Fakaʻapaʻapaʻi ʻa e “Meʻa Kuo Haʻi Fakatahaʻi ʻe he ʻOtuá”

1, 2. Ko e hā ʻoku totonu ke ueʻi kitautolu ʻe he Hepelū 13:4 ke tau faí?

KO KITAUTOLU kotoa ʻoku tau loto ke fakalāngilangiʻi pe fakaʻapaʻapaʻi ʻa Sihova. ʻOkú ne tuha mo ʻetau fakalāngilangí, pea ʻokú ne talaʻofa te ne fakalāngilangiʻi foki kitautolu. (1 Sām. 2:30; Pal. 3:9; Fkh. 4:11) ʻOkú ne toe fiemaʻu ke tau fakaʻapaʻapaʻi ʻa e kakai kehé, hangē ko e kau ʻōfisa fakapuleʻangá. (Loma 12:10; 13:7) Ka ʻoku ʻi ai ha tafaʻaki pau ʻoku tautefito ʻa e fiemaʻu ke tau fakahāhā ai ʻa e fakaʻapaʻapá. Ko e nofo malí.

² Naʻe tohi ʻe he ʻapositolo ko Paulá: “Tuku ke fakaʻapaʻapaʻi ʻa e nofo malí ʻe he kakai kotoa, pea tuku ke ʻoua naʻa ʻuliʻi ʻa e mohenga ʻo e malí.” (Hep. 13:4) Naʻe ʻikai ke lave fakalūkufua pē ʻa Paula ia fekauʻaki mo e nofo malí. Naʻá ne tala ki he kau Kalisitiané kuo pau ke nau fakaʻapaʻapaʻi ʻa e nofo malí, ʻa ia, ko e vakai ki ai ʻoku mahuʻinga. Ko e anga ia hoʻo vakai ki he nofo malí, tautefito ki hoʻo nofo malí ʻo kapau ʻokú ke ʻosi mali?

 3. Ko e hā ʻa e faleʻi mahuʻinga naʻe fai ʻe Sīsū fekauʻaki mo e nofo malí? (Sio ki he ʻuluaki fakatātā ʻi he kupú ni.)

³ Kapau ʻokú ke vakai ki he nofo malí ʻoku mahuʻinga, ʻokú ke muimui ʻi ha faʻifaʻitakiʻanga lelei ʻaupito. Naʻe fakaʻapaʻapaʻi ʻe Sīsū tonu ʻa e nofo malí. ʻI he ʻeke ange kiate ia ʻe he kau Fālesí fekauʻaki mo e vete malí, naʻá ne lave ki he meʻa naʻe leaʻaki ʻe he ʻOtuá fekauʻaki mo e ʻuluaki nofo malí: “Ko e ʻuhinga ʻeni ʻe tuku ange ai ʻe ha tangata ʻene tamaí mo ʻene faʻeé, pea ʻe hoko ʻa e toko uá ko e kakano pē taha.” Naʻe toe pehē ʻe Sīsū: “Ko e meʻa kuo haʻi fakatahaʻi ʻe he ʻOtuá, tuku ke ʻoua naʻa fakamāvae ia ʻe ha tangata.”​—Lau ʻa e Maʻake 10:2-12; Sēn. 2:24.

 4. Ko e hā ʻa e taumuʻa ʻa Sihova ki he nofo malí?

⁴ Naʻe tui ʻa Sīsū ko e ʻOtuá ʻa e toko taha naʻá ne fakatupu ʻa e nofo malí pea ko e nofo malí ʻoku totonu ke tuʻuloa ia. ʻI he taimi naʻe fuofua fakahoko ai ʻe he ʻOtuá ʻa e ʻuluaki nofo malí, naʻe ʻikai ke ne tala ange kia ʻĀtama mo ʻIvi ʻe lava ke na vete. ʻI hono kehé, ko ʻene taumuʻá ki he “toko uá” ke na nofoʻaki fāʻūtaha ʻi he nofo malí ʻo taʻengata.

 5. Naʻe anga-fēfē hono uesia ʻe he maté ʻa e nofo malí?

⁵ Kae kehe, ʻokú ke ʻilo, ʻi he talangataʻa ʻa ʻĀtamá, naʻe liliu ʻa e ngaahi meʻa lahi. Ko e taha ʻo e ngaahi liliu ko iá ko e kamata ke mate ʻa e faʻahinga ʻo e tangatá, pea ko e liliu ko iá naʻá ne uesia ʻa e nofo malí. Naʻe fakamatala ʻe he ʻapositolo ko Paulá ki he kau Kalisitiané ʻe fakangata ʻe he maté ha nofo mali pea ko e hoa mali kei moʻuí ʻokú ne ʻatā ke toe mali.​—Loma 7:1-3.

 6. Ko e hā ʻoku akoʻi mai ʻe he Lao ʻa Mōsesé fekauʻaki mo e vakai ʻa e ʻOtuá ki he nofo malí?

⁶ Ko e Lao naʻe ʻoange ʻe he ʻOtuá ki ʻIsilelí naʻe ʻoatu ai ʻa e fakaikiiki fekauʻaki mo e nofo malí. Ko e fakatātaá, naʻe ʻatā ki ha tangata ʻIsileli ke ne maʻu ha uaifi laka hake ʻi he tahá. Ko e tōʻonga ko ení naʻe ʻi ai ki muʻa ke ʻoange ʻe he ʻOtuá ʻa e Laó. Kae kehe, naʻe maluʻi ʻe he Laó ʻa e kakai fefiné mo e fānaú mei hono ngaohikoviá. Ko e fakatātaá, kapau ʻe mali ha tangata ʻIsileli mo ha pōpula pea toe maʻu ha uaifi ki mui ai, naʻe pau ke ne kei tokangaʻi ʻa e ngaahi fiemaʻu ʻa hono ʻuluaki uaifí ʻo hangē ko ia naʻá ne fai ki muʻá. Naʻe fiemaʻu ʻe he ʻOtuá ke ne hokohoko atu ke maluʻi mo tokangaʻi ia. (ʻEki. 21:9, 10) ʻOku ʻikai ke tau muimui ki he Lao ʻa Mōsesé ʻi he ʻahó ni. Ka ʻoku akoʻi mai ai ko e vakai ʻa e ʻOtuá ki he nofo malí ʻoku mātuʻaki mahuʻinga. ʻOku tokoniʻi moʻoni heni kitautolu ke tau fakaʻapaʻapaʻi ʻa e nofo malí.

7, 8. (a) Ko e hā naʻe leaʻaki ʻe he Laó fekauʻaki mo e veté ʻo fakatatau ki he Teutalōnome 24:1? (e) ʻOku anga-fēfē ʻa e vakai ʻa Sihova fekauʻaki mo e veté?

⁷ Ko e hā naʻe leaʻaki ʻe he Laó fekauʻaki mo e veté? Neongo naʻe ʻikai ʻaupito fakataumuʻa ʻe Sihova ki ha husepāniti mo ha uaifi ke na vete, naʻe fakaʻatā ʻi he Laó ha tangata ʻIsileli ke vete mo hono uaifí kapau “naʻá ne ʻilo ha meʻa taʻetaau fekauʻaki mo ia.” (Lau ʻa e Teutalōnome 24:1.) Naʻe ʻikai fakamatalaʻi ʻi he Laó pe ko e hā ʻa e meʻa ʻe lava ke lau ko e “meʻa taʻetaau.” Kae kehe, kuo pau pē ko ha meʻa fakamā pe mātuʻaki mafatukituki pea ʻoku ʻikai ko ha kiʻi fehālaaki pē. (Teu. 23:14) Ko e meʻa fakamamahí, ʻi he ʻaho ʻo Sīsuú, ko e kau Siu tokolahi naʻa nau veteʻi honau ngaahi uaifí “ʻi ha faʻahinga ʻuhinga pē.” (Māt. 19:3) Ko hono moʻoní ʻoku ʻikai ke tau loto ke fakatupulekina ʻa e faʻahinga tōʻonga ko iá.

⁸ ʻI he ʻaho ʻo e palōfita ko Malakaí, naʻe anga-maheni ki ha tangata ke ne veteʻi hono ʻuluaki uaifí, mahalo ke mali mo ha fefine kei siʻi ange ʻa ia naʻe ʻikai tauhi kia Sihova. Ka naʻe ʻai ʻe he ʻOtuá ke māʻalaʻala ʻaupito ʻa e anga ʻo ʻene vakai ki he veté. Naʻá ne pehē: “ʻOku ou fehiʻa ʻi he vete malí.” (Mal. 2:14-16) Ko e vakai ʻa e ʻOtuá ki he nofo malí kuo ʻikai ke liliu talu mei he kamataʻangá, ʻi he taimi naʻá ne pehē ai ko ha tangata “te ne pīkitai ki hono uaifí, pea te na hoko ko e kakano pē taha.” (Sēn. 2:24) Pea naʻe poupouʻi ʻe Sīsū ʻa e vakai ʻa ʻene Tamaí ki he nofo malí ʻi heʻene pehē: “Ko e meʻa kuo haʻi fakatahaʻi ʻe he ʻOtuá, tuku ke ʻoua naʻa fakamāvae ia ʻe ha tangata.”​—Māt. 19:6.

 9. ʻOku ʻuhinga ki he hā ʻa e ngaahi lea ʻa Sīsū ʻi he Maʻake 10:11, 12?

⁹ ʻE ʻeke nai ʻe ha niʻihi, ‘ʻOku ʻi ai koā ha ʻuhinga ki ha Kalisitiane ke vete pea toe mali?’ Fakatokangaʻi ʻa e meʻa naʻe leaʻaki ʻe Sīsuú: “ʻIlonga ʻa ia te ne veteʻi hono uaifí peá ne mali mo ha taha kehe, ʻokú ne tono ʻo faihala ai ki hono uaifí, pea ka ʻi ai ha fefine ʻi he hili ʻene veteʻi ʻa hono husepānití ʻokú ne mali mo ha taha kehe, ʻokú ne tono ai.” (Mk. 10:11, 12; Luke 16:18) ʻOku hā mahino, naʻe fakaʻapaʻapaʻi ʻe Sīsū ʻa e nofo malí, pea ʻokú ne loto ke fai pehē ʻa e niʻihi kehé. Kapau ʻe veteʻi ʻe ha tangata ʻa hono uaifi faitōnungá pea toe mali, ʻokú ne tono ai. Ko e meʻa tatau pē ʻe hoko ki ha fefine kapau te ne veteʻi hono husepāniti faitōnungá. Ko hono ʻuhingá ʻoku ʻikai ke fakangata ʻe he veté ʻiate ia pē ha nofo mali. ʻOku kei lau pē ʻe he ʻOtuá ʻa e ongo meʻá ko e “kakano pē ʻe taha.” Naʻe toe pehē ʻe Sīsū kapau ʻe veteʻi ʻe ha tangata hono uaifi tonuhiá, ʻe ʻi ha tuʻunga fakatuʻutāmaki ʻa hono uaifí ke fai ha tono. ʻE malava fēfē ke hoko ia? Sai, ʻi he taimi ko iá, ʻe ongoʻi nai ʻe ha fefine ʻosi vete kuo pau ke ne toe mali koeʻuhi ko ha ʻuhinga fakapaʻanga. Ko ha nofo mali pehē ʻe tatau pē ia mo e tonó.

10. Ko e hā ʻa e ʻuhinga pē ʻe taha ʻe lava ai ha Kalisitiane ʻo vete pea ʻatā ke toe mali?

¹⁰ Naʻe akoʻi ʻe Sīsū ʻoku ʻi ai ʻa e ʻuhinga pē ʻe taha ʻe lava ke vete ai ha tokotaha: “ʻOku ou tala atu kiate kimoutolu ʻilonga ʻa ia te ne veteʻi hono uaifí, tuku kehe pē ʻi he fehokotaki fakasino taʻetāú, peá ne mali mo ha taha kehe, ʻokú ne tono ai.” (Māt. 19:9) Naʻá ne lave ki he poini tatau ʻi he Malanga ʻi he Moʻungá. (Māt. 5:31, 32) Fakatouʻosi ʻa e ongo taimi ko iá, naʻe lave ʻa Sīsū ki he “fehokotaki fakasino taʻetāú.” Ko e fehokotaki fakasino taʻetāú ʻoku lava ke kau ai ʻa e ngaahi angahala hangē ko e tono, faifeʻauaki, fehokotaki fakasino ʻi he vahaʻa ʻo e faʻahinga teʻeki mali, faka-Sōtoma pea mo e fehokotaki fakasino mo e manú. Ko e fakatātaá, kapau ʻe fai ʻe ha tangata ʻosi mali ha fehokotaki fakasino taʻetaau, ʻe lava ke fili ʻa hono uaifí pe te ne veteʻi ia pe ʻikai. Kapau te ne veteʻi ia, heʻikai toe vakai ʻa e ʻOtuá kiate kinaua ʻokú na mali.

11. Ko e hā nai ʻe fili ai ha Kalisitiane ke ʻoua te ne vete mo hono hoá neongo kapau naʻá ne fai ha fehokotaki fakasino taʻetaau?

¹¹ Fakatokangaʻi naʻe ʻikai ke pehē ʻe Sīsū ia kapau ʻe fai ʻe ha tokotaha ʻosi mali ha fehokotaki fakasino taʻetaau, ko e tokotaha mali tonuhiá kuo pau ke ne vete. Ko e fakatātaá, ʻe fili nai ha uaifi ke kei nofo pē mo hono husepānití neongo naʻá ne fai ha fehokotaki fakasino taʻetaau. Ko e hā hono ʻuhingá? ʻOkú ne kei ʻofa pē nai ʻiate ia mo loto-lelei nai ke fakamolemoleʻi ia pea ngāue fakataha mo ia ke fakaleleiʻi ʻena nofo malí. ʻIkai ko ia pē, kapau te na vete pea ʻikai ke ne toe mali, te ne fekuki nai mo ha ngaahi faingataʻa pau. Ko e fakatātaá, fēfē ʻene fiemaʻu fakamatelié mo e fiemaʻu fakaefehokotaki fakasinó? Te ne tuēnoa? ʻE anga-fēfē hono uesia ʻe he veté ʻa ʻene fānaú? ʻE faingataʻa ange ke ʻohake kinautolu ʻi he moʻoní? (1 Kol. 7:14) ʻOku hā mahino, ko ha hoa tonuhia ʻokú ne fili ke fai ha vete te ne fekuki mo ha ngaahi palopalema mafatukituki.

12, 13. (a) Ko e hā ʻa e meʻa naʻe hoko ʻi he nofo mali ʻa Hōseá? (e) Ko e hā naʻe toe fakafoki ai ʻe Hōsea ʻa Kōmelá, pea ko e hā ʻoku lava ke tau ako mei heʻene nofo malí?

¹² Ko e hokosia ʻa e palōfita ko Hōseá ʻoku akoʻi mai ai kiate kitautolu fekauʻaki mo e anga ʻo e vakai ʻa e ʻOtuá ki he nofo malí. Naʻe tala ʻe he ʻOtuá kia Hōsea ke ne mali mo ha fefine ko Kōmela, ʻa ia ko ha “fefine feʻauaki” pea te ne maʻu mo ha “fānau ʻi heʻene feʻauakí.” Naʻe ʻi ai ʻa e foha ʻo Kōmela mo Hōsea. (Hōs. 1:2, 3) Ki mui ai, naʻe maʻu ʻe Kōmela ha taʻahine mo ha tamasiʻi, ngalingali mei ha tangata kehe. Neongo naʻe ʻikai ke fai tuʻo taha pē ʻe Kōmela ʻa e tonó, naʻe kei nofo pē ʻa Hōsea mo ia. Faifai atu pē, naʻá ne liʻaki ʻa Hōsea pea hoko ko ha pōpula. Neongo ia, naʻe ʻalu ʻa Hōsea ʻo fakatau mai ia. (Hōs. 3:1, 2) Naʻe ngāueʻaki ʻe Sihova ʻa Hōsea ke fakahaaʻiʻaki ʻa e anga ʻene toutou fakamolemoleʻi ʻa ʻIsileli ʻi he hili ʻa e taʻefaitōnunga ʻa e puleʻangá kiate Ia pea lotu ki he ngaahi ʻotua kehé. Ko e hā ʻe lava ke tau ako mei he nofo mali ʻa Hōseá?

¹³ Kapau ʻe fai ʻe ha hoa Kalisitiane ha ʻulungaanga taʻetaau, ko e Kalisitiane tonuhiá kuo pau ke ne fai ha fili. Naʻe pehē ʻe Sīsū ko e hoa tonuhiá ʻokú ne maʻu ha ʻuhinga totonu ke fai ha vete pea ʻatā leva ke toe mali. Kae kehe, heʻikai ke hala ia kapau ʻe fili ʻa e tokotaha tonuhiá ke fakamolemoleʻi hono hoá. Naʻe fakafoki mai ʻe Hōsea ʻa Kōmela. Hili ʻene foki mai kia Hōseá, naʻe tala ange ʻe Hōsea kiate ia heʻikai lava ke ne toe maʻu ha vahaʻangatae fakaefehokotaki fakasino mo ha toe tangata kehe. Ko Hōsea naʻe ʻikai ke ne “mohe” mo Kōmela ʻi ha vahaʻa taimi. (Hōs. 3:3, fakamatala ʻi lalo) Kae naʻe faai atu pē, kuo pau pē naʻe toe hoko atu ʻa e vā fakaemali ʻa Hōsea mo hono uaifí. Naʻe fakafofongaʻi heni ʻa e loto-lelei ʻa e ʻOtuá ke toe tali ʻa e kau ʻIsilelí pea hokohoko atu hono vahaʻangatae mo kinautolú. (Hōs. 1:11; 3:3-5) Ko e hā ʻoku akoʻi mai heni fekauʻaki mo e nofo malí ʻi he ʻahó ni? Kapau ʻe kamata ha hoa mali tonuhia ke toe hoko atu hono vahaʻangatae fakaefehokotaki fakasino mo e hoa halaiá, ʻoku fakahaaʻi ai ʻe he hoa tonuhiá kuó ne fakamolemoleʻi ia. (1 Kol. 7:3, 5) Pea heʻikai leva ke toe ʻi ai ha ʻuhinga totonu ke fai ha vete. Hili iá, ʻoku totonu ke ngāue fakataha ʻa e husepānití mo e uaifí pea fetokoniʻaki ke vakai ki he nofo malí ʻo hangē ko e vakai ʻa e ʻOtuá.

14. Fakatatau ki he 1 Kolinitō 7:10, 11, ko e hā ʻe hoko nai ʻi ha nofo mali?

¹⁴ ʻOku totonu ke fakaʻapaʻapaʻi ʻe he kau Kalisitiané kotoa ʻa e nofo malí ʻo hangē pē ko Sihova mo Sīsuú. Kae kehe, ʻi he taimi ʻe niʻihi ʻoku ʻikai ke fai pehē ʻa e niʻihi, koeʻuhí ʻoku tau taʻehaohaoa kotoa. (Loma 7:18-23) Ko ia ʻoku ʻikai totonu ke tau ʻohovale ko e niʻihi ʻi he muʻaki kau Kalisitiané naʻa nau fekuki mo e ngaahi palopalema mafatukituki ʻi heʻenau nofo malí. Naʻe tohi ʻe Paula “ʻoku totonu ke ʻoua naʻa māvae ha uaifi mo hono husepānití.” Ka ʻi he taimi ʻe niʻihi naʻe hoko ia.​—Lau ʻa e 1 Kolinitō 7:10, 11.

15, 16. (a) Ko e hā ʻoku totonu ke hoko ko e taumuʻa ʻa ha ongo meʻa ʻi he ʻi ai ha palopalema ʻi heʻena nofo malí, pea ko e hā hono ʻuhingá? (e) ʻOku anga-fēfē hono ngāueʻaki eni kapau ʻoku ʻikai tauhi kia Sihova ha hoa mali?

¹⁵ Naʻe ʻikai fakamatalaʻi ʻe Paula ʻa e ngaahi tuʻunga naʻá ne fakatupunga ʻa e māvae ʻa e ngaahi hoa malí. Ko e fakatātaá, ʻoku tau ʻilo naʻe ʻikai ko e palopalemá naʻe fai ʻe he husepānití ha fehokotaki fakasino taʻetaau. He ka pehē, naʻe maʻu ai ʻe he uaifí ha ʻuhinga ke vete pea toe mali. Naʻe tohi ʻe Paula ko ha uaifi naʻá ne māvae mo hono husepānití ʻoku totonu “ke ne nofo taʻemali ai pē, pea ka hala aí ko haʻane fakalelei mo hono husepānití.” Ko ia naʻe kei vakai ʻa e ʻOtuá ki he ongo meʻá ʻokú na kei mali. Naʻe pehē ʻe Paula ko e hā pē ha palopalema pe faingataʻa ʻe fekuki mo ha ongo meʻa, kapau naʻe ʻikai fakahoko ʻe ha taha ʻo kinaua ha fehokotaki fakasino taʻetaau, ʻoku totonu ko ʻena taumuʻá ke fakaleleiʻi, ʻa ia, ke solova ʻena ngaahi palopalemá peá na nofo fakataha ai pē. ʻE lava ke na kole tokoni ki he kau mātuʻá. Ko e kau mātuʻá heʻikai te nau kau ki ha faʻahi, ka ʻe lava ke nau ʻoatu ha faleʻi ʻaonga mei he Tohi Tapú.

¹⁶ Kae kehe, fēfē kapau ʻoku mali ha Kalisitiane mo ha tokotaha ʻoku ʻikai ke ne tauhi kia Sihova? ʻI he ʻi ai ha palopalema ʻi heʻena nofo malí, ʻoku ala tali ʻa e veté? Hangē ko ia naʻe lave ki ai ki muʻá, ʻoku pehē ʻe he Tohi Tapú ko e fehokotaki fakasino taʻetāú ʻa e ʻuhinga totonu ki he veté. Ka ʻoku ʻikai ke tala mai ʻe he Tohi Tapú ia ʻa e ngaahi ʻuhinga ke māvae nai ai ha ongo meʻa. Naʻe tohi ʻe Paula: “Kapau ʻoku maʻu ʻe ha fefine ha husepāniti taʻetui, pea ʻoku loto-lelei pē ʻa e husepānití ke ne nofo fakataha mo ia, tuku ke ʻoua te ne liʻaki hono husepānití.” (1 Kol. 7:12, 13) ʻOku ngāueʻaki foki eni ʻi he ʻahó ni.

17, 18. Ko e hā ʻoku kei nofo mali ai pē ʻa e kau Kalisitiane ʻe niʻihi neongo ʻenau fekuki mo e ngaahi palopalema mafatukitukí?

¹⁷ Neongo ia, kuo ʻi ai ʻa e ngaahi tuʻunga ʻa ia kuo fakahaaʻi ʻe ha “husepāniti taʻetui” ʻoku ʻikai ke ne ‘loto-lelei ke ne nofo’ fakataha mo hono uaifí. Ko e fakatātaá, ʻokú ne ngaohikoviʻi fakaesino tōtuʻa nai ia, ʻo aʻu ki ha tuʻunga ʻokú ne ongoʻi ʻoku ʻi he tuʻunga fakatuʻutāmaki ʻene moʻuí. ʻOkú ne fakafisi nai ke poupouʻi fakamatelie ia mo e fāmilí, pe ʻai ke faingataʻa kiate ia ke tauhi ki he ʻOtuá. ʻI he ngaahi tuʻunga ko iá, ʻe fili fakafoʻituitui nai ha uaifi Kalisitiane, neongo ʻa e meʻa ʻoku leaʻaki nai ʻe hono husepānití, ʻoku ʻikai ke ne ‘loto-lelei ke ne nofo fakataha’ mo ia pea ʻoku fiemaʻu ke na māvae. Ka ko e kau Kalisitiane kehe ʻi ha tuʻunga meimei tatau kuo nau fili ke nofo pē mo honau hoá. Kuo nau kātaki pea feinga ke ngāue ke fakaleleiʻi ʻenau nofo malí. Ko e hā ʻoku nau fili ai ke fai peheé?

¹⁸ Kapau kuo māvae ha ongo meʻa ʻi ha tuʻunga pehē, ʻokú na kei mali pē pea ʻi ai nai mo e ngaahi faingataʻa naʻa tau lave ki ai ki muʻá. Naʻe toe ʻomai ʻe he ʻapositolo ko Paulá ha ʻuhinga ʻe taha ki ha ongo meʻa ke kei nofo fakataha. Naʻá ne tohi: “Ko e husepāniti taʻetuí kuo fakatoputapuʻi ia koeʻuhi ko hono vahaʻangatae mo hono uaifí, pea ko e uaifi taʻetuí kuo fakatoputapuʻi ia koeʻuhi ko hono vahaʻangatae mo e husepāniti tuí; he ka ne ʻikai ia, ʻe taʻemaʻa ʻa hoʻomou fānaú, ka ko eni ʻoku nau māʻoniʻoni.” (1 Kol. 7:14) Ko e kau Kalisitiane tokolahi naʻa nau fili ke nofo ai pē mo honau hoá ʻa ia ʻoku ʻikai ke nau tauhi kia Sihová neongo naʻe mātuʻaki faingataʻa ʻa e tuʻungá. Naʻe tautefito ʻenau fiefia ʻi heʻenau fai ha feilaulau pehē ʻi he taimi naʻe hoko ai ʻa honau hoá ki mui ange ko ha taha ʻo e Kau Fakamoʻoni ʻa Sihová.​—Lau ʻa e 1 Kolinitō 7:16; 1 Pita 3:1, 2.

19. Ko e hā ʻoku tokolahi ʻaupito ai ʻa e ngaahi nofo mali lavameʻa ʻi he fakatahaʻanga Kalisitiané?

¹⁹ Naʻe ʻomai ʻe Sīsū ha faleʻi fekauʻaki mo e veté, pea ʻomai ʻe he ʻapositolo ko Paulá ha akonaki fekauʻaki mo e māvaé. Naʻá na loto fakatouʻosi ke fakaʻapaʻapaʻi ʻe he kau sevāniti ʻa e ʻOtuá ʻa e nofo malí. ʻI he māmaní takatakai he ʻahó ni, ʻoku lahi fau ʻa e ngaahi nofo mali lavameʻa ʻi he fakatahaʻanga Kalisitiané. Mahalo ʻoku lava ke ke ʻilo ha ngaahi hoa mali fiefia tokolahi ʻi hoʻo fakatahaʻangá, ʻa ia ko e ngaahi husepāniti mateaki ʻoku nau ʻofa ʻi honau ngaahi uaifí mo e ngaahi uaifi anga-ʻofa ʻoku nau fakaʻapaʻapaʻi honau ngaahi husepānití. Ko kinautolu kotoa ʻoku nau fakahaaʻi ko e nofo malí ʻoku lava ke fakaʻapaʻapaʻi. Pea ʻoku lava ke tau fiefia ʻi hono fakamoʻoniʻi ʻe he ngaahi husepāniti mo e ngaahi uaifi ʻe laui miliona ʻa e moʻoni ʻa e folofola ʻa e ʻOtuá: “Ko e ʻuhinga eni ʻe tuku ange ai ʻe ha tangata ʻene tamaí mo ʻene faʻeé pea te ne pīkitai ki hono uaifí, pea ʻe hoko ʻa e toko uá ko e kakano pē taha.”​—ʻEf. 5:31, 33.