3, 4. (a) Ko e hā moʻoni ʻa e meʻa ʻoku fiemaʻu ʻe Sihova meiate kitautolu ʻi he ʻaho ní? (e) Ko e hā ʻoku totonu ai ke tau muimui ofi ʻia Sīsū ʻo topuvaʻe taha mo iá?

³ ʻI he lolotonga ʻa e taʻu fakaʻosi ʻo e ngāue fakafaifekau ʻa Sīsuú, naʻe ʻalu fakataha mo ia ki ha moʻunga māʻolunga ʻa ʻene kau ʻapositolo ko ia ko Pita, Sēmisi, mo Sione, ki ha foʻi toka lelei nai ʻi Moʻunga Heamoni. Naʻa nau mamata ai ʻi ha vīsone fakaekikite ʻo Sīsū ʻi he lāngilangi fisifisimuʻa pea fanongo ai ki he leʻo ʻo e ʻOtuá tonu heʻene talaki: “Ko hoku ʻAlo Pele ʻena, ʻa ia kuo u hōifua ai; mou fakaongo kiate ia.” (Mātiu 17:​1-5) Ko hono moʻoní, ko e meʻa ia ʻoku fiemaʻu mai ʻe Sihova meiate kitautolú​—ke fakaongo ki hono ʻAló pea muimui ʻi heʻene faʻifaʻitakiʻangá mo ʻene ngaahi akonakí. (Mātiu 16:24) Ko ia, naʻe tohi ʻe he ʻapositolo ko Pitá: “Naʻe kataki mamahi ʻa Kalaisi foki koeʻuhi ko kimoutolu, ʻo ne tuku ha faʻifaʻitakiʻanga kiate kimoutolu, ke mou muimui ofi, ʻo topuvaʻe taha mo ia.”​—1 Pita 2:21.

 5. Ko e hā ʻa e lao ʻoku moʻulaloa ki ai ʻa e kau Kalisitiané, pea naʻe ngāue ʻa e lao ko iá ʻanefē?

⁵ Ko e hā ʻoku kau ki he fakaongo kia Sīsū pea faʻifaʻitaki kiate iá? ʻOku ʻuhinga iá ke hoko ʻo ʻi he malumalu ʻo ha lao? Naʻe tohi ʻe Paula: “Talaʻehai ko haʻaku ongoʻi kuo u moʻulaloa ki he Lao.” Naʻá ne lave heni ki he “fuakava motuʻa,” ʻa e Lao fuakava naʻe fai mo ʻIsilelí. Naʻe ʻilo ʻe Paula naʻá ne ʻi he “loto lao ʻa Kalaisi.” (1 Kolinito 9:​20, 21; 2 Kolinito 3:​14) ʻI he ngata ʻa e Lao fuakava motuʻá, naʻe hoko mai leva ha “fuakava foʻou” mo ʻene “lao ʻa Kalaisi” ʻa ia ʻoku moʻuaʻaki ʻe he kau sevāniti kotoa pē ʻa Sihova ʻi he ʻaho ní ke nau talangofua ki ai.​—Luke 22:20; Kaletia 6:2; Hepelu 8:​7-13.