Vahe 20

Mana Hono Ua ʻi Kená

ʻI HE foki ʻa Sīsū ki hono feituʻú ʻi he hili ʻa e feinga ngāue malanga lahi ʻi Siuteá, naʻe ʻikai ko e taumuʻá ia ke mālōlō. Ka, naʻá ne kamata ha toe ngāue fakafaifekau lahi ange ʻi Kāleli, ko e feituʻu ia naʻá ne tupu hake aí. Naʻe ʻikai ke nofo fakataha ʻa ʻene kau ākongá mo ia, ka naʻa nau foki ki honau ngaahi fāmilí pea mo e ngāue naʻa nau fai ki muʻá.

Ko e hā ʻa e pōpoaki naʻe kamata ke malangaʻi ʻe Sīsuú? Ko ʻeni ia: “Kuo ofi ʻa e puleʻanga ʻo e ʻOtuá. Mou fakatomala ʻo tui ki he ongoongo leleí.” Pea naʻe fēfē ʻa e tali ki he meʻá ni? Naʻe tali ʻe he kau Kālelí ʻa Sīsū. Naʻe tokaʻi ia ʻe he tokotaha kotoa. Kae kehe, naʻe ʻikai ke hoko iá koeʻuhi pē ko ʻene pōpoakí, ka koeʻuhi ko e tokolahi naʻa nau maʻu ʻa e Laka-Atu ʻi Selusalema ʻi he ngaahi māhina ki muʻa atú pea naʻa nau mamata ki he ngaahi fakaʻilonga fakaofo naʻá ne faí.

ʻOku hā ngalingali naʻe kamata ʻe Sīsū ʻa ʻene ngāue fakafaifekau lahi ʻi Kālelí ʻi Kena. Te ke manatuʻi nai, ki muʻa atu ʻi heʻene foki mei Siuteá, naʻá ne liliu ʻa e vaí ko e uaine ʻi ha kātoanga mali naʻe fai ʻi ai. ʻI he taimi hono ua ko ʻení, naʻe puke lahi ha tamasiʻi ʻa ha ʻōfisa ngāue fakapuleʻanga ʻa Tuʻi Hēlota ʻAnitipasa. ʻI he fanongo ʻa e ʻōfisá kuo haʻu ʻa Sīsū mei Siutea ki Kená, naʻá ne fononga mei hono ʻapí ʻi Kāpaneume ke kumi kia Sīsū. Naʻe vili ʻa e tangatá ʻi heʻene fuʻu loto-mamahí, ʻo pehē: ‘Kātaki ʻo haʻu vave, naʻa mate siʻeku tamá.’

Naʻe tali ange ʻe Sīsū: ‘Foki ki ʻapi. Kuo fakamoʻui ho fohá!’ Naʻe tui ʻa e ʻōfisa ko ʻeni ʻa Hēlotá peá ne kamata ʻene fononga mamaʻo ʻo foki ki ʻapi. ʻI he lolotonga ʻene kei fonongá naʻá ne fetaulaki mo ʻene kau sevānití, ʻa ia naʻa nau haʻu fakavave ke tala kiate ia kuo lelei ʻa e meʻa kotoa​—kuo sai hono fohá! ‘Ko e taimi fē naʻá ne kamata ke lelei ange aí?’ ko ʻene ʻeké ange ia.

‘ʻI he taha efiafi ʻaneafí,’ ko ʻenau talí ia.

Naʻe ʻilo ʻe he ʻōfisá ko e houa tofu pē ia naʻe pehē ai ʻe Sīsū, ‘Kuo fakamoʻui ho fohá!’ ʻI he hili ʻa e meʻá ni, naʻe hoko ʻa e tangatá mo hono fāmilí kotoa ko e kau ākonga ʻa Kalaisi.

Ko ia ai, naʻe hoko ʻo fakahōifua ʻa Kena he ko e feituʻu ia naʻe tuʻo ua ʻa hono fai ai ʻe Sīsū ha ngaahi mana ʻo fakaʻilongaʻi ai ʻa ʻene foki mei Siuteá. Ko hono moʻoní, naʻe ʻikai ko e ngaahi mana pē ʻeni naʻe fai ʻe Sīsū ʻi he aʻu mai ki he taimi ko ʻení, ka naʻá na mahuʻingá he naʻá na fakaʻilongaʻi ʻa ʻene foki ki Kālelí.

Naʻe toki huʻu leva ʻa Sīsū ki hono koló ko Nasaleti. Ko e hā ʻa e meʻa naʻe toka tatali mai kiate ia ʻi aí? Sione 4:​43-54; Maake 1:​14, 15; Luke 4:​14, 15.

▪ ʻI he foki ʻa Sīsū ki Kālelí, ko e hā naʻe hoko ki heʻene kau ākongá, pea naʻe tali fēfē ia ʻe he kakaí?

▪ Ko e hā ʻa e mana naʻe fai ʻe Sīsuú, pea naʻe ueʻi ʻe he mana ko ʻení ʻa e kakai naʻe fekauʻaki mo e meʻa ko iá ke nau fai ʻa e hā?

▪ Ko ia ai, ʻi he founga fē naʻe hoko ʻo hōifua ai ʻa Sīsū ʻi Kená?