Founga Hono Fakafofongahalaʻi ʻe he Lotu Loí ʻa e ʻOtuá

Kapau ko e ʻOtuá ko e ʻofa, ko e hā kuo fakahoko ai ʻe he ngaahi lotú ʻa e ngaahi tōʻonga kovi lahi pea taku ʻoku nau fakafofongaʻi iá? Ko hono moʻoní, ko e ngaahi lotu ko ení ʻoku loi. Ko e meʻa ʻoku nau leaʻaki mo faí ʻoku nau ʻai ʻa e kakaí ke tui ki he ngaahi loi fekauʻaki mo e ʻOtuá. Kuo anga-fēfē ʻenau fakafofongahalaʻi iá? ʻOku anga-fēfē ʻene ongoʻi fekauʻaki mo iá? Pea ko e hā te ne fai fekauʻaki mo iá?

1. Kuo anga-fēfē hono fakafofongahalaʻi ʻe he lotu loí ʻa e ʻOtuá ʻaki ʻene ngaahi akonakí?

Ko e lotu loí kuó ne “fetongi ʻa e moʻoni ʻa e ʻOtuá ʻaki ʻa e loí.” (Loma 1:25) Ko e fakatātaá, ko e ngaahi lotu lahi kuo ʻikai ke nau akoʻi ʻa e huafa ʻo e ʻOtuá ki honau kau muimuí. Neongo ia, ʻoku pehē ʻe he Tohi Tapú ko e huafa ʻo e ʻOtuá kuo pau ke ngāueʻaki. (Loma 10:13, 14) ʻOku pehē ʻe he kau taki lotu ʻe niʻihi, ʻi he taimi ʻoku hoko ai ha meʻa fakalilifu, ko e finangalo pē ia ʻo e ʻOtuá. Ka ko ha loi ia. ʻOku ʻikai ʻaupito ko e ʻOtuá ʻokú ne fakatupunga ʻa e ngaahi meʻa ʻoku koví. (Lau ʻa e Sēmisi 1:13.) Ko e meʻa fakamamahí, ko e ngaahi loi kuo akoʻi ʻe he ngaahi lotú kuó ne ʻai ʻa e kakaí ke faingataʻa ke nau ʻofa ki he ʻOtuá.

2. Kuo anga-fēfē hono fakafofongahalaʻi ʻe he lotu loí ʻa e ʻOtuá ʻaki ʻene ngaahi meʻa ʻoku faí?

Ko e lotu loí ʻoku ʻikai ke nau fakafeangai ki he kakaí ʻo hangē ko Sihová. ʻOku pehē ʻe he Tohi Tapú ko e angahala ʻo e lotu loí “kuo fokotuʻuna ʻo aʻu hake ki he langí.” (Fakahā 18:5) ʻI he laui senituli, ko e ngaahi lotú kuo nau kaunoa ʻi he ngaahi meʻa fakapolitikalé, poupouʻi ʻa e ngaahi taú ʻo fakatupunga pe fakaʻatā ʻa e mate ʻo e fuʻu kakai tokolahi. Ko e kau taki lotu ʻe niʻihi ʻoku nau moʻui fakatuʻumālie pea kounaʻi ʻa e paʻanga mei honau kau muimuí ke totongiʻaki ia. Ko e ngaahi tōʻonga ko ení ʻoku fakamoʻoniʻi ai ʻoku ʻikai ke nau ʻiloʻi ʻa e ʻOtuá pea ʻoku ʻikai ai ʻi ai hanau totonu ke fakafofongaʻi ia.​—Lau ʻa e 1 Sione 4:8.

3. ʻOku anga-fēfē ongoʻi ʻa e ʻOtuá fekauʻaki mo e lotu loí?

Kapau ʻokú ke ʻita ʻi he ngaahi meʻa ʻoku fai ʻe he lotu loí, ʻoku fēfē ʻa e ongoʻi ʻa Sihová? ʻOkú ne ʻofa ʻi he kakaí ka ʻokú ne ʻita ʻi he kau taki lotu ʻoku nau fakafofongahalaʻi ia pea ngaohikoviʻi honau kau muimuí. ʻOkú ne talaʻofa ʻe fakaʻauha ʻa e lotu loí pea “ʻe ʻikai ʻaupito ke toe ʻiloa ia.” (Fakahā 18:21) ʻOku vavé ni ke fakaʻauha ʻe he ʻOtuá ʻa e lotu loi kotoa pē.​—Fakahā 18:8.

KELI LOLOTO ANGE

4. ʻOku ʻikai tali ʻe he ʻOtuá ʻa e lotu kotoa pē

ʻOku tui ʻa e tokolahi ko e ngaahi lotú ʻoku hangē ha ngaahi hala kehekehe ka ʻoku taki atu pē ki he ʻOtuá. Ka ʻoku moʻoni ia? Lau ʻa e Mātiu 7:13, 14, pea lāulea leva ki he fehuʻi ko ení:

• Ko e hā ʻoku leaʻaki ʻe he Tohi Tapú fekauʻaki mo e hala ʻoku taki atu ki he moʻuí?

Huluʻi ʻa e VITIOÓ, pea lāulea leva ki he fehuʻi hokó.

VITIŌ: Konga mei he​—ʻOku Tali ʻe he ʻOtuá ʻa e Founga Lotu Kotoa Pē? (3:22)

• ʻOku akoʻi ʻe he Tohi Tapú ʻoku ʻi ai ʻa e ngaahi lotu lahi ʻoku nau fakahōifua ki he ʻOtuá?

5. Ko e lotu loí ʻoku ʻikai ke nau faʻifaʻitaki ki he ʻofa ʻa e ʻOtuá

Ko e ngaahi lotú kuo nau fakafofongahalaʻi ʻa e ʻOtuá ʻi he ngaahi founga lahi. Ko ha founga kovi ʻe taha ko ʻenau poupou ʻi he taú. Huluʻi ʻa e VITIOÓ ke sio ki ha fakatātā. Lāulea leva ki he ongo fehuʻi hokó.

VITIŌ: Kaunga ʻo e Siasí ki he Tau II ʻa Māmaní (2:22)

• Ko e hā naʻe fai ʻe he ngaahi lotu lahi lolotonga ʻa e Tau II ʻa Māmaní?

• Ko e hā hoʻo ongoʻi fekauʻaki mo e meʻa naʻe fai ʻe he ngaahi lotú?

Lau ʻa e Sione 13:34, 35 mo e 17:16. Lāulea leva ki he ongo fehuʻi ko ení:

• Ko e hā ʻa e ongoʻi ʻa Sihová fekauʻaki mo e kau ʻa e ngaahi lotú ʻi he taú?

• Ko e lotu loí ʻoku nau fakatupunga ʻa e ngaahi meʻa kovi lahi ʻoku hokó. Ko e hā ʻa e ngaahi meʻa kuó ke sio ai ʻoku tōnounou ai ʻa e ngaahi lotú mei he faʻifaʻitaki ki he ʻofa ʻa e ʻOtuá?

6. ʻOku finangalo ʻa e ʻOtuá ke fakatauʻatāinaʻi ʻa e kakaí mei he lotu loí

Lau ʻa e Fakahā 18:4,a pea lāulea leva ki he fehuʻi ko ení:

• Ko e hā hoʻo ongoʻí ʻi hoʻo ʻiloʻi ʻoku loto ʻa e ʻOtuá ke fakahaofi ha taha kuo takihalaʻi ʻe he lotu loí?

7. Hokohoko atu hoʻo ako fekauʻaki mo e ʻOtua moʻoní

ʻOku totonu ke uesia ʻe he ngaahi meʻa kovi ʻoku leaʻaki mo fai ʻe he lotu loí hoʻo vakai ki he ʻOtuá? Sioloto atu ki ha foha ʻokú ne talitekeʻi ha fakahinohino fakapotopoto ʻoku ʻoange ʻe heʻene tamaí. ʻOku mavahe ʻa e fohá mei ʻapi pea fakahoko ʻa e ngaahi meʻa ʻikai lelei. ʻOku ʻikai tali ʻe he tamaí ʻa e ngaahi tōʻonga ʻa hono fohá. Ko e hā ʻe ʻikai totonu ai ke tukuakiʻi ʻa e tamaí ki he founga moʻui anga-tuʻu a hono fohá?

• ʻOku totonu nai ke tukuakiʻi ʻa Sihova pea tuku ʻa e ako fekauʻaki mo iá koeʻuhi ko e ngaahi tōʻonga ʻa e lotu loí?

FAKANOUNOU

Kuo fakafofongahalaʻi ʻe he lotu loí ʻa e ʻOtuá fakafou heʻene ngaahi akonaki loí pea mo e tōʻonga fakalilifú. ʻE fakaʻauha ʻe he ʻOtuá ʻa e lotu loí.

Fakamanatu

• Ko e hā hoʻo ongoʻí fekauʻaki mo e meʻa kuo akoʻi ʻe he lotu loí pea mo e meʻa kuo nau fakahokó?

• Ko e hā e ongoʻi ʻa Sihova fekauʻaki mo e lotu loí?

• Ko e hā ʻe fai ʻe he ʻOtuá ki he lotu loí?

AKO LAHI ANGE

Ako ki he ongo founga ʻe ua ʻoku taʻefakahōifua ai ki he ʻOtuá ʻa e ngaahi lotu lahi.

“ʻOku Tatau ʻa e Lotu Kotoa Pē? ʻOku Nau Taki Kotoa Pē ki he ʻOtuá?” (Kupu ʻi he uepisaití)

Ko e hā ʻoku loto ai ʻa Sihova ke tau lotu fakataha ange mo e niʻihi kehé kiate iá?

“Ko ha Fiemaʻu Pau Ia ke Kau ki ha Kautaha Lotu?” (Kupu ʻi he uepisaití)

Naʻe hohaʻa ha faifekau fekauʻaki mo ʻene lotú. Ka naʻe ʻikai taʻofi ia heni mei hono ako ʻa e moʻoni fekauʻaki mo e ʻOtuá.

“ʻUhinga Naʻe Mavahe Ai ha Pātele mei Hono Siasí” (Toʻo mei he ʻĀ Hake!)

ʻI he taʻu ʻe lauingeau, kuo tala ʻe he lotu loí ʻa e ngaahi loi fekauʻaki mo e ʻOtuá ke hā taʻeʻofa mo anga-kovi. Ako ʻa e moʻoni fekauʻaki mo e ngaahi loi ko iá.

“Ngaahi Loi ʻOkú Ne ʻAi ke Hā Ngali Taʻeʻofa ʻa e ʻOtuá” (Ko e Taua Leʻo, Sanuali 1, 2014)