Ke Langa Hake ʻa e Fakatahaʻangá

“Naʻe mālōlō ʻa e [fakatahaʻangá] . . . naʻe langa hake ai pe.”​—NGĀUE 9:​31.

 1. Ko e hā ʻa e ngaahi fehuʻi ʻe ʻeke nai fekauʻaki mo e ‘Fakatahaʻanga ʻa e ʻOtuá’?

ʻI HE ʻaho ʻo e Penitekosi 33 T.S., naʻe tali ai ʻe Sihova ha kulupu ʻo e kau ākonga ʻa Kalaisí ko ha puleʻanga foʻou, ko e “Isileli oe Otua.” (Kaletia 6:​16, PM ) Ko e kau Kalisitiane pani ko eni ʻe he laumālié naʻa nau toe hoko ki he meʻa ko ia ʻoku ui ʻe he Tohi Tapú ko e “Fakataha[ʻanga] ʻa e ʻOtua.” (1 Kolinito 11:22) Ko ia ko e hā ʻoku kaunga ki aí? ʻE fokotuʻutuʻu fēfē ʻa e ‘Fakatahaʻanga ʻa e ʻOtuá’? ʻE anga-fēfē ʻene ngāue ʻi he māmaní, ʻi ha feituʻu pē ʻoku nofo ai ʻa hono kau mēmipá? Pea ʻoku anga-fēfē ʻene kaunga ki heʻetau moʻuí mo ʻetau fiefiá?

2, 3. Naʻe anga-fēfē hono fakahaaʻi ʻe Sīsū ko e fakatahaʻangá ʻe ʻi ai hono faʻunga?

² Hangē ko ia naʻe lave ki ai ʻi he kupu ki muʻá, naʻe tomuʻa tala ʻe Sīsū ʻe ʻi ai moʻoni ʻa e fakatahaʻanga ko eni ʻo e kau muimui paní, ʻi heʻene tala ko ia ki he ʻapositolo ko Pitá: “ʻI he fuga maka ni [Sīsū Kalaisi] te u langa ai hoku Siasi [pe fakatahaʻangá]; pea ʻe ʻikai malohi ki ai ʻa e ngāhi matapa ʻo Hetesi.” (Mātiu 16:18) ʻIkai ngata aí, lolotonga ʻa e kei ʻi he kau ʻapositoló ʻa Sīsuú, naʻá ne ʻoange ai ʻa e ngaahi fakamatala fekauʻaki mo e ngāue mo e fokotuʻutuʻu ʻi he fakatahaʻanga ko ia ne vave ke fokotuʻú.

³ Naʻe akoʻi ʻe Sīsū ʻi he lea mo e ngāue ʻe ʻi ai ʻa e niʻihi ʻi he fakatahaʻangá te nau takimuʻa. Te nau fai ia ʻaki ʻenau hoko ko e tali fekau pe sevāniti maʻá e niʻihi kehe ʻi heʻenau kulupú. Naʻe pehē ʻe Kalaisi: “ʻOku mou ʻilo pē, ko kinautolu ʻoku lau ko e pule ʻo e kau Senitaile ʻoku nau fakafieʻeiki ki he kakai; pea ko honau kau māʻolunga ʻoku nau fakamoʻulaloaʻi ʻa e kakai. Ka ʻe ʻikai pehē ʻiate kimoutolu, ka ko ia ʻoku ne holi ke hoko ko e lahi ʻiate kimoutolu, te ne nofo ko hoʻomou sevāniti: pea ko ia ʻoku ne holi ke hoko ko homou tuʻukimuʻa, te ne nofo ko e tamaioʻeiki ki homou kotoa.” (Maake 10:​42-44) ʻOku hā mahino ko e ‘Fakatahaʻanga ʻa e ʻOtuá’ ʻe ʻikai ko ha faʻahinga tāutaha ia ʻoku nofo movetevete mo mavahe, ʻo iku atu ki ha fakatahaʻanga ʻoku ʻikai fokotuʻutuʻu maau. ʻI hono kehé, ʻe ʻi ai ʻa e faʻunga, fakataha mo e faʻahinga tāutaha ʻi loto ʻi he fakatahaʻangá ʻoku nau fengāueʻaki.

4, 5. ʻOku tau ʻilo fēfē ʻe fiemaʻu ʻe he fakatahaʻangá ʻa e fakahinohino fakalaumālié?

⁴ Ko e Tokotaha ko ia ʻe hoko ko e ʻUlu ʻo e ‘Fakatahaʻanga ʻa e ʻOtuá’ naʻá ne fakahaaʻi ko ʻene kau ʻapositoló mo e niʻihi kehe ʻa ia kuo nau ako meiate iá te nau maʻu ʻa e ngaahi fatongia pau ki he toengá. Ke fai ʻa e hā? Ko ha vāhenga-ngāue tefito ia ko hono ʻoange ʻa e fakahinohino fakalaumālie ki he faʻahinga ko ia ʻi he fakatahaʻangá. Manatuʻi ko Sīsū kuo toetuʻú, lolotonga ʻa e ʻi ai ʻa e niʻihi ʻo e kau ʻapositolo kehé, naʻá ne pehē kia Pita: “Saimone, foha ʻo Sione, ʻoku ke ʻofa kiate au?” Naʻe tali ange ʻe Pita: “ʻIo, ʻEiki; ʻoku ke meaʻi ʻoku ou ʻofa moʻoni kiate koe.” Naʻe pehē ange ʻe Sīsū kiate ia: “Fafanga siʻeku fanga lami. . . . Tauhi ʻeku fanga sipi. . . . Ke ke fafanga siʻeku fanga sipi.” (Sione 21:​15-17) He vāhenga-ngāue mahuʻinga moʻoni!

⁵ ʻOku lava ke tau sio mei he ngaahi lea ʻa Sīsuú ko e faʻahinga kuo fakatahatahaʻi mai ki he fakatahaʻangá ʻoku fakatatau kinautolu ki he fanga sipi ʻi ha lotoʻā sipi. Ko e fanga sipí ni—ʻa e kau tangata, kau fefine mo e fānau Kalisitiané—ʻe fiemaʻu ke fafangaʻi fakalaumālie mo tauhi lelei kinautolu. ʻIkai ko ia pē, koeʻuhi kuo fekauʻi ʻe Sīsū ʻa e kotoa ʻo hono kau muimuí ke nau akoʻi ʻa e niʻihi kehé pea ngaohi ko e kau ākonga, ko ha faʻahinga foʻou pē ʻoku hoko ko ʻene fanga sipi ʻe fiemaʻu ia ke akoʻi ki he anga hono fakahoko ʻa e fekau fakaʻotua ko iá.​—Mātiu 28:​19, 20.

 6. Ko e hā ʻa e ngaahi fokotuʻutuʻu naʻe fai ʻi he ‘Fakatahaʻanga [toki fokotuʻu foʻou] ʻa e ʻOtuá’?

⁶ ʻI he taimi pē naʻe fokotuʻu ai ʻa e ‘Fakatahaʻanga ʻa e ʻOtuá,’ ko e faʻahinga naʻe faʻuʻaki iá naʻa nau fakatahataha maʻu pē ki ha fakahinohino mo e fefakalototoʻaʻaki: “Naʻa nau nofo fakaʻutumauku ki he faiako ʻa e kau Aposetolo, mo e fakakautaha, mo e pakipaki ʻo e ma, mo e ngaahi feingalotu.” (Ngāue 2:​42, 46, 47) Ko ha toe fakaikiiki mahuʻinga ʻe taha ʻi he lēkooti fakahisitōlia ko ení ko hono fakanofo ko ia ʻo ha kau tangata taau ʻe niʻihi ke nau tokoni ki hono tokangaʻi ʻo e ngaahi meʻa ʻaonga ʻe niʻihi. Naʻe ʻikai fili kinautolu koeʻuhí ko ha ngaahi taʻu fakaako pe ngaahi pōtoʻi fakatekinikale. Ko e kau tangata eni naʻa nau “mātuʻaki fakalaumālie mo poto.” Ko e taha ai ko Sitīveni, pea ʻoku tohoaki ʻe he fakamatalá ʻa e tokangá ki heʻene hoko “ko e tangata naʻe fonu ʻi he tui mo e Laumālie Māʻoniʻoni.” Ko ha ola ʻe taha ʻo e fokotuʻutuʻu fakaefakatahaʻangá naʻe hoko ai ʻo “tupu maʻu pē ʻa e folofola ʻa e ʻOtua; pea fakatokolahi ʻaupito ʻa e lau ʻo e kau ako ʻi Selusalema.”—Ngāue 6:​1-7.

Kau Tangata Naʻe Ngāueʻaki ʻe he ʻOtuá

7, 8. (a) Ko e kau ʻapositolo mo e kau mātuʻa ʻi Selusalemá naʻa nau ngāue ko e hā ʻi he haʻohaʻonga ʻo e muʻaki kau Kalisitiané? (e) Ko e hā naʻe iku ki ai ʻi hono ʻoatu ʻa e fakahinohino fakafou ʻi he ngaahi fakatahaʻangá?

⁷ ʻOku hā mahino, ko e kau ʻapositoló naʻa nau takimuʻa ʻi he muʻaki fokotuʻutuʻu fakaefakatahaʻangá, ka naʻe ʻikai ko kinautolu pē. ʻI he taimi ʻe taha, naʻe foki ai ʻa Paula mo hono kaungā fonongá ki ʻAniteoke ʻi Sīlia. ʻOku pehē ʻe he Ngāue 14:27: “ʻI heʻena lava ki ai naʻa na fakataha ʻa e siasi [pe fakatahaʻangá], ʻo na fakamatala ki he ngaahi fuʻu meʻa kuo fai ʻe he ʻOtua ʻi heʻene kau mo kinaua.” Lolotonga ʻena kei ʻi he fakatahaʻanga fakalotofonua ko iá, naʻe malanga hake ha fehuʻi pe naʻe fiemaʻu ke kamu ʻa e kau tui Senitailé. Ke fakaleleiʻi ʻa e meʻá ni, naʻe fekauʻi ai ʻa Paula mo Panepasa ‘ki Jelusalema ki he kau abosetoló moe kau mātuá,’ ʻa ia ʻoku hā mahino naʻa nau ngāue ko ha kulupu pule.—Ngāue 15:​1-3, PM.

⁸ Ko e tokotaha mātuʻa Kalisitiane ko Sēmisí, ʻa e tokoua faʻē-taha ʻo Sīsū kae ʻikai ko ha ʻapositoló, naʻe sea ʻi he taimi ʻo e “fakataha ae kau abosetolo moe mātua, ke nau fakakaukau ki he mea ni.” (Ngāue 15:​6, PM ) Hili hono fakakaukauʻi lelei fakataha mo e tokoni ʻa e laumālie māʻoniʻoní, naʻa nau aʻu ai ki ha fakamulituku naʻe fehoanakimālie mo e Tohi Tapú. Naʻa nau ʻoatu eni ʻi he faitohi ki he ngaahi fakatahaʻanga fakalotofonuá. (Ngāue 15:​22-​32) Ko e faʻahinga naʻa nau maʻu ʻa e fakamatala ko ení naʻa nau tali pea ngāueʻaki ia. Ko e hā hono olá? Naʻe langa hake ai mo fakalototoʻaʻi ʻa e fanga tokouá mo e fanga tuofāfiné. ʻOku fakamatala ʻa e Tohi Tapú: “Pea ko ia naʻe fakaaʻau ʻo kaukaua ʻa e ngaahi siasi ʻi he lotu, pea fakautuutu ʻenau tokolahi ʻi he ʻaho kotoa pe.”—Ngāue 16:5.

 9. ʻOku fakamatalaʻi mai ʻe he Tohi Tapú ʻa e ngaahi ngafa fē ki he kau tangata Kalisitiane tāú?

⁹ Ka ʻe ngāue fēfē ʻa e ngaahi fakatahaʻanga fakalotofonuá ʻi he ʻaho ki he ʻaho? Ko e fakatātaá, fakakaukau angé ki he ngaahi fakatahaʻanga ʻi he motu ko Kēlití. Neongo ko e tokolahi ʻo e kakai naʻe nofo aí naʻe kovi honau ongoongó, naʻe liliu ʻa e niʻihi ʻo nau hoko ko e kau Kalisitiane moʻoni. (Taitusi 1:​10-​12; 2:​2, 3) Naʻa nau nofo ʻi he ngaahi kolo kehekehe, pea naʻa nau mamaʻo kotoa mei he kulupu pule ʻi Selusalemá. Kae kehe, naʻe ʻikai ko ha palopalema lahi ia, koeʻuhi naʻe fakanofo ʻa e kau “faifekau [pe kau tangata matuʻotuʻa]” fakalaumālie ʻi he ngaahi fakatahaʻanga fakalotofonua taki taha ʻi Kēlití, ʻo hangē ko e ngaahi feituʻu kehé. Naʻe aʻusia ʻe he kau tangata peheé ʻa e ngaahi tuʻunga taau ʻoku fiemaʻú ʻa ia ʻoku tau ʻilo ʻoku lēkooti ʻi he Tohi Tapú. Naʻe fakanofo kinautolu ko e kau mātuʻa, pe kau ʻovasia, ʻa ia naʻe lava ke nau “enginaki ʻaki ʻa e tokateline haohaoa, pea . . . ikuna ʻa kinautolu ʻoku fakaʻikai.” (Taitusi 1:​5-9; 1 Timote 3:​1-7) Naʻe taau ʻa e kau tangata fakalaumālie kehe ke nau tokoni ki he ngaahi fakatahaʻangá ʻi he tuʻunga ko e kau sevāniti fakafaifekau, pe kau tīkoni.​—1 Timote 3:​8-​10, 12, 13.

10. Fakatatau ki he Mātiu 18:​15-17, ʻe fakaleleiʻi fēfē ʻa e ngaahi palopalema mafatukitukí?

¹⁰ Naʻe fakahaaʻi ʻe Sīsū ʻe ʻi ai ha faʻunga pehē. Manatuʻi ʻa e fakamatala ʻi he Mātiu 18:​15-17, ʻa ia naʻá ne pehē ai ʻe malanga hake nai ha faingataʻa ʻi he taimi ʻe niʻihi ʻi he vahaʻa ʻo ha ongo meʻa ʻi he kakai ʻa e ʻOtuá, ʻo faiangahala ʻa e taha ko ē ki hē ʻi ha faʻahinga founga. Ko e tokotaha kuo fai ki ai ʻa e halá naʻe pau ke ne fakalea ki he tokotaha ʻe tahá ʻo “fakamahino kiate ia” tokotaha pē, ʻo fakaekinaua pē. Kapau naʻe ʻikai fakaleleiʻi ʻa e ʻīsiú ʻi he sitepu ko iá, ʻe kole nai ha toe toko taha pe toko ua kehe ʻa ia naʻá na ʻilo ki he ngaahi foʻi moʻoní, ke na tokoni. Fēfē kapau naʻe ʻikai pē ke fakaleleiʻi ai ʻa e meʻá ia? Naʻe pehē ʻe Sīsū: “Kapau te ne taʻetokai kinautolu, tala ki he Fakataha[ʻangá]: pea kapau te ne taʻetoka[ʻi] mo e Fakataha[ʻangá] foki, pea ke ne tatau kiate koe mo ha Senitaile pe ko ha popilikane.” (Fakaʻītali ʻamautolu.) ʻI he taimi naʻe leaʻaki ai ʻe Sīsū ʻa e meʻa ko iá, naʻe kei faʻuʻaki pē ʻa e kau Siú ʻa e ‘Fakatahaʻanga ʻa e ʻOtuá,’ ko ia ko ʻene ngaahi leá naʻe muʻaki ngāueʻaki ia kia kinautolu.a Kae kehe, ʻi hono fokotuʻu pē ʻo e fakatahaʻanga Kalisitiané, ʻe ngāueʻaki leva ʻa e fakahinohino ʻa Sīsuú ki ai. Ko ha toe fakamoʻoni ia ko e kakai ʻa e ʻOtuá ʻe ʻi ai honau faʻunga fakaefakatahaʻanga ki hono langa hake mo tataki ʻa e tokotaha Kalisitiane tāutaha.

11. Naʻe kaunga fēfē ʻa e kau mātuʻá ki hono fakaleleiʻi ʻa e ngaahi palopalemá?

¹¹ ʻOku feʻungamālie leva ai, ko e kau tangata matuʻotuʻá, pe kau ʻovasiá, te nau fakafofongaʻi ʻa e fakatahaʻanga fakalotofonuá ʻi hono fakatokamālie pe fakaleleiʻi ʻa e ngaahi palopalemá pe ʻi he fai ha ngāue ki he ngaahi keisi ʻo e faiangahalá. ʻOku huʻufataha ia mo e ngaahi tuʻunga taau ʻoku fiemaʻu ki he kau mātuʻá ʻa ē ʻoku lave ki ai ʻi he Taitusi 1:9. Ko e moʻoni, ko e kau mātuʻa fakalotofonuá ko e kau tangata taʻehaohaoa, hangē pē ko Taitusí, ʻa ia naʻe fekauʻi ʻe Paula ki he ngaahi fakatahaʻangá ke ne “fai atu ʻa e fakatonutonu ʻo e ngaahi meʻa naʻe toe.” (Taitusi 1:​4, 5) ʻI he ʻahó ni, ko e faʻahinga ʻoku fakaongoongoleleiʻi ke fakanofo ko e kau mātuʻá kuo pau ke nau fakamoʻoniʻi ʻenau tuí mo ʻenau līʻoá ʻi ha vahaʻa taimi. ʻOku maʻu leva ai ʻe he niʻihi kehe ʻi he fakatahaʻangá ʻa e ʻuhinga lelei ke tuku ʻenau falalá ʻi he fakahinohino mo e tataki ʻoku ʻomai fakafou ʻi he fokotuʻutuʻu ko ení.

12. Ko e hā ʻa e fatongia ʻoku maʻu ʻe he kau mātuʻá fekauʻaki mo e fakatahaʻangá?

¹² Ki he kau mātuʻa ʻi he fakatahaʻanga ʻi ʻEfesoó, naʻe pehē ʻe Paula: “Mou lamasi kimoutolu, mo e fanga sipi kotoa, ʻa ia kuo fakanofo kimoutolu ʻe he Laumālie Maʻoniʻoni ʻi honau lolotonga ko honau kau leʻo, koeʻuhi ke mou tauhi ʻa e Siasi [pe fakatahaʻanga] ʻo e ʻOtua, ʻa ia naʻa ne fakatau ʻaki hono taʻataʻa oʻona.” (Ngāue 20:28) ʻOku pehē pē mo ʻene moʻoni he ʻahó ni ko e kau ʻovasia ʻo e fakatahaʻangá ʻoku fakanofo kinautolu ke nau ‘tauhi ʻa e fakatahaʻanga ʻo e ʻOtuá.’ Te nau fai ia ʻi he ʻofa, ʻikai ko e fakafieʻeiki ki he tākangá. (1 Pita 5:​2, 3) Ko e kau ʻovasiá ʻoku totonu ke nau feinga ke langa hake mo tokoniʻi ʻa e “fanga sipi kotoa.”

Pipiki ki he Fakatahaʻangá

13. ʻI he taimi ʻe niʻihi, ko e hā ʻe lava ke hoko ʻi ha fakatahaʻanga, pea ko e hā hono ʻuhingá?

¹³ Ko e kau mātuʻá mo e faʻahinga kehe kotoa ʻi he fakatahaʻangá ʻoku nau taʻehaohaoa, ko ia ʻi he taimi ki he taimi, ʻe hoko ʻa e ngaahi taʻefemahinoʻaki pe ngaahi palopalema, hangē pē ko ia naʻe hoko ʻi he ʻuluaki senitulí ʻi he taimi naʻe kei ʻi ai ai ʻa e niʻihi ʻo e kau ʻapositoló. (Filipai 4:​2, 3) ʻE leaʻaki nai ʻe ha ʻovasia pe ko ha taha kehe ha meʻa ʻoku hā ngali anga-kovi, taʻeʻofa, pe ʻikai loko moʻoni. Pe te tau fakakaukau nai ʻoku hoko ha meʻa taʻefakatohitapu, ka ʻoku hā ngali neongo ʻoku ʻilo ki ai ʻa e kau mātuʻa fakalotofonuá, ʻoku ʻikai te nau fakatonutonu ʻe kinautolu ʻa e meʻá. Ko e moʻoni, mahalo pē nai kuo ʻosi fakaleleiʻi pe lolotonga fakaleleiʻi ʻa e meʻá ia ʻo fakatatau ki he Tohi Tapú ʻo fakafehoanaki mo e ngaahi moʻoniʻi meʻa ʻoku ʻikai te tau ʻilo ki ai. Ka neongo kapau ko e tuʻunga ia ʻoku tau fakakaukau ki aí, fakakaukau angé ki hení: Naʻe hoko ʻi ha vahaʻa taimi ha hala mafatukituki ʻi he fakatahaʻanga Kolinitoó, ko ha fakatahaʻanga naʻe tokanga ki ai ʻa Sihova. ʻI he faai mai ʻa e taimí, naʻe pau ke ne ʻai ke fai ha ngāue ki he faihalá, ʻi he totonu mo e taʻemaliliu. (1 Kolinito 5:​1, 5, 9-​11) Te tau ʻeke nai kia kitautolu, ‘Kapau naʻá ku moʻui ʻi Kolinitō lolotonga iá, naʻe mei fēfē haʻaku tali ʻi he taimi ko iá?’

14, 15. Ko e hā naʻe tuku ai ʻe he niʻihi ʻenau muimui ʻia Sīsuú, pea ko e hā ʻa e lēsoni ʻoku ʻomai heni kia kitautolu?

¹⁴ Fakakaukau ki ha toe meʻa ʻe ala hoko fekauʻaki mo e fakatahaʻangá. Tau pehē ʻoku maʻu ʻe ha taha ha akonaki Fakatohitapu ʻoku faingataʻa ke ne mahinoʻi mo tali. Kuó ne fai nai ha fekumi ʻi he Tohi Tapú pea ʻi he ngaahi tohi ʻoku ala maʻu fakafou he fakatahaʻangá pea kumi tokoni mei he kaungā Kalisitiane matuʻotuʻá, naʻa mo e kau mātuʻá. Neongo ia, ʻokú ne kei faingataʻaʻia pē ʻi hono mahinoʻi pe tali ʻa e poiní. Ko e hā ʻe lava ke ne faí? Naʻe hoko ha meʻa pehē ʻi ha taʻu nai ʻe taha ki muʻa ke pekia ʻa Sīsuú. Naʻá ne pehē ko ia ʻa e “Mā ʻo e Moʻui” pea ke moʻui taʻengata ha taha kuo pau ke ne “kai ʻa e kakano ʻo e Fanautama ʻa Tangata, mo inu hono taʻataʻa.” Naʻe taukovi lahi eni ki he niʻihi ʻo ʻene kau ākongá. ʻI he ʻikai kumi ki ha fakamatala pe tatali pē ā ʻi he tui, ko e tokolahi ʻo e kau ākongá naʻe “ʻikai te nau kei ō fano mo [Sīsū].” (Sione 6:​35, 41-66) Kapau naʻa tau toe ʻi ai, ko e hā naʻa tau mei faí?

¹⁵ ʻI onopooni, kuo tuku ʻe he niʻihi ʻenau feohi mo e fakatahaʻanga fakalotofonuá, ʻo ongoʻi ʻe lava ke nau tauhi ki he ʻOtuá ʻia kinautolu pē. Te nau pehē nai ko hono ʻuhingá he naʻe fakalotomamahiʻi kinautolu, ʻo nau fakakaukau ʻoku ʻi ai ʻa e hala kuo ʻikai fakatonutonu, pe ʻoku ʻikai lava ke nau tali ha akonaki ʻe niʻihi. ʻOku ʻuhinga lelei fēfē ʻa e ʻalunga ʻoku nau fouá? Lolotonga ʻoku moʻoni ko e Kalisitiane taki taha ʻoku totonu ke ʻi ai hono vahaʻangatae fakafoʻituitui mo e ʻOtuá, heʻikai lava ke tau fakaʻikaiʻi ʻokú ne ngāueʻaki ha fakatahaʻanga ʻi māmani lahi, hangē ko ia naʻá ne fai ʻi he ʻaho ʻo e kau ʻapositoló. ʻIkai ko ia pē, naʻe ngāueʻaki mo tāpuakiʻi ʻe Sihova ʻa e ngaahi fakatahaʻanga fakalotofonua ʻi he ʻuluaki senitulí, ʻo fokotuʻutuʻu ʻa e kau mātuʻa mo e kau sevāniti fakafaifekau taau ke maʻu ʻaonga mei ai ʻa e ngaahi fakatahaʻangá. ʻOku toe moʻoni foki eni he ʻahó ni.

16. Kapau ʻoku fakataueleʻi ha taha ke ne mavahe mei he fakatahaʻangá, ʻoku totonu ke ne fakakaukau fekauʻaki mo e hā?

¹⁶ Kapau ʻoku ongoʻi ʻe ha Kalisitiane ʻe lava ke ne falala ʻataʻatā pē ia ki hono vahaʻangatae ʻoʻona mo e ʻOtuá, ʻokú ne tafoki ai ia mei ha fokotuʻutuʻu kuo fai ʻe he ʻOtuá—ʻa ia ko e fakatahaʻanga ʻi māmani lahí mo e ngaahi fakatahaʻanga fakalotofonua ʻo e kakai ʻa e ʻOtuá. ʻE taka toko taha nai ʻa e tokotaha ko iá ʻiate ia pē pe feohi pē mo ha niʻihi kehe tokosiʻi, ka ko fē leva ʻa e fokotuʻutuʻu ki he kau mātuʻa ʻi he fakatahaʻangá mo hono tokonaki mai ʻo e kau sevāniti fakafaifekaú? ʻOku hā mahino, ʻi he taimi naʻe tohi ai ʻa Paula ki he fakatahaʻanga ʻi Kolosé mo fakahinohino ke toe lau ʻa e tohí ʻi Leotisiá, naʻá ne lea ai ki he hoko ʻo ‘aka pea langa hake ʻia Kalaisi.’ Ko e faʻahinga ʻi he ngaahi fakatahaʻangá, ʻo ʻikai ko e faʻahinga tāutaha ʻoku fakamavaheʻi kinautolu mei aí, te nau maʻu ʻaonga mei he meʻá ni.—Kolose 2:​6, 7; 4:16.

Pou mo e Tuʻunga ʻo e Moʻoní

17. Ko e hā ʻoku fakahaaʻi ʻe he 1 Timote 3:​15 ʻo fekauʻaki mo e fakatahaʻangá?

¹⁷ ʻI heʻene ʻuluaki tohi ki he mātuʻa Kalisitiane ko Tīmoté, naʻe fakamatalaʻi fakalūkufua ai ʻe he ʻapositolo ko Paulá ʻa e ngaahi tuʻunga taau ʻoku fiemaʻu ki he kau mātuʻa mo e kau sevāniti fakafaifekau ʻi he ngaahi fakatahaʻanga fakalotofonuá. Hili pē iá, naʻe lave ai ʻa Paula ki he “Fakataha[ʻanga] tonu ʻa e ʻOtua Moʻui,” ʻo ne pehē ko eni ʻa e “pou mo e tuʻunga ʻo e Moʻoni.” (1 Timote 3:15) Ko e fakatahaʻanga fakalūkufua ʻo e kau Kalisitiane paní naʻe fakamoʻoniʻi pau ko ha pou pehē ia ʻi he ʻuluaki senitulí. Pea ʻoku ʻikai toe ala fakakikihiʻi ko e fokotuʻutuʻu tefito ki he kau Kalisitiane tāutahá ke maʻu ʻa e moʻoni ko iá, naʻe fekauʻaki ia mo e fakatahaʻanga fakalotofonuá. Ko e feituʻu ia naʻe lava ke nau fanongo ai ki hono akoʻi mo taukapoʻi ʻa e moʻoní, ko e feituʻu naʻe lava ke nau langa hake ai.

18. Ko e hā ʻoku mātuʻaki mahuʻinga ai ʻa e ngaahi fakataha ʻa e fakatahaʻangá?

¹⁸ ʻI he tuʻunga meimei tatau, ko e fakatahaʻanga Kalisitiane ʻi māmani lahí ko e fale ia ʻo e ʻOtuá, ko ha “pou mo e tuʻunga ʻo e Moʻoni.” Ko ʻetau maʻu maʻu pē mo kau ki he ngaahi fakataha ʻo ʻetau fakatahaʻanga fakalotofonuá ko ha founga tefito ia ke langa hake ai kitautolu, fakaivimālohiʻi hotau vahaʻangatae mo e ʻOtuá, pea mateuteu ai ke fai hono finangaló. ʻI heʻene tohi ki he fakatahaʻanga ʻi Kolinitoó, naʻe tokangataha ai ʻa Paula ki he meʻa naʻe leaʻaki ʻi he ngaahi fakataha ko iá. Naʻá ne tohi ʻo pehē naʻá ne fakaʻamu ko e meʻa naʻe leaʻaki ʻi heʻenau ngaahi fakatahá naʻe māʻalaʻala mo mahinongofua koeʻuhi ke lava ʻo “laga hake” ai ʻa e faʻahinga naʻe ʻi aí. (1 Kolinito 14:​12, 17-​19, PM ) Ko kitautolu he ʻaho ní ʻe lava ke langa hake pehē kapau ʻoku tau ʻiloʻi ko Sihova ia ko e ʻOtuá kuó ne hanga ʻo fakamafaiʻi ʻa e fokotuʻutuʻu ki he ngaahi fakatahaʻanga fakalotofonuá pea ʻokú ne poupouʻi ia.

19. Ko e hā ʻokú ke ongoʻi houngaʻia ai ki ho fakatahaʻangá?

¹⁹ ʻIo, kapau ʻoku tau holi ke langa hake ʻi he tuʻunga ko e kau Kalisitiane, ko e feituʻu ke tau ʻi aí ko e fakatahaʻangá. Kuo fuoloa hono fakamoʻoniʻi ko ha ʻā malu ia mei he ngaahi akonaki loí, pea kuo ngāueʻaki ia ʻe he ʻOtuá ke ʻai ʻa e ongoongo lelei ʻo hono Puleʻanga Faka-Mīsaiá ke talaki takai ʻi he foʻi kolopé. ʻOku ʻikai ha veiveiua, kuo fakahoko ʻe he ʻOtuá ʻa e meʻa lahi fakafou ʻi he fakatahaʻanga Kalisitiané.​—Efeso 3:​9, 10.

[Fakamatala ʻi lalo]

ʻOku Lava Ke Ke Manatuʻi?

• Ko e hā ʻoku totonu ai ke tau ʻamanekina ʻe ngāueʻaki ʻe he ʻOtuá ha ngaahi fakatahaʻanga ʻi he māmaní?

• Ko e hā ʻoku fai ʻe he kau mātuʻá ki he fakatahaʻangá, neongo ʻenau taʻehaohaoá?

• ʻOku anga-fēfē hono langa hake koe ʻe he fakatahaʻanga fakalotofonuá?

[Fakatātā ʻi he peesi 26]

Naʻe ngāue ʻa e kau ʻapositoló mo e kau tangata matuʻotuʻa ʻi Selusalemá ko ha kulupu pule

[Fakatātā ʻi he peesi 28]

ʻOku maʻu ʻe he kau mātuʻá mo e kau sevāniti fakafaifekaú ʻa e fakahinohino ʻo lava ai ke fakahoko honau ngaahi fatongia ki he fakatahaʻangá