“Mou Loto Toʻa Pe; Kuo U Ikuna ʻa Mamani ʻe Au”

KO E ʻaho ʻo e pekia ʻa Sīsuú—ʻa e ʻaho hono 14 ʻo e māhina faka-Siu ko Nīsaní—naʻe kamata ia he tō ʻa e laʻaá ʻi he Tuʻapulelulu, ʻo Maʻasi 31, 33 T.S. ʻI he efiafi ko iá, naʻe fakatahataha ai ʻa Sīsū mo ʻene kau ʻapositoló ʻi ha loki ʻi ʻolunga ʻi ha fale ʻi Selusalema ke kātoangaʻi ʻa e Pāsová. ʻI heʻene teuteu “ke hiki mei he maama ko eni ʻo ʻalu ki he Tamai,” naʻe fakahaaʻi ʻe Sīsū naʻá ne ʻofa ʻi heʻene kau ʻapositoló ʻo aʻu ki he ngataʻangá. (Sione 13:1) Anga-fēfē? ʻAki hono akoʻi kia kinautolu ʻa e ngaahi lēsoni fakaʻofoʻofa, ʻo teuʻi ai kinautolu ki he meʻa naʻe tuʻu mei muʻá.

ʻI he faai atu ʻa e poó, naʻe tala ʻe Sīsū ki heʻene kau ākongá: “Mou loto toʻa pe; kuo u ikuna ʻa mamani ʻe au.” (Sione 16:33) Ko e hā naʻá ne ʻuhinga ki ai ʻi heʻene lea loto-toʻa ko iá? ʻI hano konga, ko e meʻá ni: ‘Ko e kovi ʻi he māmaní kuo ʻikai te ne ʻai au ke u loto-ʻita pe fakatupunga au ke u faisāuni. Kuo ʻikai te u fakaʻatā ʻa e māmaní ke ne kokoʻi au ki he fakafuo ʻaʻaná. ʻE lava ke toe fakamoʻoniʻi eni ʻi ho tuʻungá foki.’ Ko e meʻa naʻe akoʻi ʻe Sīsū ki heʻene kau ʻapositolo loto-tōnungá ʻi he ngaahi houa fakaʻosi ko ia ʻo ʻene moʻui fakaemāmaní ʻe tokoniʻi tatau ai kinautolu ke nau ikunaʻi ʻa e māmaní.

Ko hai te ne fakaʻikaiʻi ʻa e lahi ʻo e koví ʻi he māmani he ʻaho ní? ʻOku anga-fēfē ʻetau tali ki he ngaahi fakamaau taʻetotonú mo e ngaahi ngāue fakamālohi taʻeʻuhingá? ʻOku fakaʻitaʻi ʻe he ngaahi meʻá ni kitautolu pe fakataueleʻi kitautolu ke tau totongi ʻa e koví ʻaki e kovi? ʻOku anga-fēfē hono tākiekina kitautolu ʻe he hōloa fakaeʻulungaanga ʻokú ne takatakaiʻi kitautolú? ʻOku tānaki atu ki he meʻá ni ʻetau ngaahi taʻehaohaoa mo e ngaahi hehema angahalaʻia fakaetangatá, pea ʻoku ʻi ai ʻetau faitau ke fai ʻi he ongo malaʻe tau ʻe ua: ko e māmani fulikivanu ʻi tuʻá pea mo e ngaahi hehema kovi ʻi loto ʻia kitautolú. ʻE lava moʻoni ke tau ʻamanaki ke ikuna ʻo taʻekau ai ʻa e tokoni ʻa e ʻOtuá? ʻE lava fēfē ke tau maʻu ʻene tokoní? Ko e hā ʻa e ngaahi ʻulungaanga ʻoku totonu ke tau fakatupulekina ke tokoniʻi ai kitautolu ke fakafepakiʻi ʻa e ngaahi hehema fakakakanó? Ki ha ngaahi tali, tau hanga angé ki he meʻa naʻe akoʻi ʻe Sīsū ki heʻene kau ākonga ʻofeiná ʻi he ʻaho fakaʻosi ʻo ʻene moʻui ʻi māmaní.

Ikuʻi ʻa e Pōlepolé ʻAki ʻa e Anga-Fakatōkilaló

Ko e fakatātaá, fakakaukau angé ki he palopalema ʻo e pōlepolé, pe anga-hikí. Fekauʻaki mo ia, ʻoku pehē ʻe he Tohitapú: “Ko e fieʻeiki [“pōlepolé,” NW ] ko e fakamelomelo ʻo e haveʻi: pea ko e angahiki ko e fakamelomelo ʻo e hinga.” (Palovepi 16:18) ʻOku toe akonaki mai ʻa e ngaahi Konga Tohitapú kia kitautolu: “Kapau ʻoku ʻafungi ʻe ha taha ko ha meʻa ia, ʻosi ʻoku ʻikai ko ha momoʻi meʻa ia, ʻoku fakahalaʻi ia ʻe hono loto.” (Kaletia 6:3) ʻIo, ko e pōlepolé ʻoku fakatupu ʻauha mo fakatupu tākihalaʻi. ʻOku tau fakapotopoto ke fehiʻa ʻi he “lotohiki mo e fieʻeiki [“pōlepole,” NW ].”—Palovepi 8:13.

Naʻe ʻi ai ha palopalema ʻa e kau ʻapositolo ʻa Sīsuú ʻi he loto-hikí mo e pōlepolé? ʻI he taimi laka hake he tahá, naʻa nau fakakikihi ai ʻia kinautolu pe ko hai naʻe lahi angé. (Maake 9:​33-​37) ʻI he taimi ʻe taha, naʻe kole ai ʻa Sēmisi mo Sione ki ha ongo lakanga tuʻu-ki-muʻa ʻi he Puleʻangá. (Maake 10:​35-​45) Naʻe holi ʻa Sīsū ke tokoniʻi ʻene kau ākongá ke toʻo atu ʻa e hehema ko ení. Ko ia, lolotonga ʻa e kai ʻo e houa kai Pāsová, naʻá ne tuʻu hake, ʻokú ne noʻo ha tauveli, ʻo ne kamata ke fufulu ʻa e vaʻe ʻo ʻene kau ākongá. Naʻe ʻikai toe fakaveiveiua ʻa e lēsoni naʻá ne loto ke nau akó. “Kapau ā kuo u fufulu homou vaʻe, ʻa au ko e ʻEiki mo e Lapai,” ko e lea ia ʻa Sīsuú, “ʻoku totonu ke fai ʻekimoutolu foki, ʻo fefufuluʻaki homou vaʻe ʻomoutolu.” (Sione 13:14) Ko e pōlepolé kuo pau ke fetongi ia ʻe hono fehangahangaí—ko e anga-fakatōkilaló.

Ko ia ai, ko e pōlepolé, ʻoku ʻikai faingofua ke ikunaʻi ia. Ki mui ʻi he efiafi ko iá hili hono tukuange ʻe Sīsū ʻa Siutasi ʻIsikaliote, ʻa ia naʻe teu ke ne lavakiʻi iá, naʻe mapuna hake ai ha fakakikihi lahi ʻi he lotolotonga ʻo e kau ʻapositolo ʻe toko 11. Ko e hā ne nau hohaʻa ki aí? Pe ko hai ʻia kinautolu naʻe hā ngali lahi tahá! ʻI he ʻikai ngāhiʻi kinautolú, naʻe toe fakamamafaʻi anga-kātaki ai pē ʻe Sīsū ʻa e mahuʻinga ʻo e ngāue fakasevāniti ki he niʻihi kehé. Naʻá ne pehē: “Ko e ngaahi tuʻi ʻo e Senitaile ʻoku nau puleʻi kinautolu; pea ko kinautolu ʻoku faʻiteliha kiate kinautolu ʻoku lau ko e kau Ngāuemālo. Ka ʻe ʻikai te mou pehē kimoutolu: ka ko ia ʻoku maʻolunga ʻiate kimoutolu ke ne hoko ʻo hange ko e kimui; pea ko e takimuʻa ke hange ko e sevaniti.” ʻI he fakamanatu kia kinautolu ʻa ʻene faʻifaʻitakiʻangá, ʻokú ne tānaki mai: “Ko au ʻoku ou ʻi homou lotolotonga ʻo hange ko e sevaniti.”​—Luke 22:​24-​27.

Naʻe maʻu ʻe he kau ʻapositoló ʻa e poiní? ʻOku hā mahino naʻe pehē. ʻI ha ngaahi taʻu ki mui naʻe tohi ai ʻe he ʻapositolo ko Pitá: “Ke mou uouanga taha, ke mou tauʻaki kaungāmamahi, ke mou feʻofaʻaki fakalotu, ke mou manavaʻofa, ke mou angavaivai [“anga-fakatōkilalo,” NW ].” (1 Pita 3:8) He mātuʻaki mahuʻinga ē ke tau ikunaʻi foki ʻa e pōlepolé ʻaki ʻa e anga-fakatōkilaló! ʻOku tau fakapotopoto ke ʻoua ʻe nōfoʻi ʻi he tuli ki he ongoongó, mafaí, pe ko e tuʻungá. “ʻOku talitekeʻi ʻe he ʻOtua ʻa e ʻafungi, ” ko e fakamatala ia ʻa e Tohitapú, “ka ʻoku ne foaki kelesi ki he angavaivai [“anga-fakatōkilaló,” NW ].” (Semisi 4:6) ʻI he tuʻunga tatau, ʻoku pehē ʻe ha palōveepi fakapotopoto motuʻa: “Koe totogi oe agavaivai [“anga-fakatōkilaló,” NW ] moe manavahe kia Jihova koe koloa, moe ogoogolelei, moe moui.”​—Palovepi 22:​4, PM.

Ikunaʻi ʻa e Tāufehiʻá​—Anga-Fēfē?

Fakakaukau ki ha fasi-ʻa-anga ʻe taha ʻoku failahia ʻi he māmaní—ko e tāufehiʻá. Pe naʻe fakatupunga ʻe he manavaheé, taʻeʻiló, tomuʻa fehiʻá, fakafeʻātungiá, fakamaau taʻetotonú, mamahiʻi fonuá, lau fakafaʻahinga, pe lau fakamatakalí, ʻoku hā ngali ko e tāufehiʻá ʻoku ʻi he feituʻu kotoa pē. (2 Timote 3:​1-4) Naʻe toe mafolalahia ʻa e tāufehiʻá ʻi he ʻaho ʻo Sīsuú. Ko e kau tānaki tukuhaú ko e kau līʻekina fehiʻanekinaʻi ia ʻi he sōsaieti faka-Siú. Naʻe ʻikai ha feangainga ʻa e kau Siú mo e kau Samēliá. (Sione 4:9) Pea ko e kau Senitailé, pe ʻikai ko e Siú, naʻe toe fehiʻanekinaʻi kinautolu ʻe he kau Siú. Kae kehe, naʻe faifai atu pē ʻo talitali lelei ʻa e founga lotu naʻe fokotuʻu ʻe Sīsuú ʻe he kakai mei he puleʻanga kotoa pē. (Ngāue 10:​34, 35; Kaletia 3:​28) Ko ia, naʻá ne ʻoange ʻi he ʻofa ki heʻene kau ākongá ha meʻa foʻou.

Naʻe fakahā ʻe Sīsū: “Ko e tuʻutuʻuni foʻou ʻoku ou tuku kiate kimoutolu, Ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki.” Naʻe pau ke nau ako ke fakahāhā ʻa e ʻofa ko ení, he naʻá ne hoko atu: “Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:​34, 35) Naʻe foʻou ʻa e tuʻutuʻuní he naʻe mahulu atu ia ʻi he ʻofa “ki ho kaungaʻapi, ʻo hange ko hoʻo ʻofa kiate koe.” (Livitiko 19:18) ʻI he founga fē? Naʻe fakamahino ʻe Sīsū ʻa e meʻá, ʻi heʻene pehē: “Ko eni ia ʻa e tuʻutuʻuni aʻaku, Ke mou feʻofaʻaki, ʻo hangē ko e ʻofa ne u fai kiate kimoutolu. Talaʻehai ʻoku ai ha ʻofa ʻa ha taha ʻe lahi ʻi he ʻofa ko é, ke ne liʻaki ʻene moʻui koeʻuhi ko hono ngaahi kaumeʻa.” (Sione 15:​12, 13) Naʻe pau ke nau loto-lelei ke fefeilaulauʻiʻaki ʻenau moʻuí tonu ʻiate kinautolu pea ki he niʻihi kehé.

ʻE lava fēfē ke toʻo ʻe he faʻahinga taʻehaohaoa ʻo e tangatá ʻa e tāufehiʻa loto-koví mei heʻenau moʻuí? ʻAki hono fetongi ia ʻaki ʻa e ʻofa feilaulauʻi-kitá. Ko e laui miliona ʻo e faʻahinga tāutaha loto-moʻoni mei he ngaahi ʻātakai fakafaʻahinga, fakafonua, fakalotu, mo e fakapolitikalé ʻoku nau fai ʻa e meʻa tofu pē ko iá. ʻOku nau fakatahataha he taimí ni ki he kolo fāʻūtaha, ʻatā mei he fehiʻá—ko e fetokouaʻaki ʻi māmani lahi ʻa e Kau Fakamoʻoni ʻa Sihová. ʻOku nau fai ki he ngaahi lea fakamānavaʻi ʻa e ʻapositolo ko Sioné: “Ko ia ʻoku ne fehiʻa ki hono tokoua ko e tamate-tangata ia: pea ʻoku mou ʻilo, ʻilonga ha tamate-tangata, ʻoku ʻikai te ne maʻu ʻa e nofoʻi ia ʻe he moʻui taʻengata.” (1 Sione 3:15) Ko e kau Kalisitiane moʻoní ʻoku ʻikai ngata pē ʻi heʻenau fakafisi ke toʻo meʻatau ʻi ha taú ka ʻoku nau toe ngāue mālohi ke fakahāhā ʻa e feʻofaʻakí.

Ko ia ai, ko e hā ʻoku totonu ke hoko ko ʻetau vakai fakaefakakaukau ia ki he faʻahinga ʻoku ʻikai ko hotau ngaahi kaungātuí pea ʻoku nau fakahāhā nai ʻa e tāufehiʻa kia kitautolú? Lolotonga ʻene tautau ʻi ha ʻakaú, naʻe lotu ʻa Sīsū maʻa hono kau fakahoko tauteá, ʻo pehē: “Tamai, fakamolemole ʻa kinautolu; he ʻoku ʻikai te nau ʻilo ʻa e meʻa ʻoku nau fai.” (Luke 23:34) ʻI he taimi naʻe tolomakaʻi ai e ākonga ko Sitīvení ki he mate ʻe he kau tangata fonu ʻi he tāufehiʻá, ko ʻene ngaahi lea fakaʻosí eni: “ʻEiki, ʻoua naʻa lau ʻa e angahala ni kiate kinautolu.” (Ngāue 7:60) Ko Sīsū mo Sitīvení naʻá na fiemaʻu naʻa mo e lelei tahá ki he faʻahinga naʻa nau fehiʻa ʻia kinauá. Naʻe ʻikai ha tāufehiʻa ʻi hona lotó. “Ta ngaue ʻaonga ki he kakai kotoa pe,” ko e naʻinaʻi ia ʻa e Tohitapú kia kitautolú.—Kaletia 6:10.

‘Ko ha Tokotaha-Tokoni Taʻengata’

ʻI he hokohoko atu ʻa e fakataha mo ʻene kau ʻapositolo loto-tōnunga ʻe toko 11, naʻe fakahaaʻi ʻe Sīsū kia kinautolu kuo vavé ni ke ʻikai te ne kei ʻia kinautolu ʻi he kakanó. (Sione 14:28; 16:28) Ka naʻá ne fakapapauʻi kia kinautolu: “Te u kole ki he Tamaí pea te ne ʻoatu kia kimoutolu ha tokotaha-tokoni ʻe taha ke ne ʻia kimoutolu ʻo taʻengata.” (Sione 14:​16, NW ) Ko e tokotaha-tokoni naʻe talaʻofá ko e laumālie māʻoniʻoni ʻo e ʻOtuá. Te ne akoʻi kia kinautolu ʻa e ngaahi meʻa loloto ʻo e ngaahi Konga Tohitapú pea fakafoki ki heʻenau manatú ʻa e meʻa naʻe akoʻi ʻe Sīsū kia kinautolu lolotonga ʻene ngāue fakafaifekau ʻi māmaní.​—Sione 14:26.

ʻE lava fēfē ke tokoniʻi ʻe he laumālie māʻoniʻoní kitautolu he ʻaho ní? Sai, ko e Tohitapú ko e Folofola fakamānavaʻi ia ʻa e ʻOtuá. Ko e kau tangata naʻe ngāueʻaki ke nau leaʻaki ʻa e ngaahi kikité pea ke tohi ʻa e Tohitapú naʻe “ueʻi akinautolu e he Laumalie Maonioni.” (2 Pita 1:​20, 21, PM; 2 Timote 3:16) Ko ʻetau ako ʻa e ngaahi Konga Tohitapú pea ngāueʻaki ʻa e meʻa ʻoku tau akó ʻokú ne ʻomai kia kitautolu ʻa e ʻilo, poto, mahino, fakamaama, ʻiloʻilo, mo e malava fakaefakakaukau. ʻIkai ʻoku tau mateuteu lelei ange ai ke fehangahangai mo e ngaahi tenge ʻa e māmani fulikivanú?

Ko e laumālie māʻoniʻoní ko ha tokotaha-tokoni ia ʻi ha toe founga ʻe taha. Ko e laumālie māʻoniʻoni ʻo e ʻOtuá ko ha mafai mālohi ia ki he leleí, ʻo ne ʻai ke malava ʻa e faʻahinga ʻi he malumalu ʻo ʻene tākiekiná ke fakahāhā ʻa e ngaahi ʻulungaanga fakaʻotuá. “Ko e fua ʻo e laumālié ko e ʻofa, fiefia, melino, kātaki-fuoloa, anga-lelei, lelei, tui, anga-malū, mo e mapuleʻi-kita,” ko e lau ia ʻa e Tohitapú. ʻIkai ko e ngaahi ʻulungaanga tonu eni ʻoku tau fiemaʻu koeʻuhi ke ikunaʻi ai ʻa e ngaahi hehema fakakakano ki he ʻulungaanga taʻetāú, fetuʻusí, meheká, feʻiteʻitaní, mo e ngaahi meʻa peheé?—Kaletia 5:​19-23, NW.

ʻI he falala ki he laumālie ʻo e ʻOtuá, ʻe toe lava ai ke tau maʻu ʻa e “mālohi ʻoku mahulu atu ia ʻi he tuʻunga anga-mahení” ke fekuki ai mo ha faʻahinga faingataʻa pē pe ko ha mamahi. (2 Kolinito 4:​7, NW ) Lolotonga ʻe ʻikai nai ke toʻo ʻe he laumālie māʻoniʻoní ʻa e ngaahi ʻahiʻahí pe fakatauelé, ʻe lava moʻoni ke ne tokoniʻi kitautolu ke tau kātekina ia. (1 Kolinito 10:13) “ʻOku ou mafeia ʻa e meʻa kotoa pe ʻiate ia ʻoku ne fakakaukaua [“ʻomai ʻa e mālohí kiate” NW ] au,” ko e tohi ia ʻa e ʻapositolo ko Paulá. (Filipai 4:13) ʻOku ʻomai ʻe he ʻOtuá ʻa e mālohi peheé fakafou ʻi hono laumālie māʻoniʻoní. He houngaʻia ē ʻe lava ke hoko kia kitautolu ʻi he laumālie māʻoniʻoní! ʻOku talaʻofa ia ki he faʻahinga ʻoku nau ‘ʻofa kia Sīsū, mo tauhi ʻene ngaahi fekau ʻaʻaná.’—Sione 14:15.

“Nofo Maʻu ʻi he ʻOfa ko Ia Aʻaku”

ʻI hono pō fakaʻosi ʻi he tuʻunga ko ha tangatá, naʻe toe tala ʻe Sīsū ki heʻene kau ʻapositoló: “Ko ia ʻoku maʻu ʻeku ngaahi tuʻutuʻuni, mo tauhi ki ai, ko ia ia ʻoku ʻofa kiate au: pea ko ia ʻoku ʻofa kiate au ʻe ʻofeina ia ʻe heʻeku Tamai.” (Sione 14:21) “Nofo maʻu ʻi he ʻofa ko ia aʻaku,” ko ʻene ekinaki ia kia kinautolú. (Sione 15:9) ʻOku anga-fēfē hono tokoniʻi kitautolu ʻe he nofo maʻu ʻi he ʻofa ʻa e Tamaí pea mo e ʻAló ʻi heʻetau faitau mo e ngaahi hehema angahalaʻia ʻi loto ʻia kitautolú pea mo e māmani fulikivanu ʻi tuʻá?

Sai, ʻe lava ke tau puleʻi moʻoni ʻa e ngaahi hehema koví kapau ʻoku ʻikai haʻatau fakaueʻiloto mālohi ke fai pehē? Ko e hā ha toe fakaʻaiʻai lahi ange ʻoku ʻi ai ʻi he holi ke maʻu ha vahaʻangatae lelei mo Sihova ko e ʻOtuá pea mo hono ʻAló? Ko ʻĒnesi,a ko ha talavou ia naʻá ne fai ha faitau mālohi mo e founga moʻui taʻetaau naʻá ne moʻuiʻaki talu mei hono muʻaki ngaahi taʻu hongofulu tupú, ʻokú ne fakamatala: “Naʻá ku loto ke fakahōifuaʻi ʻa e ʻOtuá, pea naʻá ku ako mei he Tohitapú naʻe ʻikai te ne hōifua ʻi he founga naʻá ku moʻuiʻakí. Ko ia, naʻá ku fili ke hoko ko ha faʻahinga tokotaha kehe, ke nofo maʻu ʻi he ngaahi tataki ʻa e ʻOtuá. ʻI he ʻaho kotoa pē, naʻe pau ke u tauʻi ai ʻa e ngaahi fakakaukau ʻikai lelei, mo ʻuli naʻe kei ʻaukolo mai ki hoku ʻatamaí. Ka naʻá ku fakapapauʻi ke ikuna ʻi he faitaú ni, pea naʻá ku lotu taʻetuku ki he tokoni ʻa e ʻOtuá. Hili e taʻu ʻe ua ne ʻosi ai ʻa e tuʻunga kovi tahá, neongo ia ʻoku ou kei fakamālohituʻu pē au.”

ʻI he faitau mo e māmani ʻi tuʻá, fakakaukau ki he lotu fakaʻosi ʻa Sīsū naʻe fai ki muʻa ke ne mavahe mei he loki ʻi ʻolunga ʻi Selusalemá. Koeʻuhi ko ʻene kau ākongá, naʻá ne lotu ai ki heʻene Tamaí ʻo kole: “ʻOku ʻikai te u pehē, ke ke toʻo kinautolu mei māmani, ka ke ke taʻofi kinautolu mei he Fili. ʻOku ʻikai te nau ʻo māmāni, hange ko au, ʻoku ʻikai te u ʻo māmāni.” (Sione 17:​15, 16) He fakafiemālie moʻoni ē! ʻOku leʻohi ʻe Sihova ʻa e faʻahinga ʻokú ne ʻofa aí pea fakaivimālohiʻi kinautolu ʻi heʻenau hanganaki mavahe mei he māmaní.

“Tui Pikitai”

Ko hono tauhi ʻa e ngaahi tuʻutuʻuni ʻa Sīsuú ʻe lava moʻoni ke ne tokoniʻi kitautolu ke tau hoko ʻo ikuna ʻi heʻetau fetakai mo e māmani fulikivanú pea mo ʻetau ngaahi hehema angahalaʻiá. Kae kehe, neongo ʻa e mahuʻinga ko ia ʻo e ngaahi ikuna peheé, ʻe ʻikai lava ke nau taʻofi ʻa e māmaní pe ko e angahala tukufakaholó. Ka ʻoku ʻikai fiemaʻu ke siva ʻetau ʻamanakí.

“ʻOku fakaʻaʻau ke mole ʻa mamani mo ʻene holi aʻana,” ko e lau ia ʻa e Tohitapú, “ka ko ia ʻoku ne fai ʻa e finangalo ʻo e ʻOtua, ʻoku ne nofo maʻu ʻo taʻengata.” (1 Sione 2:17) Naʻe foaki ʻe Sīsū ʻene moʻuí ke fakahaofi mei he angahalá mo e maté ʻa ia “kotoa pe ʻoku tui pikitai kiate ia.” (Sione 3:​16) ʻI heʻetau tupulaki ʻi heʻetau ʻiloʻi ʻa e finangalo mo e ngaahi taumuʻa ʻa e ʻOtuá, tau tokanga leva ki he naʻinaʻi ʻa Sīsuú: “Tui pikitai ki he ʻOtua, tui pikitai foki kiate au.”—Sione 14:1.

[Fakamatala ʻi lalo]

[Fakatātā ʻi he peesi 6, 7]

“Nofo maʻu ʻi he ʻofa ko ia aʻaku,” ko e ekinaki ia ʻa Sīsū ki heʻene kau ʻapositoló

[Fakatātā ʻi he peesi 7]

Ko e tauʻatāina mei he angahalá mo hono ngaahi nunuʻá kuo vavé ni ke hoko moʻoni ia