Ngafa ʻo e Laumālie Māʻoniʻoní ʻi Hono Fakahoko ʻo e Taumuʻa ʻa Sihová

“[Ko] ʻeku lea ʻoku ʻalu atu mei hoku ngutu: ʻe . . . fakaaʻu ʻa e meʻa ne u fekau atu ai ia.”—AI. 55:11.

 1. Fakatātaaʻi ʻa e faikehekehe ʻi ha palani mo ha taumuʻa.

SIOLOTO atu ki ha ongo tangata ʻokú na taki taha teuteu ke na fononga kā. ʻOku mapeʻi ʻe he tokotaha ʻa e hala tefito mo pau ki he feituʻu ʻoku ʻalu ki aí. Ko e tangata ʻe tahá ʻokú ne mahinoʻi lelei ʻa e feituʻu ʻe ʻalu ki aí, ka ʻokú ne ʻiloʻi mo ha toe ngaahi hala kehe. ʻOkú ne teuteu ke feʻunuʻaki ʻa hono ʻalungá fakatatau ki he fiemaʻú ke fekuki ai mo ha meʻa taʻeʻiloa. ʻI he tafaʻaki ʻe niʻihi, ko e hala kehekehe ʻo e ongo tangatá ni ʻoku fakatātaaʻi ai ʻa e kehekehe ʻi ha palani mo ha taumuʻa. ʻE fakahoa nai ha palani ki hono mapeʻi ha hala pau, lolotonga ia ʻoku kau nai ki ha taumuʻa ʻa e fakakaukau ki ai kae ʻikai fiemaʻu ko ha founga papau ʻe taha ke aʻusia ai ia.

2, 3. (a) Ko e hā ʻoku kau ki he taumuʻa ʻa Sihová, pea naʻe anga-fēfē ʻene fai e meʻa ki he tuʻunga naʻe malanga hake ʻi he taimi naʻe faiangahala ai ʻa ʻĀtama mo ʻIví? (e) Ko e hā ʻoku totonu ai ke tau mahinoʻi ʻa hono fakaeʻa ʻo e taumuʻa ʻa Sihová?

² ʻI heʻene hoko mai ki hono fakahoko ʻa hono finangaló, ʻoku ʻikai ha palani papau ʻa Sihova, ka ko ha taumuʻa kuo fakaeʻa. (Ef. 3:11) ʻOku kau ki he taumuʻá ni ʻa e meʻa naʻá ne muʻaki fakataumuʻa ki he tangatá mo e māmaní—ke liliu ʻa e foʻi kolope ko ení ki ha ʻapi palataisi ʻa ia ʻe lava ke nofo ai ʻa e tangata haohaoá ʻi he melino mo e fiefia ʻo taʻengata. (Sen. 1:28) ʻI he taimi naʻe faiangahala ai ʻa ʻĀtama mo ʻIví, naʻe fai ʻe Sihova ʻa e meʻa ki he tuʻunga ko iá pea fai e fokotuʻutuʻu ke fakapapauʻi ʻe fakahoko ʻa ʻene taumuʻá. (Lau ʻa e Senesi 3:15.) Naʻe fakapapauʻi ʻe Sihova ʻe ʻomai ʻe heʻene fefine fakaefakatātaá ha “hako,” pe ʻAlo, ʻa ia ʻe faifai pē peá ne fakaʻauha ʻa e tokotaha fakaʻaiʻaí, ʻa Sētane, pea toʻo ʻa e maumau kotoa kuó ne fakatupungá.—Hep. 2:14; 1 Sione 3:8.

³ ʻOku ʻikai ha mālohi ʻi hēvani pe ʻi māmani ʻe lava ke ne taʻofi ʻa e taumuʻa tonu ʻa e ʻOtuá mei hono fakahokó. (Ai. 46:9-11) Ko e hā ʻoku lava ai ke tau leaʻaki iá? Koeʻuhi ʻoku kau ki ai ʻa e laumālie māʻoniʻoni ʻo Sihová. Ko e mālohi taʻealatalitekeʻi ko iá ʻokú ne fakapapauʻi ko e taumuʻa ʻa e ʻOtuá ʻe “fakaaʻu.” (Ai. 55:10, 11) ʻOku lelei ke tau hanganaki mahinoʻi kakato ʻa hono fakaeʻa ʻo e taumuʻa ʻa e ʻOtuá. Ko ʻetau ʻamanaki ki he moʻui he kahaʻú ʻoku fakatuʻunga ia ʻi hono fakahokó. ʻIkai ko ia pē, ʻoku fakatuimālohi ke sio ki he anga hono ngāueʻaki ʻe Sihova ʻa hono laumālie māʻoniʻoní. Tau lāulea leva ki he ngafa ʻo e laumālié—ʻi he kuohilí, lolotongá ni, pea ʻi he kahaʻú—ʻi hono fakahoko ʻo e taumuʻa ʻa Sihová.

Ngafa ʻo e Laumālie Māʻoniʻoní ʻi he Kuohilí

 4. Kuo anga-fēfē hono fakaeʻa māmālie ʻe Sihova ʻa ʻene taumuʻá?

⁴ ʻI he taimi ʻo e Tohi Tapú, naʻe fakaeʻa māmālie ai ʻe Sihova ʻa ʻene taumuʻá. ʻI he kamataʻangá, ko e ʻiloʻanga ʻo e Hako naʻe talaʻofá ko “ha fakalilolilo toputapu” ia. (1 Kol. 2:7, NW) Naʻe toe lave foki ʻa Sihova ʻi he taʻu nai ʻe 2,000 ki muí ki ha hako. (Lau ʻa e Senesi 12:7; 22:15-18.) Naʻe fai ʻe Sihova kia ʻĒpalahame ha talaʻofa ʻe fakahoko lahi ange. Ko e kupuʻi lea “ko ho hako” ko hano fakahaaʻi mahino ia ko e Hakó ʻe hoko mai ia ko ha tangata, ko ha hako ʻo ʻĒpalahame. ʻOku lava ke tau fakapapauʻi naʻe siofi ia ʻe Sētane fakataha mo e mahuʻingaʻia lahi ʻi hono fakaeʻa ʻa e founga pau ko ení. Ko e Fili ko iá ʻoku ʻikai ha veiveiua naʻe ʻikai te ne fiemaʻu ha toe meʻa ka ke fakaʻauha pe fakameleʻi ʻa e laine hohoko ʻo ʻĒpalahamé pea taʻofi ai ʻa e taumuʻa ʻa e ʻOtuá. Ka ko ha ola pehē naʻe taʻemalava ia, he naʻe ngāue ʻa e laumālie taʻehāmai ʻo e ʻOtuá. ʻI he ngaahi founga fē?

5, 6. Naʻe anga-fēfē hono ngāueʻaki ʻe Sihova ʻa hono laumālié ke ne maluʻi ʻa e faʻahinga tāutaha ʻi he laine hohoko ʻoku taki atu ki he Hakó?

⁵ Naʻe ngāueʻaki ʻe Sihova ʻa hono laumālié ke maluʻi ʻa e faʻahinga tāutaha ʻi he laine hohoko naʻe taki atu ki he Hakó. Naʻe folofola ʻa Sihova kia ʻEpalame (ʻĒpalahame): “Ko au ko hoʻo pa.” (Sen. 15:1) Naʻe ʻikai ko ha koto ngeʻesi ʻa e lea ko iá. Ko e fakatātaá, fakakaukau atu ki he meʻa naʻe hoko ʻi he 1919 K.M. nai, ʻi he taimi naʻe nofo fakataimi ai ʻa ʻĒpalahame mo Sela ʻi Kelá. ʻI he ʻikai ʻiloʻi ko Selá ko e mali ʻo ʻĒpalahamé, naʻe ʻave ʻe ʻApimeleki, ko e tuʻi ʻo Kelá, ʻa Sela fakataha mo e taumuʻa ke ʻai ia ko hono uaifi. Naʻe ngāuekākāʻaki ʻe Sētane ʻa e tuʻungá ni ʻo ʻikai te na ʻilo, heʻene feinga ke taʻofi ʻa hono fanauʻi ʻe Sela ʻa e hako ʻo ʻĒpalahamé? ʻOku ʻikai tala mai ia ʻe he Tohi Tapú. Ko e meʻa ʻokú ne tala maí naʻe tuʻu ʻi vahaʻa ʻa Sihova. ʻI ha misi, naʻá ne fakatokanga ai kia ʻApimeleki ke ʻoua te ne ala kia Sela.—Sen. 20:1-18.

⁶ Naʻe ʻikai hoko tuʻo taha pē ʻa e meʻa ko iá. Naʻe fakahaofi ʻe Sihova ʻa ʻĒpalahame mo e ngaahi mēmipa ʻo hono fāmilí ʻi ha ngaahi taimi. (Sen. 12:14-20; 14:13-20; 26:26-29) Ko ia naʻe lava ai ke pehē ʻe he tokotaha-tohi-sāmé fekauʻaki mo ʻĒpalahame mo hono hakó: “Naʻe ʻikai te ne [Sihova] tuku ke fai ʻe ha tangata honau fakaehaua; ʻio naʻa ne valoki ʻani tuʻi koeʻuhi ko kinautolu na. ʻOua ʻe ala ki heʻeku kau pani, pea ʻoua ʻe fai ha kovi ki heʻeku kau palofita ni.”—Sāme 105:14, 15.

 7. ʻI he ngaahi founga fē naʻe maluʻi ai ʻe Sihova ʻa e puleʻanga ʻIsilelí?

⁷ Fakafou ʻi hono laumālié, naʻe hanga ʻe Sihova ʻo maluʻi ʻa e puleʻanga ʻIsileli he kuohilí, ʻa ia ʻe fanauʻi ai ʻa e Hako naʻe talaʻofá. Fakafou ʻi hono laumālié, naʻe ʻoange ai ʻe Sihova ki ʻIsileli ʻa ʻene Laó, ʻa ia naʻe tauhi maʻu ai ʻa e lotu moʻoní pea maluʻi ʻa e kau Siú mei he ʻuli fakalaumālié, fakaeʻulungaangá mo fakaesinó. (Eki. 31:18; 2 Kol. 3:3) ʻI he taimi ʻo e kau Fakamāú, naʻe fakaivia ai ʻe he laumālie ʻo Sihová ʻa e kau tangata pau ke nau fakahaofi ʻa ʻIsileli mei hono ngaahi filí. (Fkm. 3:9, 10) Lolotonga ʻa e ngaahi senituli ki muʻa ʻi hono ʻaloʻi ʻo Sīsuú, ʻa e konga tefito ʻo e hako ʻo ʻĒpalahamé, ʻoku pau naʻe kau ʻa e laumālie māʻoniʻoní ʻi hono maluʻi ʻo Selusalema, Pētelihema mo e temipalé—naʻe kau kotoa ia ki hono fakahoko ha konga ʻo e ngaahi kikite fekauʻaki mo Sīsuú.

 8. Ko e hā ʻokú ne fakahaaʻi naʻe kau fakahangatonu ʻa e laumālie māʻoniʻoní ki he moʻui mo e ngāue fakafaifekau ʻa e ʻAlo ʻo e ʻOtuá?

⁸ Ko e laumālie māʻoniʻoní naʻe kau fakahangatonu ia ki he moʻui mo e ngāue fakafaifekau ʻa Sīsuú. ʻI heʻene ngāue ki he manava ʻo e tāupoʻou ko Melé, naʻe fakahoko ai ʻe he laumālie māʻoniʻoní ha meʻa naʻe ʻikai ʻaupito ke fai ki muʻa pe talu mei ai. Naʻá ne fakatupunga ha fefine taʻehaohaoa ke ne tuʻituʻia pea fanauʻi ha ʻAlo haohaoa, ʻa ia naʻe ʻikai te ne ʻi he malumalu ʻo e tautea ko e maté. (Luke 1:26-31, 34, 35) Naʻe maluʻi ki mui ʻe he laumālié ʻa e valevale ko Sīsuú mei he mate mutukiá. (Mt. 2:7, 8, 12, 13) ʻI he taimi naʻe taʻu 30 nai ai ʻa Sīsuú, naʻe pani ia ʻe he ʻOtuá ʻaki ʻa e laumālie māʻoniʻoní, ʻo fakanofo ke hoko ko e ʻea ki he taloni ʻo Tēvitá pea fekauʻi ia ke ne malanga. (Luke 1:32, 33; 4:16-21) Naʻe fakaivia ʻe he laumālie māʻoniʻoní ʻa Sīsū ke ne fakahoko ʻa e ngaahi mana, ʻo kau ai hono fakamoʻui ʻa e mahakí, fafanga ʻa e kakai tokolahi pea fokotuʻu hake ʻa e maté. Ko e ngaahi ngāue mālohi ko iá naʻe tomuʻa fakaʻali mai ai ʻa e ngaahi tāpuaki ʻoku lava ke tau ʻamanekina ʻi he malumalu ʻo e pule fakatuʻi ʻa Sīsuú.

9, 10. (a) Naʻe anga-fēfē ʻa e hā mahino naʻe ʻi he kau ākonga ʻa Sīsū ʻi he ʻuluaki senitulí ʻa e laumālie māʻoniʻoní? (e) Ko e hā ʻa e laka ki muʻa ʻi hono fakahoko ʻa e taumuʻa ʻa Sihová naʻe fakaeʻa ʻi he ʻuluaki senituli T.S.?

⁹ Kamata ʻi he Penitekosi 33 T.S., naʻe ngāueʻaki ai ʻe Sihova ʻa hono laumālié ke pani ʻa e konga hono ua ʻo e hako ʻo ʻĒpalahamé, ʻa ia ko e tokolahi ai naʻe ʻikai ko e fānau kinautolu ʻa ʻĒpalahame. (Loma 8:15-17; Kal. 3:29) Ko e laumālie māʻoniʻoní naʻe hā mahino ʻa ʻene ʻi he kau ākonga ʻa Sīsū ʻi he ʻuluaki senitulí, ʻo ʻai ke nau malava ʻo malanga faivelenga pea fakaivia kinautolu ke nau fakahoko ʻa e ngaahi mana. (Ng. 1:8; 2:1-4; 1 Kol. 12:7-11) Fakafou ʻi he ngaahi meʻaʻofa fakaemana ko iá, naʻe fakaeʻa ʻe he laumālie māʻoniʻoní ha laka ki muʻa fakaofo ʻi hono fakahoko ʻo e taumuʻa ʻa Sihová. Naʻe ʻikai kei ngāueʻaki ʻe Sihova ʻa e fokotuʻutuʻu ki he lotú kuo laui senituli hono motuʻá ʻa ia naʻe tuʻu ʻi he temipale ʻi Selusalemá. Naʻe hiki ʻa ʻene hōifuá ki he fakatahaʻanga Kalisitiane ne fokotuʻu foʻoú. Talu mei ai, mo hono ngāueʻaki ʻe Sihova ʻa e fakatahaʻanga pani ko iá ke fakahoko ʻa ʻene taumuʻá.

¹⁰ Maluʻi, fakaivia, pani—ko e ngaahi founga siʻi pē eni naʻe ngāueʻaki ai ʻe Sihova ʻa e laumālie māʻoniʻoní ʻi he taimi ʻo e Tohi Tapú ke ʻai ke ngaʻunu ai pē ki muʻa ʻa ʻene taumuʻá ki hono fakahokó. Ko ia ai, fēfē ʻa hotau taimí? ʻOku anga-fēfē hono ngāueʻaki ʻe Sihova he taimí ni ʻa hono laumālié ʻi hono poupouʻi ʻa ʻene taumuʻá? ʻOku tau fiemaʻu ke ʻilo, he ʻoku tau loto ke ngāue ʻo fehoanaki mo e laumālié. Tau lāulea leva ki he founga ʻe fā ʻoku ngāueʻaki ai he lolotongá ni ʻe Sihova ʻa hono laumālié.

Ngafa ʻo e Laumālie Māʻoniʻoní ʻi he Lolotongá Ni

11. Ko e hā ʻokú ne fakahaaʻi ko e laumālie māʻoniʻoní ko ha tākiekina ia ki he tuʻunga maʻa ʻi he lotolotonga ʻo e kakai ʻa e ʻOtuá, pea ʻe lava fēfē ke ke fakahaaʻi ʻokú ke ngāue fāitaha mo e laumālié?

¹¹ ʻUluakí, ko e laumālie māʻoniʻoní ko ha tākiekina ia ki he tuʻunga maʻa ʻi he lotolotonga ʻo e kakai ʻa e ʻOtuá. Ko e faʻahinga ʻoku nau kau ki he taumuʻa ʻa Sihová kuo pau ke nau maʻa fakaeʻulungaanga. (Lau ʻa e 1 Kolinito 6:9-11.) Ko e niʻihi naʻa nau hoko ko e kau Kalisitiane moʻoní naʻa nau kau ki muʻa ʻi he ngaahi tōʻonga taʻetaau hangē ko e feʻauakí, tonó mo e faka-Sōtomá. Ko e ngaahi holi ʻoku fanauʻi ai ʻa e tōʻonga angahalaʻiá ʻoku lava ke faiaka loloto ia. (Sem. 1:14, 15) Neongo ia, ko e faʻahinga tāutaha ko iá kuo “fufulu” kinautolu, ʻo fakahaaʻi ai kuo nau fai ʻa e ngaahi liliu ʻi heʻenau moʻuí naʻe fiemaʻu ke fakahōifuaʻi ai ʻa e ʻOtuá. Ko e hā ʻokú ne ʻai ke malava ha tokotaha ʻofa ki he ʻOtuá ke ne talitekeʻi lavameʻa ʻa e ongoʻi mālohi ke fai ki he ngaahi holi fehālaakí? Ko e “Laumalie ʻo hotau ʻOtua,” ko e lau ia ʻa e 1 Kolinito 6:11. ʻI he tauhi maʻu ke maʻa fakaeʻulungaangá, ʻokú ke fakahaaʻi ai ʻokú ke tuku ke hoko ʻa e laumālie ko iá ko ha tākiekina mālohi ia ʻi hoʻo moʻuí.

12. (a) Fakatatau ki he vīsone ʻa ʻIsikelí, ʻoku anga-fēfē hono tataki ʻe Sihova ʻa ʻene kautahá? (e) ʻOku lava fēfē ke ke fakahaaʻi ʻokú ke ngāue ʻo fehoanaki mo e laumālié?

¹² Uá, ʻoku ngāueʻaki ʻe Sihova ʻa hono laumālié ke ne tataki ʻa ʻene kautahá ʻi he tafaʻaki ʻokú ne loto ke ʻalu ki aí. ʻI he vīsone ʻa ʻIsikelí, ko e konga fakahēvani ʻo e kautaha ʻa Sihová ʻoku fakatātaaʻi ia ko ha saliote fakalangi ʻa ia ʻoku ngaʻunu taʻealataʻofi ke fakahoko ʻa e taumuʻa ʻa Sihová. Ko e hā ʻokú ne ueʻi ʻa e salioté ke ngaʻunu ki ha tafaʻaki pau? Ko e laumālie māʻoniʻoní. (Isi. 1:20, 21) Tau manatuʻi ko e kautaha ʻa Sihová ʻoku faʻuʻaki ia ʻa e konga ʻe ua, ko e taha ʻi hēvani mo e taha ʻi māmani. Kapau ko e konga fakahēvaní ʻoku tataki ia ʻe he laumālie māʻoniʻoní, ʻoku pehē pē ʻa e hoko ʻa e meʻa tatau ʻi he konga fakaemāmaní. ʻI he talangofua mo mateaki ki he tataki kuo maʻu mei he konga fakaemāmani ʻo e kautaha ʻa e ʻOtuá, ʻokú ke fakahaaʻi ai ʻokú ke hanganaki ʻalu fakataha mo e saliote fakalangi ʻa Sihová pea ngāue ʻo fehoanaki mo hono laumālie māʻoniʻoní.—Hep. 13:17.

13, 14. (a) Ko hai ʻoku faʻuʻaki ʻa e “toʻutangata ko eni” naʻe lave ki ai ʻa Sīsuú? (e) ʻOmai ha fakatātā ʻo fakahaaʻi ai ʻoku ngāue ʻa e laumālie māʻoniʻoní ʻi hono ʻomai ʻa e mahino ki he moʻoni Fakatohitapú. (Sio ki he puha “ʻOkú Ke ʻAlu Fakataha mo e Maama Fakautuutú?”)

¹³ Tolú, ʻoku ngāue ʻa e laumālie māʻoniʻoní ʻi hono fakamahinoʻi mai ʻa e ngaahi moʻoni Fakatohitapú. (Pal. 4:18) Ko e makasini ko ení kuo fuoloa hono ngāueʻaki ia ʻe he “tamaioeiki agatonu mo boto” ko e fouʻanga tefito ki hono fakaeʻa māmālie mai ʻa e moʻoní. (Mt. 24:45, PM) Ko e fakatātaá, fakakaukau ki heʻetau mahinoʻi ʻo e faʻahinga ʻoku faʻuʻaki ʻa e “toʻutangata ko eni” naʻe lave ki ai ʻa Sīsuú. (Lau ʻa e Mātiu 24:32-34.) Ko e hā ʻa e toʻutangata naʻe lave ki ai ʻa Sīsuú? Ko e kupu “ʻI Ai ʻa Kalaisí—Ko e Hā ʻEne ʻUhinga Kiate Koé?” naʻe fakamatalaʻi ai naʻe lave ʻa Sīsuú, ʻo ʻikai ki he fulikivanú, ka ki he kau ākongá, ʻa ia naʻe teu ke paniʻaki kinautolu ʻa e laumālie māʻoniʻoní.a Ko e kau muimui pani ʻo Sīsuú, fakatouʻosi ʻi he ʻuluaki senitulí pea ʻi hotau ʻahó ni, ʻa e faʻahinga ʻa ia ʻe ʻikai ngata pē ʻi heʻenau sio ʻi he fakaʻilongá ka nau toe ʻiloʻi foki ʻa hono ʻuhingá—ʻa ia ko Sīsuú ʻoku ofi “ki he matapa.”

¹⁴ Ko e hā hono ʻuhinga ʻo e fakamatala ko ení kia kitautolú? Neongo ʻoku ʻikai lava ke tau fakafuofua ʻa e lōloa tonu ʻo e “toʻutangata ko eni,” ʻoku lelei ke tau manatuʻi ʻa e ngaahi meʻa fekauʻaki mo e foʻi lea “toʻutangata”: ʻOku faʻa ʻuhinga ia ki he kakai ʻo e taʻumotuʻa kehekehe ʻa ia ʻoku fehopeʻaki ʻenau moʻuí lolotonga ha vahaʻa taimi pau; ʻoku ʻikai ke fuʻu lōloa; pea ʻoku ʻi ai hono ngataʻanga. (Eki. 1:6) ʻOku anga-fēfē leva ʻa e pau ke tau mahinoʻi ʻa e lea ʻa Sīsū fekauʻaki mo e “toʻutangata ko eni”? ʻOku hā mahino naʻá ne ʻuhinga ko e moʻui ʻa e kau paní ʻa ia naʻa nau ʻi ai ʻi he taimi naʻe hoko ai ʻo hā mahino ʻa e fakaʻilongá ʻi he 1914 ʻe fehopeʻaki ia mo e moʻui ʻa e kau pani kehe ʻa ia te nau sio ʻi he kamata ʻa e mamahi lahí. Ko e toʻutangata ko iá naʻe ʻi ai honau kamataʻanga, pea ʻe ʻi ai moʻoni honau ngataʻanga. Ko e fakahoko ʻa e tafaʻaki kehekehe ʻo e fakaʻilongá ʻoku fakahaaʻi mahino ai ʻoku pau pē ʻoku ofi ʻa e mamahi lahí. ʻI hono tauhi maʻu hoʻo ongoʻi fakavavevavé mo e hanganaki leʻó, ʻokú ke fakahaaʻi ai ʻokú ke ʻalu fakataha mo hono mahinoʻi ʻo e moʻoní pea muimui ʻi he tataki ʻa e laumālie māʻoniʻoní.—Mk. 13:37.

15. Ko e hā ʻokú ne fakahaaʻi ko e laumālie māʻoniʻoní ʻokú ne fakaivia kitautolu ke talaki ʻa e ongoongo leleí?

¹⁵ Faá, ʻoku fakaivia kitautolu ʻe he laumālie māʻoniʻoní ke tau talaki ʻa e ongoongo leleí. (Ng. 1:8) Ko e hā ha toe meʻa ʻoku lava ke ne fakamatalaʻi ʻa e anga ʻo hono malangaʻi ʻi māmani lahi ʻa e ongoongo leleí? Fakakaukau fekauʻaki mo ia. ʻOkú ke ʻi he lotolotonga nai ʻo e faʻahinga mahalo pē koeʻuhi ko e mā tōtuʻa pe manavasiʻí, naʻa nau fakakaukau ki muʻa, ‘Heʻikai ʻaupito lava ke u ʻalu ʻo malanga fale ki he fale!’ Neongo ia, ʻokú ke kau faivelenga he taimí ni ʻi he ngāue ko iá.b Ko e Kau Fakamoʻoni ʻa Sihova faitōnunga tokolahi kuo hokohoko atu ʻenau malangá ʻi he fehangahangai mo e fakafepakí pe fakatangá. Ko e laumālie māʻoniʻoni pē ʻo e ʻOtuá ʻoku lava ke ne fakaivia kitautolu ke tau ikuʻi ʻa e ngaahi fakafaingataʻaʻiaʻanga fakatupu lōmekiná pea fai ʻa e ngaahi meʻa ʻe ʻikai ala lava ʻi hotau mālohi pē ʻo kitautolú. (Mai. 3:8; Mt. 17:20) ʻI he kau kakato ki he ngāue fakamalangá, ʻokú ke fakahaaʻi ai ʻokú ke ngāue fāitaha mo e laumālie ko iá.

Ngafa ʻo e Laumālie Māʻoniʻoní ʻi he Kahaʻú

16. Ko e hā ʻoku lava ai ke tau tuipau ʻe maluʻi ʻe Sihova ʻa hono kakaí lolotonga ʻa e mamahi lahí?

¹⁶ ʻI he kahaʻú, ʻe ngāueʻaki ai ʻe Sihova ʻa hono laumālie māʻoniʻoní ʻi he ngaahi founga fakaofo ke lavaʻi ʻa hono fakahoko ʻo ʻene taumuʻá. ʻUluaki fakakaukau angé ki he meʻa fekauʻaki mo e maluʻí. Hangē ko ia kuo tau ʻiloʻí, kuo ngāueʻaki ʻe Sihova ʻa hono laumālié ʻi he kuohilí ke maluʻi ʻa e faʻahinga tāutaha pea pehē ki he puleʻanga ʻIsilelí fakalūkufua. Ko ia ai, kuo tau maʻu ʻa e ʻuhinga kotoa ke tui ai te ne ngāueʻaki ʻa e laumālie mālohi tatau ke maluʻi ʻa hono kakaí lolotonga ʻa e mamahi lahi ʻoku tuʻunuku maí. ʻOku ʻikai fiemaʻu ke tau fakamahamahalo ki he founga tofu pē ʻe tokangaʻi ai kitautolu ʻe Sihova he taimi ko iá. ʻI hono kehé, ʻe lava ke tau hanga atu ki he kahaʻú mo e tuipau, ʻi he ʻiloʻi ko e kau ʻofa kia Sihová heʻikai ʻaupito te nau puli mei heʻene vakaí pe ʻikai aʻu ki ai ʻa hono laumālie māʻoniʻoní.—2 Kal. 16:9; Sāme 139:7-12.

17. ʻE fēfē hono ngāueʻaki ʻe Sihova ʻa hono laumālie māʻoniʻoní ʻi he māmani foʻoú?

¹⁷ ʻE fēfē hono ngāueʻaki ʻe Sihova ʻa hono laumālie māʻoniʻoní ʻi he māmani foʻou ka hoko maí? Ko e laumālie ko iá ʻokú ne tākiekina ʻa e meʻa ʻoku tohi ʻi he ngaahi takainga tohi foʻou ʻa ia ʻe fakaava ʻi he taimi ko iá. (Fkh. 20:12) Ko e hā ʻe ʻi aí? ʻOku hā mahino, ko e ngaahi fiemaʻu pau ʻa Sihova kia kitautolu lolotonga ʻa e taʻu ʻe taha afé. ʻOkú ke fakatuʻotuʻa atu ki hono sivisiviʻi ʻa e meʻa ʻi he ngaahi takainga tohi ko iá? ʻOku tau tatali mo e ʻamanaki vēkeveke ki he māmani foʻou ko iá. Heʻikai lava ke tau sioloto atu ki he tuʻunga ʻe ʻi ai ʻa e moʻuí ʻi he taimi faitāpuekina ko iá ʻi hono ngāueʻaki ʻe Sihova ʻa hono laumālie māʻoniʻoní ke fakahoko ʻa ʻene taumuʻa ki he māmaní mo e tangata ʻi aí.

18. Ko e hā hoʻo fakapapau mālohí?

¹⁸ ʻOua ʻaupito naʻa ngalo ʻia kitautolu ko e taumuʻa ʻa Sihova kuo fakaeʻá kuo pau ke hoko, he ʻokú ne ngāueʻaki ʻa hono laumālie māʻoniʻoní—ʻa e ivi mālohi taha ʻi he ʻunivēsí—ke ne fakahoko ia. Ko e taumuʻa ko iá ʻokú ke kau ki ai. Ko ia ai, tuku ke hoko ko hoʻo fakapapau mālohí ia ke kōlenga kia Sihova ki hono laumālié pea ngāue ʻo fehoanaki mo ʻene tatakí. (Luke 11:13) Ko ia ʻe lava ai ke ke maʻu ʻa e ʻamanaki ʻo e moʻui ʻo hangē ko ia naʻe fakataumuʻa ʻe Sihova ke moʻui ai ʻa e tangatá—ʻo taʻengata ʻi Palataisi ʻi he māmaní.

[Fakamatala ʻi lalo]

ʻOkú Ke Manatuʻi?

• ʻI he ngaahi founga fē naʻe ngāueʻaki ai ʻe Sihova ʻa hono laumālie māʻoniʻoní ʻi he taimi ʻo e Tohi Tapú ke ʻai ke ngaʻunu ai pē ki muʻa ʻa ʻene taumuʻá?

• ʻOku anga-fēfē hono ngāueʻaki ʻe Sihova ʻa hono laumālié he lolotongá ni?

• ʻE fēfē hono ngāueʻaki ʻe Sihova ʻa hono laumālié ʻi he kahaʻú ke lavaʻi ʻa hono fakahoko ʻo ʻene taumuʻá?

[Puha ʻi he peesi 10]

ʻOkú Ke ʻAlu Fakataha mo e Maama Fakautuutú?

ʻOku hokohoko atu hono fakamaama ʻe Sihova ʻa hono kakaí. Ko e hā ʻa e ngaahi fakalelei kuo pulusi ʻi he Taua Leʻo?

▪ Ko e hā ʻa e lēsoni lelei fekauʻaki mo e tupu fakalaumālié ʻoku fakahaaʻi ʻi he talanoa fakatātā ʻa Sīsū ki he lēvaní? (Mt. 13:33)—Siulai 15, 2008, peesi 19-20.

▪ Naʻe ngata ʻanefē ʻa hono ui ʻo e kau Kalisitiané ki ha ʻamanaki fakahēvaní?—Mē 1, 2007, peesi 30-31.

▪ ʻOku ʻuhinga ki he hā ʻa e lotu kia Sihova ʻo “fai ʻi laumālie”? (Sione 4:24)—Siulai 15, 2002, peesi 15.

▪ Ko e lotoʻā fē ʻoku ngāue ai ʻa e fuʻu kakai lahí? (Fkh. 7:15)—Mē 1, 2002, peesi 30-31.

▪ ʻOku fai ʻafē ʻa hono vaheʻi ʻo e fanga sipí mei he fanga kosí? (Mt. 25:31-33)—ʻOkatopa 15, 1995, peesi 18-28. (br2 p. 42-52)