“Haʻu Kiate Au, . . . pea Te U Fakaivifoʻou Kimoutolu”

 1. Hangē ko ia ʻoku lēkooti ʻi he Mātiu 11:28-30, ko e hā ʻa e talaʻofa naʻe fai ʻe Sīsuú?

NAʻE fai ʻe Sīsū ha talaʻofa fakaʻofoʻofa ki ha fuʻu kakai naʻe fanongo kiate ia. “Haʻu kiate au,” ko ʻene leá ia, “pea te u fakaivifoʻou kimoutolu.” (Lau ʻa e Mātiu 11:28-30.) Naʻe ʻikai ko ha talaʻofa lau pē eni. Ko e fakatātaá, fakakaukau ki he meʻa naʻá ne fai ki ha fefine naʻá ne faingataʻaʻia ʻi ha mahaki fakamamahi.

 2. Ko e hā naʻe fai ʻe Sīsū ki ha fefine puke?

² Naʻe fiemaʻu vivili ʻe he fefiné ha tokoni. Naʻá ne ʻosi ʻalu ki he kau toketā tokolahi, ʻo ʻamanaki ke faitoʻo hono puké. Hili ʻa e taʻu ʻe 12 ʻene faingataʻaʻiá, naʻe ʻikai pē ke ne sai. Fakatatau ki he Laó, naʻá ne taʻemaʻa. (Liv. 15:25) Pea naʻá ne fanongo ʻe lava ʻe Sīsū ke faitoʻo ʻa e faʻahinga naʻe faingataʻaʻiá, ko ia naʻá ne ʻalu ʻo kumi kiate ia. ʻI heʻene maʻu iá, naʻá ne ala ki he tapa ʻo hono kofu tuʻá, pea naʻá ne sai he taimi pē ko iá! Ka naʻe fai ʻe Sīsū ʻa e meʻa lahi ange ʻi hono fakamoʻui fakaesino pē iá​—naʻá ne ʻoange kiate ia ʻa e ngeia naʻá ne tuha mo iá. Ko e fakatātā, ʻi he taimi naʻá ne lea ai kiate iá, naʻá ne ngāueʻaki ʻa e foʻi lea anga-ʻofa mo fakaʻapaʻapa ko e “ʻofefine.” Kuo pau pē naʻe ongoʻi fakaivifoʻou mo fakaivimālohi moʻoni ʻa e fefiné!​—Luke 8:43-48.

 3. Ko e hā ʻa e ngaahi fehuʻi te tau talí?

³ Fakatokangaʻi naʻe ʻalu ʻa e fefiné kia Sīsū. Naʻá ne tamuʻomuʻa. ʻOku pehē pē ʻi he ʻahó ni​—kuo pau ke tau fai ha feinga ke “haʻu” kia Sīsū. ʻI he taimí ni, heʻikai ke fakamoʻui fakaemana ʻe Sīsū ʻa e puke fakaesino ʻa e faʻahinga ʻoku “haʻu” kiate iá. Ka ʻokú ne kei fakaaʻu mai pē ʻa e fakaafé: “Haʻu kiate au, . . . pea te u fakaivifoʻou kimoutolu.” ʻI he kupu ko ení, te tau tali ʻa e fehuʻi ʻe nima: ʻE lava fēfē ke tau “haʻu” kia Sīsū? Ko e hā naʻe ʻuhinga ki ai ʻa Sīsū ʻi heʻene pehē: “Mou fua ʻeku ʻioké”? Ko e hā ʻe lava ke tau ako meia Sīsuú? Ko e hā ʻoku fakaivifoʻou ai ʻa e ngāue kuó ne ʻomai kiate kitautolú? Pea ʻe lava fēfē ke hokohoko atu ʻetau maʻu ʻa e fakaivifoʻou ʻi he malumalu ʻo e ʻioke ʻa Sīsuú?

4-5. Ko e hā ʻa e ngaahi founga ʻe lava ke tau “haʻu” ai kia Sīsuú?

⁴ Ko e founga ʻe taha ke “haʻu” ai kia Sīsuú ko hono ako ʻa e meʻa lahi taha te tau ala lavá fekauʻaki mo e meʻa naʻá ne leaʻaki mo faí. (Luke 1:1-4) Heʻikai lava ʻe ha toe taha ʻo fai eni maʻatautolu​—kuo pau ke tau ako ʻa e ngaahi fakamatala ko ení. ʻOku tau toe “haʻu” kia Sīsū fakafou ʻi heʻetau fili ke papitaiso pea hoko ko ha ākonga ʻa Kalaisi.

⁵ Ko e toe founga ʻe taha ke “haʻu” ai kia Sīsuú ko e ʻalu ki he kau mātuʻa ʻi he fakatahaʻangá ʻi he taimi ʻoku tau fiemaʻu tokoni aí. ʻOku ngāueʻaki ʻe Sīsū ʻa e “ngaahi meʻaʻofa ko e kau tangata” ke tokangaʻi ʻene fanga sipí. (ʻEf. 4:7, 8, 11; Sione 21:16; 1 Pita 5:1-3) Kuo pau ke tau tamuʻomuʻa ke kole ki heʻenau tokoní. Heʻikai lava ke tau ʻamanekina ʻa e kau mātuʻá ke nau mahinoʻi ʻetau fakakaukaú pea ʻiloʻi ʻetau fiemaʻú. Fakakaukau ki he meʻa naʻe leaʻaki ʻe ha tokoua ko Julian: “Naʻe pau ke u mavahe mei hoku vāhenga-ngāue ʻi Pētelí koeʻuhi ko e mahamahakí, pea naʻe fokotuʻu mai ʻe he taha hoku ngaahi kaumeʻá ke u kole ha ʻaʻahi fakatauhisipi. ʻI he kamatá, naʻá ku fakakaukau naʻe ʻikai ke u fiemaʻu ia. Ka ki mui ange naʻá ku kole ha tokoni, pea naʻe hoko ʻa e ʻaʻahi fakatauhisipí ko e taha ʻo e ngaahi meʻaʻofa lelei taha kuo faifai ange peá u maʻú.” Ko e kau mātuʻa mateakí, ʻo hangē ko e mātuʻa ʻe toko ua naʻá na ʻaʻahi kia Julian, ʻe lava ke nau tokoniʻi kitautolu ke ʻilo “ʻa e fakakaukau ʻa Kalaisí,” ʻa ia, ke tau mahinoʻi mo faʻifaʻitaki ki heʻene fakakaukaú mo e tōʻongá. (1 Kol. 2:16; 1 Pita 2:21) Ko e taha moʻoni eni ʻo e ngaahi meʻaʻofa lelei taha ʻe lava ke nau ʻomai maʻatautolú.

 6. Ko e hā naʻe ʻuhinga ki ai ʻa Sīsū ʻi heʻene pehē: “Mou fua ʻeku ʻioké”?

⁶ ʻI he pehē ʻe Sīsū: “Mou fua ʻeku ʻioké,” naʻá ne ʻuhinga nai ke “Tali hoku mafaí.” Naʻe lava nai ke ne toe ʻuhinga “Tau kaungā-fua fakataha ʻeku ʻioké, pea te tau ngāue ai kia Sihova.” Ko e ongo fakalea ko ení ʻoku ʻuhingá kuo pau ke tau fai ha ngāue.

 7. Fakatatau ki he Mātiu 28:18-20, ko e hā ʻa e ngāue kuo ʻomai ke tau faí, pea ko e hā ʻe lava ke tau fakapapauʻí?

⁷ ʻOku tau tali ʻa e fakaafe ʻa Sīsuú ʻi heʻetau fakatapui ʻetau moʻuí kia Sihova pea papitaiso. Ko e fakaafe ko iá ʻoku ʻatā ki he tokotaha kotoa​—heʻikai ʻaupito ke talitekeʻi ʻe Sīsū ha taha ʻoku loto-moʻoni ke tauhi ki he ʻOtuá. (Sione 6:37, 38) Ko e kotoa ʻo e kau muimui ʻo Kalaisí kuo ʻoange kiate kinautolu ʻa e monū ke kau ʻi he ngāue naʻe kole ʻe Sihova kia Sīsū ke ne faí. ʻOku lava ke tau fakapapauʻi ʻe ʻi ai maʻu pē ʻa Sīsū ke tokoniʻi kitautolu ke fai ʻa e ngāue ko iá.​—Lau ʻa e Mātiu 28:18-20.

8-9. Ko e hā naʻe tohoakiʻi ai ʻa e kakai anga-fakatōkilaló kia Sīsuú, pea ko e hā ʻa e ngaahi fehuʻi ʻoku totonu ke tau ʻeke hifo kiate kitautolú?

⁸ Ko e kakai anga-fakatōkilaló naʻe tohoakiʻi kia Sīsū. (Māt. 19:13, 14; Luke 7:37, 38) Ko e hā hono ʻuhingá? Fakakaukau ki he kehekehe ʻi he vahaʻa ʻo Sīsū mo e kau Fālesí. Ko e kau taki lotu ko iá naʻa nau taʻeʻofa mo hīkisia. (Māt. 12:9-14) Ko Sīsū naʻá ne anga-ʻofa mo anga-fakatōkilalo. Ko e kau Fālesí naʻa nau fiemahuʻinga mo pōlepole koeʻuhi ko honau tuʻunga māʻolunga ʻi he sōsaietí. Naʻe talitekeʻi ʻe Sīsū ʻa e pōlepole taʻetotonú, pea naʻá ne akoʻi ʻene kau ākongá ke nau vakai kiate kinautolu ko e kau sevāniti māʻulalo. (Māt. 23:2, 6-11) Naʻe puleʻi ʻe he kau Fālesí ʻa e niʻihi kehé ʻaki hono fakailifiaʻi mo fakamanamanaʻi kinautolu. (Sione 9:13, 22) Naʻe fakaivifoʻou ʻe Sīsū ʻa e niʻihi kehé fakafou ʻi he ngaahi ngāue anga-ʻofa mo e ngaahi lea anga-lelei.

⁹ Kuó ke ako ʻa e ngaahi lēsoni ko ení meia Sīsū? ʻEke hifo kiate koe: ‘ʻOku ou maʻu ha ongoongo ʻo e hoko ko ha tokotaha anga-mokomoko mo anga-fakatōkilalo? ʻOku ou fai loto-lelei ha ngāue māʻulalo maʻá e niʻihi kehé? ʻOku ou anga-lelei ki he niʻihi kehé?’

10. Ko e hā ʻa e faʻahinga ʻātakai naʻe langa hake ʻe Sīsū ʻi heʻene ngāué?

¹⁰ Naʻe langa hake ʻe Sīsū ha ʻātakai melino mo fakamānako maʻa hono kaungāngāué, pea naʻá ne fiefia ʻi hono akoʻi kinautolú. (Luke 10:1, 19-21) Naʻá ne fakalototoʻaʻi ʻene kau ākongá ke ʻeke ʻa e ngaahi fehuʻi, pea naʻá ne loto ke fanongo ki heʻenau fakakaukaú. (Māt. 16:13-16) Hangē ko e fanga kiʻi ʻakau ʻoku tauhi ʻi he fale ʻoku fakaili ai ʻa e ʻakaú, ko e kau ākongá ʻoku nau tupu ʻāfaʻafa. Naʻa nau ako ʻa e ngaahi lēsoni naʻe akoʻi ʻe Sīsuú pea nau laku fua mai fakafou ʻi heʻenau ngaahi ngāue leleí.

11. Ko e hā ʻa e ngaahi fehuʻi ʻoku totonu ke tau ʻeke hifó?

¹¹ ʻOkú ke maʻu ha mafai? Kapau ʻoku pehē, ʻeke hifo: ‘Ko e hā ʻa e faʻahinga ʻātakai ʻoku ou pouaki ʻi he ngāueʻangá pe ʻi ʻapi? ʻOku ou pouaki ʻa e melinó? ʻOku ou fakalototoʻaʻi ʻa e niʻihi kehé ke nau ʻeke fehuʻi? ʻOku ou loto-lelei ke fanongo ki heʻenau fakakaukaú?’ Heʻikai ʻaupito te tau loto ke hangē ko e kau Fālesí, ʻa ia naʻa nau ʻita ʻi he faʻahinga naʻa nau ʻeke fehuʻi kiate kinautolú pea fakatangaʻi ʻa e faʻahinga naʻa nau fakahaaʻi ha fakakaukau naʻe fepaki mo ʻenau fakakaukaú.​—Mk. 3:1-6; Sione 9:29-34.

12-14. Ko e hā ʻoku fakaivifoʻou ai kiate kitautolu ʻa e ngāue kuo ʻomai ʻe Sīsuú?

¹² Ko e hā ʻoku fakaivifoʻou ai kiate kitautolu ke fai ʻa e ngāue kuo ʻomai ʻe Sīsuú? ʻOku lahi ʻa e ngaahi ʻuhingá, ka te tau lāulea ki he niʻihi.

¹³ ʻOku tau maʻu ʻa e kau ʻovasia lelei tahá. Ko Sihova, ʻa hotau ʻOvasia Aoniú, ʻoku ʻikai ko ha pule taʻehoungaʻia ia pe anga-fefeka. ʻOkú ne houngaʻia ʻi he ngāue ʻoku tau faí. (Hep. 6:10) Pea ʻokú ne ʻomai kiate kitautolu ʻa e mālohi ʻoku fiemaʻu ke fuaʻaki hotau fatongiá. (2 Kol. 4:7; Kal. 6:5, fkm. ʻi lalo) Ko Sīsū, ʻa hotau Tuʻí, ʻokú ne tataki kitautolu fakafou ʻi heʻene faʻifaʻitakiʻangá. (Sione 13:15) Pea ʻoku feinga ʻa e kau mātuʻa ʻoku nau tauhi kitautolú ke faʻifaʻitaki kia Sīsū, ‘ʻa e tauhi-sipi lahí.’ (Hep. 13:20; 1 Pita 5:2) ʻOku nau feinga ke hoko ʻo anga-lelei, fakatupu langa hake pea loto-toʻa ʻi heʻenau fafanga mo maluʻi kitautolú.

¹⁴ ʻOku tau maʻu ʻa e ngaahi kaungāmeʻa lelei tahá. ʻOku ʻikai ha toe kakai te nau maʻu ha moʻui mohu taumuʻa pe haʻi ʻo e ʻofa ʻo hangē ko kitautolú. Fakakaukau atu: ʻOku tau monūʻia ke ngāue mo e kakai ʻoku nau maʻu ʻa e ngaahi tuʻunga fakaeʻulungaanga māʻolunga tahá ka ʻoku ʻikai ke nau māʻoniʻoni fau. ʻOku lahi honau ngaahi talēnití ka ʻoku nau anga-fakanānā, pea ʻoku nau vakai ki he niʻihi kehé ʻoku nau māʻolunga ange ʻiate kinautolu. ʻOku ʻikai ngata pē ʻenau vakai mai kiate kitautolu ko e kaungāngāué kae pehē foki ko e ngaahi kaungāmeʻa. Pea ko e haʻi ko iá ʻoku vāofi ʻaupito ʻo nau loto-lelei ke foaki ʻenau moʻuí koeʻuhi ko kitautolu!

15. ʻOku totonu ke fēfē ʻetau ongoʻi fekauʻaki mo e ngāue ʻoku tau faí?

¹⁵ ʻOku tau maʻu ʻa e ngāue lelei tahá. ʻOku tau akoʻi ki he kakaí ʻa e moʻoni fekauʻaki mo Sihová pea fakaeʻa ʻa e ngaahi loi ʻa e Tēvoló. (Sione 8:44) ʻOku lōmekina ʻe Sētane ʻa e kakaí ʻaki ʻa e ngaahi kavenga ʻoku ʻikai lava ke nau fua. Ko e fakatātaá, ʻokú ne loto ke tau tui heʻikai ke fakamolemoleʻi ʻe Sihova ʻetau ngaahi angahalá pea ʻoku ʻikai ʻofaʻi kitautolu. He kavenga fakamafasia mo ha loi fakalilifu ē! ʻI heʻetau “haʻu” kia Kalaisí, ʻe fakamolemoleʻi ʻetau ngaahi angahalá. Pea ko hono moʻoní ʻoku ʻofa lahi ʻa Sihova ʻiate kitautolu kotoa. (Loma 8:32, 38, 39) Ko ha meʻa fakakoloa ē ke tokoniʻi ʻa e kakaí ke nau ako ke falala kia Sihova pea ke sio ki heʻenau fakaleleiʻi ʻenau moʻuí!

16. ʻOku anga-fēfē ʻa e kehe ʻa e kavenga ʻoku kole mai ʻe Sīsū ke tau fuá mei he ngaahi kavenga kehe kuo pau ke tau fuá?

¹⁶ Ko e kavenga ʻoku kole mai ʻe Sīsū ke tau fuá ʻoku kehe ia mei he ngaahi kavenga kehe kuo pau ke tau fuá. Ko e fakatātaá, ʻi he ngataʻanga ʻo ha ʻaho ʻo e ngāue fakamāmaní, ʻoku ʻikai ngata pē ʻi he ongoʻi helaʻia ʻa e tokolahi kae toe taʻefiemālie. ʻI hono kehé, hili hono fakamoleki ha taimi ʻi he ngāue kia Sihova mo Kalaisí, ʻoku tau ongoʻi fiemālie moʻoni. Te tau helaʻia nai ʻi he ngataʻanga ʻo e ʻaho ngāué pea ʻe fiemaʻu nai ʻa e feinga lahi ʻiate kitautolu ke maʻu ha fakataha ʻa e fakatahaʻangá ʻi he pō ko iá. Ka ʻi heʻetau faʻa foki ki ʻapi mei he fakataha ko iá kuo tau ongoʻi fakaivifoʻou mo fakaivimālohi. ʻOku pehē pē mo ʻetau feinga ke malanga pea fai ʻetau ako Tohi Tapu fakafoʻituituí. Ko e totongi ʻoku tau maʻú ʻoku laka mamaʻo ange ia ʻi he ivi ʻoku tau fakamolekí!

17. Ko e hā kuo pau ke tau mahinoʻí pea tokanga fekauʻaki mo iá?

¹⁷ Kuo pau ke tau mahinoʻi ko kitautolu taki taha ʻoku fakangatangata pē ʻa e lahi hotau iví. Ko ia kuo pau ke tau tokanga fekauʻaki mo e meʻa ʻoku tau faí. Ko e fakatātaá, ʻe lava ke tau fakamoleki noa hotau iví ʻi he feinga ke tānaki ʻa e ngaahi koloa fakamatelié. Fakatokangaʻi ʻa e meʻa naʻe leaʻaki ʻe Sīsū ki ha talavou koloaʻia ʻa ia naʻá ne ʻeke ange kiate ia: “Ko e hā kuo pau ke u fai ke u maʻu ai ʻa e moʻui taʻengatá?” Ko e talavoú naʻá ne ʻosi talangofua ki he Laó. Kuo pau pē ko ha tangata lelei ia koeʻuhi ʻoku fakamatalaʻi tefito ʻi he Kōsipeli ʻa Maʻaké naʻe “ongoʻi ʻofa kiate ia” ʻa Sīsū. Naʻe ʻoange ʻe Sīsū ki he talavou pulé ha fakaafe. “ʻAlu ʻo fakatau atu ʻa e ngaahi meʻa ʻokú ke maʻú,” ko e lea ia ʻa Sīsū, “peá ke haʻu ʻo muimui ʻiate au.” Naʻe loto ʻa e tangatá ke muimui kia Sīsū, ka ʻoku hā ngali naʻe ʻikai lava ke ne tuku ange ʻene ‘ngaahi koloa lahí.’ (Mk. 10:17-22) Ko hono olá, naʻe ʻikai ke ne tali ʻa e fakaafe ʻa Sīsū ke fua ʻene ʻioké pea hokohoko atu ke ngāue fakatamaioʻeiki “ki he Koloá.” (Māt. 6:24) Ko e hā ʻa e fili naʻá ke mei faí?

18. Ko e hā ʻoku totonu ke tau fai maʻu pē, pea ko e hā hono ʻuhingá?

¹⁸ Mei he taimi ki he taimi, ʻoku lelei ke tau toe fakakaukau ki he meʻa ʻoku tau fakamuʻomuʻa ʻi heʻetau moʻuí. Ko e hā hono ʻuhingá? Koeʻuhi ke tau fakapapauʻi ʻoku tau ngāueʻaki fakapotopoto hotau iví. Fakatokangaʻi ʻa e meʻa naʻe leaʻaki ʻe ha talavou ko Maʻake: “ʻI he ngaahi taʻu lahi, naʻá ku fakakaukau naʻá ku maʻu ha moʻui faingofua. Naʻá ku tāimuʻa, ka naʻá ku fakakaukau maʻu pē fekauʻaki mo e paʻangá pea fekauʻaki mo hono ʻai ʻeku moʻuí ke toe fiemālie ange. Naʻá ku fifili pe ko e hā kuo hoko ai ʻeku moʻuí ʻo fakamafasiá. Pea naʻá ku fakatokangaʻi leva naʻá ku fakamuʻomuʻa ʻa e kumi pē ki he lelei ʻaʻakú pea toki foaki kia Sihova ʻa e taimi mo e ivi naʻe toé.” Naʻe fakatonutonu ʻe Maʻake ʻene fakakaukaú mo e founga moʻuí pea fakafaingamālieʻi ia ke fai ʻa e meʻa lahi ange ʻi he ngāue ʻa Sihová. “ʻOku ou faʻa ongoʻi loto-moʻua ʻi he taimi ʻe niʻihi,” ko e lau ia ʻa Maʻaké, “ka ʻi he tokoni ʻa Sihová mo e poupou ʻa Sīsuú, kuó u ikuʻi ʻeku ngaahi polé.”

19. Ko e hā ʻoku mātuʻaki mahuʻinga ai hono maʻu ʻa e fakakaukau totonú?

¹⁹ ʻE hokohoko atu ʻetau maʻu ʻa e fakaivifoʻou ʻi he malumalu ʻo e ʻioke ʻa Sīsuú kapau te tau fai ʻa e meʻa ʻe tolu. ʻUluakí, tauhi maʻu ha fakakaukau totonu. ʻOku tau fai ʻa e ngāue ʻa Sihová, ko ia kuo pau ke tau fai ia ʻi he founga ʻa Sihová. Ko kitautolu ʻa e kau ngāué, pea ko Sihova ʻa e Pulé. (Luke 17:10) Kapau ʻoku tau feinga ke fai ʻene ngāué ʻi heʻetau foungá, te tau hoko ai ʻo fakafepaki ki he ʻioké. Naʻa mo ha pulu mālohi ʻoku ngalingali ʻe lavea pe helaʻia kapau ʻokú ne toutou feinga ke ʻalu pē ia ki he feituʻu ʻokú ne loto ki aí ʻo fakafepaki ai ki he ʻioke ʻoku puleʻi ʻe hono pulé. ʻI he tafaʻaki ʻe tahá, ʻoku lava ke tau fai ʻa e ngaahi meʻa fakaofo pea ikuʻi ha fakafaingataʻaʻiaʻanga pē kapau ʻoku tau muimui ki he tataki ʻa Sihová. Manatuʻi heʻikai lava ha taha ʻo taʻofi hono finangaló mei hono fakahokó!​—Loma 8:31; 1 Sio. 4:4.

20. Ko e hā ʻoku totonu ko ʻetau fakaueʻilotó ia ʻi heʻetau ʻi he malumalu ʻo e ʻioke ʻa Sīsuú?

²⁰ Uá, ngāue fakataha mo e fakaueʻiloto totonu. Ko ʻetau taumuʻá ke fakalāngilangiʻi ʻetau Tamai ʻofá, ʻa Sihova. Ko e faʻahinga ʻi he ʻuluaki senitulí ʻa ia naʻe ueʻi kinautolu ʻe he mānumanú pe fakamahuʻingaʻi-kitá naʻe vave ʻenau hoko ʻo loto-mamahi pea liʻaki ʻa e ʻioke ʻa Sīsuú. (Sione 6:25-27, 51, 60, 66; Fil. 3:18, 19) ʻI hono kehé, ko e faʻahinga ko ia naʻe ueʻi ʻe he ʻofa taʻesiokita ki he ʻOtuá mo e ʻofa ki he kaungāʻapí naʻa nau fua fiefia ʻa e ʻioke ko iá ʻi he kotoa ʻenau moʻui ʻi he māmaní, fakataha mo e ʻamanaki ke ngāue fakataha mo Kalaisi ʻi hēvani. Hangē ko kinautolú, te tau hanganaki fiefia ʻi hono fua ʻa e ʻioke ʻa Sīsuú fakataha mo e fakaueʻiloto totonu.

21. Fakatatau ki he Mātiu 6:31-33, ko e hā ʻe lava ke tau ʻamanekina ke fai ʻe Sihová?

²¹ Tolú, maʻu ʻa e ngaahi ʻamanekina totonu. Kuo tau fili ha moʻui feilaulauʻi-kita pea ngāue mālohi. Naʻe fakatokanga mai ʻa Sīsū ʻe fakatangaʻi kitautolu. Ka ʻoku lava ke tau ʻamanekina ʻe ʻomai ʻe Sihova ʻa e mālohi ke kātekina ha faʻahinga pole pē. Ko e lahi ange ʻetau kātakí, te tau hoko ʻo toe mālohi ange. (Sēm. 1:2-4) ʻOku lava ke tau toe ʻamanekina ʻe tokonaki ʻa Sihova maʻatautolu, ʻe tauhi kitautolu ʻe Sīsū, pea ʻe fakalototoʻaʻi kitautolu ʻe hotau fanga tokouá mo e fanga tuofāfiné. (Lau ʻa e Mātiu 6:31-33; Sione 10:14; 1 Tes. 5:11) ʻOku tau maʻu ʻa e meʻa kotoa ʻoku fiemaʻu ke tau kātekina ai ha faʻahinga pole pē!

22. Ko e hā ʻoku lava ke tau fakamālō fekauʻaki mo iá?

²² Ko e fefine naʻe fakamoʻui ʻe Sīsuú naʻe fakaivifoʻou ʻi he ʻaho pē naʻá ne sai aí. Ka te ne maʻu ʻa e fakaivifoʻou tuʻuloa ʻo kapau pē naʻá ne hoko ko ha ākonga mateaki ʻa Kalaisi. ʻOkú ke pehē ko e hā naʻá ne faí? Kapau naʻá ne fili ke ʻi he malumalu ʻo e ʻioke ʻa Sīsuú, sioloto atu ki he palé​—ko e ngāue fakataha mo Sīsū ʻi hēvani! Ko ha faʻahinga feilaulau pē naʻá ne fai ke muimui ai kia Kalaisi heʻikai haʻane teitei ofi ʻe taha ki he tāpuaki ko iá. Tatau ai pē pe ko ʻetau ʻamanakí ke​—moʻui taʻengata ʻi hēvani pe ʻi māmani—​he fakamālō ē ko kitautolu ʻi heʻetau tali ʻa e fakaafe ʻa Sīsuú: “Haʻu kiate au!”