Naʻa Nau Fai ʻa e Finangalo ʻo Sihová

Kuo Fakahīkihikiʻi ʻa Sīsū ko e Mīsaia mo e Tuʻi!

NAʻE fakaʻohovale ki he kau Siutea tokolahi, ʻa e hū atu ʻa e fuʻu kakai longoaʻa ko ia ki Selusalema ʻi Nīsani 9, 33 T.S. Neongo naʻe ʻikai ke ngali kehe ia ke sio ki he ʻaukolo ʻa e kakaí ki he koló ki muʻa ʻi he Pāsová, ko e kau ʻaʻahi ia ko ʻení naʻe kehe ia. Ko e tokotaha tefito ʻiate kinautolú ko ha tangata naʻe heka ʻi ha ʻuhiki ʻo ha ʻasi. Ko e tangatá ko Sīsū Kalaisi, pea ko e kakaí naʻa nau fola ʻa e ngaahi kofu mo e ngaahi vaʻa paame ʻi muʻa ʻiate ia lolotonga ʻenau kalanga: “Hosana ki he Hako ʻo Tevita! Hoto ʻofa kiate ia ʻoku hoko mai ʻi he huafa ʻo e ʻEiki! Hosana ki Langi Taupotu!” ʻI he sio ki he fuʻu kakaí, naʻe ueʻi ai ha tokolahi ne nau ʻosi ʻi Selusalema pē, ke kau atu ki he laká.—Mātiu 21:​7-9; Sione 12:​12, 13.

Neongo naʻe fakahīkihikiʻi ia he taimi ko ʻení, naʻe ʻilo ʻe Sīsū naʻe fakatatali mai kiate ia ʻa e ngaahi faingataʻa. ʻIkai koā, ʻi he ʻaho pē ʻe nima, ʻe fakapoongi ai ia ʻi he kolo tatau pē ko ʻení! ʻIo, naʻe ʻilo ʻe Sīsū ia ko Selusalemá ko e kolo naʻe fakafili, pea naʻá ne fokotuʻutuʻu ʻene hū tekeutua ki he koló mo e fakakaukau pē ko iá.

Ko ha Kikite Motuʻa ʻAupito Kuo Fakahoko

ʻI he 518 K.M., naʻe tomuʻa tala ai ʻe Sākalaia ʻa e hū fakaemaʻalali mai ʻa Sīsū ki Selusalemá. Naʻá ne tohi: “Hiki mavava, taʻahine Selusalema: Ko ena ho tuʻi ʻoku meʻa mai kiate koe; ko e faitotonu ia mo fai fakamoʻui foki: Ko e ʻeiki faʻa kataki, pea ʻoku ne heka ki ha asi, ʻio, ki ha kiʻi manu ko e tama ʻa ha asi fefine. . . . pea te ne tala melino ki he ngaahi puleanga, pea ko ʻene pule ʻe fai mei tahi ki tahi, pea mei he Vaitafe ki he ngataʻanga ʻo mamani.”​—Sakalaia 9:​9, 10.

Ko ia ko e hū mai ʻa Sīsū ki Selusalema ʻi Nīsani 9, naʻe fakahoko ai ʻa e kikite ʻi he Tohitapú. Naʻe ʻikai ko ha meʻa naʻe hoko fakafokifā pē ka naʻe palani fakaleleiʻi ia. Ki muʻa atú, lolotonga ʻene kei ʻi tuʻa pē ʻi Selusalemá, naʻe ʻosi fakahinohino ʻe Sīsū ia ʻa e toko ua ʻo ʻene kau ākongá: “Mo ō ki he vilisi ko ena ʻoku hanga mai, pea te mo ʻilo leva ki ha ʻasi ʻoku noʻotaki, pea ai mo hono ʻuhiki: vete, ʻo taki mai. Pea ka ai ha lea ʻe fai atu ʻe ha taha, pea mo pehē, ʻOku fiemaʻu kinaua ʻe he ʻEiki; pea te ne tuku mai leva kinaua.” (Mātiu 21:​1-3) Ka ko e hā naʻe fiemaʻu ai ʻe Sīsū ke heka ʻi ha ʻasi ki Selusalemá, pea ko e hā naʻe mahuʻinga ai ʻa e tōʻonga ʻa e fuʻu kakaí?

Ko ha Pōpoaki Fekauʻaki mo e Tuʻunga-Tuʻí

ʻOku faʻa mālohi ange ʻa e sio ki ha meʻa ʻi he lea ʻo fakamatalaʻí. Ko ia ʻi he taimi ʻe niʻihi naʻe ʻai ai ʻe Sihova ʻene kau palōfitá ke nau fakatātaaʻi ʻenau pōpoakí ke fakamālohiʻaki ʻenau pōpoaki fakaekikité. (1 Tuʻi 11:​29-32; Selemaia 27:​1-6; Isikeli 4:​1-17) Ko e founga lelei ko ʻeni ʻo e fetuʻutaki sió ʻe malave maʻu ia naʻa mo e ʻi he ʻatamai ʻo e tokotaha mamata loto-fefeka tahá. ʻI ha founga meimei tatau, naʻe fakatātaaʻi ʻe Sīsū ha pōpoaki mālohi ʻaki ʻene heka ʻi ha ʻasi ki he kolo ko Selusalemá. ʻO fēfē?

ʻI he taimi ʻo e Tohitapú naʻe ngāueʻaki ai ʻa e ʻasí ki he ngaahi taumuʻa fakaʻeiʻeiki. Ko e fakatātaá, naʻe heka ʻa Solomone ʻi he “miuli fefine” ʻa ʻene tamaí ki hono pani ia ke tuʻí, ʻa ia ko ha hako fekolosiʻaki ia ʻo ha ʻasi tangata.a (1 Tuʻi 1:​33-40) Ko ia ai ko e heka ʻa Sīsū ʻi ha ʻasi ki Selusalemá naʻe ʻuhinga iá ko ʻene fakafeʻiloaki ia ko ha tuʻi. Ko e ngaahi tōʻonga ʻa e kakaí naʻá ne pouaki ʻa e pōpoaki ko ʻení. Ko e matangá, naʻe ʻikai toe veiveiua ko e lahi tahá pē ko e kau Kāleli, naʻa nau fola honau ngaahi kofú ʻi muʻa ʻia Sīsū​—ko ha fakaʻilonga ia ʻo hono toe fakamanatuʻi ʻa hono fanongonongo fakapuleʻanga ko ia ʻa e tuʻi ʻa Sehú. (2 Tuʻi 9:13) Ko ʻenau lave ko ia kia Sīsū ko e “Hako ʻo Tevita,” naʻe fakamamafaʻi ai ʻa ʻene totonu fakalao ke pulé. (Luke 1:​31-33) Pea ko ʻenau ngāueʻaki ko ia ʻa e ngaahi vaʻa paamé naʻe fakahā moʻoni ai ʻa ʻenau anga-nofo ki hono mafai fakatuʻí.​—Fakafehoanaki mo Fakahā 7:​9, 10.

Ko ia ai ko e fononga naʻe ōmai ki Selusalema ʻi Nīsani 9, naʻá ne fakahoko māʻalaʻala atu ko Sīsuú ko e Mīsaia mo e Tuʻi ia ʻa e ʻOtuá kuo fakanofó. ʻOku moʻoni, naʻe ʻikai ke fiefia kotoa ʻi he sio ki he aʻu mai ko ia ʻa Sīsū ʻi he foungá ni. Naʻe tautefito ki he kau Fālesí ʻa ʻenau fakakaukau naʻe mātuʻaki taʻefeʻunga moʻoni mo Sīsū ke taumalingi ki ai ha fakalāngilangi fakatuʻi pehē. “Tangataʻeiki,” ko ʻenau fekaú ange ia, ʻoku ʻikai ha veiveiua naʻa nau leoʻi ʻita, “lolomi hoʻo kau ako.” Naʻe tali atu ʻe Sīsū: “Tala atu, kapau te nau fakalongo ʻe kinautolu, ʻe kalakalanga ʻe he ngaahi maka.” (Luke 19:​39, 40) ʻIo, ko e Puleʻanga ʻo e ʻOtuá ʻa e kaveinga ʻo e malanga ʻa Sīsuú. Naʻá ne talaki lototoʻa ʻa e pōpoaki ko ʻení neongo ai pē pe ʻe tali ia ʻe he kakaí pe ʻikai.

Lēsoni Kiate Kitautolu

Naʻe fiemaʻu kia Sīsū ha loto-toʻa lahi ke hū ai ki Selusalema ʻi he founga naʻe tomuʻa tala ʻe he palōfita ko Sākalaiá. Naʻá ne ʻilo ʻi heʻene fai peheé ʻe langaʻi ai ʻa e ʻita ʻa hono ngaahi filí. Ki muʻa peá ne hāʻele hake ki hēvaní, naʻe fekau atu ʻe Sīsū ʻa ʻene kau muimuí ke malangaʻi ʻa e ongoongo lelei ʻo e Puleʻanga ʻo e ʻOtuá pea mo “ngaohi ʻa e ngāhi kakai kotoa pe ko [ʻene] kau ako.” (Mātiu 24:14; 28:​19, 20) Ke fakahoko ʻa e ngāué ni naʻe toe fiemaʻu foki ki ai ʻa e lototoʻá. ʻOku ʻikai ke fiefia ʻa e faʻahinga kotoa he fanongo ki he pōpoakí. Ko e niʻihi ʻoku ʻikai te nau mahuʻingaʻia ai, ko e niʻihi ʻoku nau fakafepakiʻi. Ko e ngaahi puleʻanga ʻe niʻihi kuo nau fokotuʻu ha fakangatangata ki he ngāue fakamalangá pe mātuʻaki tapui pē ia.

Ka neongo ia, ʻoku ʻilo ʻe he Kau Fakamoʻoni ʻa Sihová ia, ko e ongoongo lelei ko ia ʻo e Puleʻanga ʻo e ʻOtuá kuo fokotuʻú kuo pau ke malangaʻi ia, tatau ai pē pe ʻe fanongo ʻa e kakaí ia pē sītuʻa mei ai. (Isikeli 2:7) ʻI heʻenau hokohoko atu hono fakahoko ʻa e ngāue fakaefakahaofi moʻui ko ʻení, ʻoku fakapapauʻi ai kiate kinautolu ʻa e talaʻofa ko ia ʻa Sīsū: “Ko eni, ʻoku ou ʻiate kimoutolu ʻe au ʻi he ngaahi ʻaho kotoa pe, ʻo aʻu ki he ngataʻanga ʻo mamani.”​—Mātiu 28:20.

[Fakamatala ʻi lalo]