“Kuó Ke Fakaeʻa Ia ki he Kau Valevalé”

ʻOkú ke loto ke ʻiloʻi ʻa e moʻoni fekauʻaki mo e ʻOtuá—ko hai ia, ko e hā ʻokú ne ʻofa aí pea ko e hā hono finangaló? ʻI heʻene Folofolá, ʻa e Tohi Tapú ʻoku fakahaaʻi kakato ai ʻe Sihova ko e ʻOtuá ʻa e moʻoni fekauʻaki mo iá. Ka ʻoku ʻikai lava ʻe ha faʻahinga taha pē ke lau ʻa e Tohi Tapú pea mahinoʻi kakato ʻa e moʻoni ko iá. Ko e hā hono ʻuhingá? Koeʻuhí ko hono mahinoʻi ʻa e moʻoni fakalaumālie peheé ko ha monū ia; ʻoku ʻikai maʻu ia ʻe he tokotaha kotoa. Tau lāulea angé ki he meʻa naʻe leaʻaki ʻe Sīsū fekauʻaki mo e meʻá ni.—Lau ʻa e Mātiu 11:25.

ʻOku kamata ʻa e vēsí ʻo pehē: “ʻI he taimi ko iá naʻe tali ʻe Sīsū.” Ko ia, ko e meʻa ʻoku ʻamanaki ke ne leaʻakí, mahalo ko e tali ki he meʻa naʻe toki hokó. Naʻe toki ʻosi pē ʻene valokiʻi ʻa e kakai naʻe taʻefiefanongo ʻi he ngaahi kolo ʻe tolu ʻi Kālelí ʻa ia naʻá ne fakahoko ai ha ngaahi ngāue fakaofo. (Mātiu 11:20-24) Teke fifili nai, ‘ʻE anga-fēfē ha sio ʻa ha tokotaha ki he ngaahi ngāue fakaemana ʻa Sīsuú pea ʻikai ke tali ʻa e moʻoni naʻá ne akoʻí?’ Ko e tōʻonga taʻefiefanongo ʻa e kakaí naʻe makatuʻunga ia ʻi heʻenau fakakaukau loto-taʻeʻunuá.—Mātiu 13:10-15.

Naʻe ʻilo ʻe Sīsū ko hano tatala ʻa e moʻoni fakalaumālié ʻoku ʻi he Tohi Tapú, ʻoku tau fiemaʻu ʻa e meʻa ʻe ua: Ko e tokoni ʻa e ʻOtuá mo e tuʻunga totonu ʻo e lotó. ʻOku fakamatala ʻa Sīsū: “ʻOku ou fakahīkihikiʻi fakahāhaaʻi koe, ʻe Tamai, ko e ʻEiki ʻo hēvani mo māmani, he kuó ke fufū ʻa e ngaahi meʻá ni mei he kau potó mo e kau ʻatamaiʻiá pea kuó ke fakaeʻa ia ki he kau valevalé.” Ko hono mahinoʻi ʻa e moʻoni fakalaumālie ʻoku ʻi he Tohi Tapú ʻoku lava ke pehē nai ko ha monū ia, ko e hā hoʻo fakakaukau? Ko Sihova ko e “ʻEiki ʻo hēvani mo māmani,” ʻe lava nai ke ne fūfuuʻi pe fakaeʻa ʻa e moʻoní ʻo fakatatau ki hono finangalo aoniú. Ka ko e ʻOtuá ʻoku ʻikai te ne anga-fefeka fekauʻaki mo e meʻá ni. ʻOku makatuʻunga ʻi he hā ʻene fakaeʻa ʻa e moʻoni ʻo e Tohi Tapú ki he niʻihi kae ʻikai ki he niʻihi?

ʻOku hōifua ʻa Sihova ki he anga-fakatōkilaló, kae ʻikai ko e hīkisiá. (Sēmisi 4:6) ʻOkú ne fūfuuʻi ʻa e moʻoní mei he “kau tangata potó mo e kau tangata ʻatamaiʻiá”—ko e kau poto fakaemāmaní mo e kau akó ʻa ia ʻi heʻenau pōlepolé mo e falala pē kia kitá ʻoku nau ongoʻi ai ʻoku ʻikai ke nau fiemaʻu ʻene tokoní. (1 Kolinitō 1:19-21) Ka ʻokú ne fakaeʻa ʻa e moʻoní ki he “kau valevalé”—ʻa e faʻahinga ʻoku haʻu kiate ia mo e loto-moʻoní, ʻo fakahāhā ʻa e anga-fakatōkilalo hangē ha kiʻi tamá. (Mātiu 18:1-4; 1 Kolinitō 1:26-28) Ko e ʻAlo ʻo e ʻOtuá ʻa Sīsū naʻá ne ʻiloʻi fakatouʻosi ʻa e ongo kakaí ni. Ko e kau taki lotu tuʻunga ako lelei pōlepole tokolahi naʻe ʻikai ke nau mahinoʻi ʻa e pōpoaki ʻa Sīsū, ka ko e kau tangata toutai anga-fakatōkilaló naʻa nau mahinoʻi. (Mātiu 4:18-22; 23:1-5; Ngāue 4:13) ʻI he taimi tatau, ko e kau tuʻumālie mo e kau poto ʻe niʻihi naʻa nau fakahāhā ʻa e anga-fakatōkilalo moʻoní ʻo nau hoko ko e kau muimui ʻo Sīsū.—Luke 19:1, 2, 8; Ngāue 22:1-3.

Tau toe foki ki he fehuʻi naʻe ʻohake ʻi he kamataʻangá: Te ke loto ke ʻilo ki he moʻoni fekauʻaki mo e ʻOtuá? Kapau ko ia, te ke maʻu nai ha fiemālie ʻi hono ʻiloʻi ko e ʻOtuá ʻoku ʻikai ke ne hōifua ki he faʻahinga ko ia ʻoku nau fakakaukau kiate kinautolu ʻoku nau poto fakaemāmaní. ʻI hono kehé, ʻokú ne hōifua ki he faʻahinga ʻoku siolalo nai ki ai ʻa e kau poto fakaemāmaní. Kapau ʻokú ke ako ʻa e Folofola ʻa e ʻOtuá mo ha fakakaukau totonu mo e loto-totonu, mahalo te ke kau ʻi he faʻahinga ʻa ia ʻe ʻoange ʻe Sihova ha meʻaʻofa mahuʻinga—ko e mahinoʻi ʻa e moʻoni fekauʻaki mo iá. Ko hono mahinoʻi ʻa e moʻoní ʻe tānaki atu ai ʻa e fiefia lahi ange ki hoʻo moʻuí he taimí ni pea lava ke taki atu ki he “moʻui moʻoní”—ko e moʻui tuputupuʻa kuo talaʻofa mai ʻe he ʻOtuá ʻi he māmani foʻou ʻo e kau māʻoniʻoní ʻoku vavé ni ke hoko maí.a—1 Tīmote 6:12, 19; 2 Pita 3:13.