Faitotonu ʻi he Meʻa Kotoa Pē

Ko e tokotaha kotoa ʻokú ne loto ke maʻu ʻa e ngaahi kaumeʻa ʻoku faitotonu. ʻOku ʻamanekina foki ʻe Sihova hono ngaahi kaumeʻá ke nau faitotonu. ʻOku ʻikai ke faingofua eni ʻi ha māmani ʻa ia ko e tokolahi ʻo e kakaí ʻoku nau taʻefaitotonu. Ko e hā ʻa e ngaahi ʻaonga ʻoku maʻu mei he hoko ʻo faitotonu ʻi he meʻa kotoa pē?

1. Ko e hā ʻa e ʻuhinga mahuʻinga taha ke faitotonú?

ʻI heʻetau faitotonu ki he niʻihi kehé, ʻoku tau fakahaaʻi kia Sihova ʻoku tau ʻofa mo fakaʻapaʻapaʻi ia. Fakakaukau angé: ʻOku ʻilo ʻe Sihova ʻa e meʻa kotoa ʻoku tau faí mo fakakaukau ki aí. (Hepelū 4:13) ʻOkú ne fakatokangaʻi ʻa e taimi ʻoku tau fili ai ke faitotonú pea ʻokú ne fiefia ai. ʻOku pehē ʻe heʻene Folofolá: “ʻOku fakaliliʻa ʻa Sihova ʻi ha tokotaha kākā, ka ʻokú Ne kaumeʻa ofi mo e faitotonú.”​—Palōveepi 3:32.

2. Ko e hā ʻa e ngaahi founga ke faitotonu ai ʻi heʻetau moʻui fakaʻahó?

ʻOku loto mai ʻa Sihova ke tau “leaʻaki ʻa e moʻoní ʻiate” kitautolu. (Sākalaia 8:16, 17) ʻOku ʻuhinga eni ki he hā? Tatau ai pē pe ʻoku tau talanoa ki hotau fāmilí, kaungāngāue, fanga tokoua mo e fanga tuofāfine Kalisitiané pe kau maʻu mafai ʻi he puleʻangá, ʻoku ʻikai ke tau loi pe ʻoatu ha fakamatala takihala. Ko e kakai faitotonú ʻoku ʻikai ke nau kaihaʻa mei he niʻihi kehé pe kākaaʻi kinautolu. (Lau ʻa e Palōveepi 24:28 mo e ʻEfesō 4:28.) ʻOku nau totongi kotoa ʻa e tukuhau ʻoku totonu ke totongí. (Loma 13:5-7) ʻI he foungá ni mo e ngaahi founga kehe, ʻoku tau “faitotonu ʻi he meʻa kotoa pē.”​—Hepelū 13:18.

3. Ko e hā ʻa e ngaahi ʻaonga ʻo e hoko ʻo faitotonú?

ʻI heʻetau maʻu ha ongoongo ʻo e faitotonú, ʻoku falala mai ʻa e niʻihi kehé. ʻOku tau poupou ki he ongoʻi malu ʻa e tokotaha kotoa ʻi he fakatahaʻangá, ʻo hangē ha fāmili ʻofá. ʻOku tau maʻu ha konisēnisi maʻa. Ko ʻetau faitotonú ʻe lava ai ke “teungaʻia . . . ʻa e akonaki ʻa hotau Fakamoʻuí, ʻa e ʻOtuá,” pea tohoakiʻi mai ʻa e niʻihi kehé ki he lotu moʻoní.​—Taitusi 2:10.

KELI LOLOTO ANGE

4. Ko e faitotonú ʻoku fakahōifua kia Sihova

Lau ʻa e Saame 44:21 mo e Malakai 3:16, pea lāulea leva ki he ongo fehuʻi ko ení:

• Ko e hā ʻoku taʻefakapotopoto ai ke tui ʻoku lava ke tau fūfuuʻi ʻa e moʻoní?

• ʻOku anga-fēfē ongoʻi ʻa Sihová ʻi he taimi ʻoku tau fili ai ke tala ʻa e moʻoní, naʻa mo e taimi ʻoku faingataʻa ai ke fai pehē?

5. Hoko ʻo faitotonu ʻi he taimi kotoa pē

VITIŌ: Ko e Hā ʻOku Tokoni ki he Fiefiá?​—Ko ha Konisēnisi Maʻa (2:32)

Lau ʻa e Hepelū 13:18, pea lāulea leva ki he founga te tau lava ai ʻo faitotonu . . .

• ʻi hotau fāmilí.

• ʻi he ngāué pe ʻapiakó.

• ʻi he ngaahi tuʻunga kehé.

6. ʻOku tau maʻu ʻaonga mei he faitotonú

Ko e faitotonú ʻe lava ke iku nai ki ha ngaahi palopalema. Ka ʻi he lele lōloá, ko e meʻa lelei maʻu pē ia ke ke faí. Lau ʻa e Saame 34:12-16, pea lāulea leva ki he fehuʻi ko ení:

• ʻOku anga-fēfē hono ʻai ʻe he faitotonú hoʻo moʻuí ke lelei angé?

1. A. Ko e husepāniti mo e uaifi faitotonú ʻokú na fakaivimālohiʻi ʻena nofo malí

2. E. Ko ʻete ngāue faitotonú ʻokú te maʻu ʻa e falala ʻa e pule ngāué

3. F. Ko e kau tangataʻifonua faitotonú ʻoku nau maʻu ha ongoongo lelei mei he kau maʻu mafai fakapuleʻangá

FAKANOUNOU

ʻOku finangalo ʻa Sihova ki hono ngaahi kaumeʻá ke nau faitotonu ʻi he meʻa kotoa ʻoku nau leaʻakí mo faí.

Fakamanatu

• Ko e hā ʻa e ngaahi founga ke faitotonu aí?

• Ko e hā ʻoku taʻefakapotopoto ai ke tui ʻoku lava ke tau fūfuuʻi ʻa e moʻoní?

• Ko e hā ʻokú ke loto ai ke faitotonu ʻi he taimi kotoa pē?

AKO LAHI ANGE

ʻE lava fēfē ʻa e ngaahi mātuʻá ʻo akoʻi ʻenau fānaú ke faitotonu?

Hoko ʻo Lea Moʻoni (1:44)

Ko e hā ʻa e ngaahi ʻaonga ʻoku tau maʻu mei hono tauhi ʻetau ngaahi leá?

Tauhi Hoʻo Palōmesí, Maʻu ʻa e Tāpuaki (9:09)

Sio angé pe kuo pau ke tau totongi tukuhau neongo kapau ʻoku ngāuehalaʻaki ia.

“Tukuhaú​—Kuo Pau Ke Ke Totongi Ia?” (Toʻo mei he Ko e Taua Leʻo)

Ko e hā naʻá ne ueʻi ha tangata taʻefaitotonu ke liliu ʻene moʻuí pea hoko ʻo ngāue faitotonu?

“Naʻá Ku Ako ko Sihová ʻOku Mohu Meesi mo Faʻa Fakamolemole” (Ko e Taua Leʻo, Siulai 1, 2015)