Ko e Lāngilangi Lahi Ange ʻo e Fale ʻo Sihová

“Te u fakafonu langilangi ʻa e fale ni​—ko e folofola ia ʻa Sihova Sapaoti.”—HAKEAI 2:7.

 1. ʻOku anga-fēfē kaunga ʻa e laumālie māʻoniʻoní ki he tuí mo e ngāué?

LOLOTONGA ʻa e malanga mei he fale ki he falé, naʻe fetaulaki ai ʻa e taha ʻo e Kau Fakamoʻoni ʻa Sihová mo ha fefine Penitekosi naʻá ne pehē, ‘ʻOku mau maʻu ʻe kimautolu ʻa e laumālie māʻoniʻoní, ka ko kimoutolu ia ʻa e faʻahinga ʻoku fai ʻa e ngāué.’ ʻI he founga fakapotopoto, naʻe fakamatalaʻi leva kiate ia ko e tokotaha ko ē ʻokú ne maʻu ʻa e laumālie māʻoniʻoní, ʻe fakaenatula pē hono ueʻi ʻona ke fai ʻa e ngāue ʻa e ʻOtuá. ʻOku pehē ʻe Semisi 2:17: “ʻA e tui, kapau ʻoku ʻikai ke ō mo e ngaue, ʻoku mate pe ia, heʻene tuʻu taha.” ʻI he tokoni ʻa e laumālie ʻo Sihová, kuo fakatupu ai ʻe heʻene Kau Fakamoʻoní ʻa e tui mālohi, pea kuó ne ‘fakafonu langilangi hono falé’ ʻaki hono fokotuʻutuʻu kinautolu ki hono fai ʻo e ngaahi ngāue anga-tonú​—tautefito ki hono ‘fanongonongo ʻo e ongoongolelei ʻo e Puleʻangá ki māmani kotoa pē ko e fakamatala ki he ngaahi kakai kotoa pē.’ ʻI he taimi kuo lava ai ʻa e ngāué ni ki he fiemālie ʻa Sihová, ʻe “toki hoko ʻa e ngataʻanga.”​—Mātiu 24:14.

 2. (a) ʻI hono luva atu kitautolu ki he ngāue ʻa Sihová, ko e hā ʻa e tāpuaki ʻe maʻu aí? (e) Ko e hā ʻoku totonu ai ke tau fiefia pē kapau ʻoku hā “ngali tuai”?

² Mei he ngaahi lea ko ʻeni ʻa Sīsuú, ʻoku tau ʻilo ai ko ʻetau ngāue ʻi he ʻaho ní ʻe fakahanga ia ki hono malangaʻi ki he niʻihi kehé ʻa e “Kosipeli ʻo e langilangi ʻo e ʻOtua Mohu Monuʻia,” ʻa ē kuo tuku kiate kitautolú. (1 Timote 1:11) Ko e lahi ange ʻetau luva fiefia atu kitautolu ki he ngāue ʻa Sihová, ko ʻene hā ngali vave ange ia ʻa e hoko mai ʻa e ngataʻangá. ʻI he Hapakuke 2:​2, 3, ʻoku tau lau ai ʻa e ngaahi lea ʻa Sihová: “Tohi ʻa e visone, tongi ke mahino ʻi he ngaahi tohiʻanga, koeʻuhi ke lau ai pe ʻa e lele. He ʻoku sio ʻa e visone ki ha taimi atu kuo tuʻutuʻuni, pea ʻoku holi ia ke aʻu, pea ʻe ʻikai loi: kapau ʻoku ngali tuai, piki pe ki ai; he kuo pau te ne haʻu: ʻe ʻikai tuai.” ʻIo, “ʻa e visone” kuo pau ke hoko “kapau ʻoku ngali tuai.” ʻI hení, ʻi hono 83 taʻu ʻo e pule ʻa e Puleʻanga ʻo Sīsuú, ʻoku ngali ongoʻi ʻe he niʻihi ia ʻoku tau ʻi ha vahaʻa taimi ngali tuai ʻi he lolotongá ni. ʻIkai ʻoku totonu ke tau fiefia, neongo, kuo teʻeki hoko mai ʻa e ngataʻangá? Lolotonga ʻa e taʻu ʻe hongofulu ko ʻeni ʻo e 1990 tupú, ko e ngaahi fakataputapui ki he malangaʻi ʻo e ongoongo leleí kuo toʻo ia, ʻo ngali hangē ha maná, ʻi ʻIulope Hahake, ngaahi konga ʻo ʻAfilika, mo e ngaahi fonua kehé. Ko e “ngali tuai” hā mahino ko iá ʻoku fakaʻatā ai ʻa e taimi ke tānaki ai ʻa e “fanga sipi” tokolahi ange mei he ngaahi feituʻu naʻe toki fakaʻatā maí.​—Sione 10:16.

 3. Ko e hā ʻoku totonu ai ke hanga ʻe heʻetau ʻilo fakamuimui taha fekauʻaki mo e “toʻutangata ko ʻeni” ʻo ueʻi kitautolu ke tau fakavavevave ʻi he ngāue ʻa e ʻOtuá?

³ “E ʻikai tuai,” ko e lau ia ʻa e palōfitá. Naʻe pehē ʻe Sīsū ko e toʻutangata fulikivanu lolotongá ni ʻe ʻikai te nau ʻosi he mole kae ʻoua “ke hoko kotoa ʻa e ngāhi meʻa ko ia kotoa pe.” (Mātiu 24:34) ʻOku hoko ai ʻa ʻetau mahino fakamuimui taha fekauʻaki mo ʻene ngaahi leá ke ʻuhinga ko ʻetau ngāue fakamalangá ʻoku ʻikai fakavavevave ia?a Ko e ngaahi moʻoniʻi meʻá, ʻoku hā ai ʻoku mātuʻaki fepaki ia! Ko hotau toʻutangata lolotongá ʻoku uku atu ia ki ha tuʻunga fulikivanu mo e taʻefaitotonu ʻo kehe ia mei he kotoa ʻo e hisitōlia ki muʻá. (Fakafehoanaki mo Ngāue 2:40.) ʻOku totonu ke tau fakavavevave ʻi hono fai ʻetau ngāué. (2 Timote 4:2) Kātoa ʻa e ngaahi kikite fekauʻaki mo e taimi ʻo e mamahi lahí ʻoku hā ai ʻe hoko fakafokifā, fakaʻohovale, fakafufū​—hangē ha kaihaʻá. (1 Tesalonaika 5:​1-4; Fakahā 3:3; 16:15) “Ko ia ke toka teuteu ʻa kimoutolu foki: he ko e hoko mai ʻa e Fanautama ʻa Tangata ʻe fai ʻi ha taimi ʻoku ʻikai te mou ʻamanaki ai kiate ia.” (Mātiu 24:44) ʻI he fakaofi atu ʻa e toʻutangata fakaʻotuamate ko ʻeni ʻo e faʻahinga ʻo e tangatá ki he ngutungutu ʻo e fakaʻauhá, ʻoku pau heʻikai te tau fiemaʻu ke siʻaki ʻetau ʻamanaki mahuʻinga ko ia ʻo e moʻui taʻengatá ʻaki haʻatau toe foki ʻo “toe fakapelepela” ʻi he ngaahi fakalelu ʻo e māmaní!​—2 Pita 2:22; 3:10; Luke 21:​32-36.

 4. Ko e hā ʻa e tuʻunga kuo uiaki ai ki hano tokonaki fakautuutu ange ʻo e “meʻakai ʻi hono taimi totonu,” pea kuo anga-fēfē hono fakahoko ʻa e fiemaʻu ko ʻení?

⁴ ʻI he moʻoni ʻa e kikite ko ia ʻa Sīsuú, ʻi he 1914 naʻe ʻi ai ʻa e “kamataʻanga pe ʻo e langā” ʻi he hū atu ko ia ʻa e faʻahinga ʻo e tangatá ki he “fakaʻosi ʻo e kuonga.” Ko e mamahí, ngaahi fakatuʻutāmakí, mo e maumau laó kuo liuliunga ia ʻo aʻu mai ki he ʻahó ni. (Mātiu 24:​3-8, 12) ʻI he taimi tatau, kuo fekauʻi ai ʻe Sihova ʻene kalasi tamaioʻeiki anga-tonu mo potó ke tokonaki ʻa e “meʻakai” fakalaumālie “ʻi hono taimi totonu” ki he kau nofoʻanga ʻo honau Takí, ʻa Kalaisi. (Mātiu 24:​45-47) Mei hono taloní ʻi hēvani, ko e Tuʻi faka-Mīsaia ko ʻení ʻokú ne lolotonga tataki ha fuʻu polokalama fafanga fakalaumālie lahi fakaʻulia ʻi he māmaní kotoa.

“Meʻakai” Lahi ʻAupito

 5. Ko e konga tefito ʻo e “meʻakai” kuo fai ha tokanga fēfē ki ai?

⁵ Fakakaukau atu ki hono teuteu ʻo e “meʻakai.” (Luke 12:42) Ko e konga tefito ʻi he lisi ʻa e Kalisitiané ko e Folofola ʻa e ʻOtuá, ko e Tohitapú. Ke akoʻi ola lelei ʻa e Tohitapú, ko ha fiemaʻu tefito ia ke ʻi ai ha liliu ʻoku totonu mo faingofua ke laú. ʻI he tukuʻau mai ʻa e ngaahi taʻú, naʻe fakahoko fakalakalaka ai ʻa e fiemaʻu ko ʻení, ʻo kamata tautefito ʻi he 1950 ʻi he taimi naʻe tuku ange mai ai ʻi he lea faka-Pilitāniá ʻa e New World Translation of the Christian Greek Scriptures. ʻI he 1961 naʻe hoko ʻo ala maʻu ai ʻa e New World Translation ʻo e Tohitapú kotoa, pea naʻe vave ʻa e hā ʻa hono ngaahi tatau ʻi he ngaahi lea tefito kehé. Ko e ngaahi voliume ko ia ʻe 3 naʻe tuku ange he lolotonga ʻa e taʻu fakangāue ʻo e 1996 ne aʻu ai hono lahí kotoa ki he 27, ʻa ia ko e 14 ai ko e Tohitapú kakato. Ke lava ʻo fakahoko ʻa e ngāue ko ʻeni ʻi he Tohitapú, pea pehē ki he ngaahi tokoni ki he Tohitapú, ko ha kau Kalisitiane ʻosi fakatapui ʻe 1,174 nai ʻoku nau lolotonga ngāue taimi-kakato ʻi he liliu leá ʻi he ngaahi fonua ʻe 77.

 6. Kuo fakalato fēfē ʻe he Sōsaietí ʻa e fiemaʻu ko ia ki he ngaahi tohi faka-Tohitapú?

⁶ ʻI hono pouaki ʻo e ngāue ʻa e fuʻu kau liliu ko ʻení, kuo tokonaki ai ʻe he ngaahi vaʻa pulusi ʻe 24 ʻo e Sōsaieti Taua Leʻó ʻa e ngaahi tohí ʻo toe fuʻu lahi ange. ʻI he aʻu mai ki hení, kuo hokohoko atu hono fokotuʻu fakalahi mai ʻa e ngaahi mīsini pulusi lōtali oma ʻi he ngaahi vaʻa lalahí. Ko hono tokonaki ko ia ʻo e ngaahi makasini Taua Leʻo mo e Awake! kuo tupulaki ia ʻi he māhina ki he māhina, ʻo aʻu ki he lahi fakakātoa ko e ngaahi tatau ʻe 943,892,500, ʻa ia ko e tupu pēseti ʻe 13.4 ia ki he taʻú. Ko e lahi fakakātoa kuo tokonaki ʻi he ngaahi Tohitapú mo e ngaahi tohi takafi fefeká ʻi Finilaní, Kōlea, Mekisikou, Pelēsila, Siamane, Siapani, ʻĪtali, mo e ʻIunaite Sēteté pē kuo tupu ia ʻaki ʻa e pēseti ʻe 40 mei he 1995 ki he ngaahi tatau ʻe 76,760,098 ʻi he 1996. Naʻe toe fai foki ʻe he ngaahi vaʻa kehé mo ha fuʻu tokoni lahi ki he fakalūkufua ko ia ʻo e tupu ʻi hono tokonaki ʻo e ngaahi tohí.

 7. ʻOku anga-fēfē ʻa e hoko ʻa e Aisea 54:2 ʻo fakavavevave lahi ange ʻi he taimi ní?

⁷ Ko e lahi ʻo e tupú naʻe malava ia ʻi he lolotonga ʻa e 1990 tupú ʻi hono toʻo atu ko ia ʻa e ngaahi fakataputapui ki he Kau Fakamoʻoni ʻa Sihová ʻi ʻIulope Hahake mo ʻAfiliká. Ko e fiekaia ki he meʻakai fakalaumālié ʻoku hulu fau ia ʻi he ngaahi feituʻú ni. Ko ia ko e ui ʻoku fakaongo atu mo toe fakavavevave angé: “Fakalahi ʻa e tuʻunga ʻo ho teniti; pea ko e ngaahi tupenu ʻo ho fuʻu nofoʻanga, tuku ke nau falo atu; ʻoua ʻe taʻofi: fakaloloa hoʻo ngaahi maea, pea hunuki ke maʻu ho ngaahi faʻo.”​—Aisea 54:2.

 8. Ko e hā ʻa e tali loto-fiefoaki kuo tokoni ki hono ʻomai ʻa e poupou fakaepaʻangá?

⁸ Ko ia, kuo taau ai ke fakalahi ʻa e ngaahi nāunaú ʻi he konga lahi ʻo e ngaahi vaʻa ko ia ʻe 104 ʻo e Sōsaietí. Koeʻuhi ko e faingataʻa ʻa e tuʻunga fakaʻikonōmiká ʻi he ngaahi feituʻu lahi naʻe toki fakaʻataá, ko e konga lahi ʻo e fakamole ki he fakalahi ko ʻení ʻoku fua ia ʻe he ngaahi meʻaʻofa ki he ngāue ʻi māmani lahí ʻi he ngaahi fonua tuʻumālie angé. Ko e meʻa fakafiefiá, ko e ngaahi fakatahaʻangá mo e tokotaha tāutaha kuo nau tali loto-ʻaufuatō ʻi he laumālie ʻo e Ekisoto 35:21: “Pea naʻa nau haʻu, ʻakinautolu kotoa pe naʻe oʻi ʻe honau loto, mo kinautolu naʻe fakalotolelei ʻe honau laumalie, ʻo nau ʻomi ʻenau meʻaʻofa kia Sihova.” ʻOku mau maʻu ʻa e faingamālie ko ʻení ke fakamālō atu ai kiate kimoutolu kotoa pē kuo kau mai ki he foaki loto-fiefoaki ko ʻení.​—2 Kolinito 9:11.

 9. ʻOku anga-fēfē hono fakahoko ʻi he ʻahó ni ʻa e Loma 10:​13, 18?

⁹ Lolotonga ʻo e 1996 ko e ngaahi tohi ʻa e Sōsaieti Taua Leʻó kuo nau fakalāngilangiʻi moʻoni ʻa e huafa mo e ngaahi taumuʻa ʻa Sihová ʻo aʻu ki he ngataʻanga ʻo e māmaní. ʻOku hangē tofu pē ia ko hono tomuʻa tala ʻe he ʻaposetolo ko Paulá. ʻI hono toʻo mei he kikite ʻa Sioelí mo e Sāme 19, naʻá ne tohi: “He ʻilonga ʻa ia ʻe tautapa ki he huafa ʻo e ʻEiki ʻe fakamoʻui. ʻOua koā. Naʻa kuo ʻikai te nau fanongoa. ʻIsa, kuo ongo atu honau leʻo ki he fonua kotoa: Mo ʻenau ngaahi lea ki he ngataʻanga ʻo mamani.” (Loma 10:​13, 18) ʻI hono fakahīkihikiʻi peheʻi ʻa e huafa mahuʻinga ko e Sihová, kuo kau mahino ai ʻene kakaí ki hono fakafonu hono fale faiʻanga lotú, ʻaki ʻa e lāngilangi. Ka, kuo anga-fēfē leva, ʻa e tupulaki ʻa e fanongonongó ni he lolotonga ʻo e 1996? Kātaki ʻo sio ki he saati ʻi he peesi 18 ki he 21 ʻo e Watchtower faka-Pilitānia ʻo Sanuali 1, 1997.

Ututaʻu ʻi Māmani Lahi

10. Ko e hā ʻa e ngaahi tafaʻaki tuʻu-ki-muʻa ʻokú ke fakatokangaʻi ʻi he ngāue ʻa e kakai ʻa Sihová, ʻa ia ʻoku hā ʻi he saati ʻi he peesi 18 ki he 21 ʻo e Watchtower faka-Pilitānia ʻo Sanuali 1, 1997?

¹⁰ Kuo teʻeki ha taimi ʻe hangē ko ʻení ʻi he hoko mālohi ange ai ʻa e ngaahi lea ko ia ʻa Sīsū ʻi he Luke 10:2: “Kuo lahi ʻa e taʻu kuo motuʻu, ka ʻoku kaungatāmaki ʻa e kau ngāue: ko ia ke mou kole ki he ʻEiki ʻoku aʻana ʻa e taʻu, ke ne kouna atu mo ha kau ngāue ke utu ʻene taʻu.” ʻOkú ke tali ʻa e ui ko iá? ʻOku tali ia ʻe he laui miliona ʻi he māmaní. ʻOku fakamoʻoniʻi ʻeni ʻi he tumutumu foʻou ko ia ko e toko 5,413,769 ʻo e kau malangaʻi ʻo e Puleʻangá ʻa ia naʻa nau līpooti ʻi he malaʻe malangá ʻi he 1996. Tānaki atu ki aí, ko e ngaahi tokoua mo e tuofāfine foʻou ʻe 366,579 naʻe papitaisó. He koloaʻia ē ka ko kitautolu ʻi he “ngaahi meʻa manakoa mei he puleʻanga kotoa pē,” ʻa ia ʻoku nau kau ʻi he lolotongá ni ʻi hono ‘fakafonu ʻa e fale faiʻanga lotu ʻo Sihová ʻaki ʻa e lāngilangi’!​—Hakeai 2:​7, NW.

11. Ko e hā ʻoku ʻi ai ai ʻa e ʻuhinga kiate kitautolu kotoa ke hulu ʻetau fiefiá?

¹¹ Ko e ngaahi līpooti ʻo e tupu ʻi he ngaahi feituʻu naʻe toki fakaʻatā foʻoú ʻoku ʻikai fakasiʻia hono fakaofó. ʻOku ʻi ai ha niʻihi ʻiate kitautolu ʻoku meheka ki he faʻahinga ko ia ʻoku nau lolotonga fiefia ʻi ha tupu pehē? ʻI hono kehé, ʻoku tau kaungā-fiefia mo kinautolu. Ko e fonua kotoa pē naʻe ʻi ai honau ngaahi kamataʻanga siʻisiʻi. Ko e toʻu palōfita fakataha ʻo Hakeaí, ʻa Sākalaia, naʻá ne tohi: “Ko hai ia ʻoku ne taʻetokaʻi ʻa e ʻaho ʻo e ngaahi meʻa siʻi?” (Sakalaia 4:10) ʻOku tau fiefia ʻaupito he ko e ngaahi fonua ʻoku tuʻu lelei ai ʻa e ngāue fakamoʻoní, ʻoku laui miliona ai ʻa e kau malangaʻi ʻo e Puleʻangá, pea ʻoku toutou ʻosiki maʻu pē ʻa e feituʻú, naʻa mo e uike kotoa pē ʻi he ngaahi kolo lalahi lahi. ʻOku ʻi ai ha ʻuhinga ke fakavaivai ai hotau nimá lolotonga ʻoku fakalahi ʻe Sihova he taimí ni ʻa e faingamālie ki he fakamoʻuí ʻi he ngaahi feituʻu naʻe faingatāmaki ki muʻá? ʻIkai ʻaupito! “Ko e ngoue ko māmani,” ko e lea ia ʻa Sīsuú. (Mātiu 13:38) Ko ha fakamoʻoni fakaʻauliliki kuo pau ke hokohoko fai, ʻo hangē pē ko hono fai ʻe he muʻaki kau ākongá ha fakamoʻoni fakaʻauliliki ʻi he fakaʻosiʻosi ko ia ʻa e ngaahi meʻa ʻo e fokotuʻutuʻu faka-Siú.​—Ngāue 2:40; 10:42; 20:24; 28:23.

Laka Ai Pē ki Muʻa

12. Ko e hā ʻa e fakaʻaiʻai ʻoku tau maʻu ke laka “fakahagatonu atu be”? (Toe sio ki he puha, “Ututaʻu ‘mei he Ngataʻanga ʻo e Māmani.’”)

¹² ʻIo, kuo pau ke tau laka fakataha, ʻo laka “fakahagatonu atu be” mo e saliote fakaʻāngelo fakalangi ʻa Sihová. (Isikeli 1:​12, PM) ʻOku tau manatu ai ki he ngaahi lea ʻa Pitá: “Talaʻehai ko ʻene fai tuai ʻa e ʻEiki ʻi heʻene talaʻofa, ʻo hange ko e lau tuai ʻe he niʻihi, ka ko ʻene angamokomoko pe kiate kimoutolu, mo e ʻikai te ne finangalo ke ʻauha ha taha, ka ke aʻusia ʻa e fakatomala ʻe he kakai kotoa pe.” (2 Pita 3:9) ʻAi ke hanga ʻe he faʻifaʻitakiʻanga ʻo e faivelenga ʻa hotau ngaahi tokoua ʻi he ngaahi fonua masiva fakaʻikonōmiká ʻo fakaʻaiʻai kitautolu. Ka ʻi ai ha ngali tuai ʻe hā ʻi he taimi ʻe hoko ai ʻa ʻĀmaketoné, ko hono fakaʻatā ia ke fakatahatahaʻi ʻa e laui kilu ʻi he ngaahi fonua ko ʻení pea pehē ki he tokolahi mei he ngaahi feituʻu kuo ngāueʻi leleí. ʻOua naʻá ke maʻu hala ai: “Oku ofi ae aho lahi o Jihova, io, oku ofi ia, bea oku fakatootoo mai aubito.” (Sefanaia 1:​14, PM) ʻOku totonu ke ʻi ai mo e fakatoʻotoʻo ʻiate kitautolu foki ʻi hono fai ha fakamoʻoni fakaʻauliliki fakaʻosi!

13, 14. (a) Ko e hā ʻe lava ke leaʻaki fekauʻaki mo hono tufaki ʻo e ngaahi tohí he lolotonga ʻo e 1996? (e) Ko e hā ʻa e ngaahi palani makehe ʻe ala fai ʻe he ngaahi fakatahaʻangá ʻi he taʻu taki taha, pea ʻe anga-fēfē haʻo palani ke kau ki ai?

¹³ Neongo ʻoku ʻikai ʻasi ʻa e fakaikiikí ia ʻi he saati ngāué, kuo ʻi ai ha tupu ʻilonga ia ʻi hono tufaki ʻo e ngaahi Tohitapú, ngaahi tohí, mo e ngaahi makasiní he lolotonga ʻo e taʻu kuo maliu atú. Ko e fakatātaá, ko e ngaahi makasini kuo tufaki ʻi māmani lahí naʻe hā ai ha tupu peseti ʻe 19, ʻa ia ko e ngaahi tatau fakakātoa ʻe 543,667,923 naʻe tufakí. Ko ʻetau ngaahi makasiní ʻoku nau fakafaingofuaʻi ʻa e malanga ngaofengofuá​—ʻi he ngaahi halá, ʻi he ngaahi paʻaké, ʻi he ngaahi tauʻanga pasí, ʻi he ngaahi feituʻu pisinisí. Ko e ngaahi līpootí ʻoku hā ai ko e ngaahi feituʻu ʻe niʻihi ne hakeʻuta ai hono malangaʻi ʻo e Puleʻangá, kuo fakamānako ai ki he kakai tuʻu-ki-muʻá ʻa e lelei ʻo ʻetau ngaahi makasiní pea ʻoku nau tali ʻa e ngaahi ako Tohitapú.

¹⁴ ʻI he taʻu taki taha lolotonga ʻa e māhina ko ʻEpelelí, ʻoku faʻa fokotuʻutuʻu ai ʻe he ngaahi fakatahaʻangá ha ngāue fakamakasini makehe, ʻo fai ia ʻi ha ʻaho kakato mei he fale ki he fale mo e ngaahi feituʻu fakapuleʻangá. ʻE kau heni hoʻo fakatahaʻangá ʻi he lolotonga ʻo ʻEpeleli 1997? Kuo ʻosi teuteu ha ngaahi tatau tuʻu-ki-muʻa ʻo e Taua Leʻo mo e Awake! ʻo ʻEpeleli, pea ko hona fakaʻaliʻali taimi taha ʻi māmani lahí, ʻoku totonu ke mātuʻaki ʻilonga! ʻI he motu ko Saipaló, ko e ngaahi fakatahaʻangá, ʻi he tauhi ki heʻenau taumuʻá ko e “aʻu ki he tokotaha kotoa pē ʻe malavá mo e pōpoaki ʻo e Puleʻangá,” naʻa mo e muimui ki ai ʻi he māhina kotoa pē ʻaki ʻa e ngāue fakamakasini kuo taimi-tēpileʻi peheé, naʻe aʻu ai ki ha tumutumu foʻou ko e makasini ʻe 275,359 naʻe tufa ʻi he taʻú, ʻa ia ko e tupu ʻaki ia ʻa e pēseti ʻe 54.

Ngaahi Pōpoaki Fakaʻosi ʻa Hakeaí

15. (a) Ko e hā naʻe ʻomai ai ʻe Sihova ʻa e toe ngaahi pōpoaki ʻia Hakeaí? (e) Ko e hā ʻa e lēsoni ʻoku totonu ke mahino kiate kitautolu mei he pōpoaki hono tolu ʻa Hakeaí?

¹⁵ Naʻe fekauʻi ʻe Sihova ʻa Hakeai, hili ia ʻa e ʻaho ʻe 63 mei heʻene fakahā ʻa ʻene pōpoaki hono uá, mo e fanongonongo ko hono tolú ia ʻa ia ʻoku taau mo kitautolu ke tuku lotoʻi ʻi he ʻahó ni. Naʻe lea ʻa Hakeai ʻo hangē pē ko hano toki fakatoka ʻona ia ʻo e fakavaʻe ʻo e temipalé ʻe he kau Siú, ʻa ia ne nau ʻosi fakatoka ʻe kinautolu ʻi he taʻu ia ʻe 17 ki muʻa. Naʻe toe vakai ʻa Sihova kuo taau ke fai ha fakamaʻa. Kuo fakavaivai ʻa e kau taulaʻeikí mo e kakaí pea ko ia ai, kuo nau taʻemaʻa ʻi he ʻafio ʻa Sihová. ʻOku ngalingali nai kuo fakavaivai e nima ʻo ha niʻihi ʻo e kakai ʻa Sihová he ʻahó ni, naʻa mo ʻenau kau atu ʻi he ngaahi founga faʻifaʻiteliha mo fakamatelie ʻo e māmaní? ʻOku fakavavevave kiate kitautolu kotoa ke ʻai muʻa hotau lotó “mei he ʻaho ni ʻo fai hake” ʻi hono ʻomi ʻa e lāngilangi ki he huafa ʻo Sihová, ʻo falala ai pē ki heʻene talaʻofá: “ʻE kamata he ʻaho ni ʻeku fai tapuaki.”​—Hakeai 2:​10-19; Hepelu 6:​11, 12.

16. Ko e hā ʻa e “lulu” ʻoku vavé ni ke hokó, pea ʻe iku ki he hā?

¹⁶ ʻI he ʻaho tatau, ko e folofola ʻa “Sihova Sapaoti” naʻe hoko mai kia Hakeai ko hono tuʻo faá ia pea mo e fakaʻosí. Naʻá Ne ʻai ke ʻiloʻi ʻa e meʻa ʻoku kaunga ki Heʻene “lulu ʻa e langi, mo mamani,” ʻi Heʻene pehē: “Te u fulihi ʻa e taloni ʻo e ngaahi puleʻanga, pea te u fakaʻauha ʻa e malohinga ʻo e ngaahi puleʻanga ʻo e ngaahi kakai: pea te u fulihi ʻa e ngaahi saliote, mo e heka ai; pea ʻe to ʻa e fanga hoosi mo kinautolu ʻoku heka ai, ko e to ʻa é ʻi he heleta ʻo é.” (Hakeai 2:​6, 21, 22) Ko e “lulu” ʻe aʻu ia ki hono tumutumú ʻi he taimi ʻe hanga ai ʻe Sihova ʻo fakamaʻa fakakātoa ʻa e māmaní ʻi ʻĀmaketoné. ʻI he aʻu mai ki he taimi ko iá, “ko e ngaahi meʻa manakoa mei he puleʻanga kotoa pē” ʻe ʻosi hū mai ia, ke faʻu ʻaki ha uho ʻo e sōsaieti ʻo e faʻahinga ʻo e tangatá ki he maama foʻoú. Ko e ngaahi ʻuhinga ia ke fiefia ai mo ʻave ʻa e fakahīkihikí kia Sihová!​—Hakeai 2:​7, NW; Fakahā 19:​6, 7; 21:​1-4.

17. Kuo anga-fēfē hono fokotuʻu ʻa Sīsū ko e “mama sila”?

¹⁷ ʻI he fakaʻosi ʻo ʻene kikité, naʻe tohi ʻe Hakeai: “ʻI he ʻaho ko ia​—ko Sihova Sapaoti eni mei he Taʻehamai​—te u toʻo koe, siʻeku tamaioʻeiki, ko Seluipepeli . . . pea te u ʻai koe hange ko e mama sila: he kuo u fili koe​—ko Sihova Sapaoti ia mei he Taʻehamai.” (Hakeai 2:23) Ko Kalaisi Sīsū ko e Tuʻi faka-Mīsaia mo e Taulaʻeiki Lahi ʻikai fakataipe ia he taimí ni ʻa Sihová, ʻokú ne fālute fakataha ʻi hēvani ʻa e ongo fatongia kehekehe naʻe maʻu ʻe Kōvana Seluipēpelí pea mo e Taulaʻeiki Lahi ko Siosiuá ʻi he Selusalema fakaemāmaní. Hangē pē ko ha mama sila fakapuleʻanga ʻi he nima toʻomataʻu ʻo Sihová, ko Sīsū ʻa e tokotaha kuó ne hoko ʻo “ʻio” ko e meʻangāue ia ʻa Sihova ki hono ʻai ko ia ke moʻoni ʻa e ‘ngaahi talaʻofa lahi ʻa e ʻOtuá.’ (2 Kolinito 1:20; Efeso 3: 10, 11; Fakahā 19:10) Ko e pōpoaki fakaekikite fakakātoa ʻo e Tohitapú ʻoku tuhu ia ki he tokonaki ko ia ʻe Sihova ʻa Kalaisi ko e Tuʻi mo e Tokotaha-Huhuʻi fakataulaʻeikí.​—Sione 18:37; 1 Pita 1:​18, 19.

18. ʻE fakahoko fakatupuongoʻifoʻou fēfē ʻa e lea fakaʻosi ʻa “Sihova Sapaoti”?

¹⁸ ʻOku moʻoni ʻa e meʻá ni ʻi hotau ʻahó ni, ko e lāngilangiʻia lahi tahá ʻe ʻilo ia ʻi he temipale ngingila fakalaumālie ʻo Sihová! Pea ʻoku vavé ni, hili ko ia hono tafiʻi kotoa atu ʻe Sihova ʻa e fokotuʻutuʻu ʻa Sētané, ʻe fakahoko fakatupu-fiefia ai ʻa e Hakeai 2:9 ʻo toe lahi ange: “ʻI he potu ni te u ʻatu ʻa e melino​—ko Sihova Sapaoti ia mei he Taʻehamai.” Kuo melino!​—ko ha melino tuʻuloa, fakaeʻuniveesi ia, kuo fakapapauʻi ʻe he “mama sila” ʻa Sihová, ʻa Kalaisi Sīsū, ko e “ʻEiki ʻo e melino,” ʻa ē kuo tohi: “ʻE ʻikai fakangatangata ʻa e tupu o ʻene pule mo e melino . . . Ko e fuaʻa ʻa Sihova Sapaoti te ne fai ʻa e meʻa ko ia.” (Aisea 9:​6, 7) ʻO fai atu ki ʻitāniti, ko e lāngilangi ʻo e fale faiʻanga lotu ʻo Sihová ʻe tapua atu ia ki he kotoa ʻo e nofoʻanga melino ʻo hono tuʻunga-hau fakalevelevá. ʻOfa ke tau nofo maʻu ai pē ʻi he fale ko iá!​—Sāme 27:4; 65:4; 84:10.

[Fakamatala ʻi lalo]

ʻE Lava ke Ke Fakamatalaʻi?

◻ ʻOku anga-fēfē, hono “fakafonu langilangi” ʻo e fale ʻo Sihová ʻi he ʻahó ni?

◻ Ko e hā kuo ʻikai ai ha toe taimi fakavavevave ange ʻe hangē ko ʻení ki hono malangaʻi ʻo e ongoongo leleí?

◻ Ko e hā ʻa e fakaʻaiʻai ki hono fakavavevaveʻi ʻo e malangá ʻoku ʻomai ʻe he Līpooti ʻo e Taʻu Fakangāue ʻo e 1996?

◻ ʻOku anga-fēfē ʻa e ngāue ʻa Kalaisi ko e “mama sila” ʻa Sihová?

[Puha ʻi he peesi 29]

Ututaʻu “mei he Ngataʻanga ʻo Mamani”

ʻI HE Aisea 43:​6, ʻoku tau lau ai ʻa e fekau ʻa Sihová: “ʻOua ʻe taʻofi; ʻomi hoku ngaahi foha mei he mamaʻo na, mo hoku ngaahi ʻofefine mei he ngataʻanga ʻo mamani.” Ko e konga Tohitapu ko ʻení ʻoku fakahoko makehe ia ʻi ʻIulope Hahake ʻi he ʻahó ni. Ko e fakatātaá, ko e fonua ko ia naʻe Kominiusi ki muʻa ko Molotova. Kuo ʻi ai ʻa e ngaahi kolo ia ko e vaeua honau tokolahí ʻi he taimí ni ko e Kau Fakamoʻoni. Kuo pau ke nau fai ha fononga mamaʻo ke maʻu ha feituʻu ke fai ai ʻa e malangá, ka ʻoku nau feinga mālohi ki ai! Ko e tokolahi ʻo e kau malanga ʻi he ngaahi fakatahaʻanga ko ʻení ko e hako kinautolu ʻo e ngaahi mātuʻa naʻe kapusi ki Saipīlia ʻi he konga ki muʻa ʻo e 1950 tupú. ʻI he taimí ni ko honau ngaahi fāmilí ʻoku nau tamuʻomuʻa ʻi he ngāue ututaʻú. ʻI he kau malanga ko ia ʻe 12,565, ko e toko 1,917 ai naʻe papitaiso ʻi he taʻu ko ʻeni kuo maliu atú. ʻOku ʻi ai ʻa e fakatahaʻanga ʻe 43 ʻa ia ʻoku fakafuofua ki he kau malanga ʻe 150 ki he taha, pea ko e ngaahi feituʻu ngāué kuo hiki ia mei he faá ki he valu ʻi he taʻu fakangāue foʻoú.

ʻOku fakaofo foki, mo e tupu ko ia ʻi ʻAlipēniá. ʻI aí ko e kiʻi falukunga pē ʻo e Kau Fakamoʻoní naʻa nau kātekina ʻa e fakatikitato fakamamahi tahá ʻi ha taʻu nai ʻe 50. Ko e niʻihi ʻo kinautolu naʻe tāmateʻi. ʻOku fakamanatu ai heni ʻa e talaʻofa ko ia ʻa Sīsū: “ʻOua te ke manavahē ki he ngaahi mamahi ʻoku ene ke hoko kiate koe: ko eni ʻoku tei li homou niʻihi ʻe he Tevolo ki he pilisone, ko homou ʻahiʻahiʻi . . . ka ke pikitai kiate au, ʻo aʻu ki he mate, pea te u ʻatu kiate koe ʻa e kalauni ʻo e moʻui.” (Fakahā 2:10; toe sio kia Sione 5:​28, 29; 11:​24, 25.) Ko e hā ʻoku tau sio ki ai he taimí ni ʻi ʻAlipēniá? ʻOku moʻoni ko hano fakahoko fakaofo ia ʻo e talaʻofa ko ia ʻa Sihova ʻoku hā ʻi he Aisea 60:22: “Ko e kiʻi siʻi ʻe hoko ko e toko afe”! ʻI he 1990 ko e tokotaha malanga pē taha naʻe līpooti ʻoku ngāue ʻi ʻAlipēniá. Ka neongo ia, ko e “kau ngāue” tokolahi ange mei ʻĪtali mo e ngaahi fonua kehé naʻa nau tali ʻa e ui ko ia ʻa Sīsū: “Ko ia ke mou ō, ʻo ngaohi ʻa e kakai kotoa pe ko ʻeku kau ako . . . , ʻi he papitaiso kinautolu.” (Mātiu 28:19; Luke 10:2) ʻI he aʻu mai ki he Fakamanatu ʻo e pekia ʻa Sīsuú ʻi he 1996, ko e kau malanga ia ʻe 773 naʻa nau longomoʻui ʻi he malaʻé, pea ko e faʻahingá ni naʻa nau fakatahatahaʻi mai ʻa e toko 6,523 ki heʻenau ngaahi fakataha ki he Fakamanatú, ʻo lahi ange ia ʻi he liunga valu ʻo e kau malangá! Naʻe fakaʻulia mo e kau maʻu fakataha naʻe līpooti mei he ngaahi feituʻu tuʻu mavahevahé. Neongo naʻe ʻikai ke ʻi ai ha kau malanga ʻi he koló, ko e ngaahi kolo lalahi ʻo Kukës mo Divjakë naʻe fetōʻaki holo pē ʻa e kau maʻu fakatahá ia ʻi he 192 mo e 230. Ko Krujë, ʻa ia ko e tokotaha malanga pē ʻe taha ʻi aí, naʻe maʻu Fakamanatu ai ʻa e toko 212 ia. Ko e kau malanga ko ia ʻe toko 30 ʻi Korçë naʻa nau totongi ʻa e feituʻu ʻe hao ai ʻo aʻu ki he toko 300. ʻI he hili pē ʻa e fakaʻefihi atu ʻa e tokolahi ko ʻení ki he loki fanongó, naʻe pau leva ke fakafoki atu ʻa e toko 200 ia koeʻuhi naʻe ʻikai toe lava ke hao ha taha. ʻOku moʻoni ko ha ngoue ia kuo poloʻuto ki he ututaʻú!

Mei Lumēnia kuo maʻu mai mei ai ʻa e līpooti ko ʻení: “Lolotonga ʻemau fai ʻa e malanga fale-ki-he-falé, naʻa mau fetaulaki ai mo ha tokotaha naʻá ne pehē ko e taha ia ʻo e Kau Fakamoʻoni ʻa Sihová pea naʻe nofo ʻi ha kiʻi kolo ʻa ia, fakatatau ki heʻemau ʻiló, naʻe ʻikai ha Kau Fakamoʻoni ia ai. Naʻá ne talamai kiate kimautolu ʻo pehē, tukukehe ia, ʻoku toe ʻi ai mo e toko 15 kehe ʻa ia kuo taʻu lahi ʻeni ʻenau fakahoko ai ʻa e ngaahi fakataha ʻi he ngaahi ʻaho Tuʻapulelulú mo e Sāpaté, pea kuo nau ʻosi kamata ke malanga mei he fale ki he fale. ʻI he ʻaho hono hokó naʻa mau ʻalu ai ki he kolo ko iá. Naʻe talitali mai kiate kimautolu ʻi ha loki ʻe ua ʻa e toko 15 ko e kau tangata, kau fefine, mo e fānau ʻa ia naʻa nau tali ʻa e ʻū tohi ʻe 20 mo e 20 ʻi he ngaahi makasini fakamuimui tahá. Naʻa mau fakaʻaliʻali kiate kinautolu ʻa e founga ko ia hono fai ʻo e ako Tohitapú. Naʻa mau hiva fakataha pea mo tali ʻenau ngaahi fehuʻi ne fuʻu fiemaʻu fakavavevavé. Ko e tokotaha naʻe takimuʻa ʻi he kulupú ni naʻá ne vete ange ʻo pehē: ‘ʻI he ngaahi ʻaho siʻi ki muʻá, naʻá ku lotu mo tangi ai kia Sihova ke ʻomi ha tauhi-sipi, pea ko ʻeni kuo tali ʻeku lotú.’ Ne mau fuʻu fiefia ʻaupito, pea ʻi heʻemau mavahé, naʻe hangē siʻa paea liʻekina ne toki ʻilo ʻene tamaí, ʻa ʻene pehē: ‘Fakamolemole ʻoua naʻa fakangaloʻi kimautolu. Mou toe haʻu pē ʻo sio mai kiate kimautolu!’ Naʻa mau fai pehē, pea ʻi he taimí ni ko e ako Tohitapu ʻeni ʻe fitu ʻoku lolotonga fakahoko ʻi he kolo ko iá. ʻI he ngaahi vāhenga-ngāue foʻou lahi, ʻoku kamata ʻa e ngāué ʻi ha founga fakaofo ʻaki ʻa e ngaahi tohi faka-Tohitapú, ʻa ia ʻoku mātuʻaki fakahoungaʻi ʻaupito, pea ʻoku hā ai ko e ngāué ʻoku mei he matavai fakaeʻotua.”

[Fakatātā ʻi he peesi 30, 31]

Ko e “ngaahi meʻa manakoa mei he puleʻanga kotoa pē” ʻoku lolotonga fakatahatahaʻi ia ʻi he ʻOtumotu ʻo ʻŌsení (1), ʻAmelika Saute (2), ʻAfilika (3), ʻĒsia (4), ʻAmelika Noate (5), mo ʻIulope (6)