Sīsū​—Ko ʻEne Moʻuí mo ʻEne Ngāue Fakafaifekau

Loto-Maʻu Lolotonga ʻa e Ngaahi ʻAho Fakaʻosí

ʻI HE ofi ʻosi atu ʻa e ʻaho Tūsite ʻo Nīsani 11, naʻe nofo ʻa Sīsū mo ʻene kau ʻaposetoló ʻi he Moʻunga ko ʻOlivé. Naʻa nau toki mavahe mai mei he temipalé, ʻa ia ʻoku nau lava ʻeni ʻo sio hifo ki ai, pea naʻe fetalanoaʻaki ʻa Sīsū mo kinautolu ki he fakaʻilonga ʻo ʻene ʻi ai ʻi he mafai ʻo e Puleʻangá mo e ngataʻanga ʻo e tuʻu ko ʻení.

Naʻe hoko atu ʻa ʻene fakamatalá, pea naʻe fakatokanga ai ʻe Sīsū kiate kinautolu ʻo kau ki he muimui ki he kau Kalaisi loi. Naʻá ne pehē ʻe ʻi ai ha ngaahi feinga ʻe fai, pea “ka ne lava, naʻa mo e kakai fili ʻe taki hē ai.” Ka, ʻi he hangē ko e fanga ʻikalé, ʻo malava ke sio mamaʻo atu, ko e kakai fili ko ʻení te nau fakatahataha ki he feituʻu ʻa ia ʻoku maʻu ai ʻa e meʻakai fakalaumālie moʻoní, ʻa ia te nau ʻi he Kalaisi moʻoní ʻi heʻene ʻi ai taʻehāmaí. ʻE ʻikai ke taki hē kinautolu ke fakatahataha ki ha Kalaisi loi.

Ko e kau Kalaisi loí ʻoku malava ke nau hā mai pē. Ko hono faikehekehé, ko e ʻi ai ʻa Sīsuú ia ʻoku taʻehāmai ia. Naʻe pehē ʻe Sīsū ʻo fekauʻaki mo e hili ʻa e mamahi lahí: “ʻE fakapoʻuli ʻa e laʻā, pea ʻe tuku ʻe he māhina ʻene huhulu.” ʻIo, ko e vahaʻa taimi fakapoʻuli taha ia ʻo e faʻahinga ʻo e tangatá. ʻE hangē ia kuo fakapoʻuli ʻa e laʻaá lolotonga ʻa e taimi ʻahó, pea ʻe hangē ia kuo ʻikai ke ulo mai ʻa e māhiná ʻi he poʻulí.

Naʻe hoko atu ʻe Sīsū: “Pea ʻe ngatōtō ʻa e ngaahi malohinga ʻo e ngaahi langi.” Ko ia naʻá ne fakahā ko e langi fakamatelié ʻe hā fakailifia. ʻE hulu atu ʻa e manavaheé mo e fakamālohí ia ʻi ha toe taimi ki muʻa atu ʻi he hisitōlia ʻo e faʻahinga ʻo e tangatá.

Naʻe pehē ʻe Sīsū, tupu mei he meʻá ni, “ʻe mamahi ʻa e ngaahi kakai, ko ʻenau puputuʻu ʻi he longoaʻa ʻo e tahi mo e peau: ʻe to ʻa e manava ʻo e kakai ko ʻenau ilifia, mo e fakatuʻatāmaki ki he ngaahi meʻa ʻoku hoko hifo ki māmani.” Ko hono moʻoní, ʻi he ofi ke ngata ʻa e vahaʻa taimi fakapoʻuli taha ʻo e faʻahinga ʻo e tangatá, “ʻe toki ha ʻi he langi ʻa e fakaʻilonga ʻo e Fanautama ʻa tangata: pea ʻe toki lauʻaitu ʻa e ngāhi matakali ʻo mamani.”

Ka ʻe ʻikai ke lauʻaitu pe tangilāulau kotoa ʻi he ‘hoko mai ʻa e Fanautama ʻa tangatá ʻi he mālohi’ ke fakaʻauha ʻa e tuʻu fulikivanu ko ʻení. Ko e “kakai fili,” ʻa e toko 144,000 ʻa ia te nau kau mo Kalaisi ʻi hono Puleʻanga fakahēvaní, ʻe ʻikai te nau tangilāulau, pea pehē foki mo honau takangá, ʻa e faʻahinga ʻa ia naʻe ui ʻe Sīsū ki muʻa atu ko e “fanga sipi kehe.” Neongo kuo nau moʻui ʻi he vahaʻa taimi fakapoʻuli taha ʻi he hisitōlia ʻo e faʻahinga ʻo e tangatá, naʻe tali ʻe he faʻahinga ko ʻení ʻa e fakalototoʻa ʻa Sīsū: “Pea ʻi he kamata hoko ʻa e ngaahi meʻa ko ia, mou hiki homou ʻulu, ʻo hanga hake; he ʻoku ofi ai homou huhuʻi.”

Naʻe ʻoange ʻe Sīsū ʻa e talanoa fakatātā ko ʻení ke ʻilo ʻa e ofi ʻa e ngataʻangá ʻe heʻene kau ākonga ʻa ia te nau moʻui he lolotonga ʻa e ngaahi ʻaho fakaʻosí: “Mou vakai ʻa e fiki, mo e ngaahi ʻakau kehekehe: ka nau ka talamuka leva, ʻoku mou lāuʻilo ʻi hoʻomou sio ki ai, ʻoku ofi ʻa e faʻahitaʻu māfana. Pehē foki kimoutolu, ka mou ka vakai kuo hoko ʻa e ngaahi meʻa ko ia, pea mou ʻilo kuo ofi ʻa e puleʻanga ʻo e ʻOtua. Ko au e, ʻoku ou tala atu, ʻE ʻikai ʻaupito mole ʻa e toʻutangata ko ʻeni, kaeʻoua ke hoko hono kotoa.”

Ko ia, ʻi he sio ʻa ʻene kau ākongá kuo fakahoko ʻa e ngaahi tafaʻaki kehekehe ʻo e fakaʻilongá, ʻoku totonu ke nau ʻiloʻi ʻoku ofi ʻa e ngataʻanga ʻo e tuʻu ko ʻení pea ʻoku vavé ni ki he Puleʻanga ʻo e ʻOtuá ke ne fakaʻauha ʻa e tuʻunga fulikivanu hono kotoa pē. Ko hono moʻoní, ʻe hoko ʻa e ngataʻangá ʻi he lolotonga ʻa e taimi ʻoku kei moʻui ai ʻa e kakai naʻa nau sio ki hono fakahoko ʻa e ngaahi meʻa hono kotoa pē naʻe kikiteʻi ʻe Sīsuú! ʻI he ekinaki ki he kau ākonga ko ia ʻa ia te nau moʻui he lolotonga ʻa e ngaahi ʻaho fakaʻosi mahuʻinga ko iá, naʻe pehē ʻe Sīsū:

“Ka mou lamasi kimoutolu, naʻa ʻiloange ʻe mafatukituki homou loto, ko e meʻa ʻi he faʻa kai, mo e faʻa inu, mo e faʻa lotomoʻua ki he moʻui ni, pea lapasi kimoutolu ʻe he ʻaho ko ia ʻo hangē ko ha hele puna: he te ne hoko ki he kakai kotoa pe ʻi heʻenau nofo pe ʻi he funga ʻo māmani kotoa. Ka mou ʻā pe, mo lotu ʻi he taimi kotoa pe, koeʻuhi ke mou lava ke hao mei he ngāhi meʻa ko ia fulipe ʻoku ene ke hoko; pea ke tuʻu ʻi he ʻao ʻo e Fanautama ʻa tangata.” Mātiu 24:​23-51; Maʻake 13:​21-37; Luke 21:​25-36; Fakahā 14:​1, 3; Sione 10:16.

◆ Ko e hā ʻa e ngaahi tuʻunga ʻi he māmaní ʻoku fakaʻilongaʻiʻaki ʻa e ʻi ai ʻa Kalaisí?

◆ ʻE hoko ʻafē ʻa e ‘tangilāulau ʻa e matakali kotoa pē ʻi he māmaní,’ ka ko e hā ʻe fai ʻe he kau muimui ʻo Kalaisí?

◆ Ko e hā ʻa e talanoa fakatātā naʻe tokonaki ʻe Sīsū ke tokoni ki heʻene kau ākonga ʻi he kahaʻú ke ʻilo ʻa e ofi ʻa e ngataʻangá?

◆ Ko e hā ʻa e ekinaki naʻe tokonaki ʻe Sīsū ki heʻene kau ākonga te nau moʻui ʻi he lolotonga ʻo e ngaahi ʻaho fakaʻosí?