Siosifa ʻo ʻAlemateá Tuʻu ʻo Poupou

KO SIOSIFA ʻO ʻALEMATEÁ ne ʻikai te ne meimei ʻiloʻi pe naʻe anga-fēfē ʻene maʻu ʻa e loto-toʻa ke fakaofiofi ai ki he kōvana Lomá. Naʻe ʻiloa ʻa Ponitō Pailato ʻi heʻene mātuʻaki anga-fefeká. Neongo ia, kapau naʻe fiemaʻu ke fakangeingeia hono tanu ʻo Sīsuú, naʻe pau ke kole ʻe ha taha kia Pailato ke tuku ange mai ʻa e sinó. Hangē ko ia naʻe hokó, naʻe ʻikai ke faingataʻa ʻa e feʻiloaki mata ki he mata mo iá ʻo hangē ko ia naʻe fakakaukau atu ki ai ʻa Siosifá. Hili hono fakapapauʻi mei ha ʻōfisa naʻe pekia ʻa Sīsuú, naʻe tali ʻe Pailato ʻa e kolé. Ko ia ʻi he taimi ko ení, lolotonga ʻa e kei loto-mamahi lahi ʻa Siosifá, naʻá ne foki fakavave ki he feituʻu faiʻanga tauteá.​—Mk. 15:42-45.

• Ko hai ʻa Siosifa ʻo ʻAlemateá?

• Ko e hā ʻene felāveʻi mo Sīsuú?

• Pea ko e hā ʻa e meʻa ʻokú ne ʻai ke ke mahuʻingaʻia ai ʻi he talanoa fekauʻaki mo iá?

Ko e Kōsipeli fakamānavaʻi ʻa Maʻaké ʻoku ui ai ʻa Siosifa “ko ha mēmipa tokaʻi ʻo e Fakatahá.” ʻI he tuʻunga ko ení, ʻoku lava ai ke pehē ko e Fakatahá ʻa e Sanetalimí, ʻa e fakamaauʻanga māʻolunga faka-Siu mo e kulupu māʻolunga naʻe pulé. (Mk. 15:1, 43) Ko ia ko Siosifa ʻa e taha ʻo e kau taki ʻo hono kakaí, ʻa ia ʻoku fakamatalaʻi ai ʻa e ʻuhinga naʻe lava ai ke ne feʻiloaki mo e kōvana Lomá. ʻOku ʻikai foki ha ofo ʻi he koloaʻia ʻa Siosifá foki.​—Māt. 27:57.

ʻI he tuʻunga ko ha kulupú, naʻe fehiʻanekinaʻi ʻe he Sanetalimí ʻa Sīsū. Naʻe faʻufaʻu ʻa hono kau mēmipá ke tāmateʻi ia. Kae kehe, ko Siosifá ʻoku ui ia “ko ha tangata lelei mo māʻoniʻoni.” (Luke 23:50) ʻI he ʻikai hangē ko e tokotaha taha ʻo hono kaungā Sanetalimí, naʻá ne moʻui faitotonu mo ʻulungaanga taau peá ne fai ʻene lelei tahá ke talangofua ki he ngaahi fekau ʻa e ʻOtuá. Naʻá ne toe “tatali ki he Puleʻanga ʻo e ʻOtuá,” ʻa ia ʻoku fakamatalaʻi nai ai ʻa e ʻuhinga naʻá ne hoko ai ko e taha ʻo e kau ākonga ʻa Sīsuú. (Mk. 15:43; Māt. 27:57) ʻOku ngalingali, naʻe tohoakiʻi ia ki he pōpoaki ʻa Sīsuú ʻi haʻane holi loto-moʻoni ki he moʻoní mo e fakamaau totonú.

ʻOku pehē ʻi he Sione 19:38 ko Siosifá “ko ha ākonga ʻa Sīsū ka ko ha ākonga fakapulipuli pē koeʻuhi ko ʻene manavahē ki he kau Siú.” Ko e hā naʻe ilifia ki ai ʻa Siosifá? Naʻá ne ʻiloʻi ʻa e fehiʻa ʻa e kau Siú ʻia Sīsuú mo ʻenau fakapapauʻi ke kapusi mei he sinakoké ha taha pē ʻokú ne fakahāhā ha tui kiate ia. (Sione 7:45-49; 9:22) Ko e kapusi mei he sinakoké naʻe ʻuhinga iá ko e fehiʻanekinaʻi, talitekeʻi, pea ʻikai ke tali ʻe he kaungā Siú. Ko ia naʻe toumoua ʻa Siosifa ke fakahāhā ʻa ʻene tui kia Sīsuú. Ko e fai peheé ʻe ʻuhinga iá ko e mole ʻa hono tuʻungá mo hono ongoongó.

Naʻe ʻikai ko Siosifa pē ʻa e toko taha naʻe ʻi he tuʻunga ko ení. Fakatatau ki he Sione 12:42, ko e “tokolahi ʻo e kau pulé naʻa nau tui moʻoni kiate ia, ka naʻe ʻikai te nau fakahaaʻi ʻenau tui kia Sīsuú koeʻuhi ko e kau Fālesí, telia naʻa kapusi kinautolu mei he sinakoké.” Ko ha toe toko taha naʻe ʻi he tuʻunga tatau mo ia ko Nikotīmasi, ko ha mēmipa foki ia ʻo e Sanetalimí.​—Sione 3:1-10; 7:50-52.

Kae kehe, ko Siosifá, naʻe hoko ko ha ākonga, ka naʻe ʻikai lava ke ne leaʻaki fakahāhā ia. Ko ha palopalema mafatukituki ia, tautefito ʻi hono mahinoʻi ʻa e fakahaaʻi ʻe Sīsū: “Ko e tokotaha kotoa pē ʻokú ne fakahaaʻi ʻi he ʻao ʻo e tangatá ʻokú ne ʻiloʻi aú, te u fakahaaʻi foki ʻi he ʻao ʻo ʻeku Tamai ʻoku ʻi hēvaní ʻoku ou ʻiloʻi ia. Kae ʻilonga ʻa ia ʻokú ne siʻaki au ʻi he ʻao ʻo e tangatá, te u siʻaki foki ia ʻi he ʻao ʻo ʻeku Tamai ʻoku ʻi hēvaní.” (Māt. 10:32, 33) Naʻe ʻikai ke fakaʻikaiʻi fakaʻaufuli ʻe Siosifa ʻa Sīsū, pea naʻe ʻikai foki ke ne maʻu ʻa e loto-toʻa ke fakahaaʻi ʻokú ne ʻiloʻi ia. Fēfē koe?

Ki ha lelei maʻa Siosifa, ʻoku fakahaaʻi ʻe he Tohi Tapú naʻe ʻikai te ne poupouʻi ʻa e faʻufaʻu ʻa e Sanetalimí fekauʻaki mo Sīsuú. (Luke 23:51) Hangē ko e fakahuʻunga ʻa e niʻihi, mahalo pē naʻe ʻikai ʻi ai ʻa Siosifa ʻi he fakamāuʻi ʻo Sīsuú. Ko e hā pē ʻa e tuʻungá, kuo pau pē naʻe mātuʻaki ongoʻi mamahi ʻa Siosifa fekauʻaki mo e mioʻi fakalilifu ko ia ʻo e fakamaau totonú​—ka naʻe ʻikai lava ke ne fai ha meʻa ke taʻofi ia!

ʻI he taimi ʻo e pekia ʻa Sīsuú, ʻoku hā mahino naʻe ikuʻi ʻe Siosifa ʻene manavaheé, pea naʻá ne fili ke ne poupou ki he kau muimui ʻo Sīsuú. Ko e fili ko iá ʻoku fakahaaʻi ia ʻi he ngaahi lea ʻi he Maʻake 15:43 “Naʻá ne loto-toʻa ʻo ne hū atu ki he ʻao ʻo Pailató ʻo kole ʻa e sino ʻo Sīsuú.”

ʻOku hā ngali naʻe ʻi ai ʻa Siosifa ʻi he taimi naʻe pekia ai ʻa Sīsuú. Ko e moʻoni, naʻá ne tomuʻa ʻilo ki he pekia ʻa Sīsuú ʻia Pailato. Ko ia ai, ʻi he kole ʻe Siosifa ʻa e sinó, ko e kōvaná naʻá ne ‘fifili pe kuo ʻosi pekia’ ʻa Sīsū. (Mk. 15:44) Kapau naʻe sio tonu ʻa Siosifa ʻi he faingataʻaʻia ʻa Sīsū ʻi he ʻakau fakamamahí, naʻe ueʻi ia ʻe he meʻa fakalilifu naʻe hokó ke ne sivisiviʻi ʻa hono konisēnisí pea fakapapauʻi aofangatuku ai kuo pau ke ne tuʻu maʻá e moʻoní? ʻOku malava ke pehē. ʻI ha tuʻunga, naʻe ueʻi ʻa Siosifa ʻi he taimi ko ení ke ne fai ha meʻa. Heʻikai te ne kei hoko ko ha ākonga fakapulipuli.

Naʻe fiemaʻu ʻi he lao faka-Siú ʻa e faʻahinga naʻe tautea maté ke tanu kinautolu ki muʻa ke tō ʻa e laʻaá. (Teu. 21:22, 23) Kae kehe, hangē ko ia naʻe tokanga ki ai ʻa e kau Lomá, ko e sino ʻo e kau faihia naʻe tāmateʻí naʻe tuku ʻi he ʻakaú ke ʻauʻaunga ai pe naʻe lī ki ha faʻitoka anga-maheni. Ka naʻe ʻikai ko e meʻa ia naʻe fakakaukauʻi ʻe Siosifa fekauʻaki mo Sīsuú. Naʻe maʻu ʻe Siosifa ʻo ofi ki he feituʻu faiʻanga tauteá ha fonualoto foʻou kuo tā mei he maká. Ko e fonualoto ko ení naʻe teʻeki ai ʻaupito ke ngāueʻaki, ʻa ia ʻoku fakahaaʻi ai naʻe toki hiki mai pē ʻa Siosifa mei ʻAlemateaa ki Selusalema pea naʻá ne ʻamanekina ke ngāueʻaki ʻa e fonualotó ni ko ha tanuʻanga maʻa hono fāmilí. (Luke 23:53; Sione 19:41) Ko hono tanu ʻa Sīsū ʻi he fonualoto ʻo Siosifa ki he kahaʻú ko ha tōʻonga nima-homo ia ʻi he tafaʻaki ʻa Siosifá pea ʻoku fakahoko ai ʻa e kikite ʻo pehē ko e Mīsaiá ʻe tanu ia “fakataha mo e koloaʻiá.”​—ʻAi. 53:5, 8, 9.

ʻOku lēkooti ʻi he Kōsipeli kotoa ʻe faá ʻi he hili hono ʻohifo ʻa e sino ʻo Sīsuú mei he ʻakaú, naʻe kofu ia ʻe Siosifa ʻi ha līneni lelei pea tuku ki hono fonualotó. (Māt. 27:59-61; Mk. 15:46, 47; Luke 23:53, 55; Sione 19:38-40) Ko e tokotaha pē naʻe fakahaaʻi papau naʻe tokoni kia Siosifá ko Nikotīmasi, ʻa ia naʻá ne ʻomi ʻa e ngaahi sipaisi ki he tanú. Koeʻuhi ko e tuʻunga ʻo e toko uá ni, ʻoku ngalingali naʻe ʻikai ko kinaua pē naʻá na ʻave ʻa e sinó. ʻOku ngalingali naʻá na ngāueʻaki ʻa e kau sevāniti ke nau fata ia ʻo tanu. Pe naʻá na fai ʻa e meʻa ko iá, ko e ngāue naʻe fakahoko ʻe he ongo tangatá naʻe ʻikai ko ha meʻa naʻe taʻemahuʻinga. Ko ha taha pē naʻe pā ki ha ʻangaʻanga naʻe hoko ai ʻo ne taʻemaʻa fakaeouau ʻo feʻunga mo e ʻaho ʻe fitu, ʻo ʻai ai ʻa e meʻa kotoa pē naʻa nau ala ki aí ke taʻemaʻa. (Nōm. 19:11; Hāk. 2:13) ʻI ha tuʻunga pehē naʻe fiemaʻu ai ke fakamavaheʻi kinautolu lolotonga ʻa e uike Pāsová pea ʻe ʻikai te nau maʻu ʻa e kotoa ʻo hono ngaahi ouaú mo e kātoangá. (Nōm. 9:6) ʻI hono fokotuʻutuʻu ʻa e tanu ʻo Sīsuú, naʻe toe hoko ai ʻa Siosifa ʻo ʻi ha tuʻunga ke manukiʻi ʻe hono kaungā Sanetalimí. Neongo ia, ʻi he tuʻunga ko ení, naʻá ne loto-lelei ke tali ʻa e ngaahi meʻa ʻe hoko ʻi hono tanu fakangeingeia ʻo Sīsuú pea ʻi hono fakahaaʻi atu ia ko e taha ʻo e kau ākonga ʻa Kalaisí.

Hili ʻa e fakamatala Kōsipeli ki he tanu ʻo Sīsuú, ʻoku ʻikai ha toe lave ʻa e Tohi Tapú kia Siosifa ʻo ʻAlemateá, ʻo iku ai ki ha fehuʻi ʻe taha ʻoku lava ke mahinoʻi: Ko e hā naʻe hoko kiate iá? Ko hono moʻoní, ʻoku ʻikai ke tau ʻiloʻi. Kae kehe, ʻi he vakai ki he meʻa ne toki ʻosi lāulea ki aí, ʻoku mātuʻaki ngalingali naʻá ne fakahaaʻi mahino ia ko ha Kalisitiane. He ko ē, ʻi he mōmeniti ʻo e ʻahiʻahí mo e faingataʻá, naʻe tupulaki ʻa ʻene tuí mo e loto-toʻá kae ʻikai ke hōloa. Ko ha fakaʻilonga lelei ia.

Ko e talanoá ni ʻoku langaʻi hake ai ha foʻi fehuʻi ʻoku lelei kiate kitautolu kotoa ke tau fakakaukauloto ki ai: ʻOku ʻi ai ha meʻa​—pe ko e tuʻunga, ngāue, koloa, ʻofa fakafāmili, pe naʻa mo ʻetau tauʻatāiná tonu—​ʻoku tau fakamahuʻingaʻi lahi ange ʻi hotau vahaʻangatae mo Sihová?