Sīsū Kalaisi​—Ko e Mīsaia Naʻe Talaʻofa Maí

KE TOKONIʻI kitautolu ke ʻiloʻi ʻa e Mīsaiá, naʻe fakamānavaʻi ʻe Sihova ko e ʻOtuá ʻa e kau palōfita tokolahi ʻi he Tohi Tapú ke nau ʻomai ʻa e ngaahi fakaikiiki fekauʻaki mo e ʻaloʻi, ko e ngāue fakafaifekau pea mo e pekia ʻa e Tokotaha-Faifakahaofi ko eni naʻe talaʻofa maí. Ko e ngaahi kikite Fakatohitapu kotoa ko ení naʻe fakahoko ia ʻia Sīsū Kalaisi. ʻOku nau totonu pea ʻi he tuʻunga fakaikiiki fakaofo. Ke fakatātaaʻi ení, tau vakai angé ki ha ngaahi kikite siʻi ʻa ia naʻe tomuʻa tala ai ʻa e ngaahi meʻa naʻe felāveʻi mo e ʻaloʻi pea mo e tuʻunga kei siʻi ʻo e Mīsaiá.

Naʻe tomuʻa tala ʻe he palōfita ko ʻAiseá ko e Mīsaiá ʻe hoko ia ko ha hako ʻo Tuʻi Tēvita. (Aisea 9:7) Naʻe ʻaloʻi moʻoni mai ʻa Sīsū ʻi he laine ʻo Tēvitá.—Mātiu 1:​1, 6-17.

Ko Maika, ko ha palōfita ia ʻe taha ʻa e ʻOtuá, naʻá ne tomuʻa tala ko e tamá ni ʻe faifai pē peá ne hoko ko ha pule pea ʻe ʻaloʻi ia ʻi “Petelihema Efalata.” (Maika 5:2) ʻI he taimi ʻo e ʻaloʻi ʻo Sīsuú, naʻe ʻi ai ʻa e ongo kolo ʻe ua ʻi ʻIsileli naʻe ui ko Pētelihema. Ko e taha naʻe tuʻu ia ʻo ofi ki Nasaleti ʻi he vahefonua fakatokelau ʻo e fonuá, pea ko e tahá, naʻe ofi ia ki Selusalema ʻi Siuta. Ko e Pētelihema ofi ki Selusalemá naʻe ui ia ki muʻa ko ʻEfalata. Naʻe ʻaloʻi ʻa Sīsū ʻi he kolo ko iá, ʻo hangē tofu pē ko e meʻa naʻe tomuʻa tala ʻe he kikité!—Mātiu 2:1.

Naʻe tomuʻa tala ʻe he kikite Fakatohitapu ʻe taha ko e ʻAlo ʻo e ʻOtuá ʻe ui ia “mei Isipite.” Ko e tama ko Sīsuú naʻe ʻave ia ki ʻIsipite. Naʻe fakafoki ia mei ai hili ʻa e pekia ʻa Hēlotá, ʻo fakahoko ai ʻa e kikité.—Hosea 11:1; Mātiu 2:15.

ʻI he saati “Ngaahi Kikite Fekauʻaki mo e Mīsaiá,” ko e ngaahi konga Tohi Tapu ʻoku fakahokohoko ʻi lalo ʻi he kaveinga “Kikité” ʻoku ʻi ai ʻa e ngahi fakaikiiki ʻo fekauʻaki mo e Mīsaiá. Kātaki ʻo fakahoa ʻa e ngaahi meʻá ni mo e ngaahi konga Tohi Tapu ʻoku fakahokohoko ʻi lalo ʻi he kaveinga “Fakahokó.” Ko hono fai iá ʻe fakaivimālohiʻi lahi ange ai hoʻo tui ki he moʻoni ʻo e Folofola ʻa e ʻOtuá.

Lolotonga hoʻo sivisiviʻi ʻa e ngaahi konga Tohi Tapu ko ení, manatuʻi ko e ngaahi konga Tohi Tapu ko ia ʻoku natula fakaekikité naʻe tohi ia ʻi he ngaahi taʻu ʻe laui teau ki muʻa ʻi hono ʻaloʻi ʻo Sīsuú. Naʻe fakahaaʻi ʻe Sīsū: “Kuo pau ke hoko ʻa e ngaahi meʻa kotoa pe kuo tohi kiate au ʻi he Lao ʻa Mosese, mo e Tohi Palofita, mo e Tohi Same.” (Luke 24:44) Hangē ko ia ʻoku lava ke ke fakapapauʻi ʻi hoʻo tatau Tohi Tapú tonu, naʻe fakahoko moʻoni kinautolu—ʻi he tuʻunga fakaikiiki kotoa pē!