Vahe 62

Ko ha Lēsoni ʻi he Anga-Fakatōkilaló

HILI ʻene fakamoʻui ha tamasiʻi ʻāvanga he potu fonua ofi ki Sesalia Filipaí, naʻe fakaʻamu ʻa Sīsū ke foki ki hono ʻapí ki Kāpaneume. Kae kehe, naʻá ne fiemaʻu ko ia pē mo ʻene kau ākongá ke nau fonongá koeʻuhi ke ne toe teuteuʻi atu kinautolu ki heʻene pekiá pea mo honau ngaahi fatongia ʻamuí. “ʻOku nānāfaki ke tukuange ʻa e Fanautama ʻa tangatá ki he nima ʻo e kakaí,” ko ʻene fakamatala ia kiate kinautolú, “pea te nau tāmateʻi ia, pea ʻi hono ʻaho tolú ʻe toe fokotuʻu ia.”

Neongo naʻe ʻosi lea ʻa Sīsū fekauʻaki mo e meʻá ni ki muʻa, pea naʻe sio tonu ʻa e kau ʻaposetolo ʻe toko tolu ki heʻene fakasinokehe ʻa ia naʻe lolotonga fai ai ʻa e fetalanoaʻaki fekauʻaki mo ʻene “mavahe,” naʻe teʻeki ai pē ke mahino ki hono kau muimuí ʻa e meʻá ni. Neongo naʻe ʻikai ha taha ʻiate kinautolu ʻe feinga ke ne fakaʻikaiʻi ʻa e teu ke tāmateʻi iá, hangē ko ia naʻe fai ʻe Pita ki muʻá, naʻa nau manavahē ke nau toe fehuʻi kiate ia ʻo kau ki he meʻá ni.

Faifai atu pē pea nau haʻu ki Kāpaneume, ʻa ia ko e feituʻu ʻeni naʻa nau nofo fakamaʻunga ki ai he lolotonga ʻo e ngāue fakafaifekau ʻa Sīsuú. Ko e toe feituʻu foki ʻeni ʻo Pita mo e kau ʻaposetolo kehe ʻe niʻihi. ʻI aí, ko e kau tangata ʻoku nau tānaki ʻa e tukuhau ki he temipalé naʻa nau fakaofi mai kia Pita. Mahalo ko ʻenau feingá ke fakakau ʻa Sīsū ʻi hano maumauʻi ha tōʻonga fakafonua, ʻo nau fehuʻi: “ʻOku fai ʻapē ʻe hoʻomou tangataʻeikí ʻa e tukuhau fakasiasí [ki he temipalé]?”

“Ko ia,” ko e tali ia ʻa Pita.

Ngalingali naʻe aʻu mai ʻa Sīsū ki he falé he hili ha taimi siʻi pē mei ai, ʻo ne ʻiloʻi ʻa e meʻa naʻe hokó. Ko ia ki muʻa ke lea ʻa Pita ki he meʻá ni, naʻe fehuʻi atu ʻe Sīsū: “Ko e hā hoʻo poa, Saimone? Ko e ngaahi tuʻi ʻo māmaní ʻoku nau tānaki tute mo e tukuhaú meia hai? Mei he faleʻaló, pe mei he kakai kehé?”

“Mei he kakai kehé pē,” ko e tali ia ʻa Pitá.

“ʻAua, pea tā ʻoku ʻataʻatā ʻa e faleʻaló,” ko e lea ia ʻa Sīsuú. Koeʻuhi ko e Tamai ʻa Sīsuú ko e Tuʻi ia ʻo e ʻuniveesí, ko e Tokotaha ia naʻe fai ki ai ʻa e lotú ʻi he temipalé, ʻoku ʻikai ko ha fiemaʻu fakalao ia ki he ʻAlo ʻo e ʻOtuá ke totongi ʻa e tukuhau ki he temipalé. “Ka koeʻuhi ke ʻoua naʻa tau fakatūkia kinautolu,” ko e lea ia ʻa Sīsuú, “ʻalu koe ki tahi, ʻo lafo ha mātaʻu, pea ko e ʻuluaki ika ʻe kaí ke ke toʻo ʻo faʻai hono ngutú, pea te ke ʻilo ai ha foʻi sikeli [koini]. Toʻo ia ʻo ʻange kiate kinautolu maʻaku mo koe.”

ʻI he fakatahataha mai ʻa e kau ākongá hili ʻenau foki ki Kāpaneumé, mahalo pē ʻi he fale ʻo Pitá, naʻa nau ʻeke: “Ko hai nai ʻe lahi ʻi he puleʻanga ʻo hēvaní?” Naʻe ʻiloʻi ʻe Sīsū ʻa e meʻa naʻá ne fakatupunga ʻenau fehuʻí, koeʻuhi naʻá ne ʻiloʻi ʻa e meʻa naʻe ʻiate kinautolu ʻi heʻenau muimui fakatoupīkoi mai ʻiate ia ʻi heʻenau foki mei Sesalia Filipaí. Ko ia naʻá ne fehuʻi: “Ko e hā ʻa e meʻa naʻa mou fakakikihi ki ai ʻi he halá?” ʻI he mā ʻa e kau ākongá, naʻa nau longo pē he naʻa nau fakakikihi ʻi he halá pe ko hai ʻe lahí.

Hili ʻa e meimei taʻu ʻe tolu ʻo e faiako ʻa Sīsuú, naʻe ngalingali faingataʻa ke tui ʻe kei ʻi he kau ākongá ha fekīhiaki pehē? ʻOku hā mei ai ʻa e tākiekina mālohi ʻa e taʻehaohaoa fakaetangatá, pea pehē ki he ʻātakai fakalotú. Ko e lotu faka-Siu ko ia naʻe tupu hake ai ʻa e kau ākongá naʻe fakamamafaʻi ai ʻa e tuʻungá pe lakangá ʻi he meʻa kotoa pē. Tānaki atu ki ai, mahalo ko Pita, koeʻuhi ko e palōmesi ange ʻa Sīsū ke ne maʻu ha “ngaahi kī” ki he Puleʻangá, naʻá ne ongoʻi ai ʻokú ne māʻolunga ange. Ngalingali naʻe maʻu ʻe Sēmisi mo Sione ʻa e fakakaukau meimei tatau koeʻuhi ko ʻena maʻu ʻa e faingamālie ke sio tonu he fakasinokehe ʻa Sīsuú.

Pe ko e hā pē ʻa e meʻá, naʻe fai ʻe Sīsū ha fakatātā ko ʻene feinga ke fakatonutonu ʻenau ngaahi fakakaukaú. Naʻá ne ui ha tamasiʻi, ʻo fokotuʻu ʻi honau haʻohaʻongá, pea puke ʻaki ia hono nimá, peá ne pehē: “Kapau ʻe ʻikai te mou liliu, ʻo hoko ʻo hangē ko e tamaikí, ʻe ʻikai ʻaupito te mou hū ki he puleʻanga ʻo hēvaní. Ko ia ʻilonga ʻa ia te ne fakavaivaiʻi ia ʻo hangē ko e tamasiʻi ko ʻení, ko ia ia ʻoku lahi ʻi he puleʻanga ʻo hēvaní; pea ka ai ha taha ʻokú ne tali ha tamasiʻi peheni ʻe toko taha, koeʻuhi ko hoku hingoá, ʻokú ne tali au.”

Ko ha founga fisifisimuʻa ē ke fakatonutonu ʻaki ʻene kau ākongá! Naʻe ʻikai ke ʻita ʻa Sīsū ia ʻiate kinautolu pea pehē ʻoku nau anga-hiki, mānumanu, pe fie māʻolunga. ʻIkai, ka naʻá ne fakatātaaʻi ʻene akonaki fakatonutonú ʻo ngāueʻaki ʻa e fānau iiki, ko kinautolu ʻoku nau ʻulungaanga anga-fakanānā pea ʻataʻatā mei he fie māʻolungá pea ʻikai ha fakakaukau ki he fakalakanga ʻiate kinautolu. Ko ia naʻe fakahāhā ʻe Sīsū ko ʻene kau ākongá ʻoku fiemaʻu ke nau fakatupulekina ʻa e ngaahi ʻulungaanga ko ʻeni ʻoku ʻulungaanga ʻaki ʻe he fānau anga-fakatōkilaló. Hangē ko e fakaʻosiʻaki ʻe Sīsuú: “He ko ia ʻoku nofo kimui ʻaupito ʻiate kimoutolú, ko ʻeni ia ʻoku lahí.” Mātiu 17:​22-27; 18:​1-5; Maake 9:​30-37; Luke 9:​43-48.

▪ ʻI he foki ki Kāpaneumé, ko e hā ʻa e akonaki naʻe toe fai ʻe Sīsuú, pea naʻe anga-fēfē hono talí?

▪ Ko e hā naʻe ʻikai ko ha fatongia ai ia ʻo Sīsū ke totongi ʻa e tukuhau ki he temipalé, ka ko e hā naʻá ne totongi ai peé?

▪ Ko e hā ʻa e ngaahi meʻa naʻe fakatupunga nai ai ʻa e fekīhiaki ʻa e kau ākongá, pea naʻe fēfē hono fakatonutonu kinautolu ʻe Sīsuú?