Ngaahi Vīsone ʻa Sākalaiá​—Anga ʻo ʻEne Kaunga Kiate Koé

1-3. (a) ʻI he kamata ke kikite ʻa Sākalaiá, ko e hā ʻa e tuʻunga naʻe ʻi ai ʻa e kakai ʻa Sihová? (e) Ko e hā naʻe fiemaʻu ai ʻe Sihova hono kakaí ke nau foki kiate iá?

KO HA takainga tohi ʻoku puna, ko ha fefine ʻi loto ʻi ha ʻaiʻanga meʻa, mo e ongo fefine naʻá na puna mai ʻi he matangí mo e kapakau hangē ko e kapakau ʻo e sitoaké. Ko e niʻihi eni ʻo e ngaahi vīsone fakatoʻoaloto naʻe mamata ki ai ʻa Sākalaia. (Sāk. 5:1, 7-9) Ko e hā naʻe ʻoange ai ʻe Sihova ʻa e ngaahi vīsone fakaofo ko ení ki heʻene palōfitá? Ko e hā ʻa e tuʻunga naʻe ʻi ai ʻa e kau ʻIsilelí ʻi he taimi ko iá? Pea ʻe lava fēfē ke tau maʻu ʻaonga mei he ngaahi vīsone ko ení ʻi he ʻahó ni?

² Ko e taʻu 537 ia ki muʻa ʻia Kalaisí, pea ko e kakai ʻa Sihová naʻa nau fiefia ʻaupito. Naʻe tuku pōpula kinautolu ʻi Pāpilone ʻi he taʻu lōloa ʻe 70, ka ko eni naʻa nau tauʻatāina! Naʻa nau fiefia ke foki ki Selusalema ʻo toe langa ʻa e temipalé pea lotu ai kia Sihova. ʻI he taʻu ʻe taha ki mui ai, naʻe fakatoka ai ʻe he kau ʻIsilelí ʻa e fakavaʻe ʻo e temipalé. Naʻe fiefia ʻaupito ʻa e kakaí, pea naʻa nau ‘kaikaila ʻo fuʻu leʻo-lahi pea naʻe ongo atu ia ki he mamaʻó.’ (ʻĒsela 3:10-13) Ka ko e fakafepaki ki he ngāue langá naʻe hoko ʻo toe mālohi ange. Naʻe hoko ai ʻa e kau ʻIsilelí ʻo mātuʻaki loto-siʻi pea tuku ʻenau langa ʻa e temipalé. ʻI hono kehé, naʻa nau tokangataha ki hono langa honau ngaahi ʻapí pea ngoueʻi ʻenau ngaahi ngoueʻangá. ʻI he taʻu ʻe 16 mei ai, naʻe teʻeki ai pē ke ʻosi ʻa e temipale ʻo Sihová. Naʻe fiemaʻu ha fakamanatu ki he kakai ʻa Sihová ke nau foki kia Sihova pea tuku ʻa e fakakaukau pē kiate kinautolú. Naʻe fiemaʻu ʻe Sihova ke nau lotu ange kiate ia ʻi he faivelenga mo e loto-toʻa.

³ Ko ia ʻi he taʻu 520, naʻe fekauʻi atu ai ʻe Sihova ʻene palōfita ko Sākalaiá ke ne tokoniʻi ʻa e kakaí ke nau manatuʻi ʻa e ʻuhinga naʻá Ne fakatauʻatāinaʻi ai kinautolu mei Pāpiloné. ʻOku mālié he ko e ʻuhinga eni ʻo e hingoa Sākalaiá “Kuo Manatuʻi ʻe Sihova.” Neongo naʻe ngalo ʻi he kau ʻIsilelí ʻa e meʻa naʻe fai ʻe Sihova maʻanautolú, naʻe kei manatuʻi pē kinautolu ʻe he ʻOtuá. (Lau ʻa e Sākalaia 1:3, 4.) Naʻe talaʻofa ʻe Sihova te ne tokoniʻi kinautolu ke toe fakafoki ʻa e lotu maʻá. Ka naʻá ne toe fakatokanga kiate kinautolu te ne toki tali pē ʻenau lotú kapau te nau foaki ange kiate ia ʻenau lelei tahá. Tau sivisiviʻi angé ʻa e vīsone hono ono mo hono fitu ʻa Sākalaiá. Te tau ako ai ʻa e founga ʻo hono ueʻi ʻe Sihova ʻa e kau ʻIsilelí pea mo e founga ʻe lava ke tokoniʻi ai ʻe he ongo vīsone ko ení kitautolu ʻi he ʻahó ni.

 4. Ko e hā naʻe sio ki ai ʻa Sākalaia ʻi heʻene vīsone hono onó? Ko e hā naʻe fai ai ʻa e tohi ʻi he ongo tafaʻaki fakatouʻosi ʻo e takainga tohí? (Sio ki he ʻuluaki fakatātā ʻi he kupú ni 1.)

⁴ Ko e vahe 5 ʻo e tohi Sākalaiá ʻoku kamata ia ʻaki ha vīsone anga-kehe. (Lau ʻa e Sākalaia 5:1, 2.) Naʻe mamata ʻa Sākalaia ki ha takainga tohi ʻoku puna ʻi he ʻeá. Ko e takainga tohí ni naʻe meimei mita ʻe 9 (fute ʻe 30) hono lōloá pea mita ʻe 4.5 (fute ʻe 15) hono fālahí. Naʻe fakaava ʻa e takainga tohí, pea naʻe hiki ai ha pōpoaki. (Sāk. 5:3) Ko hā pōpoaki mafatukituki ia ʻo e fakamaau. ʻI he kuonga muʻá, naʻe faʻa faitohi ai ʻa e kakaí ʻi he tafaʻaki pē ʻe taha ʻo ha takainga tohi. Ka ko e pōpoakí ni naʻe mātuʻaki mahuʻinga he naʻe fai ʻa e tohi ʻi he ongo tafaʻaki fakatouʻosi ʻo e takainga tohí.

5, 6. ʻOku anga-fēfē ongoʻi ʻa Sihova fekauʻaki mo ha faʻahinga kaihaʻa pē?

⁵ Lau ʻa e Sākalaia 5:3, 4. Ko e faʻahinga kotoa ʻo e tangatá te nau fai ha fakamatala ki he ʻOtuá ʻi heʻenau ngaahi tōʻongá. ʻOku tautefito ʻene moʻoni eni ʻi he kakai ʻa Sihová, he ʻoku uiʻaki kinautolu ʻa hono huafá. ʻOku nau ʻofa kiate ia pea ʻiloʻi ko e kaihaʻá ʻoku fakamaaʻi ai ʻa hono huafá. (Pal. 30:8, 9) ʻOku fakakaukau nai ʻa e kakai ia ʻe niʻihi ʻoku ʻikai hala ke kaihaʻa kapau ʻoku ʻi ai haʻanau ʻuhinga lelei ki ai. Kae tatau ai pē pe ʻoku hā ngali lelei ʻa e ʻuhingá, ko ha tokotaha ʻoku kaihaʻa ʻokú ne fakahaaʻi ko ʻene holi mānumanú ʻoku mahuʻinga ange ia kiate ia ʻia Sihova, ko Hono huafá, mo ʻEne laó.

⁶ Naʻá ke fakatokangaʻi ʻoku pehē ʻi he Sākalaia 5:3, 4 ko e malá ʻe “hū ia ki he fale ʻo e tokotaha kaihaʻá” pea ʻe “nofo ai pē ʻi loto ʻi he fale ko iá ʻo keina ia”? Ko ia ʻoku lava ke fakaeʻa ʻe Sihova peá ne fakamāuʻi ha faihala pē ʻi he lotolotonga ʻo hono kakaí. Neongo kapau ʻoku lava ke fufū ʻe ha tokotaha kaihaʻa ʻa e meʻa ʻokú ne faí mei he kau polisí, kau pule ngāué, kau mātuʻá, pe mātuʻa tauhi fānaú, heʻikai lava ke ne fufū ia meia Sihova. ʻE fakapapauʻi ʻe he ʻOtuá ke fakaeʻa ha faʻahinga kaihaʻa pē. (Hep. 4:13) ʻOku tau fiefia moʻoni ʻi he feohi mo e kakai ʻoku nau fai ʻenau lelei tahá ke hoko ʻo faitotonu “ʻi he meʻa kotoa pē”!​—Hep. 13:18.

 7. ʻE lava fēfē ke tau hao mei he mala ʻi he takainga tohi ʻoku puná?

⁷ Ko ha faʻahinga kaihaʻa pē ʻoku fakalotomamahiʻi ai ʻa Sihova. Ko ha lāngilangi ia kiate kitautolu ke tau ʻiloʻi pea talangofua ki he ngaahi tefitoʻi moʻoni ʻa Sihova ʻo fekauʻaki mo e tonú pea mo e halá pea ke moʻui ʻi ha founga ʻoku ʻikai ke fakamaaʻi ai ʻa hono huafá. ʻI hono fai ení te tau hao ai mei he fakamaau ʻe fai ʻe Sihova ki he kakai ʻoku ʻikai te nau talangofua kiate iá.

8-10. (a) Ko e hā ʻa e fuakava? (e) Ko e hā ʻa e fuakava naʻe maumauʻi ʻe Tuʻi Setekaiá.

⁸ Ko hono hokó, naʻe ʻoatu ʻi he takainga tohi ʻoku puná ha pōpoaki fakaefakatokanga ki he faʻahinga ʻoku nau fai “ha fuakava loi” ʻi he huafa ʻo e ʻOtuá. (Sāk. 5:4) Ko e fuakavá ko ha fakamatala ia ʻoku fakapapauʻi ai ʻa e moʻoni ha meʻa pe ko ha palōmesi mafatukituki ia ke fai pe ʻikai ke fai ha meʻa pau.

⁹ Ke fai ha fuakava ʻi he huafa ʻo Sihová ko ha meʻa mafatukituki ʻaupito ia. ʻOku tau ʻilo eni mei he meʻa naʻe hoko kia Setekaia, ko e tuʻi fakamuimui taha naʻe pule ʻi Selusalemá. Naʻe fai ʻe Setekaia ha fuakava ʻi he huafa ʻo Sihová te ne fakamoʻulaloa ki he tuʻi ʻo Pāpiloné. Ka naʻe ʻikai ke fai ʻa Setekaia ki heʻene palōmesí. ʻI he ʻuhinga ko ení, naʻe pehē ai ʻe Sihova ko Setekaiá te ne “mate ʻi Pāpilone, ʻi he feituʻu ʻoku nofo ai ʻa e tuʻi ko ia naʻá ne fakanofo ia ko e tuʻí, ʻa e tokotaha ko ʻene fakapapaú ē naʻá ne taʻetokaʻí pea ko ʻene fuakavá ē naʻá ne maumauʻí.”​—ʻIsi. 7:16.

¹⁰ Naʻe fai ʻe Tuʻi Setekaia ʻa ʻene fuakavá ʻi he huafa ʻo e ʻotuá, pea naʻe ʻamanekina ʻe Sihova te ne fai ki ai. (2 Kal. 36:13) Ka naʻe maumauʻi ʻe Setekaia ʻa ʻene palōmesí peá ne kole ki ʻIsipite ke tokoniʻi ia ke ne ʻatā mei Pāpilone. Neongo ia, naʻe ʻikai lava ke tokoniʻi ia ʻe ʻIsipite.​—ʻIsi. 17:11-15, 17, 18.

11, 12. (a) Ko e hā ʻa e palōmesi mahuʻinga taha ʻe faifai ange pea tau faí? (e) ʻOku totonu ke fēfē ʻa e kaunga ʻetau fakatapuí ki heʻetau moʻui fakaʻahó?

¹¹ Mei he meʻa naʻe hoko kia Setekaiá, ʻoku tau ʻilo ai ʻoku fanongo mai ʻa Sihova ki he ngaahi palōmesi ʻoku tau faí. Ke fakahōifuaʻi iá, kuo pau ke tau fai ki heʻetau palōmesí. (Saame 76:11) Ko e palōmesi mahuʻinga taha ʻe lava ke tau faí ko ʻetau fakatapui kia Sihova. ʻI heʻetau fakatapui kiate iá, ʻoku tau palōmesi ai te tau tauhi kiate ia ʻo tatau ai pē pe ko e hā ʻe hoko ʻi heʻetau moʻuí.

¹² ʻE lava fēfē ke tau fai ki heʻetau palōmesi kia Sihová? “ʻI he ʻaho ki he ʻaho” ʻoku ʻi ai ai hotau ngaahi ʻahiʻahi lalahi mo iiki. ʻOku tau fakahaaʻi ʻa e lahi ʻo e mālohi hotau vahaʻangatae mo Sihová ʻi he anga ʻo ʻetau fakafeangai ki he ngaahi ʻahiʻahi ko ení. (Saame 61:8) Ko e fakatātaá, ko e hā te ke fai kapau ʻe kamata fakamalinga atu kiate koe ha taha ʻi he ngāué pe ʻi he ʻapiakó? Te ke talitekeʻi ʻa e tokanga ko iá pea fakahāhā ʻokú ke loto ke talangofua kia Sihova? (Pal. 23:26) Pe fēfē kapau ko koe toko taha pē ʻi ho fāmilí ʻoku lotu kia Sihová? ʻOkú ke kole kia Sihova ke ne tokoniʻi koe ke hokohoko atu ʻa hoʻo tōʻonga ko ha Kalisitiané? Tatau ai pē pe ko e hā ʻa e tuʻunga ʻokú ke ʻi aí, ʻokú ke fakamālō kia Sihova ʻi he ʻaho kotoa pē ʻi heʻene ʻofá mo ʻene tatakí? ʻOkú ke vaheʻi ha taimi ke lau fakaʻaho ai ʻa e Tohi Tapú? Ko e moʻoni, ʻoku tau palōmesi ke fai ʻa e ngaahi meʻá ni ʻi heʻetau fakatapui ʻetau moʻuí kia Sihová. ʻI heʻetau fakatapui kiate ia pea foaki kiate ia ʻetau lelei tahá, ʻoku tau fakahaaʻi ai kia Sihova ʻoku tau ʻofa kiate ia pea ʻoku ʻaʻana kitautolu. Ko ʻetau lotú ko ha founga moʻui ia. Pea koeʻuhi ko ʻetau faitōnunga kia Sihová, ʻokú ne talaʻofa mai ha kahaʻu fisifisimuʻa kiate kitautolu.​—Teu. 10:12, 13.

13. Ko e hā ʻoku lava ke tau ʻilo mei he vīsone hono ono ʻa Sākalaiá?

¹³ Ko e vīsone hono ono ʻa Sākalaiá ʻoku tokoniʻi ai kitautolu ke tau mahinoʻi kapau ʻoku tau ʻofa kia Sihova, heʻikai ke tau kaihaʻa pe maumauʻi ʻetau ngaahi palōmesí. ʻOku tau toe ʻilo ai neongo naʻe fai ʻe he kau ʻIsilelí ʻa e ngaahi fehālaaki lahi, naʻe fai ʻa Sihova ki heʻene palōmesí pea naʻe ʻikai te ne liʻaki ʻa hono kakaí. Naʻá ne mahinoʻi naʻa nau ʻi ha tuʻunga mātuʻaki faingataʻa ʻi he takatakaiʻi kinautolu ʻe he ngaahi filí. ʻI heʻene faʻifaʻitakiʻangá tonu, ʻoku akoʻi mai ai ʻe Sihova ʻoku totonu ke tau fai ki heʻetau ngaahi palōmesí. Pea ʻe lava ke tau fakapapauʻi te ne tokoniʻi kitautolu ke tau fai pehē. Ko e founga ʻe taha ʻoku tokoniʻi ai kitautolu ʻe Sihová ko hono ʻomai kiate kitautolu ha ʻamanaki ki he kahaʻú. Kuo vavé ni ke ne fakangata ʻa e fulikivanu kotoa pē ʻi he māmaní. ʻE lava ke tau lau fekauʻaki mo e ʻamanaki ko ení ʻi he vīsone hono hoko ʻa Sākalaiá.

14, 15. (a) Ko e hā naʻe mamata ki ai ʻa Sākalaia ʻi heʻene vīsone hono fitú? (Sio ki he ʻuluaki fakatātā ʻi he kupú ni 2.) (e) Ko hai ʻa e fefine ʻi loto ʻi he ʻaiʻanga meʻá? Ko e hā naʻe silaʻi ai ʻe he ʻāngeló ʻa e ʻaiʻanga meʻá?

¹⁴ ʻI he hili ʻa e sio ʻa Sākalaia ki he takainga tohi ʻoku puná, naʻe tala ange ʻe ha ʻāngelo kiate ia: “Hanga hake.” Naʻe mamata leva ai ʻa Sākalaia ki ha ʻaiʻanga meʻa naʻe ui ko ha “efa.” (Lau ʻa e Sākalaia 5:5-8.) Ko e ʻaiʻanga meʻá naʻe ʻi ai hono tāpuni fuopotopoto naʻe ngaohi mei he pulú. ʻI hono fakaava ʻa e ʻaiʻanga meʻá, naʻe mamata ʻa Sākalaia ki ha “fefine ʻoku tangutu ʻi loto.” Naʻe fakamatalaʻi ʻe he ʻāngeló kia Sākalaia ko e fefine ʻi loto ʻi he ʻaiʻanga meʻá ko “Anga-Fulikivanu.” Sioloto atu ki he ilifia ʻa Sākalaia ʻi heʻene sio ki he feinga ʻa e fefiné ke hū ki tuʻá! Ka naʻe lī fakavave ʻe he ʻāngeló ʻa e fefiné ki loto pea silaʻi ʻa e ʻaiʻanga meʻá ʻaki ha tāpuni mamafa. Ko e hā ʻa e ʻuhinga ʻo e meʻá ni?

¹⁵ ʻOku ʻomai ʻi he vīsone ko ení kiate kitautolu ʻa e tuipau ʻe ʻikai fakaʻatā ʻe Sihova ha fulikivanu pē ke ʻi he lotolotonga ʻo hono kakaí. Kapau ʻoku ʻafio mai ʻa Sihova ki ha meʻa ʻoku kovi, te ne ngāue fakavavevave ke toʻo ia. (1 Kol. 5:13) Naʻe fakahaaʻi ʻe he ʻāngeló ʻa e meʻá ni ʻi heʻene ʻai he taimi pē ko iá ʻa e tāpuni mamafá ki he funga ʻaiʻanga meʻá.

16. (a) Ko e hā naʻe hoko ki he ʻaiʻanga meʻá? (Sio ki he ʻuluaki fakatātā ʻi he kupú ni 3.) (e) Ko fē naʻe ʻave ki ai ʻe he ongo fefine ʻoku ʻi ai hona kapakaú ʻa e ʻaiʻanga meʻá?

¹⁶ Ko hono hokó, naʻe sio ʻa Sākalaia ki ha ongo fefine naʻe ʻi ai hona kapakau mālohi hangē ko e kapakau ʻo e sitoaké. (Lau ʻa e Sākalaia 5:9-11.) Ko e ongo fefiné ni naʻá na kehe ʻaupito mei he fefine fulikivanu ʻi he ʻaiʻanga meʻá. Naʻá na hiki hake ʻaki hona kapakau mālohí ʻa e ʻaiʻanga meʻa ʻoku ʻi loto ai ʻa “Anga-Fulikivanu” peá na puna mamaʻo. Naʻá na ʻave ia ki fē? Naʻá na ʻave ʻa e ʻaiʻanga meʻá ki he “fonua ko Sainá,” ʻa ia ko Pāpilone. Ko e hā naʻá na ʻave ai ia ki aí?

17, 18. (a) Ko e hā naʻe hoko ai ʻa Pāpilone ko e ‘feituʻu totonu’ kia “Anga-Fulikivanu”? (e) Ko e hā ʻokú ke fakapapauʻi ke faí?

¹⁷ Ko e kau ʻIsileli naʻe moʻui ʻi he ʻaho ʻo Sākalaiá naʻa nau mei mahinoʻi ʻa e ʻuhinga naʻe hoko ai ʻa Pāpilone ko e feituʻu totonu ke ʻave ki ai ʻa “Anga-Fulikivanu.” Naʻa nau ʻiloʻi ko ha fuʻu kolo fulikivanu ia naʻe fonu ʻi he ʻulungaanga taʻetāú mo e lotu loí. Ko Sākalaia mo e kau Siu kehe naʻe nofo aí naʻa nau feinga mālohi ʻi he ʻaho kotoa pē ke talitekeʻi ʻa ʻene tākiekina fakapanganí. Ko ia naʻe fakapapauʻi ʻi he vīsone ko ení ʻe tauhi ʻe Sihova ke maʻa ʻa ʻene lotú.

¹⁸ Naʻe toe fakamanatu ʻi he vīsoné ki he kau Siú ko kinautolu foki naʻe ʻi ai honau fatongia ke tauhi ʻenau lotú ke maʻa. Heʻikai pea ʻe ʻikai lava ke fakaʻatā ʻa e anga-fulikivanú ke ʻi he lotolotonga ʻo e kakai ʻa e ʻOtuá. ʻI he ʻahó ni, kuo ʻomai ai kitautolu ʻe Sihova ki heʻene kautaha maʻá, ʻa ia ʻoku tau ongoʻi ai ʻa ʻene ʻofá mo ʻene maluʻí. Ko kitautolu taki taha ʻoku ʻi ai hotau fatongia ko e tokoni ke tauhi ia ke maʻa. Kuo pau ke ʻikai ʻi ai ha anga-fulikivanu ʻi he lotolotonga ʻo e kakai ʻa Sihová.

19. Ko e hā ʻa e ʻuhinga ʻo e ngaahi vīsone fakatoʻoaloto ʻa Sākalaiá kiate kitautolu he ʻaho ní?

¹⁹ Ko e vīsone hono ono mo hono fitu ʻa Sākalaiá ko ha fakatokanga mafatukituki ia ki he faʻahinga ʻoku faikoví. Heʻikai fakaʻatā ʻe Sihova ke hokohoko atu ʻa e anga-fulikivanú. ʻI he tuʻunga ko ʻene kau sevānití, kuo pau ke tau fehiʻa ʻi he anga-fulikivanú. ʻOku toe fakapapauʻi mai ʻi he ongo vīsone ko ení kapau te tau ngāue ke fakahōifuaʻi ʻa ʻetau Tamai ʻofá, heʻikai te ne fakamalaʻiaʻi kitautolu ka te ne maluʻi mo tāpuakiʻi kitautolu. Neongo ʻe faingataʻa nai ke kei maʻa ai pē ʻi he māmani fulikivanu ko ení, ʻi he tokoni ʻa Sihová ʻe lava ke tau lavameʻa! Ka ʻe lava fēfē ke tau fakapapauʻi ʻe hao atu ʻa e lotu moʻoní? Pea ʻi heʻetau hoko ʻo ofi ange ki he fuʻu mamahi lahí, ʻoku anga-fēfē ʻetau ʻiloʻi ʻe maluʻi ʻe Sihova ʻa ʻene kautahá? Te tau lāulea ki he ongo fehuʻi ko ení ʻi he kupu hoko maí.