Loto ke Koloaʻia Fakalaumālie

KO E hoko ʻo koloaʻia fakamatelié ʻoku fiemaʻu ki ai ʻa e feinga mo e feilaulau ʻosi fakapapauʻi. ʻOku pehē pē mo e hoko ʻo koloaʻia fakalaumālié. Naʻe fakahaaʻi eni ʻe Sīsū ʻi heʻene pehē: “Faʻoaki koloa maʻamoutolu ʻi langi.” (Fakaʻītali ʻamautolu; Mātiu 6:20) ʻOku ʻikai fokotuʻuna ʻa e koloa fakalaumālié ʻiate ia pē. Ko e kau pē ki ha lotú heʻikai ʻai ai ha tokotaha ke koloaʻia fakalaumālie ʻo hangē pē ko e ʻikai ke ʻai ia ke ne tuʻumālie fakapaʻanga ʻi he ʻi ai haʻane tohi pangikeé. Ko hono fakatupulekina ha vahaʻangatae fekoekoeʻi mo e ʻOtuá, hoko ko ha tokotaha fakalaumālie pea hoko ʻo koloaʻia ʻi he ngaahi ʻulungāanga fakalaumālié ʻoku fiemaʻu ki ai ʻa e loto fakapapauʻi, taimi, feinga mo e feilaulau papau.—Palovepi 2:​1-6.

ʻE Lava Ke Ke Maʻu Fakatouʻosi?

ʻIkai koā ʻe lava ke maʻu fakatouʻosi ʻe ha taha ʻa e koloa fakalaumālié mo ha ngaahi meʻa fakamatelie hulu fau? Mahalo pē, ka ko e taha pē ʻi he ongo meʻá ni ʻe lava ke tuli lavameʻa ki aí. Naʻe pehē ʻe Sīsū: “ʻOku ʻikai te mou lava ke eikiʻaki ʻa e ʻOtua mo Koloa fakatouʻosi.” (Mātiu 6:24e) Ko e hā hono ʻuhingá? Koeʻuhi ko e tuli ki he ngaahi koloa fakalaumālié mo fakamatelié ʻoku fakahuʻunga ʻe hoko ai ha fepaki. ʻOku halalotoʻapi ʻa e taha ko ē ʻi hē. Ko ia ai, ki muʻa ke tala ki heʻene kau ākongá ke nau faʻoaki ʻa e ngaahi koloa fakalaumālié, naʻe pehē ʻe Sīsū: “ʻOua naʻa faʻoaki koloa maʻamoutolu ʻi mamani.”—Fakaʻītali ʻamautolu; Mātiu 6:19.

Kapau ʻoku liʻaki ʻe ha taha ʻa e akonaki ʻa Sīsuú pea feinga ke tuli fakatouʻosi ki he koloa fakalaumālié mo e fakamatelié, ko e hā ʻe hokó? Naʻe pehē ʻe Sīsū: “ʻOku ʻikai ke lava ʻe ha taha ke ne ʻeikiʻaki ha ʻeiki ʻe toko ua: he te ne fehiʻa ki he taha kae ʻofaʻi ʻa e taha, pe te ne piki ki he taha kae taʻetokaʻi ʻa e taha.” (Mātiu 6:24a) ʻI he taimi ʻoku tuli fakatouʻosi ai ki ai ha tahá, ko e ngaahi meʻa fakalaumālié leva, neongo kapau ʻoku fai ia ʻi he ongoʻi ko ha fatongia, ʻe vakai nai ki ai ko ha meʻa fakahohaʻa ʻoku hā ngali maʻu pē ko ha fakafaingataʻaʻiaʻanga. ʻI he ʻikai ke hanga ki he ʻOtuá, ʻe aʻu nai ʻo hanga ha taha ki he paʻangá mo e meʻa ʻoku fakatau mai ʻakí ko e ongo founga tefito ia ke fekuki ai mo e ngaahi loto-moʻua ʻi he moʻuí. ʻOku hangē ia ko e lea ʻa Sīsuú: “Ko e potu ʻoku ʻi ai hoʻo koloa, ʻe ʻi ai foki mo ho loto.”—Mātiu 6:21.

ʻOku lelei ki he Kalisitiane taki taha ke ne fakakaukau fakamātoato ki he akonaki Fakatohitapu ko iá ki muʻa ke ne fili pe ko fē ʻe fakahangataha ki ai hono taimí, ko ʻene tokangá pea mo hono lotó. Koeʻuhí pē ʻoku ʻikai ke ʻomai ʻe he ʻOtuá ha ngaahi fakangatangata pau ki he lahi ʻo e meʻa ʻoku lava ke maʻu ʻe ha Kalisitiané ʻoku ʻikai ʻuhinga ai iá ko ʻEne ngaahi fakatokanga fekauʻaki mo e mānumanú ʻoku ʻikai kau ki ai ha tautea. (1 Kolinito 6:​9, 10) Ko e faʻahinga ʻoku nau tukunoaʻi ʻa e akonaki Fakatohitapú pea fakatupulekina ha loto ke koloaʻiá ʻoku nau faingataʻaʻia fakalaumālie, fakaeʻatamai mo fakaeongo, hangē ko ia kuo tau sio ki aí. (Kaletia 6:7) ʻI hono kehé, naʻe pehē ʻe Sīsū ko e faʻahinga ko ia ʻoku nau lāuʻilo ki heʻenau ngaahi fiemaʻu fakalaumālié te nau fiefia. (Mātiu 5:3) Ko e moʻoni ko hotau Tokotaha-Fakatupú mo hono ʻAló ʻokú na ʻiloʻi ʻa e meʻa ʻoku lelei taha ki heʻetau fiefiá mo e leleí!—Aisea 48:​17, 18.

Fili Heʻikai Te Ke Fakaʻiseʻisa Ai

Ko e hā te ke tokangataha ki aí, ko e ʻOtuá pe ko e koloá? ʻOku hā mahino kuo pau ke tau fai ha tokanga ki heʻetau ngaahi fiemaʻu fakamatelié. ʻI heʻene ʻuluaki tohi kia Tīmoté, naʻe pehē ai ʻe he ʻapositolo ko Paulá: “Ka ʻo ka ai ha taha ʻoku ʻikai tokanga ki hono kainga, kaeʻumaʻā hono famili, ʻoku ne fakaʻikaiʻi ʻene lotu, ʻio, ʻoku ne koviange ʻi ha hiteni.” Naʻe toe fakalototoʻaʻi ʻe Paula ʻa e kau Kalisitiané ke tuʻu ʻenau falalá, ʻo ʻikai ʻi he paʻangá, ka ʻi he ʻOtuá pea “ke nau koloaʻia ʻi he ngāue lelei.” (1 Timote 5:8; 6:​17, 18) Ko e hā te ke tokangataha ki aí? Ko e hā te ke tuli ki aí? ʻOku muʻomuʻa ʻi he ngaahi ngāue lelei naʻe lave ki ai ʻa Paulá ʻa e ngāue fakamalanga mo e ngaohi-ākonga naʻe ʻoange ʻe Sīsū ki heʻene kau ākongá ke nau faí. (Mātiu 28:​19, 20) ʻI he taimi ʻoku fakafaingofuaʻi loto-lelei ai ʻe he kau Kalisitiané ʻenau moʻuí, ʻo ʻikai ke kiʻi mālōlō pē pea fiefia ʻi he moʻuí ka ke kau lahi ange ʻi he ngāue mohu ʻuhinga ko ení, ʻoku nau “faʻoaki ai maʻanautolu ha tuʻunga lelei ki he ʻamui” ʻi he māmani foʻou kuo talaʻofa ʻe he ʻOtuá. Pea naʻa mo e taimí ni ʻoku nau ʻiloʻi ai ko e ngaahi koloa fakalaumālié “hono ʻikai ngutuhuaange ia ʻi he maʻu ha koula”!—1 Timote 6:19; Palovepi 16:16; Filipai 1:10.

Fakakaukau angé ki he hokosia ʻa Eddie, ʻa ia ko hono fāmilí naʻa nau hoko ko e Kau Fakamoʻoni ʻa Sihova ʻi heʻene kei siʻí. ʻI he taimi ʻe taha ne mole ai mei he fāmilí ʻenau koloá kotoa, pea naʻe pau ai ke nau hiki mei honau ʻapí. ʻOku fakamatala ʻa Eddie: “Naʻá ku hohaʻa maʻu pē fekauʻaki mo e meʻa ʻe hokó ʻo kapau te mau aʻu ki he tuʻunga te mau halaʻatā moʻoni ai mo ha meʻá. Sai, he taimi ko iá ne mau halaʻatā mo ha meʻa. Pea ʻoku mou ʻilo ʻa e meʻa naʻe hokó? Halaʻatā ke hoko ha meʻa! Naʻa mau kei kai pē, inu mo maʻu ha vala. Naʻe tokonaki mai ʻa Sihova, pea naʻe faifai pē ʻo mau fakaakeake mei he mole ne hokó. Naʻe akoʻi au ʻe he hokosia ko ení ke u tokanga fakamātoato ki he meʻa naʻe talaʻofa mai ʻe Sīsū ʻi he Mātiu 6:33—ʻa ia kapau te tau ʻai ʻa e Puleʻanga ʻo e ʻOtuá ko e meʻa muʻomuʻa ia ʻi heʻetau mouí, ʻoku ʻikai ʻaupito fiemaʻu ke tau loto-moʻua fekauʻaki mo ʻetau ngaahi fiemaʻu fakamatelié.” ʻI he ʻahó ni ʻoku ngāue ai ʻa Eddie ko ha faifekau fefonongaʻaki taimi-kakato, ʻo ʻalu fakataha mo hono uaifí. ʻOkú na maʻu ʻa e meʻa fakamatelie ʻokú na fiemaʻú. Ko e meʻa mahuʻinga angé, ʻokú na tuʻumālie fakalaumālie.

Ngaahi ʻAonga Taʻefaʻalaua

ʻI he ʻikai hangē ko e ngaahi koloa ʻi he māmaní, ʻa ia ʻoku lava ke kaihaʻasi ʻe he kau kaihaʻá, ko e koloa fakalaumālié ʻoku lava ke tuʻuloa. (Palovepi 23:​4, 5; Mātiu 6:​20) Ko e moʻoni ko e fakalakalaka fakalaumālié ʻoku faingataʻa ange ke fakafuofuaʻi. ʻOku ʻikai faingofua ke fakapapauʻi ʻa e lahi kuo aʻu ki ai ha taha ʻi he ʻofá, fiefiá, pe tuí ʻo hangē ko ia ko hono fakapapauʻi ʻa ʻete laka ki muʻa fakapaʻangá. Ka ko e ngaahi pale ʻo e koloa fakalaumālié ʻoku taʻefaʻalaua. ʻI he lau ki he kau ākonga ʻa ia te nau liʻaki naʻa mo honau falé mo e ngoué, ʻio, ʻa e meʻa ʻoku maʻu mei ai ʻenau moʻuí, ke fakaʻataʻatā ki he ngaahi meʻa fakalaumālié, naʻe pehē ʻe Sīsū: “Ko au e, ʻoku ou tala atu, ʻOku ʻikai ha taha kuo ne liʻaki ha fale, pē ha ngaahi tokoua, pe ha ngaahi tuofāfine, pe ha fāʻe, pe ha tamai, pe ha fanau, pe ha ngaahi tokanga ngoue, koeʻuhi ko au, pea koeʻuhi ko e Kōsipeli, ka te ne maʻu ni, ʻi he nofo ko eni, ʻo lōteau, ha ngaahi fale, mo ha ngaahi tokoua, mo ha ngaahi tuofāfine, mo ha ngaahi fāʻe, mo ha fānau, mo ha ngaahi tokanga ngoue, ʻo ō pe mo e ngaahi fakatanga; pea ʻi he maama ka haʻu ko e moʻui taʻengata.”—Maake 10:​29, 30.

Ko e hā te ke fakamuʻomuʻa ʻi hoʻo moʻuí? Ko e ʻOtuá pe ko e koloá?

[Fakatātā ʻi he peesi 8, 9]

ʻOkú ke tuli ki he koloa fakamatelié . . .

. . . pe ko e koloa fakalaumālié?