Moʻui ʻo Fehoanaki mo e Sīpinga Lotú—Konga 1

“Tuku ke fakamāʻoniʻoniʻi ho huafá.”—MĀT. 6:9.

ʻOKÚ KE MANATUʻI?

Ko e hā ʻoku tau ako mei he kupuʻi lea “ko ʻemau Tamai”?

Ko e hā ʻoku totonu ai ke tau lotu ke fakamāʻoniʻoniʻi ʻa e huafa ʻo e ʻOtuá?

ʻOku feʻunga ke lotu pē ke fai ʻa e finangalo ʻo e ʻOtuá he māmani? Fakamatalaʻi.

 1. ʻI heʻetau ngāue fakamalangá, ʻoku anga-fēfē ʻetau ngāueʻaki ʻa e lotu ʻa Sīsū ʻi he Mātiu 6:9-13?

ʻOKU ʻiloʻi ʻe he kakai tokolahi ʻa e ngaahi lea ʻo e lotu ʻi he Mātiu 6:9-13. ʻI heʻetau ngāue fakamalangá, ʻoku tau ngāueʻaki ai ʻa e ngaahi lea ʻo e lotu ko ení ke akoʻi ki he kakaí ko e Puleʻangá ko ha founga-pule moʻoni ia mei he ʻOtuá ʻa ia te ne liliu ʻa e māmaní ko ha palataisi. ʻOku tau toe ngāueʻaki ʻa e kupuʻi lea “tuku ke fakamāʻoniʻoniʻi ho huafá” ke fakahaaʻi ʻoku ʻi ai ʻa e huafa ʻo e ʻOtuá pea kuo pau ke tau ʻai ia ke toputapu.—Māt. 6:9, fakamatala ʻi lalo.

 2. ʻOku anga-fēfē ʻetau ʻiloʻi naʻe ʻikai loto ʻa Sīsū ke toutou leaʻaki ʻa e ngaahi lea tatau ʻi he taimi kotoa pē ʻoku tau lotu aí?

² Naʻe loto ʻa Sīsū ke tau toutou leaʻaki ʻa e ngaahi lea naʻá ne ngāueʻakí ʻi he taimi kotoa ʻoku tau lotu aí, ʻo hangē ko ia ʻoku fai ʻe he tokolahi? ʻIkai. Naʻe pehē ʻe Sīsū: “Ka ʻi hono fai ha lotú, ʻoua ʻe toutou leaʻaki ʻa e ngaahi meʻa tatau.” (Māt. 6:7) ʻI he taimi ʻe taha, ʻi heʻene akoʻi ʻene kau ākongá ki he founga ke lotu aí, naʻá ne toutou leaʻaki ʻa e lotú ka naʻe ʻikai ke ne ngāueʻaki ʻa e ngaahi lea tatau tofu pē. (Luke 11:1-4) Ko ia naʻe ʻomai ʻe Sīsū ha sīpinga lotu ke akoʻi kitautolu ki he ngaahi meʻa ʻoku fiemaʻu ke tau lotu fekauʻaki mo iá.

 3. Ko e hā ʻa e ongo fehuʻi ʻe lava ke ke ʻeke hifo kiate koe ʻi hoʻo ako ʻa e sīpinga lotú?

³ ʻI he kupu ko ení mo e kupu hoko maí, te tau ako fakalelei ai ʻa e sīpinga lotú. ʻI heʻetau fai ení, ʻeke hifo kiate koe, ‘ʻE lava fēfē ke tokoniʻi au ʻe he lotu ko ení ke lelei ange ai ʻeku lotú?’ Pea ko e mahuʻinga angé, ‘ʻOku ou moʻui ʻo fehoanaki mo e Lotu ʻa e ʻEikí?’

“KO ʻEMAU TAMAI ʻOKU ʻI HĒVANI”

 4. Ko e hā ʻoku fakamanatu mai ʻe he kupuʻi lea “ko ʻemau Tamai,” pea ʻoku anga-fēfē ʻa e hoko ʻa Sihova ko ʻetau Tamaí?

⁴ Naʻe kamataʻaki ʻe Sīsū ʻa e lotú ʻaki ʻene pehē, “Ko ʻemau Tamai.” ʻOku fakamanatu mai ai ko Sihova ko ha Tamai ki he kotoa hotau fanga tokoua mo e fanga tuofāfine ʻi māmani lahí. (1 Pita 2:17) Ko e faʻahinga ʻoku fili ʻe Sihova ke moʻui ʻi hēvaní kuo ohi kinautolu ko hono ngaahi foha, ko ia ko ʻenau Tamaí ia ʻi ha founga makehe. (Loma 8:15-17) Ko e faʻahinga ʻe moʻui taʻengata ʻi māmaní ʻe lava ke nau toe ui ia ko ʻenau “Tamai.” ʻOku foaki ange ʻe Sihova ʻa e moʻuí mo tokonaki anga-ʻofa ange ʻenau ngaahi fiemaʻú. ʻE ui kinautolu ko e “fānau ʻa e ʻOtuá” hili ʻenau hoko ʻo haohaoá pea nofoʻaki mateaki kia Sihova ʻi he ʻahiʻahi fakaʻosí.—Loma 8:21; Fkh. 20:7, 8.

5, 6. Ko e hā ʻa e meʻaʻofa lelei taha ʻe lava ke ʻoange ʻe he ngaahi mātuʻá ki heʻenau fānaú, pea ko e hā ʻoku totonu ke fai ʻe he kiʻi tama taki taha ki he meʻaʻofa ko ení? (Sio ki he ʻuluaki fakatātā ʻi he kupú ni.)

⁵ ʻOku ʻoange ʻe he ngaahi mātuʻá ki heʻenau fānaú ha meʻaʻofa ʻi heʻenau tokoniʻi kinautolu ke mahinoʻi ko Sihova ʻenau Tamai fakahēvaní pea ʻi heʻenau akoʻi kinautolu ke lotu kiate iá. ʻOku pehē ʻe ha ʻovasia sēketi ʻi ʻAfilika Tonga: “Mei he ʻaho naʻe fanauʻi ai homa ongo ʻofefiné, naʻá ku lotu mo kinaua ʻi he pō kotoa tuku kehe kapau naʻá ku mamaʻo mei ʻapi. ʻOku faʻa pehē ʻe homa ongo ʻofefiné ʻoku ʻikai ke na manatuʻi ʻa e ngaahi lea tofu pē ʻo e ngaahi lotu poʻuli ko iá. Kae kehe, naʻá na manatuʻi ʻa e ʻātakaí, ko e toputapu ʻo e fetuʻutaki mo ʻetau Tamaí, ʻa Sihova, mo e ongoʻi ʻo e nonga mo e malu. ʻI heʻena malava pē ke lotú, naʻá ku fakalototoʻaʻi kinaua ke na lotu leʻo-lahi koeʻuhí ke malava ʻou fanongo ki heʻena fakahaaʻi ʻena ngaahi fakakaukaú mo e ongoʻí kia Sihova. Ko ha faingamālie lelei eni ke tomuʻa ʻilo ai ki hona lotó. Pea ʻe lava ai ke u akoʻi anga-ʻofa kinaua ke fakakau ʻa e ʻelemēniti mahuʻinga ʻo e sīpinga lotú koeʻuhí ke hoko ʻena lotú ʻo ʻi ha makatuʻunga lelei.”

⁶ ʻI heʻena tupu haké naʻe hokohoko atu ʻa e ʻunuʻunu ofi kia Sihova hono ongo ʻofefiné. ʻOkú na mali he taimí ni pea ngāue taimi-kakato kia Sihova fakataha mo hona ongo husepānití. Ko e meʻaʻofa lelei taha ʻe lava ke ʻoange ʻe he ngaahi mātuʻá ki heʻenau fānaú ko hono akoʻi kia kinautolu ko e Tokotaha moʻoni ʻa Sihova pea ʻe lava ke nau hoko ko hono kaumeʻa ofi. Ka ko e kiʻi tama taki taha ʻoku fiemaʻu ke ne tauhi ʻa e kaumeʻa vāofi ko eni mo Sihová.—Saame 5:11, 12; 91:14.

“TUKU KE FAKAMĀʻONIʻONIʻI HO HUAFÁ”

 7. Ko e hā ʻa e monū ʻoku tau maʻú, ka ko e hā kuo pau ke tau faí?

⁷ ʻOku tau maʻu ʻa e monū ko hono ʻiloʻi ʻa e huafa ʻo e ʻOtuá pea hoko ko ha “kakai maʻa hono huafá.” (Ngā. 15:14; ʻAi. 43:10) ʻOku tau lotu, “Tuku ke fakamāʻoniʻoniʻi ho huafá,” ʻa ia ko hono ʻai ia ke toputapu. ʻOku tau toe kole kia Sihova ke ne tokoniʻi kitautolu ke ʻoua te tau fai pe leaʻaki ha meʻa ʻe taʻefakalāngilangi ai ia. ʻOku totonu ke ʻoua te tau hangē ko e niʻihi ʻi he ʻuluaki senitulí ʻa ia naʻe ʻikai te nau fai ʻa e meʻa naʻa nau akoʻi ʻa e niʻihi kehé ke faí. Naʻe tohi ʻa Paula kia kinautolu: “Ko e huafa ʻo e ʻOtuá kuo fai ʻa e laukovi ki ai ʻi he lotolotonga ʻo e ngaahi puleʻangá koeʻuhi ko kimoutolu.”—Loma 2:21-24.

8, 9. ʻOmai ha fakatātā ʻo e anga hono tokoniʻi ʻe Sihova ʻa e faʻahinga ʻoku loto ke fakamāʻoniʻoniʻi hono huafá.

⁸ ʻOku tau fai ʻa e meʻa kotoa te tau malavá ke fakalāngilangiʻi ʻa e huafa ʻo Sihová. ʻOku pehē ʻe ha tuofefine ʻi Noaue ko au pē naʻe toé mo ʻeku tamasiʻi taʻu uá hili ʻa e mate hono husepānití: “Ko ha taimi mātuʻaki faingataʻa ia ʻi heʻeku moʻuí. Naʻá ku lotu ʻi he ʻaho kotoa, ʻo meimei ʻi he houa kotoa pē ki ha mālohi ke ʻai ke mafamafatatau ʻeku ongoʻí koeʻuhí ke ʻoua naʻá ku ʻoange kia Sētane ha ʻuhinga ke ne manukiʻi ai ʻa Sihova koeʻuhí ko ha fili fakavalevale pe taʻefaitōnunga ʻi heʻeku tafaʻakí. Naʻá ku loto ke fakamāʻoniʻoniʻi ʻa e huafa ʻo Sihová, pea naʻá ku loto ke toe sio ʻeku tamasiʻí ki heʻene tamaí ʻi he Palataisí.”—Pal. 27:11, PM.

⁹ Naʻe tali ʻe Sihova ʻene lotú? ʻIo. Naʻá ne loto-toʻa ʻi he feohi maʻu pē mo e fanga tokouá mo e fanga tuofāfiné. ʻI he taʻu ʻe nima ki mui ai, naʻá ne mali mo ha mātuʻa. Ko ʻene tamasiʻí, ʻa ia ʻoku taʻu 20 he taimí ni, ko ha tokoua ʻosi papitaiso ia. ʻOkú ne pehē: “ʻOku ou fiefia ʻaupito ʻi hono tokoniʻi au ʻe hoku husepānití ke ʻohake ʻa e tamasiʻí.”

10. ʻE anga-fēfē hono fakamāʻoniʻoniʻi fakaʻaufuli ʻe he ʻOtuá hono huafá?

¹⁰ ʻE fakamāʻoniʻoniʻi fakaʻaufuli ʻe Sihova hono huafá ʻi he taimi te ne toʻo atu ai ʻa e faʻahinga kotoa ʻoku nau taʻefakalāngilangiʻi mo talitekeʻi ia ko honau Tokotaha-Pulé. (Lau ʻa e ʻIsikeli 38:22, 23.) ʻI he taimi ko iá, ʻe hoko ʻo haohaoa ʻa e faʻahinga ʻo e tangatá, pea ʻe lotu kia Sihova ʻa e tokotaha kotoa pē ʻi hēvani mo māmani mo fakalāngilangiʻi hono huafa toputapú. ʻI he fakaʻosí, ko ʻetau Tamai anga-ʻofá te ne “tāfataha ʻi he ngaahi meʻa kotoa pē ki he tokotaha kotoa pē.”—1 Kol. 15:28.

“TUKU KE HOKO MAI HO PULEʻANGÁ”

11, 12. ʻI he 1876, ko e hā naʻe tokoniʻi ʻe Sihova ke mahinoʻi ʻe hono kakaí?

¹¹ Ki muʻa ke foki ʻa Sīsū ki hēvaní, naʻe ʻeke ange ʻe heʻene kau ākongá: “ʻEiki, te ke toe fakafoki mai ʻa e Puleʻangá ki ʻIsileli he taimi ko ení?” Naʻe tali ange ʻe Sīsū ʻoku teʻeki ai taimi ke nau ʻilo pe ʻe kamata fakakū ʻa e pule ʻa e Puleʻanga ʻo e ʻOtuá. Naʻá ne tala ange ki heʻene kau ākongá ke nau tokangataha ki he mahuʻinga ʻo e ngāue fakamalangá. (Lau ʻa e Ngāue 1:6-8.) Ka naʻá ne toe akoʻi kinautolu ke nau lotu ke hoko mai ʻa e Puleʻanga ʻo e ʻOtuá pea fakatuʻotuʻa atu ki he taimi ko iá. Ko e ʻuhinga ia ʻoku tau kei lotu ai ke hoko mai ʻa e Puleʻangá.

¹² ʻI he ofi ki he taimi ke kamata pule ai ʻa Sīsū ʻi hēvaní, naʻe tokoniʻi ʻe Sihova hono kakaí ke nau mahinoʻi ʻa e taʻu ʻe hoko ai iá. ʻI he 1876, naʻe tohi ʻe Charles Taze Russell ʻa e kupu “Ngaahi Kuonga ʻo e Senitailé: ʻE Ngata ʻAfē?” Naʻá ne fakamatalaʻi ko e “fituʻi kuonga” ʻi he kikite ʻa Tanielá ʻoku tatau pē ia mo e “taimi kotofa ʻo e ngaahi puleʻangá” ʻi he kikite ʻa Sīsuú. Naʻe fakamatalaʻi ʻe he kupú ko e ngaahi taimi ko iá ʻe ngata ʻi he 1914.a—Tan. 4:16; Luke 21:24.

13. Ko e hā naʻe hoko ʻi he 1914, pea ko e hā ʻoku fakamoʻoniʻi ʻe he ngaahi meʻa ʻi he māmaní talu mei he 1914?

¹³ ʻI he 1914, naʻe kamata ʻa e taú ʻi ʻIulope pea vave ʻaupito ʻene mafola atu ki he kotoa ʻo e māmaní. Koeʻuhi ko e taú, naʻe hoko ai ʻa e honge lahi fakaʻulia. Pea ʻi he ngataʻanga ʻo e taú, ʻi he 1918, naʻe tāmateʻi ʻe ha fulū fakatupu mate ʻa e kakai tokolahi ange ʻi he māmaní ʻi he mate ʻi he taú. Ko e ngaahi meʻa kotoa ko ení ko e konga ia ʻo e “fakaʻilonga” naʻe ʻomai ʻe Sīsuú. ʻOku fakamoʻoniʻi ʻe he fakaʻilongá naʻe hoko ʻa Sīsū ʻo Tuʻi ʻi hēvani ʻi he 1914. (Māt. 24:3-8; Luke 21:10, 11) ʻI he taʻu ko iá, naʻá ne “ʻalu atu ʻi he ikuna pea ke fakakakato ʻene ikuná.” (Fkh. 6:2) Naʻe lī hifo ʻe Sīsū ʻa Sētane mo ʻene kau tēmenioó mei hēvani ki he māmaní. Hili iá, naʻe kamata ke fakahoko ʻa e kikité: “ʻOiauē ʻa e māmaní pea mo e tahí, koeʻuhi kuo ʻalu hifo ʻa e Tēvoló kiate kimoua, ʻokú ne ʻita lahi, ʻi heʻene ʻiloʻi ʻoku toe siʻi pē hono taimí.”—Fkh. 12:7-12.

14. (a) Ko e hā ʻoku tau kei lotu ai ke hoko mai ʻa e Puleʻanga ʻo e ʻOtuá? (e) Ko e hā ʻa e ngāue mahuʻinga kuo pau ke tau fai he taimi ní?

¹⁴ ʻOku tokoniʻi kitautolu ʻe he kikite ʻi he Fakahā 12 ke tau mahinoʻi ʻa e ʻuhinga naʻe kamata ke hoko ai ʻi he māmaní ʻa e ngaahi meʻa fakalilifu ʻi he taimi naʻe hoko ai ʻa Sīsū ko e Tuʻi ʻi he Puleʻanga ʻo e ʻOtuá. Neongo ʻoku pule ʻa Sīsū ʻi hēvani, ʻoku kei pule ʻa Sētane ʻi he māmaní. Ka ʻoku vavé ni ke hanga ʻe Sīsū ʻo “fakakakato ʻene ikuná” ʻaki hono toʻo atu ʻa e kotoa ʻo e fulikivanú mei he māmaní. Ka ʻi he teʻeki ke hoko iá, ʻoku tau hanganaki lotu ke hoko mai ʻa e Puleʻanga ʻo e ʻOtuá, pea ʻoku tau hanganaki femoʻuekina ʻi hono malangaʻi ʻa e Puleʻanga ko iá. ʻOku fakahoko ʻe heʻetau ngāué ʻa e kikite ʻa Sīsuú: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē, pea ʻe toki hoko mai leva ʻa e ngataʻangá.”—Māt. 24:14.

“TUKU KE FAI HO FINANGALÓ . . . ʻI MĀMANI”

15, 16. ʻOku feʻunga pē ke lotu ke fai ʻa e finangalo ʻo e ʻOtuá ʻi he māmaní? Fakamatalaʻi.

¹⁵ ʻI he taʻu nai ʻe 6,000 kuohilí, naʻe fai ʻa e finangalo ʻo e ʻOtuá ʻi he māmaní. Ko e ʻuhinga ia naʻe pehē ai ʻe Sihova ko e ngaahi meʻa kotoa pē “kuo lelei ʻaupito.” (Sēn. 1:31) Naʻe angatuʻu leva ʻa Sētane, pea talu mei he taimi ko iá, ko e tokolahi taha ʻo e kakaí naʻe ʻikai ke nau fai ʻa e finangalo ʻo e ʻOtuá. Ka ʻi he ʻahó ni ʻoku ʻi ai ʻa e kakai ʻe toko valu miliona nai ʻoku nau tauhi kia Sihova. ʻOku nau lotu ke fai ʻa e finangalo ʻo e ʻOtuá ʻi māmani, pea ʻoku nau toe fai foki mo e finangalo ʻo e ʻOtuá. ʻOku nau moʻui ʻi ha founga ʻoku fakahōifua ki he ʻOtuá pea akoʻi faivelenga ʻa e niʻihi kehé fekauʻaki mo hono Puleʻangá.

¹⁶ Ko e fakatātaá, ko ha misinale taʻu 80 ʻi ʻAfilika, ʻa ia naʻe papitaiso ʻi he 1948, ʻokú ne pehē: “ʻOku ou lotu maʻu pē ke fetuʻutaki mo e kakai kotoa hangē ha sipí pea tokoniʻi kinautolu ke hoko ʻo ʻiloʻi ʻa Sihova ki muʻa ke fuʻu tōmuí. Pehē foki, ʻi he ʻamanaki pē ke u faifakamoʻoni ki ha taha, ʻoku ou kole ha poto ke aʻu ai ki he loto ʻo e tokotaha ko iá. Pea ʻi he fekauʻaki mo e faʻahinga hangē ha sipí ʻa ia kuo ʻosi maʻú, ʻoku ou lotu ke tāpuakiʻi ʻe Sihova ʻetau ngaahi feinga ke tokangaʻi kinautolú.” Ko e tuofefine taʻumotuʻa ko ení kuó ne tokoniʻi ʻa e tokolahi ke nau ako fekauʻaki mo Sihova. ʻE lava ke ke fakakaukau atu ki ha faʻahinga taʻumotuʻa kehe ʻoku nau faivelenga ʻi hono fai ʻa e finangalo ʻo Sihová?—Lau ʻa e Filipai 2:17.

17. ʻOku anga-fēfē hoʻo ongoʻi fekauʻaki mo e meʻa ʻe fai ʻe Sihova ʻi he kahaʻú maʻá e faʻahinga ʻo e tangatá pea mo e māmaní?

¹⁷ Te tau hanganaki lotu ke fai hono finangaló, kae ʻoua kuo toki toʻo atu ʻe Sihova hono ngaahi filí mei he māmaní. Pea ʻe ʻai leva ʻa e māmaní ko ha palataisi, pea ʻe toetuʻu mai ʻa e kakai ʻe laui piliona. Naʻe pehē ʻe Sīsū “ʻoku haʻu ʻa e houa ʻa ia ko e faʻahinga kotoa ʻi he ngaahi fonualoto fakamanatú te nau fanongo ki hono leʻó pea te nau hū mai ki tuʻa.” (Sione 5:28, 29) Sioloto atu ki he fiefia te tau maʻú ʻi he taimi te tau talitali lelei mai ai hotau ngaahi ʻofaʻangá! Ko e ʻOtuá “te ne holoholo ʻa e loʻimata kotoa pē” mei hotau matá. (Fkh. 21:4) Ko e tokolahi taha ʻo e faʻahinga ʻe toetuʻu maí ko e kau ‘taʻemāʻoniʻoni,’ ʻa ia ko e faʻahinga naʻe ʻikai ʻaupito ke nau ako ʻa e moʻoni fekauʻaki mo Sihova mo Sīsuú. Te tau fiefia ʻi hono akoʻi kinautolu fekauʻaki mo e finangalo ʻo e ʻOtuá koeʻuhí ke nau lava ʻo maʻu ʻa e “moʻui taʻengatá.”—Ngā. 24:15; Sione 17:3.

18. Ko e hā ʻoku fiemaʻu lahi taha ʻe he faʻahinga ʻo e tangatá?

¹⁸ ʻI he hoko mai ʻa e Puleʻanga ʻo e ʻOtuá, te ne fakamāʻoniʻoniʻi hono huafá, pea ko e tokotaha kotoa ʻi he ʻunivēsí te nau lotu fāʻūtaha kia Sihova. ʻIo, ʻe ʻoange ʻe he ʻOtuá ki he faʻahinga ʻo e tangatá ʻa e ngaahi meʻa ʻoku nau fiemaʻu lahi tahá ʻi heʻene tali ʻa e ʻuluaki kole ʻe tolu ʻi he sīpinga lotú. ʻI he kupu hoko maí, te tau lāulea ai ki he ngaahi fiemaʻu mahuʻinga kehe naʻe akoʻi mai ʻe Sīsū ke tau lotu fekauʻaki mo iá.

[Fakamatala ʻi lalo]

[Fakatātā ʻi he peesi 23]

ʻOkú ke akoʻi hoʻo fānaú ke nau fai ʻa e finangalo ʻo e ʻOtuá? (Sio ki he palakalafi 16)