ʻOkú Ke ʻIloʻi ʻa e Taimí?

ʻI HOʻO fieʻilo ʻa e taimí, ko e hā ʻa e meʻa ʻokú ke faí? Ngalingali te ke sio ki ho uasí pe ki ha uasi. Te ke ʻilo nai ai ko e ʻosi ia ʻa e houa ʻe taha mo e miniti ʻe 30 mei he 12. Ko e hā te ke tala ange ki ha kaumeʻa te ne ʻeke atu, “Ko e fihá eni?”

ʻOku fakatuʻunga ia ʻi he feituʻu ʻokú ke nofo aí. Ko e fakatātaá, te ke pehē nai, “Ko e 1:30” pe “Ko e 13:30.” ʻI he feituʻu ʻe niʻihi te ke pehē nai ai, “ʻOku haafe ʻa e uá,” ʻo ʻuhingá ʻoku toe ʻa e miniti ʻe 30 pea hoko ʻa e uá.

Naʻe anga-fēfē hono tala ʻe he kakaí ʻa e taimí ʻi he taimi ʻo e Tohi Tapú? Naʻa nau maʻu foki ha founga laka hake ʻi he tahá. Ko e Ngaahi Konga Tohi Tapu Faka-Hepeluú ʻoku ngāueʻaki ai ʻa e ngaahi foʻi lea hangē ko e “pongipongi,” “hoʻatā,” “hoʻatā mālié,” mo e “efiafi.” (Sēn. 8:11; 19:27; 43:16; Teu. 28:29; 1 Tuʻi 18:26) Ka ʻi he taimi ʻe niʻihi ʻoku ngāueʻaki ai ʻe he Tohi Tapú ha ngaahi foʻi lea ʻoku fakapatonu ange.

ʻI ʻIsileli ʻo e kuonga muʻá, naʻe angamaheniʻaki ke ʻi ai ha kau tangata leʻo, tautefito ʻi he lolotonga ʻa e poʻulí. Naʻe vahevahe ʻe he kau ʻIsilelí ʻa e poʻulí ki he konga ʻe tolu, ʻa ia naʻa nau ui ko e “ngaahi houa leʻo.” (Saame 63:6) ʻI he Fakamaau 7:19, ʻoku tau lau ai fekauʻaki mo e “uasi hono ua ʻo e poó.” ʻI he taimi naʻe ʻaloʻi ai ʻa Sīsuú, naʻe vahevahe ai ʻe he kau Siú ʻa e poʻulí ki he uasi ʻe fā, ʻo hangē ko ia naʻe fai ʻe he kau Kalisí mo e kau Lomá.

ʻOku lave tuʻo lahi ʻa e ngaahi Kōsipelí ki he ngaahi houa leʻo ko eni ʻi he poʻulí. Ko e fakatātaá, “ʻi he uasi hono fā ʻo e poʻulí,” naʻe luelue ai ʻa Sīsū ʻi he fukahi tahí ki he vaka naʻe ʻi ai ʻene kau ākongá. (Māt. 14:25) Pea naʻe pehē ʻe Sīsū ʻi ha talanoa fakatātā: “Kapau naʻe ʻiloʻi ʻe he tokotaha ʻo e ʻapí pe ko e uasi fē ʻe haʻu ai ʻa e kaihaʻá, te ne hanganaki ʻā ʻo ʻoua ʻe tuku ke haea hono falé.”​—Māt. 24:43.

Naʻe lave ʻa Sīsū ki he uasi ʻe fā kotoa ko ení ʻi heʻene tala ki heʻene kau ākongá ke nau ʻāʻā koeʻuhí “ʻoku ʻikai te mou ʻiloʻi pe ʻe haʻu fakakū ʻa e ʻeiki ʻo e falé, pe ko e efiafí pe tuʻapoó pe ki muʻa ʻi he mafoa ʻa e atá, pe pongipongia.” (Mk. 13:35, fakamatala ʻi lalo) Ko e ʻuluaki ʻo e ngaahi uasi ko iá, ko e “efiafí,” naʻe mei he tō ʻa e laʻaá ʻo aʻu nai ki he hoko ʻa e hivá ʻi he efiafí. Ko hono uá, ko e uasi he “tuʻapoó,” naʻe mei he hoko nai ʻa e hivá ʻi he efiafí ʻo aʻu ki he tuʻapoó. Ko e uasi hono tolú, “ki muʻa ʻi he mafoa ʻa e atá,” pe “ʻuʻua ʻa e moá,” naʻe mei he tuʻapoó ki he tolú hengihengi nai. ʻOku ngalingali naʻe ʻuʻua ʻa e moá lolotonga ʻa e uasi ko ení ʻi he pō naʻe puke ai ʻo ʻave ʻa Sīsuú. (Mk. 14:72) Ko e uasi hono faá, ko e “pongipongia” naʻe mei he hoko nai ʻa e tolú hengihengi ki he hopo ʻa e laʻaá.

Ko ia neongo ko e kakai ʻi he taimi ko iá naʻe ʻikai ke ʻi ai haʻanau uasi hangē ko ia ʻoku tau maʻu ʻi he ʻaho ní, naʻe ʻi ai ʻenau founga ke tala ai ʻa e taimí.