Hanganaki Kumi ʻa e Puleʻangá mo e Māʻoniʻoni ʻa e ʻOtuá
“Ka mou [hanganaki, “NW”] kumi muʻa ki hono puleʻanga, mo e maʻoniʻoni aʻana, pea ʻe ʻatu mo ia foki ʻa e ngāhi meʻa ko ia kotoa.”—MĀTIU 6:33.
1, 2. Naʻe liliu ki he hā ʻe he kau sikalaipé mo e kau Fālesí ʻa e ngaahi ngāue ʻoku lelei pē ia, pea ko e hā ʻa e fakatokanga naʻe fai ʻe Sīsū ki hono kau muimuí?
NAʻE kumi ʻa e kau sikalaipé mo e kau Fālesí ki he māʻoniʻoní ʻi he founga pē ʻanautolu, ʻa ia naʻe ʻikai ko e founga ia ʻa e ʻOtuá. ʻIkai ko ia pē, ka ʻi haʻanau fai ha ngaahi ngāue ʻoku lelei pē ia, naʻa nau fakahoko ia ʻi ha ngaahi founga mālualoi ke mamata ki ai ʻa e tangatá. Naʻa nau tauhi, ʻo ʻikai ki he ʻOtuá, ka ko e pōlepole pē ʻa kinautolu. Naʻe fakatokanga ʻe Sīsū ki heʻene kau ākongá ki he fakangalingali peheé: “Kae vakai, telia naʻa mou fai hoʻomou toʻonga fakalotu [māʻoniʻoni, NW] ke hā ki he kakai, koeʻuhi ke nau siofia kimoutolu; he ka pehe, ʻoku ʻikai haʻamou totongi mei hoʻomou Tamai ʻoku ʻi hevani.”—Mātiu 6:1.
2 ʻOku houngaʻia ʻa Sihova ki he faʻahinga ʻoku nau foaki ki he masivá—kae ʻikai ki he faʻahinga ʻoku nau foaki ʻo hangē ko ia naʻe fai ʻe he kau Fālesí. Naʻe fakatokanga ʻe Sīsū ki heʻene kau ākongá ke ʻoua te nau faʻifaʻitaki ki ai: “Ko ia, ʻo ka ke ka fai ha foaki, ʻoua naʻa ke ifi ha meʻalea ke fakaha koe, ʻo hange ko e fai ʻe he kau malualoi ʻi he falelotu mo e hala, koeʻuhi ke nau maʻu ʻa e fakamālō ʻa e kakai. Ko au e, ʻoku ou tala atu, Ko hono ngata ia o ʻenau totongi kuo nau maʻu.”—Mātiu 6:2.
3. (a) Ko e founga fē naʻe totongi kakato ai ʻa e kau sikalaipé mo e kau Fālesí ki heʻenau foakí? (e) Naʻe kehekehe fēfē ʻa e tuʻunga ʻo Sīsū ʻi he foakí?
3 Ko e foʻi lea faka-Kalisi ki he ‘kuo nau maʻu’ (a·peʹkho) ko e foʻi lea naʻe faʻa hā ʻi he ngaahi līsiti pisinisi. ʻOku ngāueʻaki ʻi he Malanga ʻi he Moʻungá ʻo hā ai “kuo nau maʻu ʻenau totongi,” ʻa ia, “kuo nau ʻosi fakamoʻoni ʻi he līsiti ki heʻenau totongi: ko ʻenau totonu ke maʻu ʻa ʻenau totongí kuo fakahoko, hangē tofu pē kuo ʻosi ʻoatu ha līsiti ki ai.” (An Expository Dictionary of New Testament Words, fai ʻe W. E. Vine) Ko e ngaahi meʻaʻofa ki he masivá naʻe palōmesi fakahāhā ʻaki ʻi he ngaahi halá. Naʻe fakahā ʻa e hingoa ʻo e kau foaki meʻaʻofá ʻi he ngaahi sinakoké. Ko kinautolu naʻa nau foaki lalahí naʻe fakalāngilangiʻi makehe ia ʻaki ʻenau nofo ʻi ha ngaahi nofoʻanga ʻoku hoko atu ki he kau lāpaí he lolotonga ʻa e lotú. Naʻa nau foaki ke sio ki ai ʻa e tangatá; naʻe siofia mo fakalāngilangiʻi kinautolu ʻe he tangatá; ko ia, kuo nau fakaʻilongaʻi ʻa e līsiti ki he totongi ʻoku maʻu mei heʻenau foakí ʻo pehē “Totongi Kakato.” Ko ha kehekehe ē mo e tuʻunga naʻe fakahā ai ʻe Sīsū! “Ke lilo pe hoʻo foaki; pea ko hoʻo Tamai, ʻa ia ʻoku ne ʻafioʻi ʻa e lilo, te ne totongi kiate koe.”—Mātiu 6:3, 4; Palōvepi 19:17.
Ko e Ngaahi Lotu ʻOku Fakahōifua ki he ʻOtuá
4. Ko e hā naʻe fakatupunga ai ʻe he ngaahi lotu ʻa e kau Fālesí ke ui ai ʻe Sīsū ʻa e kau tangata ko iá ko e kau mālualoi?
4 ʻOku houngaʻia ʻa Sihova ʻi he ngaahi lotu ʻoku fai kiate iá—kae ʻikai hangē ko e ngaahi lotu ʻa e kau Fālesí. Naʻe pehē ʻe Sīsū ki hono kau muimuí: “Pea ʻoka mou ka lotu, ʻe ʻikai te mou hange ko e kau mālualoi; he ʻoku nau manako ke tuʻu ʻi he falelotu mo e tuliki ʻo e malaʻe ke fai ʻenau lotu, koeʻuhi ke nau hā ki he kakai. Ko au e, ʻoku ou tala atu, Ko hono ngata ia o ʻenau totongi kuo nau maʻu.” (Mātiu 6:5) Naʻe ʻi ai ʻa e ngaahi lotu lahi ʻa e kau Fālesí naʻe lau fakaʻaho, ʻi ha ngaahi taimi tukupau, tatau ai pē pe naʻa nau ʻi fē. Naʻe totonu ke fai kinautolu ʻi he lilo. Kaekehe, naʻa nau ʻai ke nau ‘ʻi he ngaahi tuliki ʻo e ngaahi hala,’ ʻo nau hā ki he kakai ʻoku fononga ai ʻi he tafaʻaki ʻe fā, ʻi he hoko ʻa e taimi ki he lotú.
5. (a) Ko e hā ʻa e toe ngaahi tōʻonga naʻe fakatupunga ai ʻa e ngaahi lotu ʻa e kau Fālesí ke ʻikai ke fanongo ki ai ʻa e ʻOtuá ia? (e) Ko e hā ʻa e ngaahi meʻa naʻe fakamuʻomuʻa ʻe Sīsū ʻi he lotu naʻá ne akoʻí, pea ʻoku loto-tatau ʻa e kakai ʻi he ʻaho ní ʻi he meʻá ni?
5 ʻI hono fakahāhā ʻa e māʻoniʻoni loí, te nau “mounu ʻaki ʻenau lotu lōloa.” (Luke 20:47) Naʻe pehē ʻe ha talatukufakaholo ʻe taha: “Ko e kau tangata anga-fakangalilotu ʻo e kuonga ko ē naʻa nau fakalongolongo ʻi ha houa ʻe taha pea nau toki fai ʻa e Tefillah [lotu].” (Mishnah) Ko ia ai, ʻe pau ke mamata ʻa e tokotaha kotoa pē ki heʻenau anga fakalotú pea fakatumutumu ai! Naʻe ʻikai ke laka hake ʻa e ngaahi lotu peheé ʻi honau ngaahi foʻi ʻulu ʻonautolú. Naʻe pehē ʻe Sīsū ke lotu ʻi he liló, ʻo ʻikai toe ʻai ʻi he anga-hiki, pea naʻá ne ʻoange kiate kinautolu ha sīpinga faingofua. (Mātiu 6:6-8; Sione 14:6, 14; 1 Pita 3:12) Ko e sīpinga lotu ʻa Sīsuú naʻá ne fakamuʻomuʻa ʻa e ngaahi meʻa ʻoku muʻomuʻá: “Ko ʻemau Tamai ʻoku ʻi Hevani, ke tapuhā ho huafa, ke hoko hoʻo pule, ke fai ho finangalo.” (Mātiu 6:9-13) ʻOku tokosiʻi ʻa e kakai ʻi he ʻahó ni ʻoku nau ʻilo ʻa e huafa ʻo e ʻOtuá, toe siʻi ange ʻa e fiemaʻu ke fakatapuhaaʻi iá. ʻOku nau ʻai ai ia ko ha ʻotua ʻoku ʻikai hano huafa. Ke hoko mai ʻa e Puleʻanga ʻo e ʻOtuá? Ko e tokolahi ʻoku nau fakakaukau kuo ʻosi hoko mai ia, ʻi loto ʻiate kinautolu. ʻOku nau lotu nai ke fai hono finangaló, ka ko e tokolahi taha ʻoku nau taki taha fai pē honau loto ʻonautolú.—Palōvepi 14:12.
6. Ko e hā naʻe fakahalaʻi ai ʻe Sīsū ʻa e ngaahi ʻaukai ʻa e kau Siú ko ha meʻa taʻeʻaongá?
6 ʻOku ala tali ʻe Sihova ʻa e ʻaukaí—kae ʻikai ke hangē ko e anga hono fai ʻe he kau Fālesí. Hangē pē ko hono fakataʻeʻaongaʻi ʻa e foaki meʻaʻofa ki he kau masivá mo e lotu ʻa e kau sikalaipé mo e kau Fālesí, naʻe toe fakataʻeʻaongaʻi foki ʻe Sīsū mo ʻenau ʻaukaí ko ha meʻa taʻeʻaonga: “Pea ka mou ka ʻaukai, ʻoua te mou fakamatapeko, ʻo hange ko e kau mālualoi: he ʻoku nau fakalālāfuaʻa honau mata, koeʻuhi ke nau hā ki he kakai ʻoku nau ʻaukai. Ko au e, ʻoku ou tala atu, Ko hono ngata ia o ʻenau totongi kuo nau maʻu.” (Mātiu 6:16) Ko ʻenau ngaahi talatukufakaholó naʻe hā ai ko e lolotonga ʻa e ngaahi ʻaukaí naʻe ʻikai totonu ki he kau Fālesí ke nau kaukau pe pani kinautolu ka ke fakaefuefu honau ʻulú. ʻI he ʻikai ke fai ha ʻaukaí, naʻe kaukau maʻu pē ʻa e kau Siú pea milimili honau sinó ʻaki ʻa e lolo.
7. (a) Naʻe totonu ke fēfē ʻa e angafai ʻa e kau muimui ʻo Kalaisí ʻo ka nau ka ʻaukai? (e) Fekauʻaki mo e ʻaukaí, ko e hā naʻe fiemaʻu ʻe Sihova ʻi he ʻaho ʻo ʻAiseá?
7 Fekauʻaki mo e ʻaukaí, naʻe tala ʻe Sīsū ki hono kau muimuí: “Pani ho ʻulu mo fufulu ho mata: koeʻuhi ke ʻoua naʻa hā hoʻo ʻaukai ki he kakai, ka ki hoʻo Tamai pe.” (Mātiu 6:17, 18) ʻI he ʻaho ʻo ʻAiseá ko e kau Siu fakaholomuí naʻa nau fiefia ʻi heʻenau ʻaukaí, ʻo fakamamahiʻi honau sinó, mapelu honau ʻulú, mo tangutu tauangaʻa mo fakaefuefu. Ka naʻe fiemaʻu kinautolu ʻe Sihova ke fakatauʻatāinaʻi ʻa e kakai kuo fakamālohiʻí, fafanga ʻa e fiekaiá, fakahū ki honau falé ʻa e kau masivá, mo fakavalaʻi ʻa e telefuá.—ʻAisea 58:3-7.
Faʻoaki ʻa e Ngaahi Koloa Faka-Hēvani
8. Ko e hā naʻá ne fakatupunga ʻa e kau sikalaipé mo e kau Fālesí ke puli meiate kinautolu ʻa e founga ke maʻu ai ʻa e hōifua ʻa e ʻOtuá, pea ko e hā ʻa e tefitoʻi moʻoni, ʻa ia naʻe fakahā ki mui ʻe Paula, naʻe ʻikai te nau fakatokangaʻí?
8 ʻI heʻenau tulimui ki he māʻoniʻoní, naʻe puli ai mei he kau sikalaipé mo e kau Fālesí ʻa e founga ke maʻu ai ʻa e hōifua mei he ʻOtuá pea nau hangataha ki he mālie fakaetangatá. Naʻa nau hoko ʻo moʻui ʻaki ʻa e ngaahi talatukufakaholo ʻa e tangatá ʻo nau tuku ai ki he tafaʻakí ʻa e Folofola ʻa e ʻOtuá kuo ʻosi tohí. Naʻa nau tuku honau ngaahi lotó ki he tuʻunga fakamāmaní kae ʻikai ki he koloa faka-hēvaní. Naʻa nau taʻetokangaʻi ʻa e moʻoni faingofua naʻe hiki ʻe ha Fālesi-naʻe-liliu-ʻo-Kalisitiane ʻi he ngaahi taʻu ki mui mai: “ʻIlonga ha meʻa te mou fai, ngaue fie ngaue ki ai, he ko e ngaue ki he ʻEiki, ʻo ʻikai ki he kakai: ʻo mou ʻilo, ko e ʻEiki ia te mou maʻu mei ai ʻa e totongi totonu, ko e maʻu tofiʻa.”—Kolose 3:23, 24.
9. Ko e hā ʻa e ngaahi fakatuʻutāmaki ʻe lava ke ne fakamanamanaʻi ʻa e koloa fakaemāmaní, ka ko e hā te ne tauhi ke malu ʻa e koloa moʻoní?
9 ʻOku mahuʻingaʻia ʻa Sihova ʻi hoʻo mateaki kiate iá, kae ʻikai ʻi hoʻo tohi pangikeé. ʻOkú ne ʻafioʻi ko ho lotó ʻoku ʻi he feituʻu ʻoku ʻi ai hoʻo koloá. ʻE lava ʻe he ʻumeʻumeá mo e ané ʻo keina hoʻo koloá? ʻE lava ʻe he kau kaihaʻá ke keli atu ʻi he ngaahi ʻā ʻo kaihaʻasi ia? Pe ʻi he taimi ko ʻeni ʻi onopooni ʻo e feliliuaki fakaʻikonōmiká, ʻe lava ʻe he mamafa ʻa e koloá ke fakasiʻisiʻi hono ivi fakatau maí pe ʻe lava ke mole atu ia ʻi he movete ʻa e fakatauʻanga ʻo e ʻinasi ʻi ha kautaha (stock-market)? ʻE lava ʻe he tupulaki lahi ange ʻa e faihiá ʻo fakatupunga ke kaihaʻasi hoʻo koloá? ʻIkai kapau ko ho matá—ko ha maama ia ʻokú ne fakamaama ho sinó kotoa—ʻoku faingofua, ʻo fakahangataha pē ki he Puleʻanga ʻo e ʻOtuá mo ʻene māʻoniʻoní. ʻOku faingofua ke mole ʻa e ngaahi koloá: “ʻOua te ke fakaongosia ke maʻu koloa; tuku hoʻo feinga poto ko ia; he te ke lava ke kilo puna ki ai, he ʻoku ʻikai? He ʻoku matuʻaki ʻai kapakau ia, hange ha ikale ʻoku puna ki he ʻatā.” (Palōvepi 23:4, 5) Ko ia ko e hā ʻoku ʻikai ke lava ai ke ke mohe koeʻuhi ko e koloá? “Ko e topono fau ʻa e koloaʻia ʻa ia ʻoku ʻikai te ne mamohe ai.” (Koheleti 5:12) Manatuʻi ʻa e fakatokanga ʻa Sīsū: “ʻOku ʻikai te mou lava ke ʻeikiʻaki ʻa e ʻOtua mo Koloa fakatouʻosi.”—Mātiu 6:19-24.
Tui ʻOkú Ne Toʻo ʻa e Lotomoʻuá
10. Ko e hā ʻoku mahuʻinga ai ke ʻai hoʻo tuí ki he ʻOtuá kae ʻikai ʻi he koloa fakamatelié, pea ko e hā ʻa e akonaki naʻe fai ʻe Sīsuú?
10 ʻOku fiemaʻu ʻe Sihova ʻa hoʻo tuí ke ʻiate ia, ʻo ʻikai ke ʻi he ngaahi koloa fakamatelié. “Ka ʻo ka taʻekau ʻa e tui, ʻoku ʻikai momoʻi lava haʻate fakahōifua ia: he ko ia ʻoku ʻunuʻunu ki he ʻOtua, kuo pau ʻoku ne tui ʻoku ʻi ai ia, pea te ne hanga ʻo totongi kiate kinautolu ʻoku kumi hākili kiate ia.” (Hepelū 11:6) Naʻe pehē ʻe Sīsū: “Neongo ʻoku fuʻu lahi ʻa e koloa ʻa ha taha, ka ʻoku ʻikai hoko ai ʻo tautau ʻene moʻui ki heʻene ngaʻotoʻota.” (Luke 12:15) Ko e paʻanga ʻe laui miliona ʻi he pangikeé ʻe ʻikai lava ke ne ʻai ke ngāue ʻa e ngaahi maʻamaʻa kuo mahakiʻiá pe ko e mafu kuo maumaú ke toe pamu. Ko ia naʻe hoko atu ʻe Sīsū ʻi heʻene Malanga ʻi he Moʻungá ʻo pehē: “ʻOku ou tala kiate kimoutolu, ʻOua naʻa mou lotomoʻua koeʻuhi ko hoʻomou moʻui, ha meʻa te mou kai pe ha meʻa te mou inu; ʻumaʻā homou sino, ki ha meʻa te mou ʻai ki ai. ʻIkai ʻoku lahi ʻa e moʻui ʻi he meʻakai, mo e sino ʻi hono kofu?”—Mātiu 6:25.
11. Naʻe maʻu ʻi fē ʻe Sīsū ʻa ʻene ngaahi talanoa fakatātaá, pea ʻoku anga-fēfē hono fakatātaaʻi ʻeni ʻi he Malanga ʻi he Moʻungá?
11 Ko Sīsū ko e tokotaha taukei ia ʻi he ngaahi talanoa fakatātaá. Naʻá ne fakakaukau ki ai ʻi ha feituʻu pe ʻokú ne sio ki ai. Naʻá ne sio ki ha fefine ʻokú ne ʻai ha maama kuo ʻosi tutu ki ha tuʻunga maama pea naʻá ne liliu ia ko ha talanoa fakatātā. Naʻá ne sio ki ha tauhi-sipi ʻokú ne vaheʻi ʻa e fanga sipí mei he fanga kosí; naʻe hoko ia ko ha talanoa fakatātā. Naʻá ne sio ki he tamaiki ʻoku nau vaʻinga ʻi he malaʻe fakataú; naʻe hoko ia ko ha talanoa fakatātā. Ko ia naʻe pehē mo e Malanga ʻi he Moʻungá. ʻI heʻene lave ki he loto-moʻua ʻi he ngaahi fiemaʻu fakamatelié, naʻá ne sio ki ha ngaahi talanoa fakatātā ʻi he ngaahi manupuna ʻoku nau puna holó mo e ngaahi lile ʻoku falikiʻaki ʻa e ngaahi tafamoʻungá. ʻOku tūtuuʻi mo utu ʻa e fanga manupuná? ʻIkai. ʻOku lalanga ʻa e ngaahi lilé? ʻIkai. Naʻe ngaohi ia ʻe he ʻOtuá; ʻokú ne tauhi kinautolu. Kaekehe, ʻoku mou mahuʻinga ange kimoutolu ʻi he fanga manupuná mo e ngaahi lilé. (Mātiu 6:26, 28-30) Naʻá ne foaki hono ʻAló koeʻuhi ko kimoutolu, kae ʻikai ko kinautolu.—Sione 3:16.
12. (a) Naʻe ʻuhinga ʻa e ngaahi talanoa fakatātā ʻo kau ki he fanga manupuná mo e ngaahi ngoue matalaʻiʻakaú ʻe ʻikai ke fiemaʻu ke ngāue ʻa e kau ākonga ia ʻa Sīsuú? (e) Ko e hā ʻa e poini naʻe ʻai ʻe Sīsū ʻo fekauʻaki mo e ngāué mo e tuí?
12 Naʻe ʻikai ke tala heni ʻe Sīsū ki hono kau muimuí ke ʻoua naʻa nau ngāue ke fafanga mo fakavala kinautolu. (Sio ki he Koheleti 2:24; ʻEfesō 4:28; 2 Tesalonaika 3:10-12.) ʻI he pongipongi faʻahitaʻu failau ko iá naʻe femoʻuekina ʻa e fanga manupuná he kumi ki ha meʻakai, fakamaheni, faʻu ʻa e ngaahi pununga, tataʻo ʻa e ngaahi fua, fafanga ʻa honau ʻuhikí. Naʻa nau ngāue ka naʻe ʻikai te nau loto-moʻua. Naʻe femoʻuekina foki ʻa e ngaahi ngoue matalaʻiʻakaú ʻi hono teke atu honau ngaahi aká ki he loto kelekelé ko ha fekumi ki ha vai mo e ngaahi meʻa kehe mo ʻohake ia ki honau ngaahi laú ke maʻu ha maama mei he laʻaá. Naʻe pau ke nau matuʻotuʻa mo matala mo tuku mai honau ngaahi tenga ki muʻa pea nau maté. Naʻa nau ngāue ka ʻoku ʻikai te nau loto-moʻua. ʻOku tokonaki ʻe he ʻOtuá maʻá e fanga manupuná mo e ngaahi lilé. ‘ʻIkai ʻe lahi ange ʻene tokonaki maʻamoutolu, ʻa e kau tui vaivai?’—Mātiu 6:30.
13. (a) Ko e hā naʻe feʻungamālie ai pē ke ngāueʻaki ʻe Sīsū ha fua ko e hangá ʻi he lave ki he fakalahi atu ʻa e moʻui ʻa ha taha? (e) ʻOku anga-fēfē haʻo fakalōloa atu hoʻo moʻuí ke taʻengata ʻaki ha ngaahi maile ʻe laui miliona?
13 Ko ia maʻu ʻa e tuí. ʻOua ʻe loto-moʻua. Ko e loto-moʻuá ʻe ʻikai te ne lava ke liliu ha meʻa ʻe taha. Naʻe pehē ʻe Sīsū: “Pea neongo hoʻomou lotomoʻua ki ai, ka talaʻehai ʻe lava ai ʻe ha taha ke toloʻi atu hono taʻu ko ha momoʻi hanga pe ʻe taha.” (Mātiu 6:27) Ka ko e hā ʻoku ngāueʻaki ai ʻe Sīsū ʻa e fua ʻo ha mamaʻo fakamatelié, ko ha hanga, ki he fua ʻo ha taimi ʻo e moʻuí? Mahalo koeʻuhi ko e toutou fakatatau ʻe he Tohitapú ʻa e moʻui ʻa e faʻahinga ʻo e tangatá ki ha fononga, ʻo ngāueʻaki ʻa e ngaahi kupuʻi lea hangē ko e “hala ʻo e kau faikovi,” “ʻalunga ʻo haʻa faitotonu,” ‘hala fālahi ki he fakaʻauha,’ mo e ‘hala fāsiʻi ki he moʻui.’ (Sāme 1:1; Palōvepi 4:18; Mātiu 7:13, 14) Ko e loto-moʻua ki he ngaahi fiemaʻu fakaʻahó ʻe ʻikai lava ke ne fakalōloa ha moʻui ʻa ha taha ʻaki ha kiʻi konga siʻisiʻi pē, ko e “hanga pe ʻe taha.” Ka ʻoku ʻi ai ha founga ke fakalōloa ai ʻa hoʻo moʻuí ʻaki ha ngaahi maile ʻe laui miliona. Kae ʻikai ʻaki ʻa e loto-moʻua mo pehē: “Te tau kai ai e ha mo inu e ha? mo kofuʻaki ʻa e ha?” ka ko e maʻu ʻa e tui mo fai ʻa ia ʻoku tala mai ʻe Sīsū ke tau faí: “Ka mou kumi muʻa ki hono puleʻanga, mo e maʻoniʻoni aʻana, pea ʻe ʻatu mo ia foki ʻa e ngāhi meʻa ko ia kotoa.”—Mātiu 6:31-33.
Ko Hono Aʻusia ʻa e Puleʻanga ʻo e ʻOtuá mo Hono Māʻoniʻoni
14. (a) Ko e hā ʻa e kaveinga ʻo e Malanga ʻi he Moʻungá? (e) Ko e hā ʻa e founga hala naʻe kumi ai ʻa e kau sikalaipé mo e kau Fālesí ki he Puleʻangá mo e māʻoniʻoní?
14 ʻI he sētesi fakaava ʻo ʻene Malanga ʻi he Moʻungá, naʻe lea ai ʻa Sīsū ʻo kau ki he Puleʻanga ʻo hēvaní ʻoku ʻanautolu ʻoku nau ʻiloʻi ʻenau fiemaʻu fakalaumālié. ʻI he sētesi hono faá, naʻá ne pehē ko kinautolu ʻoku fiekaia mo fieinua ki he māʻoniʻoní ʻe fakalato ia. ʻOku fokotuʻu heni ʻe Sīsū fakatouʻosi ʻa e Puleʻangá mo e māʻoniʻoni ʻa Sihová ko e ʻuluaki meʻá ia. Ko e ongo kaveinga ia ʻo e Malanga ʻi he Moʻungá. Ko e tali kinaua ki he ngaahi fiemaʻu kotoa ʻa e faʻahinga ʻo e tangatá. Ka ʻe makatuʻunga ʻi he hā ʻa e malava ke aʻusia ʻa e Puleʻanga ʻo e ʻOtuá mo e māʻoniʻoni ʻa e ʻOtuá? ʻOku anga-fēfē ʻetau hokohoko atu ʻa e fekumi ki aí? ʻOku ʻikai ko e founga naʻe fai ʻe he kau sikalaipé mo e kau Fālesí. Naʻa nau kumi ki he Puleʻangá mo e māʻoniʻoní ʻo makatuʻunga ʻi he Lao ʻa Mōsesé, ʻa ia naʻa nau taku naʻe kau ki ai ʻa e ngaahi talatukufakaholó, he naʻa nau tui ko e Lao naʻe tohí mo e ngaahi talatukufakaholó naʻe ʻoange fakatouʻosi ʻe he ʻOtuá kia Mōsese ʻi Moʻunga Sainai.
15. (a) Fakatatau ki he kau Siú, naʻe kamata ʻanefē ʻa ʻenau ngaahi talatukufakaholó, pea naʻe anga-fēfē ʻa ʻenau fakamāʻolungaʻi ia ʻi he Lao ʻa Mōsese naʻe tohí? (e) Ko hono moʻoní, naʻe kamata ʻanefē ʻa e ngaahi talatukufakaholo ko ení, pea fēfē ʻene uesia ʻa e Lao ʻa Mōsesé?
15 Ko ʻenau talatukufakaholo ʻo fekauʻaki mo e meʻa ko ʻení ʻoku pehē: “Naʻe maʻu ʻe Mōsese ʻa e Laó [fakamatala ʻi lalo, “Ko e ‘Lao Tala Ngutu Mai’”] mei Sainai pea naʻá ne ʻoatu ia kia Siōsiua, pea meia Siōsiua ki he kau mātuʻá, pea mei he kau mātuʻá ki he kau Palōfitá; pea tuku ʻe he kau Palōfitá ki he kau tangata ʻi he Sinakoke Lahí.” ʻI he faai mai ʻa e taimí naʻe fakamāʻolungaʻi ai ʻa ʻenau lao tala ngutu mai ko ení ʻi he Lao naʻe hikí: “[Kapau] te ne laka hala ʻi he ngaahi lea ʻo e Laó [naʻe tohí], ʻe ʻikai ala tukuakiʻi,” ka ʻo kapau “te ne fakalahi ki he ngaahi lea ʻa e kau Sikalaipé [ngaahi talatukufakaholó], ʻoku ala tukuakiʻi ia.” (Mishnah) Ko ʻenau ngaahi talatukufakaholó naʻe ʻikai ke kamata ia ʻi Sainai. Ko hono moʻoní, naʻe kamata fokotuʻutuʻu ia ʻi ha senituli ʻe ua ki muʻa ʻia Kalaisi. Naʻa nau fakalahi ki ai, toʻo mei ai, pea nau fakataʻeʻaongaʻi ai ʻa e Lao ʻa Mōsese naʻe tohí.—Fehoanaki mo Teutalōnome 4:2; 12:32.
16. ʻOku anga-fēfē ʻa e hoko mai ʻa e māʻoniʻoni ʻa e ʻOtuá ki he faʻahinga ʻo e tangatá?
16 ʻOku maʻu ʻa e māʻoniʻoni ʻa e ʻOtuá ʻo ʻikai fakafou ʻi he Laó kae makehe mei ai: “Ko e meʻa ki he ngaahi ngaue fakalao, ʻe tuʻu mola ai ʻa e kakano kotoa pe ʻi hono ʻao, ʻo ʻikai hanau fakatonuhia [māʻoniʻoni, NW] mei ai: he ko e meʻa ʻoku fou mei he Lao, ko e fakaʻilo angahala pe. Ka ʻi onopōni kuo fakaeʻa ha fakatonuhia [māʻoniʻoni, NW] mei he ʻOtua, ʻa ia ʻoku taʻe kau ai ʻa e lao, ka ʻoku ʻi ai ha lau ki ai ʻi he Lao mo e Tohi Palofita; ʻio, ko e fakatonuhia [māʻoniʻoni, NW] mei he ʻOtua ʻoku fou mai ʻi he tui kia Sisu Kalaisi.” (Loma 3:20-22) Ko ia ʻoku maʻu ʻa e māʻoniʻoni ʻa e ʻOtuá ʻi he tui kia Kalaisi Sīsū—naʻe “lau ki ai ʻi he Lao mo e Tohi Palofita.” Ko e ngaahi palofisai faka-Mīsaiá naʻe fakahoko ia ʻia Sīsū. Naʻá ne toe fakakakato ʻa e Laó; naʻe toʻo atu ai ia ʻaki hono tutuki ki hono ʻakau fakamamahí.—Luke 24:25-27, 44-46; Kolose 2:13, 14; Hepelū 10:1.
17. Fakatatau ki he ʻapositolo ko Paulá, naʻe anga-fēfē ʻa e ʻikai ke ʻilo ʻe he kau Siú ʻa e māʻoniʻoni ʻa e ʻOtuá?
17 Ko ia, naʻe tohi ʻa e ʻapositolo ko Paulá ʻo kau ki he taʻe malava ʻa e kau Siú ʻi he fekumi ki he māʻoniʻoní: “He ʻoku ou fakamoʻoni pe, ʻoku ʻi ai haʻanau mamahiʻi ʻa e ʻOtua, ka ʻoku ʻikai fou ʻi he ʻilo totonu. He ko e meʻa ʻi he ʻikai te nau ʻilo ki he maʻoniʻoni ʻoku mei he ʻOtua, ka nau feinga pe ke tuʻu ʻa e maʻoniʻoni fakaekinautolu, ko ia naʻe ʻikai ai te nau fakavaivai ki he maʻoniʻoni ʻoku mei he ʻOtua. He ko Kalaisi ko e fakangata ia ʻo Lao, kae maʻoniʻoni ʻa e tangata kotoa pe ʻoku tui.” (Loma 10:2-4) Naʻe toe tohi foki ʻa Paula ʻo kau kia Kalaisi Sīsū: “Naʻa ne ngaohi ko e koto angahala ʻa e toko taha ko ia naʻe ʻikai te ne ongona ha angahala, koeʻuhiā ko kitautolu; koeʻuhi ke tau hoko ai ʻiate ia ko e koto maʻoniʻoni fakaʻotua.”—2 Kolinitō 5:21.
18. Naʻe anga-fēfē ʻa e vakai ʻa e kau Siu tauhi talatukufakaholó, ko e kau filōsefa Kalisí, mo e “kakai kuo ne fili” ki he “Kalaisi kuo kalusefai”?
18 Naʻe vakai ʻa e kau Siú ki ha Mīsaia kuo mate ʻoku vaivai mo taʻeʻaonga. Naʻe manuki ʻa e kau filōsefa Kalisí ki ha Mīsaia pehē ʻoku ngali vale. Ka neongo ia, ʻoku hangē pē ko ia naʻe fanongonongo ʻe Paulá: “Tala ʻe he Siu ke ʻomi ha ngaahi mana, tangi ʻe he Kalisi ki ha meʻa ʻoku ngali poto; ka ka malangaʻaki ʻe kimautolu ha Kalaisi kuo kalusefai, ʻa ia ko e tūkiaʻanga leva ki he Siu, pea ko e koto vale ki he Senitaile; ka ki he kakai ko ia, ʻa e kakai kuo ne fili, pe ʻoku nau Siu pe Kalisi, ko e Kalaisi ko ia ko e ivi ʻo e ʻOtua, mo e poto ʻo e ʻOtua. He ko e meʻa ʻa e ʻOtua ʻoku ngali vale ʻoku poto ia ʻi he kakai, pea ko e meʻa ʻa e ʻOtua ʻoku ngali vaivai ʻoku malohi ia ʻi he kakai.” (1 Kolinitō 1:22-25) Ko Kalaisi Sīsū ko e fakahāhā ia ʻo e ivi mo e poto ʻo e ʻOtuá pea ko e makatuʻunga ia ʻa e ʻOtuá ki he māʻoniʻoni mo e moʻui taʻengata ki he faʻahinga talangofua ʻo e tangatá. “Pea ʻoku ʻikai ke tuʻu ʻi ha taha kehe ʻa e fakamoʻui; he talaʻehai ʻoku ʻi ai mo ha hingoa kehe ʻi he lalo langi kuo fokotuʻu ʻi he lotolotonga ʻo e kakai, ʻa ia kuo tuʻutuʻuni ke tau moʻui ai.”—Ngāue 4:12.
19. Ko e hā ʻe fakahā ʻe he kupu hono hoko maí?
19 Ko e kupu hono hoko maí te ne fakahā kapau te tau fie hao ʻi he fakaʻauhá pea maʻu ʻa e moʻui taʻengatá, kuo pau ke tau hanganaki kumi ki he Puleʻanga ʻo e ʻOtuá mo ʻene māʻoniʻoní. Kuo pau ke fai ia ʻo ʻikai ko e fanongo pē ki he ngaahi lea ʻa Sīsuú kae pehē foki ki hono fai ia.
Ngaahi Fehuʻi Fakamanatu
◻ Naʻe liliu ki he hā ʻa e fai ʻe he kau taki lotu Siú ʻa ʻenau ngaahi foaki meʻaʻofá, ngaahi lotú, mo e ngaahi ʻaukaí?
◻ Ko e fē ʻa e feituʻu malu ke faʻoaki ki ai hoʻo koloá?
◻ Ko e hā ʻoku totonu ai ke tau fakaʻehiʻehi mei he loto-moʻua ki heʻetau ngaahi fiemaʻu fakamatelié?
◻ Ko e hā ʻa e taukaveʻi loi naʻe fai ʻe he kau Siú ʻo kau ki he tupuʻanga ʻo ʻenau ngaahi talatukufakaholó?
◻ ʻOku makatuʻunga ʻi he hā ʻa e maʻu ʻa e Puleʻanga ʻo e ʻOtuá mo ʻene māʻoniʻoní?
[Fakatātā ʻi he peesi 14]
Ko e kau Fālesí naʻa nau manako ke lotu tuʻu ʻi he ngaahi tuliki ʻo e halá, ʻa ia ʻe lava ke mamata kiate kinautolu ʻa e kakaí