Ko e ʻEukalisiá—Ko e Moʻoniʻi Meʻa ʻi Mui ʻi he Ouaú

KO E kakai ʻi he māmaní kotoa ʻoku nau fakamanatu maʻu pē ha kātoanga—ʻoku fai tuʻo lahi ia ʻi he taʻú, fakauike, pe naʻa mo fakaʻaho. Neongo ia, ʻoku ui ia ko ha misiteli ʻo e tuí, pea ko e tokolahi ʻo e faʻahinga ʻoku nau fai iá ʻoku ʻikai te nau taukaveʻi ʻoku nau mahinoʻi ia. ʻOku vakai ki ai ko e meʻa toputapu pea ʻoku aʻu ʻo pehē tokua ʻoku fakaemana.

Ko e kātoanga ko iá ko e ʻEukalisiá—ʻa e konga ko ia ʻo e Misa ʻa e Katoliká ʻa ia ʻoku lea ai ʻa e pātelé ʻo tāpuakiʻi ʻa e maá mo e uainé pea fakaafeʻi ʻa e fakatahaʻangá ke nau tali ʻa Kalaisi ʻi he Sākalameniti Māʻoniʻoní.a Naʻe pehē ʻe Tuʻitapu Penitiketo XVI ko e kātoangá ni ki he kau Katoliká ko e “konga tefito mo māʻolunga taha ia ʻo ʻemau tuí.” ʻIkai fuoloa mei heni, naʻe kātoangaʻi ʻe he siasí ʻa e “Taʻu ʻo e ʻEukalisiá” ko e konga ia ʻo ha feinga ke “toe fakaake mo fakalahi ʻa e tui fakaʻeukalisiá.”

Naʻa mo e kau Katolika ʻoku nau fāinga mo ʻenau tuí ʻoku mahuʻinga ʻaupito kiate kinautolu ʻa e ouau ko ení. Ko e fakatātaá, ʻi ha ʻēsei ki muí ni ʻi he makasini Time, ko ha fefine ʻa ia naʻe fakamatalaʻi ko ha finemui Katolika fakalakalaka naʻá ne tohi: “Tatau ai pē pe ko e hā ʻemau ngaahi ʻīsiu fekauʻaki mo e ngaahi tefitoʻi tui ʻa e lotu faka-Katoliká, ʻoku mau kei pipiki pē ki he meʻa ʻokú ne fakafāʻūtahaʻi kimautolu ʻi he tui faka-Katoliká: ko ʻemau līʻoa ki he kātoanga ʻo e ʻEukalisiá.”

Ko ia ko e hā koā ʻa e ʻEukalisia? ʻOku fiemaʻu ke kātoangaʻi ia ʻe he kau muimui ʻo Kalaisí? Tau ʻuluaki lāulea angé ki he anga ʻo e tukuʻau mai ʻa e talatukufakaholo ʻo e ʻEukalisiá. Pea ʻe lava leva ke tau tokangataha ki ha foʻi fehuʻi mahuʻinga ange: ʻOku tapua moʻoni mei he ʻEukalisiá ʻa e kātoanga naʻe fokotuʻu ʻe Sīsū Kalaisi ʻi he meimei taʻu ʻe 2,000 kuohilí?

Ko e ʻEukalisiá mo e Puleʻanga-Haʻa-Kalisitiané

ʻOku ʻikai faingataʻa ke sio ki he ʻuhinga ʻoku vakai ai ki he ʻEukalisiá ko e meʻa fakaemaná. Ko e mōmeniti tefito ʻo e kātoangá ʻoku hoko ia lolotonga ʻa hono lotuʻi ʻo e ʻEukalisiá. ʻI he tuʻunga ko iá, fakatatau ki he lau ʻa e Catechism of the Catholic Church, “ko e mālohi ʻo e ngaahi foʻi leá mo e ngāue ʻa Kalaisí, pea mo e mālohi ʻo e Laumālie Māʻoniʻoní” ʻokú ne ʻai ai ʻa e sino mo e taʻataʻa ʻo Sīsuú ke “ʻi ai fakasākalameniti.” Ko e pātelé, hili ʻene maʻu ʻinasi mei he maá mo e uainé, ʻokú ne fakaafeʻi ʻa e kau faitōnungá ke nau maʻu ʻa e Sākalamenití, ʻo faʻa hoko ko hono kai pē ʻo e mā ʻo e ʻeukalisiá.

ʻOku akoʻi ʻe he Siasi Katoliká ko e maá mo e uainé ʻoku liliu fakaemana ia ki he sino mo e taʻataʻa moʻoni ʻo Kalaisí—ko ha tokāteline ʻoku ui ko e liliu sino mo e toto ʻa e maá mo e uainé. Ko e akonakí ni naʻe malanga māmālie hake, ʻi hono ʻuluaki fakamatalaʻi mo ngāueʻaki fakaʻofisiale ʻa e foʻi leá ʻi he senituli hono 13. ʻI he ngaahi ʻaho ʻo e Fakalelei-Lotu Palotisaní, naʻe fehuʻia ai ha ngaahi tafaʻaki pau ʻo e ʻEukalisia ʻa e Katoliká. Naʻe talitekeʻi ʻe Lūtelo ʻa e liliu fakaemana ʻo e sino mo e taʻataʻa ʻo Kalaisí ka ne fokotuʻu ʻa e tui ʻo pehē naʻe fakatahaʻi moʻoni ʻa e sino mo e taʻataʻa ʻo Kalaisí mo e mā mo e uaine ʻi he ʻeukalisiá. Ko hona kehekehé ʻoku siʻisiʻi. Naʻe akoʻi ʻe Lūtelo ko e maá mo e uainé ʻokú na ʻi ai fakataha mo e kakano mo e taʻataʻa ʻo Sīsuú, ka ʻoku ʻikai ke liliu ki ai.

ʻI he faai mai ʻa e taimí, ko e ngaahi faikehekehe fekauʻaki mo e ʻuhinga ʻo e ʻEukalisiá pea pehē ki he founga mo e toutou fai ʻo hono kātoangaʻí naʻe tupu ia ʻi he haʻohaʻonga ʻo e fanga kiʻi kautaha lotu ʻo e Puleʻanga-Haʻa-Kalisitiané. Kae kehe, ʻi ha faʻahinga founga ko e ouaú ni ʻoku kei mahuʻinga tefito ia ʻi he kotoa ʻo e lotu ʻa e Puleʻanga-Haʻa-Kalisitiané. Ka naʻe fēfē ʻa e muʻaki kātoanga ia naʻe fokotuʻu ʻe Sīsuú?

Ko e Fokotuʻu ʻa e “ʻOhomohe ʻo e ʻEiki”

Naʻe fokotuʻu ʻe Sīsū tonu ʻa e “ʻOhomohe ʻo e ʻEiki,” pe Fakamanatu ʻo ʻene pekiá. (1 Kolinito 11:20, 24) Kae kehe, naʻá ne fokotuʻu ha ouau fakamisiteli ʻa ia ʻe kai moʻoni ai ʻe hono kau muimuí ʻa hono sinó mo inu ʻa hono taʻataʻá?

Ko e toki ʻosi ia ʻo e kātoangaʻi ʻe Sīsū ʻa e Pāsova faka-Siú pea fakangofua ke mavahe ʻa Siutasi ʻIsikaliote, ʻa e ʻapositolo naʻe teu ke ne lavakiʻi iá. Ko Mātiu, ʻa e taha ʻo e kau ʻapositolo ʻe toko 11 ne ʻi aí, naʻá ne fakamatala: “Pea lolotonga ʻenau kai, naʻe toʻo ʻe Sisu ha foʻi ma, ʻo ne tapuaki ia, mo ne pakipaki ʻo tufaki ki he kau ako, ʻo ne pehe, Toʻo ʻo kai; [“ʻoku ʻuhingá,” NW] ko hoku sino ʻeni. Naʻa ne toʻo foki ha ipu, mo ne fakafetaʻi [faka-Kalisí, eu·kha·ri·ste΄sas], ʻo ne ʻange kiate kinautolu, mo ne pehe, Mou inu kotoa pe mei ai; he [“ʻoku ʻuhingá,” NW] ko hoku toto ʻeni ko e toto fuakava, ʻa ia ʻoku lilingi koeʻuhi ko e tokolahi ke lava ai ʻa e fakamolemole angahala.”—Mātiu 26:26-28.

Kia Sīsū, pea pehē ki he kotoa ʻo e kau sevāniti ʻa e ʻOtuá, ko e meʻa totonu ʻa hono kole ha tāpuaki ki he meʻakaí. (Teutalonome 8:10; Mātiu 6:11; 14:19; 15:36; Maake 6:41; 8:6; Sione 6:11, 23; Ngāue 27:35; Loma 14:6) ʻOku ʻi ai ha ʻuhinga ke tui ai ʻi he fai ʻo e fakamāloó, naʻe toe fakahoko ai ʻe Sīsū ha mana, ʻo fakatupunga ai ke kai moʻoni ʻe hono kau muimuí ʻa hono kakanó mo inu hono taʻataʻá?

‘ʻOku ʻUhinga ʻEní’ pe “ko . . . ʻEni”?

Ko ia ai, ʻoku fakalea ʻi he ngaahi liliu Tohi Tapu ʻe niʻihi ʻa e ngaahi lea ʻa Sīsuú ʻo peheni: “Toʻo ʻo kai; ko hoku sinó ʻeni,” mo e “Mou inu kotoa pē, koeʻuhi ko hoku totó ʻeni.” (Mātiu 26:26-28, Conferenza Episcopale Italiana; The New Jerusalem Bible) Ko e moʻoni foki ko e foʻi lea faka-Kalisi ko e e·stin΄, ko ha faʻunga ia ʻo e foʻi veape faka-Kalisi ko e “hoko,” ʻoku ʻuhinga tefito iá ko e “ko.” Ka ko e foʻi veape tatau ʻoku toe ʻuhinga iá ko e “fakaʻilongaʻi.” ʻOku mālié, ʻi he ngaahi liliu lahi ʻo e Tohi Tapú, ko e foʻi veape ko ení ʻoku toutou liliu ia ko e “ʻuhinga” pe “tuʻu fakatātā ki he.”b Ko e potutohí ʻokú ne fakapapauʻi ʻa e liliu tonu tahá. Hangē ko ení, ʻi he Mātiu 12:7, ʻoku liliu ai ʻa e e·stin ko e “ʻuhinga” ʻi he ngaahi liliu Tohi Tapu lahi: “Ka ne mou ʻilo hono ʻuhinga [faka-Kalisí, e·stin] ʻo e meʻa ni, ko e mēsi ʻoku ou tangi ki ai, ʻo ʻikai ko e feilaulau, pehe ne ʻikai te mou fakahalaia ʻa e ʻataʻatā.”—CEI; Douay Version.

ʻI he meʻá ni, kuo felotoi ai ʻa e kau mataotao Tohi Tapu tokolahi ʻoku fakaʻapaʻapaʻí ko e foʻi lea “ko” ʻoku ʻikai te ne liliu totonu ʻa e fakakaukau naʻe fakahaaʻi heni ʻe Sīsuú. Ko e fakatātaá, naʻe vakaiʻi ʻe Jacques Dupont ʻa e anga fakafonua mo e sōsaieti ʻa ia naʻe nofo ai ʻa Sīsuú ʻo ne fakaʻosiʻaki “ko e fakanatula taha” ʻi hono liliu ʻo e vēsí ʻoku totonu ke peheni: “ʻOku ʻuhinga ʻení ko hoku sinó” pe “ʻOku fakafofongaʻi ʻe he meʻá ni ʻa hoku sinó.”

ʻI ha tuʻunga pē, naʻe ʻikai lava ke pehē naʻe ʻuhinga ʻa Sīsuú ko hono kau muimuí naʻa nau kai moʻoni ʻa hono kakanó mo inu ʻa hono totó. Ko e hā hono ʻuhingá? Hili e Lōmaki ʻo e ʻaho ʻo Noá, ʻi hono ʻoange ʻe he ʻOtuá ʻa e ngofua ke kai ʻa e kakano ʻo e fanga monumanú, naʻá ne tapui fakahangatonu ai ʻa e tangatá mei hono kai ʻo e totó. (Senesi 9:3, 4) Ko e fekaú ni naʻe toe fai ia ʻi he Lao ʻa Mōsesé, ʻa ia naʻe talangofua kakato ki ai ʻa Sīsū. (Teutalonome 12:23; 1 Pita 2:22) Pea naʻe fakamānavaʻi ʻa e kau ʻapositoló ʻe he laumālie māʻoniʻoní ke nau toe fakahaaʻi ʻa e fekau ke ʻoua ʻe kai ʻa e totó, ʻo ʻai ʻa e lao ko iá ke kau ki ai ʻa e kau Kalisitiane kotoa pē. (Ngāue 15:20, 29) ʻE fokotuʻu ʻe Sīsū ha kātoanga ʻa ia ʻe fiemaʻu ai ʻa hono kau muimuí ke nau maumauʻi ha lao toputapu ʻa e ʻOtua Māfimafi-Aoniú? Mole ke mamaʻo!

ʻOku mahino leva, naʻe ngāueʻaki ʻe Sīsū ʻa e maá mo e uainé ko e ongo meʻa fakaefakatātā. Ko e mā taʻelēvaní naʻe ʻuhinga iá, pe naʻá ne fakafofongaʻi ʻa hono sino taʻehaangahala ʻa ia ʻe feilaulauʻí. Naʻe fakaʻilongaʻi ʻe he uaine kulokulá ʻa hono taʻataʻá ʻa ia ʻe lilingi “koeʻuhi ko e tokolahi ke lava ai ʻa e fakamolemole angahala.”—Mātiu 26:28.

Ko e Taumuʻa ʻo e ʻOhomohe ʻa e ʻEikí

Naʻe fakaʻosiʻaki ʻe Sīsū ʻa e ʻuluaki fakamanatu ʻo e ʻOhomohe ʻa e ʻEikí ʻa e ngaahi leá ni: “Mou fai ʻeni mōku fakamanatu.” (Luke 22:19) Ko e kātoangá ʻokú ne tokoniʻi moʻoni kitautolu ke tau manatuʻi ʻa Sīsū mo e ngaahi meʻa fakaofo naʻe fakahoko ʻi heʻene pekiá. ʻOku fakamanatu mai ai naʻe pouaki ʻe Sīsū ʻa e tuʻunga-hau ʻo ʻene Tamaí, ʻa Sihova. ʻOku toe fakamanatu mai ai fakafou heʻene pekia ko ha tangata haohaoa, taʻehaangahalá, naʻe foaki ai ʻe Sīsū “ʻene moʻui ke huhuʻiʻaki ha tokolahi, heʻene fetongi kinautolu.” ʻOku ʻai ʻe he huhuʻí ke malava ki ha taha pē te ne ngāueʻi ʻa e tui ki heʻene feilaulaú ke fakatauʻatāinaʻi mei he angahalá pea ke ne maʻu ʻa e moʻui taʻengatá.—Mātiu 20:28.

Ka ko e meʻa tefitó, ko e ʻOhomohe ʻa e ʻEikí ko ha kai fakataha ia. Ko e faʻahinga ʻoku kau ki aí ko (1) Sihova ko e ʻOtuá, ʻa ia naʻá ne fokotuʻutuʻu ʻa e huhuʻí, (2) Sīsū Kalaisi, “ʻa e Lami ʻa e ʻOtua,” ʻa ia naʻá ne tokonaki ʻa e huhuʻí, pea mo e (3) fanga tokoua fakalaumālie ʻo Sīsuú. ʻI he maʻu ʻinasi he maá mo e uainé, ʻoku fakahaaʻi ʻi hono inu ʻa e uainé ʻoku nau fāʻūtaha kakato mo Kalaisi. (Sione 1:29; 1 Kolinito 10:16, 17) ʻOku nau toe fakahaaʻi ai ʻoku nau ʻi he “fuakava foʻou” ʻi he tuʻunga ko e kau ākonga ʻa Sīsū kuo pani ʻe he laumālié. Ko e faʻahinga eni te nau pule fakataha mo Kalaisi ʻi hēvani ko e ngaahi tuʻi mo e kau taulaʻeiki.—Luke 22:20; Sione 14:2, 3; Fakahā 5:9, 10.

ʻE kātoangaʻi ʻafē ʻa e Fakamanatú? ʻOku hoko ʻo mahino ʻa e talí ʻi heʻetau manatuʻi naʻe fili ʻe Sīsū ha ʻaho pau ke fokotuʻu ai ʻa e kātoangá ni—ʻa e Pāsová. Naʻe kātoangaʻi fakataʻu ʻe he kakai ʻa e ʻOtuá ʻa e ʻaho ko iá, ʻa Nīsani 14 ʻi heʻenau tohi-māhiná, ʻo laka hake he taʻu ʻe 1,500 koeʻuhi ke fakamanatu ai ha fakamoʻui fakaofo naʻe fakahoko ʻe Sihova maʻa hono kakaí. ʻOku hā mahino, naʻe fakahinohinoʻi ʻe Sīsū ʻa hono kau muimuí ke nau ngāueʻaki ʻa e ʻaho tatau ke fakamanatu ai ha ngāue lahi mamaʻo ange ʻo e fakamoʻuí ʻa ia ʻe ʻai ʻe he ʻOtuá ke malava fakafou ʻi he pekia ʻa Kalaisí. Ko ia ʻoku kau ai ʻa e kau muimui moʻoni ʻo Sīsuú ki he ʻOhomohe ʻa e ʻEikí ʻi he taʻu kotoa pē ʻi he ʻaho ʻoku fehoanakimālie mo Nīsani 14 ʻi he tohi-māhina faka-Hepeluú.

ʻOku nau fai iá koeʻuhi ko haʻanau fie fakamanatu pē ha ouau? Ko hono moʻoní, ko e meʻa ia ʻoku manako ai ʻa e tokolahi ʻi hono kātoangaʻi ʻa e ʻEukalisiá. Naʻe pehē ʻi he ʻēsei ʻa e faʻu-tohi ʻo e makasini Time naʻe lave ki ai ki muʻá: “ʻOku ʻi ai ʻa e meʻa fakafiemālie lahi fekauʻaki mo e kau ʻi he ngaahi ouau motuʻa ko ia naʻe fai ʻe he tokolahi.” ʻI he hangē ko e kau Katolika tokolahi he ʻaho ní, ʻoku saiʻia ange ʻa e faʻu-tohi ia ko ení ke fakahoko ʻa e kātoangá ʻi he faka-Latiná ʻo hangē ko ia ʻi he kuohilí. Ko e hā hono ʻuhingá? ʻOkú ne tohi ʻo pehē: “ʻOku ou loto ke hivaʻi ʻa e Misá ʻi ha lea ʻoku ʻikai te u mahinoʻí koeʻuhi ʻoku ʻikai te u faʻa saiʻia ʻi he meʻa ʻoku ou fanongo ki ai ʻi he lea faka-Pilitāniá.”

Ko e Kau Fakamoʻoni ʻa Sihová fakataha mo e laui miliona ʻo e faʻahinga mahuʻingaʻiá, ʻoku nau fiefia ʻi hono kātoangaʻi ʻo e ʻOhomohe ʻa e ʻEikí ʻi heʻenau lea pē ʻanautolú ʻi ha feituʻu pē ʻoku nau nofo ai. ʻOku nau fiefia ʻi hono fakaleleiʻi ʻenau mahino fekauʻaki mo e ʻuhinga pea mo e mahuʻinga ʻo e pekia ʻa Kalaisí. Ko e ngaahi moʻoni peheé ʻoku taau ke fakakaukauloto mo lāulea ki ai ʻi he taʻú kotoa. ʻOku ʻiloʻi ʻe he Kau Fakamoʻoní ko hono kātoangaʻi ʻo e Fakamanatú ʻa e founga lelei taha ke hanganaki fakamanatu ai ʻa e ʻofa lahi ʻa e ʻOtua ko Sihová pea mo hono ʻAló, ʻa Sīsū Kalaisi. ʻOku tokoniʻi ai kinautolu ke hanganaki “fakaha ʻa e pekia ʻa e ʻEiki kaeʻoua ke ne hoko mai.”—1 Kolinito 11:26.

[Fakamatala ʻi lalo]

[Fakamatala ʻi he peesi 21]

Naʻe fēfē ʻa e muʻaki kātoanga naʻe fokotuʻu ʻe Sīsuú?

[Fakatātā ʻi he peesi 22]

Naʻe fokotuʻu ʻe Sīsū ʻa e Fakamanatu ʻo ʻene pekiá

[Fakatātā ʻi he peesi 23]

Ko hono kātoangaʻi ʻa e Fakamanatu ʻo e pekia ʻa Sīsū Kalaisí