ʻOku tuʻu ʻi fē ʻa e Palataisi Fakatohitapú? — LAIPELI Taua Le‘o ‘I HE ‘INITANETÍ

ʻEke Heʻetau Kau Lautohí . . .

ʻOku tuʻu ʻi fē ʻa e Palataisi Fakatohitapú?

▪ Naʻe talaʻofa ʻe Sīsū ki ha tangata ne tauʻaki ke mate ʻa ia naʻá ne fakahaaʻi loto-toʻa ʻa e tui kiate ia: “Te ke ʻi Palataisi mo au.” (Luke 23:43) ʻE ʻi fē ʻa e tangatá? ʻE tuʻu ʻa e Palataisí ʻi hēvani, ʻi māmani, pe ʻi ha feituʻu he vahaʻá ʻa ia ʻoku tatali ai ʻa e faʻahinga ʻo e tangatá ki he fakamāú?

Ko ʻetau ongo kuí naʻá na nofo ʻi ha taimi ʻi Palataisi. ʻOku tala mai ʻe he Tohi Tapú: “Naʻe tō ʻe Sihova Elohimi ha ngouetapu ʻi Iteni, ʻi hahake; pea ne tuku ai ʻa e tangata kuo ne ngaohi. . . . Pea naʻe ʻave ʻa e tangata ʻe Sihova Elohimi, ʻo ne tuku ia ʻi he ngouetapu ʻo Iteni ke ngoueʻi mo tauhi ia.” (Senesi 2:8, 15) ʻI he taimi naʻe liliu ai ʻa e ngaahi lea ko iá ki he faka-Kalisí, ko e foʻi lea “ngouetapu” naʻe liliu ia ko e pa·raʹdei·sos, ʻa ia naʻe haʻu mei ai ʻa e foʻi lea faka-Tonga ko e “palataisí.”

Hangē ko hano fakalahi ʻe ha ongo meʻa hona falé ʻi he taimi ʻoku tokolahi ange ai ʻena fānaú, ʻoku pehē pē ʻa e ʻamanekina ke fakalahi ʻe heʻetau ʻuluaki ongo mātuʻá ʻa e Palataisí ke fakalaka atu ia ʻi he ngaahi ngatangataʻanga ʻo ʻĪtení ʻi he tupu ʻa e fāmili fakaetangatá. Naʻe tala ʻe he ʻOtuá kia kinaua: “Fakafonu ʻa mamani, pea ikuna ia.”—Senesi 1:28.

Ko e taumuʻa leva ʻa hotau Tokotaha-Fakatupú ki he tangatá ke nau moʻui pea maʻu fānau ʻi Palataisi ʻi heni ʻi he māmaní. Te nau moʻui taʻengata ʻi ha ngoue fakaemāmani ʻo ʻikai fiemaʻu ki ai ha ngaahi faʻitoka. Ko e māmaní naʻe pau ke hoko ia ko e ʻapi tuʻuloa maʻá e faʻahinga kotoa ʻo e tangatá. ʻOku ʻikai ha ofo ʻi hono ʻomai kiate kitautolu ʻe he ngaahi meʻa fakanatula ʻo hotau palanité ʻa e fiefia lahi! Naʻe fakatupu kitautolu ke tau nofo ʻi ha māmani fakaʻofoʻofa.

Kuo liliu ʻa e taumuʻa ʻa e ʻOtuá? ʻIkai. He ʻoku fakapapauʻi mai ʻe Sihova: “ʻE pehe pe mo ʻeku lea ʻoku ʻalu atu mei hoku ngutu: ʻe ʻikai foki ngeʻesi mai, kaeʻoua ke ne fai ʻa e meʻa ne u loto ki ai.” (Aisea 55:11) Laka hake he taʻu ʻe 3,000 hili hono fakatupu ʻo e tangatá, naʻe fakamatala ai ʻa e Tohi Tapú fekauʻaki mo e tokotaha “naʻa ne faʻu ʻa e fonua mo ngaohi ia” naʻe “ʻikai te ne fakatupu ia ke maomaonganoa,” ka naʻá ne “faʻu ia ke nofoʻanga.” (Aisea 45:18) Kuo ʻikai liliu ʻa e finangalo ʻo e ʻOtuá. Ko e māmaní ʻe kei hoko pē ko ha palataisi.

ʻOku mālié, ko e lahi ʻo e ngaahi kupu ʻi he Tohi Tapú fekauʻaki mo e Palataisí ko e ngaahi fakamatala pē ia ki he moʻui ʻi he māmaní. Ko e fakatātaá, ʻoku pehē ʻi ha kikite ʻa ʻAisea: “Te nau langa fale, ʻo nofo ai; pea te nau to ngouevaine, pea kai hono fua.” (Aisea 65:21) ʻOku langa ʻa e ngaahi falé pea tō ʻa e ngaahi ngoue kālepí ʻi fē? ʻOku kai ʻi fē ʻa e fuaʻiʻakaú? ʻI he māmaní. ʻOku fakahaaʻi mahino ʻe he Palovepi 2:21: “Ko e kau angatonu te nau nofoʻia ʻa e fonua.”

Naʻe toe lea foki ʻa Sīsū fekauʻaki mo ha palataisi fakaemāmani. Ko e moʻoni, naʻá ne toe talaʻofa ha palataisi fakahēvani, ka ko e talaʻofa ko iá ki ha tokosiʻi pē kuo fili. (Luke 12:32) Hili ʻa e maté, ko e faʻahinga ko ení ʻoku nau toetuʻu ki he Palataisi fakahēvaní pea kau fakataha mo Kalaisi ke pule mai ki he Palataisi fakaemāmaní. (Fakahā 5:10; 14:1-3) Ko e kau kaungāpule fakahēvani ko ení te nau fakapapauʻi ko e Palataisi ʻi he māmaní ʻe puleʻi mo tokangaʻi lelei ia fakatatau ki he ngaahi tuʻunga ʻa e ʻOtuá.

Naʻe ʻiloʻi ʻe Sīsū ko e finangalo eni ʻo e ʻOtuá ki he māmaní. He ko ē, naʻá ne ʻi hēvani fakataha mo ʻene Tamaí ʻi he taimi naʻe ngaohi ai ʻa e ngoue ʻo ʻĪtení. Ko e moʻui ʻi ha palataisi fakaemāmani ʻi he kahaʻú ʻoku ʻatā ia ki he kakai kotoa pē ʻoku nau ngāueʻi ʻa e tuí ʻi he ʻaho ní. (Sione 3:16) Ki he faʻahinga ko iá, ʻoku talaʻofa ʻe Sīsū: ‘Te mou ʻi Palataisi mo au.’—Luke 23:43.

[Picture Credit Line ʻi he peesi 13]