Naʻá Ke ʻIloʻi?

Naʻe anga-fēfē hono teuteuʻi ʻe he kau Siu ʻi he ʻuluaki senitulí ʻa e maté ki hono tanú?

Ko e kau Siú naʻa nau tanu vave ʻenau kau maté, ko e anga-mahení ʻi he ʻaho tatau. Naʻe ʻi ai ʻa e ʻuhinga ʻe ua ki he ngāue vave peheé. ʻUluakí, ko e ngaahi sinó ʻoku ʻauʻaunga vave ʻi he ʻea vela ʻo e Hahake Lotolotó. Uá, fakatatau ki he fakakaukau ʻo e taimi ko iá, ko hono tuku ha sino taʻetanu ʻi ha laui ʻaho ʻoku fakahāhā ai ʻa e taʻefakaʻapaʻapa ki he tokotaha maté mo hono fāmilí.

Ko e ngaahi Kōsipelí mo e tohi Ngāué ʻoku lēkooti ai ha putu ʻe fā naʻe tanu pē ʻi he ʻaho ʻo e maté. (Mātiu 27:57-60; Ngāue 5:5-10; 7:60–8:2) ʻI he laui senituli ki muʻa, ko e uaifi ʻofaʻanga ʻo Sēkope ko Lesielí naʻe mate lolotonga ʻa e fononga ʻa Sēkope mo hono fāmilí. ʻI he ʻikai ke fakafoki hono sinó ki honau malaʻe fakafāmilí, naʻe tanu ia ʻe Sēkope ʻi ha faʻitoka “ʻi he hala ki . . . Petelihema.”—Sēnesi 35:19, 20, 27-29.

Ko e ngaahi fakamatala Fakatohitapu ki he fokotuʻutuʻu ki he putú ʻoku fakahaaʻi ai ko e kau Siú naʻa nau fai ʻa e tokanga lahi ki hono teuteuʻi ʻa e sinó ki muʻa ke tanú. Ko e fāmilí mo e ngaahi kaungāmeʻá naʻa nau tatafi ʻa e sino ʻo e pekiá, tākai ʻaki ʻa e sipaisi mo e lolo lelei pea kofuʻaki ha tupenu. (Sione 19:39, 40; Ngāue 9:36-41) Ko e ngaahi kaungāʻapí mo e niʻihi kehé naʻe lava ke nau haʻu ke fakahāhā ʻenau kaungāmamahi mo fakanonga ki he fāmilí.—Maʻake 5:38, 39.

Naʻe telio ʻa Sīsū ʻi he founga anga-maheni ʻa e kau Siú?

Ko e tokolahi ʻa e ngaahi fāmili Siu naʻa nau tanu ʻenau kau maté ʻi he ngaahi ʻana mo e ngaahi fonualoto naʻe tongi ʻi he ngaahi maka molū ʻa ia naʻe anga-maheni ʻi he feituʻu lahi ʻi ʻIsileli. ʻI hono fai iá, naʻa nau muimui ʻi he sīpinga naʻe fokotuʻu ʻe he kau pēteliaké. Ko ʻĒpalahame, Sela, ʻAisake, Sēkope mo e niʻihi naʻe tanu ʻi he ʻana ʻi Makipila ofi ki Hepeloní.—Sēnesi 23:19; 25:8, 9; 49:29-31; 50:13.

Naʻe telio ʻa Sīsū ʻi ha fonualoto ʻa ia naʻe foa ʻi ha maka. (Maʻake 15:46) Ko ha malaʻe pehē naʻe angamaheniʻaki ʻa e ʻi ai ha hūʻanga fāsiʻi. ʻI lotó, ʻoku ʻi ai ʻa e fanga kiʻi ʻatā pe feituʻu hiliʻanga meʻa naʻe tongi ʻi he maká ʻa ia ʻe fakatokoto ai ʻa e sino ʻo e ngaahi mēmipa ʻo e fāmilí kuo maté. Hili ʻa e ʻauʻaunga ʻa e sinó, ko e ngaahi hui mōmoá naʻe tānaki pea faʻo ki ha puha maka naʻe ui ko e tauhiʻanga-hui ʻa ia ko e anga fakafonua ia ʻi he taimi ʻo Sīsuú. ʻI he foungá ni, ʻe lava ʻe he fāmilí ke ʻai ha tafaʻaki ke ʻatā ʻi he fonualotó ki ha ngaahi putu ʻi he kahaʻú.

Ko e mālōlō he Sāpaté naʻe fiemaʻu ʻe he Lao ʻa Mōsesé naʻe ʻikai lava ai ʻa e kau Siú ke tokangaʻi ʻa e ngaahi meʻa ʻo e putú ʻi he ʻaho ko iá. Koeʻuhi naʻe pekia ʻa Sīsū ʻi he houa nai ʻe tolu ki muʻa ke kamata ʻa e Sāpaté, ko Siosefa ʻo ʻAlemateá mo e niʻihi naʻa nau tanu ia ʻo ʻikai fakakakato ʻa e teuteuʻi hono sinó ki he telió. (Luke 23:50-56) ʻI he ʻuhinga ko iá, ko e niʻihi ʻo e ngaahi kaumeʻa ʻo Sīsuú naʻa nau fononga ki hono fonualotó ʻi he hili ʻa e Sāpaté, ʻo ʻamanaki ke fakakakato ʻa e ngāué.—Maʻake 16:1; Luke 24:1.

[Fakatātā ʻi he peesi 8]

[Fakatātā ʻi he peesi 8]