Sīsū–Ko ʻene Moʻuí mo ʻene Ngāue Fakafaifekau

Ko e Hū Fakafiefia ʻa Kalaisi ki Selusalema

ʻI HE pongipongi hono hokó ʻa ia ko e Sāpate ʻo Nīsani 9, naʻe mavahe atu ai ʻa Sīsū mei Pētani mo ʻene kau ākongá ʻo huʻu atu ki he Moʻunga ʻOlivé ke fou ai ki Selusalema. ʻI ha taimi nounou pē, naʻa nau fakaofiofi atu ki Petefesi, ʻa ia ʻoku tuʻu ʻi he Moʻunga ʻOlivé. Naʻe fakahinohino leva ʻe Sīsū ʻa e toko ua ʻo ʻene kau ākongá:

“Mo ō ki he vilisi ko ena ʻoku hanga mai, pea te mo ʻilo leva ki ha ʻasi ʻoku noʻotaki, pea ai mo hono ʻuhiki: vete, ʻo taki mai. Pea ka ai ha lea ʻe fai atu ʻe ha taha, pea mo pehē, ʻOku fiemaʻu kinaua ʻe he ʻEiki; pea te ne tuku mai leva kinaua.”

Neongo ʻi he kamataʻangá naʻe ʻikai ke ʻilo ʻe he kau ākongá ko e ngaahi fakahinohino ko ʻení ʻoku fekauʻaki mo hono fakahoko ʻo ha kikite faka-Tohitapu, ka ki mui mai naʻa nau ʻiloʻi ia. Naʻe kikiteʻi ʻe he palōfita ko Sākalaiá ko e Tuʻi kuo talaʻofa ʻe he ʻOtuá ʻe heka atu ki Selusalema ʻi ha ʻasi, “ki ha kiʻi manu ko e tama ʻa ha asi fefine.” Naʻe meimei tatau ia mo e heka ʻa e Tuʻi ko Solomoné ki hono paní ʻi ha ʻuhiki ʻo ha ʻasi.

ʻI he hū atu ʻa e ongo ākongá ki Petefesi ʻo ʻave ʻa e ʻasi mo ʻene faʻeé, naʻe pehē ʻe he niʻihi naʻe tuʻu ʻo ofi mai ki ai: “Ko e hā ʻoku mo fai na?” Ka ʻi hono fakahā ko e ʻave ʻa e ongo monumanú ki he ʻEikí, naʻe tuku ai pē ʻe he kau tangatá ʻa e ongo ākongá ke na ʻave ia kia Sīsū. Naʻe ʻai leva ʻe he kau ākongá ʻa honau ngaahi kofu tuʻá ki he faʻē ʻa e ʻasí pea pehē ki heʻene tamá, ka naʻe heka ʻa Sīsū ia ʻi he ʻuhikí.

ʻI he heka atu ʻa Sīsū ʻo huʻu ki Selusalemá, naʻe toe tokolahi ange ʻa e fuʻu kakaí. Ko e tokolahi taha ʻo e kakaí naʻa nau fofola ʻa honau ngaahi kofu tuʻá ʻi he halá, lolotonga ia naʻe tutuʻu hifo ʻe he niʻihi ia ʻa e ngaahi vaʻa mei he ngaahi ʻakau ʻo fofola atu. Naʻa nau kalanga: “Oku monuia ae Tuʻi oku haele mai ʻi he huafa o Jihova: ke fiemalie [melino] i he lagi, bea fakamalo fugani lahi i oluga.”

Ko ha kau Fālesi ʻe niʻihi ʻi he fuʻu kakaí naʻa nau loto-mamahi ʻi he ngaahi fanongonongo ko ʻení pea nau lāunga kia Sīsū: “Tangataʻeiki, lolomi hoʻo kau ako.” Ka naʻe tali ʻe Sīsū: “Tala atu, kapau te nau fakalongo ʻe kinautolu, ʻe kalakalanga ʻe he ngaahi maka.”

ʻI he fakaofi atu ʻa Sīsū ki Selusalemá, naʻá ne sio atu ki he koló pea kamata ke tangi koeʻuhi ko ia, ʻo ne pehē: “ʻE, taumaiā ne ke lavea​—keheā ho taimi ko eni​—ʻio, ʻo lavea ʻe koe foki ʻa e ngāhi meʻa ʻoku tuʻu ai hoʻo lelei! ka kuo fufū ʻeni meiate koe.” Naʻe pau ke inumia ʻe Selusalema ʻa e tautea koeʻuhi ko ʻene talangataʻa loto pē ki ai, ʻo hangē ko ia naʻe kikiteʻi ʻe Sīsū:

“ʻE ʻākoloʻi koe ʻe ho ngaahi fili [ko e kau Loma ʻi hono taki ʻe Seniale Taitusi], pea te nau kapuʻi koe, mo punipuni mei he potu kotoa pe, pea te nau laiki koe mo hoʻo fanau foki; pea ʻe ʻikai te nau fakatoe hao maka ʻo taʻe holoki.” Ko e fakaʻauha ko ʻeni ʻo Selusalemá naʻe kikiteʻi ʻe Sīsuú naʻe hoko moʻoni ia ʻi he ʻosi ha taʻu ʻe 37 ki mui mai, ʻa ia ko e 70 T.S.

ʻI he ngaahi uike siʻi ki muʻa atu ai, ko e tokolahi ʻi he fuʻu kakaí naʻa nau sio ʻi hono fokotuʻu ʻe Sīsū ʻa Lasalosi mei he maté. Naʻe hokohoko atu hono tala ki he niʻihi kehé ʻe he faʻahinga ko ʻení ʻo kau ki he mana ko iá. Ko ia ʻi he hū ʻa Sīsū ki Selusalemá, naʻe ngatū ʻa e koló hono kotoa. “Ko hai ʻeni?” ko e fie ʻilo ia ʻa e kakaí. Pea naʻe hoko atu pē hono tala ʻe he fuʻu kakaí: “Ko Sisu ʻeni ko e palofita mei Nasaleti ʻi Kaleli”! ʻI he vakai ki he meʻa naʻe hokó, naʻe fepehēaki ʻa e kau Fālesí ʻoku ʻikai te nau lava ha meʻa, he ʻo hangē pē ko ʻenau leá: “Kuo hiki fuʻu ʻa māmani, ʻo muimui kiate ia.”

Naʻe ʻalu atu ʻa Sīsū ki he temipalé ke faiako he ko e meʻa naʻá ne angaʻaki ʻi heʻene ngaahi ʻaʻahi ki Selusalemá. Naʻe haʻu ai kiate ia ʻa e kui mo e heke pea naʻá ne fakamoʻui kinautolu! ʻI he sio ʻa e houʻeiki taulaʻeikí mo e kau sikalaipé ki he ngaahi meʻa fakaofo naʻe fai ʻe Sīsuú pea mo ʻenau fanongo ki he tamaiki tangata ʻi he temipalé naʻa nau kalanga, “Hosana ki he Hako ʻo Tevita” naʻa nau ʻita ai. Naʻa nau lea fakafepaki kiate ia: “ʻOku ke fanongo ki he meʻa ʻoku lau ʻekinautolu na?”

Naʻe tali ʻe Sīsū: “ʻIo: pea kuo teʻeki koā ke mou lau, ʻo pehe, Ko e ngutu ʻo e tamaiki mo e valevale kuo ke tuʻutuʻuni mei ai hao fakamalo”?

Naʻe hoko atu ʻe Sīsū ʻa ʻene akonakí, peá ne vakavakai holo ʻi he ngaahi meʻa kotoa ʻi he temipalé. Naʻe vavé ni ʻa e poʻuli. Ko ia naʻá ne ʻalu fakataha mo e toko 12, ʻo toe foki ʻi he kilomita ʻe tolu nai ki Pētani. Naʻá ne nofo ai ʻi he pō Sāpate, ngalingali ʻi he ʻapi ʻo hono kaungāmeʻa ko Lasalosí. Mātiu 21:​1-11, 14-17; Maʻake 11:​1-11; Luke 19:​29-44; Sione 12:​12-19; Sākalaia 9:9.

◆ Naʻe fai ʻanefē mo anga-fēfē ʻa e hū atu ʻa Sīsū ki Selusalemá ʻo hangē ha Tuʻí?

◆ Ko e hā naʻe mahuʻinga ai ʻa e fakamālō ʻa e fuʻu kakaí kia Sīsū?

◆ Naʻe anga-fēfē ʻa e ongoʻi ʻa Sīsū ʻi heʻene vakai atu ki Selusalemá, pea ko e hā ʻa e kikite naʻá ne leaʻakí?

◆ Ko e hā naʻe hoko ʻi he ʻalu ʻa Sīsū ki he temipalé?