Vahe 64

Ko ha Lēsoni ʻi he Fakamolemolé

ʻOKU ngalingali naʻe kei ʻi he fale ʻi Kāpaneumé ʻa Sīsū mo ʻene kau ākongá. Naʻá ne fetalanoaʻaki ai mo kinautolu ki he founga ʻo e ngāue ki ha ngaahi faingataʻa ʻi he vā ʻo e ngaahi tokouá, pea fehuʻi ai ʻa Pita: “ʻEiki, ʻe tuʻo fiha ʻa e faihala ʻa hoto tokouá kia kita, ka te fakamolemole pē?” Koeʻuhi ko e fokotuʻu ʻe he kau faiako fakalotu Siú ke fai ʻa e fakamolemolé ʻo tuʻo tolu pē, mahalo naʻe fakakaukau ai ʻa Pita ia ʻoku mātuʻaki feʻunga ʻānoa ke ne pehē “ʻo tuʻo fitu ʻapē?”

Ka ko e foʻi fakakaukau fakakātoa ki hono lau peheé ʻoku hala. He naʻe fakatonutonu ai ʻe Sīsū ʻa Pita: “ʻOku ʻikai te u pehē kiate koe, ʻO tuʻo fitu, ka, ʻO tuʻo fitu liunga ʻaki ʻa e fitungofulu.” Naʻá ne fakahāhā ai ʻoku ʻikai ha fakangatangata ke ʻai ʻe Pita ki he tuʻo lahi ʻo ʻene fakamolemoleʻi hono tokouá.

Ke ongo ʻeni ki he kau ākongá ko honau fatongiá ia ke fakamolemole, naʻe fakahā ʻe Sīsū ha talanoa fakatātā kiate kinautolu. Naʻe fekauʻaki ʻeni mo ha tuʻi naʻá ne fiemaʻu ke fai ha fakalelei fakapaʻanga mo ʻene kau tamaioʻeikí. Naʻe ʻomai ai kiate ia ha tamaioʻeiki ʻe taha naʻá ne moʻuaʻaki kiate ia ʻa e tēnali ʻe 60,000,000. Naʻe ʻikai ha founga ʻe lava ke ne totongi ai ia. Ko ia, hangē ko e fakamatala ʻa Sīsuú, naʻe tuʻutuʻuni leva ʻe he tuʻí ke fakatau atu ia mo hono uaifí pea mo ʻene fānaú ke fai ʻaki ʻa e totongí.

Naʻe tōmapeʻe leva ʻa e tamaioʻeikí ʻi he vaʻe ʻo hono ʻeikí ʻo ne kole: “Ke ke fakatotoka mai, pea te u totongi kotoa.”

ʻI hono ueʻi ia ʻe he ʻofá, naʻe fai meesi ai ʻa e ʻeikí ʻo kaniseli ʻa e fuʻu moʻua lahi ʻo e tamaioʻeikí. Ka ʻi hili leva ʻene fai ʻa e meʻá ni, naʻe hoko atu ʻe Sīsū, naʻe ʻalu leva ʻa e tamaioʻeiki ko ʻení ʻo kumi hono kaungātamaioʻeiki naʻá ne moʻua ange ʻaki kiate ia ʻa e tēnali pē ʻe 100. Naʻe puke leva ʻe he tangatá ni hono kaungātamaioʻeikí ʻo sisina hono kiá, ʻo ne pehē: “Kapau kuó ke moʻua, totongi.”

Ka naʻe ʻikai ke ʻi ai ha paʻanga ia ʻa hono kaungātamaioʻeikí. Ko ia, naʻá ne tōmapeʻe ʻi he vaʻe ʻo e tamaioʻeiki naʻá ne moʻua ki aí, ʻo ne kole: “Ke ke fakatotoka mai, pea te u totongi kiate koe.” ʻI heʻene ʻikai tatau mo hono ʻeikí, naʻe ʻikai fai meesi ʻa e tamaioʻeikí ni ia, pea naʻá ne fakaʻatā leva ke lī hono kaungātamaioʻeikí ki he pilīsoné.

Sai, naʻe hoko atu ʻe Sīsū, ʻi he sio ʻa e kau tamaioʻeiki kehé ki he meʻa kuo hokó naʻa nau ō ʻo tala ia ki he ʻeikí. Naʻá ne ʻita lahi peá ne fekau ke ʻomai ʻa e tamaioʻeikí. “ʻA e tamaioʻeiki angakovi,” ko ʻene leá ia, “naʻá ku fakamolemoleʻi koe ʻa e fuʻu moʻua ko ia kotoa ʻi hoʻo kole maí. ʻIkai naʻe mei totonu haʻo ʻofa mo koe kiate ia ʻokú mo kaungā tamaioʻeikí ʻo hangē ko ʻeku ʻofa ʻaku kiate koé?” ʻI heʻene tuputāmakí, naʻe fakaʻatā ai ʻe he ʻeikí ʻa e tamaioʻeiki taʻefaimeesí ke ʻave ki he pilīsoné kae ʻoua ke ne totongi ʻa e meʻa kotoa naʻá ne moʻua ki aí.

Pea fakaʻosiʻaki ʻe Sīsū: “ʻE pehē foki mo e fai ʻa ʻeku Tamai fakalangí kiate kimoutolú, ʻo kapau ʻe ʻikai te mou fakamolemole taki taha hono tokouá, ʻo fai ʻaki homou lotó.”

Ko ha lēsoni lelei ē ʻi he fakamolemolé! ʻI hono fakatatauʻi mo e fuʻu moʻua angahala kuo fakamolemoleʻi ai kitautolu ʻe he ʻOtuá, ʻoku siʻi ʻaupito ha faiangahala ia ʻoku fai mai ʻe ha tokoua Kalisitiane kiate kitautolu. ʻIkai ngata aí, kuo tuʻo laui afe hono fakamolemoleʻi kitautolu ʻe Sihova ko e ʻOtuá. Ka ʻoku hoko maʻu pē, ʻo ʻikai te tau fakatokangaʻi ʻe kitautolu ʻetau ngaahi faihala kiate iá. Ko ia ai, meʻa nī ʻe ʻikai malava ke tau fakamolemoleʻi hotau tokouá ʻi ha ngaahi taimi, neongo ʻoku tau maʻu ha ʻuhinga totonu ke tau lāunga ai? Manatuʻi, hangē ko ia naʻe akoʻi ʻe Sīsū ʻi heʻene Malanga ʻi he Moʻungá, ʻe hanga ʻe he ʻOtuá ʻo “fakamolemole homau ngaahi moʻuá, hangē kuo mau fakamolemole foki ʻa kinautolu ne moʻua kiate kimautolú.” Mātiu 18:​21-35; 6:12; Kolose 3:13.

▪ Ko e hā naʻá ne langaʻi ʻa e fehuʻi ʻa Pita fekauʻaki mo e fakamolemoleʻi hono tokouá, pea ko e hā naʻe fakakaukau ai ʻa Pita ʻoku feʻunga ʻānoa pē ke ne pehē ke tuʻo fitú?

▪ Naʻe anga-fēfē ʻa e tali ʻa e tuʻí ki he tangi ʻa ʻene tamaioʻeikí ʻo kehe ia mei he tali ʻa e tamaioʻeikí ki he tangi ʻa hono kaungātamaioʻeikí?

▪ Ko e hā ʻoku tau ako mei he talanoa fakatātā ʻa Sīsuú?