Fehuʻi mei he Kau Lautohí

Ko e hā naʻe toʻo-lea ai ʻa Sīsū mei he ngaahi lea ʻa Tēvita ʻi he Saame 22:1 ʻi he ki muʻa pē ke ne pekiá?

Ko e taha ʻi he ngaahi lea fakaʻosi ʻa Sīsū ki muʻa ke ne pekiá ʻoku hiki ʻi he Mātiu 27:46: “ʻE hoku ʻOtua, ʻe hoku ʻOtua, ko e hā kuó ke liʻaki ai aú?” ʻI hono leaʻaki ení, naʻe fakahoko ai ʻe Sīsū ʻa e ngaahi lea ʻa e tokotaha-tohi-saame ko Tēvitá ʻi he Saame 22:1. (Mk. 15:34) ʻE hala ia ke fakaʻosiʻaki naʻe leaʻaki ʻe Sīsū ení koeʻuhi naʻá ne loto-mamahi pe naʻe vaivai ʻene tuí he taimi ko ení. Naʻe mahinoʻi kakato ʻe Sīsū ʻa e ʻuhinga naʻe fiemaʻu ai ke pekiá, pea naʻá ne loto-lelei ke fai pehē. (Māt. 16:21; 20:28) Naʻá ne toe ʻiloʻi foki ʻi he taimi ʻo ʻene pekiá, ʻe fiemaʻu kia Sihova ke ne toʻo ʻa hono “ʻaaʻi malu takai ia.” (Siope 1:10) Naʻe fakaʻatā ai ʻe Sihova ʻa Sīsū ke ne fakamoʻoniʻi taʻetoeveiveiua te ne nofoʻaki faitōnunga neongo pe ko e hā ʻa e tuʻunga faingataʻa ʻene pekiá.​—Mk 14:35, 36.

Ko ia ko e hā naʻe leaʻaki ai ʻe Sīsū ʻa e ngaahi lea ko eni ʻi he sāmé? Neongo heʻikai ke tau fuʻu fakamatematē, tau lāulea angé ki ha ngaahi ʻuhinga ʻoku ala maʻu.a

ʻI hono leaʻaki ʻa e ngaahi lea ko ení, naʻe fakamamafaʻi ʻe Sīsū heʻikai ke kau mai ʻa Sihova ki heʻene pekiá? Naʻe fiemaʻu ke totongi ʻe Sīsū ʻa e huhuʻí ʻo taʻekau ai ʻa e tokoni ʻa Sihová. Naʻá ne hoko ko ha tangata pea naʻe fiemaʻu ke ne hokosia ʻa e maté “maʻá e tokotaha kotoa pē.”​—Hep. 2:9.

ʻI he toʻo-lea mei he saame ko iá, naʻe fakahanga ʻe Sīsū ʻa e tokangá ki he kotoa ʻo e sāmé? Naʻe anga-maheni ʻi he ngaahi ʻaho ko iá ki he kakai Siú ke nau ako maʻuloto ʻa e ngaahi sāmé. ʻI he fanongo ki ha veesi ʻe taha ʻo ha saame, ko e anga-mahení te nau fakakaukau nai ki he kotoa ʻo e saame ko iá. Kapau ko e meʻa eni naʻe ʻi he fakakaukau ʻa Sīsuú, naʻá ne mei tokoni heni ki hono kau muimui Siú ke nau manatuʻi ʻa e ngaahi kikite ʻi he saame ko ení felāveʻi mo ʻene pekiá. (Saame 22:7, 8, 15, 16, 18, 24) Pehē foki, ʻi he ofi ki he ngataʻanga ʻo e sāmé, ko e ikuna ʻa e tuʻunga-tuʻi ʻa Sihová ʻoku fakamatalaʻi ai ʻoku aʻu ki he ngatangataʻanga ʻo e māmaní.​—Saame 22:27-31.

ʻI he toʻo-lea mei he ngaahi lea ko eni ʻa Tēvitá, naʻe fakamamafaʻi ʻe Sīsū ʻene tonuhiá? Ki muʻa ke pekia ʻa Sīsuú, naʻe pau ke ne kātekina ha fakamaau taʻefakalao naʻe fakahalaiaʻi ai ki he lea fieʻotua. (Māt. 26:65, 66) Ko e fakamaau ko iá naʻe fai fakavave ʻi he fuoloa ʻa e poʻulí pea naʻe fepaki ia mo e ngaahi tuʻunga fakalaó. (Māt. 26:59; Mk. 14:56-59) ʻI he toʻo-lea mei he ngaahi lea ko ení ʻi he faʻunga ʻo ha fehuʻi ke ʻoua ʻe tali, naʻe fakahanga nai ʻe Sīsū ʻa e tokangá ki he moʻoniʻi meʻa ko ia naʻe halaʻatā ke ne fai ha meʻa ke ne tuha ai mo e tautea ko ení.

Naʻe toe fakamanatu ʻe Sīsū ki he niʻihi kehé neongo naʻe fakaʻatā ʻa Tēvita, ʻa e tokotaha-tohi ʻo e saame ko ení, ke ne faingataʻaʻia, naʻe ʻikai ʻuhinga eni naʻe mole ʻa e hōifua ʻa Sihová meia Tēvita? Naʻe ʻikai fakahaaʻi ʻi he fehuʻi ʻa Tēvitá naʻe vaivai ʻene tuí. Hili hono ʻeke ʻa e fehuʻí, naʻá ne hoko atu ke fakahaaʻi ʻa e falala pau ki he mālohi faifakahaofi ʻo Sihová, pea naʻe hokohoko atu hono tāpuakiʻi ia ʻe Sihová. (Saame 22:23, 24, 27) ʻI he tuʻunga meimei tatau, neongo ko Sīsū “ʻa e Foha ʻo Tēvitá,” naʻá ne faingataʻaʻia ʻi he ʻakau fakamamahí, naʻe ʻikai ʻuhinga eni naʻe mole ʻa e hōifua ʻa Sihová meia Sīsū.​—Māt. 21:9.

Naʻe fakahaaʻi ʻe Sīsū ʻa e lahi ʻene mamahí koeʻuhi ko e toʻo ʻe Sihova ʻEne maluʻí meiate ia kae lava ke ne fakamoʻoniʻi kakato ʻene anga-tonú? Naʻe ʻikai ko e muʻaki taumuʻa ia ʻa Sihova ki hono ʻAló ke faingataʻaʻia pea pekia. Naʻe toki fiemaʻu eni hili ʻa e fuofua angatuʻú. Naʻe ʻikai fai ʻe Sīsū ha hala, ka naʻe fiemaʻu ke ne faingataʻaʻia pea pekia koeʻuhi ke fai ha tali ki he ʻīsiu naʻe langaʻi ʻe Sētané pea tokonaki ʻa e mahuʻinga ʻo e huhuʻí ke fakatau mai ʻaki ʻa e meʻa naʻe fakamoleki ʻe he tangatá. (Mk. 8:31; 1 Pita 2:21-24) Naʻe malava ke fakahoko pē eni kapau ʻe toʻo fakataimi ʻe Sihova ʻene maluʻí meia Sīsū ko e fuofua taimí ia ʻi heʻene moʻuí.

Naʻe feinga ʻa Sīsū ke tokoniʻi hono kau muimuí ke tokangataha ki he ʻuhinga naʻe fakaʻatā ai ʻe Sihova ke ne pekia ʻi he founga ko ení?b Naʻe ʻiloʻi ʻe Sīsū ko e founga ʻene pekia ko eni hangē ha tokotaha faihia ʻi ha ʻakau fakamamahí ʻe fakatūkiaʻi ai ʻa e tokolahi. (1 Kol. 1:23) Kapau naʻe tokangataha hono kau muimuí ki he ʻuhinga moʻoni ʻene pekiá, te nau mahinoʻi hono mahuʻinga moʻoní. (Kal. 3:13, 14) Te nau vakai kiate ia ko ha Fakamoʻui kae ʻikai ko ha tokotaha faihia.

Tatau ai pē pe ko e hā ʻa e ʻuhinga naʻe toʻo-lea ai ʻa Sīsū mei he ngaahi lea ko ení, naʻá ne ʻiloʻi ko e meʻa naʻá ne hokosiá ko e konga ia ʻo e finangalo ʻo Sihova kiate iá. Taimi nounou mei he toʻo-lea ʻa Sīsū mei he saame ko ení, naʻá ne pehē: “Kuo lava!” (Sione 19:30; Luke 22:37) ʻIo, ko e toʻo fakataimi ʻo e maluʻi ʻa Sihová naʻe fakaʻatā ai ʻa Sīsū ke ne fakahoko kakato ʻa e meʻa kotoa naʻe fekauʻi mai ai ki he māmaní. Naʻe toe fakaʻatā ai ke ne fakahoko ʻa e meʻa kotoa naʻe tohi fekauʻaki mo ia “ʻi he Lao ʻa Mōsesé pea ʻi he Kau Palōfitá mo e Ngaahi Sāmé.”​—Luke 24:44.