“Pea,” naʻe hoko atu ʻe Sīsū, “ʻe tuku atu ʻe he tangatá hono tokouá ki he mate, mo e tamaí ʻene tamá, pea ʻe tuʻu hake ʻa e fānaú ki he mātuʻá pea te nau tāmateʻi kinautolu.” Naʻá ne tānaki atu: “Te mou hoko ko e fehiʻanekina ʻe he kakai kotoa pē koeʻuhi ko hoku hingoá; ka ko ia te ne kītaki ʻo aʻu ki he ikuʻangá, ko e tokotaha ko iá ʻe moʻui.”

Ko e moʻoni ia naʻe ʻoange ʻe Sīsū ʻa e fakahinohino, fakatokanga, mo e fakalototoʻa ko ʻení ki heʻene kau ʻaposetolo ʻe toko 12, ka naʻe toe ʻuhinga foki ia ki he faʻahinga ko ia te nau kau ʻi he ngāue fakamalanga ʻi māmani lahí ʻi he hili ʻa ʻene pekia mo toetuʻú. ʻOku fakahaaʻi ia ʻe heʻene lea ko ia ʻo pehē ko ʻene kau ākongá ʻe ‘fehiʻanekina ʻe he kakai kotoa pē,’ ʻo ʻikai ko e kau ʻIsilelí pē ʻa ia naʻe fekau atu ki ai ʻa e kau ʻaposetoló ke malanga ki aí. ʻIkai ngata aí, ʻoku hā mahino naʻe ʻikai ke ʻave ʻa e kau ʻaposetoló ki ha kau kōvana mo ha ngaahi tuʻi ʻi he taimi naʻe fekau atu ai kinautolu ʻe Sīsū ʻi heʻenau feingangāue fakamalanga taimi nounoú. ʻIkai ko ia pē, naʻe ʻikai tuku atu ki he maté ʻa e kau tuí ʻe he ngaahi mēmipa ʻo e fāmilí.