ʻOku Moʻui ʻa e Folofola ʻa Sihová
Ngaahi Meʻa Mahuʻinga mei he Tohi Nehumí, Hapakuke mo Sefanaia
KUO ʻosi fakaʻauha ʻe he puleʻanga hau ko ʻAsīliá ʻa Samēlia, ʻa e kolomuʻa ʻo e puleʻanga matakali ʻe hongofulu ʻo ʻIsilelí. Ne toe fuoloa pē foki ʻa e hoko ʻa ʻAsīlia ko e fakamanamana ki Siutá. ʻOku ʻi ai ha pōpoaki ʻa e palōfita mei Siuta ko Nēhumí ʻo fekauʻaki mo e kolomuʻa ʻo ʻAsīlia ko Ninivé. ʻI hono hiki ki muʻa ʻi he 632 K.M., ʻoku ʻi he tohi Nehumí ʻa e pōpoaki ko iá.
Ko e puleʻanga hau hono hoko ʻe ʻalu haké ko e ʻEmipaea Pāpiloné, ʻa ē naʻe faʻa puleʻi ʻi he taimi ʻe niʻihi ʻe he ngaahi tuʻi Kalitiá. Ko e tohi Hapakuké, ʻa ia naʻe fakakakato nai ʻi he 628 K.M., ʻoku tomuʻa tala ai ʻa e founga ʻe ngāueʻaki ai ʻe Sihova ʻa e puleʻanga hau ko iá, ko ʻene fakafofonga ki hono fakahoko ʻa e fakamāú pea mo e meʻa ʻe iku ki ai ʻa Pāpiloné.
Naʻe kikite ʻa e palōfita Siuta ko Sefanaiá ki muʻa ia ʻia Nēhumi mo Hapakuke. ʻI hono tomuʻa kikiteʻi laka hake ʻi he taʻu ʻe 40 ki muʻa ke fakaʻauha ʻa Selusalema ʻi he 607 K.M., ʻokú ne talaki ha pōpoaki fakaefakaʻauha pea mo e ʻamanaki ki Siuta. ʻOku ʻi he tohi Sefanaiá foki ʻa e ngaahi pōpoaki fakaefakamaau ki he ngaahi puleʻanga kehé.
“ʻOIAUE ʻA E KOLO TOTOʻIA”
“Koe tala mamafa ki Ninive” meia Sihova ko e ʻOtuá, ʻa ia ʻoku ‘tuai ki he houhau, mo lahi i he malohi.’ Neongo ko Sihová “koe hufaga malohi ia i he aho oe mamahi” ki he faʻahinga ʻoku nau kumi hūfanga kiate iá, ʻe fakaʻauha ʻa Ninive.—Nehumi 1:1, 3, 7, PM.
“[ʻE liliu pe fakafoki] e Jihova ae nāunāu o Jekobe.” Kae kehe, hangē ko e “haehae e he laione” ha meʻa, kuo fakamanamanaʻi ʻe ʻAsīlia ʻa e puleʻanga ʻo e kakai ʻa e ʻOtuá. ʻE ‘tutu ʻe Sihova ae gaahi saliote ʻa Ninivé i he ahu, bea e fakaauha e he heletaá ʻa ʻene faga laione muí.’ (Nehumi 2:2, 12, 13, PM) “ʻOiaue ʻa e kolo totoʻia”—ʻa Ninive. “Ko ia kotoa pe ʻoku fanongo ki he ongoongo kiate [ia] te ne pasipasi nima” mo fiefia.—Nehumi 3:1, 19.
Tali ki he Ngaahi Fehuʻi Fakatohitapú:
1:9—Ko e hā ʻene ʻuhinga ki Siuta ʻa e “fakangata ʻaupito” ʻo Ninivé? ʻE ʻuhinga iá ko e fakatauʻatāina tuʻuloa mei ʻAsīlia; “ʻe ʻikai ke hoko tuʻo ua ʻa e ʻefihia” pe mamahí. ʻI he fakamatala ʻo hangē ia ne ʻikai ke toe ʻi ai ʻa Ninivé, ʻoku tohi ʻa Nēhumi: “Vakai ʻi he ngaahi funga moʻunga ʻa siʻi vaʻe ʻo e talaongoongolelei, ʻo ia ʻoku fakaha ʻa e melino! ʻE Siuta, fai hoʻo ngaahi katoanga.”—Nehumi 1:15.
2:6—Ko e hā ʻa e “ngaahi matapa ʻo e ngaahi vaitafe” naʻe fakaavá? Ko e ngaahi matapā ko ení ʻoku ʻuhinga ia ki he ava ʻi he ngaahi ʻā ʻo Ninivé koeʻuhi ko e ngaahi vai mei he Vaitafe Taikilisí. ʻI he 632 K.M. ʻi he taimi naʻe fakatūʻuta ai ʻi Ninive ʻa e kau tau fakatahataha ʻa Pāpilone mo Mītiá, naʻe ʻikai te ne fuʻu ongoʻi teteki. ʻI he ongoʻi malu ʻi loto ʻi hono ngaahi ʻā māʻolungá, naʻá ne fakakaukau ko ha kolo ia ʻe ʻikai ala fai ha hū ange ki ai. Kae kehe, naʻe fakatupunga ʻe he ngaahi ʻuha lōvaí ke hake ʻa e vaitafe Taikilisí. Fakatatau ki he faihisitōlia ko Tiotolusí, naʻe hoko ai ʻeni ʻo “tāfea ha konga ʻo e koló pea holo hifo ai ha konga ʻo e ngaahi ʻaá.” Naʻe ava hake ai ʻa e ngaahi matapā ʻo e vaitafé, pea hangē ko ia ne tomuʻa talá, naʻe fakaʻauha vave ʻa Ninive ʻo hangē ko ha afi ʻokú ne keina ha veve mōmoá.—Nehumi 1:8-10.
3:4—Naʻe anga-fēfē ʻa e hangē ʻa Ninive ha paʻumutú? Naʻe kākaaʻi ʻe Ninive ʻa e ngaahi puleʻangá ʻaki ʻa e talaʻofa ange kia kinautolu ʻa e vā fakakaungāmeʻa mo e tokoni ka ko e meʻa pē ne nau maʻu mei aí ko e ʻioke ʻo e faingataʻaʻia. Ko e fakatātaá, naʻe kiʻi tokoni ʻa ʻAsīlia ki he Tuʻi Siuta ko ʻĀhasí ke hao mei he faʻufaʻufono ʻa e ongo puleʻanga ʻo Sīlia mo ʻIsilelí. Kae kehe, ne iku ʻo ‘haʻu kia ʻĀhasi ʻa e Tuʻi Asiliá ʻo ne fakafaingataʻaʻia ia.’—2 Kalonikali 28:20.
Ngaahi Lēsoni kia Kitautolu:
1:2-6. Ko hono sāuni ʻe Sihova ʻa hono ngaahi filí, ʻa ia ʻoku nau fakafisi ke līʻoa kakato kiate iá, ʻoku fakahaaʻi ai ʻokú ne ʻamanekina ʻa e līʻoa maʻataʻatā kakato mei heʻene kau lotú.—Ekisoto 20:5.
1:10. Ko e ngaahi ʻā lalahi mo e ngaahi taua ʻe laui ngeaú naʻe ʻikai ke taʻofi ai ʻa hono fakahoko ʻa e folofola ʻa Sihova ki Ninivé. Ko e ngaahi fili ʻo e kakai ʻa Sihová he ʻaho ní heʻikai malava ke nau hao ʻi he ngaahi fakamaau tamaki ʻa e ʻOtuá.—Palovepi 2:22; Taniela 2:44.
“KO E MAʻONIʻONI TE NE MOʻUI”
Ko e ʻuluaki ongo vahe ʻo e tohi Hapakuké ko ha fetalanoaʻaki ia ʻi he vahaʻa ʻo e palōfitá mo Sihova ko e ʻOtuá. ʻI he mamahi ʻi he meʻa ʻoku lolotonga hoko ʻi Siutá, ʻoku ʻeke ange ʻe Hapakuke ki he ʻOtuá: “Ko e ha ʻoku ke tuku ai ke u sio ki he kovi? pea ke moʻu vakaia ʻe koe ʻa e fakamamahi?” ʻI he tali angé, ʻoku pehē ʻe Sihova: “ʻOku ou fokotuʻu ʻa e kau Kalitia, ʻa e puleʻanga angafitaʻa mo ʻoho.” ʻOku ʻohovale ʻa e palōfitá ʻi hono ngāueʻaki ʻe he ʻOtuá ʻa e “faʻahinga kākā” ke nau tauteaʻi ʻa Siuta. (Hapakuke 1:3, 6, 13) ʻOku fakapapauʻi ange kia Hapakuke ʻe moʻui ʻa e māʻoniʻoní, ka heʻikai ke ʻalu taʻetautea ʻa e filí. ʻIkai ngata aí, ʻoku hiki ʻe Hapakuke ʻa e ʻoiauē ʻe nima ʻe taaʻi ʻaki ʻa e fili ko e kau Kalitiá.—Hapakuke 2:4.
ʻI ha lotu ki he mēsí, ʻoku fakalau ai ʻe Hapakuke ʻi he “fasi fakalotomafana” pe taʻanga fakamamahi ʻa e ngaahi fakahāhā ʻi he kuohilí ʻo e mālohi fakaofo ʻo Sihová ʻo hangē ko ia ʻi he Tahi Kulokulá, ʻi he toafá, pea ʻi Sielikō. ʻOku toe tomuʻa tala ʻe he palōfitá ʻa e laka atu ʻa Sihova ʻi heʻene houhaú ke faifakaʻauha ʻi ʻĀmaketone. ʻOku fakaʻosiʻaki ʻe he lotú ʻa e ngaahi lea ko ení: “Ko Sihova Atonai ʻa hoku malohinga, pea kuo ne ʻai hoku vaʻe ke hange ko e motuʻa tia, pea ʻoku ne fakahaʻele au ʻi hoku ngaahi potu maʻolunga.”—Hapakuke 3:1, 19.
Tali ki he Ngaahi Fehuʻi Fakatohitapú:
1:5, 6—Ko e hā naʻe ngali taʻetui ai ʻa e kau Siú ki hono fokotuʻu ʻa e kau Kalitiá ke fakaʻauha ʻa Selusalemá? ʻI he taimi naʻe kamata kikite ai ʻa Hapakuké, naʻe hoko ʻa Siuta ia ʻo tākiekina mālohi ʻe ʻIsipite. (2 Tuʻi 23:29, 30, 34) Neongo naʻe fakaʻaʻau ke mālohi ange ʻa Pāpilone, naʻe teʻeki ai ke ikuʻi ʻe heʻenau kau taú ʻa Felo Neko. (Selemaia 46:2) ʻIkai ngata aí, naʻe ʻi Selusalema ʻa e temipale ʻo Sihová, pea naʻe pule mei ai ʻa e laine tuʻi ʻo Tēvitá ʻo ʻikai ha fakafaingataʻaʻiaʻanga. Ki he kau Siu ʻi he taimi ko iá, ko e “ngaue” ʻa e ʻOtuá ki hono fakaʻatā ko ia ʻa e kau Kalitiá ke nau fakaʻauha ʻa Selusalemá ʻe hā taʻemalava ia. Kae kehe, tatau ai pē ʻene hā taʻemalava ʻa e ngaahi lea ʻa Hapakuké kia kinautolú, ko e vīsone ʻo kau ki hono fakaʻauha ʻa Selusalema ʻe he kau Pāpiloné naʻe “pau” ʻene hokó ʻi he 607 K.M.—Hapakuke 2:3.
2:5—Ko hai ʻa e tangata “toʻa” pea ko e hā ʻe “ʻikai [ai] te ne manofo” pe aʻusia ʻene taumuʻá? Ko e kau Pāpiloné, ʻa ia naʻa nau ngāueʻaki ʻenau pōtoʻi fakakautaú ke ikuʻiʻaki ʻa e ngaahi puleʻangá, ko ha “toʻa” faʻu fetuiaki ia. Ko hono aʻusia ʻa e ikuná naʻe ʻai ai ia ke hangē ha tokotaha ʻoku konā ʻi he uaine. Kae kehe, heʻikai te ne lavameʻa ʻi hono tānaki mai kiate ia ʻa e ngaahi puleʻangá kotoa, koeʻuhi ʻe ngāueʻaki ʻe Sihova ʻa e kau Mītiá mo e kau Pēsiá ke fakatupunga ʻene toó. Ko e tangata faʻu fetuiaki ʻi onopōní ʻoku faʻuʻaki ia ʻa e ngaahi mafai fakapolitikalé. ʻOku kau mo ia foki ʻi he konā ʻi he falala pē kia kitá mo e loto-hīkisiá pea ʻokú ne havala ke toe fakalahi atu ia. Ka ʻoku ʻikai ke ne aʻusia ʻene taumuʻa ko hono “tanaki mai kiate ia ʻa e ngaahi puleʻanga kotoa.” Ko e Puleʻanga pē ʻo e ʻOtuá te ne fakafāʻūtahaʻi ʻa e faʻahinga ʻo e tangatá.—Mātiu 6:9, 10.
Ngaahi Lēsoni kia Kitautolu:
1:1-4; 1:12–2:1. Naʻe ʻeke ʻe Hapakuke ʻa e ngaahi fehuʻi loto-moʻoni, pea naʻe tali ange ʻa Sihova kiate ia. ʻOku fanongo ʻa e ʻOtua moʻoní ki he ngaahi lotu ʻa ʻene kau tamaioʻeiki faitōnungá.
2:1 (PM). ʻI he hangē ko Hapakuké, ʻoku totonu ke tau nofoʻaki ʻāʻā mo longomoʻui fakalaumālie. ʻOku totonu ke tau toe mateuteu ke feʻunuʻaki ʻetau fakakaukaú ke fehoanaki mo ha ‘valoki’ pe fakatonutonu ʻe fai mai nai kia kitautolu.
2:3; 3:16. ʻI heʻetau tatali ʻi he tui ki he hoko mai ʻa e ʻaho ʻo Sihová, ʻai ke ʻoua naʻa mole ʻetau ongoʻi ʻoku fakavavevavé.
2:4. Ke hao ʻi he ʻaho ʻoku tuʻunuku mai ʻo e fakamaau ʻa Sihová, kuo pau ke tau kātaki faitōnunga.—Hepelu 10:36-38.
2:6, 7, 9, 12, 15, 19. ʻOku papau ʻa e hoko ʻa e ʻoiauē ki he tokotaha ʻoku mānumanu ke maʻu koloa taʻetotonú, ʻofa ki he fakamālohí, fai ʻa e ʻulungāanga taʻetāú, pe kau ʻi he tauhi ʻaitolí. Kuo pau ke maluʻi kitautolu ke tau fakaʻehiʻehi mei he ngaahi ʻulungāanga mo e ngaahi tōʻonga ko ení.
2:11. Kapau heʻikai ke tau fakaeʻa ʻa e fulikivanu ʻo e māmani ko ení, “ʻe hua [pe kalanga] ʻa e maka.” ʻOku mahuʻinga ke tau hanganaki malangaʻi loto-toʻa ʻa e pōpoaki ʻo e Puleʻangá!
3:6. ʻE ʻikai ha meʻa te ne malava ke taʻofi ʻa Sihova ʻi heʻene fakahoko ʻene fakamāú, naʻa mo e ngaahi kautaha fakaemāmaní ʻa ē ʻoku hā ngali tolonga fuoloa ʻo hangē ko e ngaahi moʻungá mo e ngaahi foʻi māʻolungá.
3:13. ʻOku tau maʻu ʻa e fakapapau ko e fakaʻauha ʻi ʻĀmaketoné heʻikai ke fai tavale pē ia. ʻE fakahaofi ʻe Sihova ʻene kau sevāniti faitōnungá.
3:17-19. Neongo ʻe hoko mai nai kia kitautolu ʻa e faingataʻa ʻi he ki muʻa mo e lolotonga ʻa ʻĀmaketoné, ʻoku tau loto-falala ʻe ʻomai kia kitautolu ʻe Sihova ʻa e “malohinga” ʻi he hokohoko fiefia atu ʻetau tauhi kiate iá.
“OKU OFI AE AHO O JIHOVA”
ʻOku mafola ʻa e lotu Pēalí ʻi he feituʻu kotoa ʻi Siuta. ʻOku folofolaʻaki ʻe Sihova fakafou ʻi heʻene palōfita ko Sefanaiá: “Teu mafao atu . . . a hoku nima ki Juta, bea ki he kakai kotoabe o Jelusalema.” ʻOku fakatokanga ʻa Sefanaia: “Oku ofi ae aho o Jihova.” (Sefanaia 1:4, 7, 14, PM) Ko e faʻahinga pē ʻoku fehoanaki ʻenau moʻuí mo e ngaahi fiemaʻu ʻa e ʻOtuá ʻe “fufū” ʻi he ʻaho ko iá.—Sefanaia 2:3.
“ʻOiaue . . . ʻa e kolo fai fakaehaua”—ʻa Selusalema! “Mou tatali kiate au—ko Sihova ia mei he Taʻehamai—tatali ki he ʻaho o ʻeku tuʻu hake ke fai ha vete: he ko hoku totonu ke fakatefua ʻani kakai . . . ke lilingi kiate kinautolu ʻeku houhau.” Ka ʻoku talaʻofa mai ʻa e ʻOtuá: “Te u ngaohi kimoutolu ko e kakai ʻoku ongoongoa mo fakamaloʻia ʻi he ngaahi kakai ʻo mamani, ʻo kau ka fakafoki homou popula, ʻo mou sio ki ai.”—Sefanaia 3:1, 8, 20.
Tali ki he Ngaahi Fehuʻi Fakatohitapú:
2:13, 14 (PM)—Ko e “leʻo” ʻo hai ʻe toutou “hiva” ʻi Ninive ʻa ia kuo fakaʻauhamālié? Koeʻuhi ʻe hoko ʻa Ninive ko e nofoʻanga ia ki he fanga manu kaivaó mo e fanga manupuná, ko e leʻo ʻe hokohoko hivá ʻoku ʻuhinga ia ki he hiva ʻa e manupuná pea mahalo nai ki he ongo mai ʻa e havilí ʻi he ngaahi matapā sioʻata ʻo e ngaahi ʻapi kuo liʻakí.
3:9 (PM)—Ko e hā ʻa e “lea maa,” pea ʻoku anga-fēfē hono leaʻakí? Ko e moʻoni ia ʻo e ʻOtuá ʻoku maʻu ʻi heʻene Folofolá, ʻa e Tohi Tapú. ʻOku kau ai ʻa e ngaahi akonaki kotoa ʻa e Tohi Tapú. ʻOku tau leaʻaki ia ʻaki ʻa e tui ki he moʻoní, ʻi hono akoʻi totonu ia ki he niʻihi kehé, pea ʻi he moʻui ʻo fakatatau ki he finangalo ʻo e ʻOtuá.
Ngaahi Lēsoni kia Kitautolu:
1:8. Ko e niʻihi ʻi he taimi ʻo Sefanaiá ʻoku ngalingali naʻa nau feinga ke tali lelei kinautolu ʻe he ngaahi puleʻanga takatakaí ʻaki hono tui ʻa e “kofu ʻa muli.” He fakavalevale moʻoni ia ki he kau lotu ʻa Sihová he ʻahó ni ke nau feinga ke fakatatau ki he māmaní ʻi he ngaahi founga meimei tatau!
1:12; 3:5, 16. Naʻe toutou fekauʻi ʻe Sihova ʻene kau palōfitá ke nau fakatokanga ki heʻene kakaí ʻo kau ki heʻene ngaahi tuʻutuʻuni fakaefakamāú. Naʻá ne fai ia neongo ko e tokolahi ʻo e kau Siú—ʻi he hangē ko e totoka ʻoku fatu ʻi he takele ʻo ha ʻaiʻanga uainé—naʻa nau nofo fiemālie ʻo nau taʻemahuʻingaʻia ʻi he pōpoakí. ʻI he ofi mai ʻa e ʻaho lahi ʻo Sihová, ʻi he ʻikai ke fakaʻatā ʻa e tōʻonga taʻemahuʻingaʻia ʻa e kakaí ke fakatupunga ‘hotau nimá ke taupe’ ʻo fakapikopiko, ʻoku fiemaʻu ke tau hanganaki talaki ʻa e pōpoaki ʻo e Puleʻangá ʻo ʻikai tuku.
2:3 (PM). Ko Sihova pē ʻe lava ke ne fakahaofi kitautolu ʻi he ʻaho ʻo ʻene houhaú. Ke kei hōifua maí, ʻoku fiemaʻu ke tau “kumi kia Jihova” ʻaki ʻa hono ako fakalelei ʻene Folofolá, ʻa e Tohi Tapú; ʻo kole ʻi heʻetau ngaahi lotú ki heʻene tatakí; pea ʻunuʻunu ofi kiate ia. Kuo pau ke tau “kumi ki he maonioni” ʻaki hono maʻu ha moʻui maʻa fakaeʻulungāanga. Pea ʻoku fiemaʻu ke tau “kumi ki he agamalu” ʻaki hono fakatupulekina ha tōʻonga anga-vaivai mo anganofo.
2:4-15; 3:1-5. ʻI he ʻaho ʻo hono fakahoko ʻe Sihova ʻa e fakamāú, ko e Puleʻanga-Haʻa-Kalisitiané mo e kotoa ʻo e ngaahi puleʻangá, ʻa ia kuo nau lōmekina ʻa e kakai ʻa e ʻOtuá, te nau aʻusia ʻa e ikuʻanga tatau ʻo hangē ko ia naʻe hoko ki Selusalema ʻi he kuonga muʻá mo e ngaahi puleʻanga takatakaí. (Fakahā 16:14, 16; 18:4-8) ʻOku totonu ke tau hokohoko taʻemanavahē atu hono talaki ʻa e ngaahi fakamaau ʻa e ʻOtuá.
3:8, 9 (PM). ʻI heʻetau tatali ki he ʻaho ʻo Sihová, ʻoku tau mateuteu ke hao ʻaki ʻa e ako ke leaʻaki ʻa e “lea maa” pea ʻi he ‘ui ki he huafa ʻo e ʻOtuá’ ʻaki hono fai ha fakatapui fakafoʻituitui kiate ia. ʻOku tau toe tauhi “uouagataha” kia Sihova ʻi he feohi mo ʻene kakaí pea ʻoatu kiate ia ʻa e “feilaulau fakafetaʻi” ko ha meʻaʻofa.—Hepelu 13:15.
“Oku Fakatootoo Mai”
Naʻe hiva ʻa e tokotaha-tohi-sāmé: “ʻOku toe siʻi pea mole ʻa ia ʻoku faikovi; ʻio te ke hakule ʻa e potu naʻe ʻi ai, ka ʻoku ʻikai.” (Sāme 37:10) ʻI heʻetau fakalaulauloto atu ki he meʻa naʻe tomuʻa tala ʻo kau ki Ninive ʻi he tohi Nehumí pea kau ki Pāpilone pea mo Siuta tafoki mei he moʻoní ʻi he tohi Hapakuké, ʻoku tau tui taʻetoeveiveiua ai ʻe hoko moʻoni ʻa e ngaahi lea ʻa e tokotaha-tohi-sāmé. Ko e hā leva ʻa e fuoloa ʻo ʻetau tatalí?
“Oku ofi ae aho lahi o Jihova,” ko e lau ia ʻa e Sefanaia 1:14 (PM). “Oku ofi ia, bea oku fakatootoo mai aubito.” Ko e tohi Sefanaiá ʻoku toe fakahaaʻi mai ai kia kitautolu ʻa e founga ʻe malava ke fufū ai kitautolu ʻi he ʻaho ko iá pea mo e meʻa kuo pau ke tau fai he taimí ni ke tau mateuteu ai ke haó. Ko e moʻoni, “ko e folofola ʻa e ʻOtua, ko e koto moʻui mo e koto malohi.”—Hepelu 4:12.
[Fakatātā ʻi he peesi 8]
Ko e ngaahi fuʻu ʻā lalahi ʻo Ninivé naʻe ʻikai te ne taʻofi hono fakahoko ʻa e kikite ʻa Nēhumí
[Maʻuʻanga]
Randy Olson/National Geographic Image Collection