“ʻIlonga ha Taha ʻOku Lau pea Ke Ne Tokanga ki Ai”

“Ka mou ka vakai ʻoku tuʻu ʻi he Potu Tapu ʻa e meʻa fakalielia ʻo e fakaʻauha, . . . pea ke toki hola ki he moʻunga ʻakinautolu ʻoku ʻi Siutea.”​—MĀTIU 24:​15, 16.

 1. Ko e hā ʻa e ola naʻe hoko ʻi he fakatokanga naʻe fai ʻe Sīsū ʻa ia ʻoku maʻu ʻi he Luke 19:​43, 44?

KO ʻETAU ʻāʻā ki ha fakatamaki ʻoku tuʻunuku mai ʻe lava ke ne ʻai ai kitautolu ke tau kalofi ia. (Palovepi 22:3) Ko ia, fakaʻuta atu angé ki he tuʻunga ʻo e kau Kalisitiané ʻi Selusalema ʻi he hili hono ʻohofi ʻe Loma ʻi he 66 T.S. Naʻe fakatokanga ʻa Sīsū ʻe kāpui pea fakaʻauha ʻa e koló. (Luke 19:​43, 44) Naʻe fakataleʻi ia ʻe he tokolahi taha ʻo e kau Siú. Ka naʻe tokanga ʻa ʻene kau ākongá ki heʻene fakatokangá. Ko hono olá, naʻe fakahaofi kinautolu mei he fakatamaki ʻo e 70 T.S.

 2, 3. Ko e hā ʻoku totonu ai ke tau mahuʻingaʻia ʻi he kikite ʻa Sīsū ʻoku hiki ʻi he Mātiu 24:​15-​21?

² ʻI ha kikite fakataha mo e ngaahi fakahuʻunga kiate kitautolu he ʻaho ní, naʻe fokotuʻutuʻu ai ʻe Sīsū ha fakaʻilonga fetuiaki naʻe kau ki ai ʻa e ngaahi taú, ngaahi nounou fakameʻatokoní, ngaahi mofuiké, ngaahi mahaki fakaʻauhá, mo hono fakatangaʻi ʻo e kau Kalisitiane ʻoku nau malanga fekauʻaki mo e Puleʻanga ʻo e ʻOtuá. (Mātiu 24:​4-​14; Luke 21:​10-​19) Naʻe toe tuku mai ʻe Sīsū ha ʻiloʻiʻanga ʻa ia te ne tokoniʻi ʻa ʻene kau ākongá ke nau ʻilo naʻe ofi ʻa e ngataʻangá​—ko ha ‘tuʻu ʻi he Potu Tapú ʻa e meʻa fakalielia ʻo e fakaʻauhá.’ (Mātiu 24:​15, fakaʻītali ʻamautolu.) Tau toe sivisiviʻi angé ʻa e ngaahi lea mohu ʻuhinga ko iá ke sio pe ʻoku anga-fēfē ʻene kaunga ki heʻetau moʻuí he taimí ni pea ʻi he kahaʻú.

³ Hili hono fakahaaʻi ʻa e fakaʻilongá, naʻe pehē ʻe Sīsū: “Ka mou ka vakai ʻoku tuʻu ʻi he Potu Tapu ʻa e meʻa fakalielia ʻo e fakaʻauha, ʻa ia naʻe folofola ki ai ʻi he palofita ko Taniela; (ʻilonga ha taha ʻoku lau, pea ke ne tokanga ki ai:) pea ke toki hola ki he moʻunga ʻakinautolu ʻoku ʻi Siutea: pea ko ia ʻoku ʻi he tuʻafale ke ʻoua te ne ʻalu hifo ke ʻave ʻa e ngāhi meʻa mei hono fale: pea ko ia ʻoku ʻi he ngoue, ke ʻoua te ne foki ki ʻapi ke ʻave hono kofu. Ka ʻoiaue ʻakinautolu ʻoku feitama, mo kinautolu ʻoku toutama ʻi he taimi ko ia! Pea mou lotua ke ʻoua naʻa hoko hoʻomou hola ʻi he faʻahitaʻu momoko, kaeʻumaʻā ʻi ha Sapate: koeʻuhi ʻe toki hoko ai ha mamahi lahi, ʻa ia kuo teʻeki hano tatau mei he kamataʻanga ʻo mamani.”​—Mātiu 24:​15-​21.

 4. Ko e hā ʻokú ne fakahaaʻi naʻe ʻi ai hono fakahoko ʻo e Mātiu 24:15 ʻi he ʻuluaki senitulí?

⁴ Ko e ongo fakamatala ʻa Maʻake mo Luké ʻokú na ʻomai ʻa e ngaahi fakaikiiki ʻo tānaki mai ki ai. ʻI hono ngāueʻaki ʻe Mātiu ʻa e “tuʻu ʻi he Potu Tapu,” ʻoku pehē ʻi he Maake 13:14 “ʻoku tuʻu ʻi he potu ʻoku tapu ki ai.” ʻOku tānaki mai ʻe he Luke 21:20 ki he ngaahi lea ʻa Sīsuú: “ʻO ka mou ka vakai ki he kapui ʻo Selusalema ʻe he ngaahi matatau, te mou toki ʻilo kuo ofi hono fakaʻauha.” ʻOku tokoniʻi kitautolu ʻe he meʻá ni ke tau sio ko e ʻuluaki fakahokó naʻe kau ki ai ʻa hono ʻohofi ʻe he kau Lomá ʻa Selusalema mo hono temipalé​—ko ha feituʻu naʻe māʻoniʻoni ki he kau Siú ka naʻe ʻikai ko ha feituʻu ia naʻe kei māʻoniʻoni kia Sihova—ʻa ia naʻe kamata ʻi he 66 T.S. Naʻe hoko ʻa e fakaʻauha fakaʻaufulí ʻi he taimi naʻe fakaʻauha ai ʻe he kau Lomá fakatouʻosi ʻa e koló mo e temipalé ʻi he 70 T.S. Ko e hā ʻa e “meʻa fakalielia” ʻi he taimi ko iá? Pea naʻe anga-fēfē ʻene ‘tuʻu ʻi he Potu Tapú’? Ko e ongo tali ki he ongo fehuʻí ni ʻe tokoni ia ke fakamaʻalaʻala ʻa hono fakahoko ʻi onopōní.

 5, 6. (a) Ko e hā ʻe fiemaʻu ai ʻa e tokangá ki he kau lautohi ʻo e Taniela vahe 9? (e) Naʻe anga-fēfē hono fakahoko ʻo e kikite ʻa Sīsū fekauʻaki mo e “meʻa fakalielia”?

⁵ Naʻe fakaʻaiʻai ʻe Sīsū ʻa e kau lautohí ke nau ngāueʻaki ʻa e tokangá. Kau lautohi ʻo e hā? Hangehangē ko e Taniela vahe 9. ʻI aí ʻoku tau maʻu ai ha kikite ʻokú ne fakahaaʻi ʻa e taimi ʻe hā ai ʻa e Mīsaiá mo tomuʻa tala ai ʻe “tuʻusi” ia hili ha taʻu ʻe tolu mo e konga. ʻOku pehē ʻe he kikité: “ʻE tuʻu ʻi he kapakau ʻo e koto fakalielia ha taha fakalala, ʻo aʻu ki he fakakakato, mo e meʻa kuo tuʻutuʻuni, ʻa ia ʻe huhua ki he meʻa ʻoku fakalala.”​—Taniela 9:​26, 27, fakaʻītali ʻamautolu; toe sio foki ki he Taniela 11:31; 12:11.

⁶ Naʻe fakakaukau ʻa e kau Siú naʻe kaunga eni ki hono fakalieliaʻi ʻa e temipalé ʻe ʻAnitiokasi IV ʻi he taʻu nai ʻe 200 ki muʻá. Kae kehe, naʻe fakahaaʻi ʻe Sīsū ia ʻa e meʻa kehe, ʻi hono fakaʻaiʻai ʻa e tokanga koeʻuhi ko e “meʻa fakalielia” naʻe teu ke hā ʻo tuʻu ʻi ha “Potu Tapu.” ʻOku hā mahino naʻe ʻuhinga ʻa Sīsū ki he kautau Loma ko ia te nau haʻu ʻi he 66 T.S. mo e ngaahi fuka fakaʻilongá. Ko e ngaahi fuka ko iá, kuo fuoloa hono ngāueʻakí, naʻe meimei hangē pē ha ngaahi ʻaitolí pea naʻa nau fakalielia ki he kau Siú.a Naʻa nau ‘tuʻu ʻi he Potu Tapú’ ʻanefē? Naʻe hoko ia ʻi he taimi naʻe ʻohofi ai ʻe he kautau Lomá, mo ʻenau ngaahi fuká ʻa Selusalema mo hono temipalé, ʻa ia naʻe vakai ki ai ʻa e kau Siú naʻe māʻoniʻoní. Naʻe aʻu ʻo kamata ke keli ʻe he kau Lomá ʻa e ʻā ʻo e feituʻu temipalé. Ko e moʻoni, ko e meʻa ko ia naʻe fuoloa ʻene fakalieliá naʻe tuʻu ia ʻi he taimi ko iá ʻi ha potu tapu!​—Aisea 52:1; Mātiu 4:5; 27:53; Ngāue 6:​13.

Ko ha “Meʻa Fakalielia” ʻi Onopooni

 7. Ko e hā ʻa e kikite ʻa Sīsū ʻoku fakahoko ʻi hotau taimí?

⁷ Talu mei he Tau I ʻa Māmaní, kuo tau sio ʻi he fakahoko lahi ange ʻo e fakaʻilonga ʻa Sīsū naʻe hiki ʻi he Mātiu vahe 24. Neongo ia, manatu ki heʻene ngaahi leá: “Ka mou ka vakai ʻoku tuʻu ʻi he Potu Tapu ʻa e meʻa fakalielia ʻo e fakaʻauha, . . . pea ke toki hola ki he moʻunga ʻakinautolu ʻoku ʻi Siutea.” (Mātiu 24:​15, 16) Ko e tafaʻaki ko eni ʻo e kikité kuo pau ke ʻi ai hono fakahoko ʻi hotau taimí foki.

 8. Kuo anga-fēfē hono fakapapauʻi ʻi he laui taʻu ʻe he Kau Fakamoʻoni ʻa Sihová ʻa e “meʻa fakalielia” ʻi onopōní?

⁸ ʻI hono fakahāhā ʻa e tuipau ʻa e kau sevāniti ʻa Sihová ʻe fakahoko ʻa e kikite ko ení, ko e The Watchtower ʻo Sanuali 1, 1921, naʻe fakahangataha ki ai ʻi he felāveʻi mo e ngaahi meʻa naʻe tupulekina ʻi he Hahake Lotolotó. ʻI he faai mai ʻa e taimí, ʻi heʻene ʻīsiu ʻo Tīsema 15, 1929, ʻi he peesi 374, naʻe pehē fakaʻosi ai ʻe he The Watchtower: “Ko e hehema kotoa ʻa e Kautaha ʻa e Ngaahi Puleʻangá ke fakatafokiʻi ʻa e kakaí mei he ʻOtuá pea mo Kalaisi, pea ko ia ai, ko ha meʻa fakalielia ia, ko e meʻa ʻa Sētane, pea ko ha meʻa palakū ʻi he vakai mai ʻa e ʻOtuá.” Ko ia, ʻi he 1919 naʻe hā ai ʻa e “meʻa fakalielia.” ʻI he faai mai ʻa e taimí, naʻe fetongi ai ʻa e Kautahá ia ki he Ngaahi Puleʻanga Fakatahatahá. Kuo fuoloa hono fakaeʻa ʻe he Kau Fakamoʻoni ʻa Sihová ʻa e ongo kautaha fakamelino fakaetangata ko ení ʻoku fakalielia ʻi he vakai mai ʻa e ʻOtuá.

 9, 10. Naʻe anga-fēfē hono tākiekina ʻe ha mahino ki muʻa fekauʻaki mo e mamahi lahí ʻetau vakai ki he taimi ko ia ʻe tuʻu ai ʻi ha potu tapu ʻa e “meʻa fakalielia”?

⁹ ʻOku fakanounou ʻi he kupu ki muʻá ha vakai maʻalaʻala ki he konga lahi ʻo e Mātiu vahe 24 mo e 25. ʻOku feʻungamālie ʻa e fakamaʻalaʻala fekauʻaki mo e ‘tuʻu ʻi he Potu Tapú ʻa e meʻa fakalieliá’? ʻOku hā mahino ʻoku pehē. ʻOku fakafehokotaki vāofi ʻe he kikite ʻa Sīsuú ʻa e “tuʻu ʻi he Potu Tapu” mo e mapuna hake ʻa e “mamahi” naʻe tomuʻa talá. Mei hení, neongo ko e “meʻa fakalielia” kuo fuoloa ʻene ʻi aí, ko e fehokotaki ʻi he vahaʻa ʻo ʻene “tuʻu ʻi he Potu Tapu” pea mo e mamahi lahí ʻoku totonu ke ne laveʻi ʻetau fakakaukaú. ʻO anga-fēfē?

¹⁰ Naʻe mahino ʻi ha taimi ki he kakai ʻa e ʻOtuá ko e tafaʻaki ʻuluaki ʻo e mamahi lahí naʻe kamata ia ʻi he 1914 pea ko e konga fakaʻosí ʻe hoko mai ia ʻi he tau ʻo ʻĀmaketoné. (Fakahā 16:​14, 16; fakafehoanaki mo e The Watchtower, ʻEpeleli 1, 1939, peesi 110.) Ko ia, ʻoku lava ke tau mahinoʻi ai ʻa e ʻuhinga naʻe fai ai ʻa e fakakaukau ʻi ha taimi ko e “meʻa fakalielia” ʻo e ʻaho ki mui ní kuo pau pē naʻe tuʻu ʻi ha potu tapu ʻi he hili pē ʻa e Tau I ʻa Māmaní.

11, 12. ʻI he 1969, ko e hā ʻa e vakai naʻe toe fakatonutonu fekauʻaki mo e mamahi lahí naʻe ʻomai aí?

¹¹ Kae kehe, ʻi he ngaahi taʻu ki muí kuo tau hoko ai ʻo kehe ʻetau sio ki he ngaahi meʻá. ʻI he Tuʻapulelulu, Siulai 10, 1969, ʻi he ʻAsemipilī Fakavahaʻapuleʻanga “Melino ʻi he Māmaní” ʻi he Kolo Niu ʻIoké, ko F. W. Franz, ʻa e tokoni palesiteni ʻo e Sōsaieti Taua Leʻo Tohitapu mo e Tulekí ʻi he taimi ko iá, naʻá ne fai ai ha malanga mātuʻaki fakalotomāfana. ʻI hono toe vakaiʻi ʻa e mahino ki muʻa fekauʻaki mo e kikite ʻa Sīsuú, naʻe pehē ai ʻe Tokoua Franz: “Naʻe fai ʻa e fakamatala ko e ‘mamahi lahí’ naʻe kamata ia ʻi he 1914 T.S. pea naʻe ʻikai fakaʻatā ke fakahoko kakato ia ʻi he taimi ko iá ka ko hono kehé naʻe taʻofi ʻe he ʻOtuá ia ʻa e Tau I ʻa Māmaní ʻi Nōvema ʻo e 1918. Mei he taimi ko iá ʻo faai mai ai naʻe fakaʻatā ai ʻe he ʻOtuá ha kiʻi mālōlō ki he ngāue ʻa ʻene kau Kalisitiane fili ko e toenga ʻo e kau paní ki muʻa ʻi heʻene tuku ke toe fakafoki mai ʻa e konga fakaʻosi ʻo e ‘mamahi lahí’ ʻi he tau ʻo ʻĀmaketoné.”

¹² Naʻe toki fai leva ha fakamatala feʻunuʻaki mahuʻinga: “Ke fehoanakimālie mo e ngaahi meʻa ʻo e ʻuluaki senitulí, . . . ko e ‘mamahi lahi’ ʻikai fakaetaipé naʻe ʻikai ke kamata ia ʻi he 1914 T.S. Ka, ko e meʻa naʻe hoko ki Selusalema ʻikai fakaetaipe ʻi onopōní ʻi he 1914-​1918 ko ha ‘kamataʻanga pē ʻo e mamahí’ . . . Ko e ‘mamahi lahi’ ʻa ia ʻe ʻikai toe hokó ʻoku kei tuʻu ia mei muʻa, he ʻoku ʻuhinga iá ko hono fakaʻauha ʻo e ʻemipaea ʻo e lotu loí ʻi māmani lahi (kau ai ʻa Puleʻanga-Haʻa-Kalisitiane) ʻo hoko mai ai ʻa e ‘tau ʻo e ʻaho lahi ʻo e ʻOtua Aoniú’ ʻi ʻĀmaketone.” Naʻe ʻuhinga ení ko e mamahi lahi fakakātoá naʻe kei tuʻu ia mei muʻa.

13. Ko e hā ʻoku totonu ai ke pehē ʻe ʻi ai ha ‘tuʻu ʻi he Potu Tapú’ ʻe fai ʻe he “meʻa fakalielia” ʻi he kahaʻú?

¹³ ʻOku ʻi ai ʻa e kaunga fakahangatonu ʻo e meʻá ni ki he tokangá ʻi he taimi ʻe tuʻu ai ʻa e “meʻa fakalielia” ʻi ha potu tapú. Manatuʻi ʻa e meʻa naʻe hoko ʻi he ʻuluaki senitulí. Naʻe ʻohofi ʻe he kau Lomá ʻa Selusalema ʻi he 66 T.S., ka naʻa nau holomui taʻeʻamanekina, ko ia naʻe fakaʻatā ai ke fakahaofi ʻa e “kakano” Kalisitiané. (Mātiu 24:22) Fakatatau ki ai, ʻoku tau ʻamanekina ʻa e mamahi lahí ke vave ʻene kamatá, ka ʻe fakanounou ia telia ʻa e kakai fili ʻa e ʻOtuá. Fakatokangaʻi ange ʻa e poini tefito ko ení: ʻI he sīpinga he kuonga muʻá, ko e ‘tuʻu ʻi he Potu Tapú ʻa e meʻa fakalieliá’ naʻe fakafehokotaki ia ki he ʻoho ʻa e kau Lomá ʻi he malumalu ʻo Seniale Kōlasí ʻi he 66 T.S. Ko e huʻufataha ʻi onopooni ki he ʻoho ko iá​—ko e mapuna hake ʻa e mamahi lahí​—ʻoku kei tuʻu ia mei muʻa. Ko ia ko e “meʻa fakalielia ʻo e fakaʻauha,” ʻa ia naʻe ʻi ai talu mei he 1919, ʻoku hā mahino ʻe ʻi he kahaʻú ʻa ʻene tuʻu ia ʻi he potu tapú.b ʻE anga-fēfē ʻene hoko ení? Pea ʻe lava fēfē ke uesia kitautolú?

Ko ha ʻOhofi ʻi he Kahaʻú

14, 15. ʻOku anga-fēfē hono tokoniʻi kitautolu ʻe he Fakahā vahe 17 ke mahinoʻi ʻa e ngaahi meʻa ʻe hoko ʻo aʻu ki ʻĀmaketoné?

¹⁴ ʻOku fakamatalaʻi ʻe he tohi ʻa Fakahaá ha ʻohofi fakaefakaʻauha ʻo e lotu loí ʻi he kahaʻú. ʻOku fakahaaʻi ʻi he vahe 17 ʻa e fakamaau ʻa e ʻOtuá ki “Babilone koe lahi, koe faʻe ae kau feauaki”​—ʻa e ʻemipaea ʻo e lotu loí ʻi he māmaní. ʻOku fakahoko ʻe Puleʻanga-Haʻa-Kalisitiane ha konga tefito pea taukaveʻi ʻokú ne maʻu ha vahaʻangatae fakaefuakava mo e ʻOtuá. (Fakafehoanaki mo Selemaia 7:4.) Ko e ngaahi lotu loí, kau ai ʻa Puleʻanga-Haʻa-Kalisitiane, kuo fuoloa ʻenau feangainga taʻefakalao mo e “gaahi tuʻi a mamani,” ka ʻe ngata ʻa e meʻá ni ʻi hono fakaʻauha ʻo e ngaahi lotu ko iá. (Fakahā 17:​2, 5, PM) ʻI he nima ʻo hai?

¹⁵ ʻOku fakatātaaʻi ʻi he Fakahaá ha “manu fekai kulaʻahoʻaho” ʻa ia ʻoku ʻi ai ʻi ha taimi, mole atu, pea toe foki mai. (Fakahā 17:​3, 8) ʻOku poupouʻi ʻa e manu fekai ko ení ʻe he kau pule ʻo e māmaní. Ko e ngaahi fakaikiiki naʻe ʻomai ʻi he kikité ʻokú ne tokoniʻi kitautolu ke fakapapauʻi ʻa e manu fekai fakaefakatātā ko ení ko ha kautaha fakamelino ʻa ia naʻe hoko ʻo ʻi ai ʻi he 1919 ko e Kautaha ʻa e Ngaahi Puleʻangá (ko ha “meʻa fakalielia”) pea ko e Ngaahi Puleʻanga Fakatahatahá ia he taimí ni. ʻOku fakahā ʻe he Fakahā 17:​16, 17 ʻe toki ʻai ʻe he ʻOtuá ki he loto ʻo e kau pule ʻe niʻihi ʻo e tangatá ʻa ia ʻoku nau tuʻu-ki-muʻa ʻi he “manu fekai” ko ení ke nau fakaʻauha ʻa e ʻemipaea ʻo e lotu loí ʻi he māmaní. ʻOku fakaʻilongaʻi ʻe he ʻohofi ko iá ʻa e mapuna hake ʻa e mamahi lahí.

16. Ko e hā ʻa e ngaahi tupulaki ʻoku hoko ʻa ia ʻoku taau ke fakatokangaʻi fekauʻaki mo e lotú?

¹⁶ Koeʻuhi ko e kamata ʻa e mamahi lahí ʻoku kei ʻi he kahaʻú, ʻoku kei ʻi muʻa ʻiate kitautolu ʻa e “tuʻu ʻi he Potu Tapu”? Makatuʻunga ʻi he fakamoʻoní ʻoku pehē. Lolotonga ko e “meʻa fakalielia” naʻá ne hā ki muʻa ʻi he senitulí ni pea ko ia ai, kuó ne ʻi ai ʻi ha laui hongofuluʻi taʻu, te ne ʻai hano tuʻunga ʻi ha founga makehe “ʻi he Potu Tapu” ʻi he kahaʻu ofi maí. Hangē pē ko e pau naʻe siofi loto-vēkeveke ʻe he kau muimui ʻo Kalaisi ʻi he ʻuluaki senitulí ke sio ki he anga ʻo e tupulaki ʻa e “tuʻu ʻi he Potu Tapu,” ʻoku pehē pē ʻa e kau Kalisitiane ʻi he lolotonga ní. Ko hono moʻoní, kuo pau ke tau tatali ki he fakahoko moʻoní ke ʻiloʻi ai ʻa e ngaahi fakaikiikí kotoa. Ka, ʻoku taau ke fakatokangaʻi ʻi he ngaahi fonua ʻe niʻihi kuo ʻosi ʻi ai ha fakafili pau mo fakautuutu ki he lotú. Ko e ngaahi ʻelemēniti fakapolitikale ʻe niʻihi, ʻi he fāitaha mo e kau Kalisitiane ki muʻa kuo nau mavahe mei he tui moʻoní, ʻoku nau langaʻi ʻa e fakafili ki he lotú fakalūkufua ʻo tautefito ki he kau Kalisitiane moʻoní. (Sāme 94:​20, 21; 1 Timote 6:​20, 21) Ko ia, naʻa mo e taimí ni ʻoku “fai tau mo e Lami” ʻa e ngaahi mafai fakapolitikalé, pea hangē ko ia ʻoku fakahaaʻi ʻe he Fakahā 17:​14, ko e faitau ko ení ʻe fakalalahi. Lolotonga heʻikai te nau lava moʻoni ʻo ala ki he Lami ʻa e ʻOtuá​—ʻa Sīsū Kalaisi ʻi hono tuʻunga hakeakiʻi mo fakalāngilangí—te nau toe tuku atu ʻenau fakafepakí ki he kau lotu moʻoni ʻa e ʻOtuá, tautefito ki heʻene “kakai maonioni.” (Taniela 7:​25, PM; fakafehoanaki mo Loma 8:​27; Kolose 1:2; Fakahā 12:17.) ʻOku tau maʻu ʻa e fakapapau fakaʻotua ko e Lamí mo e faʻahinga ʻe fakataha mo iá te nau ikuna.​—Fakahā 19:​11-​21.

17. ʻI he ʻikai ke hoko ʻo fakamatemateé, ko e hā nai te tau leaʻaki ki he founga ʻe tuʻu ai ʻa e “meʻa fakalielia” ʻi ha potu tapú?

¹⁷ ʻOku tau ʻiloʻi ʻoku tatali mai ʻa e fakaʻauha ki he lotu loí. Ko Pāpilone ko e Lahí ʻoku “konā . . . ʻi he toto ʻo e kakai lotu” pea kuó ne ngāue ko ha kuini, ka ʻoku papau ʻa hono fakaʻauhá. Ko e tākiekina taʻemaʻa kuó ne fai ki he ngaahi tuʻi ʻo e māmaní ʻe liliu mataʻāʻā ia ʻi he iku ʻa e vahaʻangatae ko iá ki he taha ʻo e tāufehiʻa fakamālohi ʻi he tafaʻaki ʻa e ‘nifo ʻe hongofulú mo e manu fekaí.’ (Fakahā 17:​6, 16; 18:​7, 8) ʻI he taimi ʻe ʻohofi ai ʻe he “manu fekai kulaʻahoʻaho” ʻa e fuʻu feʻauaki fakalotú, ko e “meʻa fakalielia” ʻe tuʻu ia ʻi ha founga fakamanamana ʻi he potu tapu ʻoku taku ʻe Puleʻanga-Haʻa-Kalisitiané.c Ko ia, ʻe kamata ʻa e fakaʻauhá ʻi Puleʻanga-Haʻa-Kalisitiane taʻeangatonu, ʻa ia ʻokú ne fakamatalaʻi ia tonu ʻokú ne māʻoniʻoni.

“Hola”​—ʻO Anga-Fēfē?

18, 19. Ko e hā ʻa e ngaahi ʻuhinga ʻoku ʻomai ke fakahaaʻi ko e “hola ki he moʻunga” ʻe ʻikai ʻuhinga ia ko e fetongi ʻo e lotú?

¹⁸ Hili hono tomuʻa tala ʻa e ‘tuʻu ʻi he Potu Tapú ʻa e meʻa fakalieliá,’ naʻe fakatokanga ʻa Sīsū ki he faʻahinga tokangá ke nau ngāue. Naʻá ne ʻuhingá ʻi he tuʻunga hoko mai ko iá​—ʻi he taimi ʻoku “tuʻu [ai] ʻi he Potu Tapu ʻa e meʻa fakalielia”​—ʻe hola ʻa e kakai tokolahi mei he lotu loí ʻo maʻu ʻa e lotu moʻoní? Mole ke mamaʻo. Fakakaukau ange ki he ʻuluaki fakahokó. Naʻe pehē ʻe Sīsū: “Ke toki hola ki he moʻunga ʻa kinautolu ʻoku ʻi Siutea: pea ko ia ʻoku ʻi he tuʻafale ke ʻoua te ne ʻalu hifo ki fale, ʻumaʻā haʻane hū ki ai ke ʻave ha meʻa: pea ko ia kuo ne ʻalu ki he ngoue ke ʻoua te ne foki ki he ngaahi meʻa kuo tuku ʻi ʻapi ke ʻave hono kofu. Ka ʻoiauē ʻa kinautolu ʻoku feitama mo kinautolu ʻoku toutama ʻi he taimi ko ia! Pea mou lotua ke ʻoua naʻa hoko ia ʻi he faʻahitaʻu momoko.”​—Maake 13:​14-​18, fakaʻītali ʻamautolu.

¹⁹ Naʻe ʻikai ke pehē ʻe Sīsū ko e faʻahinga pē ko ia ʻi Selusalemá naʻe fiemaʻu ke nau holomuí, ʻo hangē ia ko ʻene poiní naʻe fiemaʻu ke nau hū ki tuʻa mei he senitā ʻo e lotu faka-Siú; pea naʻe ʻikai lave ʻi heʻene fakatokangá ki ha fetongi ʻi he lotú​—ʻo hola mei he loí pea maʻu ʻa e moʻoní. Naʻe ʻikai moʻoni fiemaʻu ʻe he kau ākonga ia ʻa Sīsuú ha fakatokanga fekauʻaki mo e hola mei ha lotu ʻe taha ki ha toe lotu ʻe taha; ne nau ʻosi hoko ko e kau Kalisitiane moʻoni. Pea ko e ʻohofi ʻi he 66 T.S. naʻe ʻikai te ne ueʻi ʻa e kau tōʻonga fai ʻi he lotu faka-Siu ʻi Selusalemá pea ʻi Siutea kotoa ke liʻaki ʻa e lotu ko iá pea tali ʻa e lotu faka-Kalisitiané. ʻOku pehē ʻe Palōfesa Heinrich Graetz ko e faʻahinga ko ia naʻa nau tulimui ʻi he kau Loma naʻe holá naʻa nau foki mai ki he koló: “Ko e kau Sēlotí, ʻi heʻenau kalangaʻaki ʻa e ngaahi hiva ʻo e ikuna ʻi he taú, naʻa nau foki ki Selusalema (ʻi hono 8 ʻo ʻOkatopá), naʻe tātuʻu honau ngaahi lotó ʻi he ʻamanaki fiefia ki he tukuange mo e tauʻatāina. . . . ʻIkai kuo tokoniʻi kinautolu ʻe he ʻOtuá ʻi he meesi tatau pē ko ia naʻá Ne tokoniʻiʻaki ʻenau fanga kuí? Ko e loto ʻo e kau Sēlotí naʻe ʻikai ha manavahē ai ki he kahaʻú.”

20. Naʻe anga-fēfē ʻa e tali ʻa e muʻaki kau ākongá ki he fakatokanga ʻa Sīsū ke hola ki he moʻungá?

²⁰ Naʻe anga-fēfē leva ʻa e ngāue ʻi he taimi ko iá ʻa e kiʻi tokosiʻi ʻi hono fakahoa atú ki he fakahinohino ʻa Sīsuú? ʻAki ʻa e mavahe mei Siutea pea hola ki he ngaahi moʻungá ʻo kolosi ʻi Sioatani, naʻa nau fakahaaʻi naʻe ʻikai ko ha konga kinautolu ʻo e fokotuʻutuʻu faka-Siú, fakapolitikale pe fakalotu. Naʻa nau mavahe mei heʻenau ngaahi ngoué mo e ngaahi ʻapí, naʻa mo e ʻikai ke tānaki mai ʻenau ngaahi koloá mei honau ngaahi falé. ʻI he tuipau ki he maluʻi mo e poupou ʻa Sihová, naʻa nau fakamuʻomuʻa ʻa ʻene lotú ʻi he meʻa kehe kotoa pē ʻa ia naʻe hā ngali mahuʻingá.​—Maake 10:​29, 30; Luke 9:​57-​62.

21. ʻOku fiemaʻu ke ʻoua te tau ʻamanekina ʻa e hā ʻi he taimi ʻe ʻoho ai ʻa e “meʻa fakalielia”?

²¹ Fakakaukau ange, he taimí ni, ki he fakahoko lahi angé. Kuo tau fakaʻaiʻai ʻa e kakaí ʻi he laui hongofuluʻi taʻu ke nau hū ki tuʻa mei he lotu loí pea maʻu ʻa e lotu moʻoní. (Fakahā 18:​4, 5) Kuo fai pehē ʻa e laui miliona. ʻOku ʻikai ke fakahaaʻi ʻe he kikite ʻa Sīsuú ko e taimi pē ʻe mapuna hake ai ʻa e mamahi lahí, ʻe hanga ʻa e fuʻu tokolahi ki he lotu maʻá; ko e moʻoni, naʻe ʻikai ha fuʻu fakaului tokolahi ʻo e kau Siú ʻi he 66 T.S. Ka, ʻe maʻu ʻe he kau Kalisitiane moʻoní ʻa e hehema lahi ke ngāueʻaki ʻa e fakatokanga ʻa Sīsuú pea hola.

22. Ko ʻetau ngāueʻaki ʻa e fakahinohino ʻa Sīsū fekauʻaki mo e hola ki he moʻungá ʻe kau nai ki ai ʻa e hā?

²² ʻOku ʻikai te tau lava ʻo maʻu he lolotongá ni ʻa e fakaikiiki kakato fekauʻaki mo e mamahi lahí, ka ʻe lava moʻoni ke tau fakaʻosiʻaki, kiate kitautolu ko e hola ko ia naʻe lea ʻa Sīsū fekauʻaki mo iá ʻe ʻikai ke ʻi ha ʻuhinga fakasiokālafi ia. Ko e kakai ʻa e ʻOtuá kuo nau ʻosi ʻi he kolopé takatakai, ʻo meimei ʻi he tapa kotoa pē. Ko ia ai, ʻe lava ke tau fakapapauʻi, ko e taimi ko ia ʻoku fiemaʻu ai ʻa e holá, ʻe pau ke hokohoko atu ʻa e kau Kalisitiané ke tauhi maʻu ha faikehekehe maʻalaʻala ʻi he vahaʻa ʻo kinautolú mo e ngaahi kautaha fakalotu loí. ʻOku toe mahuʻinga he naʻe fakatokanga ʻa Sīsū fekauʻaki mo e ʻikai ke toe foki ki hoto falé ke maʻu mai ʻa e valá pe ngaahi koloa kehé. (Mātiu 24:​17, 18) Ko ia, ʻe ʻi ai nai ha ngaahi ʻahiʻahi mei muʻa ki he anga ʻo ʻetau vakai ki he ngaahi meʻa fakamatelié; ko e meʻa mātuʻaki mahuʻinga tahá kinautolu, pe ʻoku mahuʻinga ange ʻa e fakamoʻui ko ia ʻe hoko mai maʻá e faʻahinga kotoa ʻi he tafaʻaki ʻa e ʻOtuá? ʻIo, ko ʻetau holá ʻe kau nai ki ai ha ngaahi faingataʻa mo e ngaahi mole. Kuo pau ke tau mateuteu ke fai ha meʻa pē ʻe fiemaʻú, ʻo hangē ko ia naʻe fai ʻe hotau tatau ʻi he ʻuluaki senitulí ʻa ia naʻa nau hola mei Siutea ki Pēlea, ʻo kolosi ʻi Sioataní.

23, 24. (a) Ko fē pē te tau maʻu ai ʻa e maluʻí? (e) Ko e hā ʻa e ola ʻoku totonu ke hanga ʻe he fakatokanga ʻa Sīsū fekauʻaki mo e ‘tuʻu ʻi he Potu Tapú ʻa e meʻa fakalieliá’ ʻo ʻai kiate kitautolú?

²³ Kuo pau ke tau fakapapauʻi ʻoku hokohoko atu ʻa e hoko ʻa Sihova mo ʻene kautaha hangē ha moʻungá ko hotau hūfangaʻangá. (2 Samiuela 22:​2, 3; Sāme 18:2; Taniela 2:​35, 44) Ko e feituʻu ia te tau maʻu ai ʻa e maluʻí! ʻE ʻikai te tau faʻifaʻitaki ki he fuʻu tokolahi ʻo e faʻahinga ʻo e tangatá ʻa ia te nau hola ki he “ngaahi ʻana,” pea toitoi ʻi he “ngaahi makatuʻu ʻo e moʻunga”​—ʻa e ngaahi kautaha mo e ngaahi fokotuʻutuʻu fakaetangata ʻa ia te nau kei ʻi ai ʻi ha taimi nounou ʻaupito hili hono fakaʻauha ʻa Pāpilone ko e Lahí. (Fakahā 6:​15; 18:​9-​11) Ko e moʻoni, ʻe hoko nai ʻa e taimí ʻo toe faingataʻa ange​—hangē ko ia naʻe ʻi ai ʻi he 66 T.S. ki he kakai fefine feitamá ʻa ia naʻa nau hola mei Siuteá pe ki ha taha pē naʻe pau ke fononga ʻi he ʻea momoko mo ʻuhá. Ka ʻe lava ke tau fakapapauʻi ʻe ʻai ʻe he ʻOtuá ke ala lava ha hao. Tau ʻai ke mālohi naʻa mo e ʻi he taimí ni ʻetau falala kia Sihova pea mo hono ʻAló, ʻa ia ʻoku pule he taimí ni ko e Tuʻi ʻo e Puleʻangá.

²⁴ ʻOku ʻikai ha ʻuhinga kiate kitautolu ke tau nofo ʻo manavahē ki he meʻa ʻe hokó. Naʻe ʻikai loto ʻa Sīsū ke ilifia ʻa ʻene kau ākonga ʻi he taimi ko iá, pea ʻoku ʻikai te ne loto ke tau hoko ʻo manavahē ʻi he taimí ni pe ʻi he ngaahi ʻaho ka hoko maí. Naʻá ne fakatokanga kiate kitautolu koeʻuhi ke lava ke tau teuteu hotau ngaahi lotó mo e ʻatamaí. Ko ia ai, heʻikai ke tautea ʻa e kau Kalisitiane talangofuá ʻi he taimi ʻe hoko mai ai ʻa e fakaʻauhá ki he lotu loí pea mo e toenga ʻo e fokotuʻutuʻu fulikivanu ko ení. Te nau ʻiloʻilo mo tokanga ki he fakatokanga fekauʻaki mo e ‘tuʻu ʻi he Potu Tapú ʻa e meʻa fakalieliá.’ Pea te nau ngāue taʻetoefehuʻia ki heʻenau tui taʻeueʻiá. ʻOfa ke ʻoua ʻaupito ʻe ngalo ʻiate kitautolu ʻa e meʻa naʻe talaʻofaʻaki ʻe Sīsuú: “Ko ia te ne kītaki ʻo aʻu ki he ngataʻanga, ko e toko taha ko ia ʻe moʻui.”​—Maake 13:13.

[Fakamatala ʻi lalo]

ʻOkú Ke Manatuʻi?

◻ Naʻe anga-fēfē hono fakaeʻa ʻe he “meʻa fakalielia ʻo e fakaʻauha” ʻa ia tonu ʻi he ʻuluaki senitulí?

◻ Ko e hā ʻoku ʻuhinga lelei ai ke fakakaukau ko e “meʻa fakalielia” ʻi onopōní ʻe tuʻu ia ʻi ha potu tapu ʻi ha taimi he kahaʻú?

◻ Ko e hā ʻa e ʻohofi ʻe fai ʻe ha “meʻa fakalielia” ʻoku tomuʻa tala ʻi he Fakahaá?

◻ Ko e faʻahinga “hola” fēfē ʻe kei fiemaʻu nai mei heʻetau tafaʻakí?

[Fakatātā ʻi he peesi 16]

ʻOku ui ʻa Pāpilone ko e Lahi ko e “faʻe ae kau feauaki”

[Fakatātā ʻi he peesi 17]

Ko e manu fekai kulaʻahoʻaho ʻo e Fakahā vahe 17 ʻa e “meʻa fakalielia” naʻe lave ki ai ʻa Sīsuú

[Fakatātā ʻi he peesi 18]

ʻE tataki ʻe he manu fekai kulaʻahoʻahó ha ʻohofi fakaefakaʻauha ʻo e lotú