Sīsū–Ko ʻEne Moʻuí mo ʻEne Ngāue Fakafaifekau

Naʻe ʻIkai Lava ke Nau Tauheleʻi ʻa Sīsū

NAʻE faiako ʻa Sīsū ʻi he temipalé pea naʻá ne toki fakahā ki he ngaahi fili fakaelotu kiate iá ʻa e talanoa fakatātā ʻe tolu ʻa ia naʻe fakaeʻa ai ʻa ʻenau anga-fulikivanú. Naʻe ʻita ʻa e kau Fālesí mo nau fakaangaanga ke nau tauheleʻi ia ke ne leaʻaki ha meʻa ʻa ia ʻe lava ke nau puke ai ia. Naʻa nau fefonotaki mo fekau ʻenau kau ākongá, fakataha mo e kau muimui kia Hēlotá, ke feinga ke tauheleʻi ia.

Naʻe pehē ʻe he kau tangatá ni: “Tangataʻeiki ʻoku mau ʻilo ʻoku ke moʻoni koe, pea ʻoku ke ako totonu ʻaki ʻa e hala ʻo e ʻEiki, pea ʻoku ʻikai te ke tokaʻi ha taha: koeʻuhi ʻoku ʻikai te ke filifilimānako. Ko ia ke ke tala mai pe ko e ha hoʻo poa, Pe ʻoku ngofua ke tukuhau kia Sisa, pe ʻikai?”

Ka naʻe ʻikai ke kākaaʻi ʻa Sīsū ʻe he fakahekeheké. Naʻá ne ʻilo kapau te ne pehē, ‘ʻIkai, ʻoku ʻikai ke fakalao pe totonu ke totongi ʻa e tukuhau ko ʻeni,’ ʻe halaia ai ia ki he fakatupu maveuveu ki he puleʻanga Lomá. Ka ʻo kapau te ne pehē, ‘ʻIo, ʻoku totonu ke mou totongi ʻa e tukuhau ko ʻeni,’ ko e kau Siú, ʻa ia ʻoku nau fehiʻa ki heʻenau fakamoʻulaloa ki he kau Lomá, te nau fehiʻa kiate ia. Ko ia naʻá ne tali: “ʻA e kau mālualoi, ko e ha ʻoku mou ʻahiʻahiʻi ai au? fakaʻaliʻali mai ʻa e paʻanga tukuhau.”

Pea ʻi heʻenau ʻomai iá, naʻá ne ʻeke: “Ko e fofonga ʻena mo e hingoa ʻo hai?”

Naʻa nau tali: “ʻO Sisa.”

“Peʻi ʻange kia Sisa ʻa e ngāhi meʻa ʻa Sisa; pea ki he ʻOtua ʻa e ngāhi meʻa ʻa e ʻOtua.”

ʻI he fanongo ʻa e kau tangatá ni ki ha tali mālie pehē, naʻa nau ofo. Pea nau ʻalu atu meiate ia.

ʻI he vakai ki he taʻe malava ʻa e kau Fālesí ke fai ha meʻa ke tukuakiʻi ʻaki ʻa Sīsuú, ko e kau Sātusí, ʻa ia naʻa nau pehē ʻoku ʻikai ke ʻi ai ha toe tuʻú, naʻa nau ʻunuʻunu atu kiate ia ʻo nau ʻeke: “Tangataʻeiki, naʻe pehe ʻe Mosese, Kapau ʻe pekia ha tangata taʻe haʻane fanau, pea ke mali hono tokoua mo e finemotuʻa, ʻo ne fakatupu ha hako ki hono tokoua. Pea ko eni, naʻe nofo mo kimautolu ha tuʻunga meʻa ʻe toko fitu, ko e tautehina: pea mali ʻa e ʻuluaki ʻo pekia, pea ko e meʻa ʻi he ʻikai hano hako naʻa ne tuku hake hono finemotuʻa ki hono tehina. Pehe foki ʻa hono toko ua, mo hono toko tolu, kaeʻoua ke ʻosi ʻa e toko fitu. Pea toki pekia kimui ʻa e fefine. Pea ʻi he toetuʻu te ne hoko ko e uaifi ʻo hai ʻi he toko fitu? he naʻa nau maʻu ia kotoa pe.”

ʻI he talí naʻe pehē ʻe Sīsū: “ʻIkai ko hono ʻuhinga ia ʻoku mou he ai; ko e taʻe te mou ʻilo ʻa e Tohitapu, kaeʻumaʻā ʻa e māfimafi ʻo e ʻOtua? He ka toetuʻu leva ʻa e kakai mei he pekia, ʻe ʻikai ha maʻu uaifi, pe ha maʻu husepaniti; ka te nau hange ko e kau angelo ʻi hevani. Ka ko e meʻa ki he pekia, ʻa ʻenau toetuʻu, ne ʻikai te mou lau koā ʻi he tohi ʻa Mosese ʻi he vahe ʻoku kau ki he talatalaʻamoa, ʻa e folofola ʻa e ʻOtua kiate ia, ʻo pehē, Ko au ko e ʻOtua ʻo Epalahame, mo e ʻOtua ʻo Aisake, mo e ʻOtua ʻo Sekope? ʻOku ʻikai ko e ʻOtua ia ʻo e mate, ka ʻo e moʻui. ʻOku mou hē lahi.”

Naʻe toe ofo ʻa e fuʻu kakaí ʻi he tali ʻa Sīsuú. Naʻa mo e niʻihi ʻo e kau Fālesí naʻa nau pehē: “Tangataʻeiki, kuo mālō hoʻo lea.”

Pea ʻi he sio ʻa e kau Fālesí kuo ʻai ʻe Sīsū ʻa e kau Sātusí ʻo nau fakalongolongó, naʻa nau haʻu fakataha kiate ia. Ke hoko atu ʻa hono ʻahiʻahiʻí, naʻe ʻeke ʻe he toko taha ʻo kinautolu: “Tangataʻeiki, ko e faʻahinga tuʻutuʻuni fē ʻi he Lao ʻoku mamafa taha?”

Naʻe tali ʻe Sīsū: “Koe lahi eni i he gaahi fekau kotoabe, Fanogo, e Isileli; Ko Jihova ko ho tau Otua ko Jihova oku taha be: Bea ke ofa kia Jihova ko ho Otua aki ho loto kotoa, be mo ho laumalie kotoa, mo ho atamai kotoa, mo ho malohi kotoa. Koe lahi eni i he fekau. Bea ko hono ua oku tatau mo ia, Ke ke ofa ki ho kaugaabi o hage be ko koe. Oku ikai ha fekau e lahi hake ki he ogo fekau ni.” Ko hono moʻoní, naʻe tānaki atu ʻe Sīsū: “Ko e ongo tuʻutuʻuni ko eni ʻe ua ʻoku tautau ki ai ʻa e Lao kotoa mo e Tohi Palofita.”

Naʻe loto-tatau ki ai ha sikalaipe ʻo ne pehē: “Mālō, Tangataʻeiki, moʻoni hoʻo lau: ʻoku Taha pe ia, pea ʻoku ʻikai hano ua: pea ko ʻete ʻofa kiate ia ʻaki ʻa e kotoa ʻo hoto loto, mo e kotoa ʻo hoto ʻatamai, mo e kotoa ʻo hoto ivi, pea mo ʻete ʻofa ki hoto kaungaʻapi ʻo hange ko ʻete ʻofa kia kita, ʻoku hulu noa pe ia ʻi he ʻatu ʻo e ngaahi feilaulau liʻaki pe ko e ngaahi ʻinasi.”

ʻI he vakai ki he fakapotopoto ʻa e tali ʻa e sikalaipé, naʻe tala ʻe Sīsū kiate ia: “ʻOku ʻikai te ke mamaʻo koe mei he puleʻanga ʻo e ʻOtua.”

Kuo ʻaho ʻeni ʻe tolu​—ko e Sāpate, Mōnite, mo e Tūsite​—naʻe faiako ai ʻa Sīsū ʻi he temipalé. Naʻe fanongo fiefia kiate ia ʻa e kakaí, ka naʻe loto ʻa e kau taki lotu loto-mamahí ke tāmateʻi ia. Mātiu 22:​15-40; Maʻake 12:​13-34; Luke 20:​20-40.

◆ Ko e hā ʻa e fefonotaki naʻe fai ʻe he kau Fālesí ke nau tauheleʻi ʻaki ʻa Sīsū, pea ko e hā hano ola ʻo kapau naʻá ne fai ha tali ʻio pe ʻikai?

◆ Naʻe anga-fēfē hono toe fakataʻeʻaongaʻi ʻe Sīsū ʻa e ngaahi feinga ʻa e kau Sātusí ke tauheleʻi iá?

◆ Ko e hā mo ha toe feinga ʻa e kau Fālesí ke ʻahiʻahiʻi ʻa Sīsū, pea ko e hā ʻa e meʻa naʻe hokó?

◆ Lolotonga ʻo ʻene ngāue fakamalanga fakaʻosi ʻi Selūsalemá, ko e ʻaho ʻe fiha naʻe faiako ai ʻa Sīsū ʻi he temipalé, pea ko e hā hono olá?