Ko e Hā ke Kātoangaʻi Ai ʻa e Kai Efiafi ʻa e ʻEikí?

“Naʻa ku maʻu ʻe au mei he ʻEiki ʻa ia ā ne u tuku atu.”—1 KOLINITO 11:23.

1, 2. Ko e hā naʻe fai ʻe Sīsū ʻi he pō ʻo e Pāsova ʻo e 33 T.S.?

NAʻE ʻi ai ʻa e ʻAlo-tofu-pē-taha-ne-fakatupu ʻo Sihová. Pehē foki ki he kau tangata ʻe toko 11 ‘kuo nofo maʻu mo ia ʻi hono ʻahiʻahí.’ (Luke 22:28) Ko e efiafi Tuʻapulelulu ia, Maʻasi 31, 33 T.S., pea ʻoku mātuʻaki ngalingali naʻe fakateungaʻaki ʻa e langí ha māhina kātoa ʻi ʻolunga ʻi Selusalema. Ko e toki fakaʻosiʻosi ia ʻe Sīsū Kalaisi mo ʻene kau ʻapositoló ʻa e kātoanga Pāsová. Kuo ʻosi tukuange ʻa e tokotaha lavaki ia ko Siutasi ʻIsikalioté, ka naʻe teʻeki taimi ki he niʻihi kehé ke nau mavahe. Ko e hā hono ʻuhingá? Koeʻuhí naʻe teu ʻa Sīsū ke fai ha meʻa naʻe mātuʻaki mahuʻinga. Ko e hā ia?

² Koeʻuhi naʻe ʻi ai ʻa e tokotaha-tohi Kōsipeli ko Mātiú, tau tuku ke ne tala mai. Naʻá ne tohi: “Naʻe toʻo ʻe Sisu ha foʻi ma, ʻo ne tapuaki ia, mo ne pakipaki ʻo tufaki ki he kau ako, ʻo ne pehe, Toʻo ʻo kai; ko hoku sino ʻeni. Naʻa ne toʻo foki ha ipu, mo ne fakafetaʻi, ʻo ne ʻange kiate kinautolu, mo ne pehe, Mou inu kotoa pe mei ai; he ko hoku toto ʻeni ko e toto fuakava, ʻa ia ʻoku lilingi koeʻuhi ko e tokolahi ke lava ai ʻa e fakamolemole angahala.” (Mātiu 26:​26-28) ʻE hoko eni ko ha meʻa ke tā tuʻo taha? Ko e hā hono mahuʻingá? ʻOku ʻi ai hano ʻuhinga kia kitautolu he ʻaho ní?

“Mou Fai ʻEni”

 3. Ko e hā ʻoku mahuʻinga ai ʻa e meʻa naʻe fai ʻe Sīsū ʻi he pō ko ia ʻo Nīsani 14, 33 T.S.?

³ Ko e sitepu naʻe fou ai ʻa Sīsū Kalaisi ʻi he pō ʻo Nīsani 14, 33 T.S., naʻe ʻuhinga lahi ange ia ʻi ha meʻa pē naʻe hokonoa ʻi heʻene moʻuí. Naʻe lāulea ʻa e ʻapositolo ko Paulá ki ai ʻi he taimi naʻá ne tohi ai ki he kau Kalisitiane pani ʻi Kolinitoó, ʻa ia naʻe kei fai ai ʻa e muimui ki he sīpinga ko iá ʻo laka hake ʻi he taʻu ʻe 20 ki mui. Neongo naʻe ʻikai ke ʻi ai ʻa Paula ʻia Sīsū pea mo e kau ʻapositolo ʻe toko 11 ʻi he 33 T.S., naʻá ne ako moʻoni mei he niʻihi ʻo e kau ʻapositoló ʻa e meʻa naʻe hoko ʻi he taimi ko iá. ʻIkai ko ia pē, naʻe maʻu moʻoni ʻe Paula ʻa e fakapapauʻi ʻo e ngaahi tafaʻaki ʻo e meʻa naʻe hoko ko iá fakafou ʻi ha meʻa fakahā naʻe fakamānavaʻi. Naʻe pehē ʻe Paula: “Naʻa ku maʻu ʻe au mei he ʻEiki ʻa ia ā ne u tuku atu, ʻo pehe, Ko e ʻEiki ko Sisu, ʻi he po ko ia naʻe fai ai hono lavakiʻi, naʻa ne toʻo ha ma: pea hili ʻene fakafetaʻia, naʻa ne pakipaki, ʻo ne meʻa, Ko hoʻóku ʻeni sino, ʻa ia ʻoku maʻamoutolu: mou fai pehe mōku fakamanatu. Pehe foki ʻene toʻo ʻa e ipu, hili ʻa e ʻohomohe, ʻo ne meʻa, Ko e ipu ni, ko e fuakava foʻou ia ʻoku faiʻaki hoku toto: ʻilonga haʻamou inu ia, fai pehe mōku fakamanatu.”—1 Kolinito 11:​23-25.

 4. Ko e hā ʻoku totonu ai ke kātoangaʻi ʻe he kau Kalisitiané ʻa e Kai Efiafi ʻa e ʻEikí?

⁴ ʻOku fakapapauʻi mai ʻe he tokotaha-tohi Kōsipeli ko Luké naʻe fekauʻi ʻe Sīsū: “Mou fai ʻeni mōku fakamanatu.” (Luke 22:19) Ko e ngaahi lea ko ení kuo toe liliu ia: “Fai eni i he fakamanatu kiate au.” (PM) Ko hono moʻoní, ko e kātoanga ko ení ʻoku faʻa lave ki ai ko e Fakamanatu ʻo e pekia ʻa Kalaisí. ʻOku toe ui ia ʻe Paula ko e Kai Efiafi ʻa e ʻEikí​—ko ha fakalea feʻungamālie ia, koeʻuhí naʻe fokotuʻu eni ʻi he poʻulí. (1 Kolinito 11:20) ʻOku fekauʻi ʻa e kau Kalisitiané ke nau kātoangaʻi ʻa e Kai Efiafi ʻa e ʻEikí. Ka ko e hā naʻe fokotuʻu ai ʻa e kātoanga ko ení?

ʻUhinga Naʻe Fokotuʻu Aí

5, 6. (a) Ko e hā ʻa e ʻuhinga ʻe taha naʻe fokotuʻu ai ʻe Sīsū ʻa e Fakamanatú? (e) ʻOmai ha toe ʻuhinga ʻe taha ki he ʻuhinga naʻe fokotuʻu ai ʻa e Kai Efiafi ʻa e ʻEikí.

⁵ Ko e taha ʻo e ʻuhinga naʻe fokotuʻu ai ʻa e Fakamanatú he naʻe felāveʻi ia mo e taumuʻa ʻe taha naʻe fakahoko ʻe he pekia ʻa Sīsuú. Naʻá ne pekia ko e tokotaha pouaki ʻo e tuʻunga-hau ʻo ʻene Tamai fakahēvaní. Naʻe fakamoʻoniʻi ai ʻe Kalaisi ko Sētane ko e Tēvoló, ʻa ia kuó ne tukuakiʻi loi ko e tauhi pē ʻa e tangatá ki he ʻOtuá ʻi he ngaahi taumuʻa siokitá, ko e tokotaha loi. (Siope 2:​1-5) Ko e pekia ʻa Sīsū ʻi he faitōnungá naʻe fakamoʻoniʻi ai ʻoku hala ʻa e tukuakiʻi ko ení pea naʻá ne ʻai ai ʻa e loto ʻo Sihová ke fiefia.​—Palovepi 27:11.

⁶ Ko e toe ʻuhinga ʻe taha naʻe fokotuʻu ai ʻa e Kai Efiafi ʻa e ʻEikí ke fakamanatu kia kitautolu ʻi he fakafou ʻi heʻene pekia ko e tangata haohaoa mo taʻeangahalá, ko Sīsuú naʻe “tuku ʻene moʻui ke huhuʻiʻaki ha tokolahi.” (Mātiu 20:28) ʻI he faiangahala ʻa e ʻuluaki tangatá ki he ʻOtuá, naʻá ne fakamoleki ai ʻa e moʻui fakaetangata haohaoá pea mo hono ngaahi ʻamanakí kotoa. Kae kehe, naʻe pehē ʻe Sīsū: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) Ko e moʻoni, “koe totogi oe agahala koe mate; ka koe moui taegata koe foaki ofa ia ae Otua ia Jisu Kalaisi ko ho tau Eiki.” (Loma 6:​23, PM) Ko e fakamanatu ʻo e Kai Efiafi ʻa e ʻEikí ʻokú ne fakamanatu ai kia kitautolu ʻa e ʻofa lahi naʻe fakahāhaaʻi fakatouʻosi ʻe Sihova mo hono ʻAló ʻi he fekauʻaki mo e pekia fakaefeilaulau ʻa Sīsuú. He totonu ē ko kitautolu ke fakahoungaʻi ʻa e ʻofa ko iá!

Kātoangaʻi Ia ʻAfē?

 7. ʻOku anga-fēfē ʻa e “toutou” maʻu ʻinasi ʻa e kau Kalisitiane paní ʻi he Fakamanatú?

⁷ Fekauʻaki mo e Kai Efiafi ʻa e ʻEikí, naʻe pehē ʻe Paula: “ʻIlonga haʻamou [“toutou,” NW] kai ʻa e ma ni mo inu ʻi he ipu, ʻoku mou fakaha ʻa e pekia ʻa e ʻEiki kaeʻoua ke ne hoko mai.” (1 Kolinito 11:26) Ko e kau Kalisitiane pani tāutahá te nau maʻu ʻinasi ʻi he ongo meʻa fakaefakatātā ʻo e Fakamanatú kae ʻoua kuo nau mate. Ko ia ai, ʻi he ʻao ʻo Sihova ko e ʻOtuá mo e māmaní, te nau hokohoko fakahāhā ai ʻenau tui ki he tokonaki ʻa e ʻOtuá fekauʻaki mo e feilaulau huhuʻi ʻa Sīsuú.

 8. Ko e hā hono fuoloa ʻe hanga ai ʻe he kulupu ʻo e kau paní ʻo kātoangaʻi ʻa e Kai Efiafi ʻa e ʻEikí?

⁸ Ko e hā hono fuoloa ʻe hanga ai ʻe he kulupu ʻo e kau Kalisitiane paní ʻo kātoangaʻi ʻa e Fakamanatu ʻo e pekia ʻa Kalaisí? “Kaeʻoua ke ne hoko mai,” ko e lea ia ʻa Paulá, ʻo ʻuhinga mahino ia ko e ngaahi kātoanga ko ení ʻe hokohoko atu ia kae ʻoua kuo hoko mai ʻa Sīsū ke maʻu atu hono kau muimui paní ki hēvani fou ʻi ha toetuʻu lolotonga ʻene “ʻi aí.” (1 Tesalonaika 4:​14-17, NW) ʻOku fehoanakimālie eni mo e ngaahi lea ʻa Sīsū ki he kau ʻapositolo mateaki ʻe toko 11: “Neongo te u ʻalu ʻo teuteu ha potu moʻomoutolu, ka ʻoku ou toe haʻu pe, pea te u maʻu kimoutolu kiate au; koeʻuhi ko e potu ʻoku ou ʻi ai, ke mou ʻi ai foki.”—Sione 14:3.

 9. Ko e hā ʻoku ʻuhinga ki ai ʻa e ngaahi lea ʻa Sīsū ʻoku lēkooti ʻi he Maake 14:25?

⁹ ʻI he taimi naʻe fokotuʻu ai ʻe Sīsū ʻa e Fakamanatú, naʻá ne lave ai ki he ipu uainé mo ne tala ki heʻene kau ʻapositolo faitōnungá: “ʻE ʻikai ʻaupito te u toe inu mei he fua ʻo e vaine, ʻo aʻu ki he ʻaho ko ia te u toki inu ia kuo foʻou ʻi he Puleʻanga ʻo e ʻOtua.” (Maake 14:25) Koeʻuhi ʻe ʻikai ke inu ʻe Sīsū ia ha uaine moʻoni ʻi hēvani, ʻoku hā mahino naʻá ne fakakaukau ki he fiefia ʻoku fakatātaaʻi ʻi he taimi ʻe niʻihi ʻe he uainé. (Sāme 104:15; Koheleti 10:19) Ko e hoko ʻo fakataha ʻi he Puleʻangá ʻe hoko ia ko ha hokosia fakafiefia naʻá ne ʻunaloto ki ai mo hono kau muimui molomolo muivaʻé ʻi ha fakatuʻamelie lahi.​—Loma 8:23; 2 Kolinito 5:2.

10. ʻOku totonu ke toutou kātoangaʻi tuʻo fiha ʻa e Fakamanatú?

¹⁰ ʻOku totonu ke fakamanatu ʻa e pekia ʻa Sīsuú ʻo fai fakamāhina, fakauike, naʻa mo e fakaʻaho? ʻIkai. Naʻe fokotuʻu ʻe Sīsū ʻa e Kai Efiafi ʻa e ʻEikí pea naʻe fakapoongi ia ʻi he ʻaho ʻo e Pāsová, ʻa ia naʻe kātoangaʻi “ke fakamanatu” hono fakatauʻatāina ʻo ʻIsileli mei he hopoate ki ʻIsipite ʻi he 1513 K.M. (Ekisoto 12:​14, PM) Ko e Pāsová naʻe fai tuʻo taha pē ʻi he taʻu, ʻi he ʻaho hono 14 ʻo e māhina faka-Siu ko Nīsani. (Ekisoto 12:​1-6; Livitiko 23:5) ʻOku fakahaaʻi ʻe he meʻá ni ko e pekia ʻa Sīsuú ʻoku totonu ke fakamanatu pē ia ʻo toutou fai hangē ko e Pāsová​—ʻo fakataʻu​—ʻikai fakamāhina, fakauike, pe fakaʻaho.

11, 12. Ko e hā ʻoku fakaeʻa ʻe he hisitōliá fekauʻaki mo e ngaahi ʻuluaki fakamanatu ʻo e Fakamanatú?

¹¹ Ko ia ai, ʻoku feʻungamālie ke kātoangaʻi ʻa e Fakamanatú ʻo fakataʻu ʻi Nīsani 14. ʻOku pehē ʻe ha maʻuʻanga fakamatala ʻe taha: “Ko e kau Kalisitiane ʻo ʻĒsia Mainá naʻe ui kinautolu ko e Kau Kuatatesimani [Kau ʻAho-Taha-Fā] mei heʻenau angaʻaki ko ia hono kātoangaʻi ʻo e pascha [Kai Efiafi ʻa e ʻEikí] ʻo fai tuʻumaʻu ʻi hono 14 ʻo Nīsaní . . . Ko e ʻaho ko iá ʻe tō nai ʻi he Falaite pe ko ha ʻaho kehe pē ʻo e uiké.”​—The New Schaff-Herzog Encyclopedia of Religious Knowledge, Voliume IV, peesi 44.

¹² ʻI he lave fekauʻaki mo e tōʻonga ʻo e senituli hono ua T.S., ʻoku pehē ʻe he faihisitōlia ko J. L. von Mosheim ko e kau Kuatatesimaní naʻa nau kātoangaʻi ʻa e Fakamanatú ʻi Nīsani 14 koeʻuhí “naʻa nau pehē ko e faʻifaʻitakiʻanga ʻa Kalaisí ʻokú ne maʻu ʻa e mālohi ʻo ha lao.” ʻOku pehē ʻe ha faihisitōlia ʻe taha: “Ko hono ngāueʻaki ʻe he ngaahi siasi Kuatatesimani ʻo ʻĒsiá naʻe hokohoko ia hangē ko e siasi Selusalemá. ʻI he senituli hono 2 ko e ngaahi siasi ko ení ʻi heʻenau Pascha ʻi hono 14 ʻo Nīsaní naʻa nau fakamanatu ai ʻa e huhuʻi naʻe fakahoko ʻe he pekia ʻa Kalaisí.”​—Studia Patristica, Voliume V, 1962, peesi 8.

ʻUhinga ʻo e Maá

13. Ko e hā ʻa e faʻahinga mā naʻe ngāueʻaki ʻe Sīsū ʻi he taimi naʻá ne fokotuʻu ai ʻa e Kai Efiafi ʻa e ʻEikí?

¹³ ʻI he taimi naʻe fokotuʻu ai ʻe Sīsū ʻa e Fakamanatú, “naʻa ne toʻo ha foʻi mā, ʻo ne tapuaki ia, mo ne pakipaki, ʻo ne ʻange [ki he kau ʻapositoló].” (Maake 14:22) Ko e mā naʻe ala maʻu ʻi he taimi ko iá ko e mā ko ia naʻe toki ʻosi ngāueʻaki ki he Pāsová. (Ekisoto 13:​6-10) Koeʻuhi naʻe taʻo ia ʻo taʻelēvani, naʻe lafalafa ia mo mapakipakingofua pea naʻe pau ke pakipaki ia ki hono tufotufá. ʻI he taimi naʻe fakalahi fakaemana ai ʻe Sīsū ʻa e mā ki he toko laui afé, naʻe hangē mo ia foki ha mā pakupakú, he naʻá ne paki ia ke lava ʻo tufotufa. (Mātiu 14:19; 15:36) ʻOku hā mahino leva, ko hono pakipaki ʻa e mā ʻo e Fakamanatú ʻoku ʻikai hano ʻuhinga fakalaumālie ʻona.

14. (a) Ko e hā ʻoku feʻungamālie ai ke taʻelēvani ʻa e mā ʻo e Fakamanatú? (e) Ko e hā ʻa e faʻahinga mā ʻe lava ke maʻu pe taʻo ke ngāueʻaki ki he Kai Efiafi ʻa e ʻEikí?

¹⁴ Fekauʻaki mo e mā naʻe ngāueʻaki ʻi hono fokotuʻu ʻo e Fakamanatú, naʻe pehē ʻe Sīsū: “Ko hoʻóku ʻeni sino, ʻa ia ʻoku maʻamoutolu.” (1 Kolinito 11:24; Maake 14:22) Naʻe feʻungamālie ʻa e taʻelēvani ʻa e maá. Ko e hā hono ʻuhingá? Koeʻuhí ko e lēvaní ʻoku lava ke ʻuhinga ia ko e kovi, fulikivanu, pe angahala. (1 Kolinito 5:​6-8) ʻOku fakafofongaʻi ʻe he maá ʻa e sino fakaetangata haohaoa mo taʻeangahala ʻo Sīsuú, ʻa ia naʻe ʻoatu feʻungamālie ko ha feilaulau huhuʻí. (Hepelu 7:26; 10:​5-10) ʻOku manatuʻi eni ʻe he Kau Fakamoʻoni ʻa Sihová pea ʻoku nau muimui ki he faʻifaʻitakiʻanga naʻe fokotuʻu ʻe Sīsuú ʻaki hono ngāueʻaki ʻa e mā taʻelēvani ʻi he ngaahi kātoanga Fakamanatú. ʻI he ngaahi tuʻunga ʻe niʻihi, ʻoku nau ngāueʻaki ʻa e mā-pakupaku taʻelēvani faka-Siú ʻa ia ʻoku ʻikai toe tānaki ki ai ha ngaahi meʻa, hangē ko e onioní pe fuaʻi moá. Ka ʻikai ia, ʻe lava ke ngaohi ha mā taʻelēvani ʻaki ha kiʻi meʻi mahoaʻa melomelo (ʻo ka malava, ko e mahoaʻa uite) ʻo heuʻaki ha kiʻi meʻi vai. Ko e toú ʻoku totonu ke lolaʻi ia ke manifi pea ʻe lava ke taʻo ia ʻi ha laulau taʻo mā kuo kiʻi vali lolo kae ʻoua kuo mōmoa mo pakupaku ʻa e maá.

ʻUhinga ʻo e Uainé

15. Ko e hā naʻe ʻi he ipu naʻe ngāueʻaki ʻi he taimi naʻe fokotuʻu ai ʻe Kalaisi ʻa e Fakamanatu ʻo ʻene pekiá?

¹⁵ Hili hono paasi ʻa e mā taʻelēvaní, naʻe toʻo ʻe Sīsū ha ipu, “mo ne fakafetaʻi, ʻo ne ʻange [ki he kau ʻapositoló]; pea nau inu kotoa pē mei ai.” Naʻe fakamatala ʻe Sīsū: “Ko hoku toto ʻeni, ko e toto fuakava, ʻa ia ʻoku lilingi koeʻuhi ko e tokolahi.” (Maake 14:​23, 24) Ko e hā naʻe ʻi he ipú? Ko e uaine kuo ʻosi fakatoka, ʻikai ko ha huhuaʻi kālepi kuo teʻeki fakatoka. ʻI he taimi ʻoku lave ai ʻa e Ngaahi Konga Tohitapú ki he uainé, ʻoku ʻikai ke ʻuhinga ia ko e huhuaʻi kālepi kuo teʻeki fakatoka. Hangē ko ení, ko e uaine kuo fakatoká, ʻikai ko e huhuaʻi kālepí, te ne fakapaaki ʻa e “ngāhi hina leta motuʻa,” hangē ko e lea ʻa Sīsuú. Pea naʻe tukuakiʻi ʻe he ngaahi fili ʻo Kalaisí ʻo pehē naʻá ne “faa inu uaine.” ʻE taʻeʻuhinga ʻa e tukuakiʻi ko iá kapau ko e uainé ko e huhuaʻi kālepi pē. (Mātiu 9:17; 11:​19, PM) Ko e uainé naʻe inu ia lolotonga ʻa e kātoanga Pāsová, pea naʻe ngāueʻaki ia ʻe Sīsū ʻi he taimi naʻá ne fokotuʻu ai ʻa e Fakamanatu ʻo ʻene pekiá.

16, 17. Ko e hā ʻa e faʻahinga uaine ʻoku feʻungamālie ki he ngaahi kātoanga Fakamanatú, pea ko e hā hono ʻuhingá?

¹⁶ Ko e uaine kulokulá pē ʻa e fakatātā feʻungamālie ʻo e meʻa ʻoku fakafofongaʻi ʻe he meʻa ʻi loto he ipú, ʻa ia, ko e taʻataʻa ne lilingi ʻo Sīsuú. Ko ia tonu naʻá ne pehē: “Ko hoku toto ʻeni, ko e toto fuakava, ʻa ia ʻoku lilingi koeʻuhi ko e tokolahi.” Pea naʻe tohi ʻe he ʻapositolo ko Pitá: “Ko hoʻomou [kau Kalisitiane paní] ʻilo, naʻe ʻikai fai ʻaki ʻa e ngaahi meʻa ʻauha, ha siliva pe ha koula, homou huhuʻi mei he anga taʻeʻaonga ne tuku fakaholo mai mei he matuʻa; ka naʻe fai ʻaki ha taʻataʻa maʻongoʻonga, he ko e toto ʻo ha lami taʻemele mo taʻeʻila, ko e taʻataʻa ʻo Kalaisi.”—1 Pita 1:​18, 19.

¹⁷ ʻOku taʻetoeveiveiua ko e uaine kālepi kulokulá ʻa e faʻahinga uaine naʻe ngāueʻaki ʻe Sīsū ʻi he taimi naʻá ne fokotuʻu ai ʻa e Fakamanatú. Kae kehe, ko e ngaahi uaine kulokula ia ʻe niʻihi he ʻaho ní ʻoku ʻikai ala tali ia koeʻuhí kuo huʻi ia ʻo mālohi ʻaki ʻa e kava mālohí pe kava palanité pe kuo tānaki ki ai ha fanga kiʻi lauʻi ʻakau ia mo e sipaisi. Ko e taʻataʻa ʻo Sīsuú naʻe feʻungaʻānoa, ʻo ʻikai toe fiemaʻu ke tānaki ki ai ha meʻa. Ko ia ai, ko e faʻahinga uaine hangē ko e port, sherry, mo e vermouth ʻe ʻikai ke feʻungamālie ia. Ko e ipu ʻo e Fakamanatú ʻoku totonu ke ʻi ai ʻa e uaine kulokula taʻefakamelie mo taʻehuʻi kava mālohi. Ko e uaine kulokula taʻefakamelie ngaohi ʻi ʻapí ʻe lava ke ngāueʻaki, pea pehē ki he ngaahi uaine hangē ko e burgundy mo e claret kulokulá.

18. Ko e hā naʻe ʻikai fakahoko ai ʻe Sīsū ha mana fekauʻaki mo e mā mo e uaine ʻo e Fakamanatú?

¹⁸ ʻI hono fokotuʻu ʻa e kai ko ení, naʻe ʻikai ke fakahoko ʻe Sīsū ia ha mana, ʻo liliu ʻa e ongo meʻa fakaefakatātaá ko hono kakano mo hono toto moʻoní. Ko e kai ʻo e kakano ʻo e tangatá mo inu ʻa e totó ko e kai-tangata ia, ko hano maumauʻi ia ʻo e lao ʻa e ʻOtuá. (Senesi 9:​3, 4; Livitiko 17:10) Naʻe kei maʻu pē ʻe Sīsū ia ʻa e kotoa ʻo hono sino fakakakanó mo e kotoa ʻo hono totó. Ko hono sinó naʻe foaki ia ko ha feilaulau haohaoa, pea ko hono totó naʻe lilingi ia ʻi he hoʻatā hono hokó ʻi he ʻaho faka-Siu tatau, Nīsani 14. Ko ia ai, ko e mā mo e uaine Fakamanatú ko e fakatātā pē ia ʻi natula, ʻokú ne fakafofongaʻi ʻa e kakano mo e toto ʻo Kalaisí.a

Ko e Fakamanatú​—Ko ha Kai Fakataha

19. Ko e hā ʻoku lava ai ke ngāueʻaki ha peleti pe ipu laka hake he tahá ʻi hono kātoangaʻi ʻo e Kai Efiafi ʻa e ʻEikí?

¹⁹ ʻI hono fokotuʻu ʻe Sīsū ʻa e Fakamanatú, naʻá ne fakaafeʻi ʻene kau ʻapositolo faitōnungá ke nau inu mei ha ipu tatau. ʻOku pehē ʻe he Kōsipeli ʻa Mātiú: “Ne toʻo foki [ʻe Sīsū] ha ipu, mo ne fakafetaʻi, ʻo ne ʻange kiate kinautolu, mo ne pehe, Mou inu kotoa pe mei ai.” (Mātiu 26:27) ʻI hono ngāueʻaki pē “ha ipu,” ʻikai ko ha ngaahi ipu kehekehe, ʻoku ʻikai ke ne ʻomi ʻe ia ha palopalema, koeʻuhi ʻi he taimi ko iá ko e kau maʻu ʻinasi pē ʻe toko 11 naʻe mahino naʻa nau ʻi he tēpile pē taha pea naʻe lava lelei pē ke paasi mei hē ki hē ʻa e ipú. ʻI he taʻú ni, ʻe fakatahataha ai ʻa e laui miliona ki he Kai Efiafi ʻa e ʻEikí ʻi he ngaahi fakatahaʻanga laka hake he 94,000 ʻa e Kau Fakamoʻoni ʻa Sihová ʻi māmani lahi. ʻI he fuʻu tokolahi ʻe fakataha ki he kātoanga ko eni ʻi he pō tatau pē, ʻe ʻikai nai malava ke ngāueʻaki ha ipu pē taha ki hono kotoa. Ka ko e meʻa tefitó ʻe tauhi maʻu ia ʻi he ngaahi fakatahaʻanga lalahí ʻaki hono ngāueʻaki ha ngaahi ipu kehekehe koeʻuhi ke lava ʻo paasi holo ia ʻi he kau fanongó ʻi ha taimi lahi feʻunga. ʻOku pehē pē, ʻe lahi hake ʻi he peleti ʻe tahá ʻe lava ke ngāueʻaki ki he maá. ʻOku ʻikai ke fakahā ia ʻi he ngaahi Konga Tohitapú ko e ipú pe ipu sioʻatá tonu ʻoku totonu ke ʻi ha fōtunga pau. Kae kehe, ko e ipú mo e peletí ʻoku totonu ke tapua atu ai ʻa e ngeia ʻo e meʻa ʻoku faí. ʻOku fakapotopoto ke fakaʻehiʻehi mei hono fakafonu ʻa e ipú ʻo aʻu ki ha tuʻunga ʻe ngalingali ʻe mahua ai ʻa e uainé ʻi he taimi ʻoku paasi aí.

20, 21. Ko e hā ʻoku lava ai ke tau pehē ko e Fakamanatú ko ha kai fakataha?

²⁰ Neongo ʻe lahi hake he tahá ʻa e peleti mā mo e ipu uaine ʻe lava ke ngāueʻakí, ko e Fakamanatú ko ha kai fakataha ia. ʻI ʻIsileli ʻo e kuonga muʻá, ʻe lava ke tokonaki ʻe ha tangata ha kai fakataha ʻaki hono ʻomai ha monumanu ki he potu toputapu ʻo e ʻOtuá, ʻa ia naʻe tāmateʻi aí. Ko e konga ʻo e monumanú naʻe tutu ia ʻi he ʻōlitá, ko e konga naʻe ʻalu ia ki he taulaʻeiki faifatongiá pea ko e konga ki he ngaahi foha fakataulaʻeiki ʻo ʻĒloné, fakataha mo e tokotaha ʻatu feilaulaú pea mo hono falé ʻoku nau ʻinasi ʻi he kaí. (Livitiko 3:​1-16; 7:​28-36) Ko e Fakamanatú foki ko ha kai fakataha ia koeʻuhí ʻoku kau ki ai ha ʻinasi fakataha.

²¹ ʻOku kau mai ʻa Sihova ʻi he kai fakataha ko ení ko e Tokotaha-Faʻu ia ʻo e fokotuʻutuʻu ko iá. Ko Sīsū ʻa e feilaulaú, pea ko e kau Kalisitiane paní ʻoku nau maʻu ʻinasi ʻi he ongo meʻa fakaefakatātaá ko e kau kai fakataha. Ko e kai ʻi he tēpile ʻa Sihová ʻokú ne fakatātaaʻi ko e kau maʻu ʻinasi aí ʻoku nau melino mo ia. Ko ia ai, naʻe tohi ʻe Paula: “Ko e ipu fakafetaʻi, ʻa ia ʻoku tau fakatapuʻaki ha fakafetaʻi, ʻikai ko e meʻa ia ʻoku tau kautaha ai ʻi he taʻataʻa ʻo Kalaisi? Ko e ma ʻoku tau pakipaki, ʻikai ko e meʻa ia ʻoku tau kautaha ai ʻi he sino ʻo Kalaisi? He neongo pe ʻoku tau toko fiha, ka ko e ma pe taha kitautolu, ʻa ia ko e sino taha: he ʻoku tau ʻinasi kotoa pe mei he ma pe ko ia ʻe taha.”—1 Kolinito 10:​16, 17.

22. Ko e hā ʻa e ngaahi fehuʻi fekauʻaki mo e Fakamanatú ʻoku kei toe ke tau lāulea ki aí?

²² Ko e Kai Efiafi ʻa e ʻEikí ko e kātoanga fakalotu fakataʻu pē ia ʻe taha ʻi he haʻohaʻonga ʻo e Kau Fakamoʻoni ʻa Sihová. ʻOku feʻungamālie eni koeʻuhí naʻe fekauʻi ʻe Sīsū ki hono kau muimuí: “Mou fai pehe mōku fakamanatu.” ʻI he Fakamanatú, ʻoku tau fakamanatu ai ʻa e pekia ʻa Sīsuú, ko ha pekia naʻá ne pouaki ʻa e tuʻunga-hau ʻo Sihová. Hangē ko ia kuo tau ʻiloʻí, ʻi he kai fakataha ko ení, ko e maá ʻokú ne fakatātaaʻi ʻa e sino fakaetangata ʻo Sīsū naʻe feilaulauʻí pea ko e uainé ko hono taʻataʻa naʻe lilingí. Kae kehe, ko e tokosiʻi pē ʻoku nau ʻinasi ʻi he mā mo e uaine fakaefakatātaá. Ko e hā ʻoku pehē ai ení? ʻOku ʻi ai ha ʻuhinga moʻoni ʻo e Fakamanatú ki he laui miliona ʻoku ʻikai ko e kau maʻu ʻinasi aí? Ko e moʻoni, ʻoku totonu ke ʻuhinga fēfē ʻa e Kai Efiafi ʻa e ʻEikí kia koé?

[Fakamatala ʻi lalo]

Ko e Hā Hoʻo Talí?

• Ko e hā naʻe fokotuʻu ai ʻe Sīsū ʻa e Kai Efiafi ʻa e ʻEikí?

• ʻOku totonu ke toutou kātoangaʻi tuʻo fiha ʻa e Fakamanatú?

• Ko e hā ʻa e ʻuhinga ʻo e mā taʻelēvani ʻo e Fakamanatú?

• Ko e hā ʻoku fakafofongaʻi ʻe he uaine ʻo e Fakamanatú?

[Fakatātā ʻi he peesi 15]

Naʻe fokotuʻu ʻe Sīsū ʻa e Kai Efiafi ʻa e ʻEikí