ʻE Fakahaofi Nai Koe ʻi he Ngāue Mai ʻa e ʻOtuá?

“Kapau naʻe ʻikai fakanounou ʻa e ngaahi ʻaho ko iá, ʻe ʻikai ha kakano ʻe fakahaofi; kae telia ʻa e kakai filí ʻe fakanounou ai ʻa e ngaahi ʻaho ko iá.”​—MĀTIU 24:​22, NW.

1, 2. (a) Ko e hā ʻoku totonu ai ke mahuʻingaʻia ʻi hotau kahaʻú? (e) Ko e hā ʻa e ongo fehuʻi mahuʻinga ʻe fakanatula pē nai ʻa e mahuʻingaʻia fekauʻaki mo kinauá?

KO E HĀ hono lahi ʻo hoʻo mahuʻingaʻia ʻiate koé tonu? Ko e tokolahi ʻi he ʻahó ni ʻoku nau ʻai ʻo fuʻu hulu ʻa e mahuʻingaʻia fakaekitá, ʻo nau hoko ai ʻo siokita. Ka, ʻoku ʻikai fakahalaiaʻi ʻe he Tohitapú ia ʻa e mahuʻingaʻia feʻunga ʻi he meʻa ʻoku kaunga kiate kitautolú. (ʻEfesō 5:​33) ʻOku kau ai ʻa e mahuʻingaʻia ʻi hotau kahaʻú. Ko ia ko e meʻa totonu pē ia kiate koe ke fieʻilo pe ko e hā ʻoku ʻi ho kahaʻú. ʻOkú ke mahuʻingaʻia ai?

² ʻOku lava ke tau fakapapauʻi naʻe ʻi ai ʻa e mahuʻingaʻia pehē ʻa e kau ʻaposetolo ʻa Sīsuú ʻi honau kahaʻú. (Mātiu 19:27) Ngalingali ko ha ʻuhinga ia naʻe fehuʻi ai ʻa e toko fā ʻo kinautolu ʻi heʻenau ʻi he Moʻunga ʻOlivé fakataha mo Sīsuú. Naʻa nau ʻeke: “Tala mai pe hoko fakakū ʻa e ngaahi meʻa ko ia, pea ko e ha ʻa e fakaʻilonga ʻo ka ene hono fakaʻosi kotoa?” (Maʻake 13:4) Naʻe ʻikai ke taʻetokanga ʻa Sīsū ki he mahuʻingaʻia fakaenatula ʻi he kahaʻú​—ʻa ʻenau mahuʻingaʻiá mo kitautolu. Naʻá ne toutou fakaeʻa ʻa e founga ʻe uesia ai ʻa hono kau muimuí pea mo e meʻa fakaʻosi ʻe hokó.

 3. Ko e hā ʻoku tau fakafehokotaki ai ʻa e tali ʻa Sīsuú ki hotau taimí?

³ Naʻe fokotuʻu ʻi he tali ʻa Sīsuú ha kikite fakataha mo hono fakahoko lahi ʻi hotau taimí. ʻOku lava ke tau sio ki heni mei he ngaahi tau lahi ʻa e māmaní mo e ngaahi vāvākovi kehe ʻi hotau senitulí, ko e ngaahi mofuike ko ia naʻá nau fakaʻauha ʻa e ngaahi moʻui taʻefaʻalaua, ko e ngaahi nounou fakameʻatokoni ʻa ia ʻoku nau ʻomai ʻa e mahamahakí mo e maté, mo e ngaahi mahaki fakaʻauha​—mei he fulū faka-Sipeini mafolalahia ʻo e 1918 ki he mahaki mofele vave ki muí ni mai ko e ʻEitisí. Kae kehe, ko e konga lahi ʻi he tali ʻa Sīsuú naʻe toe ʻi ai foki hono fakahoko naʻe iku atu ʻo kau ki ai ʻa hono fakaʻauha ʻo Selusalema ʻe he kau Lomá ʻi he 70 T.S. Naʻe fakatokanga ʻa Sīsū ki heʻene kau ākongá: “Ka mou vakavakai telia kimoutolu. Te nau fakaʻilo kimoutolu ki he ngaahi fakamāuʻanga; pea taki ki he ngaahi falelotu ke haha; pea ʻe fakahopo kimoutolu ʻi he ʻao ʻo e ngaahi kovana mo e ngaahi tuʻi koeʻuhi ko au, ke ai ha fakamatala kiate kinautolu.”​—Maʻake 13:9.

Ko e Meʻa Naʻe Tomuʻa Tala ʻe Sīsuú, mo e Meʻa Naʻe Hokó

 4. Ko e hā ʻa e ngaahi fakatokanga ʻe niʻihi naʻe kau ʻi he tali ʻa Sīsuú?

⁴ Naʻe ʻikai ngata pē ʻa Sīsū ʻi hono tomuʻa tala ʻa e anga ʻo e meʻa ʻe fai ʻe he niʻihi kehé ki heʻene kau ākongá. Naʻá ne fakatokangaʻi kinautolu tonu ki he meʻa ʻoku totonu ke nau faí. Ko e fakatātaá: “Ka ʻo ka mou ka vakai ki he meʻa fakalielia ʻo e fakaʻauha ʻoku tuʻu ʻi he potu ʻoku tapu ki ai; (ʻilonga ha taha ʻoku lau, pea ke ne tokanga ki ai;) pea ke toki hola ki he moʻunga ʻa kinautolu ʻoku ʻi Siutea.” (Maʻake 13:14) ʻOku pehē ʻi he fakamatala tatau ʻia Luke 21:20: “Ka ʻo ka mou ka vakai ki he kapui ʻo Selusalema ʻe he ngaahi matatau.” Naʻe anga-fēfē hono fakamoʻoniʻi ʻoku moʻoni ia ʻi hono ʻuluaki fakahokó?

 5. Ko e hā naʻe hoko ʻi he lotolotonga ʻo e kau Siu ʻi Siuteá ʻi he 66 T.S.?

⁵ ʻOku talamai kiate kitautolu ʻi he The International Standard Bible Encyclopedia (1982): “Naʻe fakautuutu ʻa e taʻemanonga ʻa e kau Siú ʻi he malumalu ʻo e pule ʻa e kau Lomá pea ko e kau fakafofongá naʻe fakautuutu ʻenau fakamālohí, anga-fakamamahí, mo e taʻefaitotonú. Naʻe hoko ʻa e angatuʻu mataʻāʻā ʻi he 66 T.S. . . . Naʻe kamata ʻa e taú ʻi he taimi naʻe puke ai ʻe he kau Sēlotí ʻa Masada pea hili iá, ʻi he malumalu ʻo Menahem, naʻa nau laka ki Selusalema. Naʻe tāmateʻi tavale fakaʻangataha ʻa e kau Siu ʻi he kolo puleʻi faka-Kōvana ʻo Sesaliá, pea naʻe mafola ʻa e ongoongo ʻo e anga-fakalilifu ko ʻení ʻi he fonuá kotoa. Naʻe fakaʻilongaʻi ʻi he ngaahi koini foʻou ʻa e Taʻu 1 ki he Taʻu 5 ʻo e angatuʻú.”

 6. Naʻe fakatupunga ʻe he angatuʻu ʻa e kau Siú ʻa e tali fēfē mei he kau Lomá?

⁶ Naʻe laka ʻa e Kongakau Loma Hono Taha Uá ʻi he malumalu ʻo Cestius Gallus mei Sīlia, ʻo fakaʻauha ʻa Kāleli mo Siutea, pea toki ʻohofi ʻa e kolomuʻá, ʻo aʻu ki hono kapa ʻa e konga ki ʻolunga ʻo “Selusalema ko e Kolo Tapu.” (Nehemaia 11:1; Mātiu 4:5; 5:​35; 27:53) ʻI hono fakamatalaʻi fakamāʻopoʻopo ʻa e ngaahi meʻa naʻe hokó, ʻoku pehē ʻe he voliume ko e The Roman Siege of Jerusalem: “Naʻe feinga ʻa e kau Lomá ʻi he ʻaho ʻe nima ke kaka ʻi he ʻaá, ka naʻe talitekeʻi kinautolu ʻi he taimi ki he taimi. Faifai atu pē, ne vaivai ʻa e kau fakafepakí ʻi he ʻuha atu ʻa e ngahaú, ʻo nau tukulolo. ʻI hono faʻu ha testudo​—ko e founga ʻo hono lokaʻi ʻenau ngaahi paá ʻi honau funga ʻulú ke maluʻi kinautolú​—naʻe keli ʻe he kau sōtia Lomá ʻa e ʻaá pea nau feinga ke tutu ʻa e matapaá. Naʻe pukenimā ʻe ha manavahē lahi ʻa e kau fakafepakí.” Naʻe lava ke manatu ʻa e kau Kalisitiane ʻi he loto-koló ki he ngaahi lea ʻa Sīsuú pea ʻiloʻi ʻoku tuʻu ʻa e meʻa fakalieliá ʻi ha potu tapu.a Ka ʻi hono kapu ʻo e koló, naʻe lava fēfē ke hola ʻa e kau Kalisitiane peheé, hangē ko ia naʻe fakahinohino ʻe Sīsuú?

 7. ʻI he meimei hoko ʻo ikuna ʻi he 66 T.S., ko e hā naʻe fai ʻe he kau Lomá?

⁷ ʻOku pehē ʻi he fakamatala ʻa e faihisitōlia ko Flavius Josephus: “Naʻe ʻikai ke ʻilo ʻa Cestius [Gallus] ia, ki he ʻikai ha ʻamanaki ʻa e faʻahinga naʻe ʻākoloʻí pehē ki he ngaahi ongoʻi ʻa e kakaí, fakafokifā pē naʻá ne taʻofi ʻa ʻene kau tangatá, naʻá ne tukuange ʻene ʻamanakí neongo naʻe ʻikai ke ikunaʻi ia, pea naʻá ne mavahe taʻeʻuhinga mei he koló.” (The Jewish War, II, 540 [xix, 7]) Ko e hā naʻe holomui ai ʻa Gallus? ʻI heʻene holomuí, pe ko e hā pē hono ʻuhingá, naʻe fakaʻatā ai ʻa e kau Kalisitiané ke nau talangofua ki he tuʻutuʻuni ʻa Sīsuú pea hola ki he ngaahi moʻungá pea ki he haoʻangá.

 8. Ko e hā ʻa e tafaʻaki hono ua ʻo e feinga fakafepaki ʻa e kau Lomá ki Selusalemá, pea ko e hā naʻe hokosia ʻe he faʻahinga naʻe haó?

⁸ Naʻe fakahaofi moʻui ʻa e talangofuá. Naʻe ʻikai ke fuoloa kuo ngaʻunu mai ʻa e kau Lomá ke laiki ʻa e angatuʻú. Ko e feingatau ʻi he malumalu ʻo Seniale Taitusí naʻe ʻi hono tumutumú ia ʻi hono ʻākoloʻi ʻo Selusalema mei ʻEpeleli ki ʻAokosi ʻo e 70 T.S. ʻOku fakalilifu ki ha taha ke lau ʻa e fakamatala ʻa Josephus ki he anga ʻo e mamahi ʻa e kau Siú. Tuku kehe kinautolu naʻe mate ʻi he tau mo e kau Lomá, naʻe tāmateʻi ʻa e kau Siu kehe ʻi he kulupu feʻauʻauhi pē ʻa e kau Siú, pea ko e tuʻunga fiekaiá naʻe iku ia ki he kai tangata. ʻI he taimi ʻo e ikuna ʻa e kau Lomá, ne ʻosi mate ʻa e kau Siu ia ʻe toko 1,100,000.b ʻI he toko 97,000 naʻe hao moʻuí, naʻe tāmateʻi ai ʻa e niʻihi ʻi he taimi pē ko iá; ko e niʻihi kehe naʻe fakapōpulaʻi. ʻOku pehē ʻe Josephus: “Ko kinautolu ko ia naʻe lahi hake he taʻu taha fitú naʻe haʻi ukamea pea tuku atu ki he ngāue mamafa ʻi ʻIsipité, lolotonga iá naʻe foaki atu ʻe Taitusi ʻa e fuʻu tokolahi ke ʻauha ʻi he ngaahi heletā pe ʻi he fanga manu fekai ʻi he ngaahi malaʻe vaʻingá.” ʻI he taimi tatau pē naʻe fai ai hono fakatotoloʻi ʻo e meʻa ko ʻení, naʻe mate fiekaia ai ʻa e kau pōpula ia ʻe toko 11,000.

 9. Ko e hā naʻe ʻikai aʻusia ai ʻe he kau Kalisitiané ʻa e ola tatau mo e kau Siú, ka ko e hā ʻa e ongo fehuʻi ʻoku kei toé?

⁹ Naʻe lava ke fakamālō ʻa e kau Kalisitiané ʻi heʻenau talangofua ki he fakatokanga ʻa e ʻEikí mo ʻenau hola mei he koló ki muʻa ʻi he toe foki mai ʻa e kau tau Lomá. Ko ia ai, naʻa nau hao mei he konga ʻo e meʻa naʻe ui ʻe Sīsū ko e ‘mamahi lahi, ʻa ia kuo teʻeki hano tatau mei he kamataʻanga ʻo mamaní ʻo aʻu mai ki he taimi ko iá, ʻoi, pea ʻe ʻikai ʻaupito toe ʻi ai’ ʻi Selusalema. (Mātiu 24:21) Naʻe tānaki atu ʻe Sīsū: “Kapau naʻe ʻikai fakanounou ʻa e ngaahi ʻaho ko iá, ʻe ʻikai ha kakano ʻe fakahaofi; kae telia ʻa e kakai filí ʻe fakanounou ai ʻa e ngaahi ʻaho ko iá.” (Mātiu 24:​22, NW) Ko e hā hono ʻuhinga ʻo ia ʻi he taimi ko iá, pea ko e hā hono ʻuhinga ʻi he lolotonga ní?

10. Kuo anga-fēfē ʻa ʻetau fakamatalaʻi ki muʻa ʻa e Mātiu 24:22?

¹⁰ ʻI he kuohilí naʻe fakamatalaʻi ia ko e ‘kakano ke fakahaofí’ naʻe ʻuhinga iá ki he kau Siu naʻe hao ʻi he mamahi ʻi Selusalema ʻi he 70 T.S. Naʻe hola ʻa e kau Kalisitiané, koeʻuhi ke lava ʻo tukuange atu ʻe he ʻOtuá ʻa e kau Lomá ke nau fai ha fakaʻauha vave ʻaupito. ʻI hono toe fakalea kehé, telia ʻa e moʻoni ko ia ko e “kakai fili” naʻa nau ʻatā mei he fakatuʻutāmakí, naʻe lava ke fakanounou ai ʻa e ngaahi ʻaho ʻo e mamahí, ʻo fakaʻatā ai ke fakahaofi ʻa e ngaahi “kakano” Siu ʻe niʻihi. Naʻe ongoʻi ʻo pehē ko e kau Siu naʻe haó naʻa nau tomuʻa fakatātaaʻi ʻa kinautolu ko ia ʻe hao ʻi he mamahi lahi ʻoku panaki mai ʻi hotau taimí.​—Fakahā 7:​14.

11. Ko e hā ʻoku ngali totonu ai ke toe vakai ki he fakamatalaʻi ʻo Mātiu 24:22?

¹¹ Ka ʻoku fehoanaki ʻa e fakamatala ko iá mo ia naʻe hoko ʻi he 70 T.S.? Naʻe pehē ʻe Sīsū ko e “kakano” fakaetangatá naʻe pau ke “fakahaofi” ʻi he mamahí. Te ke ngāueʻaki ʻa e foʻi lea “fakahaofi” ke fakamatalaʻiʻaki ʻa e toko 97,000 naʻe haó, ʻi he vakai atu ki he moʻoniʻi meʻa ko ia ko e laui afe ʻo kinautolu naʻa nau toe mate ʻi he fiekaiá pe naʻe tāmateʻi ʻi ha malaʻe vaʻinga? Naʻe fakamatala ʻa Josephus ʻo kau ki ha malaʻe vaʻinga ʻe taha ʻi Sesalia: “Ko e tokolahi ʻo kinautolu ko ia naʻe ʻauha ʻi he tau mo e fanga manu fekaí pe ʻi he fetauʻaki pē ʻiate kinautolú pe ʻi hono tutu moʻuí naʻe lahi hake ia ʻi he 2,500.” Neongo naʻe ʻikai te nau mate ʻi he ʻākoloʻí, naʻe ʻikai ke “fakahaofi” moʻoni kinautolu. Pea ʻe vakai atu nai ʻa Sīsū kiate kinautolu ʻoku nau hoko ʻo tatau mo e kau hao fiefia ʻi he “mamahi lahi” ʻoku panaki maí?

Kakano Naʻe Fakahaofi​—Anga-Fēfē?

12. Ko hai ia ʻa e “kakai fili” ʻi he ʻuluaki senitulí naʻe mahuʻingaʻia ai ʻa e ʻOtuá?

¹² ʻI he aʻu ki he 70 T.S., naʻe ʻikai ke kei vakai ʻa e ʻOtuá ki he kau Siu ʻi he kakanó ko ʻene kakai fili. Naʻe fakahaaʻi ʻe Sīsū kuo siʻaki ʻe he ʻOtuá ʻa e puleʻanga ko iá pea te ne tuku ke ngata ʻa hono kolomuʻá, ko hono temipalé, mo ʻene founga-lotú. (Mātiu 23:37–​24:2) Naʻe fili ʻe he ʻOtuá ha puleʻanga foʻou, ko ʻIsileli fakalaumālie. (Ngāue 15:14; Loma 2:​28, 29; Kaletia 6:​16) Naʻe faʻuʻaki ia ʻa e kau tangata mo e kau fefine kuo fili mei he puleʻanga kotoa pē pea paniʻaki ʻa e laumālie māʻoniʻoní. (Mātiu 22:14; Sione 15:19; Ngāue 10:​1, 2, 34, 35, 44, 45) ʻI he ngaahi taʻu ki muʻa ʻi he ʻohofi naʻe fai ʻe Cestius Gallus, naʻe tohi ai ʻa Pita ki he “kakai fili ʻo fakatatau ki he muʻaki ʻafioʻi ʻe he ʻOtua ko e Tamai, ʻi homou fakatapuʻi ʻe he Laumalie.” Ko e faʻahinga pehē naʻe paniʻaki ʻa e laumālié ko e “haʻa fili, ko e tuʻunga taulaʻeiki fakatuʻi, ko e kakai tapu.” (1 Pita 1:​1, 2; 2:​9, fakaʻītali ʻamautolu.) ʻE ʻave ʻe he ʻOtuá ʻa e faʻahinga pehē kuo filí ki hēvani ke nau pule fakataha ai mo Sīsū.​—Kolose 1:​1, 2; 3:​12; Taitusi 1:1; Fakahā 17:14.

13. Ko e hā ʻa e ʻuhinga naʻe maʻu nai ʻi he ngaahi lea ʻa Sīsū ʻia Mātiu 24:22?

¹³ ʻOku ʻaonga ʻa hono ʻiloʻi fakapapau ko ʻeni ʻa e faʻahinga filí, koeʻuhi he naʻe tomuʻa tala ʻe Sīsū ʻe fakanounou ʻa e ngaahi ʻaho ʻo e mamahí “telia ʻa e kakai fili.” Ko e foʻi lea faka-Kalisi naʻe liliuʻi ko e “telia ʻa e” ʻoku lava ke toe fakalea ia ko e “koeʻuhi pē ko e” pe “koeʻuhiā ko. ” (Maʻake 2:​27; Sione 12:30; 1 Kolinitō 8:​11; 9:​10, 23; 11:9; 2 Tīmote 2:​10; Fakahā 2:3) Ko ia naʻe lava ke pehē ʻe Sīsū, ‘Kapau ʻoku ʻikai fakanounou ʻa e ngaahi ʻaho ko iá, ʻoku ʻikai ha kakano ʻoku fakahaofi; ka koeʻuhi pē ko e kakai filí ʻe fakanounou ai ʻa e ngaahi ʻaho ko iá.’c (Mātiu 24:​22, NW) Naʻe ʻi ai ha meʻa naʻe hoko ʻa ia naʻe ʻaongá, pe ‘koeʻuhi pē ko e’ kau Kalisitiane ʻa e faʻahinga fili naʻe fihia ʻi Selusalemá?

14. Naʻe fakahaofi fēfē ʻa e “kakano” ʻi he taimi naʻe holomui taʻeʻamanekina ai ʻa e kau Lomá mei Selusalema ʻi he 66 T.S.?

¹⁴ Manatuʻi ʻi he 66 T.S., naʻe hū holo ai ʻa e kau Lomá ʻi he fonuá, ʻo nau kapa ʻa e konga ki ʻolunga ʻo Selusalemá, pea nau kamata keli ʻa e ʻaá. ʻOku fakamatala ʻe Josephus: “Kapau pē naʻá ne kītaki ʻo kiʻi fuoloa ange ʻi hono ʻākoloʻí naʻá ne mei maʻu pē ʻe ia ʻa e Koló ʻi he taimi pē ko iá.” ʻEke hifo kiate koe, ‘Ko e hā naʻe liʻaki fakafokifā ai ʻe he kau tau mālohi Lomá ʻa e feingataú pea “mavahe taʻeʻuhinga” ʻo holomuí?’ Ko Rupert Furneaux, ko ha mataotao ʻi hono fakamatalaʻi ʻa e hisitōlia fakakautaú, naʻá ne pehē: “ʻOku ʻikai ha faihisitōlia kuo lavameʻa ʻi hono ʻomi ha faʻahinga ʻuhinga feʻunga pē ki he fili faikehe mo fakalilifu ʻa Gallus.” Pe ko e hā pe hono ʻuhingá, ko hono olá naʻe fakanounou ʻa e mamahí. Naʻe holomui ʻa e kau Lomá, fakataha mo hono ʻohofi kinautolu ʻe he kau Siú ʻi heʻenau ʻalú. Fēfē ʻa e kau Kalisitiane pani ko e “kakai fili” ʻa ia naʻa nau fihiá? Ko e hiki ʻo e ʻākoloʻí naʻe ʻuhingá naʻa nau hao ai mei ha fakaʻauha pē ʻokú ne fakamanaʻi kinautolu ʻi he lolotonga ʻo e mamahí. Mei hení, ko e kau Kalisitiane ko ia naʻa nau maʻu ʻa e ʻaonga mei he fakanounou ʻo e mamahí ʻi he 66 T.S. ko kinautolu ia ʻa e “kakano” naʻe fakahaofi ʻoku lave ki ai ʻi he Mātiu 24:22.

Ko e Hā ʻOku ʻi Ho Kahaʻú?

15. Ko e hā te ke pehē ai ʻoku totonu ke tautefito ʻa e mahuʻingaʻia ʻi he Mātiu vahe 24 ʻi hotau taimí?

¹⁵ ʻE ʻeke nai ʻe ha taha, ‘Ko e hā ʻoku totonu ai ke u mahuʻingaʻia tautefito ʻi he mahino māʻalaʻala ko ʻeni ki he ngaahi lea ʻa Sīsuú?’ Sai, ʻoku ʻi ai ʻa e ʻuhinga feʻunga ke fakaʻosiʻaki ʻo pehē ko e kikite ʻa Sīsuú naʻe pau ke ʻi ai hano fakahoko lahi ange, ʻo fakalaka atu ia ʻi he meʻa naʻe hokó pea kau ai ʻa e 70 T.S.d (Fakafehoanaki mo Mātiu 24:7; Luke 21:​10, 11; Fakahā 6:​2-8.) Kuo malangaʻi ʻe he Kau Fakamoʻoni ʻa Sihová, ʻi he ngaahi hongofuluʻi taʻu, ko e fakahoko lahi ko ia ʻoku hoko ʻi hotau taimí ʻokú ne fakamoʻoniʻi ai ʻoku lava ke tau ʻamanekina ha “mamahi lahi” lahi ʻaupito ʻoku panaki mai mei muʻa. ʻI he lolotonga ʻo iá, ʻe anga-fēfē ʻa hono fakahoko ʻa e ngaahi lea fakaekikite ʻia Mātiu 24:22?

16. Ko e hā ʻa e moʻoni fakalototoʻa ʻoku ʻomai ʻia Fakahā ʻo kau ki he mamahi lahi ʻoku panaki maí?

¹⁶ Hili ʻa e taʻu ʻe uofulu nai hili ʻa e mamahi ʻi Selusalemá, naʻe tohi ai ʻe he ʻaposetolo ko Sioné ʻa e tohi Fakahaá. Naʻá ne fakapapauʻi ai ʻa e mamahi lahi ko ia ʻoku toka mei muʻá. Pea ʻi he hoko ʻo mahuʻingaʻia ʻi he meʻa ʻokú ne uesia fakafoʻituitui kitautolú, ʻoku tau fiefia nai ai ke ʻilo ʻoku fakapapauʻi fakaekikite mai kiate kitautolu ʻe he tohi Fakahaá ʻe hao moʻui ʻa e kakano moʻui ʻi he mamahi lahi ko ʻeni ʻoku panaki maí. Naʻe tomuʻa tala ʻe Sione “ko e fuʻu kakai lahi . . . mei he puleʻanga kotoa pē, mo e ngaahi matakali, mo e ngaahi faʻahinga, mo e ngaahi lea.” Ko hai kinautolu? ʻOku tali mai ʻe ha leʻo mei he langí: “Ko eni ia ʻakinautolu ʻoku haʻu mei he mamahi lahi.” (Fakahā 7:​9, 14) ʻIo, ko kinautolu ia ʻa e kau haó! ʻOku toe ʻomai ʻia Fakahā kiate kitautolu ʻa e ʻiloʻilo ki he founga ʻo e hoko ʻa e ngaahi meʻá ʻi he mamahi lahi ʻoku panaki maí mo e founga ʻe fakahoko ai ʻa Mātiu 24:22.

17. Ko e hā ʻe kau ʻi he konga ʻuluaki ʻo e mamahi lahí?

¹⁷ Ko e konga ʻuluaki ʻo e mamahi ko ʻení ko hano ʻohofi ʻo ha fuʻu paʻumutu tuʻu fakaefakaʻilonga ʻoku ui ko “Babilone koe Lahi.” (Fakahā 14:​8, PM; 17:​1, 2, PM) ʻOkú ne fakafofonga ʻa e ʻemipaea ʻo e lotu loí ʻi māmani lahi, fakataha mo Puleʻanga-Haʻa-Kalisitiane ko ia ʻoku pango tahá. Fakatatau ki he ngaahi lea ʻia Fakahā 17:​16-​18, ʻe fakalotoʻi ʻe he ʻOtuá ʻa e loto ʻo e ngaahi ʻelemēniti fakapolitikalé ke ʻohofi ʻa e fuʻu feʻauaki tuʻu fakaefakaʻilonga ko ʻení.e Fakakaukau atu ki he founga ʻa ia ʻe lava ke hā ki he “kakai fili” ʻosi pani ʻa e ʻOtuá pea mo honau tākangá, ko e “fuʻu kakai lahi.” ʻI he fakautuutu ʻa e ʻohofi fakaʻauha ko ʻeni ʻo e lotú, ʻe hā ngali te ne toʻo atu ʻa e ngaahi kautaha fakalotu kotoa pē, ʻo kau ai ʻa e kakai ʻa Sihová.

18. Ko e hā ʻoku hā ngali ʻe ʻikai ai ha “kakano” ʻe fakahaofi ʻi he konga ʻuluaki ʻo e mamahi lahí?

¹⁸ Ko e taimi ʻeni ʻe fakahoko ai ʻa e ngaahi lea ʻa Sīsū ʻia Mātiu 24:22 ʻi ha tuʻunga lahi ʻaupito. Hangē pē ko e hā ngali fakatuʻutāmaki ki he kakai fili ʻi Selusalemá, ko e kau sevāniti ʻa Sihová ʻe hā ngali te nau ʻi he fakatuʻutāmaki ʻi hano toʻo atu ʻi he lolotonga hono ʻohofi ʻo e lotú, ʻo hangē pē ka toʻo atu ʻi he ʻohofi ko iá ʻa e “kakano” kotoa ʻo e kakai ʻa e ʻOtuá. Neongo ia, tau tauhi maʻu ʻi heʻetau fakakaukaú ʻa e meʻa naʻe hoko ʻi muʻa ʻi he 66 T.S. Ko e mamahi naʻe fakatupunga ʻe he kau Lomá naʻe fakanounou, ʻo fakaʻatā ai ki he kakai fili ʻosi pani ʻa e ʻOtuá ha faingamālie feʻunga ke hola ai pea nau toe, ʻo moʻui. Ko ia ai, ʻoku lava ke tau tuipau ko e ʻohofi fakaʻauha ko ia ʻo e lotú ʻe ʻikai ke fakaʻatā ai ke tāmateʻi ʻosi ʻa e fakatahaʻanga fakalūkufua ʻo e kau lotu moʻoní. ʻE hoko vave ia, ʻo hangē pē “ʻi ha ʻaho pe taha.” Neongo ia, pe ko e hā pē ha founga, ʻe fakanounou ia, ʻe ʻikai fakaʻatā ia ke fakakakato ʻa ʻene taumuʻá, koeʻuhi ke lava ʻo “fakahaofi” ʻa e kakai ʻa e ʻOtuá.​—Fakahā 18:8.

19. (a) Hili ʻa e konga ʻuluaki ʻo e mamahi lahí, ko e hā ʻe hā mahinó? (e) Ko e hā ʻe iku ki ai ʻi he meʻá ni?

¹⁹ Ko e ngaahi ʻelemēniti kehe ʻo e kautaha fakaemāmani ʻa Sētane ko e Tēvoló ʻi he hili iá te nau hokohoko atu ʻi ha taimi, ʻo nau tēngihia ʻi he mole ʻo ʻenau feangainga mo ʻenau fuʻu feʻauaki fakalotu motuʻá. (Fakahā 18:​9-​19) ʻE aʻu ki ha tuʻunga, te nau fakatokangaʻi hake ʻoku kei toe pē ʻa e kau sevāniti moʻoni ʻa e ʻOtuá, “ʻoku nofo nonga honau kotoa: ʻOku nofo taʻehanau ʻa” pea hā ngali faingofua ke maʻu. He toki meʻa fakaʻohovale ē ʻe hokó! ʻI he tali ki ha fakamanamana pe ʻohofi moʻoni ʻo ʻene kau sevānití, ʻe tuʻu hake ʻa e ʻOtuá ʻi hono fakamāuʻi hono ngaahi filí ʻi he konga fakaʻosi ʻo e mamahi lahí.​—ʻIsikeli 38:​10-​12, 14, 18-​23.

20. Ko e hā ʻe ʻikai tuku ai ʻa e kakai ʻa e ʻOtuá ki ha fakatuʻutāmaki ʻi he konga hono ua ʻo e mamahi lahí?

²⁰ Ko e konga hono ua ko ʻeni ʻo e mamahi lahí ʻe huʻufataha ia mo e meʻa naʻe hoko ki Selusalema mo e faʻahinga naʻa nau nofoʻí ʻi he ʻohofi hono ua ko ia naʻe fai ʻe he kau Lomá ʻi he 70 T.S. ʻE fakamoʻoniʻi ai ʻe hoko ʻa e “mamahi lahi, ʻa ia kuo teʻeki hano tatau mei he kamataʻanga ʻo mamani ʻo aʻu mai ki he [taimi ko iá], ʻoi, pea ʻe ʻikai ʻaupito toe ʻi ai.” (Mātiu 24:21) Neongo ia, ʻoku lava ke tau tuipau, ko e kakai fili ʻa e ʻOtuá mo honau takangá ʻe ʻikai te nau ʻi he feituʻu fakatuʻutāmakí, ʻo ʻi ha tuʻunga ai ke nau mate. Seuke, kuo pau ʻe ʻikai te nau hola ki ha feituʻu ʻe taha fakasiokālafi. Ko e kau Kalisitiane ʻi he ʻuluaki senitulí ʻi Selusalemá naʻe lava ke nau hola mei he kolo ko iá ki he feituʻu moʻungá, hangē ko ia ko Pella ʻi he tafaʻaki ʻo Sioataní. Kae kehe, ʻi he kahaʻú, ko e kau Fakamoʻoni anga-tonu ʻa e ʻOtuá te nau ʻi he feituʻu kotoa pē ʻo e kolopé, ko ia ko e haoʻangá mo e maluʻangá ʻe ʻikai fakatuʻunga ia ʻi ha feituʻu fakasiokālafi.

21. Ko hai ʻe faitau ʻi he tau fakaʻosí, pea ko e hā hono olá?

²¹ Ko e fakaʻauhá ʻe ʻikai fai ia ʻe he kau tau ʻa Lomá pe ko ha toe fakafofonga fakaetangata kehe. ʻI hono kehé, ʻoku fakamatalaʻi ʻi he tohi Fakahaá ko e kau tau fakahoko tauteá te nau hoko mai mei hēvani. ʻIo, ko e konga fakaʻosi ko ia ʻo e mamahi lahí ʻe fakahoko ia, ʻikai ʻe ha kau tau fakaetangata pē, ka ko “Folofola ʻa e ʻOtua,” ʻa e Tuʻi ko Sīsū Kalaisí, ʻi hono tokoniʻi ia ʻe he ‘ngaahi matatau ʻoku ʻi he langí’ ʻo kau ai ʻa e kau Kalisitiane pani kuo ʻosi toetuʻú. Ko e “Tuʻi ʻo e ngaahi Tuʻi, mo e ʻEiki ʻo e ngaahi ʻEiki” te ne fakahoko ha fakaʻauha ʻe fakaʻāuliliki mamaʻo ange ia ʻi he meʻa naʻe fai ʻe he kau Lomá ʻi he 70 T.S. Te ne toʻo atu ʻa e kau fakafepaki kotoa ki he ʻOtuá ʻi he faʻahinga ʻo e tangatá​—ko e ngaahi tuʻi, ngaahi ʻeikitau, ko e tauʻatāina mo e pōpula, ʻa e iiki mo e lalahi. Naʻa mo e ngaahi kautaha fakaetangata ʻo e māmani ʻa Sētané te nau hoko ki honau ngataʻangá.​—Fakahā 2:​26, 27; 17:14; 19:​11-​21; 1 Sione 5:​19.

22. ʻI he ʻuhinga lahi ange fē ʻe fakahaofi ai ʻa e “kakano”?

²² Manatuʻi ko e “kakano” ko iá, fakatouʻosi ʻa e toenga ʻo e kau paní mo e “fuʻu kakai lahi,” te nau ʻosi hao ʻi he taimi ʻe mole hifo vave ʻaupito ai mo fakaʻaufuli ʻa Pāpilone ko e Lahi ʻi he ʻuluaki konga ʻo e mamahí. ʻE tatau tofu pē mo ia ʻi he konga fakaʻosi ʻo e mamahí, ko e “kakano” ko ia kuo hola ki he tafaʻaki ʻa Sihová ʻe fakahaofi. He toki faikehekehe ē ko ʻeni mo e meʻa naʻe hoko ki he kau Siu angatuʻu ʻi he 70 T.S.!

23. Ko e hā ʻe lava ke fakatuʻotuʻa atu ki ai ʻa e “kakano” ʻe haó?

²³ ʻI he fakakaukau ki he ngaahi meʻa ʻe malava ki ho kahaʻú tonu pea pehē ki he faʻahinga ko ia ʻokú ke ʻofa aí, fakatokangaʻi ʻa e meʻa ʻoku talaʻofa mai ʻi he Fakahā 7:​16, 17: “ʻE ʻikai te nau toe fiekaia, ʻumaʻā haʻanau toe fieinua, ʻumaʻā ha momoʻi lave kiate kinautolu ʻa e laʻā, pē ko e ngaahi meʻa fakavelehia. He ko e Lami ʻoku ʻi he loto taloni te ne tauhi kinautolu ʻo hangē ha fanga sipi, pea te ne tataki kinautolu ki he ngaahi matavai ʻo e Vaiola: pea ʻe holoholo ʻe he ʻOtua ʻa e loʻimata kotoa pē mei honau mata.” ʻOku papau, ko e “fakahaofi” moʻoní ia ʻi ha ʻuhinga fakaofo, ʻoku tuʻuloa.

[Fakamatala ʻi lalo]

ʻE Fēfē Haʻo Tali?

◻ Ko e hā ʻa e ongo tafaʻaki ʻe ua naʻe ʻi ai ʻi hono ʻohofi ʻo Selusalema ʻe he kau tau Lomá?

◻ Ko e hā ʻoku ʻikai ke ngalingali ai ko e kau Siu naʻe hao ʻe toko 97,000 ʻi he 70 T.S. ʻa e “kakano” naʻe lave ki ai ʻia Mātiu 24:22?

◻ Naʻe anga-fēfē hono fakanounou ʻa e ngaahi ʻaho ʻo e mamahi ʻa Selusalemá, pea ko ia ai naʻe fēfē hono fakahaofi ʻo e “kakano”?

◻ ʻI he mamahi lahi ʻoku tuʻunuku maí, ʻe anga-fēfē hono fakanounou ʻo e ngaahi ʻahó mo fakahaofi ʻa e “kakano”?

[Fakatātā ʻi he peesi 10]

Naʻe faʻu ʻa e koini Siu ʻi he hili ʻa e angatuʻú. Ko e mataʻitohi faka-Hepelū ʻoku pehē ai ko e “Taʻu hono ua,” ʻoku ʻuhinga iá ki he 67 T.S., ko e taʻu ia hono ua ʻo ʻenau tauʻatāiná

[Maʻuʻanga ʻo e Tā]

Pictorial Archive (Near Eastern History) Est.

[Fakatātā ʻi he peesi 11]

Ko e koini Loma naʻe faʻu ʻi he 71 T.S. ʻI he toʻohemá ko ha tokotaha Loma ʻi hono teungatau; ʻi he toʻomataʻú ko ha Siu ʻi heʻene mamahí. Ko e ongo foʻi lea ko e “IVDAEA CAPTA” ʻoku ʻuhingá ko e “Siutea Pōpula”

[Maʻuʻanga ʻo e Tā]

Pictorial Archive (Near Eastern History) Est.