Foaki ʻOku Fakahōifua ki he ʻOtuá

NAʻE maʻu ʻe Sīsū mo ʻene kau ākongá ha houa maʻu meʻatokoni ifo ʻi Pētani fakataha mo ha ngaahi kaungāmeʻa ofi, kau ai ʻa Mele, Māʻata, mo Lāsalosi naʻe toki fokotuʻu haké. ʻI hono toʻo ʻe Mele ha pāuni lolo mahuʻinga ʻo tākaiʻaki ʻa e vaʻe ʻo Sīsuú, naʻe hoko ai ʻo ʻita ʻa Siutasi ʻIsikaliote peá ne pehē. “Ko e ha naʻe ʻikai fakatau ai ʻa e lolo ni, ʻo maʻu ai ha tenali ʻe tolungeau [tatau mo ha vāhenga taʻu nai ʻe taha], ʻo foaki ki he masiva?” ko ʻene lea mālohí ia. Naʻe ʻohake vave ʻe he niʻihi kehé ʻa e ngaahi lāunga meimei tatau.—Sione 12:​1-6; Maake 14:​3-5.

Kae kehe, naʻe tali ʻe Sīsū: “Tuku ai pē ʻa e fefine: . . . He ko e meʻa ki he masiva te mou feangai ai pē mo kinautolu, pea ka mou ka loto ke fai ha ʻofa ki ai pea faingofua: ka ʻe ʻikai te mou feangai ai pē mo au.” (Maake 14:​6-9) Naʻe akoʻi ʻe he kau taki lotu Siú ko e tokoni ʻofá naʻe ʻikai ngata pē ʻi heʻene lelei fakaeʻulungāngá ka ʻoku toe lava ke fakamolemoleʻi ai ʻa e ngaahi angahalá. Ko Sīsū, ʻi he tafaʻaki ʻe tahá, naʻá ne ʻai ke mahino ko e foaki ʻoku fakahōifua ki he ʻOtuá ʻoku ʻikai fakangatangata pē ia ki hono fai ha ngaahi tokoni meʻaʻofa ki he masivá.

Ko ha vakai nounou ki he founga ʻo e foakí naʻe fai ʻi he muʻaki fakatahaʻanga Kalisitiané ʻe fakaeʻa ai ʻa e niʻihi ʻo e ngaahi founga ʻaonga ʻa ia ʻe lava ke tau fakahaaʻi ai ʻetau tokangá pea fakahōifuaʻi ai ʻa e ʻOtuá ʻi heʻetau foakí. Te ne toe fakahaaʻi ha faʻahinga makehe ʻo e foakí ʻoku lelei tahá.

“Fai ha Ngaahi Foaki ʻOfa”

ʻI he ngaahi taimi ʻe niʻihi naʻe fakalototoʻaʻi ai ʻe Sīsū ʻa ʻene kau ākongá ke nau “fai ʻa e ngaahi foaki ʻofa,” pe hangē ko e fakalea ʻa e kupuʻi leá ʻe he ngaahi liliu kehé, ke “foaki ʻi he tokoni ʻofá” pe “foaki ki he kautaha tokoni ʻofá.” (Luke 12:33; New English Bible; A Translation in the Language of the People, ʻa Charles B. Williams) Kae kehe, naʻe fakatokanga ʻa Sīsū fekauʻaki mo e ngaahi fai fakahāhā ʻa ia naʻe fakataumuʻa pē ke fakalāngilangiʻi ai ʻa e tokotaha foakí kae ʻikai ko e ʻOtuá. “ʻO ka ke ka fai ha foaki,” ko ʻene leá ia, “ʻoua naʻa ke ifi ha meʻalea ke fakaha koe, ʻo hange ko e fai ʻe he kau malualoi ʻi he falelotu mo e hala, koeʻuhi ke nau maʻu ʻa e fakamālō ʻa e kakai.” (Mātiu 6:​1-4) ʻI hono ngāueʻaki ʻa e ekinaki ko ení, naʻe fakaʻehiʻehi ʻa e muʻaki kau Kalisitiané mei he ngaahi fai fakahāhā ʻa e kau taki fakangalilotu ʻi honau ʻahó pea fili ke tokoniʻi ʻa e faʻahinga masivá ʻaki hono fai ʻa e ngaahi ngāue fakafoʻituitui pe ko hono foaki ʻa e ngaahi meʻaʻofa fakafoʻituitui.

Ko e fakatātaá, ʻi he Luke 8:​1-3, ʻoku tala mai ai ko Mele Makitaline, Sōana, Sūsana, mo e niʻihi kehe naʻa nau ngāueʻaki “ʻenau koloa” ʻi he tokoni fakalongolongo kia Sīsū mo ʻene kau ʻapositoló. Neongo naʻe ʻikai masiva ʻangoʻango ʻa e kau tangatá ni, ne nau liʻaki ʻenau ngaahi maʻuʻanga moʻuí ke fakahangataha ʻenau ngaahi feingá ki he ngāue fakafaifekaú ʻataʻatā. (Mātiu 4:​18-​22; Luke 5:​27, 28) ʻI hono tokoniʻi kinautolu ke fakakakato ʻenau ngāue kuo ʻomai ʻe he ʻOtuá, ko e kau fefiné ni, ko hono moʻoní, naʻa nau fakalāngilangiʻi ʻa e ʻOtuá. Pea naʻe fakahaaʻi ʻe he ʻOtuá ʻene hōifuá ʻaki hono fakatolonga mai ha lēkooti ʻo ʻenau nima-homo faimēsí ʻi he Tohitapú ke lau ʻe he toʻutangata kotoa ʻi he kahaʻú.​—Palovepi 19:17; Hepelu 6:​10.

Ko Toakase ko ha fefine anga-lelei ia ʻe taha ʻa ia naʻá ne “mohu ʻi he ngaahi ngaue lelei, mo e fai ʻofa.” Naʻá ne ngaohi ʻa e vala maʻá e kau uitou masiva ʻi hono kolo tuʻu matātahi ko Siopá. Pe naʻá ne totongi ʻe ia ʻa e tupenú kotoa, pe tuitui taʻetotongi pē ʻa e valá, ʻoku ʻikai te tau ʻiloʻi. Neongo ia, ko ʻene ngāue leleí ne ʻofaʻi ai ia ʻe he faʻahinga naʻe lava ke ne tokoniʻí, pea pehē ki he ʻOtuá, ʻa ia naʻá ne tāpuakiʻi mohu meesi ʻa ʻene anga-leleí.—Ngāue 9:​36-41.

Ko e Fakaueʻiloto Totonú ʻOku Mātuʻaki Mahuʻinga

Ko e hā naʻá ne ueʻi ʻa e faʻahinga tāutahá ni ke nau foakí? Naʻe mahulu hake ia ʻi ha ongoʻi manavaʻofa pē naʻe langaʻi ʻe ha fiemaʻu fakaeongo ki ha tokoni. Naʻa nau ongoʻi ko ha fatongia totonu fakafoʻituitui ke fai ʻa e meʻa naʻa nau malavá ʻi he ʻaho taki taha ke tokoniʻi ʻa e faʻahinga ʻoku nau hokosia ʻa e masivá, faingataʻaʻiá, puké, pe ko e ngaahi faingataʻa kehé. (Palovepi 3:​27, 28; Semisi 2:​15, 16) Ko e faʻahinga foaki eni ʻoku fakahōifuaʻi ai ʻa e ʻOtuá. ʻOku ueʻi tefito ia ʻe ha ʻofa loloto ki he ʻOtuá mo ha holi ke faʻifaʻitaki ki hono ʻulungaanga mohu meesi mo nima-homó.​—Mātiu 5:​44, 45; Semisi 1:​17.

Naʻe fakamamafaʻi ʻe he ʻapositolo ko Sioné ʻa e tafaʻaki mātuʻaki mahuʻinga ko eni ʻo e foakí ʻi heʻene ʻeke: “ʻIlonga ʻa ia ʻoku ne maʻu ʻa e meʻa ʻo mamani, mo ne sio ki hono tokoua ʻoku ne masiva, ka ne taʻofi hono fatu meiate ia, pea ʻoku nofo fēfē ʻi he toko taha ko ia ʻa e ʻofa ki he ʻOtua?” (1 Sione 3:17) Ko e talí ʻoku hā mahino. Ko e ʻofa ki he ʻOtuá ʻokú ne ueʻi ʻa e kakaí ke nau fiefoakí. ʻOku houngaʻia mo fakapaleʻi ʻe he ʻOtuá ʻa e faʻahinga, ʻa ia ʻoku nau hangē ko iá, ʻo fakahāhā ha laumālie nima-homó. (Palovepi 22:9; 2 Kolinito 9:​6-​11) ʻOku tau sio ki he faʻahinga nima-homo ko iá ʻi he ʻahó ni? Vakai angé ki he meʻa naʻe toki hoko ʻi ha fakatahaʻanga ʻa e Kau Fakamoʻoni ʻa Sihová.

Ko ha ʻapi ʻo ha fefine Kalisitiane taʻumotuʻa naʻe fiemaʻu lahi ke monomono. Naʻá ne nofo toko taha pea naʻe ʻikai hano fāmili ke tokoniʻi ia. ʻI he faai mai ʻa e ngaahi taʻú, naʻe fakaʻatā maʻu pē ʻa hono ʻapí ke fai ai ʻa e ngaahi fakataha faka-Kalisitiané, pea naʻá ne faʻa feʻinasiʻaki ʻi ha meʻakai mo ha taha pē ʻa ia naʻá ne tali ʻene fakaafé. (Ngāue 16:​14, 15, 40) ʻI he sio ki heʻene faingataʻaʻiá, naʻe fakatahataha ai ʻa e ngaahi mēmipa ʻo e fakatahaʻangá ke tokoni. Naʻe foaki ʻe he niʻihi ʻa e paʻanga, naʻe ngāue tokoni ʻa e niʻihi. ʻI ha ngaahi fakaʻosinga uike siʻi, naʻe fokotuʻu ai ʻe he kau ngāue polé ha ʻato foʻou, fokotuʻu ha fale kaukau foʻou, palasitaaʻi pea vali ʻa e faliki ʻo laló kotoa, pea fokotuʻu ha ʻū kōpate foʻou ʻi he peitó. Ko ʻenau foakí naʻe ʻikai ngata pē ʻi heʻene feau ʻa e ngaahi fiemaʻu ʻa e fefiné ka naʻá ne toe tohoakiʻi ʻa e fakatahaʻangá ke nau vāofi ange pea ʻai ke maongo ki he ngaahi kaungāʻapí ʻi he tuʻunga ko ha faʻifaʻitakiʻanga ʻo e foaki faka-Kalisitiane moʻoní.

ʻOku lahi ʻaupito ʻa e ngaahi founga te tau lava fakafoʻituitui ai ke tokoniʻi ʻa e niʻihi kehé. ʻE lava ke tau fakamoleki ha taimi mo ha tamasiʻi pe ko ha taʻahine tamai-mate? ʻE lava ke tau fai ha fakatau pe tuitui maʻa ha uitou taʻumotuʻa ʻoku tau ʻiloʻi? ʻE lava ke tau feimeʻatokoni pe tokoni ki hono totongi ha fakamole maʻa ha taha ʻoku siʻi ʻene paʻangá? ʻOku ʻikai fiemaʻu ia ke tau tuʻumālie ka tau toki tokoni. Naʻe tohi ʻe he ʻapositolo ko Paulá: “Kabau oku ai ae loto lelei ki ai, e lau ia, o fakatatau ki he mea oku maʻu e he tagata, ka e ikai fakatatau mo ia oku ikai te ne maʻu.” (2 Kolinito 8:​12, PM) Ko ia ai, ko e foaki fakahangatonu fakafoʻituitui peheé ʻa e faʻahinga foaki pē ʻe tāpuakiʻi ʻe he ʻOtuá? ʻIkai.

Fēfē ʻa e Tokoni ʻOku Fokotuʻutuʻú?

ʻI he taimi ʻe niʻihi ʻoku ʻikai feʻunga ʻa e ngaahi feinga fakafoʻituituí. Ko hono moʻoní, naʻe tauhi ʻe Sīsū mo ʻene kau ʻapositoló ha tokoni anga-maheni ki he masivá, pea naʻa nau tali ʻa e ngaahi tokoni mei he kakai mahuʻingaʻia naʻa nau fetaulaki ʻi heʻenau ngāué. (Sione 12:​6; 13:29) ʻI he founga tatau, naʻe fai ʻe he ngaahi fakatahaʻanga ʻi he ʻuluaki senitulí ʻa e ngaahi tātānaki ʻi he taimi naʻe malanga hake ai ʻa e fiemaʻú pea fokotuʻutuʻu ʻa e tokoní ʻi he tuʻunga lalahi ange.​—Ngāue 2:​44, 45; 6:​1-3; 1 Timote 5:​9, 10.

Naʻe malanga hake ʻa e tuʻunga pehē ʻe taha ʻi he 55 T.S. nai. Ko e ngaahi fakatahaʻanga ʻi Siuteá naʻa nau tō ki he masivá, mahalo ko e tupu nai mei he honge lahi ʻa ia naʻe toki ʻosí. (Ngāue 11:​27-​30) Ko e ʻapositolo ko Paulá, naʻá ne tokanga maʻu pē fekauʻaki mo e masivá, ʻo ne kole ʻa e tokoni ʻa e ngaahi fakatahaʻanga mamaʻo hangē ko Masitōniá. Naʻá ne fokotuʻutuʻu fakafoʻituitui ha tātānaki pea ngāueʻaki ʻa e kau tangata taau ke nau ʻave ia. (1 Kolinito 16:​1-4; Kaletia 2:​10) Naʻe ʻikai totongi ia pe ko e niʻihi kehe naʻe kau ki aí ʻi heʻenau ngāué.​—2 Kolinito 8:​20, 21.

Ko e Kau Fakamoʻoni ʻa Sihova ʻi he ʻaho ní ʻoku nau toe mateuteu vave ke tokoni ʻi he taimi ʻoku hoko ai ʻa e fakatamakí. Hangē ko ení, lolotonga ʻa e faʻahitaʻu māfana ʻo e 2001, naʻe fakatupunga ai ʻe ha ngaahi afā ʻuha lōvai ʻa e tāfea lahi ʻi Houston, Tekisisi, U.S.A. ʻI hono fakakātoá, ko e ʻapi ʻe 723 ʻo e Kau Fakamoʻoní naʻe maumauʻi ʻi ha tuʻunga, ko e lahi aí naʻe mātuʻaki maumau lahi. Ko ha kōmiti tokoni fakatamaki naʻe faʻuʻaki ʻa e kau mātuʻa Kalisitiane tāú ne fokotuʻu leva ia ke ne fakafuofuaʻi ʻa e ngaahi fiemaʻu tāutahá pea ke ne vahevahe ʻa e paʻanga tokoní ke tokoniʻiʻaki ʻa e Kau Fakamoʻoni fakalotofonuá ke nau fekuki mo e tuʻungá mo monomono honau ngaahi ʻapí. Ko e kau ngāue pole loto-lelei mei he ngaahi fakatahaʻanga ofi maí naʻa nau fai kotoa ʻa e ngāué. Ko e Fakamoʻoni ʻe taha naʻá ne mātuʻaki houngaʻia ʻi he tokoní he ʻi he taimi naʻá ne maʻu ai ʻa e totongi mei heʻene kautaha maluʻí ke totongiʻaki ʻa e ngaahi monomono ʻo hono falé, naʻá ne meʻaʻofaʻaki he taimi pē ko iá ʻa e paʻangá ki he paʻanga tokoní koeʻuhi ke lava ʻo tokoniʻi ʻaki ia ʻa e niʻihi kehe naʻe faingataʻaʻiá.

Ko ia ai, ʻi he fekauʻaki mo e tokoni ʻofa ʻoku fokotuʻutuʻú, ʻoku fiemaʻu ke tau tokanga ʻi heʻetau fakafuofua ʻa e ngaahi kole lahi ʻoku fai maí. Ko e ngaahi kautaha tokoni ʻe niʻihi ʻoku lahi ai ʻa e paʻanga ki hono fakalele ʻo e kau ngāue tokoní, pe ngaahi fakamole ki he tuʻuaki ʻo e feinga paʻangá, ʻo toe pē ai ha konga siʻisiʻi ʻo e paʻanga naʻe tānakí ki he taumuʻa naʻe fakahangahanga ki aí. ʻOku pehē ʻe he Palovepi 14:15: “Ko e hehemangofua ʻoku ne tui ki he lea kotoa; ka ko e fakapotopoto ʻoku ne fakakaukau ʻene laka.” Ko ia, ko e ʻalunga ia ʻo e potó ke sivisiviʻi lelei ʻa e ngaahi moʻoniʻi meʻá.

Foaki ʻOku Lelei Tahá

ʻOku ʻi ai ha faʻahinga foaki ʻa ia ʻoku toe mahuʻinga ange ia ʻi he tokoni ʻofá. Naʻe lave ʻa Sīsū ki he meʻá ni ʻi he taimi naʻe ʻeke ai ʻe ha talavou pule koloaʻia ʻa e meʻa naʻe pau ke ne fai ke maʻu ai ʻa e moʻui taʻengatá. Naʻe tala ange ʻe Sīsū kiate ia: “Alu o fakatau aia oku aau, mo foaki ki he majiva, bea te ke maʻu ai ae koloa i he lagi: bea ke haʻu, o muimui iate au.” (Mātiu 19:​16-22, PM) Fakatokangaʻi naʻe ʻikai pehē pē ʻe Sīsū, ‘Foaki ki he majivá bea te ke maʻu ai ae moʻuí.’ ʻI hono kehé, naʻá ne tānaki atu ki ai, “Haʻu, o muimui iate au.” ʻI hono toe fakaleá, neongo ʻoku fakaongoongoleleiʻi mo ʻaonga ʻa e ngaahi ngāue tokoní, ko e tuʻunga ākonga faka-Kalisitiané ʻoku kau ki ai ʻa e meʻa lahi ange.

Ko e tokanga tefito ʻa Sīsuú naʻe ʻi hono tokoniʻi fakalaumālie ʻo e niʻihi kehé. Taimi nounou ki muʻa ʻi heʻene pekiá, naʻá ne tala kia Pailato: “Koia naaku fanauʻi, bea koia naaku haʻu ai ki mamani, koeuhi keu fakamooni ki he mooni.” (Sione 18:​37, PM) Lolotonga ʻene takimuʻa ʻi hono tokoniʻi ʻa e masivá, fakamoʻui ʻa e mahakí, mo fafangaʻi ʻa e fiekaiá, naʻe akoʻi tefito ʻe Sīsū ʻa ʻene kau ākongá ke nau malanga. (Mātiu 10:​7, 8) Ko hono moʻoní, naʻe ʻi he lotolotonga ʻo ʻene ngaahi fakahinohino fakaʻosi kia kinautolú ʻa e fekau: ‘Ko ia ke mou ō, ʻo ngaohi ʻa e ngāhi kakai kotoa pe ko e kau ākonga.’—Mātiu 28:​19, 20.

Ko e moʻoni, ʻe ʻikai solova ʻe he malangá ʻa e palopalema kotoa ʻi he māmaní. Neongo ia, ko hono vahevahe atu ʻa e ongoongo lelei ʻo e Puleʻanga ʻo e ʻOtuá ki he faʻahinga kakai kotoa pē, ʻoku fakalāngilangiʻi ai ʻa e ʻOtuá koeʻuhi ko e malangá ʻoku fakahoko ai ʻa e finangalo ʻo e ʻOtuá pea fakaʻatā ai ʻa e hala ki he ngaahi ʻaonga taʻengata maʻá e faʻahinga ʻoku nau tali ʻa e pōpoaki fakaʻotuá. (Sione 17:3; 1 Timote 2:​3, 4) Fēfē ke ke fanongo ki he meʻa ʻe leaʻaki ʻe he Kau Fakamoʻoni ʻa Sihová ʻi heʻenau ʻaʻahi hono hoko atú? ʻOku nau haʻu mo kinautolu ha meʻaʻofa fakalaumālie. Pea ʻoku nau ʻiloʻi ko e founga lelei taha eni ʻe lava ke nau fai ai ha foaki kiate koé.

[Fakatātā ʻi he peesi 6]

ʻOku lahi ʻa e ngaahi founga ke fakahaaʻi ai ʻoku tau tokangá

[Fakatātā ʻi he peesi 7]

Ko ʻetau malangaʻi ʻa e ongoongo leleí ʻoku fakahōifuaʻi ai ʻa e ʻOtuá pea fakaʻatā ai ʻa e hala ki he ngaahi ʻaonga taʻengata