Naʻa Nau Tatali ki he Mīsaiá

“Naʻe tatali ʻa e kakaí, pea naʻa nau fakaʻuhinga kotoa ʻi honau lotó fekauʻaki mo Sione, pe ʻoku ʻikai nai ko e Mīsaiá ia.”​—LUKE 3:15, THE EMPHATIC DIAGLOTT.

 1. Naʻe fanongo e kau tauhi-sipi ʻe niʻihi ki he fanongonongo fakaeʻāngelo fē?

KUO poʻuli. ʻOku ʻi tuʻa e kau tauhi-sipí, ʻo leʻohi ʻenau ngaahi tākangá. He ʻohovale lahi ē ko kinautolu he tuʻu mai he tafaʻakí ʻa e ʻāngelo ʻa e ʻOtuá pea naʻe malama takai ʻia kinautolu ʻa e lāngilangi ʻo e ʻOtuá! Fanongo! ʻOku fai ʻe he ʻāngeló e fanongonongo fakatoʻoaloto ko ení: “ʻOua ʻe manavahē; he ko eni kuo u haʻu mo au ha talanoa mālie, ko e meʻa fakafiefia ʻaupito, ko e meʻa maʻa e kakai Isileli katoa. He naʻe ʻaloʻi kiate kimoutolu ʻanenai ʻi he Kolo ʻo Tevita ha Fakamoʻui, ʻa ia ko e ʻEiki Misaia,” ʻa e tokotaha ʻe fakamoʻoniʻi ko e Mīsaiá. ʻE lava ke ʻilo ʻe he kau tauhi-sipí ʻa e valevale ko ení ʻoku tokoto ʻi ha ʻaiʻanga kai ʻo e manu ʻi ha kolo ofi mai. Fakafokifā, ʻoku kamata fakamālō “ha tokolahi ʻo e hositē ʻo Langi” kia Sihova, ʻo pehē: “Ko e kolōlia ki he ʻOtua ʻi langi taupotu, pea ko e melino ki māmani ki he kakai kuo hoifua ki ai.”​—Luke 2:8-14.

 2. Ko e hā e ʻuhinga ʻo e “Misaia,” pea ʻe lava fēfē ke ʻiloʻi ia?

² Ko e moʻoni, ʻoku ʻilo ʻe he kau tauhi-sipi Siú ko e “Misaia,” pe “Kalaisi,” ko e ʻuhinga ia ki he “Tokotaha Pani” ʻa e ʻOtuá. (Eki. 29:5-7) Ka ʻe lava fēfē ke nau ako lahi ange mo fakatuipauʻi ʻa e niʻihi kehé ko e pēpē naʻe lave ki ai ʻa e ʻāngeló ʻe hoko ko e Mīsaia ia ʻa Sihova kuo fakanofó? ʻI hono sivisiviʻi e ngaahi kikite ʻi he Ngaahi Konga Tohi Tapu Faka-Hepeluú pea fakafehoanaki e ngaahi meʻá ni mo e ngaahi ngāue mo e ʻalunga moʻui ʻo e kiʻi tama ko ení.

Ko e Hā Naʻe Nofo ʻAmanaki Ai ʻa e Kakaí?

3, 4. ʻOku fēfē ʻetau mahinoʻi ʻa e Taniela 9:24, 25?

³ ʻI he taimi naʻe ʻasi ai ʻa Sione Papitaiso he ngaahi taʻu ki mui aí, ko ʻene ngaahi leá mo ʻene ngaahi ngāué naʻe taki atu ai e niʻihi ke nau fifili naʻa kuo aʻu mai ʻa e Mīsaiá. (Lau ʻa e Luke 3:15.) ʻOku ngalingali naʻe mahinoʻi totonu ʻe ha niʻihi ha kikite faka-Mīsaia fekauʻaki mo e “uike e fitungofulu.” Kapau ko ia, naʻe malava ke nau fakapapauʻi e taimi ʻe hā ai ʻa e Mīsaiá. ʻI hono konga, naʻe pehē ʻe he kikité: “Mei he fakaha oe fekau ke fakafoou mo laga a Jelusalema, o aʻu ki he Misaia koe Eiki, koe uike e fitu ia, moe uike e onogofulu ma ua.” (Tan. 9:24, 25, PM) ʻOku loto-tatau e kau mataotao kehekehe ko e ngaahi uike eni ʻo e ngaahi taʻu. Hangē ko ení, ʻoku pehē ʻe he Revised Standard Version: “Ko e ngaahi uike ʻe fitungofulu ʻo e ngaahi taʻu kuo tuʻutuʻuni.”

⁴ ʻI he ʻahó ni, ʻoku lāuʻilo e kau sevāniti ʻa Sihová ko e uike ʻe 69, pe taʻu ʻe 483, ʻo e Taniela 9:25 naʻe kamata ia ʻi he 455 K.M. ʻi he taimi naʻe fakamafaiʻi ai ʻe Tuʻi ʻAtasease ʻa Nehemaia ke toe fakafoʻou mo toe langa ʻa Selusalemá. (Nehe. 2:1-8) Ko e ngaahi uike ko iá naʻe ngata ia ʻi he taʻu ʻe 483 ki mui ai, he 29 T.S., ʻi he taimi naʻe papitaiso ai ʻa Sīsū ʻo Nasaletí mo paniʻaki e laumālie māʻoniʻoní, ʻo hoko ai ko e Mīsaiá.​—Mt. 3:13-17.a

 5. Ko e hā e ngaahi kikite te tau lāulea ki ai he taimi ní?

⁵ Tau lāulea he taimí ni ki ha niʻihi e ngaahi kikite lahi kehe fekauʻaki mo e Mīsaiá naʻe fakahoko he ʻaloʻi ʻo Sīsuú, konga ki muʻa ʻene moʻuí, mo ʻene ngāue fakafaifekaú. ʻE fakaivia taʻetoeveiveiua ʻe he meʻá ni ʻetau tui ki he folofola fakaekikite ʻa e ʻOtuá. Te ne toe tokonaki mai foki ha fakamoʻoni māʻalaʻala ko Sīsuú ko e moʻoni ko e Mīsaia ia kuo fuoloa ʻa e tatali ki aí.

Tomuʻa Tala e Konga ki Muʻa ʻEne Moʻuí

 6. Fakamatalaʻi pe naʻe fēfē hono fakahoko ʻo e Senesi 49:10.

⁶ ʻE ʻaloʻi e Mīsaiá mei he matakali ko ia ʻo ʻIsileli ko Siutá. ʻI heʻene tāpuaki tuku ko ia hono ngaahi fohá, naʻe tomuʻa tala ʻe he pēteliake ko Sēkopé: “Ko e sepita meia Siuta ʻe ʻikai ʻave, mo e tokotoko mei hono vahaʻa vaʻe, kaeʻoua ke haʻu ʻa Sailo, pea ʻe fai kiate ia ʻe he ng. kakai ʻenau tukulolo.” (Sen. 49:10) Naʻe fakafekauʻaki ʻe he kau mataotao Siu tokolahi ʻo e kuohilí ʻa e ngaahi lea ko iá mo e Mīsaiá. Kamata mei he pule ʻa Tuʻi Tēvita ʻo Siutá, naʻe nofo ʻa e sēpitá (hau fakatuʻí) mo e tokotokó (mafai ke pulé) ʻi he matakali ʻo Siutá. Ko e “Sailo” ʻoku ʻuhingá “Ko Ia ʻOku ʻAʻaná,” pe “Ko Ia ʻOku ʻOʻoná.” Ko e laine fakatuʻi ʻo Siutá ʻe ngata ia ʻia “Sailo” ko e ʻEa fakatuʻi tuʻuloá, he naʻe tala ʻe he ʻOtuá kia Setekaia, ʻa e tuʻi Siuta fakamuimuí, ko e tuʻunga-pulé ʻe foaki ia ki he tokotaha ʻokú ne maʻu e totonu fakalao ki aí. (Isi. 21:26, 27) Hili ʻa Setekaiá, ko Sīsū pē ʻa e hako ʻo Tēvita ʻa ia naʻe talaʻofa ki ai ʻa e tuʻunga-tuʻí. Ki muʻa ʻi he ʻaloʻi ʻo Sīsuú, naʻe tala ʻe he ʻāngelo ko Kepalelí kia Mele: “ʻE foaki kiate ia ʻe he ʻEiki ko e ʻOtua ʻa e taloni ʻo ʻene kui ko Tevita: pea te ne tuʻi ki he hako ʻo Sekope ʻo lauikuonga; pea ko ʻene pule ʻe ʻikai ngata.” (Luke 1:32, 33) Ko Sailó kuo pau pē ko Sīsū Kalaisi, ʻa ia ko e hako ia ʻo Siuta mo Tēvita.​—Mt. 1:1-3, 6; Luke 3:23, 31-34

 7. Naʻe ʻaloʻi ʻa e Mīsaiá ʻi fē, pea ko e hā ʻoku mātuʻaki mahuʻinga ai ení?

⁷ Ko e ʻaloʻi ʻa e Mīsaiá ʻe hoko ia ʻi Pētelihema. “Ko koe, Petelihema Efalata, siʻi fau ke lau ʻi he ngaahi toko afe ʻo Siuta,” ko e tohi ia ʻa e palōfita ko Maiká, “ʻe, ʻalu atu ha Taha meiate koe maʻaku, ʻa ia te ne hoko ko e pule ʻo Isileli; pea ko ʻene ngaahi ʻalu atu ʻoku talu mei muʻa, mei he ngaahi ʻaho ʻo itaniti.” (Mai. 5:2) Ko e Mīsaiá ʻe ʻaloʻi ia he kolo Siuta ko Pētelihemá, ʻa ia ʻoku hā mahino naʻe ui ki muʻa ko ʻEfalata. Neongo ko e faʻē ʻa Sīsuú, ʻa Mele, mo ʻene tamai ohí, ʻa Siosefa, naʻá na nofo ʻi Nasaleti, naʻe ʻave kinaua ki Pētelihema ʻe ha tuʻutuʻuni lēsisita ʻa Loma, ʻa e feituʻu naʻe ʻaloʻi ai ʻa Sīsū ʻi he 2 K.M. (Mt. 2:1, 5, 6) He fakahoko fakaofo moʻoni ē ʻo e kikité!

8, 9. Ko e hā ne tomuʻa tala fekauʻaki mo e ʻaloʻi e Mīsaiá mo e ngaahi meʻa naʻe hoko atu aí?

⁸ ʻE ʻaloʻi ʻa e Mīsaiá ʻe ha tāupoʻou. (Lau ʻa e Aisea 7:14.) ʻI he Aisea 7:14, naʻe kikiteʻi ai ʻe fāʻeleʻi ʻe he “finemui/taupoʻou” ha tama. Ko e foʻi lea tatau pē ʻoku ngāueʻaki ki he finemui ko Lepeká ki muʻa heʻene malí.​—Sen. 24:16, 43.

⁹ ʻE tāmateʻi ʻa e fānau iiki hili e ʻaloʻi ʻo e Mīsaiá. Naʻe hoko e meʻa meimei tatau he ngaahi senituli ki muʻá ʻi he taimi naʻe tuʻutuʻuni ai ʻe Felo ʻo ʻIsipité ke laku e fanga kiʻi pēpē tangata Hepeluú ki he Vaitafe Nailá. (Eki. 1:22) Ka ko e meʻa ʻoku taau ke fakatokangaʻí ko e Selemaia 31:15, 16, ʻoku fakamatalaʻi ai ʻa Lesieli ʻokú ne tengihia ʻene fānaú ʻa ia ne ʻave ki he “fonua ʻo e fili.” Ko ʻene tangilāulaú naʻe ongona ia ʻi Lama mamaʻo, ʻi he vahefonua ʻo Penisimaní, he tokelau ʻo Selusalemá. ʻOku fakahaaʻi ʻe Mātiu ko e ngaahi lea ʻa Selemaiá naʻe fakahoko ia he taimi naʻe tuʻutuʻuni ai ʻe Tuʻi Hēlota ke tāmateʻi e fanga kiʻi fānau tangata ʻi Pētelihema mo hono vahefonua takatakaí. (Lau ʻa e Mātiu 2:16-18.) Fakaʻuta atu ki he mamahi ʻi he ʻēlia ko iá!

10. Fakamatalaʻi pe naʻe fēfē hono fakahoko ʻo e Hosea 11:1 ʻia Sīsuú.

¹⁰ Hangē ko e kau ʻIsilelí, ʻe ui mai ʻa e Mīsaiá mei ʻIsipite. (Hos. 11:1) Ki muʻa ʻi he tuʻutuʻuni fakatupu mate ʻa Hēlotá, naʻe fakahinohino ʻe ha ʻāngelo ʻa Siosefa, Mele, mo Sīsū ke nau ō ki ʻIsipite. Naʻa nau nofo ai “ʻo aʻu ki he pekia ʻa Helota: koeʻuhi ke fakamoʻoni ki he meʻa naʻe folofolaʻaki ʻe he ʻEiki ʻi he palofita [ko Hōseá], ʻo pehe, Naʻa ku ui mai hoku foha mei Isipite.” (Mt. 2:13-15) Ko e moʻoni, heʻikai lava ke pehē naʻe fokotuʻutuʻu ʻe Sīsū tonu ha taha e ngaahi meʻa naʻe tomuʻa tala fekauʻaki mo hono ʻaloʻí mo e konga ki muʻa ʻene moʻuí.

Fai ʻe he Mīsaiá e Meʻa!

11. Naʻe fēfē hono teuteu e halá ʻi he teʻeki hoko mai ʻa e Tokotaha Pani ʻa Sihová?

¹¹ Ko e halá ʻe teuteu ia ʻi he teʻeki hoko mai ʻa e Tokotaha Pani ʻa e ʻOtuá. Naʻe tomuʻa tala ʻe Malakai ko e “palofita ko Ilaisia” te ne fai e ngāue ko ení, ʻo teuteu ʻa e loto ʻo e kakaí ki he haʻu ʻa e Mīsaiá. (Lau ʻa e Malakai 4:5, 6.) Naʻe fakamahinoʻi ʻe Sīsū tonu ko e “Ilaisia” ko ení ko Sione Papitaiso ia. (Mt. 11:12-14) Pea naʻe fakamahino mai ʻe Maʻake ko e ngāue fakafaifekau ʻa Sioné naʻe fakahoko ai e ngaahi lea fakaekikite ʻa ʻAiseá. (Ai. 40:3; Mk. 1:1-4) Naʻe ʻikai fokotuʻutuʻu ʻe Sīsū ia kia Sione ke ne fai ha ngāue faka-ʻIlaisiā ko Hono fakamelomelo. Ko e ngāue ʻa e “Ilaisia” ko eni naʻe tomuʻa talá naʻe fai ia ʻo fehoanaki mo e finangalo ʻo e ʻOtuá ko ha founga ke ʻiloʻi pau ai ʻa e Mīsaiá.

12. Ko e hā e fekau ʻoku tokoni ke ʻiloʻi pau ai ʻa e Mīsaiá?

¹² ʻOku tokoni ha fekau faka-ʻOtua ke ʻiloʻi pau ai ʻa e Mīsaiá. ʻI he sinakoke ʻi Nasaletí, ʻa e kolo naʻe ʻohake ai iá, naʻe lau ai ʻe Sīsū mei he haʻinga tohi ʻo ʻAiseá peá ne ʻai kiate ia tonu ʻa e ngaahi lea: “Ko e Laumālie ʻo e ʻEiki ʻoku ʻiate au; he naʻa ne pani au ke u ʻalu mo e ongoongolelei ki he masiva: kuo ne fekau au ke fanongonongo ʻa e tukuange ki he popula, mo e ʻā ki he kui; ke fekau ʻa e taʻeliekina ke ʻalu kuo tauʻataina; ke fanongonongo ʻa e taʻu ʻo e hōifua ʻa e ʻEiki.” Koeʻuhi ko ia moʻoni ʻa e Mīsaiá, naʻe malava ai ʻa Sīsū ke lea moʻoni: “Ko e ʻaho ni kuo fakamoʻoni ʻa e potu folofola ni ʻi hoʻomou fanongo.”​—Luke 4:16-21.

13. Naʻe fēfē hono tomuʻa tala ʻo e ngāue fakafaifekau ʻa Sīsū ʻi Kālelí?

¹³ Ko e ngāue fakafaifekau ʻa e Mīsaiá ʻi Kālelí naʻe tomuʻa tala. Fekauʻaki mo e “fonua ʻo Sepulone mo e fonua ʻo Nafitalai . . . ʻa Kaleli ʻo e Senitaile,” naʻe tohi ʻe ʻAisea: “Ko e kakai naʻe nofo he poʻuli ʻOku nau mamata ki ha maama lahi; ko e nofo ʻi he fonua ʻo e ʻata ʻo mate, ʻoku ulo ha maama kiate kinautolu.” (Ai. 9:1, 2) Naʻe kamata ʻe Sīsū ʻene ngāue fakafaifekau maʻá e kakaí ʻi Kāleli, ʻo nofo ʻi Kāpaneume, ʻa ia ne tokolahi ai e kakai ʻo Sepuloni mo Nafitalai naʻa nau maʻu e ngaahi ʻaonga lahi mei he maama fakalaumālie naʻá ne ʻomi kia kinautolú. (Mt. 4:12-16) ʻI Kāleli, naʻe fai ai ʻe Sīsū ʻene Malanga fakatupunga-fakakaukau ʻi he Moʻungá, fili ʻene kau ʻapositoló, fakahoko ʻene ʻuluaki maná, pea ngalingali naʻá ne hā ai ki he kau ʻapositolo ʻe 500 nai hili ʻene toetuʻú. (Mt. 5:1–7:27; 28:16-20; Mk. 3:13, 14; Sione 2:8-11; 1 Kol. 15:6) Naʻá ne fakahoko ai ʻa e kikite ʻa ʻAiseá ʻaki ʻene malanga he “fonua ʻo Sepulone mo e fonua ʻo Nafitalai.” Ko e moʻoni, naʻe ʻalu ʻa Sīsū ʻo malangaʻi ʻa e pōpoaki ʻo e Puleʻangá ʻi he feituʻu kehe ʻi ʻIsileli.

Naʻe Tomuʻa Tala e Ngaahi Ngāue Kehe ʻa e Mīsaiá

14. ʻI he founga fē naʻe fakahoko ai ʻe Sīsū ʻa e Sāme 78:2?

¹⁴ ʻE leaʻaki ʻe he Mīsaiá e ngaahi pealapeli, pe ngaahi talanoa fakatātā. Naʻe hiva e tokotaha-tohi-saame ko ʻĒsafé: “Kau toʻo hoku ngutu ʻi ha palovepi.” (Sāme 78:2) ʻOku anga-fēfē ʻetau ʻiloʻi naʻe lave fakaekikite eni kia Sīsū? ʻOku tala mai ʻe Mātiu ʻoku pehē. Hili e lave ki he ngaahi talanoa fakatātā ʻa ia naʻe fakatatau ai ʻe Sīsū e Puleʻangá ki ha tengaʻi mūsita ʻoku tupu pea ki he lēvani, ʻoku pehē ʻe Mātiu: “Naʻe ʻikai . . . leaʻaki [ʻe Sīsū] ha meʻa kiate kinautolu, ʻo taʻe ha fakatātā: koeʻuhi ke fakamoʻoni ai ʻa e meʻa naʻe folofolaʻaki ʻi he palōfita, ʻo pehē, Te u tangaki hoku ngutu ʻi he ngāhi fakatātā, te u aʻau ʻa e ngāhi meʻa ne fufū mei he kamataʻanga.” (Mt. 13:31-35) Ko e ngaahi lea fakaefakatātaá, pe pealapelí, naʻe kau ia he ngaahi founga faiako ola lelei ʻa Sīsuú.

15. Fakahaaʻi pe naʻe fēfē hono fakahoko ʻo e Aisea 53:4?

¹⁵ Ko hotau ngaahi faingataʻaʻiá ʻe fataki ʻe he Mīsaiá. Naʻe tomuʻa tala ʻe ʻAisea: “ʻA, ko e ngaahi mahaki ʻatautolu naʻe fua ʻe he toko taha ko ia, pea ko ʻetau ngaahi mamahi naʻa ne hilifaki kiate ia.” (Ai. 53:4) Naʻe fakahaaʻi ʻe Mātiu ko e hili ko ia hono fakamoʻui ʻa e faʻē-ʻi-he-fono ʻa Pitá, naʻe fakamoʻui ʻe Sīsū ʻa e niʻihi kehé “koeʻuhi ke fakamoʻoni ki he meʻa naʻe folofolaʻaki ʻia Aisea ko e palofita, ʻo pehē, Naʻa ne toʻo ʻe ia ʻetau ngāhi vaivai, mo ne fua ʻetau ngāhi mahaki.” (Mt. 8:14-17) Pea ko e taha pē eni e ngaahi taimi lahi kuo lēkooti hono fakamoʻui ʻe Sīsū ʻa e kau mahakí.

16. Naʻe fēfē hono fakahaaʻi ʻe he ʻapositolo ko Sioné naʻe fakahoko ʻe Sīsū ʻa e Aisea 53:1?

¹⁶ Neongo e lelei kotoa kuo fai ʻe he Mīsaiá, ʻe tokolahi ʻa e kakai heʻikai tui kiate ia. (Lau ʻa e Aisea 53:1.) ʻI hono fakahaaʻi naʻe fakahoko e kikite ko ení, naʻe tohi ʻe he ʻapositolo ko Sioné: ‘Neongo kuo tuva pehē ʻa e ngaahi fakaʻilonga kuo fai [ʻe Sīsū] ʻi honau ʻaó, ka naʻe ʻikai te nau tui pikitai kiate ia: koeʻuhiā ke fakamoʻoni ki he folofola ʻa e palofita ko Aiseá, ʻa ia naʻe pehē ʻene leá, ʻEiki, ko hai kuó ne tui ki heʻemau ongoongó? pea kuo fakahā kia hai ʻa e nima ʻo e ʻAfioná?’ (Sione 12:37, 38) Pehē foki, ko e tokosiʻi ne tui ki he ongoongo lelei fekauʻaki mo Sīsū, ʻa e Mīsaiá, lolotonga e ngāue fakafaifekau ʻa e ʻapositolo ko Paulá.​—Loma 10:16, 17.

17. Naʻe ngāueʻaki ʻe Sione ʻa e Sāme 69:4 ki he hā?

¹⁷ Ko e Mīsaiá ʻe fai e fehiʻa kiate ia tuʻungaʻa pē. (Sāme 69:4) ʻOku lave e ʻapositolo ko Sioné naʻe pehē ʻe Sīsū: “Ka ne ʻikai te u fai ʻi [he kakaí] ʻa e ngaahi ngāue ʻa ia ʻoku teʻeki ke fai ʻe ha taha, pehē ne ʻikai haʻanau angahala: ka ko eni kuo nau mamata pea kuo nau fehiʻa kiate au mo ʻeku Tamai fakatouʻosi. Ka koeʻuhiā pe ke fakamoʻoni ki he lea kuo tohi ʻi heʻenau lao, Naʻa nau fehiʻa kiate au tuʻungaʻa pe.” (Sione 15:24, 25) ʻOku faʻa ʻuhinga e “lao” ki he sino kotoa ʻo e Tohi Tapú. (Sione 10:34; 12:34) Ko e ngaahi fakamatala Kōsipelí ʻoku nau fakamoʻoniʻi naʻe fehiʻanekinaʻi ʻa Sīsū, tautefito ʻe he kau taki lotu Siú. ʻIkai ko ia pē, naʻe pehē ʻe Kalaisi: “Talaʻehai ʻe lava ʻe māmani ke fehiʻa kiate kimoutolu: ko au pē ʻoku ne fehiʻa ki ai, koeʻuhi ko au pe ʻoku ou fakahāʻia ʻoku kovi ʻene ngaahi ngāue.”​—Sione 7:7.

18. Ko e hā ʻa e toe sivisiviʻi ʻoku totonu ke ne fakaivia ʻetau tuipau ko Sīsū ʻa e Mīsaiá?

¹⁸ Ko e kau muimui ʻo Sīsū ʻi he ʻuluaki senitulí naʻa nau tuipau ko Sīsū ʻa e Mīsaiá, he naʻá ne fakahoko moʻoni ʻa e ngaahi kikite faka-Mīsaia ʻoku ʻi he Ngaahi Konga Tohi Tapu Faka-Hepeluú. (Mt. 16:16) Hangē ko ia kuo tau sio ki aí, naʻe fakahoko e niʻihi ʻo e ngaahi meʻá ni lolotonga ʻa e konga ki muʻa ʻo e moʻui mo e ngāue fakafaifekau ʻa Sīsū ʻo Nasaletí. ʻE sivisiviʻi ha toe ngaahi kikite faka-Mīsaia ʻi he kupu hokó. Ko ʻetau fakakaukauloto faʻa lotu fekauʻaki mo iá te ne fakaivia moʻoni ʻetau tuipau ko Sīsū Kalaisi moʻoni ʻa e Mīsaia ʻa ia kuo fakanofo heʻetau Tamai fakahēvaní, ʻa Sihova.

[Fakamatala ʻi lalo]

ʻE Fēfē Haʻo Tali?

• Ko e hā e ngaahi kikite naʻe fakahoko felāveʻi mo e ʻaloʻi ʻo Sīsuú?

• Naʻe fēfē hono teuteu e halá ʻi he teʻeki hoko mai ʻa e Mīsaiá?

• Ko e hā e ngaahi lea fakaekikite ʻo e Aisea vahe 53 naʻe fakahoko ʻia Sīsuú?