Vahe 35

Ko e Malanga ʻIloa Taha Kuo Faí

KO E taha ʻo e meʻa naʻe hoko ʻoku taau lahi taha ke manatuʻi ʻi he hisitōlia ʻi he Tohitapú: Ko Sīsū naʻe tangutu ʻi ha tafaʻaki moʻunga, ʻo ne fai ʻa ʻene Malanga ʻiloa ʻi he Moʻungá. Ko e feituʻu ia naʻe ofi ki he Tahi Kālelí, ʻo ofi nai ki Kāpaneume. ʻI he hili ʻa e lotu ʻa Sīsū ʻi ha pō kakato, naʻá ne toki fili leva ʻa e toko 12 ʻo ʻene kau ākongá ke nau hoko ko e kau ʻaposetolo. Hili iá, naʻá ne ʻalu hifo fakataha mo kinautolu kotoa ki he feituʻu tokalelei ko ʻeni ʻi he moʻungá.

Te ke fakakaukau nai naʻe fuʻu helaʻia ʻa Sīsū ʻi he taimi ko iá peá ne fiemaʻu ke ne mohe. Ka, naʻe haʻu ʻa e fuʻu kakai tokolahi, ko e niʻihi mei Siutea mo Selusalema, ʻa ia ko e kilomita ʻe 95 ki he 110 ʻa hono mamaʻó. Naʻe haʻu ʻa e niʻihi kehe mei he matātahi ʻo Tāia mo Saitoni ʻi he tokelaú. Naʻa nau haʻu ke fanongo kia Sīsū pea ke faitoʻo honau mahamahakí. Naʻa mo e kakai naʻe fakahohaʻasi kinautolu ʻe he kau tēmeniō, ko e kau ʻāngelo anga-fulikivanu ʻa Sētané, naʻa nau ʻi ai.

ʻI he ʻalu hifo ʻa Sīsuú, naʻe fakaofiofi ʻa e kakai mahamahakí kiate ia ke nau ala kiate ia, pea naʻá ne fakamoʻui ʻa kinautolu kotoa. ʻI he hili ʻení ʻoku hā mahino naʻe kaka ʻa Sīsū ki ha feituʻu māʻolunga ange ʻi he moʻungá. Naʻá ne tangutu ai ʻo ne kamata ke akoʻi ʻa e kakai tokolahi naʻe nofo takai ʻi he tokalelei ʻi lalo ʻiate ia. Pea fakakaukau ange! ʻI he taimi ko iá naʻe ʻikai ʻaupito ha foʻi tokotaha naʻe puke lahi ʻi he lotolotonga ʻo e kau fanongó kotoa!

Naʻe vēkeveke ʻa e kakaí ke fanongo ki he faiako ʻa ia naʻe malava ke ne fai ʻa e ngaahi mana fakaofo ko ʻení. Kae kehe, naʻe fai ʻe Sīsū ʻene malangá tautefito ki he lelei maʻa ʻene kau ākongá, ʻa ia naʻa nau ofi taha nai kiate ia. Ka naʻe fakatou hiki ia ʻe Mātiu mo Luke ke tau maʻu foki ʻa e ʻaonga mei ai.

Naʻe liunga fā ʻa e lōloa ʻo e fakamatala ʻa Mātiu ki he malangá ʻi he fakamatala ʻa Luké. ʻIkai ngata aí, ka ko e ngaahi konga ʻo e meʻa naʻe fakamatalaʻi ʻe Mātiú, naʻe fakahā ʻe Luke naʻe leaʻaki ia ʻe Sīsū ʻi ha toe taimi kehe ʻi he lolotonga ʻene ngāue fakafaifekaú, pea ʻe lava ke fakatokangaʻi ʻeni ʻi hono fakafehoanaki ʻa Mātiu 6:​9-13 mo Luke 11:​1-4, pea mo Mātiu 6:​25-34 mo Luke 12:​22-31. Ka, ʻoku totonu ke ʻoua te tau ʻohovale ʻi he meʻá ni. ʻOku hā mahino naʻe akoʻi ʻe Sīsū ʻa e ngaahi meʻa tatau ʻo lahi ange ʻi he tuʻo tahá, pea naʻe fili ʻe Luke ke hiki ʻa e fakamatala ʻo kau ki he niʻihi ʻo e ngaahi akonakí ni ʻi ha tuʻunga kehe.

Ko e meʻa ʻokú ne ʻai ʻa e malanga ʻa Sīsuú ke ʻaonga lahí ʻoku ʻikai ko e loloto pē ʻo e ngaahi meʻa fakalaumālie ʻi aí ka ko e founga faingofua mo māʻalaʻala naʻá ne fakahā ai ʻa e ngaahi moʻoni ko ʻení. Naʻá ne lave ki he ngaahi meʻa ʻoku faʻa hoko, peá ne ngāueʻaki ʻa e ngaahi meʻa naʻe maheni ki ai ʻa e kakaí, ʻo ne ʻai ai ʻa ʻene ngaahi fakakaukaú ke mahinongofua ki he kakai kotoa ʻoku nau kumi ki ha moʻui lelei ange ʻi he founga ʻa e ʻOtuá.

Ko Hai ʻOku Fiefia Moʻoní?

ʻOku loto ʻa e tokotaha kotoa ke fiefia. ʻI hono ʻiloʻi ʻe Sīsū ʻa e meʻá ni, naʻá ne kamata ʻene Malanga ʻi he Moʻungá ʻaki ʻene fakamatalaʻi ʻa e faʻahinga ʻoku nau fiefia moʻoní. ʻOku hangē ko ia te tau fakaʻuta atu ki aí, naʻe maʻu ʻe he meʻá ni ʻa e tokanga ʻa ʻene kau fanongo tokolahi. Ka kuo pau naʻe ngali fepaki ki he tokolahi ʻa ʻene lea kamatá.

ʻI hono fakahanga ʻe Sīsū ʻa ʻene fakamatalá ki heʻene kau ākongá, naʻá ne kamataʻaki: “Fiefia ka ko kimoutolu ʻoku masivá, he ʻoku ʻo moutolu ʻa e puleʻanga ʻo e ʻOtuá. Fiefia ka ko kimoutolu ʻoku fiekaiá ni, he ʻe fakamākona kimoutolu. Fiefia ka ko kimoutolu ʻoku tangí ni, he te mou kata. Fiefia ka ko kimoutolu ʻo ka fehiʻanekina ʻe he kakaí, . . . ʻE, mou fiefia ʻi he taimi ko iá, mo hākahaka, he vakai ʻoku lahi hoʻomou totongi ʻi he langí.”

Ko e fakamatala ʻeni ʻa Luke ʻo kau ki he lea kamata ʻo e malanga ʻa Sīsuú. Ka, fakatatau ki he fakamatala ʻa Mātiú, naʻe toe pehē ʻe Sīsū ʻoku fiefia ʻa e faʻahinga ʻoku anga-maluú, ʻa e faʻahinga ʻoku fai meesí, ʻa kinautolu ʻoku maʻa honau lotó, mo kinautolu ʻoku fakatupu melinó. Naʻe pehē ʻe Sīsū, ʻoku fiefia ʻa e faʻahinga peheé koeʻuhi te nau maʻu ʻa e māmaní, ʻe fai meesi kiate kinautolu, te nau mamata ki he ʻOtuá, pea ʻe ui kinautolu ko e ngaahi foha ʻo e ʻOtuá.

Kae kehe, ko e meʻa naʻe ʻuhinga ki ai ʻa Sīsū ʻi he hoko ʻo fiefiá ʻoku ʻikai ko e fotu fiefia pē pe kata fiefia, ʻo hangē ko ʻete kau ki ha meʻa fakafiefia. ʻOku loloto ange ʻa e fiefia moʻoní, ʻoku ʻi ai ʻa e fakakaukau ʻo e nonga, ko e ongoʻi fiemālie mo lavameʻa ʻi he moʻuí.

Ko ia ai, naʻe fakahā ʻe Sīsū ko e faʻahinga ʻoku fiefia moʻoní ʻoku nau ʻiloʻi ʻenau fiemaʻu fakalaumālié, ʻoku nau loto-mamahi koeʻuhi ko honau tuʻunga angahalaʻiá, pea ʻoku nau hoko ʻo ʻilo pea tauhi ʻa e ʻOtuá. Pea kapau ʻe fehiʻanekinaʻi pe fakatangaʻi kinautolu koeʻuhi ko ʻenau fai ʻa e finangalo ʻo e ʻOtuá, ʻoku nau fiefia koeʻuhi ʻoku nau ʻilo ʻoku nau fakahōifuaʻi ʻa e ʻOtuá pea te nau maʻu meiate ia ʻa e pale ko e moʻui taʻengata.

Kae kehe, ko e tokolahi ʻo e faʻahinga naʻa nau fanongo kia Sīsuú, ʻoku hangē pē ko e kakai ʻe niʻihi ʻi he ʻaho ní, ʻoku nau tui ko e hoko ʻo tuʻumālié pea kau ʻi he ngaahi mālié ko e meʻa ia ʻokú ne ʻai ha taha ke fiefiá. Ka naʻe ʻilo ʻe Sīsū ʻoku ʻikai ke pehē. ʻI heʻene lave ki ha faikehekehe ʻa ia kuo pau naʻe fakaʻohovaleʻi ai ʻa e tokolahi ʻo ʻene kau fanongó, naʻá ne pehē:

“Ka ʻoiauē ʻa kimoutolu koloaʻiá, he ko hono ngata ʻena ʻo hoʻomou fiemālie ʻoku mou maʻú. ʻOiauē ʻa kimoutolu ʻoku mākoná ni, he te mou fiekaia. ʻOiauē ʻa kimoutolu ʻoku katá ni, he te mou mamahi mo tangi. ʻOiauē ʻa kimoutolu, ʻo ka lauʻi lelei ʻe he kakai fulipē, he ko e meʻa pē ia naʻe fai ʻe heʻenau tamai ʻi muʻá ki he kau palōfita loí.”

Naʻe ʻuhinga ʻa Sīsū ki he hā? Ko e hā ʻoku ʻoiauē ai ʻa e faʻahinga ʻoku koloaʻia, mo nau kata ʻi heʻenau tulitāupau ki he ngaahi mālié pea ʻoku nau saiʻia ʻi hono lauʻi lelei kinautolu ʻe he kau tangatá? ʻOku peheé koeʻuhi ʻi hono maʻu mo lotoʻaki ʻe ha taha ʻa e ngaahi meʻá ni, ʻoku ʻikai leva ke kau ʻi heʻene moʻuí ʻaʻana ʻa e ngāue ki he ʻOtuá, ʻa ē pē ʻokú ne fakahoko mai ʻa e fiefia moʻoní. ʻI he taimi tatau pē, naʻe ʻikai ke ʻuhinga ʻa Sīsū ia ʻe ʻai pē ʻe he hoko ʻo masivá, fiekaiá mo e loto-mamahí ke fiefia ha taha. Kae kehe, ʻoku faʻa tali lelei nai ʻe he kakai faingataʻaʻia peheé ʻa e ngaahi akonaki ʻa Sīsuú, pea ʻi he hoko ʻa e meʻá ni ʻoku tāpuakiʻi ai kinautolu ʻaki ʻa e fiefia moʻoní.

Ko hono hokó, naʻe pehē ʻe Sīsū ʻi heʻene lea ki heʻene kau ākongá: “Ko kimoutolu ko e māsima ʻo e fonuá.” Ko hono moʻoní, naʻe ʻikai te ne ʻuhinga ko e māsima moʻoni kinautolu. Ka, ko e masimá ko e meʻa fakatolonga. Naʻe ʻi ai ha fokotuʻunga māsima lahi ʻo ofi ki he ʻōlita ʻi he temipale ʻo Sihová, pea naʻe ngāueʻaki ia ʻe he kau taulaʻeiki naʻe ngāue aí ke fakamāsimaʻaki ʻa e ngaahi feilaulaú.

Naʻe hoko ʻa e kau ākonga ʻa Sīsuú ko e “māsima ʻo e fonuá” ʻi he ʻuhinga naʻa nau hoko ko e tākiekina fakatolonga ki he kakaí. Ko hono moʻoní, ko e pōpoaki naʻa nau fakahoko atú te ne fakatolonga ʻa e moʻui ʻo e faʻahinga kotoa ʻoku nau tali iá! Te ne fakahoko mai ki he moʻui ʻa e faʻahinga peheé ʻa e ngaahi ʻulungaanga ko e tuʻumaʻu, mateaki mo e anga-tonu, ʻo taʻofi ʻa e hoko ha ʻauhia fakalaumālie mo e fakaeʻulungaangá ʻiate kinautolu.

“Ko kimoutolu ko e māma ʻo māmani,” ko e lea ia ʻa Sīsū ki heʻene kau ākongá. ʻOku ʻikai ke fokotuʻu ha maama ʻi ha lalo kato ka ʻoku fokotuʻu ia ʻi ha tuʻunga-maama, ko ia naʻe pehē ʻe Sīsū: “Pehē foki, ke ulo atu hoʻomou māmá ke hā ki he kakaí.” Naʻe fai ʻeni ʻe he kau ākonga ʻa Sīsuú ʻaki ʻenau ngāue fakamoʻoni fakahāhā, pea pehē foki ʻi heʻenau hoko ko e ngaahi faʻifaʻitakiʻanga ʻoku ulo atu ʻi he fekauʻaki mo e ʻulungaanga ʻoku fehoanaki mo e ngaahi tefitoʻi moʻoni mei he Tohitapú.

Ko ha Tuʻunga Māʻolunga ki Hono Kau Muimuí

Naʻe sio ʻa e kau taki lotú kia Sīsū ko ha tokotaha ia naʻá ne maumauʻi ʻa e Lao ʻa e ʻOtuá pea naʻe aʻu ʻo nau faʻufaʻufono ki mui ke tāmateʻi ia. Ko ia, naʻe fakamatalaʻi ʻe Sīsū ʻi heʻene hoko atu ʻene Malanga ʻi he Moʻungá: “ʻOua te mou mahalo kuó u haʻu ke tāmateʻi ʻa e Laó pe ko e kau Palōfitá. Naʻe ʻikai te u haʻu ke tāmateʻi, ka ke fakakakato.”

Naʻe tokaʻi lahi ʻe Sīsū ʻa e Lao ʻa e ʻOtuá peá ne fakalototoʻaʻi ʻa e niʻihi kehé ke nau toe fai pehē. Ko hono moʻoní, naʻá ne pehē: “Ko ia, ʻilonga ʻa ia te ne tāmateʻi ha taha ʻi he ngaahi tuʻutuʻuní ni ʻoku kihiʻi siʻí, pea ako pehē ki he kakaí, ʻe lau ia ko e ‘kihiʻi siʻi’ ʻi he puleʻanga ʻo hēvaní,” ʻo ʻuhingá heʻikai ʻaupito ke hū ha taha pehē ki he Puleʻangá.

Naʻe ʻikai ʻaupito ke taʻetokaʻi ʻe Sīsū ʻa e Lao ʻa e ʻOtuá, ka naʻá ne fakahalaiaʻi ʻo aʻu ki he ngaahi fakakaukau ʻoku tokoni ki hono maumauʻi ia ʻe ha taha. ʻI he hili ʻa ʻene fakahā naʻe pehē ʻe he Laó, “ʻOua naʻá ke fakapō,” naʻe tānaki atu ʻe Sīsū: “Ka ʻoku ou tala kiate kimoutolu ʻe au, ʻilonga ʻa ia te ne ʻita ki hono kāingá, ʻe fakamāumateaʻi he fakamāuʻanga fakakoló.”

Koeʻuhi ko e fuʻu mafatukituki ʻa hono hokohoko atu ʻa e ʻita ki ha taha, ʻo aʻu ʻo iku atu nai ai ki he fakapō, naʻe fakatātaaʻi ʻe Sīsū ʻa e tuʻunga ʻoku totonu ke aʻu ki ai ha taha ʻi he feinga ke maʻu ʻa e melinó. Naʻá ne fakahinohinoʻi: “Ko ia, ka kuó ke haʻu mo koe ha feilaulau ki he ʻōlitá, ʻo ke toki manatuʻi ai ʻoku ai ha meʻa ʻoku koviʻia ai ho kāingá kiate koe, tuku pē hena hoʻo feilaulaú ʻi he veʻe ʻōlitá, pea ke mole atu muʻa ʻo fakalelei mo ho kāingá, pea ke toki haʻu ʻo ʻatu hoʻo feilaulaú.”

ʻI hono fakahanga ʻa e tokangá ki he fekau hono fitu ʻi he Fekau ʻe Hongofulú, naʻe hoko atu ʻe Sīsū: “Kuo mou fanongo naʻe folofolaʻaki, ‘ʻOua naʻá ke tono.’” Kae kehe, naʻa mo e nōfoʻi ʻa e fakakaukaú ʻo kau ki he tonó naʻe fakahalaiaʻi ia ʻe Sīsū. “Ka ʻoku ou tala kiate kimoutolu ʻe au, ʻilonga ʻa ia te ne hanganaki fakasio ki ha fefine ke tafunaki ʻene holí ki ai, kuó ne tonoʻi ia ʻi hono lotó.”

Naʻe ʻikai ko e lave ʻeni ʻa Sīsū ki ha fakakaukau ʻulungaanga taʻetaau ʻoku maʻalifekina, ʻoku fekauʻaki mo e ‘hanganaki fakasio.’ Ko e hanganaki fakasio peheé ʻokú ne langaʻi ʻa e holi fakakakano, ʻa ia ʻe lava ke iku atu ki he tonó, ʻo ka faingamālie. ʻE lava fēfē ke taʻofi ʻe ha taha ʻa e hoko ʻa e meʻá ni? Naʻe fakatātaaʻi ʻe Sīsū ʻe fiemaʻu nai ke fai ha meʻa lahi, ʻo ne pehē: “Ko ia neongo ko ho mata toʻomataʻú ʻoku fakahingaki koé, kapeʻi ia ʻo liʻaki.  . . . Pea neongo ko ho nima toʻomataʻú ʻoku fakahingaki koé, tuʻusi ia pea liʻaki.”

ʻOku faʻa loto-lelei ʻa e kakaí ki hono tuʻusi ha nima moʻoni ʻoku mahakiʻia kae lava ke fakahaofi ʻenau moʻuí. Kae fakatatau kia Sīsū, ʻoku toe mātuʻaki mahuʻinga lahi ange ke ‘liʻaki’ ha meʻa pē, ʻo aʻu ki ha meʻa ʻoku mahuʻinga ʻo hangē ko e foʻi mata pe ko ha nima, kae lava ke fakaʻehiʻehi mei ha ngaahi fakakaukau mo e ngaahi tōʻonga ʻulungaanga taʻetaau. He ka ʻikai, naʻe fakamatalaʻi ʻe Sīsū, ʻe lī ʻa e kakai peheé ki Kīhena (ko e lingiʻanga veve naʻe tutu ofi ki Selusalema), ʻa ia ʻokú ne fakatātaaʻi ʻa e fakaʻauha taʻengata.

Naʻe toe lave ʻa Sīsū ʻo kau ki he founga ke feangai ai mo e kakai ʻoku nau fakatupunga ʻa e loto-laveá mo e loto-mamahí. “ʻOua naʻa talitekeʻi ho filí,” ko ʻene akonakí ia. “Ka ʻo ka sipiʻi ʻe ha taha ho kouʻahe toʻomataʻú, hanga koe, ʻo fulihi ki ai ho toʻohemá.” Naʻe ʻikai ke ʻuhinga ʻa Sīsū ke ʻoua ʻe maluʻi ʻe ha taha ʻa hono fāmilí pea mo ia tonu ʻo ka ʻohofi. ʻOku ʻikai ke sipiʻi ha taha ʻi he taumuʻa ke lavea, ka ke fakasiʻisiʻiʻi ia. Ko ia, ko e meʻa naʻe leaʻaki ʻe Sīsuú ʻoku ʻuhingá, kapau ʻe feinga ʻe ha taha ke langaʻi ha fuhu pe ha kē ʻi hono sipiʻi ʻaki ʻa e ʻaofi nimá, pe faiʻaki ha ngaahi lea kona, ʻe hala ia ke fai ha sāuni.

ʻI he hili ʻa hono fakahanga ʻe Sīsū ʻa e tokanga ki he lao ʻa e ʻOtuá ke ʻofa ki hoto kaungāʻapí, naʻá ne pehē: “Ka ʻoku ou tala kiate kimoutolu ʻe au: Mou ʻofaʻi homou ngaahi filí, pea hūfia ʻa kinautolu ʻoku nau fakatangaʻi kimoutolú.” Naʻá ne tānaki mai ha ʻuhinga mālohi ke fai pehē, ʻi heʻene pehē: “Koeʻuhi ke mou hokosi hoʻomou Tamai ʻoku ʻi hēvaní, he ʻokú ne fakahopo ʻene laʻaá ki he kakai koví mo e leleí.”

Naʻe fakaʻosi ʻe Sīsū ʻa e konga ko ʻeni ʻo ʻene malangá ʻaki ʻene akonaki: “Ka mou haohaoa pē ʻa kimoutolu, ʻo hangē ʻoku haohaoa ʻa hoʻomou Tamai fakalangí.” Naʻe ʻikai ke ʻuhinga ʻa Sīsuú ʻe lava ke haohaoa ʻa e kakaí ʻi he ʻuhinga kakato. Ka, ʻi heʻenau faʻifaʻitaki ki he ʻOtuá, ʻe lava ke nau fakalahi ʻenau ʻofá, ke fakakau ki ai naʻa mo honau ngaahi filí. Naʻe hiki ʻi he fakamatala huʻufataha ʻa Luké ʻa e ngaahi lea ʻa Sīsuú: “ʻE, mou hokohoko atu ʻo manavaʻofa, ʻo hangē ʻoku manavaʻofa ʻa hoʻomou Tamaí.”

Lotu, pea Falala ki he ʻOtuá

ʻI he hoko atu ʻe Sīsū ʻa ʻene malangá, naʻá ne fakahalaiaʻi ʻa e mālualoi ʻa e kakai ʻoku nau fiehāʻaki ʻenau anga-fakaʻotua ʻa ē ʻoku nau taku ʻoku nau maʻú. “ʻO ka ke ka fai ha foaki,” ko ʻene leá ia, “ʻoua naʻá ke ifi ha meʻalea ke fakahā koe, ʻo hangē ko e fai ʻe he kau mālualoí.”

“Pea,” naʻe hoko atu ʻe Sīsū, “ʻoka mou ka lotu, ʻe ʻikai te mou hangē ko e kau mālualoí; he ʻoku nau manako ke tuʻu ʻi he falelotú mo e tuliki ʻo e malaʻé ke fai ʻenau lotú, koeʻuhi ke nau hā ki he kakaí.” Ka, naʻá ne fakahinohino mai: “Ka ko koe, ʻo ka ke ka lotu, hū ki ho lokí, pea tāpuni ho matapaá, pea fai hoʻo huú ki hoʻo Tamai ʻa ia ʻoku ʻi he liló.” Naʻe fai ʻe Sīsū tonu ʻa e ngaahi lotu fakahāhā, ko ia naʻe ʻikai te ne fakahalaiaʻi ʻa e meʻa ko iá. Ko e meʻa naʻá ne talatalaakiʻí ko e ngaahi lotu ʻoku fai ke maongo ki he faʻahinga ʻoku fanongó pea ke maʻu ʻenau fakamāloó.

Naʻe toe akonaki ʻa Sīsū: “ʻI hoʻomou ngāhi lotú, ʻoua te mou toutou leaʻaki ʻa e ngaahi meʻa tatau, ʻo hangē ko ia ʻoku fai ʻe he kakai ʻo e ngaahi puleʻangá.” Naʻe ʻikai ke ʻuhinga ʻa Sīsū ʻoku hala ʻa hono toe ʻai ha meʻa. ʻI he taimi ʻe taha naʻá ne “toe fai ʻaki ʻa e lea” ʻe ia tonu ʻi heʻene lotú. Ka ko e meʻa naʻe ʻikai te ne loto ki aí ko hono leaʻaki ʻa e ngaahi kupuʻilea maʻuloto “ʻo toutou leaʻaki,” ʻo hangē ko e founga ʻoku fai ʻe he faʻahinga ʻoku nau toutou leaʻaki pē ʻenau ngaahi lotú ʻi heʻenau ala ki he ngaahi foʻi kula.

Naʻe tokonaki ʻe Sīsū ki heʻene kau fanongó ha sīpinga lotu ke tokoniʻi kinautolu ke lotu pea ʻoku kau ki ai ʻa e ngaahi kole ʻe fitu. Ko e ʻuluaki kole ʻe tolú ʻoku nau fakamoʻoniʻi ʻa e tuʻunga-hau ʻo e ʻOtuá pea mo ʻene ngaahi taumuʻá. Ko e ngaahi kole ia ke fakamāʻoniʻoniʻi ʻa e huafa ʻo e ʻOtuá, ke hoko mai hono Puleʻangá, pea ke fai hono finangaló. Ko e ngaahi kole ʻe fā kehé ko e ngaahi kole fakafoʻituitui, ke maʻu ʻa e meʻatokoni he ʻaho taki taha, ke fakamolemoleʻi ʻete ngaahi angahalá, ke ʻoua ʻe ʻahiʻahiʻi kita ʻo mahulu ange ʻi he meʻa ʻoku lava ke te kātakiʻí pea ke fakahaofi kita mei he tokotaha anga-fulikivanú.

Naʻe hoko atu ʻe Sīsū ʻo ne lave ki he tauhele ko hono fakamamafaʻi ʻo fuʻu hulu ʻa e ngaahi koloa fakamatelié. Naʻá ne naʻinaʻi: “ʻOua naʻa faʻoaki koloa maʻamoutolu ʻi māmani, he ko e potu ia ʻoku keina ai ʻe he ané mo e ʻumeʻumeá, pea haea ʻe he kau kaihaʻá ʻo nau kaihaʻasi.” ʻOku ʻikai ke ngata pē ʻi he ʻauha ngofua ʻa e ngaahi koloa peheé ka ʻoku ʻikai te nau langa hake ha tuʻunga lelei mo e ʻOtuá.

Ko ia ai, naʻe pehē ʻe Sīsū: “Kae faʻoaki koloa maʻamoutolu ʻi langi.” ʻOku fai ʻa e meʻá ni ʻaki hono fakamuʻomuʻa ʻi hoʻo moʻuí ʻa e ngāue ʻa e ʻOtuá. ʻOku ʻikai ha taha ʻe lava ke ne toʻo ʻa e lelei ʻoku tau tānaki ʻi he ʻao ʻo e ʻOtuá pe ko e pale lahi ʻo e meʻa ko iá. Pea naʻe tānaki atu ʻe Sīsū: “He ko e potu ʻoku ʻi ai hoʻo koloá, ʻe ʻi ai foki mo ho lotó.”

ʻI he lave lahi ange ʻa Sīsū ki he tauhele ko e holi ke maʻu ʻa e koloa fakamatelié, naʻe fai ʻe Sīsū ʻa e talanoa fakatātā: “Ko e maamaʻanga ʻo e sinó ko e matá. Ko ia, kapau ʻoku huʻufataha ʻa e sio ʻa ho matá, ʻe māma pē ho sinó kotoa; ka ka kovi ho matá, pea ʻe fakapoʻuli ho sinó kotoa.” Ko e mata ʻoku ngāue totonú ʻoku hangē ia ha maama ʻi ha feituʻu poʻuli ki he sinó. Ka ke tonu ʻa e sió, kuo pau ke huʻufataha ʻa e sio ʻa e matá, pe kuo pau ke ʻata-lelei ki ha meʻa pē ʻe taha. Ko e mata ʻoku ʻikai ke ʻata-leleí ʻoku iku atu ki he fakafuofua hala ʻo kau ki he ngaahi meʻa, ki hono fakamuʻomuʻa ʻa e ngaahi meʻa fakamatelié ʻi he ngāue ʻa e ʻOtuá, pea ko hono ikuʻangá ʻoku fakapoʻuli ai ʻa e “sinó kotoa.”

Naʻe tumutumuʻaki ʻe Sīsū ʻa e meʻá ni ʻaki ʻa e talanoa fakatātā mālohi: “ʻOku ʻikai ke lava ʻe ha taha ke ne ʻeikiʻaki ha ʻeiki ʻe toko ua; he te ne fehiʻa ki he taha kae ʻofaʻi ʻa e taha, pe te ne piki ki he taha kae taʻetokaʻi ʻa e taha. ʻOku ʻikai te mou lava ke ʻeikiʻaki ʻa e ʻOtuá mo Koloa fakatouʻosi.”

ʻI he hili ʻa hono fai ʻa e akonakí ni, naʻe fakapapauʻi ʻe Sīsū ki heʻene kau fanongó ʻoku ʻikai ke fiemaʻu ke nau loto-moʻua ʻo kau ki heʻenau ngaahi fiemaʻu fakamatelié ʻo kapau te nau fakamuʻomuʻa ʻa e ngāue ʻa e ʻOtuá. “Vakai ange e fanga manupuna ʻo e ʻataá,” ko ʻene leá ia, “he ʻoku nau tūtūʻi pe tuʻusi, pe faʻoaki feleoko? Ka ʻoku fafanga kinautolu ʻe hoʻomou Tamai Fakalangí.” Naʻá ne toki ʻeke leva: “ʻIkai ʻoku mou mahuʻinga noa pē ʻiate kinautolu?”

Ko hono hokó, naʻe lave ʻa Sīsū ki he ngaahi lile ʻo e ngoué ʻo ne fakatokangaʻi “naʻa mo Solomone, ʻi heʻene ʻai hono nāunaú kotoa, naʻe ʻikai ke vahaʻa teungaʻia ai ha taha ʻo e ngaahi lilé ni.” “Pea kapau,” naʻá ne hoko atu ʻo pehē, “kuo kofu fakatafuʻufuʻu pehē ʻe he ʻOtuá ʻa e mohuku ʻo e kelekelé, . . . huanoa ʻa kimoutolu, ʻa e kau tui vaivai?” Ko ai ai, naʻe fakaʻosiʻaki ʻe Sīsū ʻo pehē: “ʻOua te mou lotomoʻua, ʻo mou pehē, ‘Te tau kai ai e hā mo inu e hā?’ mo ‘kofuʻaki ʻa e ha?’ . . . ʻOku meaʻi ʻe hoʻomou Tamai Fakalangí ʻoku tāu mo kimoutolu ʻa e ngaahi meʻa ko iá kotoa. Ka mou fuofua kumi muʻa ki hono puleʻangá, mo e māʻoniʻoni ʻaʻaná, pea ʻe ʻatu mo ia foki ʻa e ngāhi meʻa ko iá kotoa.”

Ko e Hala ki he Moʻuí

Ko e hala ki he moʻuí ko e nofo maʻu ʻi he ngaahi akonaki ʻa Sīsuú. Ka ʻoku ʻikai ko e meʻa faingofua ʻeni ke fai. Ko e fakatātaá, ko e kau Fālesí naʻa nau hehema ke fakamāuʻi fefeka ʻa e niʻihi kehé, pea ʻoku ngalingali naʻe faʻifaʻitaki ʻa e tokolahi kiate kinautolu. Ko ia ʻi he hoko atu ʻe Sīsū ʻa ʻene Malanga ʻi he Moʻungá, naʻá ne fai ʻa e akonaki ko ʻení: “ʻOua naʻa mou fakamaau, telia naʻa fakamāua kimoutolu; he ko e anga ko ia ʻoku mou fakamaau ʻakí, ʻe fakamāua ai ʻa kimoutolu.”

ʻOku fakatuʻutāmaki ke muimui ki he tataki ʻa e kau Fālesi mātuʻaki fakaangá. Fakatatau ki he fakamatala ʻa Luké, naʻe fakatātaaʻi ʻe Sīsū ʻa e fakatuʻutāmaki ko ʻení ʻaki ʻene pehē: “ʻE lava koā ʻe ha kui ke takihala ki ha kui, ʻo? ʻIkai te na fakatou tō ki ha luo?”

Ko e hia mafatukituki ʻa hono fuʻu fakaangaʻi ʻa e niʻihi kehé, ʻo fakaeʻa lahi ʻenau ngaahi melé pea siosiofi kinautolu. Ko ia naʻe ʻeke ʻe Sīsū: “Te ke lea fēfē ki ho tokouá, ‘ʻE, tuku ke u toʻoa mai ʻa e malamalaʻi ʻakau mei ho matá’; ka tā ko e fuʻu lalango ʻena ʻi ho mata ʻoʻoú? Mālualoi! Motuʻa toʻo mai mei hoʻoú mata ʻa e lalangó, pea te ke toki sio totonu ke toʻo ʻa e malamalaʻi ʻakau mei he mata ʻo ho tokouá.”

ʻOku ʻikai ke ʻuhinga ʻeni naʻe ʻikai totonu ke ʻiloʻilo ʻa e kau ākonga ʻa Sīsuú ʻi he fekauʻaki mo e kakai kehé, he naʻá ne pehē: “ʻOua naʻa ʻange ʻa e ngaahi meʻa tapú ki he fanga kulií, pe laku hoʻomou ngaahi mataʻitofé ki he fanga puaká.” ʻOku toputapu ʻa e ngaahi moʻoni mei he Folofola ʻa e ʻOtuá. ʻOku nau hangē ko e ngaahi mataʻitofe fakaefakatātaá. Ka ʻo kapau ʻoku ʻi ai ha niʻihi, ʻa ia ʻoku nau hangē ko e fanga kulií pe fanga puaká, ʻo ʻikai te nau fakahā ha houngaʻia ʻi he ngaahi moʻoni mahuʻinga ko iá, ʻoku totonu ke mavahe ʻa e kau ākonga ʻa Sīsuú mei he kakai peheé pea fekumi ki he faʻahinga ʻoku ʻatamai-fiefanongo angé.

Neongo naʻe talanoa ʻa Sīsū ʻo kau ki he lotú ʻi he konga ki muʻa ʻo ʻene Malanga ʻi he Moʻungá, naʻá ne fakamamafaʻi heni ʻa e fiemaʻu ke kīvoi ʻi hono fai iá. “Hanganaki kole,” naʻá ne naʻinaʻi, “pea ʻe foaki kiate kimoutolu.” Ke fakatātaaʻi ʻa e loto-lelei ʻa e ʻOtuá ke tali ʻa e ngaahi lotú, naʻe ʻeke ʻe Sīsū: “Ko e tangata fē ʻiate kimoutolu, ka kole ki ai ʻe hono fohá ha foʻi mā, te ne ʻange koā ha foʻi maka? . . . Pea kapau ā ʻoku mou ʻilo ke foaki meʻaʻofa lelei ki hoʻomou fānaú, neongo ko e faʻahinga kovi kimoutolu, huanoa hoʻomou Tamai ʻoku ʻi hēvaní, haʻane foaki meʻa lelei kiate kinautolu ʻoku kole kiate iá.”

Naʻe toki fakahā leva ʻe Sīsū ʻa e meʻa kuo hoko ko ha lao ongoongoa ʻo e ʻulungaangá, ʻa ia ʻoku faʻa ui ko e Lao Koulá. Naʻá ne pehē: “Ko ia ʻilonga ha meʻa ʻoku mou loto ke fai ʻe he kakaí kiate kimoutolu, fai pehē foki kiate kinautolu.” ʻI he moʻuiʻaki ʻa e lao ko ʻení ʻoku kau ʻa e ngāue pau ʻi he fai lelei ki he niʻihi kehé, ʻo fai ange kiate kinautolu ʻa e meʻa ʻokú ke loto ke fai atu kiate koé.

Naʻe fakahā ʻoku ʻikai ke faingofua ʻa e hala ko ia ki he moʻuí ʻi he fakahinohino ʻa Sīsū ʻo pehē: “Mou hū ʻi he matapā fāsiʻí; he ʻoku fālahi ʻa e matapaá, pea ʻatā ʻa e hala ʻoku fakatau ki malá, pea tokolahi ʻa e kakai ʻoku hū atu aí; koeʻuhi ʻoku fāsiʻi ʻa e matapaá, pea ʻefiʻefi ʻa e hala ʻoku fakatau ki he moʻuí, pea tokosiʻi ʻa e kakai ʻoku ʻilo iá.”

ʻOku lahi ʻa e malava ke takihalaʻi kitá, ko ia naʻe fakatokanga mai ʻa Sīsū: “Ka mou lamalama ʻa e kau palōfita loí, ʻa e faʻahinga ʻoku haʻu kiate kimoutolu ʻoku nau kofu hangē ha sipí, ka ʻi loto ko e fanga ulofi fekai kinautolu.” Naʻe fakatokangaʻi ʻe Sīsū naʻa mo e ngaahi ʻakau leleí pea mo e ngaahi ʻakau koví ʻe lava ke ʻiloʻi mei honau fuá, ʻe lava ke ʻiloʻi ʻa e kau palōfita loí mei heʻenau angafaí mo e ngaahi akonakí.

Naʻe hoko atu ʻe Sīsū ʻo ne fakamatalaʻi ʻoku ʻikai ko e meʻa pē ʻoku leaʻaki ʻe ha taha ʻokú ne ʻai ia ko ʻEne ākongá ka ko e meʻa ʻokú ne faí. ʻOku taku ʻe he kakai ʻe he niʻihi ko Sīsuú ko honau ʻEikí ia, ka ʻo kapau ʻoku ʻikai te nau fai ʻa e finangalo ʻo ʻene Tamaí, ʻokú ne pehē: “Te u toki vete kiate kinautolu hoku lotó, ʻo pehē, Teʻeki te u ʻiloa kimoutolu! ʻAlu meiate au, ʻa e kau maumau lao.”

Fakaʻosí, naʻe ʻai ʻe Sīsū ki heʻene malangá ʻa e fakamulituku ʻoku taau ke manatuʻi. Naʻá ne pehē: “ʻIlonga ʻa ia ʻokú ne fanongo ki he ngaahi talá ni ʻaʻakú, mo ne fai ki aí, te u fakatatau ia ki he tangata fakapotopoto, ʻa ia naʻá ne langa hono falé ki he maká. Pea naʻe tō ʻa e ʻuha, pea tafe mai ʻa e ngaahi vai, pea angi ʻa e ngaahi matangi, ʻo nau faʻafaʻaki ki he fale ko iá, ka naʻe ʻikai holo, he ne tuʻunga ki he maká.”

ʻI he tafaʻaki ʻe tahá, naʻe fakahā ʻe Sīsū: “Ka ʻilonga ʻa ia ʻokú ne fanongo ki he ngaahi talá ni ʻaʻakú, kae ʻikai fai ki aí, ʻe fakatatau ia ki he tangata vale, ʻa ia naʻá ne langa hono falé ki he ʻoneʻoné. Pea naʻe tō ʻa e ʻuhá, pea tafe mai ʻa e ngaahi vaí, pea angi ʻa e ngaahi matangí, ʻo nau tuki ki he fale ko iá, pea holo ia, pea ko e holo ʻo e fale ko iá ko e holo lahi.”

ʻI he ʻosi ʻa hono fai ʻe Sīsū ʻa ʻene malangá, naʻe moʻutāfuʻua ʻa e fuʻu kakaí ʻi he anga ʻo ʻene faiakó, he naʻá ne akoʻi kinautolu ʻo taau mo ha tokotaha ʻokú ne maʻu ʻa e mafai kae ʻikai hangē ko honau kau taki lotú. Luke 6:​12-23; Mātiu 5:​1-12; Luke 6:​24-26; Mātiu 5:​13-48; 6:1-34; 26:​36-45; 7:​1-29; Luke 6:​27-49.

▪ Naʻe ʻi fē ʻa Sīsū ʻi heʻene fai ʻene malanga ʻa ia ʻoku taau lahi taha ke manatuʻí, ko hai naʻe ʻi aí, pea ko e hā ʻa e meʻa naʻe hoko ki muʻa siʻi peá ne fai iá?

▪ Ko e hā ʻoku ʻikai ko e meʻa fakaʻohovale ai ia ʻa hono hiki ʻe Luke ha fakamatala ʻo kau ki he ngaahi akonaki mei he malangá ʻi ha tuʻunga kehe?

▪ Ko e hā ʻa e meʻa ʻokú ne ʻai ʻa e malanga ʻa Sīsuú ke ʻaonga lahí?

▪ Ko hai ʻoku fiefia moʻoní, pea ko e hā hono ʻuhingá?

▪ Ko hai ʻoku ʻoiaueé, pea ko e hā hono ʻuhingá?

▪ ʻI he founga fē naʻe hoko ai ʻa e kau ākonga ʻa Sīsuú ko e “māsima ʻo e fonua” pea mo e “māma ʻo māmani”?

▪ Naʻe fakahaaʻi fēfē ʻe Sīsū ʻa e tokaʻi lahi ki he Lao ʻa e ʻOtuá?

▪ Ko e hā ʻa e fakahinohino naʻe fai ʻe Sīsū ke toʻo ʻaupito ʻa e ngaahi meʻa ʻoku nau fakatupunga ʻa e fakapoó mo e tonó?

▪ Naʻe ʻuhinga ki he hā ʻa Sīsū ʻi heʻene lave ki hono fulihi atu ʻa e kouʻahe ʻe tahá?

▪ ʻE lava fēfē ke tau haohaoa ʻo hangē ko ia ʻoku haohaoa ʻa e ʻOtuá?

▪ Ko e hā ʻa e ngaahi fakahinohino ʻo kau ki he lotú naʻe tokonaki mai ʻe Sīsuú?

▪ Ko e hā ʻoku lelei ange ai ʻa e ngaahi koloa fakahēvaní, pea ʻi he founga fē ʻoku maʻu ai kinautolú?

▪ Ko e hā ʻa e ngaahi talanoa fakatātā naʻe fai ke tokoniʻi ha taha ke fakaʻehiʻehi mei he holi ke maʻu ʻa e ngaahi meʻa fakamatelié?

▪ Ko e hā naʻe pehē ai ʻe Sīsū ʻoku ʻikai fiemaʻu ke tau loto-moʻuá?

▪ Ko e hā naʻe leaʻaki ʻe Sīsū ʻo kau ki hono fakamāuʻi ʻa e niʻihi kehé; ka naʻá ne fakahaaʻi fēfē ʻoku fiemaʻu ki heʻene kau ākongá ke nau ʻiloʻilo ʻi he feangai mo e kakaí?

▪ Ko e hā ʻa e toe meʻa naʻe leaʻaki ʻe Sīsū ʻo fekauʻaki mo e lotú, pea ko e hā ʻa e lao ʻo kau ki he ʻulungaangá naʻá ne ʻomaí?

▪ Naʻe fakahaaʻi fēfē ʻe Sīsū heʻikai ke faingofua ʻa e hala ki he moʻuí pea ʻoku ʻi ai ʻa e fakatuʻutāmaki ʻo hono takihalaʻi ha tahá?

▪ Naʻe fēfē hono fakaʻosiʻosi ʻe Sīsū ʻa ʻene malangá, pea ko e hā ʻa e ola ʻo ʻene malangá?