Sīsū–Ko ʻEne Moʻuí mo ʻEne Ngāue Fakafaifekau

Talanoa Fakatātā ʻo Fekauʻaki mo e Kātoanga Mali

ʻI HA ongo talanoa fakatātā ʻe ua, naʻe fakaeʻa ai ʻe Sīsū ʻa e kau sikalaipé mo e houʻeiki taulaʻeikí, pea naʻa nau loto ke tāmateʻi ia. Ka naʻe teʻeki ai ke ʻosi ʻa e lea ʻa Sīsū ʻo kau kiate kinautolu. Ko ia naʻá ne toe hoko atu ke tala kiate kinautolu ha talanoa fakatātā ʻe taha, ʻo pehē:

“Kuo tatau ʻa e Puleʻanga ʻo Hevani pea mo ha tangata, ko e tuʻi, ʻa ia naʻa ne fai ʻa e taʻane ʻo hono ʻalo; pea ne fekau atu ʻene kau tamaioʻeiki ke ui ʻa e kakai kuo tala ki ai ʻa e katoanga: ka naʻe ʻikai te nau fie haʻu.”

Ko Sihova ko e ʻOtuá ko e Tuʻi ia naʻá ne teuteu ʻa e kātoanga mali ki hono ʻAló, ko Sīsū Kalaisi. Faifai atu pē, ʻe fakataha mo ia ʻi hēvani ʻa e fefine malí ko e toko 144,000 ko hono kau muimui kuo paní. Ko e kakai ʻa e Tuʻí ko e kakai ʻIsilelí, ʻa ia ʻi hono fakahoko mai kinautolu ki he fuakava ko e Laó ʻi he 1513 K.M., naʻa nau maʻu ʻa e faingamālie ke hoko ko e “buleaga oe kau taulaeiki.” Ko ia ʻi he taimi ko iá, naʻe fuofua fai kiate kinautolu ʻa e fakaafe ki he kātoanga malí.

Kaekehe, ko e ʻuluaki ui ʻo kinautolu ʻe fakaafeʻí naʻe teʻeki ai ke fai ia ʻo aʻu ki he faʻahitaʻu fakatōlau ʻo e 29 T.S., ʻi he kamata ʻo e ngāue ʻo hono malangaʻi ʻo e Puleʻangá ʻe Sīsū mo ʻene kau ākongá (ko e kau tamaioʻeiki ʻa e tuʻí). Ka naʻe taʻeloto ke haʻu ʻa e kau ʻIsileli ʻi he kakanó ʻa ia naʻa nau maʻu ʻa e fakaafe ko ʻeni mei he kau tamaioʻeiki mei he 29 T.S. ki he 33 T.S. Ko ia naʻe ʻoange ʻe he ʻOtuá ki he puleʻanga ʻo kinautolu naʻe fakaafeʻí ha toe faingamālie, ʻo hangē ko ia naʻe fakamatala ʻe Sīsū:

“Pea ne toe fekau atu ha kau tamaioʻeiki kehe, ʻo ne pehe, Fakahā kiate kinautolu naʻe tala, Ko eni, kuo u ʻosi teu ʻeku pongipongi: kuo tamateʻi ʻeku fanga pulu, mo ʻeku fanga manu tali ʻeiki, pea kuo napanapangamālie kotoa pe: mou ōmi ki he taʻane.” Ko e ui ʻeni hono uá pea ko hono fakaʻosí ia kiate kinautolu naʻe ʻosi fakaafeʻí naʻe kamata ia ʻi he Penitekosi ʻo e 33 T.S., ʻi hono huaʻi hifo ʻa e laumālie māʻoniʻoní ki he kau muimui ʻo Sīsuú. Ko e ui ko ʻení naʻe hokohoko atu ʻo aʻu ki he 36 T.S.

Kaekehe, ko e tokolahi taha ʻo e kau ʻIsilelí naʻa nau fakasīkakaaʻi ʻa e ui ko ʻení. Naʻe fakamatala ʻe Sīsū: “Ka ka fakavaʻivaʻingaʻaki ia ʻekinautolu, ʻo nau ʻalu ko e taha ki heʻene ngoue, ko e taha ki heʻene fai fakatau; pea ko e toe naʻa nau puke ʻene kau tamaioʻeiki, ʻo nau paʻusiʻi mo tamateʻi.” Naʻe hoko atu ʻe Sīsū: “Pea houhau ai ʻa e Tuʻi, ʻo ne fekau atu ʻene ngāhi kongakau, ʻo ne fakaʻauha ʻa e kau fakapo ko ia, ʻo tutu ʻenau kolo.” Naʻe hoko ʻa e meʻa ko ʻení ʻi he 70 T.S., ʻi hono fakaʻauhamālie ʻa Selusalema ʻe he kau Lomá, pea naʻe tāmateʻi ʻa e kau fakapō ko iá.

Pea naʻe fakamatala ʻe Sīsū ʻa e meʻa naʻe hoko ʻi he vahaʻa taimi ko iá: “Pea toki folofola [ʻa e tuʻi] ki heʻene kau tamaioʻeiki, Ko e taʻane kuo teu; ka ko kinautolu naʻe tala ki ai ta naʻe ʻikai te nau tāu. Ko ia mou ō ki he ngāhi mangaʻi hala, pea ʻilonga ha kakai te mou ʻilo ai, tala ke nau haʻu ki he katoanga.” Naʻe fai ʻeni ʻe he kau tamaioʻeikí, “pea naʻe maʻopo ʻa e katoanga.”

Ko e ngāue ko ʻeni ʻo hono fakatahatahaʻi ʻa e kau fakaafe mei he ngaahi hala ʻi he tuʻakolo ʻo e faʻahinga naʻe fakaafeʻi naʻe kamata ia ʻi he 36 T.S. Ko e ʻofisa fakakautau Loma ko Koliniusí mo hono fāmilí ko e ʻuluaki kinautolu ʻi he fakatahaʻi ʻo e kau taʻekamu ʻikai ko ha Siú. Kuo hokohoko atu pē ʻo aʻu mai ki he senituli hono 20 ni ʻa hono fakatahatahaʻi ʻa e kau taʻe Siu ko ʻení, ko kinautolu kotoa ko e fetongi ia ʻo kinautolu ʻa ia naʻa nau fakafisingaʻi ʻa e uí.

ʻI he lolotonga ʻo e senituli hono 20 kuo hoko ʻo fonu ʻa e loki ki he kātoanga ʻo e malí. Naʻe lave ʻa Sīsū ki he meʻa ʻoku hokó, ʻo pehē: “Pea ʻi he meʻa mai ʻa e Tuʻi ke vakai ʻa e kakai naʻe keinanga, naʻa ne ʻilo ai ha tangata kuo ʻikai te ne tui ha kofu taʻane. Pea ne folofola ki ai, Siana, naʻe fēfē hoʻo hū mai ki heni taʻe te ke ʻai hao kofu taʻane? Pea ne moʻu longoa. Pea fekau ʻe he Tuʻi ki he kau sevaniti, Haʻi hono vaʻe mo hono nima, ʻo li ia ki he poʻuli ʻo tuaʻā. Ko e potu ia ʻe toki hoko ai ʻa e tangi mo e fengaiʻitaki ʻo e nifo.”

Ko e tangata naʻe ʻikai ke ʻi ai hano kofu malí ʻokú ne fakatātaaʻi ʻa e kau Kalisitiane fakangalingali ʻo e Puleʻanga-Haʻa-Kalisitiané. Kuo ʻikai pē ke tali ʻe he ʻOtuá ʻoku maʻu ʻe he faʻahingá ni ʻa e fakaʻilonga totonu ko e kau ʻIsileli fakalaumālié. Naʻe ʻikai ʻaupito ke pani kinautolu ʻe he ʻOtuá ʻaki ʻa e laumālie māʻoniʻoní ko ha ngaahi ʻea ki he Puleʻangá. Ko ia ai, kuo lī kinautolu ki he poʻuli ʻo tuaʻā ʻa ia ʻe fakaʻauha ai kinautolu.

Naʻe fakaʻosiʻaki ʻe Sīsū ʻa ʻene talanoa fakatātaá ʻa ʻene pehē: “He ʻoku tokolahi ʻa e ui, kae toko siʻi ʻa e fili.” ʻIo, naʻe tokolahi ʻa e kau fakaafe mei he puleʻanga ʻo ʻIsilelí ke nau hoko ko e kau memipa ʻo e fefine mali ʻo Kalaisí, ka ko e tokosiʻi pē ʻo e kau ʻIsileli ʻi he kakanó naʻe fili. Ko e tokolahi taha ʻo e kau fakaafe ʻo e toko 144,000 kuo nau maʻu ʻa e pale fakahēvaní ʻoku fakamoʻoniʻi ʻoku ʻikai ko e kau ʻIsileli. Mātiu 22:​1-14; ʻEkisoto 19:​1-6; Fakahā 14:​1-3.

◆ Ko hai naʻe fuofua fakaafeʻi ki he kātoanga malí, pea naʻe fai ʻanefē ʻa e fakaafé?

◆ Naʻe ʻuluaki fai ʻanefē ʻa e ui kiate kinautolu naʻe ʻosi fakaafeʻí, pea ko hai ʻa e kau tamaioʻeiki naʻe ngāueʻaki ke nau fai ʻa e fakaafé?

◆ Naʻe fai ʻanefē ʻa e ui hono uá, pea hili ia ko hai naʻe fakaafeʻí?

◆ Ko hai naʻe fakatātaaʻi ʻe he tangata ʻoku ʻikai ke ʻi ai hano kofu malí?

◆ Ko hai ʻa e tokolahi naʻe ui, pea mo e tokosiʻi kuo fili?