Ko Hai ʻOkú Ne Tataki ʻa e Kakai ʻa e ʻOtuá ʻi he ʻAho Ní?

1, 2. Hili ʻa e ʻalu hake ʻa Sīsū ki hēvaní, ko e hā nai naʻe fifili ki ai ʻa e kau ʻapositoló?

NAʻE tuʻu ʻa e kau ʻapositolo ʻa Sīsuú ʻi he Moʻunga ʻŌlivé ʻo siofi ʻa honau ʻeikí mo honau kaumeʻá, ʻa Sīsū, ʻi hono ʻohake ia ki he langí pea fakapuliki ʻe ha konga ʻao. (Ngā. 1:9, 10) ʻI he taʻu nai ʻe ua, naʻe akoʻi, fakalototoʻaʻi, mo tataki kinautolu ʻe Sīsū. Ka ko eni kuó ne mavahe. Ko e hā ʻa e meʻa te nau faí?

² Ki muʻa ke ne ʻalu hake ki hēvaní, naʻe tala ʻe Sīsū ki hono kau muimuí: “Te mou hoko ko e kau fakamoʻoni kiate au ʻi Selusalema, ʻi he kotoa ʻo Siuteá mo Samēlia, pea ki he feituʻu taupotu taha ʻo e māmaní.” (Ngā. 1:8) ʻE lava fēfē ke nau malava ʻo fai ʻa e ngāue ko iá? Naʻe talaʻofa ange ʻe Sīsū ʻe tokoniʻi kinautolu ʻe he laumālie māʻoniʻoni ʻo e ʻOtuá. (Ngā. 1:5) Ka ko hai te ne tataki kinautolu pea fokotuʻutuʻu ʻa e ngāue fakamalanga ʻi māmani lahí? Naʻe ʻiloʻi ʻe he kau ʻapositoló naʻe ngāueʻaki ʻe Sihova ʻa e kau tangata ke nau tataki ʻa e kau ʻIsilelí ʻi he kuohilí. Ko ia naʻa nau fifili nai pe ʻe fili he taimi ko ení ʻe Sihova ha taki foʻou.

 3 (a) Hili ʻa e ʻalu hake ʻa Sīsū ki hēvaní, ko e hā ʻa e fili mahuʻinga naʻe fai ʻe he kau ʻapositolo faitōnungá? (e) Ko e hā ʻa e ngaahi fehuʻi te tau tali ʻi he kupu ko ení?

³ Taimi nounou mei he ʻalu hake ʻa Sīsū ki hēvaní, naʻe fekumi ʻa e kau ākongá ʻi he Folofolá, lotu ki he ʻOtuá ki ha tokoni, pea fili ʻa Mataiasi ke ne fetongi ʻa Siutasi ʻIsikaliote ke hoko ko e ʻapositolo hono 12. (Ngā. 1:15-26) Ko e hā naʻe mātuʻaki mahuʻinga ai ʻa e fili ko ení kiate kinautolu pea kia Sihová? Naʻe ʻiloʻi ʻe he kau ākongá naʻe fiemaʻu ke ʻi ai ʻa e kau ʻapositolo ʻe toko 12.a (Sio ki he fakamatala ʻi laló.) Naʻe fili ʻe Sīsū ʻa e kau ʻapositoló pea akoʻi kinautolu ki ha ngafa mātuʻaki mahuʻinga ʻi he lotolotonga ʻo e kakai ʻa e ʻOtuá. Ko e hā ʻa e ngafa ko iá, pea naʻe anga-fēfē hono teuʻi kinautolu ki ai ʻe Sihova mo Sīsuú? Ko e hā ʻa e fokotuʻutuʻu meimei tatau ʻoku hoko ʻi he ʻaho ní? Pea ʻe lava fēfē ke tau “manatuʻi ʻa e faʻahinga ʻoku nau takimuʻa” ʻi hotau lotolotongá, tautefito ki he “tamaioʻeiki anga-tonu mo potó”?—Hep. 13:7; Māt. 24:45.

 4. Ko e hā ʻa e ngafa naʻe maʻu ʻe he kau ʻapositoló mo e kau mātuʻa kehe ʻi Selusalemá?

⁴ Naʻe kamata ke takimuʻa ʻa e kau ʻapositoló ʻi he fakatahaʻanga Kalisitiané ʻi he Penitekosi ʻo e taʻu 33. ʻOku pehē ʻe he Tohi Tapú “naʻe tuʻu hake ʻa Pita mo e toko hongofulu-mā-tahá” ʻo akoʻi ʻa e ngaahi moʻoni fakahaofi moʻuí ki ha fuʻu tokolahi. (Ngā. 2:14, 15) Naʻe hoko ʻa e tokolahi ʻi he fuʻu kakai ko iá ko e kau Kalisitiane. Hili iá, ko e kau Kalisitiane foʻou ko iá “naʻe hokohoko atu ʻenau līʻoa kinautolu ki he faiako ʻa e kau ʻapositoló.” (Ngā. 2:42) Naʻe fakafatongiaʻaki ʻa e kau ʻapositoló ki hono tokangaʻi ʻa e paʻanga ʻa e fakatahaʻangá. (Ngā. 4:34, 35) Naʻa nau toe akoʻi ʻa e kakai ʻa e ʻOtuá pea lotu maʻa kinautolu, ʻo pehē: “Te mau līʻoa kimautolu ki he lotú pea ki he ngāue fekauʻaki mo e folofolá.” (Ngā. 6:4) Pea naʻa nau fekauʻi atu ha kau Kalisitiane taukei ke nau malanga ʻi he ngaahi feituʻu ngāue foʻou. (Ngā. 8:14, 15) Ki mui ai, naʻe kau mai ʻa e kau mātuʻa pani ʻe niʻihi ki he kau ʻapositoló ʻi he takimuʻa ʻi he fakatahaʻangá. ʻI honau tuʻunga ko ha kulupu pulé, naʻa nau ʻoatu ʻa e tataki ki he ngaahi fakatahaʻangá kotoa.—Ngā. 15:2.

5, 6. (a) Naʻe anga-fēfē hono fakaivia ʻe he laumālie māʻoniʻoní ʻa e kulupu pulé? (Sio ki he ʻuluaki fakatātā ʻi he kupú ni.) (e) Naʻe anga-fēfē hono tokoniʻi ʻe he kau ʻāngeló ʻa e kulupu pulé? (f) Naʻe anga-fēfē hono tataki ʻe he Folofola ʻa e ʻOtuá ʻa e kulupu pulé?

⁵ Naʻe ʻiloʻi ʻe he kau Kalisitiane ʻi he ʻuluaki senitulí naʻe tataki ʻe Sihova ʻa e kulupu pulé fakafou ʻia Sīsū. Naʻe lava fēfē ke nau fakapapauʻi iá? ʻUluakí, naʻe fakaivia ʻe he laumālie māʻoniʻoní ʻa e kulupu pulé. (Sione 16:13) Naʻe maʻu ʻe he kau Kalisitiane pani kotoa pē ʻa e laumālie māʻoniʻoní, ka naʻá ne fakaivia makehe ʻa e kau ʻapositolo mo e kau mātuʻa ʻi Selusalemá ke nau fakahoko ʻa honau ngafa ko e kau ʻovasiá. Ko e fakatātaá, ʻi he taʻu 49, naʻe tataki ai ʻe he laumālie māʻoniʻoní ʻa e kulupu pulé ke nau fai ha fili ʻo fekauʻaki mo e kamú. Naʻe muimui ʻa e ngaahi fakatahaʻangá ʻi he tataki ko iá. Ko hono olá, ‘naʻe hokohoko atu ʻa hono ʻai ke nau tuʻu mālohi ʻi he tuí mo tupulekina ai pē honau tokolahí ʻi he ʻaho ki he ʻaho.’ (Ngā. 16:4, 5) ʻOku lava ke tau ʻiloʻi mei he tohi ki he ngaahi fakatahaʻangá ʻo fekauʻaki mo e kamú, naʻe maʻu ʻe he kulupu pulé ʻa e laumālie ʻo e ʻOtuá pea naʻa nau fakahāhā ʻa e ngaahi ʻulungaanga hangē ko e ʻofá mo e tuí.—Ngā. 15:11, 25-29; Kal. 5:22, 23.

⁶ Uá, naʻe tokoniʻi ʻe he kau ʻāngeló ʻa e kulupu pulé. Ko e fakatātaá, naʻe tala ʻe ha ʻāngelo kia Koliniusi ke ne kumi ʻa e ʻapositolo ko Pitá. ʻI he hili ʻa e malanga ʻa Pita kia Koliniusi mo hono kāingá, naʻa nau maʻu ʻa e laumālie māʻoniʻoní, neongo naʻe ʻikai ke kamu ʻa e kau tangata ko iá. Ko ia naʻe hoko ai ʻa Koliniusi ko e ʻuluaki Senitaile taʻekamu ke hoko ko ha Kalisitiané. ʻI he fanongo ʻa e kau ʻapositoló mo e fanga tokoua kehé fekauʻaki mo e meʻá ni, naʻa nau tali ʻa e finangalo ʻo e ʻOtuá pea talitali lelei ʻa e kau Senitaile taʻekamú ki he fakatahaʻanga Kalisitiané. (Ngā. 11:13-18) ʻI he meʻá ni, ʻe lava ke tau sio ki hono poupouʻi longomoʻui ʻe he kau ʻāngeló ʻa e ngāue fakamalanga ko ia naʻe tataki ʻe he kulupu pulé. (Ngā. 5:19, 20) Tolú, naʻe tataki ʻe he Folofola ʻa e ʻOtuá ʻa e kulupu pulé. Naʻe ngāueʻaki ʻe he kau tangata ko iá ʻa e Folofolá ke tokoni kiate kinautolu ʻi hono fai ʻa e ngaahi fili mahuʻinga fekauʻaki mo e tui faka-Kalisitiané pea ke tataki ʻa e ngaahi fakatahaʻangá.—Ngā. 1:20-22; 15:15-20.

 7. Ko e hā ʻe lava ai ke tau pehē naʻe tataki ʻe Sīsū ʻa e muʻaki kau Kalisitiané?

⁷ Neongo naʻe maʻu ʻe he kulupu pulé ʻa e mafai ʻi he fakatahaʻangá, naʻe mahinoʻi ʻe hono kau mēmipá ko Sīsū Kalaisi ʻa honau Takí. ʻOku anga-fēfē ʻetau ʻiloʻi iá? Naʻe pehē ʻe he ʻapositolo ko Paulá ko Kalaisi naʻá ne fakanofo “ʻa e niʻihi ko e kau ʻapositolo.” Naʻá ne toe pehē ko Kalaisi ʻa e “ʻulú,” pe Taki ʻo e fakatahaʻangá. (ʻEf. 4:11, 15) Pea ʻi he ʻikai ui kinautolu ʻaki ha hingoa ʻo ha ʻapositoló, ‘ʻi ha tataki fakaʻotua naʻe ui ʻa e kau ākongá ko e kau Kalisitiane.’ (Ngā. 11:26) Naʻe ʻiloʻi ʻe Paula naʻe mahuʻinga ke muimui ʻi he ngaahi akonaki makatuʻunga ʻi he Tohi Tapú mei he kau ʻapositoló mo e kau tangata kehe naʻa nau takimuʻá. Naʻa mo ia, naʻe pehē ʻe Paula: “Ka ʻoku ou loto ke mou ʻilo ko e ʻulu ʻo e tangata kotoa pē ko e Kalaisí.” Ko e fakamatala ko ení naʻe fakakau ki ai ʻa e mēmipa kotoa pē ʻo e kulupu pulé. Pea naʻe hoko atu ʻa Paula: “Ko e ʻulu leva ʻo e Kalaisí ko e ʻOtuá.” (1 Kol. 11:2, 3) ʻOku hā mahino, naʻe fakanofo ʻe Sihova ʻa hono ʻAló, ʻa Kalaisi Sīsū, ke ne tataki ʻa e fakatahaʻangá.

8, 9. Ko e hā ʻa e ngafa mahuʻinga naʻe maʻu ʻe Tokoua Russell?

⁸ Kamata ʻi he 1870, naʻe feinga ʻa Charles Taze Russell mo e niʻihi ʻo hono ngaahi kaumeʻá ke nau lotu ki he ʻOtuá ʻo fakatatau ki he Tohi Tapú pea tokoniʻi ʻa e niʻihi kehé ke nau fai pehē. Naʻe kau ki he meʻá ni ʻa hono tokoniʻi ʻo e kakai naʻa nau lea ʻi he ngaahi lea kehe. Ko ia naʻe fokotuʻu fakalao ai ʻa e Zion’s Watch Tower Tract Society ʻi he 1884, pea naʻe hoko ai ʻa Tokoua Russell ko e palesitení.b (Sio ki he fakamatala ʻi laló.) Naʻá ne ako mātuʻaki fakamākukanga ʻa e Tohi Tapú pea naʻe ʻikai te ne ilifia ke tala ki he niʻihi kehé ko e ngaahi akonaki ʻa e siasí hangē ko e Tolu-Tahaʻi-ʻOtuá mo e taʻefaʻamate ʻa e laumālié naʻe ʻikai ke ʻi he Tohi Tapú. Naʻá ne ʻiloʻi ko e toe foki mai ʻa Kalaisí ʻe taʻehāmai pea ko e “taimi kotofa ʻo e ngaahi puleʻangá” ʻe ngata ʻi he 1914. (Luke 21:24) Naʻe ngāueʻaki ʻe Tokoua Russell ʻa hono taimí, iví, mo e paʻangá ke akoʻi ʻaki ʻa e ngaahi moʻoni ko ení ki he niʻihi kehé. ʻOku hā mahino naʻe ngāueʻaki ʻe Sihova mo Sīsū ʻa Tokoua Russell ke ne takimuʻa ʻi ha taimi mahuʻinga ʻi he hisitōliá.

⁹ Naʻe ʻikai loto ʻa Tokoua Russell ke ne maʻu ha tokanga makehe mei he kakaí. ʻI he 1896, naʻá ne tohi ʻo pehē ko ia mo e kau tangata naʻe fua fatongiá naʻe ʻikai ʻaupito te nau loto ke fakalāngilangiʻi kinautolu. Naʻe ʻikai te nau loto ke ʻoange kiate kinautolu ha ngaahi hingoa fakalakanga makehe, pea naʻe ʻikai te nau loto ke ui ʻaki ha kulupu ʻa honau hingoá. Naʻá ne pehē ki mui ai: “ʻOku ʻikai ko e ngāue eni ʻa ha tangata.”

10. (a) Naʻe fakanofo ʻanefē ʻe Sīsū ʻa e “tamaioʻeiki anga-tonu mo potó”? (e) Fakamatalaʻi ʻa e anga ʻo hono fakamāʻalaʻala ʻa e kehe ʻa e Kulupu Pulé mei he Sōsaieti Taua Leʻo.

¹⁰ ʻI he 1919, ʻi he taʻu ʻe tolu hili ʻa e mate ʻa Tokoua Russell, naʻe fakanofo ʻe Sīsū ʻa e “tamaioʻeiki anga-tonu mo potó.” Ko e hā ʻa e taumuʻá? Ke nau ʻoange ki hono kau muimuí ʻenau “meʻakaí ʻi he taimi totonu.” (Māt. 24:45) Naʻa mo e lolotonga ʻa e muʻaki ngaahi taʻu ko iá, naʻe tokonaki ai ʻe ha kiʻi kulupu tokosiʻi ʻo e fanga tokoua pani ʻi he ʻuluʻi ʻapitanga ʻi Brooklyn, Niu ʻIoké, ʻa e meʻakai fakalaumālié ki he kau muimui ʻo Sīsuú. Ko e kupuʻi lea “kulupu pulé” naʻe kamata ke hā ia ʻi heʻetau ʻū tohí hili ʻa e 1940. ʻI he taimi ko iá, naʻe fengāueʻaki vāofi ʻa e kulupu pulé mo e Watch Tower Bible and Tract Society. Kae kehe, ʻi he 1971, naʻe fakamāʻalaʻala mai ai naʻe kehe ʻa e Kulupu Pulé mei he Sōsaieti Taua Leʻó, ʻa ia naʻa nau tokangaʻi ʻa e ngaahi meʻa fakalaó pē. Mei he taimi ko iá ʻo faai mai ai, naʻe lava ke hoko ʻa e fanga tokoua paní ko e konga ʻo e Kulupu Pulé ʻo ʻikai te nau kei hoko ko e kau talēkita ʻo e Sōsaietí. Ki muí ni mai, ko e fanga tokoua fua fatongia ʻi he “fanga sipi kehe” kuo nau ngāue ko e kau talēkita ʻo e Sōsaietí mo e ngaahi kautaha kehe ʻoku ngāueʻaki ʻe he kakai ʻa e ʻOtuá. Ko hono olá, ʻoku lava ke tokangataha ai ʻa e Kulupu Pulé ki hono tokonaki mai ʻo e fakahinohino mo e tataki Fakatohitapú. (Sione 10:16; Ngā. 6:4) Ko e ʻīsiu ʻo e Taua Leʻo ʻo Siulai 15, 2013, naʻe fakamatalaʻi ai ko e “tamaioʻeiki anga-tonu mo potó” ko ha kiʻi kulupu tokosiʻi ʻo e fanga tokoua paní ʻa ia ʻoku faʻuʻaki kinautolu ʻa e Kulupu Pulé.

11. ʻOku anga-fēfē hono fai ʻe he Kulupu Pulé ʻa e ngaahi filí?

¹¹ ʻOku fai ʻe he Kulupu Pulé ʻi hono tuʻunga ko ha kulupú ʻa e ngaahi fili mahuʻinga ʻi he taimi ʻoku fakataha ai ʻa hono kau mēmipá ʻi he uike taki taha. Ko e fakataha pehení ʻoku tokoniʻi ai kinautolu ke nau fetuʻutaki vāofi mo kei fāʻūtaha ai pē. (Pal. 20:18) ʻOku ʻikai ha mēmipa ʻo e Kulupu Pulé ʻe mahuʻinga ange ia ʻi he ngaahi mēmipa kehé, ko ia ʻi he taʻu taki taha ʻoku tataki ai ʻe ha tokoua kehe ʻa e ngaahi fakataha ko iá. (1 Pita 5:1) ʻOku toe pehē pē foki ʻi he ngaahi kōmiti taki taha ʻe ono ʻa e Kulupu Pulé. ʻOku ʻikai fakakaukau ha mēmipa ʻo e Kulupu Pulé ko ia ʻa e taki ʻo hono fanga tokouá. Ko kinautolu taki taha ʻoku nau toe hoko ko e kau sevāniti ʻo hono falé pea ʻokú ne maʻu ʻa e meʻakai fakalaumālié mei he tamaioʻeiki anga-tonú pea muimui ʻi heʻene tatakí.

12. Ko e hā ʻa e ongo fehuʻi te tau hoko atu ʻo talí?

¹² Ko e Kulupu Pulé ʻoku ʻikai ke fakamānavaʻi pe haohaoa. ʻOku lava ke nau fai ʻa e ngaahi fehālaaki ʻi hono fakamatalaʻi ʻa e Tohi Tapú pe ʻi hono tataki ʻa e kautahá. Ko e fakatātaá, ko e Watch Tower Publications Index ʻoku kau ai ʻa e kaveinga ko e “Beliefs Clarified,” ʻa ia ʻoku fakahokohoko ai ʻa e ngaahi fakatonutonu ʻi heʻetau mahinoʻi ʻa e Tohi Tapú talu mei he 1870. Naʻe ʻikai ke tala mai ʻe Sīsū ia ko ʻene tamaioʻeiki anga-tonú te nau ʻomai ha meʻakai fakalaumālie haohaoa. Ko ia ʻe lava fēfē ke tau tali ʻa e fehuʻi ʻa Sīsuú: “Ko hai moʻoni koā ʻa e tamaioʻeiki anga-tonu mo potó?” (Māt. 24:45) Ko e hā ʻa e fakamoʻoni ko e Kulupu Pulé ʻa e tamaioʻeiki anga-tonú? Tau lāulea angé ki he meʻa tatau ʻe tolu naʻá ne tokoniʻi ʻa e kulupu pule ʻi he taimi ʻo e kau ʻapositoló.

13. ʻOku anga-fēfē hono tokoniʻi ʻe he laumālie māʻoniʻoní ʻa e Kulupu Pulé?

¹³ ʻOku tokoniʻi ʻe he laumālie māʻoniʻoní ʻa e Kulupu Pulé. ʻOku tokoniʻi ʻe he laumālie māʻoniʻoní ʻa e Kulupu Pulé ke nau mahinoʻi ʻa e ngaahi moʻoni Fakatohitapu ko ē naʻe ʻikai te nau mahinoʻi ki muʻá. Ko e fakatātaá, fakakaukau ki he fakahokohoko ʻo e ngaahi tui kuo fakamāʻalaʻala ʻa ia naʻe lave ki ai ki muʻá. ʻOku ʻikai ha tangata kuo lava ke ne mahinoʻi mo fakamatalaʻi ʻa e “ngaahi meʻa loloto ʻa e ʻOtuá” ʻiate ia pē! (Lau ʻa e 1 Kolinitō 2:10.) ʻOku fakakaukau ʻa e Kulupu Pulé ʻo hangē ko e ʻapositolo ko Paulá, ʻa ia naʻá ne tohi: “Ko e ngaahi meʻá ni ʻoku tau toe leaʻaki foki, ʻo ʻikai ʻaki ʻa e ngaahi lea kuo akoʻi ʻe he poto fakaetangatá, ka ʻi he ngaahi lea ko ia kuo akoʻi ʻe he laumālié.” (1 Kol. 2:13) Hili ha ngaahi taʻu ʻe lauingeau ʻo e ngaahi akonaki loí mo e ʻikai ha tataki māʻalaʻalá, ko e hā kuo tupulaki pehē fau ai ʻa hono mahinoʻi ʻo e Tohi Tapú talu mei he 1919? Ko e ʻuhingá pē he ʻoku tokoniʻi ʻe he ʻOtuá ʻaki hono laumālie māʻoniʻoní!

14. Fakatatau ki he Fakahā 14:6, 7, ʻoku anga-fēfē hono tokoniʻi ʻe he kau ʻāngeló ʻa e Kulupu Pulé mo e kakai ʻa e ʻOtuá ʻi he ʻaho ní?

¹⁴ ʻOku tokoniʻi ʻe he kau ʻāngeló ʻa e Kulupu Pulé. ʻOku maʻu ʻe he Kulupu Pulé ʻa e fatongia kāfakafa ko hono tataki ʻa e kau malanga ʻe toko valu miliona tupu ʻi he ngāue fakamalanga ʻi māmani lahí. Ko e hā ʻoku mātuʻaki lavameʻa ai ʻa e ngāue ko iá? Ko e taha ʻo e ʻuhingá ko e poupou ʻa e kau ʻāngeló. (Lau ʻa e Fakahā 14:6, 7.) ʻI he ngaahi tuʻunga lahi, kuo tataki ai ʻe he kau ʻāngeló ʻa e kau malangá ki ha tokotaha ko e toki ʻosi pē ia ʻene lotu ki he ʻOtuá ki ha tokoni!c (Sio ki he fakamatala ʻi laló.) Ko e ngāue fakamalangá mo e faiakó ʻoku hokohoko atu ʻene tupú naʻa mo e ʻi he feituʻu ʻoku lahi ai ʻa e fakafepakí. Ko e meʻá ni foki ʻoku malava pē iá ʻi he tokoni ʻa e kau ʻāngeló.

15. ʻOku anga-fēfē ʻa e kehe ʻa e Kulupu Pulé mei he kau taki ʻo e Puleʻanga-Haʻa-Kalisitiané? ʻOmai ha fakatātā.

¹⁵ ʻOku tataki ʻe he Folofola ʻa e ʻOtuá ʻa e Kulupu Pulé. (Lau ʻa e Sione 17:17.) Fakakaukau angé ki he meʻa naʻe hoko ʻi he 1973. Ko e ʻīsiu ʻo e Watchtower ʻo Sune 1 naʻe ʻeke ai pe “ʻoku taau ke papitaiso ʻa e faʻahinga kuo ʻikai te nau ʻatā mei hono maʻunimā ʻe he tapaká.” Ko e tali naʻe fai ki he fehuʻí naʻe makatuʻunga ia ʻi he ngaahi tefitoʻi moʻoni Fakatohitapú, ʻa ia ko e ʻikai! Naʻe hā ʻi he Watchtower ʻa e ngaahi potu folofola, pea fakamatalaʻi ai ʻa e ʻuhinga ʻoku totonu ai ke tuʻusi ha tokotaha heʻikai ke tuku ʻene ifí. (1 Kol. 5:7; 2 Kol. 7:1) Naʻe pehē ai ko e tuʻunga totonu ko ení ʻoku ʻikai ko e haʻu ia mei ha tangata ka ko e haʻu “mei he ʻOtuá, ʻa ia ʻokú ne fakahaaʻi mai ʻa ia tonu fakafou ʻi heʻene Folofola kuo tohí.” ʻOku ʻikai ha toe kautaha fakalotu kuo loto-lelei ke falala kakato ki he Folofola ʻa e ʻOtuá neongo ko e fai peheé ʻe faingataʻa ʻaupito ki he niʻihi ʻo hono kau mēmipá. ʻOku pehē ʻe ha tohi ki muí ni fekauʻaki mo e lotú ʻi ʻAmelika: “Kuo toutou fakaleleiʻi ʻe he kau taki Kalisitiané ʻenau ngaahi akonakí ke fehoanaki mo e tui pea mo e ngaahi fakakaukau ʻoku maʻu mei he poupou ʻi he lotolotonga ʻo honau kau mēmipá pea ʻi he sōsaieti tokolahi angé.” Kae kehe, ko e Kulupu Pulé ʻoku ʻikai ke tataki ia ʻe he meʻa ʻoku saiʻia ai ʻa e tokolahi taha ʻo e kakaí. ʻI hono kehé, ko hono kau mēmipá ʻoku tataki kinautolu ʻe he Folofola ʻa e ʻOtuá, ʻa ia ʻoku fakamoʻoniʻi ai ko Sihova ʻa e tokotaha ʻokú ne tataki moʻoni ʻa hono kakaí ʻi he ʻaho ní.

16. Ko e hā ʻa e founga ʻe taha ke manatuʻi ai ʻa e Kulupu Pulé?

¹⁶ Lau ʻa e Hepelū 13:7. ʻOku pehē ʻe he Tohi Tapú ke “manatuʻi ʻa e faʻahinga ʻoku nau takimuʻa ʻiate kimoutolú.” Ko e founga ʻe taha ʻe lava ke tau fai ai ení ko e lave ki he Kulupu Pulé ʻi heʻetau ngaahi lotú. (ʻEf. 6:18) ʻOku lahi honau ngaahi fatongiá, ʻa ia ʻoku kau ai ʻa hono tokonaki mai ʻa e meʻakai fakalaumālié, tataki ʻa e ngāue fakamalangá ʻi māmani lahi, mo hono tokangaʻi ʻa e ngaahi tokoni fakapaʻanga ʻoku fai ki he kautahá. Ko ia ʻoku nau fiemaʻu moʻoni ke tau lotu maʻu pē maʻanautolu!

17, 18. (a) ʻOku anga-fēfē ʻetau muimui ʻi he tataki ʻa e Kulupu Pulé? (e) ʻOku anga-fēfē hono poupouʻi ʻe heʻetau malangá ʻa e Kulupu Pulé mo Sīsuú?

¹⁷ ʻOku lava ke tau toe manatuʻi ʻa e Kulupu Pulé ʻi heʻetau muimui ki heʻene ngaahi fakahinohinó mo e tatakí. ʻOku ʻomai ʻe he Kulupu Pulé kiate kitautolu ʻa e tataki fakafou ʻi heʻetau ʻū tohí, ngaahi fakatahá, ngaahi ʻasemipilií, mo e ngaahi fakataha-lahí. ʻOkú ne toe fakanofo ʻa e kau ʻovasia sēketí, ʻa ia ʻoku nau toki fakanofo ʻa e kau mātuʻá. ʻI he muimui kakato ki he ngaahi fakahinohino ʻoku ʻoange kiate kinautolú, ʻoku fakahaaʻi ai ʻe he kau ʻovasia sēketí mo e kau mātuʻá ʻoku nau manatuʻi ʻa e Kulupu Pulé. Pea ko kitautolu kotoa ʻoku tau fakahāhā ʻoku tau fakaʻapaʻapa ki hotau Takí, ʻa Sīsū, ʻaki ʻa e talangofua ki he kau tangata ʻokú ne ngāueʻaki ʻi he ʻaho ní.—Hep. 13:17.

¹⁸ Ko e toe founga ʻe taha ʻe lava ke tau manatuʻi ai ʻa e Kulupu Pulé ko hono fai hotau lelei tahá ʻi he ngāue fakamalangá. ʻOku enginaki mai ʻi he Hepelū 13:7 ki he kau Kalisitiané ke nau faʻifaʻitaki ki he tui ʻa e faʻahinga ʻoku nau takimuʻá. Kuo fakahāhā ʻe he Kulupu Pulé ʻa e tui mālohi ʻaki ʻenau malanga mo pouaki faivelenga ʻa e ongoongo leleí. ʻOku tau poupouʻi ʻa e fanga tokoua ko iá ʻi he ngāue mahuʻinga ko ení? Kapau ʻoku tau fai pehē, te tau ongoʻi fiefia ʻi he taimi te tau fanongo ai ki hono tala mai ʻe Sīsū: “Ko hoʻomou fai ia ki ha taha ʻo e kau siʻi taha ʻo e faʻahingá ni ʻa ia ko hoku fanga tokouá, ko hoʻomou fai ia kiate aú.”—Māt. 25:34-40.

19. Ko e hā ʻokú ke fakapapauʻi ai ke muimui ki hotau Takí, ʻa Sīsū?

¹⁹ ʻI he foki hake ʻa Sīsū ki hēvaní, naʻe ʻikai te ne liʻaki ʻa hono kau muimuí. (Māt. 28:20) Naʻá ne ʻiloʻi ko e laumālie māʻoniʻoní, kau ʻāngeló, mo e Folofola ʻa e ʻOtuá naʻa nau tokoniʻi ia ke ne hoko ko e takimuʻa ʻi he taimi naʻá ne ʻi māmani aí. ʻOkú ne ʻoange ʻa e tokoni tatau ki he tamaioʻeiki anga-tonú ʻi he ʻahó ni. Ko e Kulupu Pulé ʻoku hokohoko atu ʻenau “muimui ʻi he Lamí,” ʻa Sīsū, “ʻo tatau ai pē pe ko fē ʻokú ne ʻalu ki aí.” (Fkh. 14:4) Ko ia ʻi he taimi ʻoku tau muimui ai ʻi he tataki ʻa e Kulupu Pulé, ʻoku tau muimui ai ki hotau Takí, ʻa Sīsū. Kuo vavé ni, ke ne taki atu kitautolu ki he moʻui taʻengatá. (Fkh. 7:14-17) Pea ʻoku ʻikai ha taki fakaetangata ʻe lava ke ne talaʻofa mai ia!