ʻE Nofo ʻa e Tokotaha Taki Taha ʻi Hono Lolo Fiki

ʻOKU fiemaʻu lahi ʻa e malumalú ʻi he lolotonga ʻa e ngaahi faʻahitaʻu vela ʻi he ngaahi fonua ʻo e Hahake Lotolotó. Ko ha fuʻu ʻakau pē ʻoku ʻomai ai ʻa e malu mei he ngaahi huelo ʻo e laʻaá ʻoku manakoa ia, tautefito ʻi he taimi ʻoku tupu ai ʻo ofi ki hoto ʻapí. ʻI hono ngaahi vaʻa lalahi, fālahi mo mafola lahí, ʻoku ʻomai ai ʻe he fuʻu fikí ha malumalu lelei ange ʻi he meimei fuʻu ʻakau kehe kotoa pē ʻo e feituʻú.

Fakatatau ki he tohi ko e Plants of the Bible, ko e “malumalu [ʻo ha fuʻu fiki] ʻoku pehē ʻoku fakaivifoʻou ange ia mo mokomoko ange ʻi ha malumalu ʻo ha tēniti.” Ko e ʻulu fiki naʻe tupu ʻi he ngaahi kauʻā ʻo e ngaahi ngoue vaine ʻi ʻIsileli ʻo e kuonga muʻá naʻá ne ʻoange ki he kau ngāue ʻi he ngoué ʻa e ngaahi feituʻu lelei ki ha mālōlō nounou.

ʻI he ngataʻanga ʻo ha ʻaho lōloa mo vela, ko e ngaahi mēmipa ʻo e fāmilí ʻoku lava ke nau tangutu ʻi he malumalu ʻo honau fuʻu fikí ʻo maʻu ha feohi fakafiefia. ʻIkai ngata aí, ʻoku fakapaleʻi ʻe he fuʻu fikí ʻa e tokotaha ʻoku ʻaʻaná ʻaki ʻa e fua lahi mo ifo. Ko ia ai, mei he taimi ʻo Tuʻi Solomoné, ko e tangutu ʻi hoto lolo fikí naʻá ne fakatātaaʻi ʻa e melino, tuʻumālie, mo e mahu.​—1 Tuʻi 4:​24, 25.

ʻI he ngaahi senituli ki muʻa angé, naʻe fakamatalaʻi ai ʻe he palōfita ko Mōsesé ʻa e Fonua ʻo e Talaʻofá ko ha ‘fonua fikia.’ (Teutalonome 8:8) Naʻe ʻomai ʻe he kau asiasi ʻe toko hongofulumāuá ʻa e fakamoʻoni ʻo ʻene mahú ʻaki hono ʻomai ʻa e ngaahi foʻi fiki mo e fuaʻiʻakau kehe ki he ʻapitanga ʻIsilelí. (Nomipa 13:​21-​23) ʻI he senituli hono 19, ko ha tokotaha fononga ki he ngaahi fonua faka-Tohitapú naʻá ne fakamatalaʻi ai ko e fikí ko e taha ia ʻo e ngaahi ʻakau lahi taha ʻi aí. ʻOku ʻikai ha ofo ʻi he faʻa lave ʻa e ngaahi Konga Tohitapú ki he ngaahi foʻi fikí mo e ʻulu fikí!

Ko ha ʻAkau Toli Tuʻo Ua

ʻOku feʻunga ʻa e fuʻu fikí ki he lahi taha ʻo e ngaahi faʻahinga kelekelé, pea ko hono aka lahí ʻokú ne ʻai ia ke ne malava ʻo matuʻuaki ʻa e ngaahi taimi māfana lōloa mo mōmoa ʻo e Hahake Lotolotó. ʻOku faikehe ʻa e fuʻu ʻakaú ʻi heʻene ʻomai ha taimi toli ʻo e fiki tokamuʻá ʻi Sune pea mo e fua tefitó ʻoku meimei ʻi ʻAokosi ʻo faai mai ai. (Aisea 28:4) Naʻe faʻa kai ʻe he kau ʻIsilelí ʻa e fua tokamuʻá ʻi hono tuʻunga ko e fuaʻiʻakau foʻoú. Naʻa nau fakamōmoa ʻa e fua tokamuí ke fakaʻaongaʻi ʻi he taʻú kotoa. Ko e fiki mōmoá naʻe lava ke oʻi ia ki ha fanga kiʻi keke fuopotopoto, ʻo tānaki ki ai ʻi he taimi ʻe niʻihi ʻa e ngaahi foʻi ʻalimoni. Ko e ngaahi keke fiki ko ení naʻe ala maʻu ia, fakatupu ivi, pea ifo.

Ko e fefine fakapotopoto ko ʻApikalé naʻá ne ʻoange kia Tēvita ʻa e fanga kiʻi keke ʻe 200 ʻo e fiki kuo oʻi, ʻi he fakakaukau taʻeveiveiua ʻe hoko eni ko ha meʻakai lelei ki he kau hola kumi moʻuí. (1 Samiuela 25:​18, 27) Ko e fiki oʻí ʻoku toe ʻi ai hono mahuʻinga fakafaitoʻo. Ko ha foʻi vali ʻo e fiki mōmoa kuo oʻí, naʻe ngāueʻaki ia ki ha hangatāmaki naʻá ne fakamanamanaʻi ʻa e moʻui ʻa Tuʻi Hesekaiá, neongo ko ʻene fakaakeake naʻe hokó naʻe tupu tefito ia mei he kau mai ʻa e ʻOtuá.a​—2 Tuʻi 20:​4-7.

ʻI he kuonga muʻá, naʻe fakamahuʻingaʻi lahi ʻa e fiki mōmoá ʻi he feituʻu Metiteleniané kotoa. Ko e taki fakapuleʻanga ko Kato naʻá ne fakaʻaliʻali ha fuʻu fiki ke fakatuipauʻi ki he Sēnato Lomá ke kamata ʻa e Tau Piuniki Hono Tolu, mo Carthage. Ko e fiki mōmoa lelei taha ʻi Lomá naʻe haʻu ia mei Caria, ʻi ʻĒsia Maina. Ko ia ai, naʻe hoko ʻa e carica ko e hingoa faka-Latina ia ki he fiki mōmoá. Ko e feituʻu tatau ʻo Toake ʻi he lolotonga ní ʻoku kei ngaohi ai ʻa e fiki mōmoa tuʻunga lelei ʻaupito.

ʻOku faʻa tō ʻe he kau faama ʻIsilelí ʻa e ʻulu fikí ʻi he ngaahi ngoueʻanga vainé, ka naʻa nau tā hifo ʻa e ʻuluʻakau ne ʻikai fuá. Naʻe fuʻu siʻisiʻi ʻa e kelekele leleí ke maumauʻi ʻi he ʻuluʻakau taʻefuá. ʻI he talanoa fakatātā ʻa Sīsū ki ha fuʻu fiki taʻefuá, naʻe tala ange ai ʻe he tokotaha faʻá ki he tauhi ngoué: “Vakai, koe taʻu e tolu kuou haʻu o kumi fua i he akau koe fiki ni, kae ikai ilo ia: ta hifo ia; koeha oku ne fakataeaoga ai ae kelekele?” (Luke 13:​6, 7, PM) Koeʻuhi ko e ʻuluʻakau fuá naʻe tukuhauʻi ia ʻi he taimi ʻo Sīsuú, ko ha fuʻu ʻakau taʻefua pē ʻe toe hoko ia ko ha fakamole fakaʻekonōmika naʻe ʻikai fiemaʻu.

Naʻe mahuʻinga lahi ʻa e fikí ʻi he kai ʻa e kau ʻIsilelí. Ko ia ai, ko ha toli fiki ʻikai lelei—mahalo naʻe fekauʻaki mo ha fakamaau fakafili meia Sihova—ʻe hoko ia ko ha fakatamaki. (Hosea 2:​12; Emosi 4:9) Naʻe pehē ʻe he palōfita ko Hapakuké: “Neongo ʻe ʻikai fisi ʻa e fiki, pea ʻikai ha fua ʻi he vaine; siʻisiʻi ʻa e ngaue ʻa e olive, pea hala ʻa e ngaahi ngoueʻanga ʻi he meʻakai; . . . Ka ko au te u fiefia ʻia Sihova, te u tomeʻe ʻi hoku ʻOtua fakamoʻuiʻanga.”—Hapakuke 3:​17, 18.

Fakatātā ʻo ha Puleʻanga Taʻefaitōnunga

ʻOku ngāueʻaki fakaefakatātā ʻi he taimi ʻe niʻihi ʻe he ngaahi Konga Tohitapú ʻa e fuaʻi fikí pe ʻulu fikí. Hangē ko ení, naʻe fakahoa ʻe Selemaia ʻa e kau fakaheeʻi faitōnunga ʻo Siutá ki ha kato ʻo e fiki lelei, ko e fiki tokamuʻa ʻa ia ʻoku kai maʻu pē ʻi heʻene foʻoú. Kae kehe, ko e kau fakaheeʻi taʻefaitōnungá naʻe fakatatau ia ki he fiki kovi, ʻa ia ʻe ʻikai lava ke kai pea kuo pau ke liʻaki.​—Selemaia 24:​2, 5, 8, 10.

ʻI heʻene talanoa fakatātā fekauʻaki mo e fuʻu fiki taʻefuá, naʻe fakahaaʻi ai ʻe Sīsū ʻa e kātaki ʻa e ʻOtuá ki he puleʻanga Siú. Hangē ko ia naʻe fakahaaʻi ki muʻá, naʻá ne lea fekauʻaki mo ha tangata ʻe taha naʻe ʻi ai haʻane fuʻu fiki ʻi heʻene ngoue vainé. Naʻe taʻefua ʻa e fuʻu ʻakaú ʻi he taʻu ʻe tolu, pea naʻe teu ke tā hifo ia ʻe he tokotaha naʻe ʻaʻaná. Ka naʻe pehē ʻe he tauhi ngoué: “ʻEiki, tuku ai pe ʻi he taʻu ni foki, kaeʻoua ke u keli takai mo taufetuku ki ai; heiʻilo ʻe faifai pea fua: pea ka ʻikai, pea ke toki ta.”—Luke 13:​8, 9.

ʻI he taimi naʻe fai ai ʻe Sīsū ʻa e talanoa fakatātā ko ení, naʻá ne ʻosi malanga feʻunga mo e taʻu ʻe tolu, ʻo feinga ke fakatupulekina ʻa e tui ʻi he lotolotonga ʻo e kau mēmipa ʻo e puleʻanga Siú. Naʻe fakalahiʻi ʻe Sīsū ʻa ʻene ngāué, ʻi hono “fakaleleiʻi” ʻa e fuʻu fiki fakaefakatātaá—ko e puleʻanga Siú—pea ʻoange ki ai ha faingamālie ke ne ʻomai ʻa e fua. Kae kehe, ko e uike ki muʻa ke pekia ʻa Sīsuú, naʻe hā mahino ai ko e puleʻangá fakalūkufua naʻá ne siʻaki ʻa e Mīsaiá.​—Mātiu 23:​37, 38.

Naʻe toe ngāueʻaki ʻe Sīsū ʻa e fuʻu fikí ke fakatātaaʻiʻaki ʻa e tuʻunga kovi fakalaumālie ʻo e puleʻangá. Lolotonga ʻa e fononga mei Pētani ki Selusalema ʻi he ʻaho ʻe fā ki muʻa ʻi heʻene pekiá, naʻá ne sio ai ki ha fuʻu fiki naʻe toʻulu hono laú ka naʻe ʻikai pē hano fua. Koeʻuhi ko e fiki tokamuʻá naʻe hā fakataha ia mo e laú—pea ʻi he taimi ʻe niʻihi naʻa mo e ki muʻa ke tupu ʻa e laú—ko e taʻefua ʻa e fuʻu ʻakaú naʻe fakahaaʻi ai naʻe taʻeʻaonga.​—Maake 11:​13, 14.b

ʻI he hangē ko e fuʻu fiki taʻefua naʻe hā moʻui leleí, ko e puleʻanga Siú naʻe ʻi ai ʻene hā takiheeʻi ki tuʻa. Ka naʻe ʻikai te ne ʻomai ha fua fakaʻotua, pea naʻe faifai pē ʻo ne siʻaki ʻa e ʻAlo tonu ʻo Sihová. Naʻe talatukiʻi ʻe Sīsū ʻa e fuʻu fiki taʻefuá, pea ʻi he ʻaho hoko maí, naʻe fakatokangaʻi ai ʻe he kau ākongá ne ʻosi mae ia. Ko e fuʻu ʻakau mōmoa ko iá naʻá ne fakahaaʻi totonu ʻa e siʻaki ka hoko mai ʻe he ʻOtuá ʻa e kau Siú ʻi he tuʻunga ko ʻene kakai filí.​—Maake 11:​20, 21.

“Ako mei he Fiki”

Naʻe toe ngāueʻaki ʻe Sīsū ʻa e fuʻu fikí ke akoʻi ha lēsoni mahuʻinga fekauʻaki mo ʻene ʻi aí. Naʻá ne pehē: “Mou maʻu [“ako,” NW] mei he fiki hono fakatātā; ʻOka muimui hono muka pea ne kamata lau, ʻoku mou ʻilo ʻoku ofi ʻa e faʻahitaʻu mafana: pehe foki kimoutolu ka mou ka mamata ki he ngāhi meʻa ko ia pea mou ʻilo kuo panaki ia, ʻio, kuo aʻu ki he matapa.” (Mātiu 24:​32, 33) Ko e lau lanu mata mālohi ʻo e fuʻu fikí ʻoku taau ke fakatokangaʻi pea ko ha fakaʻilonga taʻetoehala ia ʻo e māfaná. ʻI he tuʻunga tatau, ko e kikite lahi ʻa Sīsū ʻoku lēkooti ʻi he Mātiu vahe 24, Maake vahe 13, mo e Luke vahe 21 ʻoku ʻomai ai ʻa e fakamoʻoni mahino ʻo ʻene ʻi ai he taimí ni ʻi he mālohi fakahēvani ʻo e Puleʻangá.​—Luke 21:​29-​31.

Koeʻuhi ʻoku tau moʻui ʻi ha taimi mahuʻinga pehē ʻi he hisitōliá, ʻoku fiemaʻu moʻoni ke tau ako mei he fuʻu fikí. Kapau te tau fai ia pea hanganaki ʻāʻā fakalaumālie, ʻoku tau maʻu ʻa e ʻamanaki ʻo hono hokosia ʻa e fakahoko ʻo e talaʻofa maʻongoʻonga: “Te nau nofo taki taha ʻi hono lolo vaine, pea ʻi hono lolo fiki; ʻo ʻikai mafakahohaʻa kinautolu ʻe ha taha—he kuo folofola ki ai ʻa e fofonga ʻo Sihova Sapaoti.”—Maika 4:4.

[Fakamatala ʻi lalo]