Faʻifaʻitaki ki he Fakamaau Totonu mo e Meesi ʻa Sihová

1, 2. (a) Naʻe anga-fēfē ʻa e ongoʻi ʻa Sīsū ʻo fekauʻaki mo e Lao ʻa e ʻOtuá? (e) Naʻe anga-fēfē hono ngāuehalaʻaki ʻe he kau sikalaipé mo e kau Fālesí ʻa e Laó?

NAʻE ʻofa ʻa Sīsū ʻi he Lao ʻa Mōsesé. ʻOku ʻikai ke tau ofo ai, he ko e Laó naʻe haʻu ia mei heʻene Tamaí, ʻa Sihova, ko e Tokotaha mahuʻinga taha ʻi he moʻui ʻa Sīsuú. ʻI he Saame 40:8, naʻe tomuʻa tala ai ʻi he Tohi Tapú ʻa e ʻofa lahi ʻa Sīsū ki he Lao ʻa e ʻOtuá: “Ke fai ho finangaló, ʻe hoku ʻOtua, ko hoku mamaná ia, pea ko hoʻo laó ʻoku ʻi hoku loto fatú.” Naʻe fakamoʻoniʻi ʻe Sīsū ʻi he meʻa naʻá ne leaʻaki mo faí naʻe haohaoa mo ʻaonga ʻa e Lao ʻa e ʻOtuá, pea kuo pau ke fakahoko.​—Māt. 5:17-19.

² Kuo pau pē naʻe ongoʻi mamahi ʻa Sīsū ʻi heʻene sio ki hono ngāuehalaʻaki ʻe he kau sikalaipé mo e kau Fālesí ʻa e lao ʻa ʻene Tamaí, ʻo ʻai ke hā ngali taʻefakaʻatuʻí. Naʻá ne pehē kiate kinautolu: “ʻOku mou foaki ʻa e vahe hongofulu ʻo e minití mo e tilí mo e kūminí,” ʻo ʻuhingá naʻa nau mātuʻaki tokanga ke talangofua ki he fakaikiiki siʻisiʻi taha ʻo e Laó. Ko ia ai, ko e hā ʻa e palopalemá? Naʻe fakamatala ʻa Sīsū: “Ka ʻoku ʻikai te mou tokanga ki he ngaahi meʻa mamafa ange ʻo e Laó, ʻa e fakamaau totonú mo e mēsí, mo e faitōnungá.” (Māt. 23:23) Naʻe ʻikai ʻilo ʻe he kau Fālesí ʻa e ʻuhinga ʻo e Laó, pea naʻa nau fakakaukau ʻoku nau lelei ange ʻi he niʻihi kehé. Ka naʻe mahinoʻi ʻe Sīsū ʻa e taumuʻa naʻe tuʻu mei mui ʻi he Laó mo e meʻa naʻe fakahaaʻi ʻe he fekau taki taha ʻo fekauʻaki mo Sihová.

 3. Ko e hā te tau lāulea ki ai ʻi he kupu ko ení?

³ ʻI he tuʻunga ko e kau Kalisitiané, ʻoku ʻikai fiemaʻu ke tau talangofua ki he Lao ʻa Mōsesé. (Loma 7:6) Ko ia ko e hā naʻe fakakau ai ʻe Sihova ʻa e Laó ʻi heʻene Folofolá, ʻa e Tohi Tapú? ʻOkú ne fiemaʻu ke tau mahinoʻi pea ngāueʻaki ʻa hono “ngaahi meʻa mamafa ange,” ʻi hono fakalea ʻe tahá, ʻa e ngaahi tefitoʻi moʻoni ʻoku tuʻu mei mui ʻi he Laó. Ko e fakatātaá, ko e hā ʻa e ngaahi tefitoʻi moʻoni ʻoku tau ako mei he fokotuʻutuʻu ʻo e ngaahi kolo hūfangá? ʻI he kupu ki muʻá, ʻoku tau ako ai ʻa e ngaahi lēsoni ʻi hono ako ʻa e meʻa naʻe pau ke fai ʻe he tokotaha holá. ʻI he kupu ko ení, te tau ako ai ʻa e meʻa ʻoku akoʻi mai ʻe he ngaahi kolo hūfangá fekauʻaki mo Sihová mo e founga ʻe lava ke tau faʻifaʻitaki ai ki hono ngaahi ʻulungāngá. Te tau tali ʻa e fehuʻi ʻe tolu: ʻOku anga-fēfē hono fakahaaʻi ʻe he ngaahi kolo hūfangá ʻoku mohu meesi ʻa Sihova? Ko e hā ʻoku nau akoʻi mai fekauʻaki mo e vakai ʻa e ʻOtuá ki he moʻuí? Pea ʻoku anga-fēfē ʻenau fakahaaʻi ʻa ʻene fakamaau totonu haohaoá? ʻI he tuʻunga taki taha, feinga ke sio ki he founga ʻe lava ai ke ke faʻifaʻitaki ki hoʻo Tamai fakahēvaní.​—Lau ʻa e ʻEfesō 5:1.

4, 5. (a) Ko e hā naʻe fai ke faingofua ai ʻa e hola ki ha kolo hūfanga ha tokotaha hola, pea ko e hā hono ʻuhingá? (e) Ko e hā ʻoku akoʻi mai ʻe he meʻá ni fekauʻaki mo Sihová?

⁴ Naʻe fokotuʻutuʻu ʻe Sihova ke faingofua ʻa e aʻu ki he ngaahi kolo hūfanga ʻe onó. Naʻá ne tala ki he kau ʻIsilelí ke nau fili ʻa e kolo ʻe tolu ki he tafaʻaki taki taha ʻo Sioataní. Ko e hā hono ʻuhingá? Koeʻuhi ke vave mo faingofua ʻa e aʻu ha tokotaha hola ki ha taha ʻo e ngaahi kolo ko ení. (Nōm. 35:11-14) Ko e ngaahi hala naʻe lele ki aí naʻe tauhi ke ʻi ha tuʻunga lelei. (Teu. 19:3) Fakatatau ki he talatukufakaholo faka-Siú, naʻe ʻi ai ʻa e ngaahi fakaʻilonga ʻi he ngaahi veʻehalá ke tokoni ki he kau holá ke nau ʻilo ʻa e ngaahi koló. Koeʻuhi ko e ʻi ai ʻa e ngaahi kolo hūfanga ʻi ʻIsilelí, ko ha ʻIsileli naʻá ne tāmateʻi fāinoa ha tahá naʻe ʻikai fiemaʻu ia ke ne maʻu ha maluʻi ʻi ha fonua muli, ʻa ia ʻe fakataueleʻi nai ai ia ke ne lotu ki he ngaahi ʻotua loí.

⁵ Fakakaukau angé fekauʻaki mo ení: Naʻe tuʻutuʻuni ʻe Sihova ke tāmateʻi ʻa e kau fakapoó. Ka naʻá ne toe fakapapauʻi foki ke lava ʻo maʻu ʻe ha taha naʻá ne tāmateʻi fāinoa ha taha ʻa e meesi, manavaʻofa, mo e maluʻi. Naʻe pehē ʻe ha tokotaha fakamatala Tohi Tapu ʻe taha: “Ko e meʻa kotoa pē naʻe ʻai ia ke mahino, maʻamaʻa, mo faingofua ʻo ka ala lava.” Ko Sihová ʻoku ʻikai ko ha fakamaau anga-fakamamahi ʻoku kumi ki ha ngaahi founga ke tauteaʻi ai ʻene kau sevānití. ʻI hono kehé, ʻokú ne “mohu ʻi he mēsí.”​—ʻEf. 2:4.

 6. Naʻe faʻifaʻitaki ʻa e kau Fālesí ki he meesi ʻa Sihová? Fakamatalaʻi.

⁶ Kae kehe, ko e kau Fālesí, naʻe ʻikai te nau loto-lelei ke fakahāhā ʻa e mēsí ki he niʻihi kehé. Ko e fakatātaá, ʻoku pehē ʻe he talatukufakaholo faka-Siú naʻe fakafisi ʻa e kau Fālesí ke fakamolemoleʻi ha taha naʻá ne fai ha fehālaaki tatau ʻo laka ʻi he tuʻo tolú. Ke fakahaaʻi ʻa e hala ʻa ʻenau fakakaukaú, naʻe ngāueʻaki ʻe Sīsū ha talanoa fakatātā fekauʻaki mo ha Fālesi naʻe lotu ʻo ofi ki ha tokotaha tānaki tukuhau. Naʻe pehē ʻe he Fālesí: “ʻE ʻOtua, ʻoku ou fakamālō atu kiate koe ʻi he ʻikai te u hangē ko e tokotaha kehe kotoa pē​—ʻa e kau maʻu koloa fakamālohí, kau taʻemāʻoniʻoní, kau tonó—​pe hangē ko e tokotaha tānaki tukuhaú ni.” Ko e hā naʻe ʻuhinga ki ai ʻa Sīsuú? Ko e kau Fālesí ‘naʻa nau vakai ki he niʻihi kehé ko e koto noa pē,’ pea naʻe ʻikai te nau fakakaukau naʻe fiemaʻu ke nau faimeesi.​—Luke 18:9-14.

7, 8. (a) ʻE lava fēfē ke ke faʻifaʻitaki ki he meesi ʻa Sihová? (e) Ko e hā kuo pau ai ke tau anga-fakatōkilalo koeʻuhi ke fakamolemoleʻi ʻa e niʻihi kehé?

⁷ Faʻifaʻitaki kia Sihova, kae ʻikai ko e kau Fālesí. Fakahāhā ʻa e mēsí mo e manavaʻofá. (Lau ʻa e Kolose 3:13.) ʻAi ke faingofua ki he niʻihi kehé ke nau kole fakamolemole atu kiate koe. (Luke 17:3, 4) ʻEke hifo: ‘ʻOku vave mo faingofua ʻa ʻeku fakamolemoleʻi ʻa e niʻihi kehé, naʻa mo e taimi ʻoku nau fakaʻitaʻi tā tuʻo lahi ai aú? ʻOku ou vēkeveke ke fakamelino mo ha taha kuó ne fakaʻitaʻi pe fakalotomamahiʻi au?’

⁸ Ke fakamolemolé, kuo pau ke tau anga-fakatōkilalo. Naʻe fakakaukau ʻa e kau Fālesí ʻoku nau lelei ange ʻi he tokotaha kotoa pē, ko ia naʻe ʻikai te nau loto-lelei ke fakamolemole. Ka ʻi he tuʻunga ko e kau Kalisitiané, ʻoku tau anga-fakatōkilalo ʻo “vakai ki he niʻihi kehé ʻoku nau māʻolunga ange” ʻiate kitautolu pea fakamolemoleʻi loto-lelei kinautolu. (Fil. 2:3) ʻE lava ke tau ʻeke hifo, ‘ʻOku ou faʻifaʻitaki kia Sihova ʻo fakahāhā ʻa e anga-fakatōkilaló?’ Kapau ʻoku tau anga-fakatōkilalo, ʻe faingofua ange ai ki he niʻihi kehé ke nau kole fakamolemole mai pea ʻe faingofua ange ai kiate kitautolu ke tau fakamolemoleʻi kinautolu. Fakavave ke fakahāhā ʻa e mēsí pea fakatuotuai ki he ʻitá.​—Tml. 7:8, 9.

 9. Naʻe anga-fēfē hono tokoniʻi ʻe Sihova ʻa e kau ʻIsilelí ke nau mahinoʻi ʻoku toputapu ʻa e moʻuí?

⁹ Ko e taha ʻo e ngaahi ʻuhinga tefito ki he ngaahi kolo hūfangá ke maluʻi ai ʻa e kau ʻIsilelí mei he halaia ʻi hano lilingi ha toto taʻehalaia. (Teu. 19:10) ʻOku ʻofa ʻa Sihova ʻi he moʻuí, pea ʻokú ne fehiʻa ʻi he fakapoó. (Pal. 6:16, 17) ʻI hono tuʻunga ko e ʻOtua faitotonu mo māʻoniʻoní, ʻoku ʻikai lava ke ne tukunoaʻi naʻa mo ha tāmate fāinoa. Ko e moʻoni naʻe lava ke maʻu ʻa e mēsí ʻe ha tokotaha naʻá ne tāmateʻi fāinoa ha taha. Ka naʻe pau ke ne ʻuluaki fakamatalaʻi ʻa hono tuʻungá ki he kau mātuʻá. Kapau naʻe fakamāuʻi ʻe he kau mātuʻá naʻe hoko fāinoa ʻa e maté, naʻe pau leva ke nofo ai pē ʻa e tokotaha holá ʻi he kolo hūfangá kae ʻoua kuo mate ʻa e taulaʻeiki lahí. Naʻe ʻuhinga nai iá naʻe pau ke nofo ʻa e tokotaha holá ʻi he kolo hūfangá ʻi he toenga ʻo ʻene moʻuí. Ko e fokotuʻutuʻu ko ení naʻe fakamamafaʻi ai ki he kau ʻIsilelí kotoa ko e moʻuí ʻoku toputapu. Ke fakalāngilangiʻi ʻa e Tokotaha ʻokú ne foaki ʻa e moʻuí, naʻe fiemaʻu ke nau fai ʻa e meʻa kotoa pē naʻa nau malavá ke fakaʻehiʻehi ai mei hono ʻai ke ʻi he tuʻunga fakatuʻutāmaki ʻa e moʻui ʻa e niʻihi kehé.

10. Fakatatau kia Sīsū, naʻe anga-fēfē hono fakahāhā ʻe he kau sikalaipé mo e kau Fālesí naʻe ʻikai te nau fakamahuʻingaʻi ʻa e moʻui ʻa e niʻihi kehé?

¹⁰ ʻI he ʻikai hangē ko Sihová, naʻe fakahāhā ʻe he kau sikalaipé mo e kau Fālesí naʻe ʻikai te nau fakamahuʻingaʻi ʻa e moʻui ʻa e niʻihi kehé. Naʻe pehē ʻe Sīsū kiate kinautolu: “Naʻa mou ʻave ʻa e kī ki he ʻiló. Ko kimoutolu tonu naʻe ʻikai te mou hū ki ai, pea ʻoku mou taʻofi ʻa e faʻahinga ʻoku hū atu ki aí!” (Luke 11:52) Ko e hā naʻe ʻuhinga ki ai ʻa Sīsuú? Naʻe ʻamanekina ʻe fakamatalaʻi ʻe he kau sikalaipé mo e kau Fālesí ʻa e Folofola ʻa e ʻOtuá ki he kakaí pea tokoniʻi kinautolu ke nau maʻu ʻa e moʻui taʻengatá. ʻI hono kehé, naʻa nau feinga ke taʻofi ʻa e kakaí mei he muimui kia Sīsuú, “ʻa e Fakafofonga Tefito ʻo e moʻuí.” (Ngā. 3:15) ʻI he foungá ni, naʻa nau taki ai ʻa e kakaí ki he ʻauha. Naʻe hīkisia mo siokita ʻa e kau sikalaipé mo e kau Fālesí, pea naʻe ʻikai te nau tokanga fekauʻaki mo e moʻui ʻa e kakaí. He anga-fakamamahi mo taʻeʻofa moʻoni ia!

11. (a) Naʻe anga-fēfē hono fakahāhā ʻe he ʻapositolo ko Paulá naʻá ne vakai ki he moʻuí ʻo hangē ko e vakai ki ai ʻa Sihová? (e) Ko e hā te ne tokoniʻi kitautolu ke tau faʻifaʻitaki ki he faivelenga ʻa Paula ʻi he ngāue fakafaifekaú?

¹¹ ʻE lava fēfē ke tau faʻifaʻitaki kia Sihova pea fakaʻehiʻehi mei he hoko ʻo hangē ko e kau sikalaipé mo e kau Fālesí? ʻOku tau fai eni ʻi he taimi ʻoku tau fakaʻapaʻapaʻi ai mo fakamahuʻingaʻi ʻa e moʻuí. Naʻe fai eni ʻe he ʻapositolo ko Paulá ʻaki ʻene malangaʻi ʻa e ongoongo lelei fekauʻaki mo e Puleʻangá ki he kakai tokolahi taha naʻe ala lavá. Ko e ʻuhinga ia naʻe lava ai ke ne pehē: “ʻOku ou ʻataʻatā au mei he toto ʻo e tangata kotoa pē.” (Lau ʻa e Ngāue 20:26, 27.) Ka naʻe malanga pē ʻa Paulá he naʻe ʻikai te ne loto ke ongoʻi halaia pe koeʻuhí naʻe pehē ʻe Sihova kuo pau ke ne fai pehē? ʻIkai. Naʻe ʻofa ʻa Paula ʻi he kakaí. Naʻá ne vakai ki heʻenau moʻuí ʻoku mahuʻinga, pea naʻá ne loto ke nau maʻu ʻa e moʻui taʻengatá. (1 Kol. 9:19-23) Ko kitautolu foki ʻoku totonu ke tau vakai ki he moʻuí ʻo hangē ko e vakai ki ai ʻa Sihová. ʻOkú ne finangalo ke fakatomala ʻa e tokotaha kotoa pē koeʻuhi ke lava ai ʻo nau moʻui. (2 Pita 3:9) Ke faʻifaʻitaki kia Sihova, ʻoku fiemaʻu ke tau ʻofa ʻi he kakaí. Ko ha tōʻonga mohu meesi ʻe ueʻi ai kitautolu ke tau malanga fakataha mo e faivelenga pea te tau maʻu ʻa e fiefia ʻi heʻetau fai peheé.

12. Ko e hā ʻoku mahuʻinga ai ʻa e tuʻunga malú ki he kakai ʻa e ʻOtuá?

¹² Ke vakai ki he moʻuí ʻo hangē ko e vakai ki ai ʻa Sihová, ʻoku toe fiemaʻu foki ke tau maʻu ʻa e fakakaukau totonu fekauʻaki mo e tuʻunga malú. Kuo pau ke tau fakaʻuli mo ngāue ʻi ha tuʻunga malu, naʻa mo e taimi ʻoku tau ʻi ha ngāue langa ai, monomono, pe fononga ki ha feituʻu faiʻanga lotu. Ko e kakaí, tuʻunga malú, mo e moʻui leleí ʻoku mahuʻinga ange ia ʻi hono fakahaofi ʻo e taimí pe ko e paʻangá. Ko hotau ʻOtuá ʻokú ne fai maʻu pē ʻa e meʻa ʻoku totonú, pea ʻoku tau loto ke hoko ʻo hangē ko iá. Ko e kau mātuʻá ʻoku fiemaʻu tautefito ke nau fakakaukau fekauʻaki mo e tuʻunga malú, fakatouʻosi haʻanautolú pea pehē ki he malu ʻa e niʻihi kehé. (Pal. 22:3) Kapau ʻoku fakamanatu atu ʻe ha mātuʻa ʻa e ngaahi tuʻutuʻuni pe tuʻunga fekauʻaki mo e malú, fanongo kiate ia. (Kal. 6:1) Vakai ki he moʻuí ʻo hangē ko e vakai ki ai ʻa Sihová, pea “ʻe ʻikai hoko kiate koe ha halaia ʻi he toto.”

13, 14. Naʻe lava fēfē ke faʻifaʻitaki ʻa e kau mātuʻa ʻIsilelí ki he fakamaau totonu ʻa Sihová?

¹³ Naʻe tuʻutuʻuni ʻa Sihova ki he kau mātuʻa ʻIsilelí ke nau faʻifaʻitaki ki heʻene fakamaau totonú. ʻUluakí, naʻe fiemaʻu ke fakapapauʻi ʻe he kau mātuʻá ʻa e ngaahi moʻoniʻi meʻá kotoa. Pea naʻe pau leva ke nau fakakaukau mātuʻaki fakamātoato ki he taumuʻa, fakakaukau, mo e ngaahi tōʻonga ʻa e tokotaha tāmaté ʻi he kuohilí ʻi heʻenau fili pe te nau fakahāhā ʻa e mēsí. Naʻe pau ke feinga ʻa e kau mātuʻá ke ʻiloʻi pe naʻe fehiʻa ʻa e tokotaha holá ʻi he tokotaha naʻe tāmateʻí pea naʻá ne ʻosi fakakaukauʻi ke tāmateʻi ia. (Lau ʻa e Nōmipa 35:20-24.) Kapau naʻe ʻi ai ha kau fakamoʻoni, naʻe fiemaʻu ke ʻoua ʻe toe siʻi hifo ʻi he toko uá ki muʻa ke lava ʻo fakahalaiaʻi ha tokotaha fakapō.​—Nōm. 35:30.

¹⁴ Hili hono ʻiloʻi ʻa e meʻa tofu pē naʻe hokó, naʻe pau ke fakakaukau ʻa e kau mātuʻá fekauʻaki mo e tokotahá tonu, ʻo ʻikai ko e meʻa pē naʻá ne faí. Naʻe fiemaʻu ki he kau mātuʻá ʻa e vavanga fakaefakakaukau ke nau sio fakalaka atu ʻi he meʻa ʻoku hā mahinó pea ʻiloʻi ʻa e ngaahi ʻuhinga ʻo e meʻa naʻe hokó. Ko e meʻa mahuʻinga tahá, naʻe fiemaʻu ʻa e laumālie māʻoniʻoni ʻo Sihová ke ne tokoniʻi kinautolu ke nau faʻifaʻitaki ki heʻene vavanga fakaefakakaukaú, mēsí, mo e fakamaau totonú.​—ʻEki. 34:6, 7.

15. Naʻe anga-fēfē ʻa e kehe ʻa e vakai ʻa Sīsū ki he kau angahalá mei he vakai ʻa e kau Fālesí?

¹⁵ Ko e kau Fālesí naʻe ʻikai te nau fakamaau ʻi he meesi. Naʻa nau tokangataha ki he meʻa naʻe fai ʻe he tokotaha faiangahalá kae ʻikai sio pe ko e tokotaha fēfē ia. ʻI he sio ʻa e niʻihi ʻo e kau Fālesí ki he kai ʻa Sīsū ʻi he ʻapi ʻo Mātiú, naʻa nau ʻeke ki he kau ākongá: “Ko e hā ʻoku kai fakataha ai hoʻomou faiakó mo e kau tānaki tukuhaú mo e kau angahalá?” Naʻe tali ange ʻe Sīsū: “Ko e kakai ʻoku moʻui leleí ʻoku ʻikai fiemaʻu ki ai ha toketā, ka ʻoku fiemaʻu ia ki he faʻahinga ʻoku puké. Ko ia, mou ʻalu ʻo ako ke ʻilo ʻa e ʻuhinga ʻo e meʻá ni: ‘ʻOku ou fiemaʻu ʻa e mēsí, ʻo ʻikai ko e feilaulaú.’ He naʻá ku haʻú ke ui, ʻo ʻikai ko e kakai māʻoniʻoní, ka ko e kau angahalá.” (Māt. 9:9-13) Naʻe ʻomai ʻe Sīsū ha kalofanga ki he kau angahalá? ʻIkai ʻaupito. Naʻá ne loto ke nau fakatomala. Ko ha konga mahuʻinga ia ʻo e pōpoaki naʻá ne malangaʻí. (Māt. 4:17) Naʻe ʻiloʻi ʻe Sīsū naʻe loto ʻa e niʻihi ʻo e “kau tānaki tukuhaú mo e kau angahalá” ke nau liliu. Naʻe ʻikai ke nau ʻi he ʻapi pē ʻo Mātiú ke kai. Naʻa nau ʻi aí he naʻa nau muimui kia Sīsū. (Mk. 2:15) Ko e meʻa fakamamahí, he ko e tokolahi taha ʻo e kau Fālesí naʻe ʻikai te nau vakai ki he kakaí ʻo hangē ko e vakai ki ai ʻa Sīsuú. Naʻe ʻikai te nau tui ʻe lava ke liliu ʻa e kakaí, pea naʻa nau vakai kiate kinautolu ko e kau angahala taʻehaʻamanaki. He kehe moʻoni ē ko kinautolu meia Sihova, ʻa ia ʻoku faitotonu mo mohu meesi!

16. Ko e hā kuo pau ke feinga ha kōmiti fakamaau ke nau ʻiloʻí?

¹⁶ Ko e kau mātuʻa he ʻaho ní kuo pau ke nau faʻifaʻitaki kia Sihova, ʻa ia ʻokú ne ‘manako ki he fakamaau totonú.’ (Saame 37:28) ʻUluakí, naʻe fiemaʻu ke nau “fakatotoloʻi fakaʻāuliliki” ke fakapapauʻi pe naʻe fai ha angahala. Kapau ko ia, te nau muimui ʻi he ngaahi fakahinohino Fakatohitapú ke fakapapauʻi ʻa e meʻa ke faí. (Teu. 13:12-14) ʻI heʻenau ngāue ʻi ha kōmiti fakamaau, kuo pau ke nau tokanga ʻaupito ke fakapapauʻi pe ʻoku fakatomala pe ʻikai, ha tokotaha kuó ne fai ha angahala mamafa. ʻOku ʻikai faingofua maʻu pē hono fai ení. ʻOku kau ki he fakatomalá ʻa e anga ʻo e vakai ʻa e tokotaha faiangahalá ki he meʻa kuó ne faí mo e meʻa ʻoku ʻi hono lotó. (Fkh. 3:3) Kuo pau ke fakatomala ha tokotaha faiangahala koeʻuhí ke ne maʻu ʻa e mēsí.a​—Sio ki he fakamatala ʻi lalo.

17, 18. ʻE lava fēfē ke ʻiloʻi ʻe he kau mātuʻá pe ʻoku fakatomala moʻoni ha taha? (Sio ki he ʻuluaki fakatātā ʻi he kupú ni.)

¹⁷ ʻOku ʻiloʻi ʻe Sihova mo Sīsū ʻa e meʻa tofu pē ʻoku fakakaukau ki ai mo ongoʻi ʻe ha tokotaha he ʻoku lava ke na ʻiloʻi ʻa e lotó. Ka ko e kau mātuʻá ʻoku ʻikai lava ke nau ʻiloʻi ʻa e lotó. Ko ia kapau ko ha mātuʻa koe, ʻe lava fēfē ke ke ʻiloʻi pe ʻoku fakatomala moʻoni ha taha? ʻUluakí, lotu ʻo kole ʻa e potó mo e ʻiloʻiló. (1 Tuʻi 3:9) Uá, ngāueʻaki ʻa e Folofola ʻa e ʻOtuá mo e ʻū tohi mei he tamaioʻeiki anga-tonú ke ne tokoniʻi koe ke ke sio ki he faikehekehe ʻi he vahaʻa ʻo e “ongoʻi mamahi hangē ko e kakai ʻo e māmaní” mo e “mamahi ʻi ha founga ʻoku hōifua ai ʻa e ʻOtuá,” ʻa ia, ko e fakatomala moʻoni. (2 Kol. 7:10, 11) Sio angé ki he anga hono fakamatalaʻi ʻe he Tohi Tapú ʻa e faʻahinga naʻe fakatomalá mo e faʻahinga naʻe ʻikaí, pea sivisiviʻi ʻa e anga ʻo ʻenau ongoʻí, fakakaukaú, mo e ngāué.

¹⁸ Tolú, fakakaukau fekauʻaki mo e tokotahá, ʻo ʻikai ko e meʻa kuó ne faí. Ko e hā ʻokú ne pehē aí? Ko e hā kuó ne fai ai ha ngaahi fili pau? Ko e hā ʻene ngaahi polé mo hono ngātangá? Naʻe tomuʻa tala ʻe he Tohi Tapú ko Sīsū, ʻa e ʻulu ʻo e fakatahaʻanga Kalisitiané, “heʻikai te ne faifakamaau ʻaki ʻa e meʻa ʻoku hā mai ki hono matá, pe valoki ʻo fakatatau pē ki he meʻa ʻoku fanongo ki ai ʻa hono telingá. Te ne fakamāuʻi ʻa e māʻulaló ʻaki ʻa e totonu, pea te ne fai ha valoki ʻi he anga-tonu koeʻuhi ko e faʻahinga anga-vaivai ʻo e māmaní.” (ʻAi. 11:3, 4) Kau mātuʻa, kuo fakanofo kimoutolu ʻe Sīsū ke mou tokangaʻi ʻa ʻene fakatahaʻangá, pea te ne tokoniʻi kimoutolu ke mou fakamaau ʻi he fakamaau totonu mo e meesi. (Māt. 18:18-20) ʻOku tau mātuʻaki houngaʻia ʻi heʻetau maʻu ha kau mātuʻa ʻoku nau tokanga mai kiate kitautolu! ʻOku nau toe tokoniʻi kitautolu ke tau fefakahāhāʻaki ʻa e fakamaau totonú mo e mēsí.

19. Ko e hā ʻa e lēsoni mei he ngaahi kolo hūfangá ʻokú ke palani ke ngāueʻakí?

¹⁹ ʻOku ʻi he Lao ʻa Mōsesé “ʻa e mahino tefito ki he ʻilo mo e moʻoni.” ʻOkú ne akoʻi kitautolu fekauʻaki mo Sihova mo ʻene ngaahi tefitoʻi moʻoní. (Loma 2:20) Ko e ngaahi kolo hūfanga naʻe fakamatalaʻi ʻi he Laó ʻoku akoʻi ai ki he kau mātuʻá ʻa e founga ke “fakamaau ʻaki ʻa e fakamaau totonu moʻoní,” pea ʻoku akoʻi ai ʻa kitautolu kotoa ke tau fefakahāhāʻaki ʻa e “ʻofa mateaki mo e meesi.” (Sāk. 7:9) Neongo ʻoku ʻikai fiemaʻu ke tau fai ki he Laó, kuo ʻikai ke liliu ʻa Sihova. Ko e fakamaau totonú mo e mēsí ʻoku kei mātuʻaki mahuʻinga pē kiate ia. Ko ha monū ia ke lotu ki ha ʻOtua pehē. Tau faʻifaʻitaki ki hono ngaahi ʻulungaanga fisifisimuʻá pea maʻu ʻa e maluʻanga ʻiate ia!