Sīsū Ko ʻEne Moʻuí mo ʻEne Ngāue Fakafaifekaú

Ko e Talanoa Fakatātā ʻo e Ngaahi Talēnití

NAʻE hoko atu ʻe Sīsū ʻa e fetalanoaʻaki mo ʻene kau ʻaposetoló ʻi he Moʻunga ko ʻOlivé ʻaki ʻene fakahā kiate kinautolu ha talanoa fakatātā ʻe taha, ko hono ua ia ʻi he talanoa fakahokohoko ʻe tolu. ʻI ha ngaahi ʻaho siʻi ki muʻa atu ai, lolotonga ʻa ʻene kei ʻi Sielikoó, naʻá ne fakahā ai ʻa e talanoa fakatātā ʻo e ngaahi miná ke fakahā ko e Puleʻangá naʻe ʻi he kahaʻu mamaʻo atú. Ko e talanoa fakatātā leva ko eni naʻá ne faí, neongo naʻe ʻi ai hona ngaahi tafaʻaki meimei tatau, naʻá ne fakamatala ki hona fakahoko ʻa e ngaahi ngāue he lolotonga ʻo e ʻi ai ʻa Kalaisi ʻi he mafai ʻo e Puleʻangá. Naʻe fakatātaaʻi ai ʻa e pau ke ngāue ʻa ʻene kau ākongá lolotonga ʻa ʻenau kei ʻi māmaní ke fakalahi “ʻene koloa.”

Naʻe kamata ʻe Sīsū: “He ko e [ngaahi tuʻunga ʻoku fekauʻaki mo e Puleʻangá] ʻoku hange ko ha tangata naʻe teu ʻalu ki muli, pea ne ui ange ʻene kau tamaioʻeiki aʻana, ʻo ne tuku kiate kinautolu ʻene koloa.” Ko Sīsū ʻa e tangata ko iá, ʻa ia ki muʻa ke ne fononga ki muli ki hēvaní, naʻá ne tuku ʻene ngaahi koloá ki heʻene kau tamaioʻeikí​—ʻa e kau ākonga te nau maʻu ʻa e Puleʻanga fakahēvaní. Ko e ngaahi koloa ko ʻení naʻe ʻikai ko ha koloa fakamatelie ia ka ʻoku nau fakatātaaʻi ha feituʻu ke ngāueʻi ʻa ia naʻá ne ʻosi teuteu ke maʻu mei ai ha kau ākonga lahi ange.

Naʻe tuku ʻe Sīsū ʻene ngaahi koloá ki heʻene kau tamaioʻeikí ʻi he taimi siʻi pē ki muʻa peá ne foki ki hēvaní. Anga-fēfē? ʻAki ʻa ʻene fakahinohino kiate kinautolu ke hanganaki ngāue ʻi he feituʻu kuo teuteú ʻaki hono malangaʻi ʻa e pōpoaki ʻo e Puleʻangá ki he ngaahi ngataʻanga ʻo e māmaní. Hangē ko ia naʻe pehē ʻe Sīsū: “Ko e toko taha naʻa ne ʻange ki ai ʻa e taleniti ʻe nima, pea ua ki he toko taha, pea taha ki he toko taha; ʻo fakatatau ki heʻenau mafai taki taha; pea ne ʻalu leva ki muli.”

Naʻe tufotufa atu ʻa e talēniti ʻe valú, ʻa ia ko e ngaahi koloa ʻa Kalaisí, ʻo fakatatau ki he ngaahi ivi, pe ngaahi malava fakalaumālie, ʻa e kau tamaioʻeikí. Naʻe fakatātaaʻi ʻe he kau tamaioʻeikí ʻa e ngaahi faʻahinga ʻo e kau ākongá. ʻI he ʻuluaki senitulí, naʻe hā mahino ko e faʻahinga naʻa nau maʻu ʻa e talēniti ʻe nimá naʻe kau ki ai ʻa e kau ʻaposetoló. Naʻe hoko atu ʻe Sīsū ʻo fakahā, ko e ongo tamaioʻeiki naʻá na maʻu ʻa e talēniti ʻe nimá mo e talēniti ʻe uá naʻe fakatou liunga ua ʻa e talēnití ʻaki ʻena malangaʻi ʻa e Puleʻangá mo e ngaohi ākonga. Kae kehe, ko e tamaioʻeiki naʻá ne maʻu ʻa e talēniti ʻe tahá naʻá ne tanu ia ʻi he kelekelé.

Naʻe hoko atu ʻe Sīsū: “Pea fuoloa fuoloa pea haʻu ʻa e ʻeiki ʻa e kau tamaioʻeiki ko ia, ʻo ne sivi ʻenau tohi.” Naʻe toki fakahoko ia ʻi he senituli hono 20, ko e taʻu ia ʻe 1,900 ki mui mai, naʻe foki mai ai ʻa Kalaisi ke sivi ʻenau ngāué, ko ia, ko e moʻoni ‘ko ha taimi fuoloa.’ Pea naʻe hoko atu ʻa Sīsū ʻene fakamatalá:

“Pea ʻunuʻunu mai ʻa ia naʻa ne maʻu ʻa e taleniti ʻe nima, ʻo ne haʻu mo ia mo ha taleniti kehe ʻe nima, ʻo ne pehe, ʻEiki, naʻa ke tuku mai ha taleniti ʻe nima: vakai, kuo u maʻu mai mo ha nima kehe. Pea meʻa mai ʻe heʻene ʻeiki, Malo, siʻi tamaioʻeiki lelei mo lototō; kuo ke lototō ʻi hoʻo pule ki ha ngaahi meʻa siʻi, te u fakanofo koe ke pule ki ha ngaahi meʻa lahi: hū koe ki he fiefiaʻanga ʻo hoʻo ʻEiki.” Naʻe tatau pē mo e tamaioʻeiki naʻá ne maʻu ʻa e talēniti ʻe uá, naʻe liunga ua ʻene talēnití, pea naʻá ne maʻu ʻa e fakaongoongolelei mo e pale tatau.

Ka, naʻe anga-fēfē ʻa e hū ʻa e ongo tamaioʻeiki anga-tonu ko ʻení ki he fiefiaʻanga ʻo hona ʻEikí? Ko e fiefia ʻa hona ʻEiki, ko Sīsū Kalaisí, ko e maʻu ʻa e Puleʻangá ʻi heʻene ʻalu ki muli ki heʻene Tamai ʻi hēvaní. Pea ki he kau tamaioʻeiki anga-tonu ʻi onopooní, kuo nau maʻu ʻa e fiefia lahi ʻi hono tuku kiate kinautolu ha toe ngaahi fatongia ʻo e Puleʻangá, pea ʻi he ʻosi ʻo ʻenau ngāue ʻi he māmaní, te nau maʻu ʻa e tumutumu ʻo e fiefiá ko hono fokotuʻu mei he maté ki he Puleʻanga fakahēvaní. Kae fēfē ʻa e tamaioʻeiki hono tolú?

Naʻe lāunga ʻa e tamaioʻeiki ko ʻení: “ʻEiki, ne u ʻilo koe ko e tangata faingataʻa; . . . pea u manavahe, pea u ʻalu ʻo fufū hoʻo taleniti ʻi he kelekele: ʻe, ko ena ā hoʻo meʻa.” Naʻe mātuʻaki fakafisi ʻa e tamaioʻeikí ni ke ngāue ʻi he feituʻu kuo teuteu ʻi he ngāue fakamalangá mo e ngaohi ākongá. Ko ia ʻoku ui ai ia ʻe he ʻEikí ko e “tamaioʻeiki pauʻu mo fakapikopiko” peá ne tala mo e fakamaau: “Ko ia mou toʻo ʻa e taleniti meiate ia . . . Ka mou li ʻa e tamaioʻeiki taeʻaonga ki he poʻuli ʻo tuaʻā. Ko e potu ia ʻe toki hoko ai ʻa e tangi mo e fengaiʻitaki ʻo e nifo.” Naʻe fakamasivaʻi mei ha fiefia fakalaumālie ʻa kinautolu ʻo e faʻahinga tamaioʻeiki faikovi ko ʻení, ʻi hono lī atu ki tuʻa.

ʻOku fokotuʻu mai heni ha lēsoni māfatukituki kiate kinautolu hono kotoa ʻoku nau taku ko e kau muimui kinautolu ʻo Kalaisí. Kuo pau ke nau ngāue ke fakalahi ʻa e ngaahi koloa ʻa honau ʻEiki fakahēvaní ʻaki ʻa e kau kakato ʻi he ngāue fakamalangá ʻo kapau te nau fiemaʻu ke nau aʻusia ʻa ʻene fakaongoongoleleí mo e palé pea kapau ʻoku nau fiefakaʻehiʻehi mei hano lī ki he fakapoʻuli ʻo tuaʻaá pea toki fakaʻauhá. ʻOkú ke feinga tōtōivi ke ngāueʻaki hoʻo ngaahi malavá ʻi he fekauʻaki mo e meʻá ni? Mātiu 25:​14-30.

◆ Ko e hā ʻa e lēsoni ʻoku ʻomai ʻe he talanoa fakatātā hono hokó?

◆ Ko hai ʻa e kau tamaioʻeikí, pea ko e hā ʻa e ngaahi koloa ʻa ia naʻe tuku kiate kinautolú?

◆ Naʻe haʻu ʻanefē ʻa e ʻeikí ke sivi ʻenau ngāué, pea ko e hā naʻá ne ʻilo aí?

◆ Ko e hā ʻa e fiefia naʻe hū ki ai ʻa e tamaioʻeiki anga-tonú, pea ko e hā naʻe hoko ki he tamaioʻeiki anga-fulikivanú?