ʻOkú Ke Kumi Fakamātoato kia Sihova?

NAʻE holi vēkeveke ha tangata Kalisitiane ke vahevahe atu ʻa e ongoongo lelei mei he Tohitapú ki he kau fefonongaʻaki kehe ʻi he lēlué. (Maake 13:10) Neongo ia, naʻe taʻofi ia ʻe he manavaheé. Naʻá ne foʻi ai? ʻIkai, naʻá ne ʻai ia ko ha meʻa ke lotu kīkīvoi fekauʻaki mo ia pea ngāue ki hono ako ʻa e founga ke kamataʻi ai ha fetalanoaʻakí. Naʻe tali ʻe Sihova ko e ʻOtuá ʻa e kole ʻa e tangatá ni peá ne ʻoange kiate ia ʻa e mālohi ke faifakamoʻoni ai.

Ko e fakamātoato peheé ʻoku mātuʻaki mahuʻinga ia ʻi he taimi ʻoku tau kumi ai kia Sihova mo ʻene tāpuakí. Naʻe pehē ʻe he ʻapositolo ko Paulá: “Ko ia ʻoku ʻunuʻunu ki he ʻOtua, kuo pau ʻoku ne tui ʻoku ʻi ai ia, pea te ne hanga ʻo totongi kiate kinautolu ʻoku kumi hākili [“fakamātoato,” NW] kiate ia.” (Hepelu 11:6) Ko e kumi ʻataʻatā pē kia Sihová ʻoku ʻikai ke feʻunga ia. Ko e foʻi veape faka-Kalisi ʻoku liliu ko e “kumi fakamātoató” ʻoku ʻi ha faʻunga ia ʻa ia ʻoku fakahuʻunga mei ai ʻa e feinga lahi mo fakahangataha. ʻOku kau ki he meʻá ni ʻa e kotoa ʻo hoto lotó, ʻatamaí, moʻuí mo e iví. Kapau ʻoku tau kumi fakamātoato kia Sihova, ʻoku ʻikai ke tau fai ia ʻi ha tōʻonga fakataʻetaʻetokanga, mamaeʻi-kita, pe fakapikopiko. ʻI hono kehé, ʻoku tau fakahāhā ʻa e faivelenga moʻoni ʻi he kumi kiate iá.​—Ngāue 15:17.

Faʻahinga ʻOku Nau Kumi Fakamātoato kia Sihová

ʻOku fonu ʻa e ngaahi Konga Tohitapú ʻi he ngaahi faʻifaʻitakiʻanga ʻo e faʻahinga naʻa nau fai ʻa e ngaahi feinga mālohi ʻi he kumi kia Sihová. Ko e tokotaha pehē ʻe taha ko Sēkope, ʻa ia naʻá ne fefaʻuhi mālohi mo e ʻāngelo naʻe liliu sino ʻa e ʻOtuá ʻo aʻu ki he maʻefu ʻa e ʻahó. Ko hono olá, naʻe ʻoange ai kia Sēkope ʻa e hingoa ʻIsilelí (Fāinga-mo-e-ʻOtua) koeʻuhí naʻá ne ‘fāinga’, pe kīvoi, fakafitefitaʻa [ʻa ia tonu], kītaki, mo e ʻOtuá. Naʻe tāpuakiʻi ia ʻe he ʻāngeló ʻi heʻene feinga fakamātoató.​—Senesi 32:​24-​30.

Pea ko e fefine Kāleli ko ena ʻoku ʻikai hā hono hingoá ʻa ia naʻá ne tofanga ʻo feʻunga mo e taʻu ʻe 12 ʻi ha ʻau toto, ʻa ia naʻe fakatupunga ai kiate ia ha ‘faitoʻo fakamamahi lahi.’ ʻI he tuʻunga ko ení, naʻe ʻikai ʻamanekina meiate ia ke ne ala ki he kakai kehé. Neongo ia, naʻá ne maʻu ha loto-toʻa ke ʻalu atu ke feʻiloaki mo Sīsū. Naʻá ne hanganaki pehē pē: “Kapau te u ala kiate ia, neongo ko hono kofu pe ē, ʻe fakamoʻui au.” Fakakaukau atu kiate ia ʻi heʻene tutui mālohi atu ʻi he ‘fuʻu kakai ne muimui [ʻia Sīsū] pea nau fetaʻomi kiate iá.’ ʻI heʻene ala pē ki he kofu tuʻa ʻo Sīsuú, naʻá ne ongoʻi ne “matuʻu leva ʻene ʻau”—ko hono mahaki tauhí naʻe fakamoʻui! ʻI he taimi naʻe ʻeke ai ʻe Sīsū, “Ko hai ne ala ki hoku kofu?” naʻá ne hoko ʻo ilifia. Ka naʻe tala ange loto-māfana ʻe Sīsū kiate ia: “Ngaʻata, kuo fakamoʻui koe ʻe hoʻo tui; ʻalu ʻo fiemālie pē ā, pea ke moʻui mei ho mamahiʻanga.” Ko ʻene ngaahi feingá naʻe fakapaleʻi.—Maake 5:​24-34; Livitiko 15:​25-27.

ʻI ha toe taimi ʻe taha, naʻe kōlenga fakamātoato ai ha fefine Finisia kia Sīsū ke fakamoʻui ʻa ʻene tamá. Naʻe tali ange ʻe Sīsū ʻoku taʻefeʻunga ke ʻoange ʻa e meʻakai ʻa e fānaú ki he fanga kiʻi kulií. Naʻá ne ʻuhingá ʻe ʻikai lava ke ne tokanga ki he faʻahinga ʻikai ko ha ʻIsilelí kae tuku ʻa e kau Siu ʻoku tuha mo iá. Neongo naʻá ne ʻiloʻi ʻa e ʻuhinga ʻo ʻene talanoa fakatātaá, naʻe kei kōlenga pē ʻa e fefiné: “Koe mooni, Eiki: ka oku kai e he faga [kiʻi] kuli ae momoʻi mea kai oku gagana mei he keinagaaga a ho nau eiki.” Ko ʻene tui mālohí mo ʻene loto-moʻoní naʻe ueʻi ai ʻa Sīsū ke ne pehē: “E fefine, oku lahi hoo tui: ke hoko kiate koe o hage ko ho loto.”—Mātiu 15:​22-28, PM.

Ko e hā ne mei hoko ki he faʻahinga tāutahá ni kapau naʻe ʻikai te nau kīvoi ʻi heʻenau ngaahi feingá? Ne nau mei maʻu ʻa e ngaahi tāpuakí kapau ne nau foʻi ʻi he taimi ne nau fehangahangai ai mo e ʻuluaki fakafaingataʻaʻiaʻangá pe talitekeʻí? ʻIkai! Ko e ngaahi faʻifaʻitakiʻangá ni ʻokú ne fakatātaaʻi lelei ʻa e poini ne akoʻi ʻe Sīsuú, ʻa ia ko e “kīvoi loto-toʻá” ʻoku totonu ia, pea aʻu ʻo fiemaʻu, ʻi he kumi kia Sihová.​—Luke 11:​5-​13, NW.

Fakatatau ki Hono Finangalo

ʻI he fakamatala naʻe lave ki ai ki muʻa fekauʻaki mo e faʻahinga naʻa nau maʻu ʻa e fakamoʻui fakaemaná, ko e fakamātoató ʻataʻatā pē ʻa e fiemaʻu ki he ngaahi fakamoʻuí? ʻIkai, ko ʻenau ngaahi kolé naʻe pau ke fehoanaki ia mo e finangalo ʻo e ʻOtuá. Naʻe ʻoange kia Sīsū ʻa e ngaahi mālohi fakaemana ke ne ʻoatu ai ʻa e fakamoʻoni tuʻu-ki-muʻa ko e ʻAlo ia ʻo e ʻOtuá, ko e Mīsaia ia ne talaʻofa maí. (Sione 6:​14; 9:​33; Ngāue 2:​22) ʻIkai ko ia pē, ko e ngaahi mana ne fakahoko ʻe Sīsuú ne tomuʻa fakaʻali mai ai ʻa e ngaahi tāpuaki maʻongoʻonga fakaemāmani ʻe tuku mai ʻe Sihova ki he faʻahinga ʻo e tangatá lolotonga ʻa e Pule faka-Mileniume ʻa Kalaisí.​—Fakahā 21:4; 22:2.

ʻOku ʻikai kei hoko ko e finangalo ia ʻo e ʻOtuá ki he faʻahinga ʻoku nau fai ʻa e lotu moʻoní ke nau maʻu ʻa e ngaahi mālohi fakaemaná, hangē ko e malava ko ia ke fakamoʻui mahakí mo e lea ʻi he ngaahi lea kehekehé. (1 Kolinito 13:​8, 13) Ko hono finangalo ki hotau ʻahó ʻoku kau ki ai ʻa hono talaki ʻa e ongoongo lelei ʻo e Puleʻangá ʻi he māmaní kotoa koeʻuhi ‘ke aʻusia ai ʻe he kakai kotoa pe ʻa e ʻilo kanokano ki he moʻoní.’ (1 Timote 2:4; Mātiu 24:14; 28:​19, 20) Ko e kau sevāniti ʻa e ʻOtuá ʻe lava ke nau ʻamanekina totonu ha fanongo lelei mai ki heʻenau ngaahi lotu faivelengá kapau ʻoku nau fai ha ngaahi feinga loto-moʻoni ʻo fehoanaki mo hono finangaló.

ʻE fifili nai ʻa e niʻihi, ‘Ko e hā ke tau kīvoi ai lolotonga ia ʻe iku pē ʻo fakahoko ʻa e taumuʻa ia ʻa e ʻOtuá?’ Neongo ʻoku moʻoni ʻe aʻusia ʻe Sihova ʻa ʻene taumuʻá ʻo tatau ai pē pe ko e hā ʻa e ngaahi feinga fakaetangatá, ʻokú ne hōhōʻia ke ʻai ha faʻahinga tāutaha ʻoku nau kau ʻi hono fakahoko hono finangaló. ʻE fakatatau nai ʻa Sihova ki ha tangata ʻokú ne langa ha fale. Ko e tokotaha langá ʻokú ne ʻilo ʻa e palani kakato ki he langá, ka ʻokú ne filifili pē ʻa e ngaahi naunau langá mei he meʻa ʻoku ala maʻu fakalotofonuá. ʻI he tuʻunga tatau, ʻoku maʻu ʻe Sihova ha ngāue ke fakahoko he ʻahó ni pea ʻokú ne fiefia ke ngāueʻaki ʻene kau sevānití, ʻa ē ʻoku nau foaki loto-lelei atu kinautolú.​—Sāme 110:3; 1 Kolinito 9:​16, 17.

Fakakaukau ki he meʻa naʻe hokosia ʻe he talavou ko Toshio. ʻI heʻene hū ki he akoʻanga māʻolungá, naʻá ne loto ke fai ʻa e fakamoʻoni lahi taha te ne malavá ʻi hono feituʻu ngāue makehe ko ení. Naʻe mateuteu maʻu pē ʻa ʻene Tohitapú pea naʻá ne fai ha feinga tōnunga ke hoko ko ha Kalisitiane alafaʻifaʻitakiʻanga. ʻI he ofi ke ngata ʻa hono ʻuluaki taʻu fakaakó, naʻe hoko mai ai ha faingamālie ke ne fai ai ha lea ki he kalasí. Naʻe lotu ʻa Toshio kia Sihova ki ha tokoni pea naʻá ne fiefia ke sio naʻe tokanga ʻaupito ʻa e kalasí kotoa ki heʻene malanga naʻe fakakaveinga “Ko ʻEku Taumuʻá ko Hono ʻAi ʻa e Tāimuʻá ko ha Ngāue Tuʻumaʻu.” Naʻá ne fakamatala naʻá ne loto ke hoko ko ha faifekau taimi-kakato ʻa e Kau Fakamoʻoni ʻa Sihová. Naʻe loto-lelei ʻa e taha ʻo e kau akó ke ako Tohitapu mo ia pea naʻá ne fakalakalaka ʻo aʻu ki he tuʻunga ʻo e papitaisó. Ko e ngaahi feinga fakamātoato ʻa Toshio ʻo fehoanaki mo ʻene ngaahi lotú naʻe fakapaleʻi lahi.

ʻOkú Ke Fakamātoató Fēfē?

ʻE lava ke ke fakahaaʻi ʻi ha ngaahi founga kehekehe ʻokú ke kumi fakamātoato kia Sihova mo ʻene ngaahi tāpuakí. ʻUluakí, ʻoku ʻi ai ʻa e ngaahi meʻa tefito ʻe lava ke ke fai, hangē ko e teuteu lelei ki he ngaahi fakataha faka-Kalisitiané. Fakafou ʻi he ngaahi fakamatala ʻosi teuteuʻi leleí, ngaahi malanga fakaueʻilotó, mo e ngaahi fakahāhā ola leleí, ʻokú ke fakaeʻa ai ʻa e lahi ʻo hoʻo kumi kia Sihová. ʻE toe lava foki ke ke fakahāhā ʻa hoʻo fakamātoató ʻaki hono fakaleleiʻi ʻa e tuʻunga ʻo hoʻo ngāue fakafaifekaú. Fēfē ke ke feinga ke anga-fakakaumeʻa ange ʻi hoʻo fakaofiofi atu ki he matapaá pea ngāueʻaki ʻa e ngaahi talateu ola lelei ʻa ia ʻoku feʻunga mo ho feituʻu ngāué? (Kolose 3:​23) ʻI heʻene tuku atu ʻaufuatō ʻa ia tonú, ʻe malava nai ai ha tangata Kalisitiane ke ne tali ʻa e ngaahi vāhenga-ngāue ʻi he fakatahaʻangá, hangē ko e ngāue ko ha sevāniti fakafaifekau pe ko ha mātuʻa. (1 Timote 3:​1, 2, 12, 13) ʻI hono fakafaingamālieʻi ʻa koe tonú, ʻe lava ke ke kau ai ʻi he fiefia ʻo e foakí. Te ke malava nai ai ke tohi kole ke kau ʻi ha ngāue langa ʻa e vaʻá pe ʻi ha ʻōfisi vaʻa ʻo e Kau Fakamoʻoni ʻa Sihová. Kapau ko ha talavou taʻehoa taau koe, te ke loto nai ke kau ki he Akoʻanga Ako Fakafaifekaú, ʻa ia ʻoku teuʻi ai ʻa e kau tangata fakalaumālié ke nau hoko ko e kau tauhi-sipi lelei. Kapau kuó ke mali, ko e ngāue fakamisinalé ko ha founga nai ia ke fakahaaʻi ai hoʻo holi fakamātoato ke tauhi lahi ange kia Sihová. Ko e hiki ki he feituʻu ʻoku lahi ange ai ʻa e fiemaʻu ki he kau malanga ʻo e Puleʻangá ko ha faingamālie nai ia maʻá u.​—1 Kolinito 16:9.

Ko e meʻa moʻoni ʻoku laú ko e laumālie ko ē ʻokú ke fakahokoʻaki ha vāhenga-ngāué. Ko e hā pē ha fatongia ʻokú ke fakahoko, fai fakamātoato ia, ʻo longomoʻui, fakataha mo ha “loto hangamālie.” (Ngāue 2:46; Loma 12:8) ʻOku totonu ke ke vakai ki he vāhenga-ngāue taki taha ko ha faingamālie ia ke fakahāhā ai ʻa hoʻo vēkeveke ke ʻoatu ʻa e fakahīkihiki kia Sihová. Lotu tuʻumaʻu ki he tokoni ʻa Sihová, pea fai hoʻo lelei tahá. Te ke toki utu leva ai ʻa e pale lahi.

Fakapaleʻi ʻa e Ngaahi Feinga Fakamātoató

Manatuʻi ʻa e tangata Kalisitiane ʻa ia naʻá ne lotu ke ikuʻi ʻa ʻene ngaahi manavaheé koeʻuhi kae lava ʻo ne malanga ki he kau fefonongaʻaki kehé? Naʻe tāpuakiʻi ʻe Sihova ʻa ʻene holi loto-moʻoní. Naʻe ngāue ʻa e tokouá ki hono fai ha fakaofiofi lelei, mo hono filifili ʻa e ngaahi kaveinga ko ia ke kamataʻaki ʻa e ngaahi fetalanoaʻakí. Naʻá ne malava ke ngāue ola lelei ʻaki ʻa e Tohitapú ke faifakamoʻoni ai ki ha tangata naʻe hohaʻa fekauʻaki mo ha ngaahi vā fakaetangata fakalotomafasia. Ko e ngaahi toe ʻaʻahi ʻi he lēlué naʻe iku ai ki ha ako Tohitapu ʻi ʻapi. Naʻe tāpuakiʻi moʻoni ia ʻe Sihova ʻi heʻene ngaahi feinga fakamātoató!

ʻE lava ke ke maʻu ha ngaahi ola tatau kapau te ke hokohoko atu ke kumi fakamātoato kia Sihova. Kapau te ke kītaki anga-fakatōkilalo pea ʻai ho lotó kotoa ki ha ngāue fakateokalati pē ʻokú ke kau ki ai, ʻe ngāueʻaki koe ʻe Sihova ʻi he fehoanaki mo ʻene ngaahi taumuʻá pea lilingi mai kiate koe ha tāpuaki lahi.

[Fakatātā ʻi he peesi 26]

Ko e hā ne mei hoko ki he fefiné ni kapau naʻe ʻikai te ne kīvoi?

[Fakatātā ʻi he peesi 27]

ʻOkú ke kīvoi ʻi he kōlenga kia Sihova ki heʻene tāpuakí?

[Fakatātā ʻi he peesi 28]

ʻE lava fēfē ke ke fakahaaʻi ʻokú ke kumi fakamātoato kia Sihova?