Hoko ʻa e Ngaahi Tomuʻa Fakaʻali ʻo e Puleʻanga ʻo e ʻOtuá ko ha Meʻa Moʻoni
“ʻOku mālō hoʻomou fakatokanga ki [he folofola fakaekikité], he ʻoku hange ko ha maama ʻoku ulo ʻi ha potu maomaonganoa.”—2 PITA 1:19.
1. Ko e hā ʻa e faikehekehe ʻoku tau maʻu ʻi he māmaní he ʻaho ní?
ʻOSI atu ʻa e faingataʻa kae haʻu ʻa e faingataʻa—ko ha tuʻunga tefito ia ʻoku hoko ʻi he māmani ʻo e ʻaho ní. Mei he ngaahi fakatuʻutāmaki fakaʻekolosiá ki he tautoitoi fakaemāmani lahí, ʻoku hā ngali ko e ngaahi palopalema ia ʻa e faʻahinga ʻo e tangatá ʻoku tupu ʻo ʻikai malava ke mapuleʻi. Naʻa mo e ngaahi lotu ʻo e māmaní kuo ʻikai malava ke nau tokoni. Ko hono moʻoní, ʻoku nau faʻa ʻai ʻo toe kovi ange ʻa e ngaahi meʻá ʻaki hono tafunaki ʻa e fusifusilotó, tāufehiʻá mo e mamahiʻi-fonuá ʻa ia ʻoku ʻā-vahevaheʻi ai ʻa e kakaí. ʻIo, hangē ko ia naʻe tomuʻa talá, ko e “poʻuli matolu” kuó ne ʻufiʻufi “ʻa e ngaahi faʻahinga.” (Aisea 60:2) Kae kehe, ʻi he taimi tatau pē, ʻoku hanga ʻa e laui miliona ki he kahaʻú mo e loto-maʻu. Ko e hā hono ʻuhingá? Koeʻuhi ʻoku nau tokanga ki he folofola fakaekikite ʻa e ʻOtuá “ʻoku hange ko ha maama ʻoku ulo ʻi ha potu maomaonganoa.” ʻOku nau fakaʻatā ʻa e “folofola,” pe pōpoaki ʻa e ʻOtuá, ʻoku maʻu he taimí ni ʻi he Tohi Tapú, ke ne tataki ʻenau ngaahi laká.—2 Pita 1:19.
2. Fakatatau ki he kikite ʻa Taniela fekauʻaki mo e “taimi fakamui,” ko hai pē ʻoku ʻoange ki ai ʻa e fakamaama fakalaumālié?
2 ʻI he fekauʻaki mo e “taimi fakamui,” naʻe tohi ʻe he palōfita ko Tanielá: “ʻE lele holo ha tokolahi, pea ʻe fakautuutu ʻa e ʻilo. Ko e tokolahi te nau fakamaʻa kinautolu, mo fakahinehina, mo nau sivi ke aʻu; ka ʻe fai angahala ʻa e kau angahala; pea ʻe ʻikai ʻuhinga ki ha taha ʻo e kau angahala, ka ko e kau fakapotopoto ʻe ʻuhinga ki ai.” (Taniela 12:4, 10) Ko e fakamaama fakalaumālié ʻoku tuku mai pē ia ki he faʻahinga ʻoku nau “lele holo” loto-moʻoni pe ako tōtōivi ʻa e Folofola ʻa e ʻOtuá, anga-nofo ki heʻene ngaahi tuʻungá, pea feinga ke fai hono finangaló.—Mātiu 13:11-15; 1 Sione 5:20.
3. ʻI he lolotonga ʻa e 1870 tupú, ko e hā ʻa e moʻoni mahuʻinga naʻe ʻiloʻi ʻe he muʻaki kau ako Tohi Tapú?
3 ʻI he kamakamata mai ʻa e 1870 tupú, ki muʻa ʻi he kamata “ʻa e kuonga fakamui,” naʻe kamata ai ʻe Sihova ko e ʻOtuá ke ʻomai ʻa e maama lahi ange ki he “ngaahi fakalilolilo toputapu ʻo e puleʻanga ʻo hēvaní.” (2 Timote 3:1-5; Mātiu 13:11, NW) ʻI he taimi ko iá naʻe ʻiloʻi ai ʻe ha kulupu ʻo e kau ako Tohi Tapú—ʻo kehe ʻaupito mei he fakakaukau manakoá—ko e toe foki mai ʻa Kalaisí ʻe taʻehāmai. ʻI he hili hono fakanofo tuʻi ʻi hēvaní, ʻe toe foki mai ʻa Sīsū ʻi he ʻuhinga ko hono fakahangataha mai ʻene tokanga fakatuʻí ki he māmaní. ʻE fakahaaʻi ʻe ha fakaʻilonga hāmai mo faʻu fetuiaki ki heʻene kau ākongá kuo kamata ʻa ʻene ʻi ai taʻehāmaí.—Mātiu 24:3-14.
Taimi ʻo e Hoko ha Meʻa Naʻe Tomuʻa Fakaʻali ko ha Meʻa Moʻoni
4. Kuo anga-fēfē hono fakaivimālohiʻi ʻe Sihova ʻa e tui ʻa ʻene kau sevāniti ʻi onopōní?
4 Naʻe hoko ʻa e vīsone fakasinokehé ko ha tomuʻa fakaʻali mataʻāʻā mai ia ʻo Kalaisi ʻi he lāngilangi ʻo e Puleʻangá. (Mātiu 17:1-9) Naʻe fakaivimālohiʻi ʻe he vīsone ko iá ʻa e tui ʻa Pita, Sēmisi, mo Sioné, ʻi ha taimi ʻa ia naʻe tuku ai ʻe he tokolahi ʻenau muimui ʻia Sīsuú koeʻuhi ko e ʻikai te ne fakahoko ʻenau ngaahi ʻamanaki taʻefakatohitapú. ʻOku pehē pē ʻi he taimi ko ʻeni ʻo e ngataʻangá, kuo fakaivimālohiʻi ʻe Sihova ʻa e tui ʻa ʻene kau sevāniti ʻi onopōní ʻaki hono ʻomai kiate kinautolu ʻa e fakamaama lahi ange ki he fakahoko ʻo e vīsone fakaofo ko iá mo e ngaahi kikite lahi ʻoku fekauʻaki mo iá. Tau lāulea ange he taimí ni ki ha niʻihi ʻo e ngaahi moʻoni fakalaumālie fakaivimālohi-tui ko ʻení.
5. Ko hai naʻe fakamoʻoniʻi ko e fetuʻu-ʻahó, pea naʻá ne “hopo” hake ʻanefē pea ʻi he founga fē?
5 ʻI he lave ki he fakasinokehé, naʻe tohi ʻe he ʻapositolo ko Pitá: “Kaeʻumaʻā ʻoku tau maʻu ʻa e folofola palofisai, ʻa ia ko e meʻa ʻoku pau ange; pea ʻoku mālō hoʻomou fakatokanga ki [he folofola fakaekikité], he ʻoku hange ko ha maama ʻoku ulo ʻi ha potu maomaonganoa, kaeʻoua ke mafoa ʻa e ata, pea hopo ʻa e fetuʻuʻaho ʻi homou loto.” (2 Pita 1:19) Ko e Fetuʻu-ʻAho fakaefakatātā ko iá, pe “Fetuʻu Ngingila, ko e Fetuʻu Pongipongi,” ko Sīsū Kalaisi ia kuo fakalāngilangiʻí. (Fakahā 22:16) Naʻá ne “hopo” hake ʻi he 1914 ʻi he taimi naʻe fanauʻi ai ʻa e Puleʻanga ʻo e ʻOtuá ʻi hēvaní, ʻo ne fakaʻilongaʻi ʻa e kamataʻanga ʻo ha kuonga foʻou. (Fakahā 11:15) ʻI he vīsone fakasinokehé, naʻe hā ai ʻa Mōsese mo ʻIlaisiā fakataha mo Sīsū, ʻokú na fetalanoaʻaki mo ia. Ko hai ʻokú na tomuʻa fakatātāʻí?
6, 7. Ko hai ʻoku fakafofongaʻi ʻe Mōsese mo ʻIlaisiā ʻi he fakasinokehé, pea ko e hā ʻa e fakaikiiki mahuʻinga ʻoku fakahā ʻe he Tohi Tapú ʻo fekauʻaki mo e faʻahinga ʻokú na fakafofongaʻí?
6 Koeʻuhi naʻe kaungāʻinasi ʻa Mōsese mo ʻIlaisiā ʻi he lāngilangi ʻo Kalaisí, kuo pau ʻoku fakafofongaʻi ʻe he ongo fakamoʻoni faitōnungá ni ʻa e faʻahinga ko ia ʻoku pule fakataha mo Sīsū ʻi hono Puleʻangá. Ko e mahino ko ia ʻoku ʻi ai ʻa e kau kaungā-pule ʻo Sīsuú ʻoku fehoanaki ia mo ha tomuʻa fakaʻali fakaevīsone ʻo e Mīsaia naʻe fakanofo tuʻí naʻe ʻoange ki he palōfita ko Tanielá. Naʻe sio ʻa Taniela ki ha “Taha hange ha hakoʻi tangata” ʻokú ne maʻu ha “hau taʻengata” meia “Talumeimuʻa,” ko Sihova ko e ʻOtuá. Kae fakatokangaʻi ʻa e meʻa ʻoku fakahā kia Taniela ʻi he hili pē ha taimi siʻi mei ai. ʻOkú ne tohi: “Ko e puleʻanga mo e hau mo e ivi ʻo e ngaahi puleʻanga ʻi he lalo langi katoa ʻe ʻatu ia ki he kakai tapu ʻa Elioni.” (Taniela 7:13, 14, 27) ʻIo, laka hake he senituli ʻe nima ki muʻa he fakasinokehé, naʻe fakahā ai ʻe he ʻOtuá ʻe kaungāʻinasi ʻa e “kakai tapu” papau ʻi he tuʻunga ngeia fakatuʻi ʻo Kalaisí.
7 Ko hai ʻa e kakai tapu ʻi he vīsone ʻa Tanielá? ʻI he lave ki he faʻahinga tāutaha ko iá ʻoku pehē ʻe he ʻapositolo ko Paulá: “Ko e Laumalie ʻoku ne kaungā-fakamoʻoni ʻe ia mo hotau laumalie, ʻo pehe, Ko e fanau ʻa e ʻOtua ʻa kitautolu. Pea kapau ko e fanau, ta ko e ngaahi ea foki, ko e ngaahi ea ʻo e ʻOtua, pea kaungā-ea mo Kalaisi; ʻo kapauā ʻoku tau kaungā-mamahi mo ia, ka tau kaungā-hake[a]kiʻi foki mo ia.” (Loma 8:16, 17) Ko e kakai tapú ko e kau ākonga pani moʻoni ia ʻe he laumālié ʻa Sīsuú. ʻI he tohi Fakahaá, ʻoku pehē ai ʻe Sīsū: “Ko ia ia te ne ikuna te u tuku ke ne nofo mo au ʻi hoku taloni, ʻo hangē naʻa ku ikuna mo au, ʻou nofo mo ʻeku ʻEiki ʻi hono taloni oʻona.” ʻI hono fakakātoa ko e toko 144,000, ko e ‘kau ikuna’ kuo toetuʻu ko ʻení, fakataha mo Sīsū, te nau pule mai ki he foʻi māmaní fakakātoa.—Fakahā 3:21; 5:9, 10; 14:1, 3, 4; 1 Kolinito 15:53.
8. Kuo anga-fēfē ʻa e kau ʻa e kau ākonga pani ʻa Sīsuú ʻi ha ngāue meimei tatau mo ia naʻe fai ʻe Mōsese mo ʻIlaisiaá, pea ko e hā hono ngaahi olá?
8 Ko ia, ko e hā ʻoku fakafofongaʻi ai ʻa e kau Kalisitiane paní ʻe Mōsese mo ʻIlaisiaá? Ko e ʻuhinga ki aí he ko e kau Kalisitiane ko iá, lolotonga ʻenau kei kakanó, ʻoku nau fai ʻa e ngāue meimei tatau mo ia naʻe fakahoko ʻe Mōsese mo ʻIlaisiaá. Ko e fakatātaá, ʻoku nau ngāue ko e kau fakamoʻoni ʻa Sihova, naʻa mo e ʻi he fehangahangai mo e fakatangá. (Aisea 43:10; Ngāue 8:1-8; Fakahā 11:2-12) ʻI he hangē ko Mōsese mo ʻIlaisiaá, ʻoku nau fakaeʻa loto-toʻa ʻa e lotu loí lolotonga ia ʻa e enginaki ki he kakai loto-totonú ke nau ʻoatu ʻa e anga-līʻoa maʻataʻatā ki he ʻOtuá. (Ekisoto 32:19, 20; Teutalonome 4:22-24; 1 Tuʻi 18:18-40) Kuo ʻi ai ha fua ʻo ʻenau ngāué? ʻAupito! Tuku kehe ʻa e tokoni ki hono fakatahatahaʻi ʻa e faʻahinga kotoa ʻo e kau paní, kuo nau tokoniʻi ʻa e laui miliona ʻo e “fanga sipi kehe” ke nau fakahāhā ʻa e anganofo loto-lelei kia Sīsū Kalaisi.—Sione 10:16; Fakahā 7:4.
Fakakakato ʻe Kalaisi ʻEne Ikuná
9. ʻOku anga-fēfē hono fakahaaʻi ʻe he Fakahā 6:2 ʻa Sīsū ʻi hono tuʻunga ʻi he ʻaho ní?
9 ʻI he ʻikai ke kei hoko ko ha tangata ʻoku heka ki ha ʻuhiki ʻo ha ʻasi, ko Sīsuú ko ha Tuʻi mālohi ia he taimí ni. ʻOku fakahaaʻi mai ia ʻokú ne heka ʻi ha hoosi—ko ha fakaʻilonga Fakatohitapu ia ʻo e tau. (Palovepi 21:31) “Vakai, pea ta ko e hoosi hinehina,” ko e lau ia ʻa e Fakahā 6:2, “pea ko ia naʻe heka ai naʻa ne toʻo ha kaufana; pea naʻe ʻange kiate ia ha kalauni: pea naʻa ne ʻalu atu, ko e ikuna pea ke ne [fakakakato ʻene] ikuna.” ʻIkai ko ia pē, ʻi he fekauʻaki mo Sīsuú, naʻe tohi ʻe he tokotaha-tohi-saame ko Tēvitá: “ʻE mafao atu ʻe Sihova mei Saione ʻa e sepita ʻo ho hau, heʻene pehe, ‘ʻI he lotolotonga ʻo ho ngaahi fili, pule pe koe.’”—Sāme 110:2.
10. (a) Naʻe anga-fēfē ʻa e kamata lāngilangiʻia ʻa e heka atu ʻa Sīsū ke ikuná? (e) Naʻe anga-fēfē hono uesia ʻe he ʻuluaki ikuna ʻa Kalaisí ʻa e māmaní fakalūkufua?
10 Ko e ʻuluaki ikuna ʻa Sīsuú naʻe fakahoko ia ki hono ngaahi fili mālohi tahá—ʻa Sētane mo e kau tēmenioó. ʻI hono kapusi kinautolu mei hēvaní, naʻá ne lī hifo kinautolu ki he māmaní. ʻI hono ʻiloʻi ʻoku toe siʻi pē honau taimí, kuo fakahaaʻi ai ʻe he ngaahi laumālie fulikivanu ko ʻení ʻenau ʻita tōlili ki he faʻahinga ʻo e tangatá, ʻo fakatupunga ai ʻa e faingataʻaʻia lahi. ʻOku fakatātaaʻi ʻa e faingataʻaʻia ko ʻení ʻi he tohi Fakahaá ʻaki ʻa e heka ʻa e toe kau tangata heka hoosi ʻe toko tolu. (Fakahā 6:3-8; 12:7-12) Hangē ko ia naʻe tomuʻa tala ʻi he kikite ʻa Sīsū fekauʻaki mo e “fakaʻilonga ʻo [ʻene] ʻi aí mo e fakaʻosiʻosi ʻo e ngaahi meʻa ʻoku tuʻu ní,” kuo iku ʻenau heká ki he tau, honge mo e mahaki fakaʻauha fakatupu mate. (Mātiu 24:3, 7, NW; Luke 21:7-11) ʻI he hangē ko e ngaahi langā moʻoni ʻo e teu fāʻelé, ko e ‘ngaahi langā’ ko ʻení ʻoku ʻikai ha veiveiua ʻe hokohoko atu ʻo fakalalahi kae ʻoua kuo hanga ʻe Kalaisi ʻo ‘fakakakato ʻene ikuná’ ʻaki hono fakaʻauha ʻa e toetoenga kotoa pē ʻo e kautaha hāmai ʻa Sētané.a—Mātiu 24:8.
11. ʻOku anga-fēfē ʻa e fakamoʻoni ʻa e hisitōlia ʻo e fakatahaʻanga Kalisitiané ki he mafai fakatuʻi ʻo Kalaisí?
11 ʻOku toe hā mahino ʻa e mafai fakatuʻi ʻo Sīsuú ʻi heʻene maluʻi mai ʻa e fakatahaʻanga Kalisitiané koeʻuhi ke lava ʻo ne fakahoko ʻa e fekau ke ne malangaʻi ʻa e pōpoaki ʻo e Puleʻangá ʻi māmani lahi. Neongo ʻa e fakafepaki anga-fakamanu mei Pāpilone ko e Lahí—ʻa e ʻemipaea ʻo e lotu loí ʻi he māmaní—pea mei he ngaahi puleʻanga fakafilí, kuo ʻikai ke ngata pē ʻi he hokohoko mai ʻa e ngāue fakamalangá ka kuo aʻu ia ki ha tuʻunga taʻefakatataua ʻi he hisitōlia ʻo e māmaní. (Fakahā 17:5, 6) Ko ha fakamoʻoni mālohi ē ki he tuʻunga-tuʻi ʻo Kalaisí!—Sāme 110:3.
12. Ko e hā ʻoku ʻikai ʻiloʻi ai ʻe he tokolahi taha ʻo e kakaí ʻa e ʻi ai taʻehāmai ʻa Kalaisí?
12 Ka neongo ia, ko e meʻa pangó, ko e tokolahi taha ʻo e kakaí, kau ai ʻa e laui miliona ʻoku nau taku ko e kau Kalisitiane kinautolú, ʻoku ʻikai te nau ʻiloʻi ʻa e ngaahi moʻoniʻi meʻa taʻehāmai ʻoku tuʻu mei mui ʻi he ngaahi meʻa mahuʻinga ʻoku hoko ʻi he māmaní. ʻOku aʻu ʻo nau manuki ki he faʻahinga ʻoku nau fanongonongo ʻa e Puleʻanga ʻo e ʻOtuá. (2 Pita 3:3, 4) Ko e hā hono ʻuhingá? Koeʻuhi kuo fakakuihi ʻe Sētane honau ʻatamaí. (2 Kolinito 4:3, 4) Ko hono moʻoní, naʻá ne kamata ke fakakuihi ʻa e faʻahinga naʻe taku ko e kau Kalisitiané ʻaki ʻa e fakapoʻuli fakalaumālie ʻi he ngaahi senituli lahi kuo maliu atú, naʻa mo hono fakatupunga ke nau siʻaki ʻa e ʻamanaki mātuʻaki mahuʻinga ʻo e Puleʻangá.
Siʻaki ʻa e ʻAmanaki ʻo e Puleʻangá
13. Ko e hā naʻe taki atu ki ai ʻa e fakapoʻuli fakalaumālié?
13 Naʻe tomuʻa tala ʻe Sīsū ko e kau tafoki mei he moʻoní, hangē ko e tea naʻe tūtuuʻi ʻi he lotolotonga ʻo e uité, te nau moulu mai ki he fakatahaʻanga Kalisitiané ʻo takiheeʻi ha tokolahi. (Mātiu 13:24-30, 36-43; Ngāue 20:29-31; Siutasi 4) ʻI he faai mai ʻa e taimí, naʻe ohi ai ʻe he kau Kalisitiane lau pē ko ʻení ʻa e ngaahi kātoanga, ngaahi tōʻonga, mo e ngaahi akonaki fakapangani, ʻo aʻu ki hono lau kinautolu ʻoku “faka-Kalisitiane.” Ko e fakatātaá, naʻe kamata ʻa e Kilisimasí ʻi he ngaahi ouau naʻe kau ai ʻa e lotu ki he ongo ʻotua pangani ko Mītila mo Sātuna. Ka ko e hā naʻá ne fakalotoʻi ʻa e faʻahinga naʻe taku ko e kau Kalisitiané ke nau ohi ʻa e ngaahi kātoanga taʻefakakalisitiane ko ʻení? ʻOku pehē ʻe he New Encyclopædia Britannica (1974): “Ko e Kilisimasí, ʻa e kātoanga ʻo e ʻaloʻi ʻo Sīsū Kalaisí, naʻe fekauʻaki ʻa hono fokotuʻú mo e mōlia atu ʻa e ʻamanaki ki he toe foki vave mai ʻa Kalaisí.”
14. Naʻe anga-fēfē hono hanga ʻe he ngaahi akonaki ʻa ʻOliseni mo ʻAokositainé ʻo fakaʻuhingahalaʻi ʻa e moʻoni ʻo e Puleʻangá?
14 Toe fakakaukau ange ki he mioʻi ʻo e ʻuhinga ʻo e foʻi lea “puleʻanga.” ʻOku pehē ʻe he tohi The Kingdom of God in 20th-Century Interpretation: “Ko ʻOliseni [ko ha teolosia ʻi he senituli hono tolú] ʻokú ne fakaʻilongaʻi ʻa e liliu ʻi he ngāueʻaki faka-Kalisitiane ʻo e ‘puleʻangá’ ki he ʻuhinga fakaeloto ʻo e pule ʻa e ʻOtuá ʻi he lotó.” Naʻe makatuʻunga ʻa e akonaki ʻa ʻOlisení ʻi he hā? ʻIkai ʻi he Tohi Tapú, ka ʻi he “faʻunga ʻo ha filōsofia mo e vakai fakaemāmani ʻoku kehe ʻaupito ia mei he fakakaukau ʻa Sīsū mo e muʻaki siasí.” ʻI heʻene tohi De Civitate Dei (Ko e Kolo ʻo e ʻOtuá), naʻe fakahā ai ʻe ʻAokositaine ʻo Hipó (354-430 T.S.) ko e siasí tonu ko e Puleʻanga ia ʻo e ʻOtuá. Naʻe hanga ʻe he fakakaukau taʻefakatohitapu peheé ʻo ʻoange ki he ngaahi siasi ʻo e Puleʻanga-Haʻa-Kalisitiané ʻa e ngaahi ʻuhinga fakateolosia ke ohi ai ʻa e mafai fakapolitikalé. Pea naʻa nau ngāueʻaki ʻa e mafai peheé he ngaahi senituli lahi, ʻo faʻa fakahoko ʻi he anga-fakamanu.—Fakahā 17:5, 18.
15. Kuo anga-fēfē hono fakahoko ʻo e Kaletia 6:7 ʻi he fekauʻaki mo e ngaahi siasi lahi ʻo e Puleʻanga-Haʻa-Kalisitiané?
15 Neongo ia, ʻi he ʻahó ni, ʻoku utu ai ʻe he ngaahi siasí ʻa e meʻa kuo nau tūtūʻí. (Kaletia 6:7) ʻOku hā ʻoku mole mei he ngaahi siasi lahi honau mafaí pea pehē ki he faʻahinga ʻi honau ngaahi vāhenga fakasiasí. ʻOku ʻiloa lahi ʻa e tuʻunga ko iá ʻi ʻIulope. Fakatatau ki he nusipepa ko e Christianity Today, “ʻi he taimí ni ko e ngaahi fale lotu lalahi ʻo ʻIulopé [ʻoku hoko] ʻo ʻikai ko ha ngaahi fale ʻo e lotú ka ko e ngaahi misiume, ʻo ʻahia pē ʻe he kau folau ʻeveʻevá.” Ko e tuʻunga tatau pē ʻoku lava ke mātā ʻi he ngaahi feituʻu kehe ʻo e māmaní. Ko e hā ʻoku fakakite mai ʻe he meʻá ni ki he lotu loí? Te ne mate pē ʻi he ʻikai ke poupouʻí? Pea ʻe anga-fēfē hono uesia ai ʻa e founga lotu moʻoní?
Mateuteu ki he ʻAho Lahi ʻo Sihová
16. Ko e hā ʻoku mahuʻinga ai ʻa e tupulekina ʻa e fakafili ki Pāpilone ko e Lahí?
16 Hangē pē ko e fakakite mai nai ʻe he puhi hake ʻa e kohu mo e efu mei ha moʻunga afi naʻe mate ngūngū ki muʻa ha pā ʻa e moʻunga afí ʻoku tuʻunuku mai, ko e tupulekina ʻa e fakafili ki he lotú ʻi he ngaahi feituʻu lahi ʻo e māmaní ko ha fakahāhā ia ko e ngaahi ʻaho ʻo e lotu loí kuo vavé ni ke ngata. Kuo vavé ni, ke ueʻi ʻe Sihova ʻa e ngaahi ʻelemēniti fakapolitikale ʻo e māmaní ke nau fāʻūtaha ʻi he ngaahi feinga ke fakaeʻa pea fakaʻauha ʻa e paʻumutu fakalaumālie ko Pāpilone ko e Lahí. (Fakahā 17:15-17; 18:21) ʻOku totonu ki he kau Kalisitiane moʻoní ke nau manavahē ki he meʻa ko iá pea mo e ngaahi tafaʻaki kehe ʻo e fuʻu “mamahi lahi” ʻe hoko mai aí? (Mātiu 24:21) ʻIkai ʻaupito! Te nau maʻu moʻoni ʻa e ngaahi ʻuhinga ke fiefia ʻi he taimi ʻe ngāue ai ʻa e ʻOtuá ki he fulikivanú. (Fakahā 18:20; 19:1, 2) Fakakaukau atu ki he fakatātā fekauʻaki mo Selusalema ʻo e ʻuluaki-senitulí pea mo e kau Kalisitiane naʻe nofo aí.
17. Ko e hā ʻe lava ai ʻa e kau sevāniti faitōnunga ʻa Sihová ʻo fehangahangai ʻi he loto-maʻu mo e ngataʻanga ʻo e fokotuʻutuʻu ko ʻení?
17 ʻI he taimi naʻe ʻākoloʻi ai ʻe he ngaahi kongakau Lomá ʻa Selusalema ʻi he 66 T.S., naʻe ʻikai ke ʻohovale pe ilifia ʻa e kau Kalisitiane naʻe ʻāʻā fakalaumālié. ʻI he hoko ko e kau ako lelei ʻo e Folofola ʻa e ʻOtuá, naʻa nau ʻilo ‘kuo ofi hono fakaʻauhá.’ (Luke 21:20) Naʻa nau toe ʻiloʻi ʻe hanga ʻe he ʻOtuá ʻo fakaʻatā ʻa e hala kiate kinautolu ke nau hola ai ʻo hao. ʻI he hoko ʻa e meʻa ko iá, naʻe hola ai ʻa e kau Kalisitiané. (Taniela 9:26; Mātiu 24:15-19; Luke 21:21) ʻOku pehē pē ʻi he ʻahó ni, ko e faʻahinga ʻoku nau ʻiloʻi ʻa e ʻOtuá pea talangofua ki hono ʻAló ʻe lava ke nau fehangahangai ʻi he loto-maʻu mo e ngataʻanga ʻo e fokotuʻutuʻu ko ʻení. (2 Tesalonaika 1:6-9) Ko hono moʻoní, ʻi he taimi ʻe patō ai ʻa e fuʻu mamahi lahí, te nau fiefia ʻo ‘tutuʻu ki ʻolunga ʻo hanga hake. He ko e ofi ia honau fakahaofí.’—Luke 21:28, KF.
18. Ko e hā ʻa e ikuʻanga ʻo e ʻoho fakaʻosi fakahangatonu ʻa Koki ki he kau sevāniti ʻa Sihová?
18 ʻI he hili hono fakaʻauha ʻo Pāpilone ko e Lahí, ʻi hono ngafa ʻi he tuʻunga ko Koki ʻo Mēkokí, ʻe kamata ai ʻe Sētane ha ʻoho fakaʻosi fakahangatonu ki he Kau Fakamoʻoni melino ʻa Sihová. ʻI heʻenau ʻalu hake “ke ʻufiʻufi ʻa e fonua hange ha ʻao,” ʻe ʻamanekina ai ʻe he ngaahi kongakau ʻa Kokí ha ikuna faingofua. Ko ha ʻohovale lahi ē ʻoku fakatatali mai kiate kinautolú! (Isikeli 38:14-16, 18-23) ʻOku tohi ʻe he ʻapositolo ko Sioné: “Pea u vakai kuo fakaava ʻa e langi, pea tā ko ha hōsi hinehina; pea ko ia naʻe heka ai naʻe ui ko Falalaʻanga mo Moʻoni . . . naʻe ʻalu mei hono ngutu ʻa e heleta masila ke ne tāʻi ʻaki ʻa e ngaahi kakai.” Ko e “Tuʻi ʻo e ngaahi tuʻi” taʻealaikunaʻi ko ʻení te ne fakahaofi ʻa e kau lotu mateaki ʻa Sihová pea fakaʻauha ʻosiʻosingamālie ʻa e kotoa ʻo honau ngaahi filí. (Fakahā 19:11-21) Ko ha tumutumu lahi ē ʻo e fakahoko ʻo e vīsone fakasinokehé!
19. ʻE anga-fēfē ʻa e maongo ʻa e ikuna fakaʻaufuli ʻa Kalaisí ki heʻene kau ākonga mateakí, pea ko e hā ʻoku totonu ke nau feinga ke fai he taimi ní?
19 ʻE hoko ʻa Sīsū ʻo “fakatumutumu ai, i he aho koia, akinautolu kotoabe oku tui.” (2 Tesalonaika 1:10, PM) ʻOkú ke loto ke ke ʻi he lotolotonga ʻo e faʻahinga te nau tuʻu ʻo fakatumutumu ʻi he ʻAlo ikuna ʻo e ʻOtuá? Peʻi hokohoko atu hono fakaivimālohiʻi hoʻo tuí pea ke ‘toka teuteu: he ko e hoko mai ʻa e Fanautama ʻa Tangatá ʻe fai ʻi ha taimi ʻoku ʻikai te ke ʻamanaki ai kiate iá.’—Mātiu 24:43, 44.
Ke Ke Nofoʻaki Fakakaukau Lelei
20. (a) ʻE lava fēfē ke tau fakahāhā ʻetau houngaʻia ki he tokonaki ʻa e ʻOtuá ko e “tamaioeiki agatonu mo boto”? (e) Ko e hā ʻa e ongo fehuʻi ʻoku totonu ke tau ʻeke hifo kiate kitautolú?
20 ʻOku enginaki maʻu pē “ae tamaioeiki agatonu mo boto” ki he kakai ʻa e ʻOtuá ke nau hanganaki leʻo fakalaumālie pea ke nau nofoʻaki fakakaukau lelei. (Mātiu 24:45, 46, PM; 1 Tesalonaika 5:6, NW) ʻOkú ke houngaʻia ʻi he ngaahi fakamanatu taimi tonu ko ʻení? ʻOkú ke ngāueʻaki kinautolu ʻi hono fokotuʻu ʻo e ngaahi meʻa ke muʻomuʻa ʻi he moʻuí? Ko e hā ʻoku ʻikai ʻeke hifo ai kiate koe: ‘ʻOku ou maʻu ha vakai māʻalaʻala fakalaumālie ʻokú ne fakaivia au ke u sio ki he ʻAlo ʻo e ʻOtuá ʻoku lolotonga pule ʻi hēvani? ʻOku ou ʻiloʻi ʻokú ne mateuteu ke fakahoko ʻa e fakamaau fakaʻotua ki Pāpilone ko e Lahi pea mo e toenga ʻo e fokotuʻutuʻu ʻa Sētané?’
21. Ko e hā nai kuo fakaʻatā ai ʻe he niʻihi ʻenau vakai fakalaumālié ke hoko ʻo nenefú, pea ko e hā ʻa e meʻa fakavavevave ke nau faí?
21 Kuo fakaʻatā ʻe he niʻihi ʻoku nau feohi he taimí ni mo e kakai ʻa Sihová ʻa ʻenau vakai fakalaumālié ke hoko ʻo nenefu. ʻOku hoko iá koeʻuhi ko e ʻikai haʻanau kātaki pe kītaki, ʻo hangē ko ia naʻe maʻu ʻe he niʻihi ʻo e muʻaki kau ākonga ʻa Sīsuú? Kuo hanga ʻe he ngaahi loto-moʻua ʻo e moʻuí, tuli ki he meʻa fakamatelié, pe fakatangá ʻo uesia kinautolu? (Mātiu 13:3-8, 18-23; Luke 21:34-36) Mahalo pē kuo faingataʻa ki he niʻihi ke nau mahinoʻi ha fakamatala kuo pulusi ʻe he “tamaioeiki agatonu mo boto.” Kapau kuo hoko ha taha ʻo e ngaahi meʻá ni kiate koe, ʻoku mau naʻinaʻi atu ke ke ako ʻa e Folofola ʻa e ʻOtuá fakataha mo ha faivelenga kuo toe fakafoʻou pea ke kole kia Sihova koeʻuhi ke ke toe maʻu ha vahaʻangatae mālohi mo vāofi mo ia.—2 Pita 3:11-15.
22. Kuo anga-fēfē ʻene maongo kiate koe ʻa e lāulea ki he vīsone fakasinokehé pea mo e ngaahi kikite fekauʻaki mo iá?
22 Naʻe ʻoange ʻa e vīsone fakasinokehé ki he kau ākonga ʻa Sīsuú ʻi he taimi naʻa nau fiemaʻu ai ʻa e fakalototoʻá. ʻI he ʻahó ni, ʻoku tau maʻu ai ha meʻa ʻoku lahi mamaʻo ange ia ke ne fakaivimālohiʻi kitautolu—ko e fakahoko ʻo e tomuʻa fakaʻali fakaofo ko iá mo e ngaahi kikite lahi fekauʻaki mo iá. ʻI heʻetau fakakaukauloto atu ki he ngaahi moʻoni lāngilangiʻia ko ʻení pea mo honau ʻuhinga ki he kahaʻú, ʻofa ke tau kau mo kitautolu foki ʻi hono fakahaaʻi ʻaki ʻa e kotoa ʻo hotau lotó ʻa e fakakaukau ʻa e ʻapositolo ko Sioné ʻi heʻene pehē: “ʻEmeni. ʻEiki Sisu, ke ke haʻele mai.”—Fakahā 22:20.
[Fakamatala ʻi lalo]
a ʻI he muʻaki lea faka-Kalisí, ko e foʻi lea naʻe liliu ko e “langā” ʻoku ʻuhinga fakafoʻilea ia ki he “ngaahi langā ʻo e fāʻelé.” (Mātiu 24:8, Kingdom Interlinear) ʻOku fokotuʻu mai ʻe he meʻá ni ʻi he hangē ko e ngaahi langā fāʻelé, ko e ngaahi palopalema ʻa e māmaní ʻe tupulekina ʻi he hoko tuʻo lahí, ʻi hono lahí, mo e lōloá, ʻo tumutumuʻaki ʻa e fuʻu mamahi lahí.
ʻOkú Ke Manatuʻi?
• ʻI he 1870 tupú, ko e hā naʻe hoko ʻo mahinoʻi fekauʻaki mo e toe foki mai ʻa Kalaisí ʻe ha kiʻi kulupu ʻo ha kau ako Tohi Tapu?
• Kuo anga-fēfē hono fakahoko ʻo e vīsone fakasinokehé?
• Ko e hā ʻa e ola ʻo e heka ikuna mai ʻa Kalaisí ki he māmaní pea ki he fakatahaʻanga Kalisitiané?
• Ko e hā kuo pau ke tau fai ka tau ʻi he lotolotonga ʻo e faʻahinga ko ia te nau hao atu ʻi he taimi ʻe fakakakato ai ʻe Sīsū ʻene ikuná?
[Fakatātā ʻi he peesi 16, 17]
Hoko ha meʻa naʻe tomuʻa fakaʻali ko ha meʻa moʻoni
[Fakatātā ʻi he peesi 18]
ʻOkú ke ʻiloʻi ʻa e meʻa naʻe hoko ʻi he taimi naʻe kamata ai ʻe Kalaisi ʻene ikuná?