ʻOku Tau Moʻui Moʻoni ʻi he “Kuonga Fakamui”?

ʻOKU kaunga ki hono ʻiloʻi ʻo e meʻa ʻoku ui ʻe he Tohi Tapú ko e kuonga fakamuí ʻa e ngaahi meʻa ʻoku hoko ʻi he tafaʻaki ʻe ua. ʻOku tomuʻa tala ʻe he Tohi Tapú ʻa e ngaahi meʻa ʻa ia ʻe hoko lolotonga e “faka ʻosi ʻo e kuonga.” (Mātiu 24:3) ʻOku toe lau ʻa e Tohi Tapú fekauʻaki mo e ngaahi liliu ʻi he fakakaukau mo e tōʻonga ʻa e kakai ʻoku moʻui ʻi he “kuonga fakamui.”—2 Timote 3:1.

Ko e ngaahi meʻa ʻoku hoko he māmaní fakataha mo e tōʻonga pea mo e ʻulungāanga ʻo e kakaí ʻoku fakamoʻoniʻi ai ʻoku tau moʻui ʻi he kuonga fakamuí pea kuo vavé ni ke hanga ʻe he Puleʻanga ʻo e ʻOtuá ʻo ʻomai ʻa e ngaahi tāpuaki taʻengata ki he faʻahinga ʻoku ʻofa ki he ʻOtuá. ʻOku tau kamataʻaki hono sivisiviʻi ʻa e meʻa ʻe tolu ʻa ia naʻe pehē ʻe Sīsū ʻe fakaʻilongaʻiʻaki ʻa e kuonga fakamuí.

“Ko e Kamataʻanga Pe ʻo e Langā”

“ʻE tuʻu ha kakai ki ha kakai, mo ha puleʻanga ki ha puleʻanga,” ko e lea ia ʻa Sīsuú, “pea ʻe ai ha ngāhi honge mo ha ngāhi mofuike ʻi he ngāhi potu kehekehe.” Naʻá ne tānaki mai: “Ko e ngāhi meʻa kotoa ko ia ko e kamataʻanga pe ʻo e langā.” (Mātiu 24:​7, 8) Tau sivisiviʻi tahataha angé ʻa e “ngāhi meʻa kotoa ko ia.”

Ko e fuʻu kakai tokolahi fau naʻe fakapoongi ʻi he ngaahi tau mo e ngaahi fekīhiaki fakafaʻahinga he lolotonga ʻa e senituli kuohilí. “Naʻe liunga tolu e tokolahi ʻo e kakai ne maʻukovia ʻi he tau he senituli [hono 20] ʻi he ngaahi tau kotoa mei he ʻuluaki senituli T.S. ki he taʻu 1899,” ko e fakamatala ia ʻa ha līpooti ʻa e kau mataotao mei he Akoʻanga Vakaiʻi ʻo e Māmaní. ʻI heʻene tohi ko e Humanity​—A Moral History of the Twentieth Century, ʻoku tohi ai ʻe Jonathan Glover: “Ko ha fakafuofua ki he vahaʻa taimi mei he 1900 ki he 1989 naʻe tāmateʻi ai ʻi he taú ʻa e kakai ʻe toko 86 miliona. . . . Ko e mate ʻi he tau he senituli hono uofulú kuo aʻu ia ki he tuʻunga ʻa ia ʻoku faingataʻa ke mahinoʻi. Ko ha fakaʻavalisi pē ki he tokolahi ʻo e kau maté ʻoku ʻikai ko e tuʻunga moʻoní ia, koeʻuhí ko e vahe tolu nai ʻe ua (toko 58 miliona) naʻe tāmateʻi ʻi he ongo tau ʻe ua ʻa e māmaní. Ka ʻo kapau ko e ngaahi maté ni naʻe mafola hokohoko ʻi he vahaʻa taimi kotoa ko iá, ne mei tāmateʻi ai ʻi he taú ʻa e kakai fakafuofua ki he toko 2,500 ʻi he ʻaho kotoa pē, ʻa ia ko e laka hake ia he kakai ʻe toko 100 ʻi he houa, ʻo hokohoko taʻetuku feʻunga mo e taʻu ʻe hivangofulu.” ʻE lava ke ke fakaʻuta atu ki he mamahi mo e langa kuo pau naʻe fakatupunga ʻe he meʻá ni ki he laui miliona ʻo e ngaahi kāinga mo e kaumeʻa ʻo e faʻahinga ko ia ne mole ʻenau moʻuí?

Neongo ʻa e moʻoniʻi meʻa ko ia hono ʻomai ʻe he māmaní ʻa e meʻakai hulu faú, ʻoku kau ʻi he ngaahi tafaʻaki ʻoku fakahaaʻi ai ʻa e kuonga fakamuí ʻa e ngaahi nounou fakameʻatokoni. ʻOku pehē ʻe he ngaahi fakatotoló, lolotonga ʻa e taʻu ʻe 30 kuo maliu atú naʻe ngaohi ʻo lahi ange ai ʻa e meʻakaí ʻi he tokolahi ʻo e kakaí. Neongo ia, ʻoku kei hoko lahi pē ʻa e nounou fakameʻatokoní ʻi he ngaahi feituʻu lalahi ʻo e māmaní koeʻuhi ko e ʻikai ke maʻu ʻe he kakai tokolahi ʻa e kelekele feʻunga ke tō ai ʻa e meʻakaí pe ko ha paʻanga feʻunga ke fakatau mai ʻaki ʻa e meʻakaí. ʻI he ngaahi fonua langalanga haké, ko e kakai ʻe toko 1.2 piliona nai ʻoku nau moʻui ʻi he tola ʻAmelika ʻe taha he ʻaho, pe siʻi hifo ai. ʻI he faʻahingá ni, ko e toko 780 miliona nai ʻoku nau tofanga ʻi he fiekaia hokohoko. Fakatatau ki he lau ʻa e Kautaha Moʻui ʻa Māmaní, ko e fasimanavá ko ha tupuʻanga lahi ia ʻo e mate ʻa e fānau laka hake he toko nima milioná ʻi he taʻu.

Ko e hā ʻe lava ke leaʻaki ʻo fekauʻaki mo e ngaahi mofuike naʻe tomuʻa talá? Fakatatau ki he Savea Fakaesioloki ʻAmeliká, ko e ngaahi mofuike ʻoku mālohi feʻunga ke nau maumauʻi ʻa e ngaahi falé kuo fakaʻavalisi ia ki he mofuike ʻe 17 ʻi he taʻu, talu mei he 1990 pē. ʻI hono fakaʻavalisí, ko e ngaahi mofuike ʻoku mālohi feʻunga ke nau fakatupunga ʻa e meimei ʻauha fakaʻaufuli ʻo e ngaahi falé kuo hoko tuʻo taha ia ʻi he taʻu taki taha. “Kuo toʻo ʻe he ngaahi mofuiké ʻa e moʻui ʻe laui kilu ʻi he taʻu ʻe 100 fakamuimuí,” ko e fakahaaʻi ia ʻe ha maʻuʻanga fakamatala ʻe taha. Ko e ʻuhinga ʻe taha ki he meʻá ni, he ko e talu mei he 1914 mo e fokotuʻu ʻa e ngaahi senitā ʻoku tokolahi ai ʻa e kakaí ʻi he ngaahi halanga mofuiké.

Ngaahi Meʻa Mahuʻinga Kehe ʻOku Hoko

“ʻE ai . . . ʻi he ngaahi potu kehekehe mo e ngaahi mahaki fakaʻauha,” ko e lea ia ʻa Sīsuú. (Luke 21:11) Ko e saienisi fakafaitoʻo he ʻaho ní ʻoku fakalakalaka ange ia ʻi ha toe taimi ki muʻa. Neongo ia, ʻoku hokohoko atu hono fakamamahiʻi fakatouʻosi ʻe he ngaahi mahaki foʻou mo e ngaahi mahaki motuʻa ʻa e faʻahinga ʻo e tangatá. Ko ha pepa ʻa e Kautaha Fakatotolo Fakapuleʻanga ʻAmeliká ʻoku pehē ai: “Ko e ngaahi mahaki ʻoku ʻiloa ʻe 20—kau ai ʻa e tīpií, malēliá mo e kōlelá—kuo toe ʻasi hake ia pe mafola ki he feituʻu lahi ange talu mei he 1973, ʻo faʻa ʻi ha tuʻunga mālohi ange pea ʻikai toe ʻaonga ki ai ʻa e ngaahi faitoʻó. Talu mei he 1973, kuo ʻiloʻi ʻo ʻikai siʻi hifo ai ʻa e mahaki ʻe 30 naʻe ʻikai ke ʻiloʻi ki muʻa, ʻo kau ai ʻa e HIV, ʻĒpola, ʻate pupula mo e vailasi Nipah, ʻa ia ʻoku ʻikai ala maʻu hanau faitoʻo.” Fakatatau ki ha līpooti ʻa e Kolosi Kulá ʻi Sune 28, 2000, lolotonga ʻa e taʻu ki muʻá, ko e tokolahi ʻo e kakai kuo mate mei he ngaahi mahaki pipihí naʻe lahi ange ʻo liunga 160 nai ʻi he tokolahi kuo mate ʻi he ngaahi fakatamaki fakanatulá.

Ko e “ope ʻo e maumau lao” ko ha toe tafaʻaki ia ʻo e kuonga fakamuí ʻoku taau ke fakatokangaʻi. (Mātiu 24:12) ʻI he ngaahi feituʻu lahi taha takatakai ʻi he māmaní he ʻaho ní, ʻoku ʻikai ke tuku taʻelokaʻi ai ʻe he kakaí honau ngaahi ʻapí pe ongoʻi malu ʻi he halá he poʻulí. Pea fēfē ʻa hono ʻuliʻi ʻo e ʻeá, ko e vaí, pea mo e fonuá ʻoku lolotonga hoko, ʻa ia ʻoku faʻa tupu koeʻuhi ko e ngaahi tōʻonga taʻefakalaó? Ko e meʻá ni foki ʻoku fakahoko ai ʻa e meʻa naʻe tomuʻa tala ʻe he Tohi Tapú. Ko e tohi Fakahaá ʻoku lau ai ʻo fekauʻaki mo e taimi kotofa ʻa e ʻOtuá ke “fakaʻauha ʻakinautolu ʻoku fakaʻauha ʻa e fonua.”—Fakahā 11:18.

ʻUlungāanga ʻo e Kakai ʻi he Kuonga Fakamuí

Kātaki ʻo huke ʻa hoʻo Tohi Tapú ki he 2 Timote 3:​1-5 pea lau ia. ʻOku tohi ʻe he ʻapositolo ko Paulá: “Ka hokosia ʻa e kuonga fakamui, ʻe ai ha ngaahi taimi faingataʻa.” Naʻá ne hoko atu leva ʻo fakahokohoko ʻa e angaʻitangata ʻe 20 te ne fakaʻilongaʻi ʻa e kakai anga-taʻefakaʻotuá. Kuó ke mamata ʻi he niʻihi ʻo e ngaahi ʻulungāangá ni ʻi he faʻahinga ʻoku nofo ʻi ho koló? Fakakaukau angé ki he meʻa kuo leaʻaki ki muí ni ʻo fekauʻaki mo e kakai ʻo e ʻaho ní.

“ʻOfa kiate kinautolu pe.” (2 Timote 3:2) “[Ko e kakaí ʻoku nau] vilitaki ʻi hono fai ʻenau meʻa pē ʻa kinautolú ʻa ia naʻe ʻikai ʻaupito pehē ki muʻa. [ʻOku nau] hoko ko e ngaahi ʻotua, pea ʻamanekina ke tōʻongafai ange kia kinautolu ʻi he tuʻunga ko iá.”​—Nusipepa Financial Times, ʻIngilani.

“ʻOfa ki he paʻanga.” (2 Timote 3:2) “Ko e laumālie siokita ʻo e tuli ki he meʻa fakamatelié kuó ne lōmekina he lolotongá ni ʻa e laumālie fakatōkilaló. Ka ʻikai vakai atu ʻokú ke tuʻumālie ʻi he sōsaietí ʻoku ʻikai ha mahuʻinga ia ʻo hoʻo moʻuí.”​—Nusipepa Jakarta Post, ʻInitonīsia.

“Talangataʻa ki he matuʻa.” (2 Timote 3:2) “ʻOku puputuʻu ʻa e ngaahi mātuʻá ʻi hono tuʻutuʻuniʻi takai holo kinautolu ʻe heʻenau kiʻi tama taʻu 4 ʻo hangē [ko e Tuʻi Falanisē ia] ko Lui XIV, pe ko e kikī ʻenau kiʻi leka taʻu 8 mo pehē, ‘ʻOku ou fehiʻa ʻia koe!’”​—Makasini American Educator, ʻAmelika.

“Taʻemateaki.” (2 Timote 3:​2, NW) “Ko e lahi faufaua ʻo e loto-lelei ʻa e tangatá ke liʻaki honau ngaahi hoá mo e fānaú ʻoku hoko nai ai ʻa e foʻi liliu lahi taha pē ʻi he ngaahi tuʻunga fakaeʻulungāangá lolotonga ʻa e [taʻu ʻe 40 kuohilí].”​—Makasini Wilson Quarterly, ʻAmelika.

“Taeʻofa-ki-hoʻota.” (2 Timote 3:3) “Ko e fakamālohi ʻi he fāmilí ʻa e meʻa lahi tefito ʻi he moʻui fakaʻaho ʻa e ngaahi kolo takatakai ʻi he māmaní.”​—Makasini Journal of the American Medical Association, ʻAmelika.

“Taʻefakamaʻumaʻu.” (2 Timote 3:3) “Ko e ngaahi talanoa lahi ʻoku hā ʻi he peesi ʻuluaki ʻo e nusipepá ʻi he pongipongi kotoa pē ʻoku tapua mai ai ʻa e ngaahi fakakaukau ʻo e taʻefakamaʻumaʻu, ʻikai pipiki ki he ngaahi tefitoʻi moʻoni fakaeʻulungāangá mo e ʻikai ha meesi ki honau kaungā faʻahinga ʻo e tangatá ʻo aʻu kia kinautolu tonu. . . . Kapau ʻe hokohoko atu e leleiʻia ʻa hotau sōsaietí ʻi he fakaaoaó ʻo hangē ko ia ʻoku ʻi ai he taimi ní, ʻe vavé ni ke hū hotau sōsaietí ki he tuʻunga ʻo e mole fakaʻaufuli ʻa e ʻulungāanga tāú.”​—Nusipepa Bangkok Post, Taileni.

“Angafakamanu.” (2 Timote 3:3) “Ko e ʻita taʻeʻuhingá mo e tōlili taʻemapuleʻí [ʻoku] hā ia ʻi he kau fakaʻuli he halá, ʻi he ngaohikovia he ngaahi lotoʻi fāmilí, . . . pea [ʻi] he fakamālohi hā ngali taʻetotonu mo ʻikai fiemaʻu ʻa ia ʻoku faʻa hoko fakataha mo e faihiá. ʻOku hokosia taʻeʻuhinga mo taʻeʻamanekina ʻa e fakamālohí pea ʻoku hoko ai ʻa e kakaí ʻo ongoʻi tuēnoa mo laveangofua.”​—Nusipepa Business Day, ʻAfilika Tonga.

“Kau ʻofa ki he malie ʻo ʻikai ʻofa ki he ʻOtua.” (2 Timote 3:4) “Ko e tauʻatāina fakaefehokotaki fakasinó kuo hoko ia ko ha faitau fakaeʻulungāanga, ʻa ia ko e tuʻunga ʻulungāanga faka-Kalisitiané ʻa e filí.”​—Boundless, ko ha makasini ʻInitaneti.

“Maʻu ʻa e ngeʻesi ʻo e lotu, ka kuo nau liʻaki hono kakano.” (2 Timote 3:5) “Naʻe fakahaaʻi ʻe [ha paʻumutu ki muʻa ʻi Netaleni] ko e fakafepaki ki hono fakalaoʻi [ʻo e paʻumutú] ʻoku hoko lahi ia mei he ngaahi kulupu fakalotú. Naʻá ne kiʻi longo, peá ne lea leva fakataha mo ʻene malimali ʻo ne pehē ʻi he taimi naʻá ne paʻumutu aí naʻe kau ʻa e kau faifekau tokolahi ʻi heʻene kau kasitomaá. ‘ʻOku fakahaaʻi maʻu pē ʻe he kau paʻumutú ko ʻenau kau kasitomā lelei tahá ʻoku mei he komiunitī fakalotú,’ ko ʻene lea ia mo ʻene katá.”​—Nusipepa National Catholic Reporter, ʻAmelika.

Ko e Hā ʻOku Toka mei Muʻá?

Ko e māmani ʻo e ʻaho ní ʻoku fonu ia he faingataʻa, ʻo hangē tofu pē ko ia naʻe tomuʻa tala ʻe he Tohi Tapú. Kae kehe, ʻoku ʻi ai ha tafaʻaki lelei ki he kikite fekauʻaki mo e “fakaʻilonga ʻo [e ʻi ai ʻa Kalaisí], mo e faka ʻosi ʻo e kuonga.” Naʻe pehē ʻe Sīsū: “ʻE ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe.” (Mātiu 24:​3, 14) Ko e ongoongo lelei ʻo e Puleʻanga ʻo e ʻOtuá ʻoku malangaʻi ia ʻi he fonua laka hake he 230. Ko e kakai laka hake he toko ono milioná ʻa ia ʻoku nau haʻu mei he “puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea” ʻoku nau kau longomoʻui ʻi he ngāue fanongonongo ʻo e Puleʻangá. (Fakahā 7:9) Ko e hā kuo lavaʻi ʻe heʻenau ngāue faivelengá? Ko eni: Ko e pōpoaki ko ia ʻo e Puleʻangá, ko e meʻa te ne faí, mo e founga ke maʻu ai ʻene ngaahi tāpuakí ʻoku ala maʻu ia ʻe he meimei tokotaha kotoa pē ʻi he māmaní. Ko e moʻoni, ‘kuo fakautuutu ʻa e ʻiló ʻi he taimi fakamuí.’—Taniela 12:4.

ʻOku ʻi ai ʻa e ʻuhinga lelei ke ke ngāueʻaongaʻaki ai ʻa e ʻilo ko ení. Fakakaukau atu ki he meʻa ʻe hoko hili hono malangaʻi ʻo e ongoongo leleí ki he hōifua ʻa Sihová. Naʻe pehē ʻe Sīsū: “Pea [ʻe] toki hoko ʻa e ngataʻanga.” (Mātiu 24:14) Ko e taimi ia ʻa e ʻOtuá ke fakangata ai ʻa e fulikivanu kotoa pē ʻi he māmaní. ʻOku fakahaaʻi ʻe he Palovepi 2:22: “Ka ko e kakai kovi ʻe tuʻusi mei he fonua, ʻio, ko kinautolu ʻoku fai kākā ʻe taʻaki mei ai.” Fēfē ʻa Sētane mo ʻene kau tēmenioó? ʻE lī kinautolu ki ha luo, ʻa ia ʻe ʻikai te nau kei malava ai ke takihalaʻi ʻa e ngaahi puleʻangá. (Fakahā 20:​1-3) “Ko e kau angatonu . . . pea [mo e] haohaoa te ne ʻi ai ai pe” ʻi he māmaní. Pea te nau maʻu ʻa e ngaahi tāpuaki fakaofo ʻa e Puleʻangá.—Palovepi 2:21; Fakahā 21:​3-5.

Ko e Hā ʻE Lava Ke Ke Faí?

ʻOku ʻikai ha veiveiua fekauʻaki mo ia. Ko e ngataʻanga ʻo e fokotuʻutuʻu ʻa Sētané ʻoku ofi. Ko e faʻahinga ʻoku nau tukunoaʻi ʻa e fakamoʻoni ʻoku tau moʻui ʻi he kuonga fakamuí ʻe maʻu fakafokifā kinautolu ʻi he taimi ʻe hoko mai ai ʻa e ngataʻangá. (Mātiu 24:​37-​39; 1 Tesalonaika 5:2) Ko ia ai, naʻe pehē ʻe Sīsū ki heʻene kau fanongó: “Ka mou lamasi kimoutolu, naʻa ʻiloange ʻe mafatukituki homou loto, ko e meʻa ʻi he faʻa kai, mo e faʻa inu, mo e faʻa lotomoʻua ki he moʻui ni, pea lapasi kimoutolu ʻe he ʻaho ko ia ʻo hangē ko ha hele puna: he te ne hoko ki he kakai kotoa pe ʻi heʻenau nofo pe ʻi he funga ʻo māmani kotoa. Ka mou ʻā pe, mo lotu ʻi he taimi kotoa pe, koeʻuhi ke mou lava ke hao mei he ngāhi meʻa ko ia fulipe ʻoku ene ke hoko; pea ke tuʻu ʻi he ʻao ʻo e Fanautama ʻa Tangata.”—Luke 21:​34-36.

Ko e faʻahinga pē ʻoku tuʻu ʻi ha tuʻunga fakahōifua ʻi he ʻao ʻo e Fanautama ʻa Tangatá, ʻa Sīsū, te nau maʻu ʻa e ʻamanaki ko e hao ʻi he ngataʻanga ʻo e fokotuʻutuʻu ko ení. He mātuʻaki mahuʻinga ē ke tau ngāueʻaki ʻa e taimi ʻoku toé ke feinga ai ke maʻu ʻa e hōifua ʻa Sihova ko e ʻOtuá mo Sīsū Kalaisí! ʻI heʻene lotu ki he ʻOtuá, naʻe pehē ai ʻe Sīsū: “Ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai ko e Misaia.” (Sione 17:3) Ko ia ko e ʻalunga leva ʻo e potó ʻi hoʻo tafaʻakí ke ako lahi ange fekauʻaki mo Sihova ko e ʻOtuá pea mo ʻene ngaahi fiemaʻú. Ko e Kau Fakamoʻoni ʻa Sihova ʻi ho koló te nau fiefia ke tokoniʻi koe ke ke mahinoʻi ʻa e meʻa ʻoku akoʻi ʻe he Tohi Tapú. ʻOku mau fakaafeʻi loto-māfana koe ke ke fetuʻutaki kia kinautolu pe tohi ki he kau faipulusi ʻo e makasini ko ení.

[Puha/Fakatātā ʻi he peesi 7]

NGAAHI TAFAʻAKI ʻO E KUONGA FAKAMUÍ

NGAAHI MEʻA LALAHI ʻOKU HOKÓ:

▪ Ngaahi tau.​—Mātiu 24:​6, 7.

▪ Ngaahi honge.​—Mātiu 24:7.

▪ Ngaahi mofuike.​—Mātiu 24:7.

▪ Ngaahi mahaki fakaʻauha.​—Luke 21:11.

▪ Ope ʻo e maumau laó.​—Mātiu 24:12.

▪ Fakaʻauha ʻa e fonuá.​—Fakahā 11:18.

KAKAI:

▪ ʻOfa kiate kinautolu pē.​—2 Timote 3:2.

▪ ʻOfa ki he paʻanga.​—2 Timote 3:2.

▪ Anga-taʻetokaʻi.​—2 Timote 3:2.

▪ Talangataʻa ki he mātuʻá.​—2 Timote 3:2.

▪ Taʻehounga.​—2 Timote 3:2.

▪ Taʻemateaki.​—2 Timote 3:​2, NW.

▪ Taʻeʻofa ki hoʻota.​—2 Timote 3:3.

▪ Taʻefakamaʻumaʻu.​—2 Timote 3:3.

▪ Anga-fakamanu.​—2 Timote 3:3.

▪ Kau ʻofa ki he mālié.​—2 Timote 3:4.

▪ Kau mālualoi fakalotu.​—2 Timote 3:5.

KAU LOTU MOʻONI:

▪ Maʻu ʻa e ʻilo lahi.​—Taniela 12:4.

▪ Malangaʻi ʻa e ongoongo leleí ʻi māmani lahi.​—Mātiu 24:14.

[Maʻuʻanga]

UNITED NATIONS/Photo by F. GRIFFING