ʻOku Tukulotoa ʻe Sihova ʻa Hoʻo Ngāue ʻAufuatoó

“ʻIlonga ha meʻa te mou fai, ngaue fie ngaue [“ʻaufuatō,” NW] ki ai, he ko e ngaue ki he ʻEiki [“Sihova,” NW] ʻo ʻikai ki he kakai.”​—KOLOSE 3:23.

 1, 2. (a) Ko e hā ʻa e monū lahi taha ʻoku ala lava ke tau maʻú? (e) Ko e hā nai te tau taʻemalava ai ʻi he taimi ʻe niʻihi ke fai ʻa e meʻa kotoa ʻoku tau saiʻia ke faí ʻi hono tauhi ʻa e ʻOtuá?

KO E monū lahi taha ʻoku lava ke tau ala maʻú ko hono tauhi ʻo Sihová. ʻI he ʻuhinga lelei, kuo fuoloa hono fakaʻaiʻai ʻe he makasini ko ʻení ʻa e kau Kalisitiané ke nau kau ʻi he ngāue fakafaifekaú, naʻa mo e ngāue ke “hulu atu” ʻi ha taimi pē ʻe ala lavá. (1 Tesalonaika 4:1) Kae kehe, ʻoku ʻikai te tau malava maʻu pē ke fai ʻa e meʻa kotoa ʻoku holi ki ai hotau lotó ke faí ʻi hono tauhi ʻo e ʻOtuá. “Ko e ngaahi tuʻunga ko ia ʻoku ou ʻi aí ʻoku fiemaʻu ia ke u ngāue taimi-kakato,” ko e fakamatala ia ʻa ha tuofefine taʻemali ʻa ia naʻe papitaiso meimei ʻi he taʻu ʻe 40 kuohilí. “Ko ʻeku ʻuhinga ki he ngāué, ʻoku ʻikai koeʻuhi ke maʻu ha kōpate tukuʻanga vala fonu he vala kehekehé pe ke fai ha ngaahi folau ʻeveʻeva, ka ke fakaai pē ʻa e ngaahi fiemaʻú, ʻo kau ai ʻa e ngaahi fakamole fakafaitoʻo mo hono tokangaʻi ʻo e nifó. ʻOku ou ongoʻi ʻo hangē ʻoku ou foaki ʻa e toenga siʻisiʻi ʻo hoku taimí maʻa Sihová.”

² Ko e ʻofa kia Sihová ʻokú ne ueʻi kitautolu ke tau loto ke fai ʻa e lahi taha ʻoku tau malavá ʻi he ngāue fakamalangá. Ka ko e ngaahi tuʻunga ʻi he moʻuí ʻokú ne faʻa fakangatangata ʻa e meʻa ʻoku lava ke tau faí. Ko hono tokangaʻi ʻa e ngaahi fatongia kehe Fakatohitapú, ʻo kau ai ʻa e ngaahi ngafa ʻi he fāmilí, ʻokú ne keina nai ʻa e lahi ʻo hotau taimí mo e iví. (1 Timote 5:​4, 8) ʻI he “ngaahi taimi faingataʻa” ko ʻení, ʻoku toe lahi ange ai ʻa e pole ia ʻi he moʻuí. (2 Timote 3:1) ʻI he ʻikai te tau lava ke fai ʻa e meʻa kotoa te tau saiʻia ke fai ʻi he ngāue fakafaifekaú, te tau hoko nai ʻo ongoʻi loto faingataʻaʻia. Te tau fifili nai pe ʻoku hōifua ʻa e ʻOtuá ki heʻetau founga-lotú.

Ko e Fakaʻofoʻofa ʻo e Ngāue ʻAufuatoó

 3. Ko e hā ʻoku ʻamanekina ʻe Sihova mei hono kotoa ʻo kitautolú?

³ ʻI he Sāme 103:​14, ʻoku fakapapauʻi māfana mai ai ʻe he Tohitapú kiate kitautolu ko Sihová “ʻoku ne ʻilo ʻe ia hota anga; ʻoku ne manatu ai pe ko e efu pe kitaua.” Laka hake ʻi ha toe taha pē, ʻoku mahino kiate ia hotau ngataʻangá. ʻOku ʻikai te ne fiemaʻu mai ʻo lahi ange ia ʻi he meʻa ʻoku lava ke tau foakí. Ko e hā ʻokú ne ʻamanekiná? Ko e meʻa ko ia ʻe lava ke foaki ʻe he tokotaha kotoa pē, tatau ai pē pe ko e hā hono tuʻunga ʻi he moʻuí: “ʻIlonga ha meʻa te mou fai, ngaue fie ngaue [“ʻaufuatō,” NW] ki ai, he ko e ngaue ki he ʻEiki [“Sihova,” NW] ʻo ʻikai ki he kakai.” (Kolose 3:23) ʻIo, ʻoku ʻamanekina ʻe Sihova kitautolu​—kātoa kitautolu​—ke tauhi ʻaufuatō kiate ia.

 4. Ko e hā hono ʻuhinga ʻo e tauhi ʻaufuatō kia Sihová?

⁴ Ko e hā hono ʻuhinga ʻo e tauhi ʻaufuatō kia Sihová? Ko e kupuʻi lea faka-Kalisi naʻe fakalea ko e “ʻaufuatoó” ko hono ʻuhinga fakafoʻileá ko e “mei he soulú.” Ko e “soulú” ʻoku hanga ia ki he tokotahá kakato, fakataha mo hono tufakanga fakaesino mo fakaeʻatamaí kotoa. Ko ia ai, ko e ngāue ʻaufuatoó ʻoku ʻuhingá ko hono foaki atu ʻo kitautolu, ʻo ngāueʻaki ʻa e kotoa ʻo hotau tufakangá mo hotau iví ki he kakato taha ʻe ala lava ʻi he ngāue ʻa e ʻOtuá. Ko hono ʻai mahinó, ʻoku ʻuhingá ko hono fai ʻa e meʻa kotoa ʻoku lava ʻe hotau soulú ke faí.​—Maake 12:​29, 30.

 5. ʻOku fakahaaʻi fēfē ʻi he fakatātā fekauʻaki mo e kau ʻaposetoló ʻoku ʻikai pau ke fai ʻe he tokotaha kotoa pē ʻa e meʻa tatau ʻi he ngāue fakafaifekaú?

⁵ ʻOku ʻuhinga ʻa e hoko ʻo ʻaufuatoó kuo pau ke tau fai kotoa ʻa e meʻa lahi tatau ʻi he ngāue fakafaifekaú? ʻOku faingataʻa ke malava ia, he ʻoku kehekehe ʻa e ngaahi tuʻungá mo e tufakangá mei he tokotaha ki he tokotaha. Fakakaukau angé ki he kau ʻaposetolo anga-tonu ʻa Sīsuú. Naʻe ʻikai te nau malava kotoa ke fai ʻa e meʻa lahi tatau. Hangē ko ʻení, ʻoku siʻi ʻaupito ʻetau ʻilo fekauʻaki mo e niʻihi ʻo e kau ʻaposetoló, hangē ko Saimone ko e Mamahiʻi-Fonuá mo Sēmisi ko e foha ʻo ʻAlefiusi. Mahalo pē ko ʻena ngaahi ngāue ʻi he tuʻunga ko e ongo ʻaposetoló naʻe fakangatangata. (Mātiu 10:​2-4) ʻI hono kehekehé, naʻe malava ʻa Pita ia ke ne tali ʻa e ngaahi fatongia mafatukituki lahi​—ʻikai, naʻe aʻu ʻo ʻoange kiate ia ʻe Sīsū “ʻa e ngāhi kī ʻo e Puleʻanga”! (Mātiu 16:19) Neongo ia, naʻe ʻikai ke fakamāʻolungaʻi ai ʻa Pita ia ʻi he niʻihi kehé. ʻI he taimi naʻe maʻu ai ʻe Sione ʻa e vīsone fekauʻaki mo Selusalema Foʻou ʻi he Fakahaá (he 96 T.S. nai), naʻá ne sio ai ki he ngaahi maka tuʻunga ʻe 12 pea naʻe tohi ʻiate kinautolu ʻa e “hingoa ʻe hongofulu ma ua ʻo e kau Aposetolo ʻe hongofulu ma ua.”a (Fakahā 21:14) Naʻe mahuʻinga kia Sihova ʻa e ngāue ʻa e kau ʻaposetoló kotoa, neongo ʻa e hā mahino naʻe malava ʻa e niʻihi ke fai ʻa e meʻa lahi ange ia ʻi he niʻihi kehé.

 6. ʻI he talanoa fakatātā ʻa Sīsū ki he tangata tūtūʻí, ko e hā ʻoku hoko ki he tenga ʻoku tūtuuʻi ki he “kelekele kuo lelei,” pea ko e hā ʻa e ongo fehuʻi ʻoku malanga haké?

⁶ ʻI he tuʻunga meimei tatau, ʻoku ʻikai ke fiemaʻu mai ʻe Sihova ia ʻa e tuʻunga lahi tatau ʻi he malangá meiate kitautolu hono kotoa. Naʻe fakahaaʻi ʻeni ʻe Sīsū ʻi he talanoa fakatātā ki he tangata tūtūʻí, ʻa ia naʻe fakatatau ai ʻa e ngāue fakamalangá ki hono tūtuuʻi ʻo e ngaahi tengá. Naʻe ngangana ʻa e tengá ʻi he kalasi kelekele kehekehe, ʻo fakatātaaʻi ai ʻa e kalasi kehekehe ʻi he ngaahi tuʻunga ʻo e lotó naʻe fakaeʻa ʻe he faʻahinga ko ia ʻoku nau fanongo ki he pōpoakí. “Pea ko ia naʻe tūtūʻi ki he kelekele kuo lelei,” naʻe fakamatala ʻa Sīsū, “ko e toko taha ia ʻoku fanongo ki he folofola, pea tau: pea ko eni ia ʻoku fua, ʻo fuo teau ʻa e taha, fuo onongofulu ʻa e taha, fuo tolungofulu ʻa e taha.” (Mātiu 13:​3-8, 18-23) Ko e hā ʻa e fua ko ʻení, pea ko e hā ʻoku fua ai ia ʻo kehekehe hono lahí?

 7. Ko e hā ʻa e fua ʻo e tenga naʻe tūtūʻí, pea ko e hā ʻoku fua ai ia ʻo kehekehe hono lahí?

⁷ Koeʻuhi ko e tenga ʻa ia ʻoku tūtūʻí ko e “folofola ʻo e Puleʻanga,” ko ʻene maʻu ʻa e fuá ʻoku fakahanga ia ki hono pavaki atu ʻo e folofola ko iá, ʻo leaʻaki ia ki he niʻihi kehé. (Mātiu 13:19) Ko hono lahi ʻo e fua ʻoku maʻú ʻoku kehekehe​—mei he tolungofulu ki he teau​—koeʻuhi he ko e ngaahi tufakanga mo e tuʻunga ʻi he moʻuí ʻoku kehekehe. Ko ha taha ʻoku moʻui lelei mo ivi mālohí ʻoku malava nai ke ne fakamoleki ha taimi lahi ange ʻi he malangá ʻi he malava ʻa ha taha ʻa ia kuo toʻo atu hono iví ʻi ha tuʻunga mahaki tauhi pe ʻi he lahi ʻo e taʻumotuʻá. Ko ha tokotaha taʻemali kei siʻi ʻa ia ʻoku ʻatā mei he ngaahi fatongia fakafāmilí ʻe malava nai ke ne fai ʻa e meʻa lahi ange ʻi he malava ʻa e taha kuo pau ke ngāue taimi-kakato ke tokonaki ki ha fāmili.​—Fakafehoanaki mo Palovepi 20:​29.

 8. ʻOku anga-fēfē ʻa e vakai ʻa Sihova ki he faʻahinga ʻoku nau foaki ʻa e lelei taha ʻoku malava ke foaki ʻe honau soulú?

⁸ ʻI he vakai mai ʻa e ʻOtuá, ko e tokotaha ʻaufuatō ʻo fua tolungofulú ʻoku siʻi ange haʻaná līʻoa ʻi he taha ko ia ʻoku fua teaú? ʻIkai ʻaupito! Ko e lahi ʻo e fuá ʻe kehekehe nai, ka ʻoku hōifua ʻa Sihova kapau ko e ngāue naʻe faí ko e lelei taha ia ʻoku malava ke foaki atu ʻe hotau soulú. Manatuʻi, ko e lahi ʻo e ngaahi fua kehekehé, ko e tupu kotoa ia mei he ngaahi loto ʻa ia ko e “kelekele kuo lelei.” Ko e kupuʻi lea faka-Kalisi ko e (ka·losʹ) naʻe fakalea ko e “lelei” ʻokú ne fakamatalaʻi ʻa e meʻa ʻa ia ʻoku “fakaʻofoʻofa” pea ʻoku “mālie ki he lotó, pea fakafiefia ki he matá.” He meʻa fakafiemālie ē ke ʻilo ko e taimi ko ia ʻoku tau fai ai hotau lelei tahá, ʻoku fakaʻofoʻofa hotau lotó ʻi he vakai mai ʻa e ʻOtuá!

ʻIkai Fefakafehoanakiʻaki

 9, 10. (a) ʻE tākiekina nai kitautolu ʻe hotau lotó ki he founga fakaʻuhinga taʻepau fēfē? (e) ʻOku anga-fēfē hono fakahā ʻi he talanoa fakatātā he 1 Kolinito 12:​14-26 ʻoku ʻikai fakahoa kitautolu ʻe Sihova ki he niʻihi kehé ʻi he meʻa ʻoku tau faí?

⁹ Kae kehe, ʻe kehekehe nai ʻa e fakafuofuaʻi ʻe hotau loto taʻehaohaoá ʻa e ngaahi meʻá. Te ne fakafehoanaki nai ʻetau ngāué ki he ngāue ʻa e niʻihi kehé. ʻE fakaʻuhinga nai ia, ‘ʻOku fai ʻo lahi mamaʻo ange ʻa e niʻihi kehé ia ʻi he ngāue fakamalangá ʻiate au. ʻE malava fēfē ke teitei hōifua mai ʻa Sihova ki heʻeku ngāué?’​—Fakafehoanaki mo 1 Sione 3:​19, 20.

¹⁰ Ko e ngaahi fakakaukau mo e founga ʻa Sihová ʻoku māʻolunga lahi ange ia ʻi haʻatautolú. (Aisea 55:9) ʻOku tau maʻu ʻa e mahino ki he founga ʻo e vakai mai ʻa Sihova ki heʻetau ngaahi feinga tāutahá mei he 1 Kolinito 12:​14-26, ʻa ia ʻoku fakatatau ai ʻa e fakatahaʻangá ki ha sino mo hano ngaahi kupu lahi​—ko e mata, nima, vaʻe, telinga, mo e hā fua. Fakakaukau angé, ʻi ha momeniti, ki he sinó tonu. He meʻa ngali vale ē ke fakafehoanaki ho ongo matá ki ho ongo nimá pe ko ho ongo vaʻé ki ho ongo telingá! Ko e kupu taki taha ʻokú ne fai ha ngāue kehekehe, neongo ia ʻoku ʻaonga ʻa e ngaahi kupú kotoa pea ʻoku fakamahuʻingaʻi. ʻI he tuʻunga meimei tatau, ʻoku tukulotoa ʻe Sihova hoʻo ngāue ʻaufuatoó ʻo tatau ai pē pe ʻoku fai ʻe he niʻihi kehé ʻa e meʻa lahi ange pe ʻoku nau fai ʻo siʻi ange.​—Kaletia 6:4.

11, 12. (a) Ko e hā nai ʻoku ongoʻi ai ʻe he niʻihi ʻoku nau “vaivai” pe “feifeiʻavale”? (e) ʻOku anga-fēfē ʻa e vakai ʻa Sihova ki heʻetau ngāué?

¹¹ Koeʻuhi ko e ngaahi fakangatangata ʻoku ʻomai ʻi he mahamahakí, lahi ʻo e taʻumotuʻá, pe ko e ngaahi tuʻunga kehé, ko e niʻihi ʻo kitautolu ʻi ha ngaahi taimi ʻoku tau ongoʻi nai ʻoku tau “vaivai” pe “feifeiʻavale.” Ka ʻoku ʻikai ke pehē ʻa e anga ʻo e vakai mai ʻa Sihova ki he ngaahi meʻá. ʻOku tala mai ʻe he Tohitapú kiate kitautolu: “Ko e ngaahi kupu ʻo e sino ʻoku matamata vaivai, ʻoku lahi hake noa pe honau ʻaonga: pea ko e ngaahi kupu . . . ʻoku tau lau ʻoku feifeiʻavale, ʻoku lahi hake ʻa e teunga ʻoku tau ʻai ki ai. . . . Ka ko eni, naʻe ngaohi ʻe he ʻOtua ʻa e sino ke hohoamalie, heʻene ʻai ke hulu atu ʻa e teunga ʻo ha feituʻu ʻoku masivesiva.” (1 Kolinito 12:​22-24) Ko ia ʻoku lava ke mahuʻinga kia Sihova ʻa e tokotaha tāutaha kotoa pē. ʻOkú ne koloaʻaki ʻetau ngāué ʻi he ngātanga ʻo hotau ngaahi fakangatangatá. ʻIkai ʻoku ueʻi koe ʻe ho lotó ke ke fie fai ʻa e meʻa kotoa pē te ke malavá ʻi hono tauhi ha ʻOtua ʻiloʻilo mo anga-ʻofa pehē?

¹² Ko e meʻa leva ʻoku mahuʻinga kia Sihová, ʻoku ʻikai ko hoʻo fai ʻo lahi tatau mo e meʻa ʻoku fai ʻe ha tokotaha kehe, ka ko hoʻo fai ʻa e meʻa ko koe​—ko ho soulú​—fakafoʻituitui ʻoku malava ke ke faí. Naʻe fakatātaaʻi ʻi ha founga fakaueʻiloto ʻaupito ʻa e mahuʻingaʻia ʻa Sihova ʻi heʻetau ngaahi feinga tāutahá ʻi he feangainga ʻa Sīsū mo e ongo fefine mātuʻaki kehekehe ʻe toko ua, lolotonga ʻa e ngaahi ʻaho fakaʻosi ʻo ʻene moʻui ʻi he māmaní.

Ko ha Meʻaʻofa “Mahuʻinga ʻAupito” ʻa ha Fefine Loto-Houngaʻia

13. (a) Ko e hā ʻa e ngaahi tuʻunga naʻe kau ʻi hono ʻai ʻe Mele ʻa e lolo namu kakalá ki he ʻulu mo e vaʻe ʻo Sīsuú? (e) Ko e hā ʻa e mahuʻinga fakamatelie ʻo e lolo ʻa Melé?

¹³ ʻI he efiafi Falaite, ʻo Nīsani 8, naʻe aʻu ai ʻa Sīsū ki Pētani, ko ha kiʻi kolo siʻisiʻi ʻi he tahifohifo fakahahake ʻo e Moʻunga ʻŌlivé, ko e kilomita nai ʻe tolu mei Selusalema. Naʻe ʻi ai ʻa e siʻi ngaahi kaungāmeʻa ʻo Sīsū ʻi he kolo ko ʻení​—ko Mele, Māʻata, mo hona tuongaʻane, ko Lasalosi. Naʻe fakaafeʻi ʻa Sīsū ki honau ʻapí, mahalo naʻe tuʻo lahi. Ka ʻi he efiafi Tokonakí, naʻe kai ʻa Sīsū mo hono ngaahi kaungāmeʻá ʻi he ʻapi ʻo Saimoné, ko ha tokotaha naʻe kilia ki muʻa ʻa ia naʻe fakamoʻui nai ʻe Sīsū. ʻI he tokoto ʻa Sīsū ʻi he tēpilé, naʻe fakahoko ʻe Mele ha ngāue anga-fakatōkilalo ʻa ia naʻe fakahāhaaʻi ai ʻa ʻene ʻofa lahi ki he tangata naʻá ne fokotuʻu hake hono tuongaʻané. Naʻá ne fakaava ha foʻi hina naʻe ʻi ai ʻa e lolo namu kakala, “mahuʻinga ʻaupito.” Mahuʻinga moʻoni! Ko hono mahuʻingá ko e tēnali ʻe 300, ko hono tatau ia ʻo e vāhenga he ngāue ʻi he taʻu ʻe tahá. Naʻá ne lilingi ʻa e lolo namu lelei ko ʻení ʻi he ʻulu ʻo Sīsuú mo hono ongo vaʻé. Naʻe aʻu ʻo ne holo hono ongo vaʻé ke mātuʻu ʻaki hono lauʻi ʻulú.​—Maake 14:3; Luke 10:​38-42; Sione 11:​38-44; 12:​1-3.

14. (a) Naʻe anga-fēfē ʻa e tali ʻa e kau ākongá ki he ngāue ʻa Melé? (e) Naʻe taukapoʻi fēfē ʻe Sīsū ʻa Melé?

¹⁴ Naʻe mamahi ʻa e kau ākongá! Naʻa nau ʻeke ‘ko e fai ha maumau peheé koeʻumaʻā?’ Ko Siutasi, ʻi heʻene fufū ʻene holi ke kaihaʻá ʻaki ha fokotuʻu atu ki ha tokoni ki he kau masivá, naʻá ne pehē: “Ko e ha naʻe ʻikai fakatau ai ʻa e lolo ni, ʻo maʻu ai ha tenali ʻe tolungeau, ʻo foaki ki he masiva?” Naʻe fakalongolongo pē ʻa Mele. Kae kehe, naʻe tala ʻe Sīsū ki he kau ākongá: “Tuku ai pe ʻa e fefine: ko e ha ʻoku mou fakamamahi ai kiate ia? he ko e ngāue lelei ia [ko ha founga ʻo e ka·losʹ] kuo ne fai kiate au. . . . Kuo ne fai siʻono tūkuingata: kuo ne sinaki tākai hoku sino ki faʻitoka. Pea ko au ē, ʻoku ou tala atu, ʻIlonga ha potu ʻi māmani kātoa ʻe malangaʻaki ki ai ʻa e Kōsipeli, ʻe leaʻaki ai foki ʻa e meʻa ne fai ʻe siʻi fefine ni, ko e fakamanatu kiate ia.” He meʻa fakalotomāfana ē kuo pau naʻe fakafiemālieʻiʻaki ʻe he ngaahi lea ʻa Sīsuú ʻa e loto ʻo Melé!​—Maake 14:​4-9; Sione 12:​4-8.

15. Ko e hā naʻe mātuʻaki maongo ai kia Sīsū ʻa e meʻa naʻe fai ʻe Melé, pea ko e hā ʻoku tau ako mei ai fekauʻaki mo e ngāue ʻaufuatoó?

¹⁵ Naʻe ueʻi loloto ʻa Sīsū ʻe he meʻa naʻe fai ʻe Melé. ʻI heʻene fakafuofuá, naʻá ne fakahoko ha ngāue naʻe taau ke fakahīkihikiʻi. Naʻe ʻikai ko e mahuʻinga fakamatelie ʻo e meʻaʻofá naʻe mahuʻinga kia Sīsuú ka ko e moʻoniʻi meʻa ko ia ko ʻene “fai hono tūkuingata.” Naʻá ne ngāueleleiʻaki ʻa e faingamālié ʻo foaki ʻa e meʻa naʻe malava ke ne foakí. Kuo fakaleaʻaki ʻe he ngaahi liliu kehe ʻa e ngaahi leá ni, “Kuó ne fai ʻa e meʻa kotoa naʻá ne malavá,” pe “Kuó ne fai ʻa e meʻa kotoa naʻe ʻi hono mafaí ke faí.” (An American Translation; The Jerusalem Bible) Ko e foaki ʻa Melé naʻe ʻaufuatō koeʻuhi he naʻá ne foaki ʻa ʻene lelei tahá. Ko e meʻa ia ʻoku ʻuhinga ki ai ʻa e ngāue ʻaufuatoó.

Ko Ha “Ongo Kiʻi Paʻanga Kapa” ʻa ha Uitou

16. (a) Naʻe anga-fēfē hono siofi ʻe Sīsū ʻa e tokoni ʻa ha uitou masiva? (e) Ko e hā ʻa e lahi ʻo e mahuʻinga ʻo e ongo foʻi koini ʻa e uitoú?

¹⁶ ʻI ha ʻaho ʻe ua ki mui mai, ʻi he ʻaho 11 ʻo Nīsaní, naʻe fakamoleki ʻe Sīsū ʻa e meimei ʻahó kotoa ʻi he temipalé, ʻa ia naʻe fehuʻia ai ʻa hono tuʻunga mafaí pea naʻá ne fai ha tali ki he ngaahi fehuʻi faingataʻa ʻo kau ki he ngaahi tukuhaú, ko e toetuʻú, mo e ngaahi meʻa kehe. Naʻá ne talatalaakiʻi ʻa e kau sikalaipé mo e kau Fālesí, he ʻi he kau fakataha ki ai mo e ngaahi meʻa kehe, naʻa nau “folo kotoa ʻa e ngaahi ʻapi ʻo siʻi kau uitou.” (Maake 12:40) ʻOku hā mahino naʻe tangutu hifo ʻa Sīsū, ʻi he Lotoʻā ʻo e Kakai Fefiné, ʻa ia fakatatau ki he talatukufakaholo faka-Siú, naʻe ʻi ai ʻa e ngaahi puha līʻanga meʻaʻofa ʻe 13. Naʻá ne tangutu hifo ʻi ha taimi, ʻo siofi lelei ʻa e lī ʻe he kakaí ʻenau meʻaʻofá. Naʻe haʻu ʻa e kau koloaʻia tokolahi, ko e niʻihi nai naʻa nau ʻi ha fōtunga māʻoniʻoni, naʻa mo e ʻi he fai fakahāhā. (Fakafehoanaki mo Mātiu 6:2.) Naʻe sio fakamamaʻu ʻa Sīsū ʻo tautefito ki ha fefine ʻe taha. ʻE ʻikai nai ke fakatokangaʻi ʻe ha taha anga-maheni ia ha meʻa ʻoku ngali kehe fekauʻaki mo ia pe ko ʻene meʻaʻofá. Ka ko Sīsū, ʻa ia naʻe malava ke ne ʻilo ki he loto ʻo e niʻihi kehé, naʻá ne ʻiloʻi ko iá “ko ha fefine uitou masiva.” Naʻá ne toe ʻilo foki ʻa e lahi tofu pē ko ia ʻo ʻene meʻaʻofá​—ko “ha ongo kiʻi paʻanga kapa, ʻa ia ʻoku konga seniti pe lau fakataha.”b​—Maake 12:​41, 42.

17. Naʻe anga-fēfē hono fakafuofuaʻi ʻe Sīsū ʻa e tokoni ʻa e uitoú, pea ko e hā ʻoku tau ako mei ai fekauʻaki mo e foaki ki he ʻOtuá?

¹⁷ Naʻe ui ʻe Sīsū ʻa ʻene kau ākongá kiate ia, he naʻá ne fiemaʻu ke nau sio totonu ʻi he lēsoni naʻe teu ke ne ako ʻakí. Naʻe “hulu ʻene li ʻiate kinautolu kotoa pē kuo li ki he seifi,” ko e lea ia ʻa Sīsuú. ʻI heʻene fakafuofuá naʻá ne lī ʻo lahi ange ia ʻi hono fakatahaʻi kotoa ʻa e lī ʻa e niʻihi kehé. Naʻá ne foaki “ʻa e meʻa kotoa naʻa ne maʻu”​—ko e kiʻi toenga fakaʻosi ʻo ʻene paʻangá. ʻI he fai peheé, naʻá ne tuku atu ai ia tonu ki he tauhi ʻa Sihová. Ko ia ai, ko e tokotaha ko ia naʻe filiʻi ko ha faʻifaʻitakiʻanga ʻi he foaki ki he ʻOtuá ko e taha ia ko ʻene meʻaʻofá naʻe meimei ʻikai hano ʻaonga ʻi he mahuʻinga fakamatelié. Kae kehe, ʻi he vakai mai ʻa e ʻOtuá, naʻe mahuʻinga ʻaupito!​—Maake 12:​43, 44; Semisi 1:27.

Ako mei he Vakai ʻa Sihova ki he Ngāue ʻAufuatoó

18. Ko e hā ʻoku tau ako mei he feangainga ʻa Sīsū mo e ongo fefine ʻe toko uá?

¹⁸ Mei he feangainga ʻa Sīsū mo e ongo fefine ko ʻeni ʻe toko uá, ʻoku tau ako ai ʻa e ngaahi lēsoni fakalotomāfana ʻe niʻihi ʻo fekauʻaki mo e anga ʻo e vakai ʻa Sihova ki he ngāue ʻaufuatoó. (Sione 5:19) Naʻe ʻikai ke fakafehoanaki ʻe Sīsū ia ʻa e uitoú kia Mele. Naʻá ne fakamahuʻingaʻi ʻa e ongo foʻi koini ʻe ua ʻa e uitoú ʻo ʻikai siʻi ia ʻi he meʻa naʻá ne fai ki he lolo “mahuʻinga ʻaupito” ʻa Melé. Koeʻuhi naʻe foaki ʻe he fefine taki taha ʻa ʻene lelei tahá, ʻi he vakai mai ʻa e ʻOtuá naʻe fakatou mahuʻinga ʻa ʻena meʻaʻofá. Ko ia kapau ʻoku malanga hake ha ongoʻi taʻeʻaonga ʻiate koe koeʻuhi ʻoku ʻikai te ke malava ʻa e meʻa kotoa pē ʻokú ke loto ke fai ʻi hono tauhi ʻa e ʻOtuá, ʻoua ʻe fakatuʻatamaki. ʻOku hōifua ʻa Sihova ke tali ʻa e lelei taha ʻoku malava ke ke foakí. Manatuʻi, ko Sihová ʻoku ‘sio ia ki he lotó,’ ko ia ai, ʻokú ne ʻiloʻi kotoa ʻa e ngaahi holi ʻo ho lotó.​—1 Samiuela 16:7.

19. Ko e hā ʻoku ʻikai totonu ai ke tau fakamāuʻi ʻa e meʻa ʻoku fai ʻe he niʻihi kehé ʻi hono tauhi ʻa e ʻOtuá?

¹⁹ ʻOku totonu ke tākiekina ʻe he vakai ʻa Sihova ki he ngāue ʻaufuatoó ʻa e founga ʻo ʻetau vakai mo ʻetau feangainga ʻiate kitautolú. He taʻeʻofa ē ʻe hokó ke fakaangaʻi ʻa e ngaahi feinga ʻa e niʻihi kehé, pe ke fakahoa ʻa e ngāue ʻa ha taha ki ha tokotaha ʻe taha! ʻOku fakamamahi ia, he naʻe tohi ʻa e Kalisitiane ʻe taha: “ʻI he taimi ʻe niʻihi ʻoku pehē ai ʻe he niʻihi ko hoʻo hoko pē ko e tāimuʻa pe ko e ʻikai hao ʻaonga. Ko kitautolu ko ia ʻoku fematematei ke hokohoko atu ko e kau malanga tuʻumaʻu ‘pē’ ʻo e Puleʻangá ʻoku fiemaʻu ke tau ongoʻi foki ʻoku ʻi ai hotau mahuʻinga.” Tau manatuʻi ʻoku ʻikai fakamafaiʻi kitautolu ke fakamāuʻi pe ko e hā ʻoku kau ki he ngāue ʻaufuatō ʻa ha kaungā Kalisitiane. (Loma 14:​10-12) ʻOku tukulotoa ʻe Sihova ʻa e ngāue ʻaufuatō ʻa e tokotaha taki taha ʻi he laui miliona ʻo e kau malanga anga-tonu ʻo e Puleʻangá, pea ʻoku totonu ke pehē pē mo kitautolu.

20. Ko e hā ʻoku faʻa lelei taha ke pehē ʻo fekauʻaki mo hotau kaungā-lotú?

²⁰ Fēfē leva, kapau ʻoku hā ko e niʻihi ia ʻoku nau fai ʻo siʻisiʻi ange ʻi he meʻa ʻoku nau malava ʻi he ngāue fakafaifekaú? Ko ha holo ʻa e ngāue ʻa ha kaungā-tui te ne fakahaaʻi lelei nai ki he kau mātuʻa tokangá ʻoku ʻi ai ha fiemaʻu ki ha tokoni pe fakalototoʻa. ʻI he taimi tatau, kuo pau ke ʻoua ʻe ngalo ʻiate kitautolu, ki he niʻihi ko e ngāue ʻaufuatoó ʻoku meimei tatau ange ia mo e ongo kiʻi foʻi koini ʻa e uitoú ʻi he lolo mahuʻinga ʻa Melé. ʻOku faʻa lelei tahá ke pehē ʻoku ʻofa ʻa hotau ngaahi tokouá mo e tuofāfiné kia Sihova pea ko e ʻofa ko iá te ne ueʻi kinautolu ke fai ʻo lahi​—ʻikai ke siʻisiʻi​—ʻa e meʻa ʻoku nau malavá. ʻOku pau heʻikai fili ʻe ha sevāniti loto-tōnunga ʻa Sihova ke fai ʻo siʻi ange ʻi heʻene malavá ʻi hono tauhi ʻa e ʻOtuá!​—1 Kolinito 13:​4, 7.

21. Ko e hā ʻa e ngāue fakapaleʻi ʻoku tuli ki ai ʻa e tokolahi, pea ko e hā ʻa e ongo fehuʻi ʻoku malanga haké?

²¹ Kae kehe, ki he tokolahi ʻo e kakai ʻa e ʻOtuá, kuo ʻuhinga ʻa e ngāue ʻaufuatoó ko e tuli ki ha ngāue fakapaleʻi lahi​—ko e ngāue fakafaifekau tāimuʻá. Ko e hā ʻa e ngaahi tāpuaki ʻoku nau maʻú? Pea fēfē ʻa e faʻahinga ʻo kitautolu ʻoku teʻeki ai malava ke tāimuʻá​—ʻoku lava fēfē ke tau fakahaaʻi ʻa e laumālie ʻo e tāimuʻá? ʻE lāulea ki he ongo fehuʻi ko ʻení ʻi he kupu hono hokó.

[Fakamatala ʻi lalo]

Ko e Hā Haʻo Tali?

◻ Ko e hā hono ʻuhinga ʻo e tauhi ʻaufuatō kia Sihová?

◻ ʻOku anga-fēfē hono fakahaaʻi ʻi he talanoa fakatātā he 1 Kolinito 12:​14-26 ʻoku ʻikai ke fakahoa kitautolu ʻe Sihova ki he niʻihi kehé?

◻ Ko e hā ʻoku tau ako fekauʻaki mo e foaki ʻaufuatoó mei he fakamatala ʻa Sīsū ʻo kau ki he lolo mahuʻinga ʻa Melé mo e ongo kiʻi foʻi koini ʻe ua ʻa e uitoú?

◻ ʻOku totonu ke anga-fēfē ʻa hono tākiekina ʻe he vakai ʻa Sihova ki he ngāue ʻaufuatoó ʻa e founga ʻo ʻetau fevakaiʻaki ʻiate kitautolú?

[Fakatātā ʻi he peesi 13]

Naʻe foaki ʻe Mele ʻa ʻene lelei tahá, ʻi hono tākaiʻaki ʻa e sino ʻo Sīsuú ʻa e lolo “mahuʻinga ʻaupito”

[Fakatātā ʻi he peesi 14]

Ko e ongo foʻi koini ʻa e uitoú​—naʻe meimei ʻikai hano ʻaonga ʻi he mahuʻinga fakamatelié kae mahuʻinga lahi ʻaupito ia ʻi he vakai ʻa Sihová