Sīsū–Ko ʻEne Moʻuí mo ʻEne Ngāue Fakafaifekau

Ko e Kamata ʻo ha ʻAho Mātuʻaki Mahuʻinga

ʻI HE mavahe ʻa Sīsū mei Selusalema ʻi he efiafi Mōnité, naʻá ne foki ki Pētani ʻi he tahakehake fakahihifo ʻo e Moʻunga ʻOlivé. Kuo kakato ʻa e ʻaho ʻe ua ʻo ʻene ngāue fakamalanga fakaʻosi ʻi Selusalemá. ʻOku ʻikai ha veiveiua naʻe toe nofo pē ʻa Sīsū mo hono kaungāmeʻa ko Lasalosí ʻi he pō ko iá. Talu ʻene aʻu mai mei Sielikō ʻi he Falaité, ko hono pō fā ʻaki ia ʻi Pētani.

ʻI he kei pongipongia ʻi he pongipongi Tūsité, Nīsani 11, naʻá ne hoko atu ʻa e fononga mo ʻene kau ākongá. Naʻe fakamoʻoniʻi ai heni ko e ʻaho mātuʻaki mahuʻinga ia ʻo e ngāue fakamalanga ʻa Sīsuú, ko e ʻaho femoʻuekina taha ia. Ko e ʻaho fakaʻosi ia ʻo ʻene hā ʻi he temipalé. Pea ko e ʻaho fakaʻosi ia ʻo ʻene ngāue fakamalanga fakahāhaá ki muʻa ʻi hono fakamaauʻí mo hono tāmateʻí.

Naʻa nau fou ʻi he hala tatau pē ʻo fou atu ʻi he Moʻunga ʻOlivé ʻo huʻu ki Selusalema. ʻI he hala ko eni mei Pētaní, naʻe fakatokangaʻi ai ʻe Pita ʻa e fuʻu ʻakau naʻe talatukiʻi ʻe Sīsū ʻi he pongipongi ki muʻa atú. Naʻá ne pehē: “Lapai, vakai ange, ko e fuʻu fiki naʻa ke tukitalaʻi kuo mate.”

Ka ko e hā naʻe tāmateʻi ai ʻe Sīsū ʻa e fuʻu ʻakaú? Naʻá ne fakahaaʻi ʻa e ʻuhingá ʻi heʻene pehē: “Ko au e, ʻoku ou tala atu, Kapau te mou tui, ʻo ʻoua ʻe talaʻa, ʻe ʻikai ngata ʻi he meʻa kuo fai ki he fiki ʻa e meʻa te mou lava; ka ʻo kapau te mou lea ki he moʻunga ni [ko e Moʻunga ʻOlive ʻa ia naʻa nau tuʻu ai], Fei mo mahiki koe, ʻo patū ki tahi; pea ʻe hoko. Pea ko e meʻa kotoa pe te mou kole ʻi he hū, ʻo mou tui pe, te mou maʻu.”

Ko ia ʻi hono ʻai ke mate ʻa e fuʻu ʻakaú, naʻe tokonaki ai ʻe Sīsū ʻa e lēsoni ki heʻene kau ākongá ki hono fiemaʻu kiate kinautolu ke maʻu ʻa e tui ki he ʻOtuá. Hangē ko ia naʻá ne pehē: “Ko e ngaahi meʻa kotoa pē ʻoku mou hufia mo kolea, tui pe naʻa mou maʻu ia, pea ʻe hoko kiate kimoutolu.” Ko ha lēsoni mahuʻinga ē kiate kinautolu ke nau ako, fakatefito koeʻuhi ko e ngaahi ʻahiʻahi fakalilifu naʻe vave ke hoko maí! Ka, naʻe ʻi ai ʻa e felāveʻi ʻe taha ʻa e mate ʻa e fuʻu fikí mo e anga ʻo e tuí.

Ko e puleʻanga ʻIsilelí, ʻo hangē ko e fuʻu fiki ko ʻení, naʻe hā fakahalahala. Neongo ko e puleʻangá ni naʻa nau felāveʻi ʻi he fuakava mo e ʻOtuá pea naʻe hā ki tuʻa nai naʻa nau tauhi ʻa ʻene ngaahi fekaú, ka kuo fakamoʻoniʻi naʻe ʻikai ha tui, mo hala ha ngaahi fua lelei. Koeʻuhi ko e ʻikai ha tuí, naʻa nau kamata ke talitekeʻi ʻa e ʻAlo tonu ʻo e ʻOtuá! Ko ia, ʻi he ʻai ʻe Sīsū ke mate ʻa e fuʻu fiki taʻe fuá, naʻe maeʻeeʻa lelei ai ʻa e fakahāhā ʻe Sīsū ʻa e ikuʻanga ki he puleʻanga taʻe fua mo taʻe tui ko ʻení.

Taimi siʻi pē mei ai, naʻe hū atu ʻa Sīsū mo ʻene kau ākongá ki Selusalema, pea hangē ko e meʻa naʻa nau angaʻakí, naʻa nau ʻalu ki he temipalé, ʻa ia naʻe kamata ai ʻe Sīsū ʻene faiakó. Ko e houʻeiki taulaʻeikí mo e kau tangata mātuʻa ʻi he kakaí, ʻi heʻenau kei manatuʻi pē ʻa e meʻa naʻe fai ʻe Sīsū ʻi he ʻaho ki muʻa atú ki he kau fetongi paʻangá, naʻa nau poleʻi ai ia: “Ko e ha ho tuʻunga [mafai, NW] ʻoku ke fai ai ʻa e ngāhi meʻa ko eni? pea ko hai naʻa ne tuku kiate koe ʻa e tuʻunga [mafai, NW] ko ia?”

ʻI heʻene talí naʻe pehē ʻe Sīsū: “Kau fai atu mo au haʻaku fehuʻi ʻe taha, pea kapau te mou tali mai, pea te u toki fakahā atu pe ko e ha hoku tuʻunga ʻoku ou fai ai ʻa e ngāhi meʻa ko eni. Ko e fai papitaiso ʻa Sione naʻe mei fē ia? mei he langi, pe mei he tangata?”

Naʻe kamata ke feʻekenaki ʻa e kau taulaʻeikímoekautangatamātuʻáʻiatekinau- tolu pe ʻe anga-fēfē haʻanau tali. “Kapau te tau tali, mei langi; te ne pehē mai, Pea ko  e   ha   ai  naʻe ʻikai te mou tuitala kiate ia? Pea kapau te tau pehe, Mei he tangata; kae telia ʻa e kakai; he ʻoku nau lau kotoa pe ko e palofita ʻa Sione.”

Naʻe ʻikai ke ʻilo ʻe he kau takí pe ko e hā haʻanau tali. Ko ia naʻa nau tali kia Sīsū: “ʻOku ʻikai te mau ʻilo.”

Naʻe tali ʻe Sīsū ʻo pehē: “Pea ʻe ʻikai ā te u talaatu ʻe au, pe ko e ha hoku tuʻunga ʻoku ou fai ai ʻa e ngāhi meʻa ko eni.” Mātiu 21:​19-27; Maʻake 11:​19-33; Luke 20:​1-8.

◆ Ko e hā ʻa e meʻa naʻe mahuʻinga ʻo kau ki he Tūsite ʻo Nīsani 11?

◆ Ko e hā ʻa e ngaahi lēsoni naʻe ʻomai ʻe Sīsū ʻi heʻene ʻai ke mate ʻa e fuʻu fikí?

◆ Naʻe anga-fēfē ʻa e tali ʻa Sīsū kiate kinautolu naʻa nau ʻeke ki he mafai naʻá ne fai ai ʻa e ngaahi meʻa?