ʻOtuá mo Sisa

“ʻAua; peʻi ʻange kia Sisa ʻa e ngaahi meʻa ʻa Sisa, pea ki he ʻOtua ʻa e ngaahi meʻa ʻa e ʻOtua.”​—LUKE 20:25.

 1. (a) Ko e hā ʻa e tuʻunga māʻolunga ʻo Sihová? (e) Ko e hā ʻoku tau moʻuaʻaki kia Sihova ʻa ia heʻikai ʻaupito malava ke tau ʻoange ia kia Sisa?

ʻI HE taimi naʻe fai ai ʻe Sīsū Kalaisi ʻa e fakahinohino ko iá, naʻe ʻikai ha toe veiveiua ʻi hono ʻatamaí ko e ngaahi fiemaʻu ʻa e ʻOtuá mei heʻene kau sevānití ʻoku muʻomuʻa ia ʻi ha meʻa pē ʻoku fiemaʻu nai ʻe Sisa, pe ko e Puleʻangá, meiate kinautolu. Naʻe ʻiloʻi lelei ange ʻe Sīsū ʻi ha toe taha kehe ʻa e moʻoni ʻo e lotu ʻa e tokotaha-tohi-sāmé kia Sihová: “Ko ho puleʻanga ko e puleʻanga ʻo e ngaahi kuonga kotoa, pea ko ho hau ʻoku fai mei he toʻutangata ki he toʻutangata.” (Sāme 145:13) ʻI he taimi naʻe tuʻuaki ange ai ʻe he Tēvoló kia Sīsū ʻa e pule ki he ngaahi puleʻanga kotoa ʻo e māmani ʻoku nofoʻí, naʻe tali ange ʻe Sīsū: “Kuo tohi, Te ke lotu ki he ʻEiki ko ho ʻOtua, pea ko ia pē toko taha te ke ʻotuaʻaki.” (Luke 4:​5-8) Heʻikai ʻaupito lava ke fai ʻa e lotú kia “Sisa,” tatau ai pē ʻa Sisa ko e ʻemipola Lomá, ko ha niʻihi kehe ʻi he kau pule fakaetangatá, pe ko e Puleʻangá tonu.

 2. (a) Ko e hā ʻa e tuʻunga ʻo Sētane ʻi he fekauʻaki mo e maama ko ʻení? (e) Ko e ngofua meia hai ʻoku tuʻu ai ʻa Sētane ʻi hono tuʻungá?

² Naʻe ʻikai ke fakaʻikaiʻi ʻe Sīsū ia ʻa e ʻia Sētane ʻa e ngaahi puleʻanga ʻo e māmaní. Ki mui mai, naʻá ne ui ʻa Sētane ko e “ʻeiki ʻo e maama ko eni.” (Sione 12:31; 16:11) ʻI he ofi ke ngata ʻa e ʻuluaki senituli T.S., naʻe tohi ʻe he ʻaposetolo ko Sioné: “ʻOku tau lāuʻilo ko e tupu mei he ʻOtua ʻa kitautolu, pea ko hono kotoa ʻo mamani ʻoku ʻi he nima ʻo e Fili.” (1 Sione 5:19) ʻOku ʻikai ke ʻuhinga ʻeni ia kuo tuku mai ʻe Sihova ia ʻa hono tuʻunga-haú ki he foʻi māmaní. Manatuʻi naʻe pehē ʻe Sētane, ʻi heʻene tuʻuaki ange kia Sīsū ʻa e tuʻunga-pule ki he ngaahi puleʻanga fakapolitikalé: “Te u foaki kiate koe ʻa e pule ki he ngaahi meʻa ni kotoa . . . he kuo tuku ia kiate au.” (Luke 4:6) ʻOku puleʻi pē ʻe Sētane ia ʻa e ngaahi puleʻanga ʻo e māmaní ko hono fakangofua ʻe he ʻOtuá.

 3. (a) Ko e hā ʻa e tuʻunga ʻoku maʻu ʻe he ngaahi founga-pule ʻo e ngaahi puleʻangá ʻi he ʻao ʻo Sihová? (e) ʻOku anga-fēfē ʻa e malava ke tau pehē ko e moʻulaloa ki he ngaahi founga-pule ʻo e maama ko ʻení ʻoku ʻikai ke ʻuhinga ai ia ʻoku tau moʻulaloa kia Sētane, ko e ʻotua ʻo e maama ko ʻení?

³ ʻI he tuʻunga meimei tatau, ʻoku ngāueʻi ʻe he Puleʻangá ʻa hono mafaí koeʻuhi pē ko e ʻOtuá ʻi hono tuʻunga ko e Pule Aoniú ʻokú ne fakangofua ia ki ai. (Sione 19:11) Ko ia, “ko e ngaahi pule ʻoku ʻi ai ni” ʻoku lava ke pehē “ko e fokotuʻu ʻe he ʻOtua.” ʻI he fekauʻaki mo e mafai aoniu taupotu ʻo Sihová, ʻoku mātuʻaki siʻisiʻi ange hoʻonautolú ia. Kae kehe, ko kinautolú ko e “sevaniti ia ʻa e ʻOtua,” “ko e kau fai ʻo e ngaue tapu ʻa e ʻOtua,” ʻo nau fakahoko mai ai ʻa e ngaahi ngāue ʻoku mātuʻaki fiemaʻú, tauhi maʻu ʻa e laó mo e maaú, pea tautea ʻa e kau faikoví. (Loma 13:​1, 4, 6) Ko ia, ʻoku fiemaʻu ki he kau Kalisitiané ke mahino kiate kinautolu neongo ko Sētané ko e pule taʻehāmai ia ʻo e maama ko ʻení, pe fokotuʻutuʻú ni, ʻoku ʻikai te nau moʻulaloa kinautolu kiate ia ʻi he taimi ʻoku nau fai ai ʻenau moʻulaloa fakangatangata ki he Puleʻangá. ʻOku nau talangofua ai ki he ʻOtuá. ʻI he taʻú ni, 1996, ʻoku kei hoko ʻa e Puleʻanga fakapolitikalé ko ha konga ʻo e “tuʻutuʻuni ʻa e ʻOtua,” ko ha fokotuʻutuʻu fakataimi ʻoku fakangofua ʻe he ʻOtuá ke kei ʻi aí ni, pea ʻoku totonu ke tokaʻi ia ʻe he kau sevāniti fakaemāmani ʻa Sihová.​—Loma 13:2.

Kau Sevāniti ʻa Sihova ʻi Onoʻahó mo e Puleʻangá

 4. Ko e hā naʻe fakaʻatā ai ʻe Sihova ʻa Siosifa ke ne hoko ʻo tuʻu-ki-muʻa ʻi he puleʻanga ʻo ʻIsipité?

⁴ ʻI he ngaahi taimi ki muʻa ʻi he Kalisitiané, naʻe fakangofua ai ʻe Sihova ha niʻihi ʻo ʻene kau sevānití ke nau ngāue ʻi he ngaahi tuʻunga māʻolunga ʻi he ngaahi ngāue ʻa e Puleʻangá. Ko e fakatātaá, ʻi he senituli hono 18 K.M., naʻe hoko ai ʻa Siosifa ko e palēmia ʻo ʻIsipite, ko e hoko atu ia ki he pule fakatuʻi ʻa Feló. (Sēnesi 41:​39-​43) ʻI he ngaahi meʻa naʻe hoko ki mui aí naʻe hā mahino mei ai naʻe fokotuʻutuʻu ʻe Sihova ʻa e meʻá ni kae lava ke ngāue ʻa Siosifa ko ha meʻangāue ia ki hono fakatolonga mai ʻa e ‘hako ʻo ʻĒpalahamé,’ hono ngaahi hakó, ke fakahoko ai ʻa ʻEne ngaahi taumuʻá. Ko hono moʻoní, ʻoku totonu ke manatuʻi naʻe fakatau ʻa Siosifa ʻo hoko ʻo nofo pōpula ʻi ʻIsipite, pea naʻá ne moʻui ʻi ha taimi naʻe ʻikai ke maʻu ai ʻe he kau sevāniti ʻa e ʻOtuá ʻa e Lao ʻia Mōsesé pe ko e “lao ʻa Kalaisi.”​—Sēnesi 15:​5-7; 50:​19-​21; Kalētia 6:2.

 5. Ko e hā naʻe fekau ai ki he kau Siu naʻe fakaheeʻí ke nau “kumi ki he melino” ʻo Pāpiloné?

⁵ ʻI he laui senituli mei ai naʻe fakamānavaʻi ai ʻe Sihova ʻa e palōfita ko Selemaiá ke ne tala ki he kau Siu naʻe fakaheeʻí ke nau moʻulaloa ki he kau pulé ʻi he taimi naʻe fakaheeʻi ai ʻi Pāpiloné pea ke nau lotu foki ki ha melino ʻi he kolo ko iá. ʻI heʻene tohi kiate kinautolú, naʻá ne tohi ai: “Oku pehe e Jihova oe gaahi kau tau, koe Otua o Isileli, kiate kinautolu kotoabe kuo fetuku fakabobula, . . . Kumi ke melino ae kolo aia kuou buleʻi ke fetuku fakabobula akimoutolu ki ai, bea hufia ia kia Jihova: he te mou maʻu ae fiemalie i hono melino.” (Selemaia 29:​4, 7, PM) ʻOku maʻu ʻi he taimi kotoa pē ʻe he kakai ʻa Sihová ʻa e ʻuhinga ke “kumi ki he melino” kiate kinautolu mo e fonua ʻoku nau nofo aí, ke maʻu ʻa e tauʻatāina ke lotu ai kia Sihová.​—1 Pita 3:​11.

 6. Neongo naʻe ʻoange ʻa e ngaahi tuʻunga fakapuleʻanga māʻolunga, ʻi he ngaahi founga fē naʻe fakafisi ai ʻa Tāniela mo hono ngaahi kaungāmeʻa ʻe toko tolú ke ʻoua te nau fakavaivai ʻi he fekauʻaki mo e Lao ʻa Sihová?

⁶ ʻI he lolotonga ʻa e fakaheeʻi ʻi Pāpiloné, naʻe anganofo ai ʻa Tāniela mo e kau Siu anga-tonu kehe ʻe toko tolu ʻa ia naʻa nau kau he nofo pōpula ʻi Pāpiloné ki ha ako mei he Puleʻangá pea nau hoko ai ko ha kau sevāniti ngāue fakapuleʻanga lakanga māʻolunga ʻi Pāpilonia. (Tāniela 1:​3-7; 2:​48, 49) Kae kehe, naʻa mo e lolotonga ʻo ʻenau akó, naʻa nau tuʻumaʻu mālohi ai ʻi he meʻa fekauʻaki mo e meʻakaí ʻa ia naʻe mei malava ke taki ai kinautolu ki hano maumauʻi ʻa e Lao ʻa ia naʻe hanga ʻe honau ʻOtuá, ko Sihova, ʻo tokonaki ʻo fakafou mai ʻia Mōsesé. Naʻe tāpuakiʻi kinautolu ʻi he meʻá ni. (Tāniela 1:​8-​17) ʻI hono fokotuʻu ʻe Tuʻi Nepukanesa ha fuʻu ʻīmisi Fakapuleʻanga, ʻoku hā mahino naʻe fakamālohiʻi ʻa e ngaahi kaungāmeʻa Hepelū ʻe toko tolu ʻo Tānielá ke nau ʻi he kātoangá fakataha mo honau ngaahi kaungāpule ngāue ʻi he Puleʻangá. Ka neongo ia, naʻa nau fakafisi ke “foʻohifo ʻo lotu” ki he ʻaitoli ʻo e Puleʻangá. Naʻe toe fakapaleʻi mo ʻenau anga-haohaoá. (Tāniela 3:​1-6, 13-​28) ʻOku meimei tatau pē ʻi he ʻahó ni, ʻoku tokaʻi ʻe he Kau Fakamoʻoni ʻa Sihová ʻa e fuka ʻo e fonua ʻoku nau nofo aí, ka heʻikai te nau fai ha faʻahinga tōʻonga lotu ki ai.​—ʻEkisoto 20:​4, 5; 1 Sione 5:​21.

 7. (a) Ko e hā ʻa e foʻi laka lelei naʻe fai ʻe Tānielá, neongo hono maʻu ha tuʻunga māʻolunga ʻi he faʻunga fakapuleʻanga ʻo Pāpiloné? (e) Ko e hā ʻa e ngaahi liliu naʻe hoko mai nai ʻi he ngaahi taimi ʻo e Kalisitiané?

⁷ ʻI he hili ʻa e tō ʻa e haʻa tuʻi Neo-Pāpiloné, naʻe foaki ai kia Tāniela ha tuʻunga lakanga fakapuleʻanga māʻolunga ʻi he malumalu ʻo e pule foʻou ʻa Mītia mo Pēsiá ʻa ia naʻá ne fetongi ʻa e pule ʻi Pāpiloné. (Tāniela 5:​30, 31; 6:​1-3) Ka naʻe ʻikai te ne fakaʻatā ʻa hono tuʻunga māʻolungá ke ne taki ia ke fakangaloku ai ʻa ʻene anga-haohaoá. ʻI he taimi naʻe fiemaʻu ai ʻe he lao ʻa e Puleʻangá ke ne lotu kia Tuʻi Talaiasi kae ʻikai kia Sihová, naʻá ne fakafisi. ʻI he meʻá ni naʻe lī ai ia ki he fanga laioné, ka naʻe fakahaofi ia ʻe Sihova. (Tāniela 6:​4-​24) Ko hono moʻoní, ko e meʻa ʻeni ia ʻi he ngaahi taimi ki muʻa ʻi he Kalisitiané. ʻI hono fokotuʻu ʻo e fakatahaʻanga Kalisitiané, naʻe hoko leva ʻa e kau sevāniti ʻa e ʻOtuá ʻo “ʻi he loto lao ʻa Kalaisi.” Ko e ngaahi meʻa lahi naʻe fakangofua ʻi he malumalu ʻo e fokotuʻutuʻu faka-Siú naʻe pau ke kehekehe ʻa e vakai ki aí, ʻo makatuʻunga ʻi he founga naʻe lolotonga feangai ai ʻa Sihova mo hono kakaí.​—1 Kolinitō 9:​21; Mātiu 5:​31, 32; 19:​3-9.

Fakakaukau ʻa Sīsū ki he Puleʻangá

 8. Ko e hā ʻa e meʻa ʻokú ne fakahaaʻi naʻe fakapapauʻi ʻe Sīsū ke fakaʻehiʻehi mei he kau ki ha meʻa fakapolitikale?

⁸ ʻI he taimi naʻe ʻi māmani ai ʻa Sīsū Kalaisí, naʻá ne fokotuʻu ha ngaahi sīpinga māʻolunga ange ki hono kau muimuí, pea naʻá ne fakafisi mei he kau kotoa ʻi he ngaahi meʻa fakapolitikalé pe fakakautaú. ʻI he hili ʻa ʻene fafanga fakaemana ʻa e kakai ʻe laui afe ʻaki ha ngaahi foʻi mā siʻisiʻi pē mo e kiʻi mataʻi ika ʻe uá, naʻe loto ʻa e kau tangata Siú ke puke ia ʻo ʻai ko ha tuʻi fakapolitikale. Ka naʻe fakamamaʻo ʻa Sīsū meiate kinautolu ʻaki ʻene mavahe fakavave ki he moʻungá. (Sione 6:​5-​15) ʻI he fekauʻaki mo e meʻá ni, ʻoku pehē ʻe he The New International Commentary on the New Testament: “Naʻe ʻi ai ʻa e ngaahi fakaʻamu mālohi fakafonua naʻe ʻi he lotolotonga ʻo e kau Siu ʻo e vahaʻa taimi ko iá, pea ʻoku pau ko e tokolahi ʻo e faʻahinga naʻa nau sio ki he mana ko ʻení naʻa nau fakakaukau ko ha tokotaha taki ʻeni naʻe fakamafaiʻi mei he ʻOtuá, ʻa ia ko e tokotaha ia ke ne taki kinautolu ʻo fakafepaki ki he kau Lomá. Ko ia naʻa nau fakapapauʻi ai ke ʻai ia ke tuʻi.” ʻOkú ne tānaki mai ʻo pehē “naʻe talitekeʻi fakapapauʻi” ʻe Sīsū ʻa hono tuʻuaki ange ko ʻeni ʻo e tuʻunga-taki fakapolitikalé. Naʻe ʻikai ha poupou ʻe taha ʻa Kalaisi ki ha angatuʻu ʻa e kau Siú ki he pule ʻa Lomá. Ko hono moʻoní, naʻá ne tala ki muʻa, ʻa e meʻa ʻe iku ki ai ʻa e angatuʻu ʻe hoko ʻi he hili ʻa ʻene pekiá​—ko e ngaahi faingataʻa taʻemafakafuofua ki he kau nofo ʻo Selusalemá pea mo e fakaʻauha ʻo e fuʻu kolo ko iá.​—Luke 21:​20-​24.

 9. (a) Naʻe anga-fēfē ʻa hono fakamatalaʻi ʻe Sīsū ʻa e kaunga ʻo hono Puleʻangá ki he māmaní? (e) Ko e hā ʻa e tataki naʻe ʻoange ʻe Sīsū ki hono kau muimuí ʻi he fekauʻaki mo ʻenau ngaahi fakafeangai ki he ngaahi founga-pule ʻo e māmaní?

⁹ Ki muʻa siʻi peá ne pekiá, naʻe tala ʻe Sīsū ki he fakafofonga makehe ʻo e ʻemipola Lomá ʻi Siutea: “Ko hoku puleʻanga ʻoku ʻikai ʻo e maama ko eni: ka ne ʻo e maama ko eni ʻa hoku puleʻanga, pehē ʻe tau haʻaku kau ʻofisa ke taʻofi hoku tukuange ki haʻa Siu: ka ko eni, ko hoku puleʻanga ʻoku ʻikai ʻo ʻeni.” (Sione 18:36) ʻOku muimui ʻa e kau ākonga ʻa Kalaisí ki heʻene faʻifaʻitakiʻangá ke aʻu ki hono ʻai ʻe hono Puleʻangá ha ngataʻanga ki he pule ʻa e ngaahi founga-pule fakapolitikalé. ʻOku nau talangofua ki he kau maʻu mafai kuo fokotuʻú ka ʻoku ʻikai te nau kaunoa ʻi heʻenau ngaahi ngāue fakapolitikale ʻoku faí. (Tāniela 2:​44; Mātiu 4:​8-​10) Naʻe tuku mai ʻe Sīsū ha ngaahi fakahinohino ki heʻene kau ākongá, ʻo pehē: “Peʻi ʻange kia Sisa ʻa e ngāhi meʻa ʻa Sisa; pea ki he ʻOtua ʻa e ngāhi meʻa ʻa e ʻOtua.” (Mātiu 22:21) Ki muʻa aí, ʻi heʻene Malanga ʻi he Moʻungá, naʻe pehē ai ʻe Sīsū: “Ka fakafatongia koe ʻe ha talafekau ke ke ʻave ia ʻi ha maile ʻe taha, pea mole mo ia ʻo maile ua.” (Mātiu 5:41) ʻI he potutohi ʻo e malanga ko ʻení, naʻe fakatātaaʻi ai ʻe Sīsū ʻa e tefitoʻi moʻoni ʻo e moʻulaloa loto-lelei ki he ngaahi tuʻutuʻuni ʻoku totonú, tatau ai pē ʻi he ngaahi vā fakaetangatá pe ʻoku ʻi he ngaahi fiemaʻu fakapuleʻanga ʻa ia ʻoku fehoanaki mo e lao ʻa e ʻOtuá.​—Luke 6:​27-​31; Sione 17:​14, 15.

Kau Kalisitiané mo Sisa

10. Fakatatau ki ha faihisitōlia ʻe taha, ko e hā ʻa e tuʻunga loto-tōnunga naʻe maʻu ʻe he muʻaki kau Kalisitiané ʻi he fekauʻaki mo Sisá?

¹⁰ Ko e ngaahi fakahinohino nounoú ni ke ne puleʻi ʻa e vahaʻangatae ʻo e kau Kalisitiané pea mo e Puleʻangá. ʻI heʻene tohi ko e The Rise of Christianity, naʻe tohi ai ʻe he faihisitōlia ko E. W. Barnes: “ʻI ha taimi pē, ʻi he ngaahi senituli naʻe hoko atu aí, ko ha Kalisitiane naʻe veiveiua fekauʻaki mo hono ngafa ki he Puleʻangá, naʻá ne hanga ki he akonaki maʻu mafai ʻa Kalaisí. Te ne totongi ʻa e ngaahi tukuhaú: ko e ngaahi totongi naʻe tukupaú naʻe mamafa nai​—naʻe hoko ia ʻo ʻikai ala matuʻuaki ʻi he ki muʻa ke tō ʻa e ʻEmipaea ʻo e Hihifó​—ka naʻe kei fua pē ia ʻe he Kalisitiané. Te ne kei tali pehē pē mo e ngaahi ngafa kehe kotoa ki he Puleʻangá, kehe pē ke ʻoua naʻá ne ʻave kia Sisa ʻa e ngaahi meʻa ʻoku ʻa e ʻOtuá.”

11. Naʻe anga-fēfē hono akonakiʻi ʻe Paula ʻa e kau Kalisitiané ke nau feangai mo e kau pule fakaemāmaní?

¹¹ Naʻe fehoanaki mo ʻeni ʻa e meʻa naʻe tala ʻe he ʻaposetolo ko Paulá ki he kau Kalisitiane ʻi Lomá, ʻi he hili ʻa e taʻu ʻe 20 mei he pekia ʻa Kalaisí: “Ke anganofo ʻa e tangata kotoa pe ki he ngaahi pule ʻoku maʻolunga.” (Loma 13:1) ʻI he taʻu nai ʻe hongofulu mei ai, ki muʻa siʻi ʻi hono tuku pilīsone ia hono uá pea mo hono tautea mate ia ʻi Lomá, naʻe tohi ʻa Paula kia Taitusi: “Fakamanatu kiate kinautolu [kau Kalisitiane Kēlití] ke nau anganofo ki he ngaahi pule maʻolunga, mo e ngaahi tuʻunga; ke nofo talangofua pe; ke nofo teu ki he ngaue lelei kotoa pe: ke ʻoua te nau lauʻikovi ha taha: ke ʻoua naʻa ko e kau veipā, ka ko e kau fakaʻatūʻi pe, ʻo matuʻaki faiʻaki ʻa e angakataki ki he kakai kotoa pe.”​—Taitusi 3:​1, 2.

Fakalakalaka ʻa e Mahino Fekauʻaki mo e “Ngaahi Mafai Māʻolunga”

12. (a) Ko e hā ʻa e fakakaukau ʻa Charles Taze Russell ʻo fekauʻaki mo e tuʻunga totonu ʻo ha Kalisitiane ʻi he fekauʻaki mo e ngaahi mafai fakapuleʻangá? (e) Fekauʻaki mo e ngāue ki he taú, ko e hā ʻa e ngaahi fakakaukau kehekehe naʻe maʻu ʻe he kau Kalisitiane paní ʻi he lolotonga ʻo e Tau I ʻa Māmaní?

¹² ʻI he 1886 pē, naʻe tohi ai ʻa Charles Taze Russell ʻi he tohi ko e The Plan of the Ages: “Naʻe ʻikai ke kaunoa ʻa Sīsū pe ko ʻene kau ʻaposetoló ki he kau pule fakaemāmaní ʻi ha faʻahinga founga. . . . Naʻa nau akoʻi ʻa e Siasí ke talangofua ki he ngaahi laó, pea ke tokaʻi ʻa e faʻahinga ʻoku maʻu mafaí koeʻuhi ko honau lakangá, . . . ke totongi ʻenau ngaahi tukuhau ʻoku vaheʻi maí, pea tuku kehe kapau ʻoku fepaki ʻa e ngaahi laó ia mo e ngaahi lao ʻa e ʻOtuá (Ngāue 4:​19; 5:​29) ke ʻoua naʻa talitekeʻi ha lao kuo fokotuʻu. (Loma 13:​1-7; Mt. 22:21) Naʻe tauhi-lao kotoa ʻa Sīsū mo ʻene kau ʻAposetoló mo e muʻaki siasí, neongo naʻa nau mavahe, mo ʻikai ke hoko ko ha konga ʻo e ngaahi puleʻanga ʻo e māmani ko ʻení.” Naʻe fakahaaʻi totonu ʻe he tohí ni “ʻa e ngaahi pule ʻoku maʻolunga,” pe “ngaahi mafai māʻolunga,” ʻa ia naʻe lave ki ai ʻa e ʻaposetolo ko Paulá, ko e ngaahi mafai fakapuleʻangá ia. (Loma 13:​1, NW) ʻI he 1904 naʻe fakahā ʻi he tohi ko e The New Creation ʻo pehē ko e kau Kalisitiane moʻoní “ʻoku totonu ke nau kau ʻi he lotolotonga ʻo e kau tauhi-lao lahi taha ʻo e taimi lolotonga ní​—ʻikai ko e kau hohaʻa tuʻu, ʻikai ke kē, ʻikai ko e kau lau mele.” Ko e meʻa ʻeni naʻe mahino ki he niʻihi ʻoku ʻuhinga ki ai ʻa e moʻulaloa kakato ki he ngaahi pulé, ʻoku aʻu ki he tuʻunga ko hono tali ha ngāue ki he kau taú ʻi he lolotonga ʻo e Tau I ʻa Māmaní. Kae kehe, naʻe vakai ki ai ʻa e niʻihi ia ʻoku fepaki ia mo e lea ʻa Sīsuú: “ʻIlonga kinautolu ʻoku ala ki he heletā te nau mate heletā.” (Mātiu 26:52) ʻOku hā mahino, naʻe fiemaʻu ha mahino māʻalaʻala ange fekauʻaki mo e moʻulaloa ʻa e Kalisitiané ki he ngaahi mafai māʻolungá.

13. Ko e hā ʻa e liliu ʻi he mahino fekauʻaki mo e tuʻunga ʻo e ngaahi pule ʻoku māʻolungá naʻe fakahoko mai ʻi he 1929, pea naʻe anga-fēfē ʻa hono fakamoʻoniʻi ʻa e ʻaonga ʻa e meʻá ni?

¹³ ʻI he 1929, ʻi he taimi naʻe kamata ai ʻa e ngaahi lao ʻa e ngaahi puleʻanga kehekehe ke tapui ʻa e ngaahi meʻa ʻoku fekau ʻe he ʻOtuá pea tuʻutuʻuni ʻa e ngaahi meʻa ʻoku tapui ʻe he ngaahi lao ʻa e ʻOtuá, naʻe ʻi ai ʻa e fakakaukau ia ko e ngaahi pule ʻoku māʻolungá kuo pau pē ko Sihova ko e ʻOtuá mo Sīsū Kalaisi.a Ko e mahino ia naʻe maʻu ʻe he kau sevāniti ʻa Sihová ʻi he lolotonga ʻo e vahaʻa taimi mahuʻinga ki muʻa mo e lolotonga ʻo e Tau II ʻa Māmaní pea hoko mai ai pē ki he Tau Fakamanamaná, mo ʻene fakakaukau ke palanisi ʻa e manavahēʻangá, mo ʻene mateuteu fakakautaú. ʻI he sio atu ki muí, kuo pau ke pehē ko e anga ʻo e vakai ko ʻení, naʻe hakeakiʻi ai ʻa e māʻolunga taupotu ʻa Sihová mo ʻene Kalaisí, pea tokoniʻi ai ʻa e kakai ʻa e ʻOtuá ke tauhi maʻu ha tuʻunga tuʻuʻatā taʻefakavaivai ʻi he kotoa ʻo e vahaʻa taimi faingataʻá ni.

Anganofo Fakangatangata

14. Ko e hā ʻa e maama fakalakalaka naʻe huhulu mai ki he Loma 13:​1, 2 mo e ngaahi konga Tohitapu fekauʻaki mo iá ʻi he 1962?

¹⁴ ʻI he 1961 naʻe kakato ai ʻa e New World Translation of the Holy Scriptures. Ko hono teuteu iá naʻe fiemaʻu ki ai ʻa hono ako fakaʻāuliliki ʻa e muʻaki lea naʻe hiki ai ʻa e ngaahi Konga Tohitapú. Ko e liliu lea totonu ʻo e ngaahi foʻi leá naʻe ngāueʻaki ia ʻo ʻikai ngata pē ʻi he Loma vahe 13 ka ʻoku toe pehē foki ʻi he ngaahi konga tohi hangē ko Taitusi 3:​1, 2 mo e 1 Pita 2:​13, 17 ʻo ʻai ʻo hā mahino ai ko e kupuʻi lea ko e “ngaahi mafai māʻolunga” naʻe ʻikai ʻuhinga ki he Mafai Māʻolunga Taupotú, ko Sihova mo hono ʻAlo, ko Sīsū, ka ko e ngaahi mafai fakapuleʻanga fakaetangatá. ʻI he konga ki mui ʻo e 1962, naʻe pulusi ai ha ngaahi kupu ʻi he The Watchtower ʻo ne ʻomai ha fakamatala totonu ʻo e Loma vahe 13 pea tokonaki mai foki ha fakakaukau māʻalaʻala ange ia ʻi he fakakaukau naʻe maʻu ʻi he taimi ʻo C. T. Russell. Naʻe fakahaaʻi ʻe he ngaahi kupú ni ko e moʻulaloa ʻa e Kalisitiané ki he kau maʻu mafai māʻolungá heʻikai ke fakaʻaufuli ia. Kuo pau ke fakangatangata ia, ko e moʻulaloa ki aí heʻikai te ne ʻai ai ʻa e kau sevāniti ʻa e ʻOtuá ke nau fepaki mo e ngaahi lao ʻa e ʻOtuá. Kuo toe fakamamafaʻi ʻe ha toe ngaahi kupu ʻi he The Watchtower ʻa e poini mahuʻinga ko ʻení.b

15, 16. (a) Ko e hā ʻa e fakakaukau mafamafatatau lelei ange naʻe taki atu ki ai ʻa e mahino foʻou fekauʻaki mo e Loma vahe 13? (e) Ko e hā ʻa e ongo fehuʻi ʻoku kei toe ke talí?

¹⁵ Ko e kī ko ʻeni ki he mahino totonu ʻo e Loma vahe 13 kuó ne fakaivia ʻa e kakai ʻa Sihová ke ʻai ke mafamafatatau ʻa e fakaʻapaʻapa ʻoku totonu ke fai ki he ngaahi mafai fakapolitikalé mo tuʻu taʻefakavaivai ʻi ha ngaahi tefitoʻi moʻoni Fakatohitapu mātuʻaki mahuʻinga. (Sāme 97:11; Selemaia 3:​15) Kuó ne fakaʻatā kinautolu ke nau maʻu ha vakai totonu ki honau vahaʻangatae mo e ʻOtuá pea mo ʻenau ngaahi fakafeangainga ki he Puleʻangá. Kuó ne fakapapauʻi ko e lolotonga ko ia ʻo ʻenau ʻange ʻa e ngaahi meʻa ʻa Sisá kia Sisá, ʻoku ʻikai te nau siʻaki ai ʻa hono ʻange ki he ʻOtuá ʻa e ngaahi meʻa ʻa e ʻOtuá.

¹⁶ Ka ko e hā ʻa e ngaahi meʻa totonu ʻa Sisá? Ko e hā ʻa e ngaahi tuʻutuʻuni fakalao ʻoku lava ke ʻekeʻi ʻe he Puleʻangá mei ha Kalisitiane? Ko e ongo fehuʻí ni ʻe lāulea ki ai ʻi he kupu hono hoko maí.

[Fakamatala ʻi lalo]

Ko e meʻa ʻoku fakatupu tokangá, ʻi heʻene fakamatala ki he Loma vahe 13, ʻoku tohi ai ʻa Palōfesa F. F. Bruce ʻo pehē: “ʻOku hā mahino mei hono muʻaki potutohí, ʻo hangē ko e potutohi fakakātoa ʻo e ngaahi tohi naʻe hiki ʻe he kau ʻaposetoló, ʻoku lava ke maʻu totonu ʻe he puleʻangá ʻa e talangofuá ʻi loto pē ʻi he ngaahi ngataʻanga ʻo e ngaahi taumuʻa naʻe fokotuʻu ki ai ia ʻe he ʻOtuá​—tautefito, heʻikai ke talitekeʻi pē nai ʻa e puleʻangá ka kuo pau ke talitekeʻi ia ʻi he taimi ʻokú ne tuʻutuʻuni ai ke fai ange ki ai ʻa e mateaki ʻoku totonu ke fai ki he ʻOtuá tokotaha pē.”

ʻE Lava ke Ke Fakamatalaʻi?

◻ Ko e hā ʻoku ʻikai ko ha moʻulaloa ai kia Sētane ʻa e moʻulaloa ki he ngaahi mafai māʻolungá?

◻ Ko e hā ʻa e fakakaukau naʻe maʻu ʻe Sīsū ʻo fekauʻaki mo e ngaahi meʻa fakapolitikale ʻo hono taimí?

◻ Ko e hā ʻa e akonaki naʻe ʻoange ʻe Sīsū ki hono kau muimuí ʻo fekauʻaki mo ʻenau ngaahi fakafeangai kia Sisá?

◻ Naʻe anga-fēfē hono akonakiʻi ʻe Paula ʻa e kau Kalisitiané ke nau feangai mo e kau pule ʻo e ngaahi puleʻangá?

◻ Kuo anga-fēfē ʻa e tupulaki ʻa e mahino fekauʻaki mo e tuʻunga ʻo e ngaahi mafai māʻolungá ʻi he faai atu ʻa e ngaahi taʻú?

[Fakatātā ʻi he peesi 22]

ʻI hono tuʻuaki ange ʻe Sētane kia Sīsū ʻa e pule fakapolitikalé, naʻe ʻikai te ne tali ia

[Fakatātā ʻi he peesi 25]

Naʻe tohi ʻe Russell ʻo pehē ko e kau Kalisitiane moʻoní “ʻoku totonu ke nau kau ʻi he lotolotonga ʻo e kau tauhi-lao lahi taha ʻo e taimi lolotonga ní”