Founga ke Tokoniʻi Ai ʻa e Niʻihi Kehé ke Tauhi ʻa e Fekau ʻa Kalaisí

 1. Fakatatau ki he Mātiu 28:18-20, ko e hā ʻa e fekau naʻe ʻoange ʻe Sīsuú?

HILI hono fokotuʻu hake ʻa Sīsū mei he pekiá, naʻá ne hā ki heʻene kau ākongá ʻa ia naʻa nau ʻi Kāleli. Naʻe ʻi ai ha meʻa mahuʻinga ke ne tala kiate kinautolu. Ko e hā ia? Ko ʻene ngaahi leá ʻoku maʻu ʻi he Mātiu 28:18-20.​—Lau.

 2. Ko e hā ʻa e ngaahi fehuʻi te tau lāulea ki aí?

² Ko e fekau ʻa Sīsū ke ngaohi ākongá ʻoku toe kaunga ki he kau sevāniti taki taha ʻa e ʻOtuá ʻi he ʻaho ní. Ko ia ai, te tau lāulea ki he fehuʻi ʻe tolu ʻoku fekauʻaki mo e vāhenga-ngāue ko eni kuo ʻomai ʻe Sīsuú. ʻUluakí, tānaki atu ki hono akoʻi ʻa e ngaahi fiemaʻu ʻa e ʻOtuá ki he kau ākonga foʻoú, ko e hā ʻoku totonu ke tau faí? Uá, ʻe lava fēfē ke tokoni ʻa e kau malanga kotoa ʻi he fakatahaʻangá ki he tupulaki fakalaumālie ʻa e kau ako Tohi Tapú? Tolú, ʻe lava fēfē ke tau tokoniʻi ʻa e kaungātui ʻikai longomoʻuí ke toe kau ʻi he ngāue ngaohi ākongá?

 3. Ko e hā ʻa e fakahinohino pau naʻe fakakau ʻe Sīsū ʻi heʻene fekaú?

³ ʻOku māʻalaʻala ʻa e ngaahi fakahinohino ʻa Sīsuú. Kuo pau ke tau akoʻi ki he kakaí ʻene ngaahi fekaú. Neongo ia, ʻoku ʻikai totonu ke ngalo ʻiate kitautolu ʻa e meʻa mahuʻinga ko ení. Naʻe ʻikai ke pehē ʻe Sīsū: ‘Akoʻi kiate kinautolu ʻa e ngaahi meʻa kotoa pē kuó u fekau atu kiate kimoutolú.’ ʻI hono kehé, naʻá ne pehē: Akoʻi kinautolu “ke nau tauhi ʻa e ngaahi meʻa kotoa pē kuó u fekau atu kiate kimoutolú.” Ke fakahoko ʻa e fakahinohino pau ko iá ʻi hono akoʻi ha tokotaha ako Tohi Tapu, ʻoku fiemaʻu ke tau hoko ko e kau faiako mo e kau tataki foki. (Ngā. 8:31) Ko e hā hono ʻuhingá?

 4. ʻOku ʻuhinga ki he hā ʻa hono tauhi ha fekau? Fakatātaaʻi.

⁴ Ke “tauhi” ha fekau ʻoku ʻuhingá ke talangofua ki ai. Ke fakatātaaʻi ʻa e founga ke tau akoʻi ai ha taha ke tauhi pe talangofua ki he ngaahi meʻa naʻe fekau mai ʻe Kalaisí, fakakaukau ki heni. ʻOku anga-fēfē hono akoʻi ʻe ha faiako fakaʻuli ʻene kau akó ke nau tauhi ʻa e ngaahi lao ʻo e halá? ʻOku ʻuluaki akoʻi nai ʻe he faiakó ʻene kau akó ki he ngaahi tuʻutuʻuni ʻo e halá. Kae kehe, ke akoʻi ʻene kau akó ki he founga ke talangofua ai ki he ngaahi tuʻutuʻuni ko iá, kuo pau ke ne fai ha toe meʻa. Kuo pau ke ne ʻalu mo e kau akó pea tataki kinautolu ʻi heʻenau fakaʻuli ʻi he halá mo ʻenau feinga ke ngāueʻaki ʻa e meʻa kuo nau akó. Ko e hā ʻe lava ke tau ako mei he fakatātā ko iá?

 5. (a) Fakatatau ki he Sione 14:15 mo e 1 Sione 2:3, ko e hā ʻoku fiemaʻu ke tau akoʻi ʻetau kau ako Tohi Tapú ke nau faí? (e) ʻOmai ha fakatātā ʻo e founga ʻe lava ke tau tataki ai ʻetau kau akó.

⁵ ʻI heʻetau ako ʻa e Tohi Tapú mo e niʻihi kehé, ʻoku tau akoʻi kinautolu fekauʻaki mo e meʻa ʻoku fiemaʻu ʻe he ʻOtuá meiate kitautolú. Ka kuo pau ke tau fai ʻa e meʻa lahi ange. Kuo pau ke tau akoʻi ʻetau kau ako Tohi Tapú ke nau ngāueʻaki ʻi heʻenau moʻui fakaʻahó ʻa e meʻa ʻoku nau akó. (Lau ʻa e Sione 14:15; 1 Sione 2:3.) ʻI heʻetau faʻifaʻitakiʻangá, ʻe lava ke tau fakahaaʻi ki heʻetau kau akó ʻa e founga ke nau ngāueʻaki ai ʻa e ngaahi tefitoʻi moʻoni Fakatohitapú ʻi he ʻapiakó, ngāueʻangá pe ʻi he taimi fakafiefiá. ʻE lava ke tau lave ki ha hokosia ʻi heʻetau moʻuí ke fakahaaʻi ange ai, ko hono ngāueʻaki ʻa e tataki Fakatohitapú naʻá ne maluʻi kitautolu mei he fakatuʻutāmakí pe tokoniʻi kitautolu ke fai ha fili fakapotopoto. ʻI heʻetau ako mo ʻetau kau akó, ʻe lava ke tau lotu ʻo kole ʻa e laumālie māʻoniʻoni ʻo Sihová ke ne tataki kinautolu.​—Sione 16:13.

 6. Ko e hā ʻoku kau ki hono akoʻi ʻa e niʻihi kehé ke tauhi ʻa e ngaahi fekau ʻa Sīsuú?

⁶ Ko e hā ʻoku kau ki hono akoʻi ʻo e niʻihi kehé ke tauhi ʻa e ngaahi fekau ʻa Sīsuú? ʻOku fiemaʻu ke tau tokoniʻi ʻetau kau ako Tohi Tapú ke fakatupulekina ʻa e holi ke ngaohi ākongá. ʻI he fakakaukau atu ʻa e kau ako ʻe niʻihi ke kau ʻi he ngāue fakamalangá, te nau manavasiʻi nai. Ko ia ʻoku fiemaʻu ke tau kātaki ʻi heʻetau ʻoange ʻa e fakahinohino te ne fakalolotoʻi māmālie ʻenau mahinó, aʻu ki honau lotó pea ueʻi ke nau fai ha meʻa. Ko e hā ʻe lava ke tau fai ke tokoniʻi ʻetau kau akó ke fakatupulekina ʻa e holi ke vahevahe ʻa e ongoongo leleí ki he niʻihi kehé?

 7. ʻE lava fēfē ke tau tokoniʻi ha tokotaha ako ke fakatupulekina ʻa e holi ke vahevahe ʻa e ongoongo leleí ki he niʻihi kehé?

⁷ Te tau ʻeke nai ki heʻetau tokotaha ako Tohi Tapú ʻa e ngaahi fehuʻi ko ení: “Kuo anga-fēfē hono fakaleleiʻi hoʻo moʻuí ʻe he pōpoaki ʻo e Puleʻangá? ʻOkú ke pehē ʻoku fiemaʻu ke fanongo ʻa e niʻihi kehé ki he pōpoaki ko ení? Ko e hā ʻe lava ke ke fai ke tokoniʻi kinautolú?” (Pal. 3:27; Māt. 9:37, 38) Fakahaaʻi ki he tokotaha akó ʻa e ʻū tuleki ʻi heʻetau Puha Meʻangāue Fakafaiakó pea tuku ke ne fili ʻa e tuleki ʻokú ne pehē ʻe fakamānako ki hono kāingá, kaungāmeʻá pe kaungāngāué. ʻOange ki he tokotaha akó ʻa e niʻihi ʻo e ʻū tulekí. ʻAhiʻahiʻi mo ia ʻa e founga ke tuʻuaki ai ʻa e tulekí ʻi ha founga fakapotopoto. Ko e moʻoni, hili hono tali ʻetau tokotaha akó ko ha tokotaha malanga teʻeki papitaisó, te tau loto ke ʻi hono tafaʻakí ke tataki ia.​—Tml. 4:9, 10; Luke 6:40.

 8. Ko e hā ʻoku mahuʻinga ai ke fakatupulekina ʻe heʻetau kau akó ʻa e ʻofa mālohi ki he ʻOtuá mo e kaungāʻapí? (Sio foki ki he puha “Founga ke Fakalolotoʻi Ai ʻa e ʻOfa ʻEtau Kau Akó ki he ʻOtuá.”)

⁸ Manatuʻi naʻe fakahinohinoʻi kitautolu ʻe Sīsū ke akoʻi ʻa e niʻihi kehé ke nau “tauhi ʻa e ngaahi meʻa kotoa pē” naʻá ne fekau maí. ʻOku kau ki heni ʻa e fekau lahi taha ʻe uá​—ke ʻofa ki he ʻOtuá pea ʻofa ki he kaungāʻapí​—ʻokú na fakatou felāveʻi mo e ngāue fakamalangá mo e ngaohi ākongá. (Māt. 22:37-39) Ko e hā ʻena felāveʻí? Ko ha fakaueʻiloto tefito ke kau ʻi he ngāue fakamalangá ko e ʻofá​—ko ʻetau ʻofa ki he ʻOtuá mo ʻetau ʻofa ki he kaungāʻapí. Ko e moʻoni ko e kau ako Tohi Tapu ʻe niʻihi, ko e fakakaukau atu ki he kau ki he ngāue fakamalangá ʻokú ne ʻai nai ke nau ongoʻi manavahē. Ka ʻe lava ke tau fakapapauʻi ki he kau ako ko iá ʻi he tokoni ʻa Sihová ʻe faai atu pē ʻo malava ke nau ikuʻi ʻa e manavahē tangatá. (Saame 18:1-3; Pal. 29:25) Ko e puha ʻi he kupu ko ení ʻoku fakamatalaʻi ai ʻa e ngaahi meʻa ke tau fai ke tokoniʻi ʻetau tokotaha akó ke tupulaki ʻene ʻofa ki he ʻOtuá. ʻIkai ko ia pē, ko e hā ʻe lava ke fai ʻe he fakatahaʻangá ke tokoni ki he ākonga foʻoú ke tupulaki ʻi he ʻofá?

 9. ʻI he fakatātā fekauʻaki mo e tokotaha ako fakaʻulí, ʻoku anga-fēfē ʻene ako ʻa e ngaahi lēsoni mahuʻingá?

⁹ Toe fakakaukau angé ki he fakatātā fekauʻaki mo e tokotaha ako fakaʻulí. ʻI he fakaʻuli atu ʻa e tokotaha akó ʻi he halá fakataha mo e faiakó ʻi hono tafaʻakí, ʻoku anga-fēfē ʻene akó? ʻAki ʻa e fanongo ki heʻene faiakó pea toe sio foki ki he kau fakaʻuli kehé. Hangē ko ʻení, ʻe tuhu nai ʻa e faiakó ki ha fakaʻuli ʻokú ne fakaʻatā anga-ʻofa ha tokotaha ʻe taha ke ne fakalaka hake ʻiate ia ʻi he halá. Pe te ne tuhu nai ki ha fakaʻuli ʻokú ne timi hifo ʻa e maama ʻene kaá koeʻuhi ke ʻoua te ne fakapopongiʻi ʻa e fakaʻuli ʻi he meʻalele ʻoku haʻú. ʻOku akoʻi ʻi he ngaahi faʻifaʻitakiʻanga peheé ha lēsoni mahuʻinga ʻe lava ke ngāueʻaki ʻe he tokotaha akó ʻi he taimi ʻokú ne fakaʻuli aí.

10. Ko e hā ʻe tokoni ki ha tokotaha ako Tohi Tapu ke fakalakalaka fakalaumālie?

¹⁰ ʻI he tuʻunga meimei tatau, ko ha tokotaha ako Tohi Tapu ʻokú ne kamata fononga atu ʻi he hala ki he moʻuí ʻokú ne ako ʻo ʻikai ngata pē mei heʻene faiakó kae toe pehē foki mei he faʻifaʻitakiʻanga lelei ʻa e kau sevāniti kehe ʻa Sihová. Ko ia ai, ko e hā ʻe tokoni lahi ki he fakalakalaka fakalaumālie ʻetau kau ako Tohi Tapú? Ko hono maʻu ʻetau ngaahi fakatahá. Ko e hā hono ʻuhingá? Ko e fakahinohino Fakatohitapu ʻi he ngaahi fakatahá ʻe fakalolotoʻi ai ʻenau ʻiló, fakaivimālohiʻi ʻenau tuí pea tokoniʻi ke tupulaki ʻenau ʻofa ki he ʻOtuá. (Ngā. 15:30-32) ʻIkai ko ia pē, ʻi he ngaahi fakatahá ʻe lava ke fakafeʻiloaki ʻe he faiako Tohi Tapú ʻa e tokotaha akó ki he fanga tokoua mo e fanga tuofāfine ʻoku nau faitatau ʻi he ngaahi meʻa lahi. Ko e hā ʻa e ngaahi faʻifaʻitakiʻanga ʻo e ʻofa faka-Kalisitiané ʻe lava ke sio ai ʻa e tokotaha akó ʻi he fakatahaʻangá? Fakakaukau ki he ngaahi tuʻunga ko ení.

11. Ko e hā ʻa e faʻifaʻitakiʻanga ʻe fakatokangaʻi nai ʻe ha tokotaha ako ʻi he fakatahaʻangá, pea te ne tākiekina fēfē nai ha tokotaha ako?

¹¹ Ko ha tokotaha ako Tohi Tapu ʻa ia ko ha mātuʻa taʻehoa ʻokú ne sio ki ha tuofefine Kalisitiane ʻokú ne ʻi ha tuʻunga meimei tatau mo ia. ʻOku maongo ki he loto ʻo e tokotaha akó ʻa e feinga lahi ʻa e tuofefiné ke haʻu ki he Fale Fakatahaʻangá mo ʻene fānaú. Ko ha tokotaha ako ʻokú ne fāinga ke tuku ʻene ifí ʻokú ne maheni mo ha tokotaha malanga naʻá ne fāinga mo e meʻa meimei tatau ka naʻá ne ikuʻi ia. ʻOku tala ange ʻe he tokotaha malangá ki he tokotaha akó ʻa e founga naʻe ueʻi ai ia ʻe heʻene ʻofa lahi kia Sihová ke talangofua ki he ngaahi fekau ʻa e ʻOtuá. (2 Kol. 7:1; Fil. 4:13) Hili ʻa e fanongo ki he hokosia ʻa e tokotaha malangá, ʻoku ongoʻi loto-maʻu ange ʻa e tokotaha akó ʻi hono fakapapauʻi ange ʻe he tokouá, “Te ke lava foki mo koe ʻo tuku hoʻo ifí.” Ko ha finemui ʻoku ako Tohi Tapu ʻokú ne fakatokangaʻi ha kiʻi tuofefine ʻokú ne fiefia moʻoni ʻi heʻene moʻui ko ha Fakamoʻoní. Ko e vakai ʻa e tokotaha ako Tohi Tapú ki he fiefia ʻa e kiʻi tuofefiné ʻoku ʻai ai ke ne loto ke ako lahi ange fekauʻaki mo e ʻuhinga ʻoku fiefia maʻu pē ai ʻa e tuofefiné.

12. Ko e hā ʻoku lava ai ke tau pehē ko e tokotaha taki taha ʻi he fakatahaʻangá ʻoku lava ke tokoni ki he kau ako Tohi Tapú?

¹² ʻI hono ʻiloʻi ʻe he kau ako Tohi Tapú ʻa e kau malanga faitōnunga kehekehe, ʻoku nau ako mei heʻenau faʻifaʻitakiʻangá ʻa e ʻuhinga hono tauhi ʻa e fekau ʻa Kalaisi ke ʻofa ki he ʻOtuá mo e kaungāʻapí. (Sione 13:35; 1 Tīm. 4:12) ʻIkai ko ia pē, hangē ko ia naʻe lave ki ai ki muʻá, ʻe lava ke ako ha tokotaha ako Tohi Tapu mei he kau malanga ʻoku nau fekuki mo e ngaahi pole meimei tatau mo iá. ʻOku ako ʻa e tokotaha akó mei he ngaahi faʻifaʻitakiʻanga peheé ko e ngaahi liliu ʻoku fiemaʻu ke ne fai ke hoko ai ko ha ākonga ʻa Kalaisí ʻoku malava. (Teu. 30:11) Ko e tokotaha taki taha ʻi he fakatahaʻangá ʻe lava ke tokoni ʻi he founga kehekehe ki he fakalakalaka fakalaumālie ʻa e tokotaha ako Tohi Tapú. (Māt. 5:16) Ko e hā ʻe lava ke ke fai ke fakalototoʻaʻi ʻa e kau ako Tohi Tapú ke maʻu ʻa e fakatahá?

13-14. Naʻe fakafeangai fēfē ʻa Sīsū ki heʻene kau ʻapositolo naʻa nau loto-siʻí?

¹³ ʻOku tau loto ke tokoniʻi hotau fanga tokoua mo e fanga tuofāfine ʻikai longomoʻuí ke nau toe kau ʻi hono fakahoko ʻa e fekau ʻa Kalaisi ke ngaohi ākongá. Ko e anga ʻo e fakafeangai ʻa Sīsū ki heʻene kau ʻapositolo naʻa nau loto-siʻí ʻoku fakahaaʻi ai ʻa e meʻa ʻe lava ke tau fai ʻi he ʻaho ní.

¹⁴ ʻI he ngataʻanga ʻo e ngāue fakafaifekau ʻa Sīsū ʻi he māmaní, ʻi he tuʻunuku mai ʻene pekiá, naʻe “liʻaki kotoa ia ʻe he [kau ʻapositoló] ʻo nau hola.” (Mk. 14:50; Sione 16:32) Naʻe fakafeangai fēfē ʻa Sīsū ki heʻene kau ʻapositoló ʻi he taimi ko eni naʻa nau kiʻi vaivai aí? Taimi nounou pē mei he toetuʻu ʻa Sīsuú, naʻá ne tala ange ki ha toko ua hono kau muimuí: “ʻOua ʻe manavahē! Mo ō, ʻo fakahā ki hoku fanga tokouá [kuó u toetuʻu].” (Māt. 28:10a) Naʻe ʻikai foʻi ʻa Sīsū ʻi heʻene kau ʻapositoló. Neongo naʻa nau liʻaki ia, naʻá ne kei ui pē kinautolu ko hono “fanga tokouá.” Hangē ko Sihová, naʻe faimeesi mo faʻa fakamolemole ʻa Sīsū.​—2 Tuʻi 13:23.

15. ʻOku anga-fēfē ʻetau ongoʻi fekauʻaki mo e faʻahinga kuo ʻikai ke nau toe kau ʻi he ngāue fakafaifekaú?

¹⁵ ʻI he tuʻunga meimei tatau, ʻoku tau maʻu ha tokanga lahi ki he faʻahinga kuo ʻikai ke nau toe kau ʻi he ngāue fakafaifekaú. Ko hotau fanga tokoua mo e fanga tuofāfine kinautolu, pea ʻoku tau ʻofa ʻiate kinautolu! ʻOku tau kei manatuʻi ʻenau ngaahi fakaongosia ʻofa ʻi he kuohilí​—mahalo ko e niʻihi ʻi he laui hongofuluʻi taʻu. (Hep. 6:10) ʻOku tau ongoʻi moʻoni ʻenau pulí! (Luke 15:4-7) ʻI he faʻifaʻitaki kia Sīsuú, ʻi he ngaahi founga fē ʻe lava ke tau fakahaaʻi ai ʻetau tokanga kiate kinautolú?

16. ʻE lava fēfē ke tau fakahaaʻi ʻetau tokanga ki hotau fanga tokoua mo e fanga tuofāfine ʻikai longomoʻuí?

¹⁶ Fai ha fakaafe loto-māfana. Ko e founga ʻe taha naʻe fakalototoʻaʻi ai ʻe Sīsū ʻene kau ʻapositolo naʻa nau loto-siʻí ko hono fakaafeʻi kinautolu ki ha fakataha. (Māt. 28:10e; 1 Kol. 15:6) ʻOku pehē pē ʻi he ʻahó ni, ʻe lava ke tau fakalototoʻaʻi ʻa e faʻahinga ʻikai longomoʻuí ke maʻu ʻa e ngaahi fakatahá kapau ʻoku ʻikai ke nau fai pehē. ʻOku tau ʻiloʻi ʻe fiemaʻu nai ke tau toutou fakaafeʻi kinautolu ki muʻa ke nau haʻu. ʻOku ʻikai ha veiveiua naʻe fiefia ʻa Sīsū ʻi hono tali ʻe heʻene kau ākongá ʻene fakaafé.​—Fakafehoanaki mo e Mātiu 28:16 mo e Luke 15:6.

17. ʻOku totonu ke tau fakafeangai fēfē ʻi he maʻu ʻe ha tokotaha ʻikai longomoʻui ʻa e fakatahá?

¹⁷ Fai ha talitali loto-māfana. Naʻe ʻai ʻe Sīsū ʻene kau ākongá ke nau ongoʻi ʻoku talitali lelei kinautolu ʻi heʻenau fetaulakí; naʻá ne tamuʻomuʻa ke lea kiate kinautolu. (Māt. 28:18) ʻE fēfē ʻetau fakafeangai ʻi he haʻu ha tokotaha ʻikai longomoʻui ki he Fale Fakatahaʻangá? ʻOku totonu ke tau tamuʻomuʻa ʻi hono talitali loto-māfana iá. ʻI he kamatá, ʻoku tau hohaʻa nai naʻa ʻikai ke tau ʻilo ʻa e meʻa ke leaʻakí. Ka ʻi he ʻikai ʻai ia ke ne ongoʻi maá, ʻe lava ke tau tala ange ʻoku tau fiefia ke sio kiate ia.

18. ʻE lava fēfē ke tau fakalototoʻaʻi ʻa e kau malanga ʻikai longomoʻuí?

¹⁸ Fai ha fakalototoʻa loto-moʻoni. Ko e kau ākonga ʻa Sīsuú ʻoku ngalingali naʻa nau ongoʻi lōmekina ʻi he fekau ke malanga ki he kotoa ʻo e māmaní. Naʻe fakalototoʻaʻi ʻe Sīsū hono kau muimuí ʻaki ʻene pehē: “ʻOku ou ʻiate kimoutolu ʻi he ʻaho kotoa pē.” (Māt. 28:20) Naʻe ola lelei eni? ʻIo. Hili pē ia, naʻa nau femoʻuekina ʻi he “faiako mo hono talaki ʻa e ongoongo lelei.” (Ngā. 5:42) ʻOku fiemaʻu foki ʻe he kau malanga ʻikai longomoʻuí ha fakalototoʻa. Te nau ongoʻi lōmekina nai ʻi he fakakaukau atu ki he toe foki ʻo malangá. ʻE lava ke tau fakalototoʻaʻi kinautolu heʻikai ke nau malanga ʻiate kinautolu pē. ʻI heʻenau mateuteú, ʻe lava ke tau ʻalu mo kinautolu ʻi he ngāue fakafaifekaú. ʻOku ʻikai ha veiveiua te nau houngaʻia ʻi heʻetau poupou ki heʻenau kamata ke toe malangaʻi ʻa e ongoongo leleí. ʻI heʻetau vakai mo fakafeangai ki he faʻahinga ʻikai longomoʻuí ko hotau fanga tokoua mo e fanga tuofāfine, te tau vakai nai ai ki ha ngaahi ola fakalotomāfana ʻi heʻetau fakatahaʻangá.

19. Ko e hā ʻetau holi loto-moʻoní, pea ko e hā hono ʻuhingá?

¹⁹ Ko e hā hono fuoloa ʻetau hokohoko atu ke ngaohi ākongá? ʻE hokohoko atu ʻo aʻu ki he fakaʻosiʻosi ʻo e fokotuʻutuʻu lolotongá. (Māt. 28:20; sio ki he Lea mo Hono ʻUhinga, “Fakaʻosiʻosi ʻo e fokotuʻutuʻu lolotonga.”) ʻE lava ke tau fakahoko ʻa e konga ko eni ʻo e fekau ʻa Sīsuú? ʻOku tau fakapapauʻi ke fai pehē! ʻOku tau foaki fiefia atu hotau taimí, iví mo e koloá ke kumi ki he “faʻahinga kotoa pē [ʻoku] hehema totonu ki he moʻui taʻengatá.” (Ngā. 13:48) ʻI heʻetau fai ení, ʻoku tau muimui ai ki he faʻifaʻitakiʻanga ʻa Sīsuú. Naʻá ne pehē: “Ko ʻeku meʻakaí ē ke fai ʻa e finangalo ʻo ia naʻá ne fekau mai aú pea ke fakaʻosi ʻene ngāué.” (Sione 4:34; 17:4) Ko ʻetau holi loto-moʻoní ia. ʻOku tau loto ke fakaʻosi ʻa e ngāue kuo tuku mai kiate kitautolú. (Sione 20:21) Pea ʻoku tau loto ke kātaki fakataha mo e niʻihi kehé, kau ai ʻa e faʻahinga ʻikai longomoʻuí, ʻi he ngāue ko ení.​—Māt. 24:13.

20. Fakatatau ki he Filipai 4:13, ko e hā ʻe lava ke tau fakahoko ai ʻa e ngāue naʻe fekau mai ʻe Sīsū ke tau faí?

²⁰ Ko hono moʻoní, ko hono fakahoko ʻa e fekau lahi ʻa Sīsuú ʻe hoko ko ha pole. Neongo ia, ʻoku ʻikai ke tau fai toko taha ʻa e ngāué ni. Naʻe talaʻofa ʻe Sīsū te ne ʻiate kitautolu. ʻOku tau fakahoko ʻa e vāhenga-ngāue ke ngaohi ākongá ko e ‘kau kaungāngāue kitautolu ʻo e ʻOtuá’ pea “ʻi he fāʻūtaha mo Kalaisi.” (1 Kol. 3:9; 2 Kol. 2:17) Ko ia ai, ʻe lava ke tau fakahoko ia. Ko ha monū ia mo ha meʻa fakafiefia ke fakahoko ʻa e vāhenga-ngāue ko ení pea tokoniʻi ʻa e niʻihi kehé ke nau fai ʻa e meʻa tatau!​—Lau ʻa e Filipai 4:13.