Ko e Kumi ki he Maluʻangá

MALUʻANGA. ʻOku fealeaʻaki ki ai ʻa e kau taki ʻo e māmaní. ʻOku lotu ʻa e kau taki lotú ʻo fekauʻaki mo ia. Ka, ki he kakaí fakalūkufua, ʻoku hangē ʻa e maluʻangá ia ha misí ʻi hono maʻungataʻá. Ko e fakatātā, ko Ron, ʻa ia naʻá ne luelue ki he ngāué ʻi he kolo lahi taha ʻo ʻAfilika Tonga, ko Johannesburg.

“Naʻe ʻi ai ha kau tangata ʻe toko nima naʻa nau ʻātakaiʻi au, ko e tokotaha mo ha hele naʻá ne ʻai ki hoku lalokiá pea ko e tokotaha mo e hele ʻe taha naʻá ne ʻai ki hoku tuʻá. Naʻa nau hakule hoku ngaahi kató ʻi ha ngaahi laui sēkoni pē. Naʻá ku ongoʻi ʻo hangē ha moa kuo fusi hono fulufulú. Naʻe felākaaki pē ʻa e kakaí mo fakamāhuahu kiate au.” Naʻe ʻikai ha fakafepaki atu ʻa Ron pea naʻá ne hao ʻo ʻikai te ne lavea.

Ki he tokolahi, ko e luelue ʻi he ngaahi hala puleʻangá ʻi ha faʻahinga kolo lahi pē ko ha meʻa fakatupu loto-mafasia. ‘ʻE malava fēfē ke u fakaʻehiʻehi mei he kaihaʻasi fakamālohi ha meʻa meiate au?’ ko e meʻa ia ʻoku nōfoʻi ʻi heʻenau fakakaukaú. ʻOku nau fakavave ke fakakakato ʻenau fakataú koeʻuhi kae malava ke nau foki ki he maluʻanga ʻo e ʻapí. Ka ʻoku malu fēfē ʻa ʻapi? “ʻOku tupulaki fakalilifu ʻi he taʻu taki taha ʻa e malava ʻe ha taha ke hū noaʻia ki ho ʻapí, ʻo faʻao ha konga pe ko e kotoa ʻo hoʻo ngaahi koloá pea puli mo ia ʻo ʻikai toe ʻilo,” ko e lau ia ʻa e tohi ko e Total Home Security.

ʻOku hoko leva ai ʻo fokotuʻu ʻe he kau maʻu ʻapí ha ngaahi tohi fakatokanga ke fakatokangaʻi ki he kau hū noaʻiá ʻoku ʻi loto ʻapi ha fanga kulī fekai pe ʻoku tokangaʻi ʻa e ngaahi ʻapí ni ʻe he kau leʻo ʻoku nau fakamahafu. ʻI he ngaahi feituʻu lahi ʻoku kau fakataha ʻa e kau maʻu ʻapí ʻi ha feinga ke tauʻi ʻa e faihiá. “ʻOku lahi hake ʻi he ngaahi founga fakaangaanga kehekehe pehé ni ʻe 60,000 ʻi Pilitānia pē, ʻo kau ki ai ʻa e ngaahi ʻapi ʻe 750,000,” ko e fakahā ia mei he makasini ko e Security Focus. “Koeʻuhi ko e tupulaki ʻa e faihiá, ko ha meʻa pē ʻo e kuo hilí ia ke ʻoua ʻe anga-fakakaumeʻa ʻa e ngaahi kaungāʻapí,” ko e lau ia ʻa ha fakafofonga maluʻi ʻi ʻAfilika.

ʻOku fetokangaʻaki ki heʻenau lelei ʻa e kau mēmipa ʻo e ngaahi founga maluʻi fakaekaungāʻapí pea ʻoku nau līpooti ki he kau polisí ha faʻahinga meʻa pē ʻoku ngalingalikehe.a Ka naʻe fakamatala ha tohi ongoongo ki ha mēmipa ʻo ha kulupu pehé ni ʻa ia ko hono ʻapí naʻe fai ki ai ha hae-fale: “Ko e meʻa pangó ko e founga fakaangaanga ko ení ʻoku ʻikai ko hano maluʻi ia ke pehē ʻe ʻikai ke teitei toe hae ʻo kaihaʻa mei ho falé. ʻOku ʻikai ha founga maluʻi pehé ni ʻe malava ke ne taukaveʻi ʻa e meʻa ko iá. . . . Kuo pau ke ke fakapapauʻi ʻe koe ʻoku loka ho ngaahi matapaá, pea ʻoku ʻi ai mo haʻo meʻa tala kaihaʻa (burglar alarm) pea fai ha tokanga ke maluʻi ʻa e meʻa kotoa pē.”

Neongo kuo ʻi ai ʻa e ngaahi ola lelei ʻe niʻihi ʻo e ngaahi founga maluʻi fakaekaungāʻapi pehe ní, ʻoku kei lava ke fehuʻia pe ʻoku nau malava ʻo fakasiʻisiʻi ʻa e tuʻunga faihia fakalūkufuá. “Ko e ngaahi taukaveʻi ki hono fakasiʻisiʻi ʻo e faihiá ʻi ha feituʻu siʻisiʻi ʻe hoko ʻo ‘lavameʻa’ pē ʻo kapau ʻoku siʻisiʻi pe ʻikai ha ‘fetongi’ ʻo e faihia ko iá ki he ngaahi feituʻu ʻoku fehokotaki,” ko e fakamatala ia ʻa Shapland mo Vagg ʻi he Policing by the Public. Ko ia, ʻi he ngaahi kolo lalahi ʻe niʻihi ʻa ia kuo līpooti mei ai ʻa e ngaahi lavameʻa fakaofo ʻa e ngaahi kulupu maluʻi fakaekaungāʻapí, kuo ʻi ai ha tupulaki hulu fau ia ʻi he faihiá ʻi he ngaahi feituʻu kehe ʻo e ngaahi kolo lalahi tatau pē ʻa ia ʻoku faingataʻa ke fokotuʻu ai ha ngaahi founga maluʻi pehé ni.

“ʻOku ʻi ai ʻa e ngaahi feituʻu ʻe niʻihi ʻoku ʻikai ke fuʻu ola lelei ai ʻa e ngaahi founga maluʻi fakaekaungāʻapi pehe ní,” ko e fakamatala ia ʻa e sekelitali ʻo ha founga maluʻi fakafonua ʻa ia ʻoku kau ki ai ʻa e kau mēmipa tokolahi hake ʻi he toko 20,000. Naʻe lave ʻa e fefiné ni ki ha ngaahi feituʻu lalahi “ki tuʻa ia mei he koló ʻa ia ʻoku ʻikai malava ke fesiofaki ai ʻa e ngaahi kaungāʻapí pea ʻikai ke ola lelei ai ʻa e founga ʻo fekauʻaki mo e kau leʻó.” Ko e fakatātā, naʻe ʻi ai ha ongo meʻa mali naʻá na hiki mei ha kolo lahi ʻi ʻAmelika ki ha konga ʻapi ʻe taha feʻunga mo e ʻeka ʻe 50 ʻo ofi ki ha kiʻi kolo siʻisiʻi. ʻI ha ngaahi taʻu siʻi pē, naʻe hae hona falé tuʻo ua. Naʻe fakahā ʻe he uaifí ʻa e fakakaukau ʻa e kau nofo ʻuta tokolahi: “ʻOku ou feinga ke u nonga, ka ʻoku ou ilifia. . . . ʻOku ʻikai te u teitei ongoʻi malu.” ʻI he ngaahi fonua ʻoku toutou fakahohaʻasi ʻe he ngaahi fepaki fakapolitikalé, ʻoku fehangahangai ai ʻa e kau nofo ʻutá mo e toe ngaahi fakamālohi kehe pea ʻoku faʻa fakaʻaiʻai ke nau kau ki ha tafaʻaki.

Tā neʻineʻi ke fakaʻamua ʻe he tokolahi ‘ʻa e ngaahi ʻaho lelei ʻo e kuo hilí.’ “ʻI he kamataʻanga ʻo e senitulí ni,” ko e fakamatala ia ʻa e tohi ko e The Growth of Crime, “naʻe ʻi ai . . . ha tui fakalūkufua ʻo pehē ko e [faihiá] ʻe fakaʻau ke vaivai ange.” Ka ko e hā ʻa e meʻa kuo hokó? ʻOku fakamatala ʻa e ongo faʻu tohi ko Sir Leon Radzinowicz mo Joan King ʻo pehē: “ʻI he ʻuluaki taʻu ʻe uanoa ʻo e senitulí ni, naʻa mo e lolotonga ʻo e tau ʻuluaki ʻa e māmani, ko e faihiá naʻe tuʻu pē ʻi ha tuʻunga meimei tatau pē mo e tupu ʻa e tokolahi ʻo e kakai. ʻI he hili ʻa e taimi faingataʻa ʻo e taú naʻe hoko leva ʻo fakatokangaʻi ʻa e fakaʻau ke lahi ange. ʻI he ngaahi taʻu ʻo e fuʻu liliu ʻi he tuʻunga fakaʻikonōmiká, faingataʻa ke maʻu ngāué pea mo e tau lahi hono hokó, naʻe fakaʻau ke toe lahi ange ʻa e laka lahi ʻa e [faihiá] . . . Ko e meʻa ʻe taha ʻoku hā lelei kiate kita ʻi heʻete vakai ki he faihiá ʻi hono tuʻunga ʻi he māmaní ko e hūhū mo e tupulekina tuʻukāivi ʻa e faihiá ʻi he feituʻu kotoa pē.”

Ko e ‘tupulekina ʻa e maumau lao,’ naʻe ʻosi kikiteʻi neongo naʻe ʻikai ke ʻamanekina ʻe he tokolahi. Ko e ngaahi faingataʻa lalahi kuo hoko ki he faʻahinga ʻo e tangatá talu mei he kamata ʻo e tau ʻuluaki ʻa e māmaní ʻi he 1914 naʻe ʻosi fakahā ia ki muʻa ʻe he Tohitapú. Naʻe tomuʻa kikiteʻi ʻe Sīsū ko e fokotuʻutuʻu fulikivanu ʻa e tangatá ʻe faai atu ki hano ngataʻanga: “ʻE tuʻu ha kakai ki ha kakai, mo ha puleʻanga ki ha puleʻanga: pea ʻe ai ha ngāhi honge mo ha ngāhi mofuike ʻi he ngāhi potu kehekehe. Pea ko e meʻa ʻi he ope [tupulekina, NW] ʻo e maumau lao, ʻe fakaaʻau ʻo momoko ʻa e ʻofa ʻa e tokolahi.”​—Mātiu 24:​3, 7, 12; toe vakai kia Luke 21:​10, 11.

Naʻe toe tānaki atu ʻe Sīsū: “Pea ʻi he kamata hoko ʻa e ngaahi meʻa ko ia, mou hiki homou ʻulu, ʻo hanga hake; he ʻoku ofi ai homou huhuʻi.” Ko ia ai, ʻoku ʻi ai ʻa e ʻuhinga ke ke fakakaukau pau ai. ʻOku tuʻunuku mai ke fakafiemālieʻi ʻa e kumi ʻa e tangatá ki he maluʻanga ki māmani lahí.​—Luke 21:​28-32.

[Fakamatala ʻi lalo]