Maluʻi Koe ʻe he Ngaahi Saliote mo ha Kalauni

1, 2. Ko e hā ʻa e tuʻunga ʻo e kau Siu ʻi Selusalemá ʻi he ʻosi ʻa e vīsone hono fitu ʻa Sākalaiá?

ʻI HE ʻosi ʻa e vīsone hono fitu ʻa Sākalaiá, naʻe lahi ʻa e meʻa ke ne fakakaukau ki aí. Kuo pau pē naʻá ne ongoʻi mālohi ʻi he talaʻofa ʻe Sihova te ne tauteaʻi ʻa e kakai taʻefaitotonú. Ka naʻe ʻikai ha meʻa naʻe liliu moʻoni. Naʻe kei fai pē ʻe he tokolahi ʻa e ngaahi meʻa fulikivanu mo taʻefaitotonu, pea naʻe teʻeki ai ke ʻosi ʻa hono toe langa ʻo e temipale ʻi Selusalemá. Ko e hā naʻe liʻaki vave ai ʻe he kau Siú ʻa e ngāue naʻe ʻoange ʻe Sihova kiate kinautolú? Naʻa nau foki pē ki Selusalemá ke ʻai ke lelei ange ai ʻenau moʻuí?

² Naʻe ʻiloʻi ʻe Sākalaia ko e kau Siu naʻa nau toe foki ki Selusalemá ko e kau lotu kia Sihova. Ko kinautolu ia ʻa e faʻahinga ‘naʻe ueʻi ʻe he ʻOtua moʻoní ʻa honau laumālié’ ke nau mavahe mei honau ngaahi ʻapí mo ʻenau ngaahi pisinisi ʻi Pāpiloné. (ʻĒsela 1:2, 3, 5) Naʻa nau mavahe mei ha feituʻu naʻa nau ʻiloʻi lelei ʻo hiki ki ha fonua ko e tokolahi taha ʻo kinautolú naʻe teʻeki ai ʻaupito ke nau sio ai. Ko hono toe langa ʻa e temipale ʻo Sihová naʻe mātuʻaki mahuʻinga ki he kau Siu ko iá ʻo nau loto-lelei ai ke fai ha fononga fakatuʻutāmaki ʻi ha kilomita nai ʻe 1,600 (maile ʻe 1,000) ʻi ha fonua tokakovi.

3, 4. Ko e hā ʻa e ngaahi pole naʻe fehangahangai mo e kau Siu naʻe toe fokí?

³ Sioloto atu ki he fononga lōloa mei Pāpilone ki Selusalemá. Naʻe maʻu ai ʻe he kakaí ʻa e ngaahi houa lahi ke nau fakakaukau mo talanoa ʻo fekauʻaki mo honau ʻapi ʻi he kahaʻú. Naʻe talanoa ai ʻa e faʻahinga taʻumotuʻa angé ki he fakaʻofoʻofa naʻe ʻi ai ki muʻa ʻa Selusalema mo e temipalé. (ʻĒsela 3:12) Kapau naʻá ke fononga mo kinautolu, ne mei fēfē hoʻo ongoʻí ʻi hoʻo ʻuluaki sio ki Selusalemá? Naʻá ke mei loto-mamahi ʻi he sio atu ki he toetoenga ʻo e ngaahi falé kuo kāpui ʻe he vaó mo e holofa ʻa e ʻā ʻo e koló mo e avaava lalahi ʻa e feituʻu naʻe ʻi ai ki muʻa ʻa e matapaá mo e ngaahi tauá? Naʻá ke mei fakahoa nai ai ʻa e ngaahi ʻā holofa ko ení ki he ngaahi fuʻu ʻā mālohi ʻo Pāpiloné. Ka naʻe ʻikai ke loto-siʻi ʻa e kau Siú. Ko e hā hono ʻuhingá? Koeʻuhí ʻi he lolotonga ʻenau fononga lōloá, naʻe tokoniʻi mo maluʻi kinautolu ʻe Sihova. ʻI heʻenau aʻu atu pē ki Selusalemá, naʻa nau langa ha ʻōlita ʻi he feituʻu ne ʻi ai ʻa e temipalé pea kamata ke fai ʻa e ngaahi feilaulau kia Sihova ʻi he ʻaho taki taha. (ʻĒsela 3:1, 2) Naʻa nau mātuʻaki faivelenga mo mateuteu ke ngāue. Ne hā ngali heʻikai ha meʻa ʻe lava ke ne ʻai kinautolu ke nau loto-siʻi.

⁴ Fakataha mo hono toe langa ʻa e temipalé, naʻe pau ke toe langa ʻe he kau Siú honau ngaahi koló mo e ngaahi fale. Naʻe fiemaʻu ke nau tō ha ngaahi ngoue ke lava ʻo nau tokonaki ha meʻakai maʻa honau fāmilí. (ʻĒsela 2:70) Ne hā ngali lahi fau ʻa e ngāue naʻe pau ke nau faí. Ne vave ʻa e haʻu honau ngaahi filí ʻo feinga ke taʻofi kinautolú. Naʻe hokohoko atu ʻa e fakafepakí ni ʻi he taʻu ʻe 15, pea naʻe hoko māmālie ai ʻo loto-siʻi ʻa e kau Siú. (ʻĒsela 4:1-4) Naʻe toe hoko mai ha pole ʻi he taʻu 522, ʻi he tuʻutuʻuni ʻe he tuʻi Pēsiá ke taʻofi ʻa e langa kotoa naʻe fai ʻi Selusalemá. Ne hā ngali heʻikai ʻaupito ke toe langa ʻa e koló.​—ʻĒsela 4:21-24.

 5. Naʻe anga-fēfē hono tokoniʻi ʻe Sihova ʻa hono kakaí?

⁵ Naʻe ʻafioʻi ʻe Sihova naʻe fiemaʻu ʻe hono kakaí ʻa e mālohi mo e loto-toʻa. Naʻá ne ʻoange ha vīsone fakaʻosi kia Sākalaia ke fakapapauʻi ai ki he kakaí naʻá Ne ʻofaʻi kinautolu mo fakahoungaʻi ʻenau ngaahi feinga ke tauhi kiate iá. Naʻá ne talaʻofa te ne maluʻi kinautolu kapau te nau foki ʻo fai ʻa e ngāue naʻá ne ʻoange kiate kinautolú. ʻI he fekauʻaki mo hono toe langa ʻa e temipalé, naʻe pehē ʻe Sihova: “Kapau te mou fanongo ki he leʻo ʻo Sihova ko homou ʻOtuá, te mou ʻilo leva ko Sihova ʻo e ngaahi kau taú kuó ne fekauʻi mai au kiate kimoutolú.”​—Sāk. 6:15.

 6. (a) Naʻe anga-fēfē kamata ʻa e vīsone hono valu ʻa Sākalaiá? (Sio ki he ʻuluaki fakatātā ʻi he kupú ni.) (e) Ko e hā naʻe lanu kehekehe ai ʻa e fanga hōsí?

⁶ Ko e vīsone fakamuimui taha ʻa Sākalaiá pea ko hono valú ia ko e vīsone fakatupu tui mālohi tahá ia. (Lau ʻa e Sākalaia 6:1-3.) Feinga ke ke sioloto atu ki he meʻa naʻe mamata ki ai ʻa Sākalaiá. “ʻI he vahaʻa ʻo ha ongo moʻunga” naʻe ngaohi mei he kopá naʻe haʻu mei ai ha fanga hoosi ʻoku nau toho ha saliote ʻe fā. Ko e fanga hōsí naʻa nau lanu kehekehe, ʻa ia naʻe ʻai ai ke faingofua hono ʻiloʻi ʻa e faʻahinga naʻe heka aí. Naʻe ʻeke ʻe Sākalaia: “Ko e hā ʻa e ngaahi meʻá ni?” (Sāk. 6:4) ʻOku tau toe fiemaʻu foki ke ʻiloʻi ia, he ko e vīsoné ʻoku ʻi ai hono kaunga kiate kitautolu.

7, 8. (a) Ko e hā ʻoku fakafofongaʻi ʻe he ongo moʻungá? (e) Ko e hā naʻe ngaohi ai ʻa e ongo moʻungá mei he kopá?

⁷ ʻI he Tohi Tapú, ʻoku lava ke fakafofongaʻi ai ʻe he ngaahi moʻungá ha ngaahi puleʻanga, pe founga-pule. Ko e ongo moʻunga naʻe mamata ki ai ʻa Sākalaiá ʻoku meimei tatau ia mo e ongo moʻunga ʻoku tau lau fekauʻaki mo ia ʻi he kikite ʻa Tanielá. Ko e taha ʻo e ongo moʻunga ko iá ʻokú ne fakafofongaʻi ʻa e tuʻunga-pule fakaeʻuniveesi mo taʻengata ʻo Sihová, pea ko e moʻunga ʻe tahá ʻokú ne fakafofongaʻi ʻa e Puleʻanga faka-Mīsaiá fakataha mo Sīsū ko hono Tuʻí. (Tan. 2:35, 45) Talu mei he faʻahitaʻu fakatōlau ʻo e 1914, ʻi he taimi naʻe hoko ai ʻa Sīsū ko e Tuʻí, ko e ongo moʻungá ni fakatouʻosi kuó na ʻosi ʻi ai pea ʻoku ʻi ai hona ngafa makehe ʻi hono fakahoko ʻa e taumuʻa ʻa e ʻOtuá ki he māmaní.

⁸ Ko e hā naʻe ngaohi ai ʻa e ongo moʻungá mei he kopá? Ko e kopá ko ha mētale mahuʻinga ʻaupito ia pea ʻoku ngingila. Ko hono moʻoní, naʻe tala ʻe Sihova ki he kau ʻIsilelí ke nau ngāueʻaki ʻa e kopá ʻi heʻenau langa ʻa e tāpanekalé pea ki mui ai ʻi heʻenau langa ʻa e temipale ʻi Selusalemá. (ʻEki. 27:1-3; 1 Tuʻi 7:13-16) Ko e moʻoniʻi meʻa ko ia ʻa hono ngaohi ʻa e ongo moʻungá ni mei he kopá ʻoku fakamamafaʻi ai ʻa e tuʻunga lelei ʻaupito ʻo e tuʻunga-hau fakaleveleva ʻo Sihová pea mo e Puleʻanga faka-Mīsaiá, ʻa ia ʻe ʻai ai ʻa e faʻahinga ʻo e tangatá ke nau ongoʻi malu mo nau maʻu ai ʻa e ngaahi tāpuaki lahi.

 9. Ko hai ʻa e faʻahinga ʻoku heka ʻi he ngaahi salioté, pea ko e hā ʻenau ngāué?

⁹ Ko e hā ʻoku fakafofongaʻi ʻe he ngaahi salioté mo e faʻahinga ʻoku heka aí? Ko e faʻahinga ʻoku heka aí ko e kau ʻāngelo, ngalingali ko e kulupu kehekehe ʻo e kau ʻāngelo. (Lau ʻa e Sākalaia 6:5-8.) ʻOku nau ʻalu atu “ʻi he ʻao ʻo e ʻEiki ʻo e māmaní kotoa” mo ha ngāue makehe. ʻOku fekauʻi atu ʻa e kau ʻāngeló ki he ngaahi feituʻu pau ke nau maluʻi ʻa e kakai ʻa e ʻOtuá, tautefito mei Pāpilone, ʻa e “fonua ʻo e tokelaú.” ʻI he vīsoné ni, naʻe ʻai ai ʻe Sihova ke ʻiloʻi ʻe hono kakaí heʻikai ʻaupito ke nau toe hoko ko e kau pōpula ki Pāpilone. Sioloto atu ki hono fakafiemālieʻi ʻe he meʻá ni ʻa e kau langa ʻo e temipalé ʻi he ʻaho ʻo Sākalaiá! Naʻa nau ʻiloʻi heʻikai lava ke taʻofi kinautolu ʻe honau ngaahi filí.

10. ʻOku lava fēfē ke tokoniʻi kitautolu ʻi he ʻahó ni ʻe he kikite ʻa Sākalaia fekauʻaki mo e ngaahi salioté mo e faʻahinga ʻoku heka aí?

¹⁰ ʻI he ʻahó ni, ʻoku kei ngāueʻaki pē ʻe Sihova ʻene kau ʻāngeló ke nau maluʻi mo fakaivimālohiʻi ʻa hono kakaí. (Mal. 3:6; Hep. 1:7, 14) Talu mei he 1919, ʻi hono tuku ange ʻa e kakai ʻa Sihová mei he nofo pōpula fakaefakatātā ki Pāpilone ko e Lahí, kuo feinga mālohi ʻaupito ai ʻa honau ngaahi filí ke taʻofi ʻa e tupu mo e mafola ʻa e lotu moʻoní. (Fkh. 18:4) Ka kuo ʻikai malava ke nau fai ia. Koeʻuhi ko hono maluʻi ʻe he kau ʻāngeló ʻa e kautaha ʻa Sihová, ʻoku ʻikai fiemaʻu ke tau ilifia naʻa faifai ange pea toe hoko ʻo pōpula ʻa e kakai ʻa Sihová ki he lotu loí. (Saame 34:7) ʻI hono kehé, ʻe hokohoko atu ʻetau fiefia mo femoʻuekina ʻi heʻetau lotu kia Sihová. ʻOku tokoniʻi kitautolu ʻe he kikite ʻa Sākalaiá ke tau mahinoʻi ʻoku tau malu pea ʻoku maluʻi kitautolu ʻe he ongo moʻungá.

11. Ko e hā ʻe ʻikai fiemaʻu ai ke tau ilifia ʻi he ʻohofi ka hoko mai ʻo e kakai ʻa e ʻOtuá?

¹¹ Kuo vavé ni ʻaupito ke fakatahataha ʻa e ngaahi kongakau fakapolitikale ʻo e māmani ʻo Sētané ʻo nau feinga ke fakaʻauha ʻa e kakai ʻa e ʻOtuá. (ʻIsi. 38:2, 10-12; Tan. 11:40, 44, 45; Fkh. 19:19) ʻI he kikite ʻa ʻIsikelí, ʻoku tau sio ai ki hono ʻufiʻufi ʻe he ngaahi kongakaú ni ʻa e māmaní ʻo hangē ha ngaahi konga ʻaó. ʻOku nau heka ʻi he fanga hoosi pea haʻu tōtōlili ke ʻohofi ʻa e kakai ʻa e ʻOtuá. (ʻIsi. 38:15, 16)a (Sio ki he fakamatala ʻi lalo.) ʻOku totonu nai ke tau ilifia kiate kinautolu? ʻIkai! ʻOku tau kau mo e kau tau ʻa Sihová. Lolotonga ʻa e fuʻu mamahi lahí, ʻe maluʻi ai ʻe he kau ʻāngelo ʻa Sihová ʻa hono kakaí pea fakaʻauha ha taha pē ʻoku fakafepaki ki he pule ʻa Sihová. (2 Tes. 1:7, 8) He ʻaho fakalilifu moʻoni ē ko ia! Ka ko hai ʻe taki ʻi he kau tau fakahēvani ʻa Sihová?

12, 13. (a) Ko e hā ʻa e meʻa hono hoko naʻe tala ʻe Sihova kia Sākalaia ke ne faí? (e) ʻOku anga-fēfē ʻetau ʻiloʻi ko e tangata naʻe ui ko e Hulí ʻokú ne fakafofongaʻi ʻa Sīsū Kalaisi?

¹² Ko Sākalaia pē ʻa e toko taha naʻe mamata ki he ngaahi vīsone ko ia ʻe valú. Ka ko hono hokó naʻá ne fai ʻa e meʻa ʻe sio ki ai ʻa e niʻihi kehé pea fakalototoʻaʻi ai ʻa e faʻahinga naʻa nau toe langa ʻa e temipale ʻo e ʻOtuá. (Lau ʻa e Sākalaia 6:9-12.) Naʻe aʻu mai ha kau tangata ʻe toko tolu mei Pāpilone ko Heletai, Topisa, mo Sitaia. Naʻe tala ʻe Sihova kia Sākalaia ke ne tānaki ʻa e siliva mo e koula mei he kau tangatá ni ʻo ngāueʻaki ia ke ngaohi “ha kalauni lāngilangiʻia.” (Sāk. 6:11, fakamatala ʻi lalo) Ko e kalauni eni maʻa Kōvana Seluipēpeli, ʻa ia naʻe mei he matakali ʻo Siutá pea ko ha hako ʻo Tēvita? ʻIkai. Naʻe tala ʻe Sihova kia Sākalaia ke ne ʻai ʻa e kalauní ki he ʻulu ʻo e Taulaʻeiki Lahí, ʻa Siosiua. Kuo pau pē naʻe ʻohovale ʻi he meʻá ni ha taha pē naʻe sio ki ai.

¹³ Naʻe ʻai ʻi hono fakakalauni ʻo e Taulaʻeiki Lahi ko Siosiuá ke ne hoko ai ko ha tuʻi? ʻIkai. Ko Siosiuá naʻe ʻikai ko ha hako ia ʻo Tēvita, ko ia naʻe ʻikai ai te ne taau ke hoko ko ha tuʻi. Ko hono fakakalauní ko ha fakatātā ia ʻo e meʻa ʻe hoko ki ha tuʻi taʻengata ʻi he kahaʻú mo e taulaʻeiki, ʻoku ui ko e Huli. ʻOku fakamatalaʻi ʻe he Tohi Tapú ko e Huli ko iá ko Sīsū Kalaisi.​—ʻAi. 11:1; Māt. 2:23, fakamatala ʻi lalo.

14. ʻI hono tuʻunga ko e Tuʻi mo e Taulaʻeiki Lahí, ko e hā ʻa e ngāue ʻoku fai ʻe Sīsuú?

¹⁴ Ko Sīsuú ʻoku fakatou Tuʻi mo Taulaʻeiki Lahi. ʻOkú ne taki ʻa e kau tau ʻo e kau ʻāngelo ʻa Sihová pea ngāue mālohi ke ʻai ʻa e kakai ʻa e ʻOtuá ke nau ongoʻi malu ʻi he māmani anga-fakamālohi ko ení. (Sel. 23:5, 6) Kuo vavé ni ʻaupito ke ikunaʻi ʻe Kalaisi ʻa e ngaahi puleʻangá ʻi heʻene poupouʻi ʻa e pule ʻa e ʻOtuá mo taukapoʻi ʻa e kakai ʻa Sihová. (Fkh. 17:12-14; 19:11, 14, 15) Ka ki muʻa ʻi he ʻaho ko iá, ko Sīsū, pe ko e Hulí, ʻoku ʻi ai ʻene ngāue lahi ke fai.

15, 16. (a) Kuo anga-fēfē hono fakaleleiʻi mo sivi he ʻaho ni ʻa e kakai ʻa e ʻOtuá, pea ko hai ʻokú ne fai iá? (e) ʻE fēfē ʻa e māmaní ʻi he ngataʻanga ʻo e Pule Taʻu ʻe Taha Afe ʻa Kalaisí?

¹⁵ ʻIkai ngata pē ʻi heʻene hoko ko e Tuʻi mo e Taulaʻeiki Lahí, naʻe vaheʻi foki kia Sīsū ke ne “langa ʻa e temipale ʻo Sihová.” (Lau ʻa e Sākalaia 6:13.) ʻI he 1919, naʻá ne fai ʻa e ngāue langa ko ení ʻaki hono fakatauʻatāinaʻi ʻa e kakai ʻa e ʻOtuá mei he tākiekina ʻa e lotu loí, ʻa Pāpilone ko e Lahi. Naʻe fakaleleiʻi ʻe Sīsū ʻa e fakatahaʻangá pea fakanofo ʻa e “tamaioʻeiki anga-tonu mo potó.” Ko e kulupu ko eni ʻo e fanga tokoua paní ʻoku nau tataki ʻa e ngāue mahuʻinga ʻoku fai heni ʻi he konga fakaemāmani ʻo e temipale lahi fakalaumālié. (Māt. 24:45) Kuo toe sivi foki ʻe Sīsū ʻa e kakai ʻa e ʻOtuá, ʻo tokoniʻi kinautolu ke nau lotu ʻi ha founga maʻa.​—Mal. 3:1-3.

¹⁶ Ko Sīsū mo hono kaungātuʻi mo e kaungātaulaʻeiki ʻe toko 144,000 te nau pule ʻi ha taʻu ʻe taha afe. Lolotonga ʻa e taimi ko iá, te nau tokoniʻi ai ʻa e faʻahinga faitōnunga ʻo e tangatá ke nau hoko ʻo haohaoa. ʻI he ʻosi ʻa e ngāue ko eni ʻa e ngaahi tuʻi mo e kau taulaʻeikí, ko e kau lotu moʻoni pē ʻa Sihová te nau toe ʻi he māmaní. ʻE faifai pē ʻo fakaleleiʻi kakato ʻa e lotu moʻoní!

17. Ko e hā ʻa e fakafiemālie naʻe ʻoange hono hoko ʻe Sihova ki he kau Siú, pea naʻe anga-fēfē hono ueʻi kinautolu ʻe heʻene pōpoakí?

¹⁷ Naʻe anga-fēfē hono ueʻi ʻe he pōpoaki ʻa Sākalaiá ʻa e kau Siú ʻi he taimi ko iá? Naʻe talaʻofa ʻe Sihova te ne tokoniʻi mo maluʻi kinautolu koeʻuhi ke nau lava ʻo ʻosiki hono langa ʻa e temipalé. Naʻe ʻoange ʻe he talaʻofá ni kiate kinautolu ʻa e ʻamanaki. Ka naʻa nau kei fifili pē nai pe ʻe lava fēfē ke fai ʻe ha kakai mātuʻaki tokosiʻi ha fuʻu ngāue lahi. Ko ia naʻe tala ange ʻe Sākalaia ha meʻa te ne toʻo ʻosi ʻenau manavaheé mo e veiveiuá. Fakataha mo e kakai hangē ko Heletai, Topisa mo Setaia naʻa nau haʻu ke tokoniʻi kinautolú, naʻe pehē ʻe Sihova ko e toe tokolahi kehe foki “te nau haʻu ʻo kau ʻi hono langa ʻo e temipale ʻo Sihová.” (Lau ʻa e Sākalaia 6:15.) Naʻe fakapapauʻi ʻe he kau Siú naʻe poupouʻi ʻe Sihova ʻenau ngāué. Naʻe nau foki loto-toʻa ke toe langa ʻa e temipalé, neongo naʻe tapui fakapuleʻanga ʻe he tuʻi Pēsiá ʻa e ngāué. Ko e tapui ko ení naʻe hangē ha fuʻu moʻunga ʻi honau halá, ka naʻe vave hono toʻo ia ʻe Sihová. Fakaʻosí, naʻe kakato ʻa e temipalé ʻi he taʻu 515 ki muʻa ʻia Kalaisí. (ʻĒsela 6:22; Sāk. 4:6, 7) Kae kehe, ko e ngaahi lea ko ia ʻa Sihová ʻoku toe fakamatalaʻi foki ai ha meʻa lahi mamaʻo ange ʻa ia ʻoku hoko he ʻahó ni.

18. ʻOku anga-fēfē hono fakahoko he ʻahó ni ʻa e Sākalaia 6:15?

¹⁸ ʻI he ʻahó ni, ʻoku lotu ai ʻa e kakai e laui miliona kia Sihova. ʻOku nau fiefia ke foaki kiate ia ʻenau “ngaahi meʻa mahuʻingá,” hangē ko honau taimí, iví, mo e koloa fakamatelié. ʻI he foungá ni, ʻoku nau poupou ai ki he temipale lahi fakalaumālie ʻo Sihová. (Pal. 3:9) Pea ʻe lava ke tau fakapapauʻi ʻoku fakamahuʻingaʻi ʻe Sihova ʻetau poupou mateakí. Manatuʻi naʻe ʻomai ʻe Heletai, Topisa, mo Setaia ʻa e siliva mo e koula pea naʻe ngaohiʻaki ia ʻe Sākalaia ha kalauni. Ko e kalauní naʻe hoko ia “ko ha fakamanatu,” ʻo ʻenau tokoni ki he lotu moʻoní. (Sāk. 6:14; fakamatala ʻi lalo) Heʻikai ʻaupito fakangaloʻi ʻe Sihova ʻa e ngāue ʻoku tau faí mo e ʻofa ʻoku tau fakahāhā kiate iá.​—Hep. 6:10.

19. ʻOku totonu ke ueʻi fēfē kitautolu ʻe he ngaahi vīsone ʻa Sākalaiá?

¹⁹ ʻI he ngaahi ʻaho fakaʻosi ko ení, kuo malava ai ʻa e kakai ʻa Sihová ʻo fai ha ngāue lahi. Kuo malava ení koeʻuhi ko e tāpuaki ʻa Sihová mo e taki ʻa Kalaisí. ʻOku tau fiefia ke hoko ko ha konga ʻo ha kautaha maʻumaʻuluta, malu, mo taʻengata, pea ʻoku tau ʻiloʻi ko e taumuʻa ʻa Sihova ki he lotu maʻá ʻe hoko moʻoni. Ko ia houngaʻia ʻi ho tuʻunga ʻi he lotolotonga ʻo e kakai ʻa Sihová, pea “fanongo ki he leʻo ʻo Sihova ko homou ʻOtuá.” ʻE lava leva ai ke maluʻi koe ʻe hotau Tuʻi mo e Taulaʻeiki Lahí pea ʻe he kau ʻāngeló. Fai ʻa e meʻa kotoa te ke malavá ke poupouʻi ʻa e lotu moʻoní. ʻE maluʻi koe ʻe Sihova ʻi he toenga ʻo e fokotuʻutuʻu ko ení​—pea taʻengata!